Ballina

Etiketë: ukraina

  • Disa rajone ruse raportojnë për sulme masive ukrainase

    Zyrtarët në disa rajone ruse kanë raportuar për sulme masive ukrainase me dronë gjatë natës që kanë pasur për shënjestër infrastrukturën e energjisë – përfshirë një Central bërthamor. Ndërkaq, Presidentët e Ukrainës dhe Rusisë kanë këmbyer akuza lidhur me mundësinë e negociatave të paqes.

    Zyrtarët qeveritarë në rajonet e Rusisë të Smolenskut, Nizhni Novgorodit, Tverit, Kurskut, Leningradit dhe Brianskut thanë se zonat e tyre janë goditur nga dronët e Ukrainës më 28-29 janar, ndërkaq aeroportet në Kazan dhe Shën Petersburg kanë ndaluar përkohësisht operimin për shkaqe sigurie.

    “Në disa zona në rajonin e Smolenskut, objektet civile ishin subjekt i një sulmi masiv” me dronë – shkroi në Telegram guvernatori, Vasily Anokhin.

    “Sistemet e mbrojtjes ajrore dhe ato të luftës elektronike të Ministrisë ruse të Mbrojtjes janë duke i shkatërruar dronët… Një nga dronët u rrëzua gjatë përpjekjes për të sulmuar një ndërtesë me energji bërthamore. Nuk ka viktima apo dëme.” – shtoi Anokhin.

    Informacione të tjera nuk u dhanë, por Centrali bërthamor në Smolensk është një ndërtesë e madhe për prodhimin e energjisë, që gjendet rreth 100 kilometra nga qyteti i Smolenskut.

    Ndërkaq, guvernatori i rajonit rus, Nizhni Novgorod, Gleb Nikitin tha se një dron ra në territorin e një kompleksi të karburanteve dhe energjisë në zonën industriale të Kstovskit, por nuk raportoi për viktima apo dëme të mëdha.

    “Shërbimet speciale po punojnë në vendngjarje dhe po përdoren të gjitha mjetet e nevojshme për të lokalizuar zjarrin në një nga Njësitë e rafinerisë së naftës.” – tha Nikitin.

    Guvernatorët rajonalë në rajonin Briansk, në kufi me Ukrainën dhe Tver, në afërsi të Moskës, po ashtu raportuan për sulme me dronë. Në këto dy rajone, zyrtarët nuk raportuan për viktima apo dëme.

    Autoritetet në Aeroportin e Kazanit – kryeqytetit të Republikës ruse të Tatarstanit – thanë se të gjitha fluturimet janë ndërprerë për shkaqe sigurie, ndonëse nuk njoftuan nëse Aeroporti ishte cak i ndonjë sulmi.

    Agjencia shtetërore e lajmeve TASS ka raportuar po ashtu se fluturimet në Aeroportin Pulkovo në Shën Petersburg janë ndërprerë për shkaqe sigurie, por nuk u dhanë më shumë detaje.

    Ministria ruse e Mbrojtjes tha se ka rrëzuar 104 dronë ukrainas në disa rajone gjatë natës. Ky pretendim i Rusisë nuk ka mundur të konfirmohet në mënyrë të pavarur.

    Të dyja palët e përfshira në luftë kanë intensifikuar përdorimin e dronëve muajve të fundit – fluturake që shpesh kanë pasur për cak infrastrukturën e energjisë së të dyja shteteve.

    Rusia ka shkaktuar dëme të mëdha në objektet civile ukrainase përmes sulmeve të kryera me dronë, raketa, artileri dhe lloje të ndryshme të bombave. Kremlini mohon se shënjestron zonat civile, pavarësisht provave se kryen sulme të tilla.

    Brenda Ukrainës, guvernatori rajonal Vitaliy Kim tha se dy gra janë vrarë gjatë një sulmi me raketa të kryer nga Rusia në qytetin e Mikolajivit.

