Ballina

Etiketë: Zgjedhjet

  • Delegacioni i Asamblesë së Këshillit të Europës me vizitë parazgjedhore në Kosovë

    Një delegacion prej tre anëtarësh i Asamblesë Parlamentare të Këshillit të Europës (PACE), i udhëhequr nga Petra Bayr, do të bëjë një vizitë parazgjedhore në Kosovë më 16-17 janar, për të vlerësuar fushatën zgjedhore dhe klimën politike, para Zgjedhjeve parlamentare më 9 shkurt.

    Në një komunikatë për media bëhet e ditur se, në Prishtinë, delegacioni pritet të takohet me Presidenten e Kosovës, Kryeministrin dhe Kryetarin e Kuvendit, si dhe me liderët dhe përfaqësuesit e grupeve kryesore politike të Kuvendit.

    “Gjithashtu janë planifikuar takime me delegacionin e Kuvendit të Kosovës në PACE, Kryetaren dhe anëtarët e Komisionit Qendror të Zgjedhjeve, Shefin e Misionit të BE-së për vëzhgimin e Zgjedhjeve dhe anëtarët e komunitetit ndërkombëtar, si dhe me përfaqësues të trupit diplomatik, shoqërisë civile dhe medias.” – thuhet në komunikatë.

    Delegacioni më pas do të dalë me deklaratë në përfundim të vizitës.

    Tutje, potencohet se një delegacion prej 20 anëtarësh do të udhëtojë në Kosovë për të vëzhguar Zgjedhjet më 9 shkurt.

    https://kallxo.com/lajm/numrat-e-partive-politike-per-zgjedhjet-e-9-shkurtit/

  • Rumani, mijëra protestues demonstrojnë kundër anulimit të Zgjedhjeve presidenciale

    Dhjetëra-mijëra rumunë protestuan të dielën në kryeqytetin Bukuresht, kundër vendimit të muajit të kaluar të Gjykatës Kushtetuese për anulimin e Zgjedhjeve presidenciale, pasi një kandidat i panjohur fitoi raundin e parë.

    Demonstruesit u ranë borive të makinave, valëvitën flamurin kombëtar dhe mbajtën pankarta ku shkruhej, “Duam Zgjedhje të lira” dhe bënë thirrje për demokraci. Shumë nga protestuesit kërkojnë vazhdimin e raundit të dytë të Zgjedhjeve presidenciale.

    Protesta vjen një muaj pasi Gjykata Kushtetuese mori vendimin e pashembullt, për të anuluar Zgjedhjet vetëm dy ditë përpara balotazhit të 8 dhjetorit.

    Avantazhi i politikanit populist, Calin Georgescu, i ekstremit të djathtë, tronditi shumë njerëz pas votimeve në raundin e parë më 24 nëntor. Më pas u ngritën akuza për shkelje zgjedhore dhe ndërhyrje të Rusisë.

    George Simion, udhëheqës i ekstremit të djathtë “Aleanca për Bashkimin e Rumunëve” tha gjatë protestës të dielën se: “Po protestojmë kundër grushtit të shtetit që ndodhi më 6 dhjetor”.

    Udhëheqësi i partisë që organizoi protestën të dielën tha për shtypin se: “Na vjen keq që zbuluam kaq vonë se po jetonim një gënjeshtër dhe se na udhëhiqnin njerëz që pretendonin se ishin demokratë, por që nuk janë. Kërkojmë rikthimin e demokracisë, përmes rifillimit të procesit zgjedhor – duke mbajtur raundin e dytë”.

    Anulim i Zgjedhjeve muajin e kaluar e ka zhytur Rumaninë në trazira. Vendi anëtar i Bashkimit Evropian dhe NATO-s është përfshirë edhe nga polemika të tjera – përfshirë rinumërimin e votave të raundit të parë.

    Rumania ka caktuar datën 4 maj për mbajtjen e raundit të parë të Zgjedhjeve të reja. Nëse asnjë kandidat nuk merr më shumë se 50% të votave, balotazhi do të zhvillohet dy javë më vonë, më 18 maj. Nuk është e qartë nëse zoti Georgescu do të mund të marrë pjesë në Zgjedhjet e reja.

