Aleanca për Ardhmërinë e Kosovës (AAK) qysh para nisjes së fushatës zgjedhore ka nisur të proklamojë idenë se me ardhjen e saj në pushtet, Kosova do të anëtarësohet në NATO.
Në frymën e kësaj edhe fushatën zgjedhore të cilën po e zhvillon në koalicion me Nismën Socialdemokrate, Konservatorët, Forumin Intelektual E-30 dhe Listën Ideal po e bën me sloganin “Direkt në NATO” .
Kandidati për deputet nga radhët e AAK-së, Besnik Krasniqi është zotuar në “Debat Përnime”, më 17.01.2025, se një nga punët e para që do të bëjnë nëse e fitojnë besimin e qytetarëve për të qeverisur vendin, do të jetë nënshkrimi i Planit për anëtarësim në NATO.
“Do të fillojmë një dialog politik konkret dhe direkt me NATO-n, për anëtarësimin e privilegjuar, që është i mundshëm. Qysh në fillim të mandatit tonë do ta nënshkruajmë Planin për anëtarësim në NATO.” – tha Krasniqi.
Për përmbushjen e këtij premtimi, ai deklaroi se me urgjencë do të fillojnë bisedimet me Shtetet e Bashkuara të Amerikës (SHBA) dhe NATO-n, për zhvillimin e planit konkret që Kosova të bëhet pjesë e NATO-s.
Ndërsa kandidati tjetër për deputet, Ahmet Isufi foli për përgatitjet që parashihen të bëhen në FSK.
Sipas tij, FSK është një kombinim i strategjisë së brendshme të shtetit tonë, por e ndihmuar nga NATO me misionin e KFOR-it në Kosovë.
Tutje, Isufi tha se pa anëtarësim të Kosovës në NATO nuk mund të ketë as zhvillime të tjera si shkak i mungesës së sigurisë.
“Ne e kemi në Programin tonë edhe sloganin, i cili është ‘Direkt në NATO’ dhe qëllimisht e kemi bërë këtë, sepse konsiderojmë që pa siguri nuk ka asnjë zhvillim tjetër që mund të jetë efikas për qytetarët e Kosovës dhe për vendin tonë.” – tha Isufi.
AAK parasheh gjithashtu edhe krijimin e një ekipi me diplomat për akreditim në NATO, si dhe zhvillimin e Qendrës së Ekselencës Ushtarake për rajonin, me kapacitete të specializuara të FSK-së.
Ndërsa, Krasniqi si shumë të nevojshme e ka parë edhe hapjen e Ambasadave në të gjitha shtetet e NATO-s, në të cilat Kosova ende nuk i ka të hapura.
“Kosova duhet me urgjencë që të hapë Ambasada në të gjitha shtetet e NATO-s, ku nuk i kemi momentalisht të hapura. Në ato aktualet, duhet të shtohen diplomatët e fushëveprimit të sigurisë.” – tha Krasniqi.
“Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 9 shkurtit 2025. Kandidatët për deputetë nga partitë politike garuese, përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashit dhe Visar Prebrezës nga “Krypometër”.
Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.
Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.
“Na s’jemi oligarkë. Asnjëri prej neve në KALLXO.com nuk jemi pasanikë, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”.
Anëtarësimi i Kosovës në Aleancën Veri-Atlantike (NATO) është një prej synimeve kryesore që i ka dhënë vetes koalicioni AAK-Nisma dhe të tjerët, të cilin zotohet se do ta përmbushë nëse e merr drejtimin e Qeverisë, pas Zgjedhjeve të 9 shkurtit 2025.
Koalicioni i AAK-së me Nismën, Konservatorët, Forumin Intelektual E-30 dhe Listën Ideal beson që mund ta anëtarësojë Kosovën në NATO – qëllim të cilin e kanë pasur të gjitha partitë që kanë qeverisur vendin ndër vite, por që nuk kanë arritur ta jetësojnë deri më tani. Rruga për t’u bërë pjesë e NATO-s nuk është e lehtë, duke e marrë parasysh faktin që Kosovën nuk e kanë njohur ende disa shtete, që janë anëtare të kësaj Aleance.
Në vitin e kaluar, Asambleja Parlamentare e NATO-s e miratoi rekomandimin për avancimin e statusit të Kosovës nga anëtare vëzhguese në anëtare të asociuar. Megjithatë, duhet ende punë që vendi të kalojë në hapa më specifik për anëtarësim.
