Ballina

Etiketë: Xhelal Sveçla

  • Gjuha e urrejtjes si “artileri” në betejën për pushtet

    Fushata zgjedhore në Kosovë, e nisur zyrtarisht më 11 janar 2025, po përcillet nga një diskurs i vrazhdë mes rivalëve për kryeministër të ardhshëm të vendit dhe mes kandidatëve që pretendojnë të bëhen deputetë të legjislaturës së re e cila pritet të krijohet pas zgjedhjeve të 9 shkurtit.

    Fjalimet e mbushura me gjuhë të urrejtjes, me ironi dhe me ofendime të ndërsjella mes liderëve të pozitës dhe opozitës, po i lënë në plan të dytë ato që do duhej të ishin thelbësore në garën për pushtet- programet zgjedhore. Partia që ka qeverisur në katër vjetët e fundit- Lëvizja Vetëvendosje, në fakt as që e ka ofruar një program të tillë. Megjithatë, për gjuhën dhe veprimet që nuk janë brenda normave të lejuara, secila prej partive është duke u gjobitur në vazhdimësi.

    Lëvizja Vetëvendosje është ndëshkuar me 4 mijë euro nga Paneli Zgjedhor për Ankesa dhe Parashtresa, për gjuhën fyese që ka përdorur lideri i saj, Albin Kurti, gjatë një tubimi në Pejë. “Këtu, qysh e dini edhe ju vet, Ly-Dy-Ky-Hi dhe Py-Dy-Ky-Hi (aludimi në LDK-në dhe PDK-në) janë bashkë në koalicion. Ata mund të jenë nostalgjik për të kaluarën kur kanë keqqeverisur bashkë, por nuk mund të jenë më ëndërrimtarë që mund të përsëritet kjo”, tha Kurti para simpatizantëve të LVV-së, në qytetin rrëzë Bjeshkëve të Nemuna (shih videon e publikuar në TikTok).

    Por, s’u ndal me kaq! LDK-në, partinë që drejtohet nga Lumir Abdixhiku, rivali i tij për pozitën e kryeministrit, ai e krahasoi me mizën. “Kur na rastis të dëgjojmë ndonjë udhëheqës të Ly-Dy-Ky-Hit se populli po ka simpati për ta, mua më ngjan me mizën që thoshte se kudo që po shkoj po e presin me duartrokitje”, tha Kurti, duke shtuar më pas se “ato duar që duartrokasin [dihet] se çka janë duke provuar t’i bëjnë asaj mize” (Shih videon e publikuar në TikTok).

    Nga krahasimet, megjithatë nuk shpëtoi as ai. Për mënyrën e të folurit dhe gjestikulacionet e tij, kandidatja për deputete nga LDK-ja, Xhenet Syka, shpërndau një video krahasuese me tendencë të përngjasimit me diktatorin nazist, Adolf Hitler. Ky veprim i kushtoi LDK-së, me një gjobë prej 20 mijë euro nga ana e PZAP-së, organit të përhershëm, të pavarur dhe kompetent për të vendosur në lidhje me ankesat e lejuara që kanë të bëjnë me procesin zgjedhor.

    Shkaku i gjuhës dhe i veprimeve të aktivistëve nga gjobat nuk ka shpëtuar as Partia Demokratike e Kosovës. Më 8 mijë euro u gjobit kjo parti për shkak se Armend Ahmeti, zyrtar në Komunën e Skenderajt, shpërndau një video në të cilën shihet dhe dëgjohet Sami Lushtaku, kryetari i Degës së PDK-së në këtë komunë duke i quajtur “zagarë” aktivistët e Lëvizjes Vetëvendosje. “T’i çojmë mesazh Albin Kurtit dhe zagarëve të tij” – dëgjohet duke thënë Lushtaku. I biri i tij, Mërgimi është në listën e kandidatëve të PDK-së për deputetë.

    PDK ia pa “sherrin” edhe Sekretarit të Degës në Malishevë, Ruzhdi Kryeziut. Në një video të publikuar në rrjetet sociale shihet Kryeziu bashkë me një qytetar që aderon në PDK, me ç’rast ky i fundit e prenë me gërshërë kartelën e anëtarësisë të LVV-së. “Nga sot kthehemi të shtëpia e vjetër, aty ku i kemi rrënjët tona të para dhe nga sot e shkatërrojmë kartelën e populistëve” – thotë i aderuari në PDK. Për këtë gjest, PDK-së iu shqiptua një gjobë prej 2 mijë euro.

    I përmbajtur nga përdorimi i gjuhës fyese nuk është treguar as lideri i AAK-së, Ramush Haradinaj, që njëherësh është edhe kandidat për kryeministër nga radhët e koalicionit AAK-Nisma. Që në hapje të fushatës, ai e akuzoi rivalin nga LVV-ja, Albin Kurtin, si “argat të Serbisë dhe Rusisë”. “Nuk dojmë me ba lojna me sigurinë nacionale pas shpinës së aleatëve tonë e në interes të Rusisë e Serbisë nga argati i tyre”, tha ai, duke bërë më pas edhe thirrje: “Shko Albin te prokurori se nuk po dojmë me u vjedh rezervat shtetërore, buka e ushtarit, as te energjia. Shko te prokurori e merri hajnat tjerë se je shef i hajnave”. Kjo gjuhë e Haradinajt i kushtoi AAK-së me gjobë prej 12 mijë euro nga PZAP.

    Haradinaj, që bashkë me partnerët e koalicionit garojnë në zgjedhje parlamentare me moton “Direkt në NATO”, e ka cilësuar Kurtin edhe si mercenar. “Shko se neve nuk na vjen marre prej UÇK-së se jemi kanë UÇK dhe kemi luftu për liri. Shko se e ke fy dhe poshtëru nderin e luftëtarit të lirisë. Ti je mercenar, s’është UÇK-ja mercenar, s’ka mercenarë në UÇK, ti edhe soji yt jeni mercenarë- shkoni” – ka thirrur ai.

