Ballina

Etiketë: Zgjedhjet

  • Kongresi amerikan e certifikon fitoren e Trumpit në zgjedhje

    Kongresi amerikan e ka certifikuar edhe formalisht fitoren e presidentit të zgjedhur amerikan, Donald Trump, në zgjedhjet presidenciale të nëntorit kundër kandidates demokrate, nënpresidentes Kamala Harris, duke i hapur rrugën atij për t’u betuar si president më 20 janar.

    Certifikimi i rezultatit të zgjedhjeve të hënën në 50 shtete dhe në Distriktin e Kolumbias u bë në një ceremoni formale dhe të shpejtë gjatë një seance të përbashkët të Dhomës së Përfaqësuesve dhe Senatit. Seanca u udhëhoq nga Harris në rolin e presidentes së Senatit.

    Ceremonia e së hënës kaloi plotësisht ndryshe krahasuar me atë të para katër vjetëve, kur një grup i mbështetësve të Trumpit e vërshuan Kongresin një përpjekje të dështuar për ta parandaluar certifikimin e fitores së presidentit Joe Biden në zgjedhjet e vitit 2020, në të cilat ai e mposhti Trumpin.

    Trumpi vazhdon të pretendojë rrejshëm se i humbi zgjedhjet e vitit 2020 si pasojë e manipulimit të gjerë.

    “Kongresi e certifikoi fitoren tonë të madhe sot – ky është një moment i madh në histori. MAGA!” shkroi të hënën Trump në platformën e tij sociale, Truth Social.

    Certifikimi përfundimtar konfirmon rezultatin preliminar se Trumpi i fitoi 312 vota elektorale, ndërsa Harrisi 226.

    Republikanët kontrollojnë Shtëpinë e Bardhë dhe Kongresin

    Republikanët gjithashtu siguruan shumicën në Senatin amerikan dhe ruajtën shumicën e ngushtë në Dhomën e Përfaqësuesve në zgjedhjet e nëntorit, gjë që do t’i japë Trumpit mbështetjen partiake që i nevojitet për ta zbatuar agjendën e tij të planifikuar, duke përfshirë uljen e taksave dhe dëbimin e imigrantëve që jetojnë në mënyrë të paligjshme në vend.

    Demokratët nuk tentuan të bllokonin certifikimin e fitores së Trumpit të hënën.

    “Ne duhet ta ripërtërijmë përkushtimin tonë për mbrojtjen e demokracisë amerikane”, tha Katherine Clark, demokratja numër 2 në Dhomën e Përfaqësuesve. “Si liderë të zgjedhur, besnikëria jonë duhet të jetë ndaj Kushtetutës, së pari dhe gjithmonë. Jemi këtu për ta respektuar vullnetin e popullit dhe sundimin e ligjit”.

    Masat e sigurisë brenda dhe jashtë Kongresit u shtuan në përgatitje për certifikimin dhe pritet të mbeten në fuqi deri në betimin e Trumpit.

    Hapësira përreth Kongresit u rrethua nga gardhe metalike, qindra metra larg ndërtesës, dhe hyrja lejohej vetëm përmes pikave të kontrollit të ruajtura nga oficerë policie.

    Brenda ndërtesës, ekipe shtesë të policisë kontrollonin dokumentet e identitetit në pikat e hyrjes, përfshirë dyert dhe tunelet nëntokësore që çonin në dhomat e Dhomës dhe Senatit.

    Trump ka thënë se synon t’i falë disa nga mbi 1500 personat e akuzuar për pjesëmarrje në sulmin e 6 janarit 2021 në Kongres, kur një turmë u përlesh me policinë, duke hyrë me forcë përmes dritareve dhe dyerve dhe duke thirrur, “Vareni Mike Pence”, duke iu referuar zëvendëspresidentit të atëhershëm të Trumpit, në një përpjekje të dështuar për të ndaluar Kongresin nga certifikimi i fitores së Bidenit.

    Gjatë trazirave të 2021 në Kongres, protestuesit kaluan barrikadat e policisë, sulmuan rreth 140 oficerë dhe shkaktuan më shumë se 2.8 milionë dollarë dëme. Disa oficerë policie që u përleshën me protestuesit vdiqën javët që pasuan, disa prej tyre për shkak të vetëvrasjes.

