Policia ka njoftuar se iu është raportuar se dy vëllezër kanë kërkuar ndihmë mjekësor në QKMF në Drenas pasi që ishin të therur me një mjetë të mprehtë.
Rasti ka ndodhur më 26.01.2025 rreth orës 16:40.
Njëri nga viktimat është dërguar në QKUK për tretman të mëtutjeshëm.
Pas hetimeve është arritur të identifikohen dhe të arrestohen tre të dyshuar dhe me vendim të prokurorit janë dërguar në mbajtje.
Rasti po trajtohet si vrasje në tentativë.
Policia e Kosovës ka njoftuar se dje, më 14.01.2025, një shtetas i Shqipërisë ka kërkuar trajtim mjekësor.
Sipas PK-së, i njëjti ka deklaruar se pasi ka kaluar me veturën e tij kufirin Shqipëri-Kosovë, në pikën kufitare në Morinë, persona të panjohur kanë shtënë me armë zjarri në drejtim të tij – duke e qëlluar.
Sipas Policisë, të njëjtit i është bërë matje me alkook test dhe ka rezultuar pozitiv.
Në konsultim me Prokurorin është iniciuar rasti si “vrasje në tentativë” dhe mbetet në hetime.
Në gjykimin ndaj Shkumbin Sekiraqës lidhur me akuzën për plagosjen e Pajtim Gashit në mars të vitit 2024, në seancën e së mërkurës më 08.01.2025 janë administruar provat materiale.
Shkumbin Sekiraqa, djali i Salih Sekiraqës, akuzohet për tri vepra penale: “tentim vrasje”, “armëmbajtje pa leje” e “shkaktim i rrezikut të përgjithshëm”. Përveç tij i përfshirë në këtë rast është edhe M. H., i cili nga Prokuroria po akuzohet për “ndihmë pas kryerjes së veprës penale”.
Në seancë u paraqit videoincizimi i ngjarjes kritike, e për të cilën prokurorja Bukurije Gjonbalaj tha se shihen i akuzuari Shkumbin Sekiraqa dhe personi NN duke e goditur të dëmtuarin Pajtim Gashi.
“Fillimisht shihet i akuzuari dhe personi NN, shihen duke e goditur të dëmtuarin me shqelma. Pastaj i akuzuari Shkumbin Sekiraqa shtien një herë me armë në drejtim të dëmtuarit Pajtim Gashi. Pastaj largohet i dëmtuari, ndërsa i akuzuari Shkumbin largohet me veturën Audi ngjyrë të kuqe A7. Ndërsa, personi tjetër me veturën ‘Pik-up’ ngjyrë e bardhë.” – tha prokurorja Gjonbalaj gjatë shfaqjes së video-incizimit.
“Është e vërtetë se në video-incizim dëgjohet vetëm një e shtënë. Video-incizmi është hudh nga ‘INSAJDERI’. Mirëpo, nga raporti i ekspertimit nga vendi i ngjarjes janë gjetur shtatë (7) gëzhoja. Ky incizim i cili u pa sot vërtetohet edhe me provat tjera, të cilat janë siguruar gjatë hetimeve, si: deklaratat e dëshmitarëve, deklarata e të dëmtuarit, kartela e regjistrimeve”.
Lidhur me këtë video-incizim mbrojtësi i të akuzuarit Sekiraqa, avokati Naser Sopjani propozoi që kjo provë të shpallet e papranueshme.
“Sa i përket video-incizimit që e shikuam sot, ashtu siç deklaroi edhe vetë Prokurorja ky incizim nuk është siguruar përmes urdhëresës së ligjshme. I bie që është marrë pa urdhër. Është siguruar përmes portaleve, të cilat nuk dihet se ku e kanë burimin. E, si e tillë e vlerësojmë që kjo CD duhet të veçohet nga shkresat e lëndës si provë e papranueshme.” – tha avokati Sopjani.
Ndërsa, prokurorja Gjonbalaj tha se Gjykata video-incizimin e ka marrë si provë të pranueshme, pasi i njëjti ndërlidhet me provat tjera të marra gjatë hetimit.
Ndërkaq lidhur me këtë Trupi Gjykues mori Aktvendim duke refuzuar propozimin e avokatit Sopjani, me arsyetimin se CD-ja e cila paraqet pamjet nga ngjarja e datës 04.03.2024, e cila është objekt i kësaj çështjeje penale dhe se këto pamje Prokuroria i ka siguruar nga portali “INSAJDERI”, të cilat janë shfaqur publikisht dhe në rrjete sociale. Dhe se nuk ka qenë e nevojshme që për sigurimin e këtyre pamjeve, të lëshohet urdhër i veçantë.