Kandidatët e koalicionit AAK-Nisma. Foto: Naser Fejza/KALLXO.com
Duke shpalosur zotimet në fushën e sigurisë, katër kandidatë për deputetë nga koalicioni AAK-NISMA, u zotuan në “Debat Përnime”, më 17.01.2025, se pos angazhimit për anëtarësimin e vendit në NATO, do t’i përmirësojnë raportet me SHBA-në, do të rrisin buxhetin për Forcën e Sigurisë së Kosovës (FSK), do të bëjnë Vetting në Policinë e Kosovës, si dhe do të themelojnë Departamentin për Mjedis brenda në Polici.
Ndërsa, për planet për rajonin e Prizrenit, ata premtuan se nëse do të qeverisin do ta përfundojnë autostradën Prizren-Tetovë, do ta bartin Presidencën atje dhe do të zhvillojnë Qendrat e Skijimit në Brod dhe Brezovicë.
“Direkt në NATO”
Slogani i Aleancës për Ardhmërinë e Kosovës (AAK) është “Direkt në NATO”.
Ahmet Isufi, kandidat për deputet i cili kaherë është pjesë e kësaj partie ka deklaruar se në plan të parë e kanë fuqizimin e raporteve me SHBA-në dhe se në fokus të tyre do të jetë angazhimi për siguri, përkatësisht anëtarësimi në NATO.
“Ne e kemi në Programin tonë, edhe sloganin i cili është ‘Direkt në NATO’. Dhe, qëllimisht e kemi bërë këtë, sepse konsiderojmë që pa siguri nuk ka asnjë zhvillim tjetër, që mund të jetë efikas për qytetarët e Kosovës dhe për vendin tonë.” – tha Isufi.
Kandidati tjetër për deputet, Besnik Krasniqi shpalosi disa nga projeksionet konkrete që kanë planifikuar për anëtarësim në NATO.
“Do të punojmë për të përmbushur kriteret një nga një, për t’u anëtarësuar në NATO.” – tha ai, duke shtuar se kanë në plan që të fillojnë një Dialog politik konkret për anëtarësim direkt dhe qysh në fillim të mandatit ta nënshkruajnë Planin për anëtarësim.
Kandidati i koalicionit AAK-Nisma, Ahmet Isufi. Foto: Naser Fejza/KALLXO.com
Përveç këtyre, ai tha se planifikojnë që ta krijojnë një ekip të plotë të diplomatëve, të cilët do të akreditohen në NATO dhe me urgjencë të hapen Ambasada në të gjitha shtetet e NATO-së: aty ku nuk ka, kurse në ato ekzistuese t’i shtojnë diplomatët e fushëveprimit të sigurisë.
Prej nisjes së luftës në Ukrainë, autoritetet e Kosovës kanë bërë thirrje për anëtarësimin e Kosovës në Aleancën Veri-atlantike. Presidentja e Kosovës, Vjosa Osmani kishte thënë se anëtarësimi i Kosovës në NATO është i domosdoshëm që të ruhet paqja në rajon.
Edhe pse trupat e NATO-s ndodhen në Kosovë që nga lufta e fundit 1998/1999, shteti më i ri në Europë nuk ka zënë ende vend aty. Më 09.02. 2022, Qeveria e Kosovës kishte marrë Vendim për Themelimin e Grupit punues ndërinstitucional për anëtarësimin e Kosovës në NATO.
Kryeministri Albin Kurti, kandidat për Kryeministër edhe për një mandat, kishte thënë se objektivi kryesor i këtij Grupi do të jetë avancimi i procesit të integrimit në NATO, fuqizimi i pranisë së Kosovës në organizata dhe mekanizma rajonalë e ndërkombëtarë të sigurisë, si dhe bashkëpunimi me aleatët strategjikë ndërkombëtarë.
Blerja e armatimit
Kosova ka nënshkruar Marrëveshje me Turqinë për Ndërtimin e fabrikës së parë të municionit. Me një Marrëveshje të nënshkruar më 16.12.2024, me kompaninë turke të armëve – MKE, Kosova synon të ndërtojë një fabrikë të municioneve të kalibrave të ndryshëm, të parën në vend.
Se çka do të bëjë koalicioni AAK-Nisma për këtë fabrikë të municionit, Ahmet Isufi tha se duhet të vlerësohet dhe të shikohet paraprakisht kjo gjë.
