Ballina

Etiketë: Zgjedhjet

  • Për çka u gjobit “Koalicioni për Familjen” nga PZAP?

    Më 28.01.2025 profili në rrjetin social ‘TikTok’ me emër ‘Shqiperia zgjohet’ ka publikuar një fotografi/video të bartësit të listës së ‘Koalicioni për Familjen’, Eman Rrahmani, në të cilën shkruhet “ish-deputeti i LVV u dënua me 7000 euro gjobe vetëm se ne nje tubim elektoral deklaroi qe neqoftse do qeveriste ne Kosove nuk do te lejonte kurrë martesat burre me burre e gru me gru”.

    KALLXO.com ka kontrolluar vendimet për dënime të Panelit Zgjedhor për Ankesa dhe Parashtresa (PZAP) që nga nisja e fushatës zgjedhore në Kosovë (11.01.2025) e deri më 31.01.2025.

    Më 28.01.2025, PZAP kishte publikuar vendimin për dënimin me 7,500 euro ndaj subjektit politik ‘Koalicioni për Familje’. Në vendimin e PZAP-së thuhet se dënimi është shqiptuar pas gjuhës së përdorur nga kandidati për deputet, Eman Rrahmani në rrjetin social Facebook.

    “Paneli, pas shikimit të shkresave të ofruara si provë materiale në ankesë, të cilat janë bërë nga Koalicioni për Familjen, respektivisht nga kandidati për deputet Eman Rrahmani në rrjetin social facebook, ku shihet se i njëjti ka postuar deklaratat duke përdorur fjalët “Po thonë që nuk bon me ju thanë “turp” atyre që cenojnë familjen. Turp edhe marre, secilit, organizatë joqeveritare që financon degjenerimin e fëmijeve! Turp dhe marre secilës komunë e secilit kryetar komune që i financon këto organizata, me e prish familjen!””- thuhet në vendimin e PZAP-së.

    Përveç këtij dënimi, ‘Koalicioni për Familje’ që nga fillimi i fushatës zgjedhore është dënuar edhe me tri gjoba të tjera.

    Ky subjekt politik ishte dënuar më 5 mijë euro më 23.01.2025 me arsyetimin se kandidati për deputet Jeton Haxhimustafa në rrjetin social Facebook kishte postuar një deklaratë duke përdorur fjalët “A po e kuptoni se këtu kemi të bëjmë me idiologji dhe se i kemi shumë arsye për t’u përgjigjur masovikisht këtyre bojkotimeve që po i bëhën Koalicionit për Familjen, fillimisht përmes RTK-së dhe tani përmes PZAP-së vetëm që të na detyrojnë të heshtim përballë degjenerimit. Por, përkundrazi, s’ka pushtet që i nënshtrohemi apo na pengoj që t’i themi jo martesës burrë me burrë dhe grua me grua. PIKE!”.

    ‘Koalicioni për Familje’ ishte gjobitur me 4,500 euro të tjera nga PZAP më 22.01.2025 për gjuhën e përdoror të kandidatëve për deputetë, Fatmir Smajli dhe Eman Rrahmani kundrejt komunitetit LGBTI+.

    Në vendimin e PZAP-së thuhet se gjuha e përdorur nga subjekti politik ‘Koalicioni për Familjen” ndaj LGBTI+ në tubimet zgjedhore në Pejë më datë 17.01.2025, është në kundërshtim me Kodin e Mirësjelljës për Subjektet Politike.

    “…sipas panelit përdorimi i gjuhës së tillë ka për qëllim ofendimin, denigrimin dhe njëherit shihen si shprehje me ngjyrime përçmuese ose nënvlerësuese”- thuhet në arsyetimin e vendimit të PZAP-së.

    Më 23.01.2025, ky subjekt politik ishte dënuar me 1,500 euro nga PZAP me arsyetimin se vendosja e posterit të kandidates Dorontina Kokollari në shtyllën elektrike në Komunën e Suharekës ishte në kundërshtim me dispozitat ligjore.