    Një gjuhë ofenduese ndaj opozitës ka përdorur edhe kandidati për deputet nga LVV, Xhelal Sveçla. Aktualisht, ai është ministër i Punëve të Brendshme. Në një tubim në Vushtrri, Sveçla i ka quajtur ‘disa’ anëtarë të ish-qeverive si ‘bërllok’. “Disa bërlloka të partive të vjetra thanë se Policia e Kosovës po sillet si Policia e Millosheviqit në veri. Këta bërlloka a do t’i hedhim në kantën e bërllokut të historisë sonë?” – ka deklaruar Sveçla.

    PZAP ka dënuar me 4,500 euro edhe Koalicionin për Familjen pas një ankese të organizatave CEL Kosova dhe Dylberizëm me pretendimin se anëtarët e këtij koalicioni kanë përdorur gjuhe fyese dhe diskriminuese ndaj komunitetit LGBT+, promovimin e përçarjes dhe frikës ndaj qytetarëve si dhe nxitjen e urrejtjes.

    Fushata negative me ndikim afatgjatë në shoqëri

    Profesori i Gazetarisë në Universitetin e Prishtinës, Gëzim Qerimi thotë se gjuha e urrejtjes është shndërruar në një nga karakteristikat kryesore të fushatës. Më me vend ai e sheh sikur fushata të ishte orientuar kah shpalosja e programeve, e jo të dominohej nga retorika përçarëse.

    “Për fat të keq, gjuha e urrejtjes dhe ajo denigruese nuk është monopol i një partie të vetme. Ajo është përhapur pothuajse nga të gjitha forcat politike, duke u kthyer në një normë të papranueshme të komunikimit publik”, thotë ai.

    Megjithatë, sipas tij, gjuha e urrejtjes aktualisht është më e theksuar nga kryetari i Lëvizjes Vetëvendosje, Albin Kurti, dhe kryetari i Aleancës për Ardhmërinë e Kosovës, Ramush Haradinaj. “Të dy këta liderë kanë përqafuar një diskurs politik agresiv, duke e ndërtuar fushatën e tyre mbi përplasjet dhe konfrontimin e drejtpërdrejtë, në vend që të ofrojnë zgjidhje për sfidat reale të vendit” – thotë Qerimi.

    Profesori universitar shton se kjo sjellje e liderëve politikë reflektohet në rrjetet sociale, meqë militantët e përsërisin këtë gjuhë e madje me raste shkojnë edhe deri te kërcënimet. Andaj, sipas tij, institucionet, mediat dhe shoqëria civile duhet të bëjnë më shumë për të dënuar dhe penalizuar këtë gjuhë. “Nëse kjo tendencë vazhdon, pasojat mund të jenë të rënda për stabilitetin social dhe për besimin e qytetarëve në procesin demokratik” – shprehet ai.

    Profesori i Marrëdhënieve Ndërkombëtare, Dritëro Arifi, negativitetin në fushatë e konsideron si të ‘paparë’. “Mund të themi që fushata nga partia në pushtet ka filluar me një negativitet të pakuptueshëm dhe të paparë duke shpërndarë urrejtje dhe polarizime të panevojshme. Në vend se projekteve elektorale vizionare, aty më shumë është ‘stand up’ komedi në kontekstin negativ dhe një kompeticion ku ministrat këndojnë. Do të duhej të tregoheshin projektet dhe vizioni për vitet 2015 – 2029, por për fat të keq LVV ka ngec në mentalitetin e opozitës” – deklaron Arifi.

    Sipas tij, opozita megjithatë ka më tepër koncentrim te përmbajtja dhe oferta. “Partitë opozitare janë më të koncentruara në përmbajtjen dhe ofertën e tyre. Po vërehet angazhim më i madh edhe në organizimin e tubimeve që ato të jenë sa më shumë elektorale” – shton ai.

    Sociologu Artan Muhaxhiri në anën tjetër thotë se gjuha e urrejtjes si “stil ekstrem” i diskursit publik ka ndikim tek kategoria e votuesve të cenueshëm, të cilët janë kryesisht dogmatikë dhe pa sens të mjaftueshëm kritik e racional të vlerësimit afatgjatë politik. Kjo kategori e votuesve,  sipas tij, shpesh janë edhe të margjinalizuar nga rrjedhat zhvillimore shoqërore.

    “Kjo gjuhë shfrytëzohet me qëllim të ndërtimit të rrëfimit të thjeshtëzuar ndarës: ‘Ne dhe Ata/Ato’, ku ‘Ne’ janë personazhet pozitive, kurse ‘Ata/Ato’ negative. Suksesi i saj varet prej rrethanave sociopolitike që dominojnë në kohën e caktuar, si dhe nga shkalla e kërkesës së votuesve që të udhëhiqen prej një lideri/partie me këtë frymë ideologjike e vepruese” – deklaron Muhaxhiri.

    “Policia Gjuhësore”

    Sociologu Artan Muhaxhiri thotë se duhet të ketë një pajtueshmëri për definicionin e asaj që quhet ‘gjuhë e urrejtjes’. Ndonëse ka disa definicione, sipas tij, kryesisht ‘gjuhë e urrejtjes’ kuptohet kur anëtarët e një kategorie të caktuar shoqërore përçmohen në mënyrë jashtëzakonisht të rëndë identitare, dhe se përbuzja nënçmuese përmban potencial për nxitje të dhunës.

    “Në fushatën aktuale për zgjedhjet e 9 shkurtit nuk është krejtësisht e qartë se cili është precizimi i detajshëm institucional i gjuhës së urrejtjes. Ka disa kritere të gjeneralizuara që mund të nënkuptojnë gjëra të ndryshme, kësisoj duke u hapur mundësi opcioneve subjektive interpretative. S’është identifikuar kthjellët vija e cila i ndan përzgjedhjet e mirëmenduara të strategjive politike prej kritereve të pashmangshme të etikës publike”, shpjegon ai.