“Të gjitha Marrëveshjet të cilat janë obligative për shtetin e Kosovës, e që janë të dakorduara me faktorë ndërkombëtarë duhet të shikohen; duhet të bëhet vlerësimi dhe duhet të bëhet implementimi i tyre, sepse ne kemi të bëjmë me elemente të cilat e stabilizojnë Kosovën dhe e forcojnë shtetin.” – tha ai.
Për fabrikën e municionit, ai tha që më shumë është një propagandë që është përdorur nga Qeveria Kurti, pak para Zgjedhjeve. Megjithatë, ai shtoi se duhet të analizohet gjendja. Fundja, sipas tij, pse mos të ketë fabrikë të municionit në Kosovë, derisa shtetet e tjera kanë avancuar në këtë drejtim.
“Shumë deklarime e premtime që janë dhanë ne i dimë që s’janë realizuar nga kjo Qeveri. Prandaj, edhe këtë e shohim si një veprim për propagandë të fushatës zgjedhore.” – theksoi ai.
Për blerje të armatimit, Isufi tha se do të shkojnë konform të gjitha interesave të Kosovës dhe të aleatëve.
Kurse, Besnik Krasniqi tha se kanë në plan të bëjnë blerje të armatimit me Pentagonin, siç e bëjnë disa shtete të tjera.
Buxheti për Ministrinë e Mbrojtjes në Kosovë do të jetë 207.8 milionë euro në vitin 2025, apo 54 milionë euro më shumë sesa në vitin 2024.
Kosova, viteve të fundit, ka siguruar armë edhe nga dy fuqi të NATO-s: SHBA-ja dhe Turqia.
Ushqimi dhe buxheti për FSK-në
Ushqimin për ushtarët e Forcës të Sigurisë, Ahmet Isufi thotë se si AAK, e kanë në plan ta rregullojnë në bazë të Ligjeve fuqi, por nuk shpalosi diçka më konkrete.
AAK është një ndër partitë që si opozitë më së shumti ka fajësuar Qeverinë e tanishme, në lidhje me ushqimin e ushtarëve.
“Të gjitha do të jenë konform buxhetit, si dhe zbatimit të Ligjit dhe mosndërhyrjes politike në ushtri, sepse janë segmente të cilat duhen vëmendje, më shumë në funksionim e në profesionalizëm sesa ndërhyrje për të plotësuar apetite politike.” – tha ai.
Isufi deklaroi se në planin e tyre nuk kanë përcaktuar ndonjë shifër se sa do ta rrisin buxhetin për FSK-në.
“Nuk kemi përcaktuar shifër të buxhetit, sepse do të bëjmë analizën e brendshme e të mos japim premtime blanco, por të shkojmë në ngritjen nga 2% në 3 deri në 5%.” – tha ai.
Kandidati i koalicionit AAK-Nisma, Zafir Berisha. Foto: Naser Fejza/KALLXO.com
Kurse, Zafir Berisha, i cili ka mbajtur postin e Koordinatorit Nacional për Siguri Kibernetike në Qeverinë Haradinaj, tha se ka pritur sidomos prej ministrit të Forcës të Sigurisë, Ejup Maqedonci, që të jetë më i kujdesshëm në këtë aspekt.
“Me fol për shujta për policët dhe ushtrinë është gjëja më minore që nuk duhet me qenë as pjesë e debateve publike.” – tha ai
Problemi me ushqimin e ushtarëve të Kosovës ishte krijuar pasi që Kontrata për tenderin e fundit të shpallur nuk ishte nënshkruar. Në anën tjetër, tenderit paraprak i ka skaduar Kontrata, më 30.09.2024.
Ministria e Mbrojtjes që nga tetori i vitit 2023 e deri në shtator 2024 ka dhënë tre tenderë me procedurë të negociuar pa publikimit të njoftimit për Kontratë, kompanive të cilat ishin shpallur të papërgjegjshme nga ana e Organit Shqyrtues të Prokurimit (OSHP), të njohur ndryshe si Gjykata e Tenderëve.
Kontratat e dhëna janë në vlerë miliona euro, ndërsa janë për furnizim me ushqim për nevojat e FSK-së.
Për tenderët njëburimor, kandidati i AAK-së, Fatmir Matoshi tha se në ditën që vijnë në qeverisje do t’i hapin të gjitha dosjet e tenderëve njëburimor që janë dhënë gjatë qeverisjes Kurti.
“Do t’i hapim për të gjithë ata që janë të interesuar.” – tha ai për këto Dosje, duke përjashtuar ato që janë sekrete.