    Shuma të majme të gjobave ka shqiptuar PZAP kundrejt partive politike që nga fillimi i fushatës zgjedhore. 

    PZAP u ka shqiptuar gjoba në vlerë 125 mijë euro subjekteve politike për shkelje të rregullave zgjedhore që nga fillimi i fushatës zgjedhore, e cila ka nisur më 11.01.2025 e deri më 22.01.2025.

    Sipas vendimeve të publikuara, nga 11 deri më 22.01.2025, Lidhja Demokratike e Kosovës, ishte dënuar me 45 mijë euro për gjashtë raste të ndryshme.

    Me 20 mijë euro ishte dënuar Lidhja Demokratike e Kosovës për krahasimin e kandidates për deputete, Xhenet Syka Kelmendi, e cila e ka krahasuar kandidatin e LVV-së për kryeministër, Albin Kurtin, me Adolf Hitlerin.

    Nga 11 deri më 22.01.2025 Partia Demokratike e Kosovës për 10 ditë fushatë është dënuar gjithsej 44,500 euro për 10 raste të ndryshme.

    Gjoba prej 8 mijë eurosh iu dha PDK-së për shkak të postimit të një video ku shihet Sami Lushtaku duke i quajtur aktivistet e LVV-së ‘zagarë’.

    Deri më 22.01.2025 koalicioni AAK, Nisma Socialdemokrate, Konservatorët, Forumi Intelektual E-30, është dënuar me gjithsej  23,500 euro për tri raste të ndryshme.

    Po ashtu, PZAP për 10 ditë fushatë, nga 11 deri më 22.01.2025 e ka gjobitur me 12 mijë euro partinë Lëvizja Vetëvendosje për katër raste të ndryshme.

    Më 30.01.2025, PZAP e ka dënuar Lëvizjen Vetëvendosje me 8 mijë euro gjobë për pengimin e gazetarëve gjatë fushatës zgjedhore në dy raste të ndryshme. Sipas vendimit, Lëvizja Vetëvendosje me 5,500 euro gjobë është dënuar për pengimin e gazetarëve në tubimin e saj në Malishevë të mbajtur më 25.01.2025.

    Në të njëjtën ditë, më 30.01.2025, PZAP e ka dënuar edhe me 10 mijë euro Lëvizjen Vetëvendosje, për shkelje të Kodit të Mirësjelljes për Subjektet Politike gjatë fushatës zgjedhore.

    Në vendim thuhet se AAK-ja është ankuar se kandidatja për deputete, Donika Gërvalla dhe kandidati për kryeministër, Albin Kurti kanë përdorur gjuhë të papërshtatshme gjatë fjalimit të tyre në një tubim në Deçan, më 26.01.2025.

    “Sipas parashtruesit të Ankesës, gjatë këtij fjalimi, Donika Gërvalla-Schwartz, duke aluduar për Ramush Haradinajn, të njëjtin e quan ‘Gjeneralë të vetëshpallur’ (në shumës), e më pas vazhdon e njëjta ‘Prandaj, unë mendoj që aq më pak meriton respekt kush sakrificën personale apo familjare e përdor për arsyetim për krim, për korrupsion, për vrasje apo mashtrim’” – thuhet në vendimin e PZAP-së.

    PZAP është organ i përhershëm, i pavarur kompetent për të vendosur në lidhje me ankesat e lejuara që kanë të bëjnë me procesin zgjedhor siç është caktuar me Ligjin për Zgjedhjet e Përgjithshme në Republikën e Kosovës, Ligjin për Zgjedhjet Lokale në Republikën e Kosovës dhe me Rregullat zgjedhore.

    Fushata pёr Zgjedhjet parlamentare nё Kosovё ka filluar zyrtarisht, mё 11.01.2025. Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare që do të mbahen më 09.02.2025.