    Si rezultat i dhunës së asaj dite, Kongresi miratoi legjislacion në fund të vitit 2022 për të forcuar mbrojtjet ligjore dhe për të siguruar që procesi i certifikimit të administrohet në mënyrë të ligjshme.

    Shumë nga këto ndryshime ishin përgjigje direkte ndaj veprimeve të Trumpit para dhe gjatë 6 janarit 2021. Për shembull, ligji i ri përcakton se roli i zëvendëspresidentit është kryesisht ceremonial./REL.

  • Presidenti austriak mandaton djathtistin ekstrem për formimin e qeverisë

    Presidenti austriak, Alexander Va nder Bellen e ka mandatuar të hënën më 06.01.2025 liderin e së djathtës ekstreme, Partia e Lirisë (FPO) që ta formojë një koalicion qeveritar, pasi përpjekja e centristëve për koalicion pa FPO-në dështoi papritmas në fundjavë – raporton Reuters.

    Njoftimi shënon një kthesë të madhe dramatike për Presidentin, ish-lider i së majtës së Gjelbër, të cilët kaherë kanë qenë kritik ndaj FPO-së dhe janë përplasur me liderin e saj, Herbert Kickl, por pak mundësi mbetën për Van der Bellen pas dështimit të centristëve për krijimin e një koalicioni qeveritar.

    FPO-ja euroskeptike dhe dashamire ndaj Rusisë fitoi Zgjedhjet parlamentare të shtatorit me 29% të përkrahjes së votuesve. Tani do të hyjë në negociata me partnerin e vetëm të mundshëm, Partinë Popullore Konservatore (OVP), me kërkesën që t’i prijë një Qeverie për herë të parë prej themelimit të saj në vitet pesëdhjetë nën drejtimin e një lideri që kishte qenë ushtarak i lartë në SS-in paramilitar elitar të Hitlerit.

    “E kam ngarkuar atë me nisjen e bisedimeve me Partinë Popullore për formimin e një Qeverie.” – ka deklaruar Va nder Bellen në një adresim televiziv pas takimit me Kicklin, duke shtuar: “Nuk e kam ndërmarrë me qejf këtë hap”.

    Dhe derisa Kickl po largohej pas takimit me Presidentin, qindra protestues, përfshirë studentë hebraikë dhe aktivistë të së majtës, e kanë vërshëllyer dhe kanë brohoritur “nazistët jashtë” – duke valuar njëherësh flamuj me slogane “Ne nuk duam një Austri djathtiste ekstremiste”.

    Va nder Bellen e kishte zemëruar FPO-në, duke mos ia dhënë mandatin për formimin e Qeverisë menjëherë pas Zgjedhjeve, meqë asnjë partner koalicioni ishte shfaqur menjëherë për bashkëpunim me të. Mandati i ishte besuar Partisë Popullore konservatore dhe liderit të saj, kancelarit Karl Nehammer. OVP-ja e tij kishte dalë e dyta në Zgjedhje.

    Përpjekjet e Nehammerit për të krijuar një koalicion, së pari trepartiak e pastaj dypartiak, me patitë tjera centriste dështuan në fundjavë – duke e detyruar atë që të jepte dorëheqje.

    Nehammeri ka ngulmuar kaherë se partia e tij nuk do të qeveriste me Kicklin, duke theksuar se lideri i FPO-së beson në teori konspiracioni dhe se përbën kërcënim sigurie. Me tërheqjen e Nehammerit, mund të jetë hequr edhe vija e kuqe – shkruan Reuters. Pasuesi i tij i përkohshëm në krye të OVP-së, Christian Stocker ka thënë të dielën se partia e tij do të jetë pjesë e bisedimeve të udhëhequra nga Kickl.

    “Ne jemi krejt në fillim. Nëse ftohemi në këto bisedime, rezultati i atyre bisedimeve është i hapur.” – ka deklaruar për televizionin ORF, Wilfried Haslauer, guvernatori i shtetit të Salzburgut, njeri me peshë në parti, që kishte qëndruar krah Stockerit në deklarimin e tij para mediave si lider i OVP-së.

    Nëse dështojnë Zgjedhjet ka gjasë të ketë Zgjedhje të parakohshme dhe anketimet tregojnë se FPO-ja vetëm sa ka ardhur duke e ngritur mbështetjen prej shtatorit.