Ndërsa, Zafir Berisha në lidhje me këta tenderë e akuzoi Qeverinë Kurti për hajni, anipse nuk ofroi një zgjidhje konkrete.
“Ku ke pa ti që tenderët njëburimor me u jep për një objekt. Mundet me prit edhe 2 muaj qysh ka prit 25 vjet. Këta prej pandemisë… për shkak të emergjencës botërore ia kanë vazhdu me dhënë tender njëburimor edhe për asfalt.” – theksoi ai.
A do t’i kthejnë policët serbë në institucione?
Mbi 500 policë nga radhët e komunitetit serb në veri të Kosovës kanë dhënë dorëheqje në nëntor të vitit 2022, në kuadër të tërheqjes kolektive të serbëve nga institucionet e Kosovës, për shkak të përpjekjeve të Qeverisë së Kosovës për zëvendësimin e targave serbe të makinave me targa RKS.
Se a e ka plan koalicioni AAK-Nisma që t’i kthejë këta policë përsëri në pozitat e tyre, Zafir Berisha tha se nuk bëjnë marrëveshje në çështje profesionale.
“Unë konsideroj se ajo është një kapitull i mbyllur. Këta që e kanë lëshuar Policinë me urdhër të Vuçiqit, unë mendoj se nuk kanë vend në Policinë e Kosovës… Ata duhet t’i nënshtrohen një procedure të rregullt të inkuadrimit dhe natyrisht duhet të përshtaten me realitetin që është krijuar.” – tha ai.
Më 28. 12. 2022, kryeministri i Kosovës, Albin Kurti tha se “zbrazëtia” e krijuar pas “dorëheqjeve të detyruara” duhet të plotësohet dhe u bëri thirrje të gjithë serbëve të Kosovës, veçanërisht atyre që nuk kanë pasur mundësi për të pasur një vend pune deri më tani, për të aplikuar për vende të reja pune.
Komuniteti ndërkombëtar në disa raste u ka bërë thirrje serbëve që të kthehen në institucione, por edhe Kosovës që ta lehtësojë kthimin e tyre.
Beogradi zyrtar e ka përkrahur largimin e serbëve nga institucionet e Kosovës dhe në këmbim, atyre iu dha Kontrata në bazë të së cilave, përveç pagës, rregulloheshin edhe marrëdhëniet e punës juridike, si pensioni dhe sigurimi shëndetësor.
Një premtim tjetër në lidhje me Policinë e shpërfaqi kandidati Fatmir Matoshi, i cili në Qeverinë Haradinaj ka qenë ministër i Mjedisit dhe Planifikimit Hapësinor tha se duhet që të krijohet një Departament i Policisë Mjedisore, në mënyrë që të hetohen shkatërrimet që bëhen në mjedis.
Kandidati i koalicionit AAK-Nisma, Fatmir Matoshi. Foto: Naser Fejza/KALLXO.com
Matoshi tha se secili Stacion Policor në Kosovë duhet t’i ketë zyrtarët e vetë policorë, që punojnë në kuadër të Departamentit të Policisë Mjedisore. Siç parashikoi ai, duhen rreth 200 sosh të shpërndahen nëpër Stacionet e Kosovës.
“Nuk ka një dorë të fuqishme dhe të fortë që po e parandalon krejt atë që bëhet gjithandej nëpër Kosovë. Mjafton me dal me i pa pyjet dhe brezin rrugor. Gjithandej vazhdon me pas degradime nga mbeturinat. Ky kish me qenë një prej Departamenteve të duhura.” – tha ai, duke shtuar se duhet të shihet prania e Policisë në këto ambiente.
Kurse në përgjithësi për Policinë e Kosovës, Zafir Berisha tha se Drejtoria e Përgjithshme dhe mekanizmat udhëheqës brenda Policisë duhet të kenë certifikatën e pastërtisë në momentin e avancimit në pozicione të ndryshme.
“Duhet me kalu nëpër disa filtra, që për fatin e keq deri tash nuk janë bërë.” – tha ai.
Planet për Prizrenin
Kandidati Besnik Krasniqi tha se projektin e autostradës Prizren-Tetovë do të përfundojnë, anipse nuk e quajti autostradë, por “një rrugë rajonale”.