    Populisti Calin Georgescu e ka apeluar vendimin për Zgjedhjet në një Gjykatë lokale, si dhe ka paraqitur një ankesë pranë Gjykatës Evropiane për të Drejtat e Njeriut.

    Vendimi i publikuar i Gjykatës Kushtetuese për anulimin e Zgjedhjeve përmendi përdorimin e paligjshëm të teknologjive dixhitale, përfshirë inteligjencën artificiale, si dhe përdorimin e “burimeve të padeklaruara” për financimin e fushatës. Zoti Georgescu kishte deklaruar zero shpenzime për fushatën./VOA

  • Çka presin votuesit e rinj në Kosovë?

    Edona Asllani priti Vitin e Ri në terr dhe kuptoi se Kosova ka nevojë për më shumë se vetëm premtime.

    Ajo nuk është përcaktuar ende se cilën parti do ta votojë në zgjedhjet parlamentare, por do që qeveria e ardhshme ta zgjidhë njëherë e përgjithmonë problemin e furnizimit me rrymë.

    “Për orë të tëra, natën e Vitit të Ri nuk kishim rrymë”, thotë 23-vjeçarja nga Ferizaj.

    “Unë nuk merrem me politikë, por do të votoj, sepse është obligim qytetar”, thotë ajo për Radion Evropa e Lirë.

    Edona dhe mbi dy milionë qytetarë me të drejtë vote do të mund të zgjedhin mes 28 subjekteve politike dhe katër kandidatëve për kryeministër në zgjedhjet e 9 shkurtit: Albin Kurti i Lëvizjes Vetëvendosje, aktualisht në pushtet; Bedri Hamza i Partisë Demokratike të Kosovës; Lumir Abdixhiku i Lidhjes Demokratike të Kosovës dhe Ramush Haradinaj i Aleancës për Ardhmërinë e Kosovës.

    Fushata e tyre zgjedhore nisi zyrtarisht më 11 janar.

    Vetëm në ditën e dytë të saj, Anisa Hajdini, e cila do të votojë për herë të parë, thotë se ka vendosur se cilës parti do t’ia japë besimin.

    “Idetë që ka paraqitur partia që kam zgjedhur, më kanë pëlqyer dhe pres ndryshime në sistemin e arsimimit universitar”, thotë studentja e Fakultetit Juridik në Universitetin e Prishtinës.

    “Nuk pres reforma të menjëhershme, sepse ato duhet të ndodhin në mënyrë graduale dhe të mendohen mirë… Por, për shembull, notimi me teste nuk më pëlqen, do të doja të bëhej me gojë”, thotë Anisa.

    Për herë të parë më 9 shkurt do të votojë edhe Amelia Sefa, studente e Arkitekturës në Universitetin e Prishtinës.

    Ajo nuk është përcaktuar ende se kujt do t’ia japë votën, por, ngjashëm, kërkon mbështetje më të madhe për studentët.

    “Të ketë, për shembull, furnizim me materialet e nevojshme për studime, por edhe një shumë të vogël financiare për nevojat personale të studentëve”, thotë Amelia.

    Gjin Prelvukaj është ende student, por do që të shohë ndryshime në kushtet e punësimit të të rinjve.

    Sipas tij, ato janë të domosdoshme për të rritur pjesëmarrjen e të rinjve në tregun e punës.

    Shkalla e papunësisë në mesin e personave 15-24 vjeç në Kosovë është 17.3 për qind.

    “Aktualisht, kur hapen konkurse për punë, kërkohet përvojë pune tre deri në pesë vjet. Kjo, automatikisht, e pamundëson pjesëmarrjen e të rinjve në konkurs, sepse me 22 vjet nuk mund ta kesh atë përvojë”, thotë studenti i Inxhinierisë së Mekatronikës.

    Edhe kolegu i tij, Lis Shala, do më shumë mundësi punësimi për të rinjtë dhe, siç thotë, paga më të dinjitetshme.

    Mesatarja e pagës në Kosovë, aktualisht, është 570 euro, por Lisi thotë se “minimalja duhet të jetë deri në 700 euro”.