    OVP-ja dhe FPO-ja kanë tejkaluar dallime për disa çështje – përfshirë ashpërsimin e masave ndaj emigrantëve.

    Çështja më sprovuese në bisedimet e centristëve megjithatë ishte ulja e deficitit buxhetor, që pritet të tejkalojë tavanin e përcaktuar nga BE-ja prej 3% të prodhimit ekonomik të viteve 2024 dhe 2025.

    Përderisa dy partitë bëjnë thirrje për ulje taksash, FPO-ja është zotuar se do të mënjanojë disa prej interesave të OVP-së, si Oda e fuqishme e Tregtisë. Ato janë përplasur edhe për kundërshtimin e FPO-së ndaj ndihmës për Ukrainën në luftën e saj kundër Rusisë dhe për planet aktuale për një sistem raketor të mbrojtjes.

    Va der Bellen ka thënë vazhdimisht se do të jetë i kujdesshëm që të sigurojë “themelet e demokracisë” – përfshirë respektimin e të drejtat e njeriut, mediat e pavarur dhe anëtarësimin e Austrisë në Bashkimin Europian.

     

    Përgatiti: Rexhep Maloku – Kallxo.com

  • Harris do ta certifikojë Trumpin President, katër vjet pas trazirave të Kapitolit

    Zëvendëspresidentja demokrate e Shteteve të Bashkuara të Amerikës, Kamala Harris do ta udhëheqë të hënën, më 06.01.2025, certifikimin zyrtar në Kongres të rezultatit të Zgjedhjeve presidenciale të nëntorit 2024 – një garë që e kishte humbur kundrejt rivalit republikan, Donald Trump – ka raportuar transmetuesi britanik BBC.

    Kjo datë shënon edhe katërvjetorin e trazirave dhe mësymjes në Kapitolin amerikan, kur mbështetësit e Trumpit u munduan të pamundësonin certifikimin e presidentit demokrat, Joe Biden – pas fitores së Zgjedhjeve në nëntorin e vitit 2020. Kjo është një ceremoni formale.

    Por masa të rrepta sigurie janë marrë në Uashington DC dhe presidenti Biden është zotuar se nuk do të ketë përsëritje të dhunës së 06.01.2021, që rezultoi me disa të vdekur.

    Dhe derisa kongresistët po mblidhen në Uashington, stuhia e fuqishme e dëborës mund të shkaktojë telashe.

    Kryetari i Dhomës së Përfaqësuesve, Mike Johnson ka thënë se Ceremonia e Certifikimit në mbrëmje do të mbahet pavarësisht motit të ligë – duke deklaruar për Fox Newsin: “Pavarësisht se a do të ketë acar apo jo, ne do të të jemi në sallë që të sigurohemi që puna të kryhet”.

    Si zëvendëspresidente aktuale, Harrisit i kërkohet prej Kushtetutës amerikane që të udhëheqë zyrtarisht certifikimin e rezultatit pasi Trumpi e mposhti atë në Zgjedhjet kombëtare, më 05.11.2024.

    Trumpi i fitoi të gjitha – shtatë shtetet e pavendosura, duke e ndihmuar fitoren e tij në Kolegjin zgjedhor – mekanizmi që merr Presidencën. Do të jetë detyrë e Harrisit që të lexojë numrin e votave të Kolegjit zgjedhor, të fituara prej secilit kandidat.

    Mandati i dytë i Trumpit do të nisë pas inaugurimit të tij më 20 janar. Për herë të parë prej vitit 2017, partia e Presidentit do ta ketë shumicën edhe në dhomat e Kongresit, megjithëse me një epërsi të ngushtë.

    Fitorja e Trumpit shënoi një rikthim të jashtëzakonshëm prej humbjes së tij zgjedhore në vitin 2020 dhe pas dënimit penal më 2024 – i pari për një President aktual ose ish-President amerikan.

    Presidenti Biden është zotuar se do të ketë transferim paqësor të pushtetit presidencial.

    Përgatiti: Rexhep Maloku – Kallxo.com

  • “Një ditë dashurie”: Si e përmbysi Trumpi historinë e dhunshme të 6 janarit

    Presidenti i zgjedhur amerikan dhe aleatët e tij kanë shpenzuar katër vjet duke risajuar sulmin në Kapitol – duke përhapur teori konspiracioni dhe sajuar një histori martirizimi për hesapet e tyre aktuale politike – shkruan gazeta “New York Times”, në një analizë të gjatë katër vjet pas mësymjes së mbështetësve të Donald Trumpit ndaj Kongresit, pasi republikani i kishte humbur Zgjedhjet e vitit 2020 dhe po kundërshtonte certifikimin e presidentit demokrat, Joe Biden.

