Ballina

Etiketë: Veri

  • Partitë serbe në Kosovë raportojnë incidente, pretendojnë se janë “sulme politike”

    Lista Serbe, partia më e madhe e serbëve në Kosovë e mbështetur nga Beogradi, njoftoi se persona të panjohur më 25 janar hodhën një koktej molotovi para shtëpisë familjare të aktivistes së saj, Aleksandra Popoviq, në Ranillug, një komunë me shumicë serbe në juglindje të Kosovës.

    Ky mjet shpërthyes, sipas Listës Serbe, e goditi makinën familjare të familjes Popoviqit, duke e “djegur plotësisht”.

    Më herët, Lëvizja Popullore Serbe njoftoi se persona të panjohur më 24 janar tentuan të djegin një billbord të saj në Moguillë, pranë Kllokotit, gjithashtu një komunë me shumicë serbe në rajonin e Gjilanit.

    Ky billbord ndodhej përballë shtëpisë familjare të Divna Andrews, kandidate për deputete në Kuvendin e Kosovës nga Lëvizja Popullore Serbe.

    Policia e Kosovës në rajonin e Gjilanit ka konfirmuar se të dyja incidentet janë raportuar dhe se rastet po hetohen.

    Lista Serbe dhe Lëvizja Popullore Serbe pretendojnë se këto incidente janë “sulme të motivuara politikisht”.

    “Pa dyshim që bëhet fjalë për një sulm të motivuar politikisht dhe përpjekje për të frikësuar anëtarët e këshillave zgjedhore të Listës Serbe, me qëllim që t’i pengojnë ata nga ndjekja dhe kontrolli i zgjedhjeve, në mënyrë që të favorizohen disa parti të tjera të preferuara nga Prishtina”, thuhet në deklaratën e Listës Serbe.

    Ndërkohë, Milija Bishevac nga Lëvizja Popullore Serbe ka bërë thirrje që komuniteti ndërkombëtar të reagojë lidhur me përpjekjen për djegien e billbordit të tyre, duke deklaruar se në këto kushte nuk mund të mbahen zgjedhje demokratike.

    “Nuk na keni frikësuar”, deklaruan nga kjo parti.

    Zgjedhjet parlamentare në Kosovë do të mbahen më 9 shkurt dhe, përveç Listës Serbe, në to marrin pjesë edhe pesë subjekte politike që përfaqësojnë komunitetin serb: Lëvizja Popullore Serbe, Për Liri, Drejtësi dhe Mbijetesë, Partia e Serbëve të Kosovës, Demokracia Serbe dhe Nisma Qytetare Drejtësia Popullore.

    Megjithatë, për pjesëmarrjen në zgjedhjet e ardhshme në Kosovë, mbështetjen e Beogradit e ka ekskluzivisht Lista Serbe, e cila bojkoton institucionet e Kosovës për më shumë se dy vjet në përputhje me vendimin për të braktisur institucionet në veri për shkak të insistimit të Qeverisë së kryeministrit Albin Kurti për t’i ndaluar targat serbe.

    Lista Serbe i ka fituar mbi 90 për qind të votave në të gjitha zgjedhjet në të cilat ka marrë pjesë që nga formimi i saj në vitin 2013, por misioni vëzhgues i Bashkimit Evropian ka shkruar në raportet e tij më 2021 për “monopolin dhe frikësimin” nga kandidatët dhe aktivistët e kësaj partie./REL

  • Policia e Kosovës gjen kamerën e tretë të maskuar në Veri – VIDEO

    Policia e Kosovës ka gjetur të hënën, më 20.01.2025, një kamerë të maskuar, në Leposaviq.

    Kështu konfirmoi për KALLXO.com zëvendësdrejtori i Drejtorisë Rajonale Mitrovicë – Veri të Policisë së Kosovës, Veton Elshani i cili tregoi qëllimin e kësaj kamere, si dhe bëri të ditur se është njoftuar Prokurori.

    “Kjo është vendosur, me qëllim, ashtu e maskuar për syrin e njeriut. Dje e kemi largu e jemi në konsultim me Prokurorin, se si të procedohet në rast. Por, po ashtu konfirmoj që nga Prokuroria është hap rast ‘incizim i paautorizuar’.” – tha Elshani.

    Elshani shtoi se kjo është kamera e tretë e maskuar që gjendet në Veri. Sipas tij, dy janë gjetur në Mitrovicë të Veriut në “air conditioner”.

     

    Pamjet: Policia e Kosovës

     

     

  • Inspektorati Policor rekomandon shtimin e policëve në Veri në Njësinë e Trafikut Rrugor

    Inspektorati Policor i Kosovës ka rekomanduar shtimin e policëve në Drejtorinë Rajonale Mitrovicë – Veri, përkatësisht në Njësinë e Trafikut.