Tutje, avokati Sopjani propozoi që në cilësi të dëshmitarit të dëgjohet Salih Sekiraqa, babai i të akuzuarit Shkumbin Sekiraqa, me arsyetimin se i njëjti me dëshminë e tij do t’i ndihmojë Trupit Gjykues për ta kuptuar mënyrën se si është kryer vepra penale.
Trupi Gjykues këtë propozim të avokatit Sopjani e refuzoi duke vlerësuar se dëshmitari i propozuar është i panevojshëm për ndriçimin e kësaj çështjeje penale.
Me kërkesë të mbrojtësit të të akuzuarit Shkumbin Sekiraqa, avokatit Naser Sopjani, seanca e sotme, më 08.01.2025, u ndërpre dhe u caktua e radhës për në muajin shkurt 2025.
Paraprakisht në seancë ka dhënë dëshminë dëshmitari Skender Hoti, i cili tha se ditën kritike ka qenë duke punuar në objektin “Premtimi” në lokalin e “Alba Market” – duke vendosur qeramikë.
“Deri sa kam qenë brenda lokalit duke punuar, nga dritarja kam parë dy vetura njëra ‘Audi’ dhe tjetra ‘Pik-up’. Unë kam qenë jashtë në atë moment, pasi po zbraznim materialin. Aty kam vërejtur tre persona afër njëri-tjetrit duke biseduar. Njëri nga ta ka qenë Pajtim Gashi, ndërsa dy të tjerë nuk i kam njohur. S’i kam parë kurrë.” – tha dëshmitari Hoti.
Dëshmitari Hoti tha se njëri nga personat kishte qenë zeshkan dhe më i plotë, ndërsa tjetri më i gjatë e i hollë dhe se nuk kishte arritur ta dëgjonte bisedën e tyre.
Dëshmitari Hoti, tutje, tha se pasi kishte hyrë në lokal kishte dëgjuar të shtënat me armë, mirëpo deklaroi se nuk e di sa të shtëna ka pasur.
“Pas të shtënave kam shikuar jashtë dhe e kam parë Pajtimin duke shkuar drejt zyrës së tij, ndërsa dy personat e tjerë kanë hyrë në veturë dhe janë larguar. Krejt ngjarja ka ndodhur për 1-2 minuta.” – deklaroi dëshmitari Skender Hoti.
Ky rast po trajtohet nga Trupi Gjykues, i përbërë nga: gjyqtari Naser Foniqi – kryetar, Gëzim Ademi dhe Gazmend Bahtiri – anëtarë.
I akuzuari M. H. nuk ka pranuar fajësinë; Shkumbin Sekiraqa, i akuzuar për tri vepra penale, nuk e ka pranuar fajësinë.
Dosja e Prokurorisë
Shkumbin Sekiraqa akuzohet nga Prokuroria e Prishtinës se më 04.03.2024 kishte tentuar ta privojë nga jeta Pajtim Gashin. Ky i fundit mbeti i plagosur.
“Rreth orës 10:00 në rrugën “Bedri Shala” në Prishtinë, derisa ishte duke lëvizur me një veturë të tipit “Audi” pronë e të pandehurit tjetër M. H., ishte takuar me personin NN i cili lëvizte me një “Pick-up”. I pandehuri Shkumbin Sekiraqa për arsye të panjohura me dashje, me qëllim që të privojë nga jeta të dëmtuarin Pajtim Gashi pas bisedës me NN personin, i drejtohet me fjalë ‘Paja shoq, a po më njeh mua!?’, ku më pas e sulmojnë fizikisht.” – përshkruhet ngjarja e cila ndodhi më 04.03.2024.
Dosja e Prokurorisë përshkruan edhe se Shkumbin Sekiraqa kishte nxjerrë armën e zjarrit, kishte shtënë në drejtim të Pajtim Gashit, e më pas e kishte goditur në kokë me kondak të armës.
“Me këto veprime i shkakton lëndime në kokë dhe një plagë në këmbën e djathtë. I dëmtuari (Pajtim Gashi) ka arritur të largohet nga vendi i ngjarjes. I pandehuri (Shkumbin Sekiraqa) ka vazhduar që të gjuajë në drejtim të tij.” – përshkruhet tutje në aktakuzën që ka siguruar KALLXO.com.
Me këto veprime Shkumbin Sekiraqa – sipas Prokurorisë – ka kryer veprat penale: “vrasje në tentativë”, “shkaktim i rrezikut të përgjithshëm” dhe “armëmbajtje pa leje”.
Shkumbin Sekiraqa në deklarimin e tij në Polici kishte mohuar përfshirjen e tij në rast.
“Çka kam thënë në Polici është e vërtetë dhe nuk kam tjetër çka të shtoj. Tani nuk dua të deklarohem më. Në Polici ka deklaruar se nuk ka lidhje me rastin që ka ndodhur më 04.03.2024 dhe nuk e njeh të dëmtuarin Pajtim Gashi.” – thuhet tutje në Dosjen e Prokurorisë.