“Ne jemi duke përcjellë punimet. E kemi parë projektin. E kemi parë Kontratën-Bazë-Kornizë. Është një rrugë rajonale. Kanë filluar punimet me intensitet shumë të ulët. Sigurisht që do ta ndryshojmë këtë projekt dhe ta shndërrojmë në një autostradë moderne, siç kemi bërë edhe në të kaluarën me autostradën “Ibrahim Rugova” dhe “Arbën Xhaferi.” – tha ai.
Sipas tij, kostoja varion nga 100 milionë deri në 240 milionë, varësisht prej trasesë kah do të shtrohet kjo rrugë.
Kandidati i koalicionit AAK-Nisma, Besnik Krasniqi. Foto: Naser Fejza/KALLXO.com
Një premtim tjetër i këtij koalicioni, të cilin e shpalosi Krasniqi, ishte bartja e Presidencës të Kosovës nga Prishtina në Prizren.
“[Ky projekt] Nuk e prek Pakon e Ahtisaarit, sepse e kemi trajtuar me ekspertë të fushës së Kushtetueses. Do të prek vetëm dy Ligje, atë për Presidencën e Kosovës dhe të Kryeqytetit të Kosovës, të cilat me një shumicë të thjeshtë mund të plotësohen e të ndryshohen, në mënyrë që këto institucione të kalohen në qytetin historik.” – tha ai.
Ndërsa për Qendrat e Skijimit në Brod dhe në Sharr, ai theksoi se e kanë në plan që t’i zhvillojnë përmes Partneritetit Publiko-Privat.
“Ne konsiderojmë që kjo është mënyra e vetme për të zhvilluar këta sektorë të industrisë: edhe Prevallën, edhe Dragashin, por edhe pjesë të tjera të Sharrit të cilat kanë potencialë të jashtëzakonshëm.” – tha ai.
Përvoja e Aleancës në pushtet
Në Zgjedhjet e fundit të vitit 2021, AAK fitoi 7.07% të votave. Me këtë zuri 8 ulëse në Kuvendin e Kosovës.
Ramush Haradinaj në vitin 2005 ishte për tre muaj Kryeministër i Kosovës. Në atë kohë, ai dha dorëheqje pas 100 ditësh qeverisjeje, pasi u akuzua nga Tribunali i Hagës për “krime lufte”.
Kjo parti e mori pushtetin edhe njëherë në vitin 2017, por kësaj radhe në koalicion me Partinë Demokratike të Kosovës dhe NISMA-n, i njohur si PAN. Qeveria Haradinaj e filloi mandatin më 09.19.2017, pas humbjes së Isa Mustafës dhe zgjati deri më 3 shkurt 2020 pas humbjes në Zgjedhjet parlamentare të vitit 2019.
Qeveria Haradinaj ishte formuar gjatë një seance maratonike në Kuvendin e Kosovës, me 61 vota – minimumi që i duhet një Qeverie për ta marrë besimin e deputetëve.
Votimi i Ekzekutivit kosovar ishte mundësuar falë votave të deputetëve të subjektit politik nga radhët e komunitetit serb, Listës Serbe, e cila u largua më vonë nga Qeveria. Rrjedhimisht, kjo bëri që koalicioni qeverisës që përbëhej nga PDK-AAK-NISMA të mos i ketë votat e duhura për vendimmarrje në Kuvendin e Kosovës.
AAK në Zgjedhjet e 9 shkurtit 2025 garon në koalicion me Nismën, Konservatorët, Forumin Intelektual E30 dhe me Listën Idealin.
“Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 9 shkurtit 2025. Kandidatët për deputetë nga partitë politike garuese, përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashit dhe Visar Prebrezës nga “Krypometër”.
Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.
Kryetari i Iniciativës së Re Demokratike e Kosovës, Elbert Krasniqi po vazhdon fushatën elektorale për Zgjedhjet e 9 shkurtit 2025.
Përmes një videoje të publikuar në Facebook, Krasniqi ka promovuar pastrimin e një deponie të mbeturinave në një lagje të Gjakovës.
Ai ka thënë se IRDK nuk bën pazare me barazi dhe nuk bëjnë kompromis me dinjitet.
“Ali Ibra nuk është më deponi e mbeturinave. Rrugë e re aty, ndriçim publik dhe qendër mësimore. Ne nuk bëmë pazare me barazi dhe nuk bëjmë kompromis me dinjitet.” – ka thënë ai.
Krasniqi ka njoftuar tutje se ka zhvilluar takime me qytetarë në fshatin Rudicë dhe Zallq.
Ai ka thënë se bashkëbiseduan për punën e IRDK-së në Qeverinë aktuale dhe planet për projektet në Qeverinë Kurti 3.
