Ballina

Etiketë: Ura e Badovcit

  • Dalin rezultatet e testimit të urës së Badovcit

    Zëvendësministri i Infrastrukturës, Hysen Durmishi, më 29.01.2025, konfirmoi se i kanë pranuar rezultatet e testimit të urës te Liqeni i Badovcit, testim ky i kryer më 09.01.2025 pas raportimit të KALLXO.com.

    Ndonëse nuk janë bërë publike, zëvendësministri tha se rezultatet tregojnë se struktura e urës është stabile.

    “Tani i kemi bërë edhe testimet sipas kontratës që i kemi pasë dhe rezultatet kanë dalë në rregull, pra ura është stabile dhe mos të krijohet një lloj konfuzioni se ne e kemi lëshuar urën dhe është rreziku dikush aty. Pra ura ka qene stabile në ditën që është leshu në qarkullim, është stabile edhe sot, pesha të rënda kalojnë aty dhe nuk ka pasur asnjë problem”- tha zëvendësministri Hysen Durmishi.

    KALLXO.com më 07.01.2025 kishte raportuar ekskluzivisht se Ura e Badovcit ishte lëshuar për qarkullim pa u testuar.

    Zëvendësministri Durmishi tha se ura u lëshua për qarkullim për shkak të fluksit të madh të mërgimtarëve të cilët kishin vendosur që festat e fundvitit t’i presin në Kosovë.

    “Ura e Badovcit është lëshu në qarkullim për shkak të mërgimtarëve që kanë qenë të shumtë në atë kohë, për shkak se gjatë gjithë kohës së ndërtimit, janë bërë a-testet paraprake, është shqyrtuar çdo material që është përdorur aty dhe ky testimi final që ka qenë pjesë e kontratës, në fund është vetëm formal. Të gjithë inxhinierët e dinë se nëse ka pasur monitorim të përditshëm të zhvillimit të punimeve dhe rezultatet e betonit dhe armaturës kanë qenë të gjitha në rregull dhe janë zhvillu punimet sipas projektit, atëherë natyrisht që ura është stabile”- shtoi Durmishi.

    Pas raportimit të KALLXO.com se testimi nuk ishte kryer dhe ura ishte lëshuar në qarkullim, Prokuroria e Prishtinës nisi hetimet.

    Më 23.01.2025 Policia njoftoi se një person është intervistuar, teksa rasti është cilësuar si – mbikëqyrje e pandërgjegjshme e trafikut publik.

    https://kallxo.com/lajm/u-leshua-ne-qarkullim-pa-u-testuar-pas-raportimit-te-kallxo-com-intervistohet-nje-person-per-uren-e-badovcit/

    Teksa sipas Policisë një person është intervistuar, ministri i Infrastrukturës, Liburn Aliu, dhe zëvendësi i tij, nuk janë në dijeni nëse për rastin është intervistuar edhe ndonjë zyrtar në Ministrinë e Infrastrukturës.

    Ura që shtrihet në magjistralen Prishtinë – Gjilan ishte mbyllur në fund të muajit prill të vitit 2023. Më pas, më 17.05.2023, Ministria e Infrastrukturës kishte asfaltuar rrugën ndihmëse që shfrytëzohej si rrugë alternative, deri në përfundimin e urës.

    Ndërsa në tetor të vitit 2023 kishin filluar procedurat e prokurimit për ndërtimin e urës së re.

    Kontrata “Ndërtimi i urës në rrugën nacionale N25.2, segmenti Prishtinë – Gjilan, lokacioni te Liqeni i Badovcit” ishte nënshkruar më 10.01.2024. Vlera e kontratës së nënshkruar me kompaninë fituese “Dreni Inginiering” ishte 468 mijë e 522 euro.

    Testimi i urës ishte paraparë në aneks-kontratë dhe shtetit i kushtoi 6,000 euro.

  • U lëshua në qarkullim pa u testuar, pas raportimit të KALLXO.com intervistohet një person për Urën e Badovcit

    Pas raportimit të KALLXO.com se Ura e Badovcit është lëshuar për qarkullim pa u testuar, Policia e Kosovës ka njoftuar se pas pranimit të autorizimit nga Gjykata dhe pas ndërmarrjes së veprimeve hetimore ka konfirmuar se Ura është lëshuar për qarkullim pa përfunduar testimi final.