    Për këto Zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre

     – me qëllim të fitimit të përkrahjes nga votuesit e tyre;– të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues

     – në pajtim me rregullat e KQZ-së dhe ligjet e tjera në fuqi.

    Këto do të jenë Zgjedhjet e para të rregullta, që Kosova mban që nga shpallja e pavarësisë më 2008.

  • AfD-ja, me votimin e mocionit ndaj azilit, dridh Parlamentin gjerman

    Parlamenti gjerman është përfshirë në fjalosje dhe akuza fajësie, pasi u shkërmoq “muri i zjarrtë” që ishte ngritur kundër bashkëpunimit me partinë e së djathtës ekstreme – raporton transmetuesi britanik BBC.

    Një mocion jodetyrues që bën thirrje për rregulla më të serta të kontrollit kufitar dhe të azilit kaloi me mbështetje të partisë së djathtë ekstreme, Alternativa për Gjermaninë (AfD). Gjatë seancës së zjarrtë, politikanë të partive të ndryshme patën kritika dhe fajësuan njëra-tjetrën.

    Lideri i konservatorëve të CDU-së, Fiedrich Merz, i cili shtroi planet, i ka mbrojtur si “të domosdoshme”. Por, kancelari socialdemokrat, Olaf Scholz, e qortoi lëvizjen si “gabim të pafalshëm”.

    Merzi planifikon të propozojë sot legjislacion – përsëri me mbështetje të AfD-së – me synim të frenimit të numrit të emigrantëve dhe të drejtave të bashkimit familjar.

    Por, masat e tij të propozuara zor se do të futen në fuqi para Zgjedhjeve të parakohshme të shkurtit – dhe nëse po – atëherë do të binin ndesh me legjislacionin e Bashkimit Europian.

    Duke iu referuar mbështetjes së AfD-së për mocionin, lideri i CDU-së ka deklaruar në Bundestag se një politikë nuk është e gabuar vetëm pse “e mbështesin njerëzit e gabuar”.

    “Sa fëmijë janë bërë viktima të akteve të tilla të dhunës para se ju të besoni se ka një kërcënim për sigurinë dhe rendin publik?” – ka pyetur ai.

    Lideri i CDU-së, i cili llogaritet se do të jetë Kancelari i ardhshëm i Gjermanisë, pasi partia e tij prin në anketime, ka ngulmuar gjithashtu se as nuk e ka kërkuar e as nuk e dëshiron përkrahjen e AfD-së.

    “Të mendosh se si fraksioni i AfD-së do të gëzohet dhe fytyrat e tyre do të lumturohen, më bën të ndihem në siklet.” – ka deklaruar ai para deputetëve.

    Kancelari Scholz – një socialdemokrat koalicioni i të cilit ra vjet – i ka qortuar ashpër veprimet e Merzit.

    “Që nga themelimi i Republikës Federale të Gjermanisë mbi 75 vjet më parë ka pasur gjithmonë konsensus të qartë midis të gjithë demokratëve në Parlamentet tona: ne nuk bëjmë kauzë të përbashkët me të djathtën ekstreme.”

    Debati tashmë i tensionuar i Gjermanisë mbi emigracionin është ndezur pas një serie sulmesh fatale, ku të dyshuarit ishin azilkërkues, së fundmi në qytetin Aschaffenburg.

    Është kthyer në çështjen qendrore në fushatën për Zgjedhjet – shkaktuar nga prishja e koalicionit qeverisës të Scholzit.

    Mocioni i CDU-së i së mërkurës, i mbështetur nga AfD-ja dhe FDP-ja liberale, bën thirrje për “ndalim” të kujtdo që tenton të hyjë në Gjermani pa dokumentet e duhura, por nuk mund të detyrojë Qeverinë aktuale të pakicës të veprojë.

    Është e vështirë të mbivlerësohet rëndësia e murit të zjarrit kundër së djathtës ekstreme në kulturën politike gjermane. Përkujtimi i Holokaustit luan një rol themelor në Gjermaninë moderne.