    “IPK i rekomandon Drejtorit të Drejtorisë së Personelit, që në bashkëpunim me Drejtorinë Rajonale Policore – Mitrovicë Veriu, të sigurojnë personel të mjaftueshëm për të përmbushur strukturën dhe kapacitetet e Njësisë Rajonale të Trafikut Rrugor – Mitrovicë Veriu.” – thuhet në Raportin e Inspektimit të IPK-së.

    Lista e Personelit të Autorizuar (LPA) ka bërë të ditur se në Mitrovicë të Veriut janë tre rreshterë dhe 30 policë në Ekipe patrulluese, ndërsa në Ekipin e hetimeve janë vetëm tre policë e nuk ka rreshter fare.

    “Nëse e përcjellim individualisht gjendjen sasiore me burime brenda secilës Njësi, pasqyrohet se Njësia e Trafikut Rrugor në Mitrovicë të Veriut ka tre rreshterë – 21 policë më pak krahasuar me Listën e Personelit të Autorizuar. Njësia e Trafikut Rrugor në Mitrovicë – Pejë në Ekipe patrulluese ka pesë policë më shumë.” – thuhet në njoftimin e IPK-së.

    IPK njofton se janë kontrolluar 658 mostra të ngjarjeve, ku ka pasur reagim për dalje në vendin e aksidentit. Në Mitrovicë të Veriut, nga pranimi i informatës në arritjen e tyre në vendin e ngjarjes shënohet kohëzgjatja prej 21 minutash.

    Ndonëse, në Raport thuhet se në përgjithësi zyrtarët policorë të trafikut kanë të kryer trajnimin bazik në fushën e sigurisë së trafikut rrugor. Sipas IPK-së ka prej tyre që nuk kanë trajnime nga fusha e trafikut, për shkak se janë policë të rinj apo të lëvizur nga Njësi të tjera.

    “Nga të gjitha këto Njësi, vetëm 26 zyrtarë policorë kanë të kryer trajnime të avancuara për analizën e aksidenteve, edhe atë: Njësia për Kontrollin e Autostradës – tre policë, ndërsa sa i përket Njësisë së Trafikut Rrugor në Pejë janë trajnuar shtatë policë; në Mitrovicë të Veriut – tre, Mitrovicë të Jugut – dy, Gjilan – pesë, Gjakovë – dy, Ferizaj – një dhe Prishtinë – tre.” – përfundon IPK-ja.

     

  • Arsenijeviq flet për padinë e LVV-së kundër partisë së tij dhe për vendimet e Qeverisë Kurti për veriun dhe strukturat paralele serbe

    Në një konferencë për media më 15.01.2025, politikani serb i Kosovës, Aleksandar Arsenijeviq, lider i partisë Demokracia Serbe, ka ngritur çështjen e ankesës apo padisë së Lëvizjes Vetevëndosje (LVV) kundër partisë që ai drejton dhe mbylljen e institucioneve paralele serbe në Kosovë.

    Arsenijeviq kritikoi Listën Serbe për shkak të mosreagimit në mënyrë demokratike kundër vendimeve që i ka marrë kryeministri Kurti për mbylljen e strukturave paralele e për heqjen e dinarit.

    Ai tha se kur është mbyllur posta vetëm njëzet serbë shprehën revoltën e tyre. Sipas tij po të kishin qenë 5 mijë serbë situata do të ndryshonte.

    “Vetëm për shkak nesh rreth 20 personave, pati reagime serioze nga komuniteti ndërkombëtar. A mendoni se herën tjetër do të guxonin të bënin diçka të tillë? Jo!”- u shpreh Arsenijeviq.

    Ndër të tjera, Arsenijeviq ngriti edhe çështjen e padisë së Vetëvendosjes kundër Demokracisë Serbe. Sipas tij, LVV është ankuar për prishje të fushatës së tyre zgjedhore.

    Më 12.01.2025 në të njejtën ditë kur kryeministri Kurti ishte për fushatë në Mitrovicë, Arsenijeviq është arrestuar e më pas liruar nga Policia e Kosovës.

    Nga Drejtoria Rajonale Mitrovicë – Veri e Policisë së Kosovës patën konfirmuar për KALLXO.com se Arsenijeviqit i është shqiptuar tiketë për moszbatim të urdhrit policor. Ky i fundit kishte protestuar me pretendimet se një qytetar serb është lënduar fizikisht nga Policia e Kosovës në Leposaviq.

    Për padinë e LVV-së ndaj partisë së tij thotë se nuk e ka fyer as Kurtin e as grupin e tij. Madje ankesën e Vetëvendosjes e cilëson si të pabazë për faktin se tubimi i tyre nuk ka qenë i regjistruar zyrtarisht në veri. Sipas tij, Kurti nuk ka pasur aktivitet fushate në veri por thjesht kanë pirë kafe.

    “Sipas nenit 34, gjobat zbatohen për ata që prishin ngjarjet e regjistruara të fushatës, sipas rregulloreve zgjedhore. Mora një shembull të formularit të cilin Vetëvendosje nuk e kishte plotësuar dhe nuk është paraqitur në formë të shkruar apo elektronike te KKZ”- tha Arsenijeviq.