    Muhaxhiri thotë se s’bën të krijohet përshtypja e një “Policie Gjuhësore” që i përkufizon kornizat e nuancave të lirisë së shprehjes së politikanëve në një terren skajshmërisht të komplikuar me simbolika, metafora dhe alegori. “Dita e zgjedhjeve do të duhej të ishte vlerësim i votuesve kosovarë ndaj partive dhe liderëve edhe për këtë aspekt të tyre” – thotë ai.

    Për Qerimin, gjuha e urrejtjes e përdorur nga politikanë nuk është e rastësishme. Në fakt, sipas tij, kjo është një strategji e mirëmenduar e partive politike për të manipuluar ndjenjat e qytetarëve dhe për të polarizuar elektoratin. “Kjo gjuhë synon të mobilizojë militantët, duke e paraqitur kundërshtarin politik si një ‘armik’ të vendit dhe të popullit. Kjo strategji, edhe pse mund të sjellë përfitime afatshkurtra për disa parti, në tërësi dëmton rëndë procesin demokratik dhe ndërton një kulturë politike të bazuar në përçarje dhe urrejtje” – shprehet Qerimi.

    “Bullizimi verbal dhe sarkazmi tallës”

    Gjobat e shqiptuara nga PZAP ndaj partive politike, profesor Arifi i sheh me vend, por thotë se një shoqëri normale nuk ndërtohet në këtë formë. “Dënimet janë të mëritura- ka qenë rast i rënd të krahasohet kryeministri me një diktator. Kjo është ajo që nuk duhet të kalohen në urrejtje pavarësisht nga kush bëhen. Edhe në rastin tjetër kur është dënuar opozita për të njëjtat arsye nuk mund të ndërtojmë shoqëri normale nëse elita politike shprehet në ketë formë” – deklaron Arifi.

    Sociologu Muhaxhiri nga këndvështrimi i tij thotë se “qasja e këtillë e instancave që merren me procesin zgjedhor duket se më shumë ka synime parandaluese, për ta minimizuar intensitetin e përdorimit të kësaj retorike në të ardhmen”. “Këtyre ditëve ka pasur raste të bullizimit verbal dhe sarkazmit tallës – për shembull nga Kryeministri Kurti, për ç’gjë edhe është dënuar nga PZAP, që i ka konsideruar ato si ‘gjuhë të urrejtjes’. Kandidatët tjerë për kryeministër nuk janë shquar për fjalë të kësollojta” – thekson Muhaxhiri.

    Qerimi në anën tjetër konsideron se përveç ‘elektrizimit’ të masës nga kjo gjuhë e urrejtjes, mund të jetë edhe efekti tjetër, që disa qytetarë të lodhen nga klima toksike dhe mos të marrin pjesë fare në zgjedhje. “Normalizimi i gjuhës së urrejtjes”, sipas tij, hap rrugën për akte të dhunës verbale apo dhe fizike. E kjo pastaj nëse nuk ndalet në kohë, mund të përshkallëzohet deri në konflikte serioze ndërmjet mbështetësve të partive të ndryshme, paralajmëron Qerimi.

    “Degradimi i kulturës demokratike, ku gjuha e urrejtjes dominon diskursin publik, partitë dhe liderët politikë nuk ndihen më të detyruar të ofrojnë zgjidhje reale për problemet e vendit. Kjo çon në një degradim të skenës politike, ku gara për pushtet bazohet në sulme dhe manipulime, jo në ide dhe projekte konkrete për qytetarët” – thotë ai. Gjuha e urrejtjes, sipas tij, sjell edhe humbjen e besimit në institucione dhe sistemin demokratik në përgjithësi. Rrjedhimisht rritjen e pasigurisë dhe zhgënjimit tek populli.

    Për shkak të thyerjeve të rregullave, në dhjetë ditët e para të fushatës, Paneli Zgjedhor për Ankesa dhe Parashtresa u ka shqiptuar subjekteve politike gjoba në shumën prej 125 mijë euro. Bazuar në vendimet e publikuara nga ky organ, e para për nga shuma e gjobitjes është Lidhja Demokratike e Kosovës, e cila deri më tani është dënuar me 45 mijë euro për gjashtë raste të ndryshme. Partia Demokratike e Kosovës, brenda të njëjtës periudhë është gjobitur me 44 mijë e 500 euro për 10 raste të ndryshme. Koalicioni AAK- Nisma me 23 mijë e 500 euro për tri raste të ndryshme. Dhe, LVV është gjobitur me 6 mijë e 500 euro për dy deklarata të Kurtit, gjatë tubimeve në Pejë dhe Podujevë.

  • Pse ndërkombëtarët kritikuan aksionin e mbylljes së strukturave paralele serbe nga Policia e Kosovës?

    Xhafer Ymeri nga Podujeva, të mërkurën, më 15.01.2025, erdhi në Graçanicë për të marrë shërbime në Postën e Serbisë. Por, ai u kthye prapa pa kryer punë, meqë autoritetet kosovare e mbyllen postën për të cilën pretendojnë që është ilegale.

    Ymeri, i cili foli për KALLXO.com, ka frikë se vërtetimin që është gjallë nuk do të arrijë ta dërgojë në Beograd, në mënyrë që të vazhdojë ta marrë pensionin.

    “Jam ardhë me u lajmëru që jam gjallë, se i marrin ata vërtetimat e dua me i çu për Beograd. Për qata kam ardhë. Pardje u kanë ‘zavodi’ mshelë, dje u kanë mshelë, sot mshelë. Çka është kjo punë nuk e di, na vërtetimet mos me i çu kena me mbetë pa pensione. Jemi kanë punëtor të Beogradit, tash ku me u drejtu s’e di” – tha Xhafer Ymeri për KALLXO.com.

    Kurse, drejtori i Postës, Ivan Millojeviq, tha se qëllimi i autoriteteve kosovare është që tema e postës të largohet nga bisedimet në Bruksel.