    Përveç sulmeve në fushëbetejë, krerët e dy shteteve kanë këmbyer akuza. Presidenti ukrainas Volodymyr Zelensky tha se presidenti rus Vladimir Putin ka “frikë” që të hyjë në negociata për përfundimin e luftës, pasi udhëheqësi i Kremlinit refuzoi mundësinë e bisedimeve të drejtpërdrejta me homologun e tij ukrainas.

    “Sot Putini edhe një herë e konfirmoi se ai ka frikë nga negociatat, frikë nga udhëheqësit e fuqishëm dhe bën gjithçka që mundet për ta prolonguar luftën.” – shkroi Zelensky në X.

    “Çdo lëvizje që ai bën dhe të gjitha marifetet e tij cinike synojnë që kjo luftë të jetë e pafund.” – shtoi ai.

    Më herët Putin i tha televizionit shtetëror rus se bisedimet me Ukrainën janë të mundura, por jo me Zelenskyn, të cilin ai e cilësoi si “jolegjitim”, për shkak se mandati i tij presidencial i ka mbaruar, teksa shteti ende është në gjendje lufte.

    “Por në esencë, nëse ata duan të vazhdojnë përpara, ka rrugë ligjore për ta bërë këtë. Lejoni Kryetarin (e Parlamentit ukrainas) ta udhëheqë këtë gjë, në bazë të Kushtetutës.” – tha Putin.

    “Megjithatë, deri më tani ne thjesht nuk shohim se ka një dëshirë të tillë.” – shtoi ai.

    Ndërkaq, Axios ka raportuar se ushtria amerikane gjatë kësaj jave ka transferuar në Ukrainë rreth 90 Sisteme kundërajrore Patriot, që janë marrë nga depot në Izrael dhe në Poloni.

    Axios, duke cituar tri burime që kanë njohuri për këtë çështje, tha se Sistemet Patriot i ishin dhënë Izraelit mbi 30 vjet më parë gjatë Luftës së parë të Gjirit./REL

  • Zelensky: Trump t’ia mbajë anën Ukrainës, Putini nuk i frikësohet Europës

    Ukrainës i duhen garanci më të mëdha sigurie dhe presidenti rus Vladimir Putin nuk i frikësohet Europës – ka deklaruar presidenti ukrainas Volodymyr Zelensky për Fox News, në një intervistë ku i kërkoi presidentit amerikan Donald Trump të mbajë anën e Ukrainës – raporton Agjencia e lajmeve Reuters.

    Trump, i cili mori detyrën më 20.01.2025, ka premtuar se shpejt do t’i japë fund luftës Rusi-Ukrainë, por pa treguar sesi. Këshilltarët e tij kanë sugjeruar se arritja e Marrëveshjes mund të marrë muaj të tërë. Trump ka shprehur gatishmërinë për të folur me Putinin për përfundimin e luftës – një kontrast me Administratën e ish-presidentit demokrat Joe Biden, i cili e shmangu liderin rus.

    Fitorja zgjedhore e Trumpit në nëntor ngjalli shpresën për zgjidhje diplomatike për t’i dhënë fund pushtimit të Ukrainës nga Moska, që filloi në shkurt 2022, por gjithashtu shtoi frikën në Kiev se Marrëveshja e menjëhershme e paqes mund të ketë një çmim të lartë për Ukrainën.

    “Ne duam që ai (Trump) të jetë në anën e drejtësisë, në anën e Ukrainës.” – ka deklaruar Zelensky në intervistën e transmetuar të martën mbrëma, më 28.01.2025, sipas kohës lokale amerikane. “Putini nuk ka frikë nga Europa”.

    Zelensky ka shtuar se Ukraina nuk mund ta pranojë pushtimin rus, por preferoi zgjidhje diplomatike.

    Shtëpia e Bardhë nuk doli me asnjë koment të menjëhershëm.

    Pas fillimit të pushtimit rus Shtetet e Bashkuara nën Bidenin i dhanë mbi 175 miliardë dollarë ndihmë për Ukrainën – duke përfshirë mbi 60 miliardë dollarë ndihmë për sigurinë. Nuk është e sigurt nëse ndihma do të vazhdojë me të njëjtin ritëm edhe nën Trumpin.