    Dhe brenda dy javësh, Trumpi pritet të kalojë edhe njëherë nëpërmjet portës harkore të Kapitolit të Shteteve të Bashkuara, që edhe njëherë të betohet si i zoti i Shtëpisë së Bardhë. Përderisa rituali i Ditës së inaugurimit për bartjen paqësore të pushtetit po përgatitet paqësisht, ai do të shkojë në të njëjtin vend ku u shfaqën skenat e tmerrshme të 6 janarit 2021, kryesisht në emër të tij.

    Menjëherë prapa shpinës së Trumpit do të jenë dyert prej metali e xhami, ku protestuesit, të nxitur prej rrenës së tij se i ishin vjedhur Zgjedhjet e vitit 2020, sulmuan Kapitolin me shufra metalike, gjësende të ndryshme dhe armë të tjera. Në të majtë të tij është pjesa e ndërtesës ku protestuesit e zhurmshëm ua morën anën policëve të paktë në numër. Në të djathtë të tij është pjesa ku ishte gjetur një grua e përgjakur që po vdiste.

    Dhe para tij janë shkallët e mermerta që lëshohen drejt foltores me vulën presidenciale. Në të njëjtat shkallë, katër vjet më parë, flamujt e Trumpit ishin valëvitur mbi turma të egërsuara njerëzish: ku një zyrtar policie ishte tërhequr zvarrë që të rrihej me një flamur amerikan dhe një tjetër polic do të tërhiqej e shkelmohej.

    “Rikthimi i pashpjegueshëm”

    Pas mësymjes së madhe ndaj Kapitolit, karriera e trazuar politike e Trumpit dukej se mori fund, derisa fjalët nxitëse të tij për prijësit e trazirave tronditën edhe liderët e vetë Partisë së tij Republikane, kujton gazeta “The Times”. Një mal faktorësh shpjegojnë kryengritjen e tij tronditëse, por asnjëri prej tyre nuk ta mbushë mendjen sesi ai dhe besnikët e tij ia dolën ta shpëlajnë historinë e 6 janarit – duke e kthyer ankthin politik në aset politik.

    Ajo që filloi si një përpjekje e sforcuar për të shfajësuar zotin Trump nga përgjegjësia për 6 janarin, filloi gradualisht pasi aleatët e tij në Kongres dhe media e hodhën poshtë sulmin dhe ia ridrejtuan fajin turmave të krahut të majtë, demokratëve dhe madje edhe Qeverisë. Rebelët e dhunshëm – të ndjekur penalisht, të dënuar dhe të burgosur – u kthyen disi në martirë patriotë.

    Ky interpretim i përmbysur sfidoi atë që vendi kishte parë me sytë e vet, por i përshtatej mjeshtërisht narrativës së persekutimit që e lidh Trumpin me shumë prej besnikëve të tij. Pasi kandidoi sërish për President, dyfishoi rikthimin e skenarit për trazirat dhe goditjen e saj, duke përfshirë një hetim të Kongresit dhe dy padi penale kundër tij, si pjesë e një viktimizimi të orkestruar. 

    “Hataja amerikane”

    Ajo ditë ishte një hata amerikane, vlerëson “The Times”. Kongresistët po luftonin për sigurinë e tyre. Zëvendëspresidenti, Mike Pence i shpëtoi një turme njerëzish që bërtiste se ai duhej të varej. Shumë njerëz vdiqën gjatë dhe pas trazirave: përfshirë një protestues prej të shtënave të armëve, katër policë nga vetëvrasja dhe më shumë se 14 zyrtarë policie u lënduan në një përleshje të stërzgjatur, që pothuajse e pezulloi çfarë do të duhej të ishte certifikim rutinor i fitores elektorale të kundërshtarit të Trumpit, Joseph R. Biden Jr.