    Para votimit të së mërkurës, Bundestagu mbajti përkujtimin e tij vjetor për viktimat e nazistëve, ku 88-vjeçari i mbijetuar i Holokaustit, Roman Schwarzmann iu drejtua Parlamentit.

    Përgatiti: Rexhep Maloku – Kallxo.com

  • Ekonomia e Kosovës: Shumë premtime, pak përparime

    Kur ka prezantuar programin e Qeverisë së tij në maj të vitit 2021, kryeministri i Kosovës, Albin Kurti, ka thënë, mes tjerash, se potenciali i madh i prodhimit të ushqimit në Kosovë, duhet të shfrytëzohet jo vetëm për nevoja të brendshme, por edhe për të eksportuar.

    Ai ka thënë se do të angazhohet në blerjen e makinerive prodhuese dhe përpunuese për eksport, si dhe do t’i ndihmojë bizneset në gjetjen e tregjeve për eksport.

    Në kuadër të mbështetjes për to, ka thënë se Kosova do të themelojë edhe Bankën e saj Zhvillimore.

    “Ajo do të jetë mekanizëm për mbështetjen e sektorit privat dhe promovimin e investimeve. Ajo do të jetë komponenti kreditues, që do të financohet nga paratë publike dhe shitja e letrave të borxhit, duke investuar në degë të caktuara të industrisë, që krijojnë vende pune dhe përmirësojnë bilancin tregtar”, ka thënë Kurti në vitin 2021.

    Katër vjet më vonë, kjo bankë nuk është themeluar dhe bilanci tregtar nuk është se ka ndryshuar.

    Të dhënat e Agjencisë së Statistikave të Kosovës dhe të Doganës së vendit tregojnë se në vitin 2021 vlera e eksporteve në Kosovë ka qenë 775.7 milionë euro, kurse e importeve 4.6 miliardë euro.

    Në vitin 2024, eksportet janë rritur në 990.2 milionë euro, por edhe importet në 6.3 miliardë euro.

    Kurti edhe në fushatën për zgjedhjet e 9 shkurtit – në të cilat do të garojë për mandatin e dytë si kryeministër nga Lëvizja Vetëvendosje – bën premtime të ngjashme.

    “Do të ofrojmë mbështetje deri në një miliard euro për investime të mesme e të mëdha në ndërmarrjet prodhuese cep më cep Kosovës. Do ta shtojmë prodhimin, do ta shtojmë investimin, do ta mundësojmë riinvestimin dhe do ta rrisim eksportin”, ka thënë Kurti në një tubim me mbështetësit e tij në Gjakovë.

    Me këso premtimesh, mbështetësve u drejtohen edhe kundërkandidatët e tij.

    Bedri Hamza i Partisë Demokratike të Kosovës ka thënë se do të ndajë mbi 6 miliardë euro për projekte kapitale dhe zhvillimore.

    “Ne nuk i ofendojmë bizneset private. Ne do t’i mbështesim bizneset private. Në qeverinë time, nuk do të ketë më pagesa të TVSH-së në kufi, por në brendi të Kosovës, pas shitjes së produkteve dhe jo përpara”, u ka thënë Hamza mbështetësve në Skenderaj.

    Për Lumir Abdixhikun e Lidhjes Demokratike të Kosovës, bizneset krijojnë vende të reja të punës, eksportojnë dhe ulin deficitin e lartë tregtar. Është “paradoks i kohës”, sipas tij, që ato edhe sot e kësaj dite përballen me mungesë të energjisë elektrike.

    “Pas 9 shkurtit, Qeveria e Kosovës, qeveria e djathtë, bizneset i sheh si partner. Do të punojë me to dhe do ta bëjmë Kosovën me to”, ka thënë Abdixhiku gjatë një vizite në një kompani për konstruksione metalike.

