Ballina

Etiketë: vjosa osmani

  • Osmani priti në takim kryetarin e Bujanocit

    Presidentja e Kosovës, Vjosa Osmani, gjatë javës ka pritur në takim kryetarin e Komunës së Bujanocit, Arbër Pajazitin, së bashku me ekipin e tij.

    Sipas njoftimit të Presidencës të publikuar më 12.01.2024, Osmani rikonfirmoi “përkushtimin e institucioneve të Republikës së Kosovës për t’i mbështetur vazhdimisht shqiptarët që jetojnë në Preshevë, Bujanoc dhe Medvegjë në realizimin e të drejtave të tyre në përputhje me standardet më të larta për të drejta të njeriut”.

    “Presidentja dhe Kryetari Pajaziti diskutuan edhe për lehtësimin e procedurave të shtetësisë për qytetarët nga këto komuna, duke theksuar rëndësinë e adresimit të sfidave me të cilat përballen ata” – ka njoftuar Presidenca.

    Më tej thuhet se kryetari i Bujanocit falënderoi presidenten “për ngritjen e zërit për të drejtat e shqiptarëve në Luginë në të gjitha forumet ndërkombëtare, ndërkaq diskutuan edhe për një sërë iniciativash nëpërmjet të cilave mund të përkrahen shqiptarët në Presheve, Medvegjë e Bujanoc”.

     

  • Osmani: Kosova dhe SHBA do ta finalizojnë së shpejti Dialogun Strategjik

    Presidentja e Kosovës, Vjosa Osmani më 10.01.2025 deklaroi se në takim me zëvendëssekretarin amerikan Richard Verma iu konfirmua se Kosova dhe SHBA-ja do ta finalizojnë së shpejti Dialogun Strategjik.

    Sipas Osmanit, kjo është një e arritur e jashtëzakonshme e cila dëshmon se partneriteti i mirëfilltë, i bazuar në vlera dhe interesa të përbashkëta, gjithmonë sjell rezultate.

    “Pas propozimit që i kam dërguar Shteteve të Bashkuara të Amerikës, si Presidente e Republikës qysh në vitin 2021, pastaj rikonfirmuar në qershor të vitit 2022 nëpërmjet notës verbale, si dhe në takimin me Sekretarin Blinken në korrik 2022, si dhe pas një pune të jashtëzakonshme të ekipeve tona përgjatë viteve të kaluara, sot në takim me zëvendëssekretarin amerikan Richard Verma m’u konfirmua se Kosova dhe SHBA-ja do ta finalizojnë së shpejti Dialogun Strategjik.” – ka shkruar Osmani.

    Ajo ka falënderuar: “Falënderoj Qeverinë e Shteteve të Bashkuara të Amerikës për këtë përkrahje ndaj popullit të Kosovës.”

    Ndërsa, ka thënë se mezi pret ta vazhdojë bashkëpunimin intensiv në interes të Kosovës.

    “Ekipet tona do të takohen së shpejti për ta finalizuar marrëveshjen për Dialogun Strategjik, e cila do të përfshijë fusha shumë të rëndësishme në interes të qytetarëve të Kosovës.” – ka thënë tutje Osmani.

    E ngarkuara me Punë të Ambasadës së Shteteve të Bashkuara të Amerikës në Kosovë, Anu Prattipati është takuar më 09.01.2025 me sekretarin amerikan, Richard Verma.

    Sipas njoftimit të Ambasadës, zëvendëssekretari i Shtetit do të takohet me zyrtarët më të lartë të Kosovës, komunitetin e biznesit dhe përfaqësues të mediave.

    Verma ka nisur turin në disa shtete të Ballkanit Perëndimor që nga data 07.01.2025, në Shqipëri, Kosovë dhe Serbi. Ai do të qëndrojë deri më 11.01.2025.

    Ende nuk dihet nëse do të ndodhë një takim edhe me kryeministrin Albin Kurti.

    Departamenti i Shtetit (DASH) bëri të ditur se në Kosovë, Verma do të diskutojë për normalizimin e marrëdhënieve të Kosovës me Serbinë përmes Dialogut të lehtësuar nga BE-ja, forcimin e qeverisjes dhe sundimit të ligjit, si dhe nxitjen e rritjes ekonomike dhe sigurisë energjetike për të mirën e të gjithë kosovarëve.

    Ndër të tjera thuhet se Verma, gjithashtu, do të falënderojë Qeverinë e Kosovës, për mbështetjen e fuqishme të Ukrainës dhe për ndihmën e saj për afganët në nevojë.

    https://kallxo.com/lajm/dialogu-kosove-serbi-presidentja-osmani-takohet-me-zyrtarin-amerikan-richard-verma/

  • “Dialogu Kosovë-Serbi”, presidentja Osmani takohet me zyrtarin amerikan Richard Verma

    Presidentja e Kosovës, Vjosa Osmani ka pritur në takim zëvendëssekretarin e Shtetit Amerikan për Menaxhimin dhe Resurset, Richard R. Verma.

    Osmani, Vermën e priti në Presidencën e Kosovës, duke e falënderuar për përkrahjen që ka ofruar ndaj Kosovës gjatë këtyre viteve.