“Në odën e Gani Isenaj në Rudicë e në odën e Rifat Stollaj në Zallq bashkëbiseduam për punën e IRDK-së në Qeveri në mandatin Kurti 2 dhe shpalosëm planet e projektet për Kurti 3. Këto familje janë motivi ynë që të vazhdojmë të punojmë me përkushtim dhe përgjegjësi.” – ka thënë ai.
Fushata pёr Zgjedhjet parlamentare nё Kosovё ka filluar zyrtarisht mё 11.01.2025.
Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare të 9 shkurtit 2025.
Për këto Zgjedhje janë certifikuar 28 subjekte politike, me 1,280 kandidatë.
Sipas Ligjit, gjatë periudhës së fushatës zgjedhore subjektet politike kanë të drejtë:
– të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre, me qëllim të fitimit të përkrahjes nga votuesit e tyre;
– të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor; gjithashtu, edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet e tjera në fuqi.
Këto do të jenë Zgjedhjet e para të rregullta, që Kosova mban që nga shpallja e Pavarësisë më 2008.
Sekretari i Përgjithshëm i Lëvizjes Vetëvendosje, Alim Rama i është përgjigjur letrës së hapur të Qendrës Europiane për Lirinë e Shtypit dhe Medias (ECPMF) që ia adresoi liderit të LVV-së, njëherazi kryeministrit të Kosovës, Albin Kurtit, në lidhje me vendimin e partisë së tij, që t’i bojkotojë tri kanale televizive në vend gjatë fushatës zgjedhore.
Sekretari Rama i është përgjigjur letrës së ECPMF një javë pasi ajo u publikua, më 10.01.2025. Ndërsa, LVV ka bojkotuar kanalet televizive – T7, Klan Kosova dhe TV Dukagjini, gjatë fushatës zgjedhore që ka nisur më 11.01.2025.
Ndonëse ECPMF ia kritikoi transparencën dhe llogaridhënien partisë në pushtet, Rama thotë se LVV mbetet e palëkundur në angazhimin e saj për këto dy çështje.
Në letrën e saj, Qendra Europiane për Lirinë e Shtypit dhe Medias i ka bërë thirrje kryeministrit Kurti që ta anulojë vendimin për bojkotimin e këtyre mediave dhe të sigurohet që Vetëvendosja të sigurojë qasje të barabartë në informacione publike për këto media.
“Na vjen keq për çdo keqkuptim ose dezinformatë rreth kontekstit të çështjes në fjalë. Kjo Qeveri, e udhëhequr nga partia jonë, përfaqëson udhëheqjen më demokratike që Kosova ka pasur. Ne mbajmë lirinë e fjalës, pavarësinë e medias dhe një mjedis të gjallë e të larmishëm mediatik si shtyllat themelore të demokracisë dhe parimet thelbësore që ne i mbështesim me krenari.” – ka shkruar Rama.
Sipas Ramës, si parti politike kanë të drejtë të zgjedhin kanalet komunikuese “që më së miri përcjellin mesazhin e tyre dhe të sigurojnë se publiku është i mirë-informuar rreth Programit politik të tyre për mandatin e ardhshëm.”
“Është esenciale të qartësojmë se ky nuk është një bojkot i medias. Vendimi për t’i përjashtuar tri kanale (televizive) specifike nuk e minon mjedisin e pasur dhe të larmishëm të medias në Kosovë, që përfshin platforma të numërta për debat dhe shumë gazetarë profesionistë në vend.” – ka theksuar Rama.
Rama thotë madje se në tri studiot e kaneleve televizive të cilat i ka bojkotuar LVV ka ofendime të shpeshta e akuza të pabaza.
“Gjuha toksike, ofendime të shpeshta dhe akuza të pabaza që mbizotërojnë në këto tri studio, të shoqëruara me raportim të njëanshëm dhe joobjektiv. Dështuan të ofrojnë një platformë të drejtë për partinë tonë, për të prezantuar planet e saj të fushatës dhe qëllimet.” – ka thënë Rama.
Megjithatë, Rama përmend se LVV nuk është duke ia kufizuar ndonjë gazetari apo organizate mediatike mbulimin e periudhës së fushatës zgjedhore apo aktiviteteve të partisë.
“Vendimi i përket vetëm mospjesëmarrjes në debate dhe programe që nuk ofrojnë një mjedis të favorshëm për t’i shprehur këndvështrimet tona.” – ka shtuar Rama.