E Pajtim Gashi, i cili mbeti i plagosur në mars 2024, kishte deklaruar se në datën e lartpërmendur ishte në afërsi të një biznesi familjar.
“Ka ardhur një person me veturë të kuqe. Personi më është ofru dhe më ka thënë ‘Pse po më këqyrë?’. Ka filluar të më shajë me fjalë banale “Çka k… po më këqyr!”. I kam thënë ‘Nuk jam kah të këqyri, o vlla! Po shko rrugës tande. Ai më ka thënë se ‘Je ka më këqyr shtremtë!’. Pas kësaj ka vazhdu me veturë kah objekti teposhtë. Vetura e ka pasur derën e hapur dhe edhe pse ishte duke vozitur ai e mbante derën çelë. Mandej, pasi që është largu diku 15 metra, e ka ndalë derën, ka dalë nga vetura, është nisur në drejtim të tij; nuk i ka parë asgjë në dorë dhe ka filluar prapë të shajë.” – ka shpjeguar Pajtim Gashi në Prokurori ngjarjen e marsit.
Gashi kishte treguar për sulmin e më pas edhe për të shtënat me armë.
“Me sa di ai ka shtënë 5-6 herë. Shkumbin Sekiraqën nuk e njeh, nuk e ka njohur më parë dhe nuk ka pasur asnjëherë probleme me të. Në Polici nuk ka arritur që ta identifikojë Shkumbin Sekiraqën, Pajtim Gashi.” – thuhet tutje në Dosje.
Si i bashkakuzuar në këtë rast është edhe M. H., i cili ngarkohet se i ka dhënë ndihmë Shkumbin Sekiraqës, pasi është kryer vepra penale duke e fshehur në garazhën e tij veturën Audi A7 e që në deklaratën e dhënë në Polici kishte thënë se të njëjtën veturë e ka shitur.
Ky rast del të jetë si fillesë e problemit mes familjes Gashi e Sekiraqa, pasi më 01.09.2024 kishte pasur shkëmbim me armë të zjarrit mes disa personave, ku një person kishte ndërruar jetë e pesë të tjerë kishin mbetur të plagosur.
Si i plagosur në rastin e datës 01.09.2024 është edhe babai i Shkumbin Sekiraqës, Salih Sekiraqa.
Raportimet e KALLXO.com – LINK
Shtëpia e të dyshuarit Sh.H, në Podujevë është bastisur ndërsa ekipet policore nuk kanë gjetur diçka të dyshimtë tek ai deri sa i njëjti nuk është hasur askund dhe vazhdon të jetë në kërkim nga organet e rendit.
Bastisja u krye pas identifikimit të të dyshuarit për plagosjen që u regjistrua më 03.01.2025 në Lagjen Arbëria në Prishtinë.
KALLXO.com mëson se pak orë pas ngjarjes që u regjistrua me urdhër të prokurorit kujdestar të Prokurorisë Themelore të Prishtinës, u krye edhe bastisje në shtëpinë e të dyshuarit në Podujevë.
Policia kishte njoftuar prokurorinë se nuk ka gjetur asgjë të dyshimtë në shtëpi.
I dyshuari është vendosur në kërkim policor dhe aktualisht policia është duke hetuar rastin.
Rasti është iniciuar si vrasje në tentativë.
Një person është plagosur mbrëmë më 03.01.2025 rreth orës 18:30 në Lagjen Arbëria në Prishtinë.
Policia ka dhënë detaje në lidhje me plagosjen që ndodhi ndërsa ka njoftuar edhe se i dyshuari ndonëse është identifikuar vazhdon të jetë në kërkim nga njësitet policore.
Viktima në këtë rast për të cilin KALLXO.com kishte marrë vesh se ka inicialet F.J, sipas policisë është plagosur në shpinë me armë zjarri.
Sh.H., sipas policisë dyshohet se ka gjuajtur me armë në drejtim të viktimës më pas është larguar nga vendi i ngjarjes.
Pas marrjes së informacionit se në Lagjen Arbëria ka të shtëna armësh, njësitet policore relevante kanë dalë në vendin e ngjarjes.
Aty kanë gjetur dhe sekuestruar pesë gëzhoja.
Viktima është dërguar për tretman mjekësor në Qendrën Klinike Universitare të Kosovës ndërsa mjeku kujdestar Adem Jaha, i ka thënë KALLXO.com se nga salla operative ishte dërguar në kujdes intensiv duke shtuar se pacienti ka qenë në rrezik për jetë
Në anën tjetër zëdhënësi i policisë për rajonin e Prishtinës, Agron Borovci ka thënë për KALLXO.com se përvec të dyshuarit, janë identifikuar edhe dy vetura të cilat u përkasin të përfshirëve në plagosjen që ndodhi në Lagjen Arbëria në Prishtinë.