    Takimi nisi duke folur për vizitën e Vermës në Tiranë, ku qëndroi para se të vijë në Prishtinë. Atje takoi kryeministrin shqiptar Edi Rama.

    Verma ka nisur turin në disa shtete të Ballkanit Perëndimor që nga data 07.01.2025, në Shqipëri, Kosovë dhe Serbi. Ai do të qëndrojë deri më 11.01.2025.

    Ende nuk dihet nëse do të ndodhë një takim edhe me kryeminstrin Albin Kurti.

    Departamenti i Shtetit (DASh) bëri të ditur se në Kosovë, Verma do të diskutojë për normalizimin e marrëdhënieve të Kosovës me Serbinë përmes Dialogut të lehtësuar nga BE-ja, forcimin e qeverisjes dhe sundimit të ligjit, si dhe nxitjen e rritjes ekonomike dhe sigurisë energjetike për të mirën e të gjithë kosovarëve.

    Ndër të tjera thuhet se Verma gjithashtu do të falënderojë Qeverinë e Kosovës, për mbështetjen e fuqishme të Ukrainës dhe për ndihmën e saj për afganët në nevojë.

    Në Tiranë, Verma ka pasur të flasë për përparimin demokratik të Shqipërisë, aftësitë mbrojtëse dhe thellimin e lidhjeve ekonomike me Shtetet e Bashkuara dhe do të falënderojë Qeverinë e Shqipërisë për mbështetjen e vazhdueshme ndaj aleatëve tanë afganë.

    Në Serbi, sipas DASH-it, Zëvendëssekretari do të theksojë partneritetin strategjik në rritje SHBA-Serbi për energjinë dhe çështje të tjera ekonomike. Ai do të ofrojë mbështetje për integrimin e Serbisë në institucionet evropiane, normalizimin e marrëdhënieve të Serbisë me Kosovën, forcimin e sundimit të ligjit dhe bashkëpunimin më të ngushtë dypalësh për çështjet ushtarake dhe të sigurisë.

    Ai do të riafirmojë, gjithashtu, përkushtimin e Shteteve të Bashkuara ndaj vendeve të Ballkanit Perëndimor, ndërsa ato ndjekin integrimin euroatlantik dhe bashkëpunimin më të thellë rajonal.

  • Presidentja Osmani takoi të ngarkuarën me punë në ambasadën e SHBA-ve në Kosovë

    Presidentja Vjosa Osmani ka takuar sot, 09.01.2025, të Ngarkuarën me Punë të Ambasadës së Shteteve të Bashkuara të Amerikës në Kosovë, Anu Prattipati.

    Presidenca ka njoftuar se gjatë këtij takimi u diskutuan zhvillimet e fundit në vend dhe pritshmëritë për bashkëpunimin bilateral ndërmjet Kosovës dhe SHBA-së gjatë vitit 2025.

    “Në prag të vizitës së zëvendës Sekretarit të Shtetit Amerikan për Menaxhimin dhe Resurset, Richard R. Verma, u diskutua për qëllimin e kësaj vizite, si dhe u fol për disa nga temat kryesore që do të trajtohen. Gjatë bisedës, presidentja Osmani dhe Prattipati theksuan rëndësinë e avancimit të bashkëpunimit në fusha të ndryshme”- thuhet në njoftim.

    Po sipas njoftimit, Osmani potencoi rëndësinë e vazhdimit të partneritetit strategjik ndërmjet Kosovës dhe SHBA-së në adresimin e çështjeve të interesit të përbashkët.

     

     

     

     

     

     

     

     

  • Heshtja e liderëve: Osmani e Kurti s’tregojnë a kanë marrë ftesë për inaugurimin e Trumpit

    Një “Po” ose një “Jo” nuk kanë qenë në gjendje ta thonë për më shumë se dy javë Zyra e Presidencës dhe Zyra e Kryeministrit të Kosovës, për të konfirmuar ose për të mohuar ftesën për pjesëmarrje në Ceremoninë e Inaugurimit të Presidentit të 47-të amerikan, Donald Trump. Duke zgjedhur heshtjen, këto dy Zyra kanë lënë pikëpyetje nëse dy liderët kryesorë të shtetit, Vjosa Osmani dhe Albin Kurti do të jenë të pranishëm në momentin kur i pari i SHBA-së do të vë dorën mbi Bibël dhe ta japë betimin presidencial.

    Kallxo.com është interesuar të marrë një përgjigje nga Ambasada amerikane në Kosovë, nëse Presidentja dhe Kryeministri kanë marrë ftesë për inaugurimin e Trumpit, por nga kjo Ambasadë kanë sugjeruar që për këtë çështje të kërkohet përgjigje nga Departamenti për Europë në Departamentin Amerikan të Shtetit. As ky Departament nuk është përgjigjur, vetëm ka rekomanduar që të kontaktohet ekipi i Trumpit. Si përfundim, deri në publikimin e këtij artikulli, nuk është marrë përgjigje as nga ky ekip. Kallxo.com ka insistuar të marrë një përgjigje nga vet kryeministri Kurti, pas një vizite që ai i ka bërë Planetariumit në Shtime më 08.01.2025, por ai ka refuzuar të flasë, edhe pse e ka dëgjuar pyetjen që i është i bërë nga gazetari.