    “Policia erdhi për të mbyllur Postën, duke thënë se është gjë e përkohshme derisa të aplikojmë për licencë. Por mua këtu asgjë s’më duket e përkohshme, as qëllimi i përkohshëm. Sikurse në veri ashtu edhe në jug qëllimi është tjetër, të heqin postën nga bisedimet në Bruksel, sepse atje po diskutohet për këtë. Këtë e di Kurti por s’ka nevojë para zgjedhjeve të bëj filma. Filma sikurse që bënte represion me Policinë ndaj popullit serb. Kjo fushatë është negative dhe them se do t’i ‘thyhet për koke’”-tha Millojeviq pas aksionit të Policisë.

    Po në Graçanicë, 200 metra larg objektit të Postës, Policia e mbylli edhe Autoritetin e Përkohshëm Komunal të Prishtinës. Kurse në fshatin Lepi, mbylli objektin që shërbente si zyrë komunale për banorët e Lipjanit.

    Përveç në Graçanicë, autoritetet kosovare mbyllën edhe disa organe komunale serbe, zyra postare dhe të Administratës Tatimore të Serbisë, në dhjetë komuna të Kosovës, pas një aksioni të gjerë më 15.01.2025.

    Aksionet policore u zhvilluan në komunën e Lipjanit, Obiliqit, Prishtinës, Fushë-Kosovës, Vushtrrisë, Novobërdës, Kamenicës, Vitisë, Rahovecit dhe Skenderajt.

    Megjithatë, aksioni në rajonin e Prishtinës u krye pa autorizimin e Prokurorisë.

    Prokuroria Themelore e Prishtinës njoftoi se nuk është ofruar asnjë provë për të krijuar dyshimin e bazuar për kryerjen e ndonjë vepre penale.

    “Prokurori i shtetit sqaron opinionin publik se nuk ka autorizuar kryerjen e kontrollit apo bastisjes në këto lokacione, për shkak se nuk ka pasur ndonjë kërkesë zyrtare me shkrim për kryerjen e këtij aksioni nga ana e institucioneve gjegjëse, për çka edhe nuk është ofruar kurrfarë prove para prokurorit të shtetit për tu krijuar dyshimi i bazuar se është duke u kryer ndonjë vepër penale që bie nën kompetencën e Prokurorisë Themelore në Prishtinë”-tha Prokuroria përmes një komunikate.

    https://kallxo.com/lajm/policia-per-aksionin-ndaj-strukturave-paralele-thote-se-nderpreu-aktivitetet-e-disa-institucioneve-te-jashteligjshme/

    Për bastisjet, autorizim nuk ka lëshuar as Prokuroria Themelore e Mitrovicës, teksa zëdhënësi Valon Preteni për KALLXO.com tha se po presin për kërkesë.

    “Prokurori kujdestar vetëm është njoftuar nga Policia, por kërkesë nuk ka pasur. Pritet që kërkesa të bëhet e pastaj të vendoset më tutje”- bëri të ditur Preteni.

    Ndërkohë, Policia përmes një komunikate tha se aksioni kishte qellim ndërprerjen e aktiviteteve të disa institucioneve të jashtëligjshme.

    “Policia e Kosovës me njësitë e saja relevante, sot në orët e hershme të mëngjesit, në bashkëpunim dhe koordinim me institucionet përkatëse të Republikës së Kosovës, ka realizuar një operacion të gjerë policor, operacion ky i shtrirë në disa rajone të Kosovës: DRP Prishtinë, DRP Gjilan, DRP Gjakovë dhe DRP Mitrovicë Jugu, për ndërprerjen e aktiviteteve të disa institucioneve të jashtëligjshme që vepronin si komuna, posta, banka, etj., të cilat ofronin shërbime të jashtëligjshme, kundër rendit kushtetues dhe ligjeve pozitive të Republikës së Kosovës”- tha Policia përmes komunikatës.

    KALLXO.com i ka dërguar pyetje Ministrisë së Punëve të Brendshme, por deri në publikimin e shkrimit nuk mori përgjigje.

    Ambasada e SHBA-së në Kosovë ka reaguar duke vlerësuar se veprimet e Qeverisë së Kosovës për mbylljen e institucioneve të drejtuara nga Serbia “dobësojnë besimin në marrëdhënie dhe kufizojnë aftësinë tonë për të ndihmuar Kosovën të sigurojë të ardhmen më të mirë dhe më të ndritshme për të gjithë njerëzit e saj”

    https://kallxo.com/lajm/mbyllja-e-strukturave-ilegale-ambasada-amerikane-thote-se-keto-veprime-e-dobesojne-besimin/

    Për aksionin e së mërkurës ka reaguar edhe Bashkimi Europian, duke përmendur faktin se mbyllja e strukturave të mbështetura nga Serbia, u bë në mes të fushatës zgjedhore për zgjedhjet parlamentare të 09.02.2025, dhe “veprimet bien ndesh me detyrimet e Kosovës ndaj Bashkimit Europian në kuadër të procesit të normalizimit”.

    https://kallxo.com/lajm/be-thote-se-qeveria-mbylli-strukturat-ilegale-ne-mes-te-fushates-ia-permend-edhe-masat/

    Sipas BE-së, statusi i strukturave të mbështetura nga Serbia parashikohet të zgjidhet përmes dialogut të lehtësuar nga BE-ja.

    Ndër të tjera janë përmendur edhe masat ndaj Kosovës, duke shtuar se këto veprime të Kosovës janë të pafavorshme për t’ia hequr masat.

    Në një video të publikuar në rrjete sociale, ministri i Brendshëm Xhelal Sveçla tha se “me aksionin e përbashkët, përfundon epoka e komunave dhe institucioneve paralele e kriminale të Serbisë në Republikën e Kosovës”.

    Në videon e publikuar u pa edhe ministri i Administrimit të Pushtetit Lokal, Elbert Krasniqi, teksa shtoi se “nga sot, 28 komunat paralele, kriminale të Serbisë në Kosovë dhe pesë qarqet e tyre mbyllen përfundimisht”.