    Më tej, në njoftim thuhet se tashmë një person është intervistuar, teksa rasti është cilësuar, si: “mbikëqyrje e pandërgjegjshme e trafikut publik”.

    “Në koordinim me Prokurorin është intervistuar një i dyshuar mashkull kosovar. Në konsultim me Prokurorin rasti vazhdon në procedurë të rregullt.” – thuhet në Raportin 24-orësh të Policisë së Kosovës.

    Më 07.01.2025, KALLXO.com kishte raportuar ekskluzivisht se Ura e Badovcit ishte lëshuar në qarkullim pa u testuar.

    Ura ishte lëshuar në qarkullim më 31.12.2024, teksa testimi final i saj ishte realizuar disa ditë pas raportimit të KALLXO.com, saktësisht më 09.01.2025. Pra, testimi ishte bërë dhjetë ditë pasi e njëjta ishte lëshuar për qarkullim për automjete.

    Pas raportimit ekskluziv të KALLXO.com, Prokuroria e Prishtinës kishte kërkuar nga Policia e Kosovës të mbledhë informacione për lëshimin në qarkullim të Urës te Liqeni i Badovcit – pa u testuar fare struktura e saj.

    Kjo u konfirmua nga kryeprokurori i Prishtinës, Zejnullah Gashi.

    “Po, mund t’jua konfirmojmë se Prokuroria Themelore e Prishtinës ka kërkuar nga Policia e Kosovës mbledhjen e informacioneve – lidhur me lëshimin e Urës në qarkullim pa u testuar.” – tha kryeprokurori Gashi për KALLXO.com, më 08.01.2025.

    Kompania përgjegjëse për kryerjen e testimit “Dreni Inginiering” kishte konfirmuar për KALLXO.com se Ura ishte lëshuar për qarkullim për shkak të festave.

    Ndërsa, zëvendësministri i Infrastrukturës, Hysen Durmishi për KALLXO.com kishte deklaruar se testimi ishte vetëm formal, sepse Ura ishte ndërtuar me kritere të larta të ndërtimit.

    Sipas aneks-Kontratës, ky testim i ka kushtuar buxhetit të shtetit 6 mijë euro, kurse i gjithë projekti ka kushtuar mbi gjysmëmilioni euro.

    Ura, që shtrihet në magjistralen Prishtinë – Gjilan, ishte mbyllur në fund të muajit prill të vitit 2023. Më pas, më 17.05.2023, Ministria e Infrastrukturës kishte asfaltuar rrugën ndihmëse, që shfrytëzohej si rrugë alternative, deri në përfundimin e Urës. Ndërsa, në tetor të vitit 2023, kishin filluar procedurat e prokurimit për ndërtimin e Urës së re. Kontrata “Ndërtimi i urës në rrugën nacionale N25.2, segmenti Prishtinë – Gjilan, lokacioni te Liqeni i Badovcit” ishte nënshkruar më 10.01.2024. Vlera e Kontratës së nënshkruar me Kompaninë fituese “Dreni Inginiering” ishte 468 mijë e 522 euro.

  • Ura e Badovcit u testua 10 ditë pas hapjes për qarkullim

    Dhjetë ditë pasi u lëshua në qarkullim, për disa orë ura te liqeni i Badovcit u bllokua për qarkullim të enjten më 09.01.2025.

    Pas raportimit të KALLXO.com se ura ishte lëshuar pa u testuar struktura e saj, një gjë e tillë u bë sot.

    Fillimisht, poshtë u vendosën pajisjet që regjistronin lëvizjet e strukturës së urës, kur katër kamionë me ngarkesa deri në 30 tonë, kalonin mbi urë. Proces ky që zgjati rreth 2 orë.

    Ndërkohë, disa nga qytetarët që frekuentonin magjistralen Prishtinë – Gjilan nuk e dinin që ura nuk ishte e testuar.

    “Jo, nuk e kam ditë. Veç le të ndreqet mirë sepse është për krejt qytetarët”- tha Rexhep Maloku për KALLXO.com.

    Një tjetër qytetar faktin se ura ishte lëshuar në qarkullim pa u testuar struktura e saj e kishte kuptuar përmes mediave.

    “Po, e kam kuptu. Kjo me të vërtetë është katastrofë”- tha Enver Gashi.