    Derisa për liderët e shtetit që konsiderohet më miqësori në raport më SHBA-në nuk dihet nëse kanë pranuar ftesë për të qenë të pranishëm më 20 janar në Uashington, Trump ka zgjedhur që t’i ftojë në Ceremoninë e Inaugurimit të tij jo vetëm aleatët por edhe kundërshtarët.

    Zëdhënësja e republikanit Trump, Karoline Leavitt ka deklaruar në emisionin “Fox and Friends” se ftesa për liderët e botës është “një shembull i Presidentit Trump për të krijuar një dialog të hapur me udhëheqësit e vendeve, që janë jo vetëm aleatët, por edhe kundërshtarët dhe konkurrentët tanë.”

    Gjatë rihapjes së Katedraljes ikonike Notre Dame në Paris, presidentja e Kosovës Vjosa Osmani ishte takuar me presidentin e zgjedhur të SHBA-së, Donald Trump. “Ndërsa isha në Paris, ishte një nder të takoja presidentin Donald Trump dhe ta përgëzoja për fitoren e tij në emër të popullit të Kosovës. Rikonfirmova, gjithashtu, angazhimin tonë për të forcuar aleancën tonë. Ne mbështetemi në udhëheqjen e fortë të SHBA-së, ndërsa punojmë së bashku për të promovuar paqen, sigurinë dhe prosperitetin në rajonin tonë dhe më gjerë.” – ka shkruar Osmani, në rrjetin social X, më 08.12.2024.

    Ndërkaq, kryeministri Albin Kurti pati deklaruar më 11.11.2024 se do të vazhdojë komunikimin dhe bashkëpunimin me cilëndo Administratë që vjen në SHBA – pa marrë parasysh a janë demokratët ose republikanët në pushtet.

    I pyetur nëse do të zhvillojë ndonjë telefonatë me presidentin e zgjedhur amerikan, Donald Trump, Kurti tha se “ne bashkëpunojmë me SHBA-në në mënyrë të pazëvendësueshme dhe me gjithë përkushtimin dhe seriozitetin tonë”.

    “Presidenti i ardhshëm i SHBA-së, në një letër urimi që i pati dërguar një pararendësi para nesh, pati vendosur në thelb njohjen reciproke si diçka qendrore midis raporteve Kosovë e Serbi dhe jemi të interesuar që këtë bashkëpunim ta zgjerojmë.” – kishte thënë Kurti.

    Megjithatë, ish-ambasadori amerikan në Kosovë, Jeffrey Hovenier pati shprehur vitin e kaluar shqetësime me cilësinë e partneritetit mes Shteteve të Bashkuara dhe Kosovës, veçmas sa i përket mënyrës se si Ekzekutivi po i menaxhonte çështjet që kanë të bëjnë me minoritetin serb. Në një intervistë për REL-in, ai pati theksuar se veprimet e pakoordinuara të Qeverisë në veri e zvogëlojnë entuziazmin e SHBA-së, për të mbështetur Kosovën në rrugën e saj euroatlantike.

    Siç raportojnë mediat ndërkombëtare, në inagurimin e Trumpit janë ftuar edhe presidenti i Kinës Xi Jinping, kryeministri hungarez Viktor Orbán, presidenti argjentinas Javier Milei, kryeministrja italiane Giorgia Meloni, presidenti ukrainas Volodymyr Zelenskyy. Ndërsa, sipas medias SkyNews, presidenti rus Vladimir Putin nuk ka marrë ftesë. Presidenti në largim, demokrati Biden ka konfirmuar se do të marrë pjesë në inaugurim. Se a do të marrin pjesë të ftuarit e sipërpërmendur ende është e paqartë.

    Ceremonia do të zhvillohet në Uashington DC dhe shënon kalimin paqësor të pushtetit nga Bideni te Trumpi, i cili po kthehet në Shtëpinë e Bardhë për një mandat të dytë, pas një shkëputje që e pati për një mandat, ku në krye të SHBA-së qëndroi Biden.

    Parada pritet të nisë nga Kapitoli i SHBA-së në Shtëpinë e Bardhë. Ngjarja do të fillojë afërsisht në orën 15:00 me kohën lokale (rreth orës 21:00 – sipas kohës sonë).

    Trump do të rikthehet në Shtëpinë e Bardhë, pas fitores ndaj demokrates, Kamala Harris, e cila nuk ia doli të bëhej presidentja e parë grua në Amerikë.

    Republikani Trump 78-vjeçar ka siguruar votat e 270 anëtarëve të Kolegjit Elektoral, aq sa ishin të nevojshme për t’u bërë President.

    Trumpi e ka shpallur fitoren dhe ka paralajmëruar lidership të fuqishëm të Shteteve të Bashkuara të Amerikës.

    Donald Trump ka qenë President i SHBA-së nga viti 2017 deri më 2021.