    “… sepse qiraja, ushqimi, rryma, çmimet e produkteve janë shumë të larta. Pagat aktuale nuk sigurojnë mirëqenie sociale”, sipas tij.

    Diamant Maraj, 23 vjeç, thotë se partia që do ta votojë ai, ka premtuar rritje pagash dhe beson se ky premtim do të përmbushet.

    Për të, prioritet duhet të jetë edhe luftimi i korrupsionit.

    “Dyshohet se ka korrupsion me rrymën. Le të hiqen këto dyshime”, thotë Diamanti.

    Deri në mëngjesin e 9 shkurtit – sa do të zgjasë fushata zgjedhore – qytetarët do të kenë mundësi të dëgjojnë e shohin se çka premtojnë partitë politike.

    Në rrjete sociale, intervista e debate televizive, shumë prej tyre tashmë kanë shpalosur ide e premtime, qoftë për marrëdhëniet me jashtë, për zhvillimin ekonomik apo për reformat në shëndetësi e arsim.

    Ndonëse përmirësime të ngjashme janë premtuar edhe më herët, kërkesat e qytetarëve për më shumë ndryshime përsëriten para çdo palë zgjedhjeve.

    Sipas Komisionit Qendror të Zgjedhjeve, janë 2.075.868 votues brenda dhe jashtë Kosovës që do të mund të zgjedhin se kush do t’i përfaqësojë ata dhe interesat e tyre gjatë katër vjetëve të ardhshëm.

    Prej tyre, mbi 125 mijë janë votues të rinj që i kanë mbushur 18 vjet në mes të dy proceseve zgjedhore.

    “Deri më tash, asnjë parti nuk më ka bindur deri në atë pikë që të them se është ideale për t’u votuar”, thotë juristja 23 vjeçe, Mimoza Maqedonci.

    Ajo pret zhvillimin e fushatës për t’u informuar më shumë për ofertat e tyre./REL

  • Anëtarët e KQZ-së pretendojnë për ndikim në procesin e votimit në diasporë, Kurteshi i quan tendecioze 

    Anëtarë të KQZ-së në mbledhjen e mbajtur të premten, më 10.01.2025, ngritën pretendime për ndikim në procesin e votimit në diasporë. 

    Ishte anëtari i PDK-së në KQZ, Ilir Gashi, i cili ngriti shqetësime për procesin e votimit në diapsorë, duke thënë se ka tendecë për t’u pamundësuar apo manipuluar në disa raste ky lloj votimi. 

    Duke lëshuar një video-incizim përpara anëtarëve të KQZ-së, Gashi pretendoi se në rrjete sociale, ata që janë regjstruar për të votuar, po marrin ndihmë se si të votojnë dhe se po bëhet thirrje për ata që janë regjistruar për të votuar, të votojnë me postë. 

    Sipas Gashit, votimi me postë duhet të bëhet vetëm individualisht. 

    “Kam pranu video nga qytetarë që i ftojnë votuesit për t’u regjistruar përmes postës, gjoja për t’iu ndihmuar. Këto janë thirrje, përpjekje për kontaminim të procesit. Votimi përmes postës duhet të jetë individual, nëse ka dikush nevojë për informacione duhet të drejtohet në KQZ.” – ka thënë Gashi.

    Ai deklaroi se Prokuroria duhet të merret me këto çështje dhe se secili qytetar që bën një gjë të tillë, të ballafaqohet me Prokurorinë Speciale dhe Ligjet e Kosovës. 

    Këto pretendime të Gashit të PDK-së i kundërshtoi anëtari i LVV-së në KQZ, Sami Kurteshi. 

    Ai mohoi se video të tilla janë shqetësuese, duke thënë se Gashi ka tendencë të shpërndajë dyshime te njerëzit. 

    “Hiç nuk është shqetësim. Gjithkush e ka obligim gjithkujt me i ndihmu, deri në momentin që nuk shkruan votë me dorën e tij në votën e huaj. Secili prej nesh e ka për detyrë me i ndihmu çdokujt, deri në momentin që ai e mbush fletëvotimin vetë me dorën e tij. Kolegu don me shpërnda një skepticizëm, një dyshim te njerëzit që kurrkush-kurrkujt të mos i ndihmojë.” – tha Kurteshi. 