    Përgatiti: Rexhep Maloku – Kallxo.com

  • Putin thotë se është i gatshëm të bisedojë me Trumpin për Ukrainën

    Presidenti rus, Vladimir Putin, tha se është i gatshëm për bisedime me homologun e tij amerikan, Donald Trump, për Ukrainën, duke e quajtur atë udhëheqës “të mençur” i cili do të mund ta kishte parandaluar nisjen e konfliktit më 2022.

    Kievi reagoi menjëherë, duke paralajmëruar kundër përjashtimit të tij nga negociatat.

    Udhëheqësi rus nuk tha se kur këto bisedime do të mbaheshin dhe Kremlini ka thënë më herët se po pret për “sinjale” nga Uashingtoni, pavarësisht se Trump një ditë më herët paralajmëroi se është i gatshëm të takohet “menjëherë” me Putinin.

    “Ne gjithmonë kemi thënë, dhe unë dua ta theksoj sërish, se ne jemi të gatshëm për këto negociata sa i përket çështjes ukrainase”, tha Putin për një gazetar të televizionit shtetëror rus.

    Duke e lavdëruar Trumpin dhe duke e quajtur njeri “të mençur” dhe “pragmatik”, Putin po ashtu përsëriti pretendimin e pabazuar të presidentit amerikan se kishte fituar zgjedhjet presidenciale amerikane kundër Joe Biden më 2020.

    Pothuajse tre vjet më parë nisja e konfliktit në Ukrainë bëri që raportet mes dy fuqive bërthamore të ishin në pikën më të ulët që nga Lufta e Ftohtë.

    Trump, që u inaugurua të hënën, e ka quajtur konfliktin “qesharak” dhe e ka kërcënuar Rusinë me sanksione ekonomike nëse nuk pajtohet të ndalë luftën.

    Ai po ashtu ka thënë se nëse ulen çmimet e naftës, atëherë lufta do të përfundonte shpejt, pasi Rusia përdor të ardhurat nga nafta për të financuar luftën e saj kundër Ukrainës.

    Asnjëra palë nuk duket se po jep shenja për uljen e armiqësive që nga inaugurimi i Trumpit, i cili gjatë fushatës zgjedhore kishte thënë se do t’i jepte fund luftës brenda “24 orëve” pasi të merrte detyrën e presidentit.

    Pas deklaratave të Putinit, Kievi reagoi të premten dhe tha se nuk duhet të përjashtohet nga bisedimet.

    “Ai [Putini] dëshiron të negociojë për fatin e Evropës, pa Evropën. Ai dëshiron bisedime për Ukrainën, pa Ukrainën”, tha, Andriy Yermak, shefi i zyrës së presidentit të Ukrainës.

    “Kjo nuk do të ndodhë. Putin duhet t’i kthehet realitetit apo do të bëjë kthim prapa. Kjo nuk ndodh në botën moderne”, tha ai./REL

  • Digjet rafineria ruse e naftës pas sulmit më të madh ukrainas sivjet

    Një rafineri e naftës në qytetin Riazan në Rusi është përfshirë plotësisht nga zjarri, pasi Kievi e kreu një sulm të madh me dronë të premten.

    Ky sulm – më i madhi i Ukrainës që nga fillimi i këtij viti – u krye ndaj më shumë se dhjetëra rajoneve të Rusisë – përfshirë Moskën.

    Dëshmitarët dhe videot e verifikuara shfaqin një zjarr shumë të madh në rafinerinë e naftës së Rosneftit në Kazan.

    Një video, e postuar në Telegram, shfaq zjarrin e madh e njerëzit duke bërtitur dhe duke ikur nga një zonë industriale e përfshirë nga flakët.

    Për zjarre u raportua gjithashtu edhe në afërsi të Termocentralit Novo-Riazan.

     

    Nuk është raportuar për viktima, ndërsa Ministria e Mbrojtjes e Rusisë tha se i ka shkatërruar mbi 120 dronë ukrainas në të gjithë territorin rus.