    Këtë pikëpamje për bizneset, në disa tubime me mbështetës, e ka ndarë edhe Ramush Haradinaj i Aleancës për Ardhmërinë e Kosovës.

    “Duhet të dërgojmë sinjale të qarta se biznesi është partner. Bizneset janë vlerë e shtuar, krijojnë buxhet, krijojnë investime. Duhet t’i fuqizojmë sipërmarrësit tonë, jo vetëm të mëdhenjtë dhe jo vetëm do, por çdo sipërmarrës të Kosovës duhet ta kemi partner”, ka thënë Haradinaj para mbështetësve të tij në Rahovec.

    Secila prej këtyre partive, në periudha të ndryshme pas pavarësisë e këndej, ka qenë ose në krye të Qeverisë së Kosovës, ose partnere koalicioni. Subvencione për bizneset ka pasur aty-këtu.

    Në konferencën e fundvitit të kaluar me afaristë, Kurti ka thënë se, për tre vjet, u ka shpërndarë bizneseve 1.3 miliard euro në formë të granteve dhe programeve të tjera, për të forcuar konkurrencën e tyre në tregjet vendore e ndërkombëtare.

    Por, bilanci tregtar nuk është përmirësuar asnjëherë. Kosova çdo vit importon mesatarisht 5 miliardë euro mallra, nisur nga qepët, domatet e mollët deri te materialet ndërtimore, ndërsa eksporton në vlerën e më pak se 1 miliard eurove, kryesisht produkte të metalit dhe plastikës.

    Prodhuesit kosovarë ankohen vazhdimisht për Tatim të lartë mbi Vlerën e Shtuar, për ekonomi joformale, kamata të larta për kredi, mungesë infrastrukture, jostabilitet me rrymë e të tjera.

    Ramiz Gashi prej vitesh udhëheq kompaninë “Relux” jashtë Prishtinës, e cila merret me prodhimin e ngjyrave dhe të fasadave. Me mbi 40 të punësuar, ai thotë se kompania ka arritur të eksportojë në 11 vende të botës, përfshirë Gjermaninë, Francën, Britaninë e Qipron – të gjitha me forcat e veta.

    “Deri më tani, që sa vite operojmë… jo vetëm kjo Qeveria e tanishme që bën premtime shumë, por edhe të kaluarat që kanë bërë premtime të njëjta, asnjëra prej tyre nuk na ka dalë në ndihmë, pa marrë parasysh se çfarë kërkesash kemi pasur – ndoshta edhe një kërkesë sa më elementare”, thotë Gashi për programin Expose të Radios Evropa e Lirë.

    Gashi tregon se biznesi i tij, sa herë që bie shi, rrethohet nga uji, për shkak të infrastrukturës së dobët të kanalizimit përreth. Ky problem, sipas tij, e pengon punën e biznesit dhe do të duhej të zgjidhej me urgjencë.

    “Ne kemi bërë disa herë kërkesa, protesta e peticione, jo vetëm ne, por të gjitha bizneset që operojnë këtu, dhe të gjitha kanë hasur në veshë të shurdhër”, thotë Gashi.

    Ky biznesmen shpreh bindjen se mund të bëhet gjigant i madh eksportues dhe të ndikojë edhe në rregullimin e bilancit tregtar, nëse merr një dorë nga shteti.

    “Ne nuk kërkojmë që të na jepet diçka krejt falas, por të paktën të na mundësohet ndonjë kredi me kamatë më të favorshme dhe të kemi ndonjë lehtësirë. Këtë e presim nga qeveritë në ardhje”, thotë Gashi.

    Lulzim Rafuna, kryetar i Odës Ekonomike të Kosovës, thotë se cilado parti që krijon Qeverinë, e ka mundësinë t’i realizojë premtimet ndaj bizneseve, nëse do që t’i trajtojë ato me seriozitet.