    Anëtari i PDK-së, Ilir Gashi gjatë mbledhjes kundërshtoi edhe ndërhyrjet e mundshme në votime dhe mbledhjen e Certifikatave personale të votuesve për t’u dërguar në Postë.  

    “Nuk lejohet ndërhyrja në votues, nuk lejohet mbledhja e Certifikatave personale të votuesve. As grumbullimi i tyre në një vend të caktuar, e pastaj dikush me i mbeldh e me i dërgu në Postë”.

    Ashpër i është kundërpërgjigjur Kurteshi i VV-së, i cili i quajti shpifje pretendimet e Gashit, duke thënë se këto diskutime po i bën ngase në Zgjedhjet paraprake, pjesa më e madhe e votave nga diaspora kanë qenë për Lëvizjen Vetëvendosje.

    “Po shpif. Nuk ka kërku kurrkush me i mbledhë Certifikatat. Pse po e përmend këtë? Kjo është dhimtë e 2021-shit, në 2021 78% të votave nga mërgata kanë qenë për Lëvizjen Vetëvendosje, prandaj. Prespektiva po shihet këtu. Le të delë Prokuroria, cilindo element që e gjen për vepër penale, ajo duhet me reagu.” – tha Kurteshi. 

    Tutje, anëtari i LDK-së në KQZ, Sami Hamiti gjatë fjalës së tij në mbledhje është shprehur se KQZ ka kryer punë të shkëlqyeshme për njoftimin e diasporës se si duhet të votohet. 

    “Ky insitucion e ka kry punën në mënyrë të shkëlqyeshme. Pjesët tjera po, shihet ashiqare, asistim në grup është. Konsideroj që nuk është në rregull. Nëse është nevoja KQZ me pas ende sqarime, por me u bo tubime me u votu, kredibilitet nuk ka.” – ka thënë Hamiti.   

    Procesi i votimit jashtë vendit do të zhvillohet në 17 Ambasada dhe 15 Konsullata, në 19 shtete të ndryshme të botës. Numri i qytetarëve, sipas të dhënave të KQZ-së, të cilët janë regjistruar për të votuar jashtë Kosovës është 104 mijë e 924 votues.

    Prej shumës totale, 84 mijë e 525 prej tyre kanë zgjedhur të votojnë përmes postës. Të dhënat e regjistrimit të popullsisë të vitit 2024, nga Agjencia e Statistikave të Kosovës, vënë në pah se në diasporë jetojnë rreth 550 mijë kosovarë.Gjithsej 2 milionë e 75 mijë e 868 votues do të kenë të drejtë vote këto Zgjedhje – sipas të dhënave të KQZ-së. Numri i qytetarëve me të drejtë vote në vendvotime vetëm në Kosovë është 1 milion e 970 mijë e 944 votues.

    Në Zgjedhjet parlamentare do të garojnë 27 subjekte politike. Prej tyre 19 janë parti politike, pesë koalicione, dy nisma qytetare dhe një kandidat i pavarur. Ky është procesi i parë i rregullt zgjedhor në Kosovë, që nga shpallja e Pavarësisë më 2008.

  • Lista Serbe e akuzon KQZ-në se po ia mohon të drejtën për vëzhgim e kontroll në ditën e zgjedhjeve

    Lista Serbe, partia më e madhe e serbëve në Kosovë, ka shprehur pakënaqësi për përbërjen e komisioneve zgjedhore për numërimin e votave për zgjedhjet parlamentare të 09.02.2025 në vendvotime dhe në qendrat e numërimit të votave.

    Ajo e ka akuzuar Komisionin Qendror të Zgjedhjeve (KQZ) se e ka dëmtuar atë, pasi në shumë komuna, Lista Serbe nuk ka anëtarë të vet për të “kontrolluar ligjshmërinë, legjitimitetin dhe karakterin demokratik të zgjedhjeve”.