  • Aksioni policor në disa Komuna – deklarohen ministrat Krasniqi dhe Sveçla – VIDEO

    “Ka përfunduar epoka e Komunave dhe institucioneve paralele e kriminale të Serbisë në Kosovë.” – kanë deklaruar ministri i Punëve të Brendshme, Xhelal Sveçla dhe ai i  Administrimit të Pushtetit Lokal, Elbert Krasniqi.

    Deklarata e tyre vjen pas aksionit policor në disa Komuna të vendit, kundër strukturave ilegale serbe.

    Aksioni u zhvillua edhe në bashkëpunim me Ministrinë e Industrisë, Ndërmarrësisë dhe Tregtisë (MINT).

    Sveçla ka thënë se të mërkurën, më 15.01.2025, janë mbyllur Komunat paralele të Serbisë në: Lipjan, Obiliq, Prishtinë, Fushë Kosovë, Vushtrri, Novobërdë, Kamenicë, Viti, Rahovec, Skenderaj, si dhe Posta e Zyra Tatimore ilegale.

    “Nga sot, kapitulli i institucioneve paralele ilegale kriminale të Serbisë në Republikën e Kosovës mbyllet. Në Banjë e gjithandej në pjesë tjera të Republikës së Kosovës, objektet komunale, postat, zyrat tatimore, të gjitha mbetjet e institucioneve paralele përfundojnë.” – ka deklaruar ministri Sveçla.

    “Nga sot, 28 Komunat paralele kriminale të Serbisë në Kosovë dhe pesë qarqet e tyre mbyllen përfundimisht. Këto institucione paralele kriminale të Serbisë nuk kanë vend në Republikën e Kosovës.” – ka thënë ministri Krasniqi.

    Sveçla ka theksuar se, ashtu siç janë zotuar, nuk lejojnë asnjë paralelizëm, e aq më tepër kriminal të Serbisë, që të cenojë Kushtetutën e ligjshmërinë në vend.

    KALLXO.com raportoi se Policia e Kosovës, në bashkëpunim dhe koordinim me institucionet kompetente, në orët e hershme të mëngjesit, më 15.01.2025, ka nisur një operacion policor në disa rajone të Kosovës.

    Operacioni i Policisë po zhvillohet në Prishtinë, Gjilan, Gjakovë dhe Mitrovicë të Jugut.

    Lajmin për KALLXO.com e ka konfirmuar zëdhënësi i Policisë, Baki Kelani.

    “Mund të konfirmojmë se sot në orët e hershme të mëngjesit, Policia e Kosovës në bashkëpunim dhe koordinim me institucionet kompetente ka filluar realizimin e një operacioni policor i cili përfshin disa rajone të Kosovës, si: DRP – Prishtinë, DRP – Gjilan, DRP – Gjakovë dhe DRP – Mitrovicë Jugu.” – ka thënë Kelani.

    KALLXO.com ka qëndruar edhe në Graçanicë dhe ka sjellur pamjet nga aksioni:

    Një javë më parë, më 08.01.2025, KALLXO.com ka raportuar se Policia e Kosovës ka ndërhyrë në një ndërtesë në Mitrovicë të Veriut, për të cilën KALLXO kishte raportuar në nëntor të vitit 2024 se funksiononte ilegalisht si Administratë Tatimore.

    Rastin e ka konfirmuar për KALLXO.com zëvendësdrejtori i Drejtorisë Rajonale Mitrovicë – Veri të Policisë së Kosovës, Veton Elshani. Ai ka thënë se objekti ka funksionuar si Zyrë Tatimore nga Serbia.

    “Rreth orës 09:00 kemi hyrë në këtë ndërtesë, e cila sipas informacioneve tona ka funksionuar si Zyrë Tatimore – si Degë e Ministrisë së Financave të Serbisë.” – ka thënë Elshani.

    KALLXO.com, më 01.11.2024, ka raportuar për dëshmitë për funksionimin e institucionit paralel ilegal në Mitrovicë të Veriut.

    Ekipi i KALLXO.com verifikoi më 30.10.2024, se në këtë objekt paralel funksiononte e ashtuquajtura “Administrata Tatimore”.

    KALLXO.com hyri brenda këtij objekti paralel, ku kishte punonjës dhe po funksiononte. Për të verifikuar çka po ofrohet konkretisht, gazetarët thanë se “po u duhet certifikata e lindjes, që ta nxjerrin letërnjoftimin e Serbisë”.

    “Ky dokument duhet të nxirret në Komunë. Na jena ‘Administrata Tatimore’ këtu zotëri.” – ishte përgjigjja e punonjësve.

    Ministri Elbert Krasniqi kishte njoftuar më 30.08.2024, se janë mbyllur Komunat paralele: Qarku i Mitrovicës së Kosovës, Komuna paralele e Mitrovicës, Komuna paralele e Zveçanit, Komuna paralele e Zubin Potokut dhe Komuna paralele e Leposaviqit.

    Sipas Krasniqit, pesë Komunat paralele që kishte përmendur se nuk do të operojnë më, do t’i bashkohen 7 Komunave të tjera paralele, të cilat u mbyllën në Prizren, Pejë, Suharekë, Istog, Klinë, Rahovec dhe Dragash.

    Më 26.01.2024 u mbyllën katër Komuna paralele në fshatin Vranisht të Dragashit, ndërsa më 02.02.2024 u mbyll një Komunë ilegale serbe në Pejë, e në të njëjtën ditë u zhvillua aksioni policor edhe në Komunën e Klinës, Istogut.