    Por me kthimin e tij në pushtet, zoti Trump tani ka një platformë për ta shpëlarë dhe sajuar sulmin në Kapitol – në atë që e ka quajtur “një ditë dashurie”. Ai është zotuar se do të falë sulmuesit në orën e parë të marrjes së pushtetit, përderisa mbështetësit e tij në Kongres po kërkojnë ngritjen e akuzave penale kundër atyre që hetuan veprimet e tij në atë ditë kaotike.

    Kur është pyetur për riformulimin e sulmit në Kapitol dhe nëse zoti Trump duhet të pranojë ndonjë përgjegjësi për çfarë kishte ngjarë më 6 janar, zëdhënësja e tij, Karoline Leavitt, në vend të përgjigjes, ka thënë t’i referoheni një deklarate të “humbësve politikë”, të cilët u munduan ta nxjerrin nga binarët karrierën e tij politike dhe pretendoi se “mediat tradicionale ende refuzojnë ta raportojnë të vërtetën për çfarë ndodhi atë ditë”. Ajo ka shtuar se “populli amerikan nuk ra në grackën e frikës që e Majta e ngjallte për 6 janarin”.

    Tregimi për 6 janarin që e rrëfen zoti Trump është soji i vetë teorisë së zëvendësimit, aso që terron faktet e qarta sikurse tepihu i kaltër që mbulon ato shkallë të njollosura të Kapitolit në Ditën e Inaugurimit – shkruan e përditshmja “The Times”.

    Përgatiti: Rexhep Maloku – Kallxo.com

  • Zgjedhjet gjermane të 2025-tës: Kush prin në sondazhe?

    Mbështetja për SPD-në e kancelarit Olaf Scholz, të Gjelbrit dhe FDP-në ka rënë, derisa partitë opozitare, si CDU dhe AfD, kanë shfrytëzuar momentumin – ka raportuar të hënën, më 06.01.2025, Euronews.

    Skena politike e Gjermanisë po dëshmon një kthesë derisa po zbehet përkrahja për koalicionin “semafori” – duke u theksuar edhe më shumë pas prishjes së aleancës ndërmjet Socialdemokratëve të Scholzit, të Gjelbërve dhe Demokratëve të Lirë (FDP) pro-biznes.

    Njëherësh Unioni Kristiandemokrat (CDU) i së djathtës së qendrës dhe partia bavareze simotër, Unioni Kristiansocial (CSU) kanë vazhduar të kryesojnë në sondazhe, derisa e djathta ekstreme populiste, Alternativa për Gjermaninë (AfD) mbetet partia e dytë më e madhe opozitare.

    SPD-ja e kancelarit Scholzit ka ngelur prapa partisë së madhe opozitare, të prirë prej Friedrich Merzit, kur vjen puna te mbështetja popullore para Zgjedhjeve.

    Zëvendëskancelari Robert Habeck, nga radhët e të Gjelbërve, ka hyrë në garën për Kancelarinë, por partia e tij ka vazhduar të shënojë rënie të përkrahjes pas rënies së koalicionit trepartiak.

    AfD-ja e së djathtës ekstreme, që vazhdimisht ka shënuar ngritje, ka nominuar Alice Weidelin si kandidate për kancelare.

    Megjithatë partia mbetet politikisht e izoluar, derisa partitë tradicionale vazhdojnë të refuzojnë çfarëdo koalicioni me të.

    Prej të majtës, BSË-ja e porsaformuar, e prirë prej Sahra Wagenknechtit, ka materializuar pakënaqësinë populiste – duke diversifikuar edhe më tej mundësitë politike të Gjermanisë.

    Dhe, derisa po afrohen Zgjedhjet e reja, anketimet sugjerojnë një spektër të fragmentuar, pa asnjë parti afër një fitoreje absolute.

    Me gjasë rezultati do të shpije drejt negociatave për formimin e një koalicioni – shenjë e politikës gjermane.

    Sondazhet tregojnë se VDU/CSU janë në pozitë më të mirë për formimin e një koalicioni shumice, por që do t’u duhet edhe mbështetja nga të Gjelbrit ose SPD-ja. Përderisa, koalicioni aktual trepartiak nuk pritet të përtërihet me anketimet që e nxjerrin FDP-në poshtë pragut prej 5% për përfaqësim në Bundestag.

    Sistemi zgjedhor proporcional i Gjermanisë ofron një spektër të besueshëm për formim të mundshëm të Qeverisë pas Zgjedhjeve.

    Përgatiti: Rexhep Maloku – Kallxo.com