    Sipas tij, Kosova nuk e ka luksin për ta pasur borxhin publik në 17 për qind të bruto prodhimit të brendshëm, kur me ligji mund të shkojë deri në 40 për qind, dhe ta shfrytëzojë atë në favor të zhvillimit.

    “Vendim i parë i Qeverisë do të duhej të ishte përcaktimi i sektorëve konkurrues të Kosovës dhe të përqendrohet tek ata, t’i mbështesë, t’i subvencionojë, të marrë masa, qoftë administrative, qoftë në kuptimin e politikave fiskale apo të normave të interesit, në mënyrë që bizneset të prodhojnë sa më shumë, të eksportojnë sa më shumë dhe ta zbresin importin që e kemi kaq të lartë”, thotë Rafuna për Exposenë.

    Në mënyrë konkrete, ai numëron edhe tre hapa: reformën e Tatimit të Vlerës së Shtuar, lirimin e më shumë lëndëve të para dhe diplomacinë ekonomike. Rritja e prodhimit, e rrjedhimisht eksportit, pastaj është e garantuar.

    “Duke ia krijuar kushtet biznesit, ti përveçse e rrit atë biznes që e ke brenda Kosovës, motivon edhe ardhjen e investitorëve të huaj. Ne duhet ta kemi parasysh se Kosova nuk mund të zhvillohet e vetme dhe duke u mbyllur. Është urgjente për Kosovën që t’i bashkohet çdo iniciative që promovon tregun e hapur të importimit dhe eksportimit të produkteve”, thotë kryetari i OEK-ut.

    Lekë Musa, ekspert i ekonomisë dhe ish-drejtor i Odës Ekonomike Amerikane në Kosovë, thotë se Kosova e ka të pamundur që ta zhvillojë secilën industri, por janë disa, si teknologjia informative, industria e drurit apo e frutave, që mund të shpërthejnë në tregjet e jashtme.

    “T’iu ndihmohet atyre duke u krijuar parakushte dhe politika stimuluese, por në radhë të parë t’iu hiqen barrierat që i pengojnë në baza ditore. Pastaj, ka mundësi për t’i ndihmuar edhe në përmirësimin e cilësisë, edhe në mbërritjen e standardeve që kërkohen në tregjet evropiane”, thotë Musa për Exposenë.

    Të dhënat e Agjencisë së Statistikave të Kosovës për vitin 2023 tregojnë se vendi i ka pasur 68.390 biznese aktive, në krahasim me 81.692 sa i ka pasur në vitin 2022.

    Bilanci tregtar pozitiv, sipas ekspertëve, e forcon ekonominë dhe siguron stabilitet financiar.

    Sipas një parashikimi të Bankës Botërore në tetor të vitit të kaluar, rritja ekonomike në Kosovë këtë vit do të jetë 3.9 për qind, nga 3.8 për qind sa ka qenë vitin e kaluar.

    Me popullsi relativisht të re, me tokë të përshtatshme për kultivimin e kulturave të ndryshme, me burime ujore e minerare, Kosova 1.6 milionëshe ka shpresë… por kjo shpresë merr formë vetëm kur qeveritë t’i zëvendësojnë premtimet me veprime – mundësisht përpara ciklit të ardhshëm zgjedhor./REL

  • Nis tërheqja e pakove të para me fletëvotime nga kutitë postare në Shtutgart, Vjenë dhe Podgoricë

    Komisioni Qendror i Zgjedhjeve (KQZ) ka njoftuar se ka filluar tërheqjet e para të pakove me fletëvotime nga kutitë postare në Shtutgart, Vjenë dhe Podgoricë.

    Sipas njoftimit, duke filluar nga sot, 23.01.2025, KQZ ka filluar me tërheqjet e para të pakove me fletëvotime nga kutitë postare, në të cilat shtetasit e Kosovës të regjistruar për të votuar përmes postës mund të dërgojnë pakon e tyre me fletëvotim. Sipas njoftimit, nga Shtutgarti i Gjermanisë janë tërhequr 6,054 pako me fletëvotime, nga Podgorica në Mal të Zi janë tërhequr 80 pako me fletëvotime dhe nga Vjena në Austri 712 pako me fletëvotime.