    Zyrtari i kësaj partie, Igor Simiq, tha në një konferencë për media se partia e Nenad Rashiqit, Partia për Liri, Drejtësi dhe Mbijetesë, është “favorizuar” dhe se, në disa raste, ka më shumë anëtarë në komisionet zgjedhore, edhe pse, sipas tij, në zgjedhjet e vitit 2021 kjo parti mori dukshëm më pak vota.

    Si shembull për pretendimet e tij, Simiq e mori komunën e Istogut, ku në zgjedhjet e vitit 2021 Lista Serbe mori 259 vota, por nuk ka asnjë kryesues apo anëtar në komisionin zgjedhor, në qendrën komunale të numërimit të votave ose në vendet për votimin me kusht.

    Simiq theksoi se Lista Serbe, edhe pse parlamentare, ka më pak anëtarë në komisionet zgjedhore, madje edhe në komunat me shumicë serbe.

    “Në komunën e Mitrovicës së Veriut, Lista Serbe si parti parlamentare ka 18 përfaqësues në vendvotime, përfshirë vetëm tre kryesues nga gjithsej 24 vendvotime dhe 15 anëtarë. Si rrjedhojë, mund të llogaritni vetë – në gjashtë vende ne nuk kemi përfaqësuesit tanë, që do të thotë se në gjashtë klasa me potencialisht 6.000 votues, nuk kemi kontroll mbi procesin zgjedhor, pasi nuk kemi anëtarë të cilët mund ta mbikëqyrin procesin”, tha Simiq.

    Ai gjithashtu theksoi përpjekjet e Lëvizjes Vetëvendosje në pushtet për të penguar Listën Serbe që të marrë pjesë në zgjedhje, duke deklaruar se kjo parti është “mburoja e mbrojtjes së interesave të serbëve dhe Serbisë në Kosovë”.

    Radio Evropa e Lirë iu drejtua Komisionit Qendror të Zgjedhjeve në lidhje me akuzat e Listës Serbe për “shkeljen e rregullave zgjedhore”, por deri në publikimin e lajmit nuk ka marrë përgjigje.

    Lista Serbe gjatë ditës paraqitur një ankesë në Panelin Zgjedhor për Ankesa dhe Parashtresa kundër vendimit të KQZ-së për përbërjen e komisioneve zgjedhore.

    Ndërkohë, Lëvizja Vetëvendosje bëri përpjekje ta ndalonte pjesëmarrjen e Listës Serbe në zgjedhjet e 9 shkurtit duke kërkuar moscertifikimin e saj, por Paneli Zgjedhor për Ankesa dhe Parashtresa në dy raste mori vendime në favor të Listës Serbe.

    Përfaqësuesit e partisë në pushtet e kanë arsyetuar kundërshtimin e certifikimit të Listës Serbe duke thënë se kjo parti nuk e njeh shtetin e Kosovës dhe vazhdon ta quajë atë provincë autonome të Serbisë, “Kosova dhe Metohia”.

    Ndër arsyet e kundërshtimit të pjesëmarrjes së Listës Serbe në zgjedhje nga Vetëvendosja është edhe fakti se partia serbe nuk është distancuar nga ish-nënkryetari i saj Millan Radoiçiq, i cili ka marrë përgjegjësinë për sulmin e armatosur në Banjskë, ku u vra një polic kosovar.

    Ndërkohë, kryetari i Listës Serbe, Zllatan Ellek, deklaroi se kryeministri i Kosovës, Albin Kurti, po përpiqet të pengojë pjesëmarrjen e kësaj partie në zgjedhje, pasi e konsideron atë “kundërshtarin më të madh”.

    Lista Serbe u themelua në vitin 2013 me mbështetjen e Beogradit zyrtar dhe që atëherë ka pasur mbështetje për të marrë pjesë në institucionet e Kosovës.

    Deri më tani, në të gjitha proceset zgjedhore ku ka marrë pjesë, kjo parti ka fituar mbi 90 për qind të votave të komunitetit serb, por Misioni Vëzhgues i BE-së, në raportin e saj të vitit 2021, ka përfunduar se Lista Serbe ka “monopolizuar jetën politike ndërmjet serbëve të Kosovës” dhe janë shënuar raste të frikësimit dhe presionit ndaj votuesve nga kandidatët dhe aktivistët e kësaj partie./REL