    Rezultatet e testimit të urës pritet të publikohen gjatë javës në vijim.

    Ura që shtrihet në magjistralen Prishtinë – Gjilan ishte mbyllur në fund të muajit prill të vitit 2023. Më pas, më 17.05.2023, Ministria e Infrastrukturës kishte asfaltuar “by-pass”-in që shfrytëzohej si rrugë alternative, deri në përfundimin e urës.

    Ndërsa, në tetor të vitit 2023 kishin filluar procedurat e prokurimit për ndërtimin e urës së re.

    Kontrata “Ndërtimi i urës në rrugën nacionale N25.2, segmenti Prishtinë – Gjilan, lokacioni te Liqeni i Badovcit” është nënshkruar më 10.01.2024. Vlera e kontratës së nënshkruar me kompaninë fituese “Dreni Inginiering” ishte 468 mijë e 522 euro.

    Kurse, testimi parashihej në aneks-kontratë dhe kushtoi 6,000 euro.

    Pas raportimit ekskluziv të KALLXO.com, Prokuroria e Prishtinës më 08.01.2025 kishte konfirmuar se ka kërkuar nga Policia e Kosovës të mbledhë informacione për lëshimin në qarkullim të urës te liqeni i Badovcit pa u testuar fare struktura e saj.

    Këtë e kishte konfirmuar kryeprokurori i Prishtinës, Zejnullah Gashi.

     

    https://kallxo.com/lajm/ekskluzive-ura-e-badovcit-u-leshua-ne-qarkullim-pa-u-testuar-video/

     

  • Prokuroria nis mbledhjen e informatave për urën e Badovcit që u lëshua për qarkullim pa u testuar struktura e saj

    Pas raportimit ekskluziv te KALLXO.com, Prokuroria e Prishtinës ka kërkuar nga Policia e Kosovës të mbledhë informacione për lëshimin në qarkullim të urës te liqeni i Badovcit pa u testuar fare struktura e saj.

    Kjo u konfirmua nga kryeprokurori i Prishtinës, Zejnullah Gashi.

    “Po, mund të jua konfirmojmë se Prokuroria Themelore e Prishtinës ka kërkuar nga Policia e Kosovës mbledhjen e informacioneve lidhur me lëshimin e urës në qarkullim pa u testuar” – tha kryeprokurori Gashi për KALLXO.com.

    Më 07.01.2025, KALLXO.com kishte raportuar se ura te liqeni i Badovcit, e cila u lëshua në qarkullim më 31.12.2024, nuk ishte testuar.

    Këtë e kishte konfirmuar vetë kompania “Dreni Inginiering” përgjegjëse  për kryerjen e testimit, duke thënë se ura u lëshua për qarkullim për shkak të festave.

    Në anën tjetër, zëvendësministri i Infrastrukturës, Hysen Durmishi, kishte thënë se testimi është vetëm formal sepse ura është stabile meqë ura është ndërtuar me standarde të larta.

    Zëvendësministri Durmishi, megjithatë, përmes një statusi në Facebook, njoftoi se testimi i urës do të bëhet të enjten.

    Testimi i urës që ka gjatësi rreth 40 metra, ishte paraparë në aneks-kontratë, të cilën Ministria e Infrastrukturës e nënshkroi kur punimet ishin në fazën fillestare.

    Sipas paramasës, vetëm testimi i urës do të kushtojë 6,000 euro.

     

  • Kurti nuk përgjigjet për urën e patestuar te liqeni i Badovcit, Mbrojtja e Afërt nuk lejon ekipin e KALLXO.com t’i afrohet kryeministrit

    “Ura në Badovc është lëshu për qarkullim pa qenë e testuar. A ndiheni ju i sigurt me kalu në atë urë?” dhe “A jeni ftuar për të marrë pjesë në inagurimin e presidentit Trump?”

    Këtyre dy pyetjeve të gazetarit të KALLXO.com nuk u është përgjigjur kryeministri, Albin Kurti, më 08.01.2025.

    Madje, pjesëtarët e Mbrojtjes së Afërt e kanë penguar ekipin e KALLXO.com t’i afrohet kryeministrit, teksa ky ka vizituar Observatorin dhe Planetariumin Kombëtar të Kosovës në fshatin Rashincë të Shtimes.