    “Në përputhje me procedurat, gjatë ditës së enjte është realizuar tërheqja e 6,054 pakove me fletëvotime nga kutia postare e KQZ-së në Shtutgart të Gjermanisë dhe të njëjtat janë dërguar në Konsullatën e Republikës së Kosovës në këtë qytet, të cilat janë vendosur në dhomën e sigurisë dhe që vëzhgohet me kamera 24 orë”- thuhet në njoftim.

    Ky proces, sipas njoftimit, është realizuar nën mbikëqyrjen e anëtarëve dhe stafit të KQZ-së, vëzhguesve të subjekteve politike të akredituar për vëzhgimin e procesit zgjedhor dhe të përfaqësuesve të autorizuar të përfaqësisë diplomatike.

    KQZ -ja bën të ditur se këto pako me fletëvotime dhe të tjerat që do të tërhiqen në mënyrë të herëpashershme, do të sillen në Kosovë gjatë ditëve në vazhdim.

    Sipas procedurave, shton KQZ-ja, fillimisht këto pako me fletëvotime i nënshtrohen procesit të vlerësimit, i cili përfshin verifikimin nëse ato u takojnë votuesve të regjistruar dhe nëse janë ndjekur procedurat e tjera të parapara, ndërkaq numërimi i këtyre fletëvotimeve do të bëhet në një fazë të mëvonshme në Qendrën e Numërimit dhe Rezultateve, pas ditës së zgjedhjeve.

    Edhe procesi i vlerësimit të dërgesave postare do të mund të vëzhgohet nga vëzhgues të akredituar nga KQZ-ja.

    “KQZ ka realizuar edhe tërheqjen e 80 pakove me fletëvotime nga kutia postare në Podgoricë të Malit të Zi, të cilat janë transportuar si pako diplomatike dhe janë vendosur në hapësirën për grumbullimin dhe vlerësimin e pakove me fletëvotime në objektin e KQZ-së. Gjithashtu, KQZ, nën monitorimin e vëzhguesve të subjekteve politike ka tërhequr 712 pako me fletëvotime nga kutia postare në Vjenë të Austrisë, të cilat do t’i nënshtrohen procedurës së njëjtë” – thuhet në njoftim.

    Me qëllim të mundësimit të votimit përmes postës janë duke funksionuar kutitë postare në 22 shtete të ndryshme të botës, përfshirë dhe kutinë postare të KQZ-së në Kosovë.

    Periudha e votimit përmes postës për të votuar nga jashtë Kosovës do të përfundojë më 8 shkurt 2025.

    Zgjedhjet parlamentare në Kosovë do të mbahen më 09.02.2025.

  • Nis shtypja e fletëvotimeve për zgjedhjet e 9 shkurtit

    Komisioni Qendror i Zgjedhjeve ka njoftuar se ka filluar shtypja e fletëvotimeve dhe broshurave njoftuese për kandidatët për zgjedhjet parlamentare që mbahen më 09.02.2025.

    Sipas KQZ-së, fletëvotimet dhe broshurat po shtypen në Celje të Sllovenisë.

    “Shtypja e fletëvotimeve dhe broshurave po realizohet në shtypshkronjën e dokumenteve me siguri të lartë, “Cetis”, në Celje të Sllovenisë. Sipas vendimit të KQZ-së do të shtypen 1,752,650 fletëvotime, prej të cilave 1,664,100 për votimin në vendvotime të rregullta; 28,450 për votimin me kusht; 38,650 për votimin e personave me nevoja të veçanta dhe si fletëvotime rezervë; dhe 21,450 për votimin në përfaqësi diplomatike”- thuhet në njoftimin e KQZ-së.

    Zgjedhjet për Kuvendin e Kosovës do të mbahen më 09.02.2025.