  • Vendimi i Apelit rreth konfirmimit të aktakuzës ndaj Sveçlës dhe të tjerëve për hedhjen e gazit lotsjellës në Kuvend

    Gjykata e Apelit e ka vërtetuar vendimin e Gjykatës Themelore të Prishtinës, e cila kishte konfirmuar aktakuzën e Prokurorisë Themelore ndaj aktualisht ministrit të Punëve të Brendshme, Xhelal Sveçla dhe deputetëve Fitore Pacolli, Drita Millaku dhe Salih Zyba, të akuzuar për hedhjen e gazit lotsjellës në Kuvendin e Kosovës më 21.03.2018.

    “Refuzohen si të pabazuara ankesat e mbrojtësve të të pandehurve Xh.S., avokat Laur Prenaj, F.P., avokat Lavdërim Salihu, D.M., avokat Labinot Buzuku dhe S.Z., avokat Laura Pnishi, ndërsa aktvendimi i Gjykatës Themelore në Prishtinë, Departamenti i Përgjithshëm, … i datës 06.06.2024, vërtetohet” – thuhet në vendimin e Gjykatës së Apelit.

    Gjykata e Prishtinës, Departamenti i Përgjithshëm pas vlerësimit të kërkesave për hedhje të aktakuzës dhe kundërshtimit të provave, të ushtruara nga mbrojtësit e të pandehurve, të njëjtat i ka refuzuar si të pabazuara.

    Kundër këtij aktvendimi në afatin ligjor ankesë ka paraqitur mbrojtësi i të pandehurit Xhelal Sveçla, avokati Laur Prenaj, mbrojtësi i të pandehurës Fitore Pacolli-Dalipi, avokati Lavdërim Salihu, mbrojtësi i të pandehurës Drita Millaku, avokati Labinot Buzuku, dhe mbrojtësja e të pandehurit Salih Zyba, avokatja Laura Pnishi.

    Prokuroria e Apelit ka dorëzuar parashtresë më 01.08.2024 përmes të cilës ka propozuar që ankesat e mbrojtësve të të pandehurve të refuzohen si të pabazuara, ndërsa aktvendimi i ankimuar të vërtetohet.

    Gjykata e Apelit pas shqyrtimit të shkresave të lëndës, aktvendimit të ankimuar dhe pretendimeve në ankesa ka gjetur se ankesat janë të pabazuara.

    Gjetjet e Gjykatës së Apelit

    Sipas vendimit të Gjykatës së Apelit, aktvendimi i Gjykatës së shkallës së parë me të cilin janë refuzuar kërkesat për hedhje të aktakuzës dhe kundërshtimin e provave është i bazuar, i drejtë dhe ligjshëm, i njëjti nuk përmban shkelje, për të cilat pretendohet në ankesa, e as që ka shkelje të tjera.

    Tutje sipas vendimit të Apelit gjykata ka vlerësuar së në rastin konkret ajo çka është relevante për këtë fazë të procedurës penale është fakti se aktakuza e ngritur nga ana e Prokurorisë Themelore në Prishtinë përmban të gjitha elementet e duhura ligjore.

    Gjithnjë sipas vendimit të Gjykatës së Apelit, e njëjta mbështetet në prova thelbësisht të mbështetshme dhe të marra konform dispozitave ligjore dhe nuk ka vend për hedhjen e aktakuzës, ngase vepra penale për të cilën akuzohen të pandehurit paraqet vepër penale, nuk ekzistojnë rrethana që e përjashtojnë përgjegjësinë penale, nuk ka arritur afati i parashkrimit, nuk ka rrethana të tjera që e pengojnë ndjekjen penale dhe se ka prova të mjaftueshme për një dyshim të bazuar mirë se të pandehurit kanë kryer veprën penale për të cilën akuzohen.

    Në seancën fillestare të mbajtur më 26.03.2024 Sveçla dhe të tjerët nuk e kishin pranuar fajësinë për hedhjen e gazit lotsjellës.

    Për veprën penale – përdorimi i armës apo mjetit të rrezikshëm, të gjithë të akuzuarit nuk e kanë pranuar fajësinë.

    Aktakuza ndaj tyre është ngritur më 26.07.2019.

    Sipas Prokurorisë, hedhja e gazit lotsjellës kishte pamundësuar vazhdimin e seancës së Kuvendit, dhe të gjithë deputetët ishin detyruar ta lirojnë sallën.

    Me këto veprime, ata akuzohen edhe për pengim të personit zyrtar, në këtë rast të deputetëve të Kuvendit.

    Hetimet për këtë rast kishin filluar një ditë pas ngjarjes që kishte ndodhur në Kuvendin e Kosovës, më 22.03.2018. Ndërsa, Prokurorisë për të “kurorëzuar” këto hetime me aktakuzë i ishte dashur më shumë se një vit, saktësisht deri më 26.07.2019.

    Sipas dosjes së siguruar nga KALLXO.com, të gjithë të akuzuarit ishin mbrojtur në heshtje në Polici.

    Raportimet e KALLXO.com lidhur me këtë rast mund t’i lexoni duke klikuar në LINK.

  • Ministri Xhelal Sveçla refuzon të përgjigjet pse drekoi me të dyshuarin për korrupsion

    Ministri i Punëve të Brendshme, Xhelal Sveçla, ka refuzuar që të japë një përgjigje në pyetjet e KALLXO.com se pse drekoi me të dyshuarin për korrupsion në rastin “Brezovica” më 07.01.2025.

    Ekipi i KALLXO.com ndoqi nga afër një tubim politik në të cilin ishte edhe ministri Sveçla.

    Ai u pyet disa herë radhazi nga gazetari i KALLXO.com për hulumtimin që KALLXO.com publikoi më 08.01.2025 se Sveçla e ministri Elbert Krasniqi u pritën për festën e Krishtlindjes ortodokse në shtëpinë e njërit nga të dyshuarit, i cili po hetohet për korrupsion, konkretisht marrje të ryshfetit, në rastin e njohur si “Brezovica”.

    “Tubimi ka qenë madhështor”- është përgjigjja e Sveçlës në pyetjen e gazetarit të KALLXO.com.