    Ai shtoi se Kurti duhet ta ketë parasysh se sipas sistemit të Kosovës ekziston Mitrovica Veriore dhe Mitrovica Jugore. Gjithashtu arrestimin nga Policia, Arsenijeviq e cilëson joadekuat.

    “Më 12 janar kur për pak më thyen qafën. Pra nuk mjaftoi që për pak më vranë, për pak më thyen qafën por duan të na shkatërrojnë edhe finaciarisht që mos të jemi faktorë politikë në këto zgjedhje”- përfundoi Arsenijeviq.

    Kryeministri i Kosovës, Albin Kurti, njëherazi kandidati i Lëvizjes Vetëvendosje për kryeministër është parë në Mitrovicën e Veriut pak minuta para fillimit të tubimit të kësaj partie në Mitrovicën e Jugut.

    Afër tij është parë ministri i Punëve të Brendshme, Xhelal Sveçla, kryetari i Mitrovicës së Veriut, Erden Atiq dhe ish-kryetari i Mitrovicës së Jugut, Agim Bahtiri.

    https://kallxo.com/lajm/kurti-kalon-ne-sheshin-e-mitrovices-se-veriut-pamje/

    https://kallxo.com/lajm/kurti-ne-mitrovice-kritikon-ish-qeverite-per-rritje-ekonomike-jemi-tri-here-me-te-shpejte/

     

  • Renovimi i shtëpive në veri, ministri Rashiq e quan “të improvizuar” mënyrën se si punon MAPL

    Në një takim informues në Komunën e Mitrovicës së Veriut mbi statuset e regjistrimit civil, ku ishte i pranishëm ministri Nenad Rashiq, asamblisti i Iniciativës Qytetare, Betim Osmani ngriti çështjen e renovimit të banesave në Mitrovicën e Veriut, rindërtimin e shtëpive të djegura gjatë luftës e kthimin e qytetarëve shqiptarë në këto vendbanime.

    Sipas këtij të fundit, ministritë nuk janë duke punuar në këtë drejtim.

    “Këto ministritë që po ndërtojnë, shumica as ujin e kanalizimin nuk janë duke e rregulluar nëpër shumicën e këtyre ndërtimeve që po ndodhin. Nuk e di sa jeni të informuar ose sa doni me u involvu në këtë çështjen e kthimit. Se me këtë trend të kthimit ne do të presim edhe dhjetë vite për t’u kthyer në pronat tona. Aq dobët edhe ngadalë është duke funksionu kthimi në veriun e Mitrovicës”- tha ai.

    Ministri për Komunitete dhe Kthim, Nenad Rashiq, tha se mënyrën se si punon ministri i Administrimit të Pushtetit Lokal, Elbert Krasniqi, e konsideron të improvizuar, duke potencuar se “nuk dua të punoj kështu”.

    “Këto dy vitet e fundit e konsideroj temën komplekse dhe ju duhet më shumë kohë për të iniciuar. Ne e kemi pranuar trashëgiminë dhe me kaq duhet të merremi… mendoj se kur të fillojmë me rikthim në Mitrovicë duhet të jemi mjaft të organizuar dhe më lejoni të them qartë se nuk do të ketë konfuzion. Unë mendoj se mënyra se si funksionon Ministria e Administrimit të Pushtetit Lokal, kolegu im i nderuar Elbert, është për mendimin tim, të improvizuar. Nuk dua të punoj kështu. Unë dua të punoj me elementet që përmende, jo një shtëpi si e tillë, por me pajisje percjellëse si edhe mobilje…”- u shpreh Rashiq.

    Në dhjetor të vitit të kaluar, kryetari i Mitrovicës së Veriut, Erden Atiq, kishte thënë se Komuna e tij nuk ka fonde për renovimin e rreth 40 banesave në Mitrovicën e Veriut.

    Gjatë debatit në “Jeta në Komunë”, Atiq ka thënë se për këto renovime e pret ndihmën e Ministrisë së Administrimit të Pushtetit Lokal (MAPL).

    “Ministria, njëra prej ministrive me gjasë më të madhe Ministria e Administrimit të Pushtetit Lokal, do ta bëjë renovimin e ndërtesave të cilat i ka liruar Agjensioni për Verifikimin e Pronës, nën një. Nën dy edhe ne si Komunë kemi kërkesa, nuk shkon një javë dy, në javë një herë minimumi kam takim me qytetarët që kërkojnë sanimin. Nuk kemi pare, me pasë pare e kishim bo, por s’kemi”- kishte thënë Atiq.

    Në shtator të vitit 2023, Qeveria e Kosovës ka marrë vendim për rindërtimin dhe renovimin e shtëpive individuale në Mitrovicë të Veriut për familjet të cilave u janë dëmtuar shtëpitë gjatë periudhës kohore 1998-1999.

    Më 23.11.2023 është hapur thirrja për ndërtimin e shtëpive në veri, Qeveria ka miratuar kërkesën e Ministrisë për 1 milion euro.