Rama shton po ashtu se kritika gjithmonë ka qenë një gur themel i Lëvizjes së tyre dhe se i mirëpresin mendimet e ndryshme edhe kur ato i sfidojnë.
“Ne kategorikisht refuzojmë pretendimet e pavërteta se Qeveria jonë ka kërkuar t’i kontrollojë mediat dhe se përfaqësuesit tonë kanë sulmuar gazetarët e pavarur, profesionistë. Mjedisi i larmishëm i medias dhe prezenca e zërave dhe qëndrimeve të ndryshme – duke përfshirë edhe kritikat më të ashpra të Qeverisë dhe Lëvizjes Vetëvendosje si dëshmia më e fortë e kësaj.” – ka thënë Rama.
Gjatë mandatit të tyre, Rama thotë se Kosova ka bërë hapa të rëndësishëm për lirinë e medias, siç shprehet ai, që këto reflektojnë në indeksët ndërkombëtar.
“Ky progres megjithatë është sfiduar nga presionet e jashtme, duke përfshirë tensione të eskaluara dhe sulme në veri më 2023. Këto sulme, të ushqyera nga fqinji ynë verior nuk i ka rrezikuar vetëm gazetarët, por gjithashtu e pengoi aftësinë e tyre për të performuar punën e tyre kritike.” – ka potencuar Rama.
“Ne mbetemi të përkushtuar për t’u angazhuar në diskutimet publike rreth Programit, ideve dhe vizionit tonë për të dy mandatet, të tanishmin dhe të ardhshmin. Lëvizja Vetëvendosje dhe Qeveria e saj do të vazhdojnë ta mbrojnë lirinë e fjalës, lirinë e medias dhe komunikimit transparent me publikun përmes medias.” – ka thënë në fund Rama.
Në anën tjetër, në letrën e saj, ECPMF ka theksuar se duke i bojkotuar kanalet kryesore televizive, minohet e drejta e publikut për informacion dhe roli esencial i gazetarëve në promovimin e transparencës dhe llogaridhënies.
“Të gjithë gazetarët duhet të jenë në gjendje të raportojnë lirisht dhe në mënyrë të drejtë për periudhën zgjedhore. Mbrojtja e lirive të medias dhe e drejta e publikut për një proces të informuar dhe demokratik duhet të jetë prioritet.” – thuhet në letrën e ECPMF-së për Kurtin.
ECPMF tha se gjatë katër vjetëve të kaluara, derisa Reagimi i Shpejtë i Lirisë së Medias (MFRR) nga afër ka monitoruar zhvillimet në lirinë e medias, kanë qenë dëshmitarë të një rënie shqetësuese të lirisë së mediave në Kosovë.
“Në vitin 2022, partnerët e Platformës për Sigurinë e Gazetarëve të Këshillit të Europës vizituan Kosovën për të vlerësuar gjendjen e lirisë së medias dhe mbrojtjen e gazetarëve në vend. Derisa pak progres është vërejtur, misioni konstatoi se “retorikë toksike dhe fushatat e shpifjeve kundër medias, financimi i pamjaftueshëm i transmetuesit publik dhe mungesa e transparencës rrezikojnë të minojnë progresin.” – ka thënë ECPMF.
Më tej, ECPMF bazohet edhe në të dhënat e Asociacionit të Gazetarëve të Kosovës për sulmet dhe kërcënimet ndaj gazetarëve, të cilat thotë se janë dyfishuar.
“Shumica e këtyre sulmeve përfshijnë sulme verbale nga anëtarë të partisë suaj, të cilët i kanë etiketuar gazetarët si “spiunë serbë” ose bashkëpuntorë dhe i kanë akuzuar që kanë lidhje me interesat serbe.” – i ka adresuar ECPMF Kurtit.
Qendra Europiane për Lirinë e Shtypit dhe Medias ia ka përmendur Kurtit edhe miratimin e Projektligjit për Komisionin e Pavarur për Media (KPM) në Kuvendin e Kosovës, më 12.07.2024.
Sipas Qendrës, ky Ligj i ri për Median dështoi të përfshijë rekomandimet kritike të Këshillit të Europës, Komisionit Europian dhe shoqërisë civile.