    Ministri i Punëve të Brendshme, Xhelal Sveçla, dhe ai i Pushtetit Lokal, Elbert Krasniqi, kanë publikuar fotografi gjatë një vizite me rastin e festës së fundit me njërin prej njerëzve që po hetohet për korrupsion në Brezovicë. 

    Sasha Iliq është personi që po hetohet për korrupsion si pjesë e grupit të Bratisllav Nikoliqit të Listës Serbe, të cilët akuzohen nga Prokuroria se zhvatën miliona euro nga investitorët ilegalë në Brezovicë.

    Nga viti 2015 e tutje, Bratisllav Nikoliq, njëri nga njerëzit më të fuqishëm të Listës Serbe në Shtërpcë, ishte përfshirë në njërën nga aferat më të mëdha të korrupsionit në Kosovë.

    Ish-kryetari i Komunës së Shtërpcës pretendohet se u dha leje ilegale kompanive me pronarë shqiptarë, të cilët ndërtonin në këtë zonë ilegalisht.

    Ministri i Punëve të Brendshme, Xhelal Sveçla dhe ai i Pushtetit Lokal, Elbert Krasniqi, vendosën ta vizitonin familjen e njërit prej bashkëpuntorëve të Nikoliqit, Sasha Iliq, i cili hetohet se mori para dhe i dërgoi te grupi i Nikolliqit të Listës Serbe.

    Sveçla, në postimin e tij të datës 07.01.2025 (arkivi), njoftoi se ka takuar familjen Iliq dhe publikoi fotografi në të cilën shihet duke uruar të pandehurin Sasha Iliq.

    KALLXO.com ka konfirmuar me burime të pavarura se Iliq, tavolina e të cilit është nderuar nga ministrat e Qeverisë Kurti, është personi i njëjtë të cilin po e heton prokurori Rasim Maloku për aferën “Brezovica”.

    Prokurori Maloku në një komunikim me ekipin e KALLXO.com ka konfirmuar se personi me emrin Sasha Iliq është person që hetohet për korrupsion në aferën “Brezovica”.

    Maloku ka treguar se çështja ndaj Iliqit është duke u hetuar dhe hetimet do të përfundojnë diku kah mesi i vitit 2025. 

    Iliq ishte arrestuar më 16.03.2022 nën dyshimin për marrje ryshfeti në lidhje me rastin “Brezovica”. 

    Sipas dosjes së Prokurorisë, të cilën e kishte siguruar KALLXO.com në atë kohë, Iliq dyshohej se nga viti 2010 në Shtërpcë kishte ndihmuar personin zyrtar në kryerje të veprës penale të marrjes së ryshfetit. 

    Ai dyshohej se në cilësinë e zyrtarit në Komunën e Shtërpcës ka ndërmjetësuar në marrjen e parave në shuma nga 10 mijë euro deri në 30 mijë euro nga personat fizikë e juridikë për t’ua mundësuar ndërtimin në Parkun Kombëtar “Sharri”, vikend- zona e Brezovicës, në kundërshtim me Ligjin për Ndërtimin, Ligjin për Mbrojtjen e Mjedisit, Ligjin për Ujërat e Kosovës dhe Planin Hapësinor të Parkut Kombëtar “Sharri”, kurse me paratë që i ka marrë si ryshfet, kanë blerë prona të paluajtshme në vikend-zonën bashkë me të pandehurin, ish-kryetarin e Komunës së Shtërpcës, Bratislav Nikoliq, prona këto të cilat janë regjistruar në emër të të pandehurit Sasha, me qëllim që të fshihen nga zbulimi dhe konfiskimi.

    Ndaj Iliqit Gjykata e Ferizajt kishte vendosur edhe masën e sigurisë, atë të paraburgimit, për veprat penale marrje ryshfeti në ndihmë. 

    KALLXO.com ka kontaktuar me ministrin e Administrimit dhe Pushtetit Lokal, Elbert Krasniqi, në lidhje me vizitën tek i dyshuari për korrupsion. 

    “Jo, është e para herë që po dëgjoj nga ana juaj në lidhje me këtë çështje. Sinqerisht nuk mund të them asgjë tjetër. Tash, prej juve po e dëgjoj këtë. Asnjë informacion nuk e kemi pasur apo marrë. Tash po e dëgjoj për herë të parë nga ana juaj. Unë ju thash se për shkak të festës së Krishtlindjeve ortodokse ne kemi qenë në Shtërpcë, jemi pritë nga dy familje dhe në lidhje me këto pretendimet e juaja, unë për herë të parë po dëgjoj tash, këtu, nga ju, në lidhje me këtë çështje.”- tha Krasniqi përmes telefonit për KALLXO.com. 

    E ministri i Brendshëm, Xhelal Sveçla, nuk i është përgjigjur telefonatës dhe kërkesës së KALLXO.com për të sqaruar këtë çështje. 

    KALLXO.com ka tentuar të marrë përgjigje nga Sveçla edhe përmes shefes së kabinetit dhe këshilltares së lartë politike, Jeta Tela, por e njëjta nuk ka kthyer ndonjë përgjigje apo koment të ministrit. 

    Sasha Iliq (i arrestuar për korrupsion në rastin “Brezovica”), ministrat Xhelal Sveçla dhe Elbert Krasniqi – Foto: Facebook

    Çka dihet për aferën “Brezovica”?

    Dosja “Brezovica” është njëra nga dosjet më të mëdha të korrupsionit në Kosovë. Në këtë aferë janë përfshirë njerëz të Listës Serbe, ish-pushtetarë të Komunës së Shtërpcës e deri tek biznesmenë e politikanë shqiptarë e serbë.

    Deri më tani, Gjykata e Pejës ka shpallur aktgjykim më 08.11.2024 për Mustafë Hysenin, i akuzuar në rastin “Brezovica” për keqpërdorim të detyrës zyrtare me mosveprim. Ai është dënuar me 6 muaj dënim me burgim me mundësi zëvendësimi në dënim me gjobë në shumën prej 5 mijë euro.