    Mbrojtja e Afërt ia pamundësoi punën ekipit të KALLXO.com me arsyetimin se vizita e kryeministrit është “private”.

    “I nderuar, po më vjen keq, nuk mundemi me leju, është private, a e di? Mos merr pamje, të lutem!” – tha fillimisht njëri pjesëtar i Mbrojtjes së Afërt.

    Më pas, ekipi i KALLXO.com u detyrua që të largohet më tej, jashtë “perimetrit të sigurisë” sipas Mbrojtjes së Afërt.

    “Është vizitë private, është me familje, është urdhër. Në vizitat zyrtare nuk të kemi pengu asnjëherë. Absolutisht. Kjo është vizitë private, vazhdoni në pjesën atje. Mos xhironi në vizita private! Tek vetura e parë, vazhdoni tek vetura e parë” – tha tutje pjesëtari i Mbrojtjes së Afërt.

    Pasi që ekipi u largua dhe mes tyre dhe kryeministrit u vendosën veturat zyrtare, Mbrojtja e Afërt u pyet se pse po ‘rrezikohet’ siguria vetëm nga gazetarët, kurse qytetarët e pranishëm u lanë në afërsi.

    “Ka raste kur biem ndesh tek aspekti i sigurisë. Pamundësohet puna e juaj, pamundësohet edhe puna e jonë” – tha tutje pjesëtari i Mbrojtjes së Afërt.

    “Ama në këtë ras, sigurinë jemi duke e pengu ne? Komplet ata qytetarë atje, nuk janë duke e pengu? Gazetari dhe kameramani që kanë me ba pyetje, për me iu pamundësu pyetje, ata duhet me i largu” – ishte sqarimi i kërkuar nga ekipi, për ç’gjë nuk mori përgjigje.

    Kryeministri Kurti nuk dha përgjigje as nëse është ftuar në inaugurimin e Donald Trump si president i SHBA-së më 20.01.2025.

    Ura te liqeni i Badovcit është lëshuar për qarkullim më 31.12.2024.

    Ura u lëshua në qarkullim por testimi i strukturës së saj nuk i është bërë ende.

    Testimi, sipas tenderit, i kushton buxhetit të Kosovës 6 mijë euro.

    Më 07.01.2024, KALLXO.com raportoi se si u lëshua kjo urë në qarkullim pa qenë e testuar.

    Se kjo urë nuk u testua e kanë pranuar edhe nga kompania që ka kryer punimet, edhe nga zëvendësministri i Infrastrukturës, Hysen Durmishi.

    Nga kompania “DRENI INGINERING”, e cila është përgjegjëse për kryerjen e testimit, thonë se ura është hapur për qarkullim për shkak të festave të fundvitit.

    “Unë e bëj testimin e urës, nuk është kryer. Kemi dashtë me e lëshu për qarkullim për shkak të festave dhe në një afat tjetër bahet testimi i urës”- tha Adnan Lushtaku për KALLXO.com.

    Kurse, zëvendësministri i Infrastrukturës, Hysen Durmishi, kur u pyet se pse ura është lëshuar për qarkullim pa u testuar struktura e saj, tha se testimi është vetëm formal sepse ura është stabile.

    “Dëgjo, duheni me e pyet menaxheren e kontratës, por ura testohet gjatë gjithë fazës se ndërtimit, do të thotë merren atestet paraprake sepse është material. Sasia e armaturës që vendoset aty, çfarë marke e betonit vendoset aty. Merren mostrat edhe dihet se a është ajo markë e beton a jo, a është ajo klasë e armaturës a jo, nëse gjatë këtyre fazave është vendos armatura, është vendos betoni sipas projektit, natyrisht që ura është stabile. Ai testimi është vetëm formal” – tha ai për KALLXO.com.

    https://kallxo.com/lajm/ekskluzive-ura-e-badovcit-u-leshua-ne-qarkullim-pa-u-testuar-video/

    https://kallxo.com/lajm/leshimi-i-ures-se-badovcit-pa-u-testuar-reagon-zevendesministri-hysen-durmishi/?fbclid=IwZXh0bgNhZW0CMTEAAR3MoUu1fzD-TfOL1ceYXAR1mYDAj8nRf4Q-7OnpHKUfDzw_e5DcyXDX40I_aem_PVfWYNd7qjZR-Jd1kGgwOg