“Kosova urgjentisht ka nevojë të marrë masa për të mbrojtur lirinë e medias, të promovojë transparencë dhe të sigurojë llogaridhënien e zyrtarëve publikë. Publiku, veçanërisht gjatë fushatave zgjedhore ka të drejtën themelore të qaset në informacione të ndryshme, të shqyrtojë me kujdes premtimet politike dhe t’i mbajë politikanët llogaridhënës.” – ka theksuar ECPMF.
Organizatat e shoqërisë civile reagojnë ndaj Vetëvendosjes për bojkotin e “Debat Përnime”
KALLXO.com ka raportuar gjithashtu se një grup prej dhjetëra organizatave joqeveritare kanë reaguar ndaj bojkotit të subjektit politik, Lëvizja Vetëvendosje për mos të marrë pjesë në emisionin “Debat Përnime” – prodhim i dy organizatave, Rrjetit Ballkanik të Gazetarisë Hulumtuese (BIRN) dhe Internews Kosova.
Në reagimin e tyre, OJQ-të kanë theksuar që bojkoti për mospjesëmarrje në “Debat Përnime” e cenon interesin publik dhe informimin e drejtë të qytetarëve në kohë Zgjedhjesh.
“Ne, organizatat e poshtëshënuara e kemi marrë me shumë shqetësim vendimin e Lëvizjes Vetëvendosje, me të cilin kjo parti ka vendosur të bojkotojë debatin zgjedhor të organizuar nga organizatat e shoqërisë civile, Rrjeti Ballkanik për Gazetari Hulumtuese – BIRN dhe Internews Kosova, organizata anëtare e International Fact-checking Network – IFCN dhe European Factchecking Standards Network – EFCSN dhe fituese e çmimeve ndërkombëtare për gazetari hulumtuese.” – thuhet në reagim.
Partia Lëvizja Vetëvendosje mori vendim bojkotimin e tre televizioneve në vend, duke përfshirë edhe formatin e debateve zgjedhore “Debat Përnime”.
“Vendimi për të bojkotuar debatin e organizuar nga organizata të certifikuara të verifikimit të fakteve dhe organizata me renome në gazetari hulumtuese cenon interesin publik dhe informimin e drejtë të qytetarëve për ofertën politike të partive politike dhe llogaridhënies.” – thuhet tutje në reagim.
Ndaj bojkotimit të “Debat Përnime” ka reaguar edhe drejtoresha e Rrjetit Ballkanik të Gazetarisë Hulumtuese dhe drejtuesja e emisionit “Debat Përnime”, Jeta Xharra.
Kryetari i Kuvendit të Kosovës, Glauk Konjufca, ka pritur në takim delegacionin e Asamblesë Parlamentare të Këshillit të Europës, të kryesuar nga Petra Bayr.
Konjufca i ka njoftuar mysafirët me ecurinë aktuale politike në vend, në këtë periudhë të fushatës zgjedhore që përfundon me zgjedhjet parlamentare që do të mbahen më 09.02.2025.
Ai ka vlerësuar se ky proces është duke u zhvilluar konform përcaktimit të tij ligjor, në frymë demokratike, si dhe duke i ndjekur e nxitur vlerat e përbashkëta europiane.
“Në takim u diskutua rreth Ligjit të zgjedhjeve në Republikën e Kosovës që e definon këtë proces, si dhe në lidhje me pritshmëritë që këto zgjedhje të vazhdojnë traditën e mirë demokratike, si një vend që aspirojmë zhvillim sa më të madh në këtë drejtim, me aspirata të anëtarësimit në strukturat ndërkombëtare dhe evropiane”- thuhet në njoftimin e datës 17.01.2025.
Konjufca ritheksoi se Republika e Kosovës mbetet e përkushtuar për t’u anëtarësuar në Këshillin e Europës, ashtu siç ka qenë dhe vijon të mbetet e angazhuar në ruajtjen dhe zhvillimin e mëtejshëm të demokracisë në vendin tonë, për mbrojtjen e të drejtave të njeriut dhe fuqizimin e sundimit të ligjit.
Konjufca e falënderoi delegacionin e Asamblesë Parlamentare të Këshillit të Evropës për diskutimin e frytshëm dhe iu uroi atyre qëndrim sa më të mirë e sa më produktiv në Kosovë.
Fushata pёr zgjedhjet parlamentare nё Kosovё ka filluar zyrtarisht mё 11.01.2025.
Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.
Për këto zgjedhje janë certifikuar 28 subjekte politike, me 1,280 kandidatë.
Këto do të jenë zgjedhjet e para të rregullta që Kosova mban që nga shpallja e Pavarësisë më 2008.