    I pandehuri kishte arritur marrëveshje për pranim të fajësisë me Prokurorinë, e cila ishte aprovuar më 04.11.2024 dhe i njëjti është shpallur dëshmitar bashkëpunues për raste të tjera.

    Hyseni akuzohet se si shef i Departamentit për Mbrojtje të Ujit dhe Mjedisit, nuk kishte marrë veprime për ndaljen e veprimeve në zonën e Brezovicës.

    Në këtë rast, pos Hysenit, të akuzuar janë edhe 11 veta tjerë për vepra penale si keqpërdorim i pozitës zyrtare, marrje ryshfeti, dhënie ryshfeti, detyrim e armëmbajtje pa leje, lidhur me lëshimin e lejeve ndërtimore në zonën e mbrojtur të Brezovicës.

    Bratisllav Nikoliq, Dimitrije Raçiqeviq, Dragomir Millosavljeviq, Hysni Bajrami, Sasha Millosavljeviq, Arben Çitaku, Bedri Halimi, Husein Ajdini, Sasha Spasiq dhe Jardan Kostiq, janë të akuzuarit e tjerë në këtë rast.

    Gjykimi ndaj të akuzuarve të këtij rasti po zhvillohet në Gjykatën e Pejës.

    Procesi gjyqësor është duke vazhduar për 11 personat e tjerë.

    Në seancën e 06.11.2024 kishte dhënë dëshminë dëshmitari bashkëpunues, por kryetarja e trupit gjykues, Nushe Kukaj- Mekaj, ka marrë vendim për të mos u publikuar dëshmia e tij deri në përfundimin e dhënies së dëshmive nga dëshmitarët tjerë.

    Çka thotë aktakuza e Prokurorisë?

    Sipas aktakuzës së Prokurorisë së Ferizajt, kryetari i Komunës së Shtërpcës, Bratisllav Nikoliq, nga 21 janari 2016 e deri më 10 shtator 2018 ka keqpërdorur detyrën zyrtare me qëllim të përfitimit të dobisë pasurore për vete dhe i ka mundësuar një investitori marrjen e lejeve ndërtimore në mënyrë të kundërligjshme për të cilin shërbim ka marrë 200 mijë euro për 19 leje ndërtimore, për një shtëpi vikendi dhe një pëlqim rrugor dhe 100 miijë euro për lejen ndërtimore për objektin e hotelerisë “Rimida”.

    Ish- kryetari i Komunës së Shtërpcës akuzohet edhe në disa dispozitiva të tjerë të aktakuzës për keqpërdorim të detyrës zyrtare.

    Në pikën dytë të aktakuzës, i njëjti akuzohet se nga 30 janari i vitit 2015 e deri më 27 maj 2019, përsëri sipas Prokurorisë, ka keqpërdorur detyrën zyrtare me qëllim të përfitimit të pasurisë për vete duke i mundësuar një personi tjetër përfitimin e lejes ndërtimore në mënyrë të kundërligjshme për të cilin shërbim ka marrë 140 mijë euro për 14 leje ndërtimore dhe për shtëpi vikendi.

    60 mijë euro të tjera akuzohet nga Prokuroria se i ka marrë ish- kryetari i Komunës së Shtërpcës për lëshimin e 5 lejeve ndërtimore në mënyrë të kundërligjshme për ndërtimin e shtëpive të vikendit. Këto objekte ishin ndërtuar në zonën e tretë të mbrojtur të Parkut “Sharri”.

    Në pikën katër të aktakuzës thuhet se nga 23 nëntor 2018 deri më 6 gusht 2019 ish- kryetari i Komunës së Shtërpcës kishte marrë 40 mijë euro për lëshimin e 6 lejeve ndërtimore për shtëpi vikendi.

    Aktakuza kësisoj vazhdon për keqpërdorim të detyrës zyrtare për ish-kryetarin e Komunës së Shtërpcës edhe në pikën 5, 6, 7, 8, 9.

    Në po këtë aktakuzë Bratisllav Nikoliq akuzohet edhe për marrje ryshfeti e ushtrim ndikimi.

    Në këtë aktakuzë të përfshirë janë edhe Dimitrije Reçiqeviq– si drejtor i Urbanizimit, inspektorët komunalë të ndërtimit Hysni Bajrami dhe Dragomir Millosavljeviq dhe Arben Çitaku si ish-sekretar i përgjithshëm i Ministrisë së Mjedisit, Mustafë Hyseni si shef i Departamentit për Mbrojtje të Ujërave dhe Mjedis , Husein Ajdini si investitor, Raif Bajrami si shef i Inspeksionit të Shtërpcës dhe të akuzuarit Sasha Spasiq, Bedri Halimi i akuzuar në cilësinë e kryeinspektorit e Sasha Millosavljeviq si shef i Drejtorisë së Kadastrës.

    Të lartëcekurit akuzohen për vepra penale si marrje ryshfeti, keqpërdorim i pozitës zyrtare, ushtrim ndikimi dhe për vepra si armëmbajtje pa leje.

    Më 17.09.2023 prokurori që po përfaqëson këtë rast, Rasim Maloku, kishte ndarë detaje ekskluzive për KALLXO.com lidhur me hetimin e këtij rasti.

    Më 16.09.2024 në emisionin “Kallxo Përnime” janë transmetuar pamje nga bastisjet që ishin realizuar në fund të dhjetorit 2021 në çështjen e njohur si ‘Brezovica”.

    Në materialet ekskluzive ishte transmetuar edhe momenti kur njësiti i Krimeve të Rënda i Policisë së Kosovës dhe Prokuroria e Ferizajt kishin zbuluar në shtëpinë e ish- kryetarit Branislav Nikoliq disa grumbuj me para.

     Hetuesit shihen në pamje duke numëruar monedha 500 euroshe, të cilat zbulohen në zona të ndryshme të shtëpisë.

    Detaje të tjera lidhur me aktakuzën mund t’i lexoni duke klikuar në këtë LINK.