    Sipas kryetarit të Moskës, Sergei Sobyanin, gjashtë dronë u rrëzuan mbi Moskë dhe disa të tjerë u rrëzuan në zonat përreth: Shchyolkovo, Kolomna, Ramenskoye dhe Podolsk.

    Sobyanin tha se nuk pati dëme të mëdha apo lëndime në vendet ku kishin rënë mbetjet e dronëve, por sulmi shkaktoi ndërprerje të dukshme në trafikun ajror civil – duke pezulluar përkohësisht operacionet në tri Aeroportet kryesore të Moskës: Vnukovo, Domodedovo dhe Zhukovsky.

    Sipas Ministrisë ruse të Mbrojtjes, në rajonin Briansk u rrëzuan 37 dronë, ndërsa në rajone të tjera si Kursk dhe Saratov u rrëzuan nga 17 dronë. Numër më i vogël dronësh u rrëzuan në rajonet Rostov, Belgorod, Voronezh, Tula, Oryol dhe Lipetsk.

    Kufizime të përkohshme u vendosën gjithashtu për uljet dhe nisjet e fluturimeve në Aeroportet në Kazan, Nizhnekamsk, Penza, Samara dhe Saratov, për shkak të kërcënimit të vazhdueshëm nga dronët.

    Shkalla e sulmeve të Ukrainës me dronë kundër Rusisë përkoi me një seri sulmesh ajrore ruse mbi territorin ukrainas.

    Në Kiev një sulm rus shkaktoi vdekjen e tre civilëve. U raportuan gjithashtu dëme në zona banimi – duke përfshirë shkatërrime të konsiderueshme në qytetet Fastiv dhe Brovari, pranë Kryeqytetit ukrainas.

    Forcat ruse përdorin rregullisht lloje të ndryshme armësh – përfshirë dronë, raketa dhe artileri, për t’i sulmuar rajonet ukrainase – duke goditur shpesh infrastrukturën civile dhe zonat e banuara.

    Derisa autoritetet ruse e mohojnë se e sulmojnë qëllimisht infrastrukturën civile, Ukraina dhe Organizatat Ndërkombëtare i kanë dënuar këto veprime si krime lufte – duke theksuar frekuencën dhe natyrën e qëllimshme të sulmeve ndaj Spitaleve, Shkollave dhe objekteve energjetike./REL

  • Trump i kërkon OPEC-ut të rrisë prodhimin e naftës për t’i bërë presion Putinit

    Presidenti amerikan, Donald Trump nuk ka arritur që ta bindë liderin e Kremlinit, Vladimir Putin, për bisedime që t’i japë  fund luftës në Ukrainë. Prandaj, ai po kërkon ndihmë për këtë çështje nga Arabia Saudite.

    Gjatë fjalimit më 23 janar në Forumin Botëror Ekonomik në Davos të Zvicrës, Trump u bëri thirrje Arabisë Saudite dhe aleatëve të Organizatës së Vendeve Eksportuese të Naftës, OPEC, që të rrisin prodhimin e naftës – një lëvizje që do të ulte çmimet e naftës së papërpunuar – duke ngufatur burimet e të ardhurave që Moska përdor për luftën kundër Ukrainës.

    “Unë do t’iu kërkojë po ashtu Arabisë Saudite dhe OPEC-ut që t’i ulin kostot e naftës. Do t’i ulim çmimet, që në fakt jam i befasuar që nuk i kanë ulur para Zgjedhjeve. Isha i befasuar nga ky fakt. Nëse çmimet ulen, lufta mes Rusisë dhe Ukrainës do të merrte fund menjëherë.” – tha Trump.

    Gjatë fushatës zgjedhore për Zgjedhjet presidenciale të vitit 2024, Trump e bëri prioritet përfundimin e pushtimit trevjeçar rus të Ukrainës dhe ka deklaruar se do që të takohet me presidentin Putin.

    Megjithatë, Kremlini duket se po heziton që të përfshihet në bisedime, teksa analistët thonë se Putini beson se po fiton luftën dhe prandaj nuk sheh arsye që të ndalë luftimet.

    Së fundi, Rusia është duke marrë territor në lindje të Ukrainës me ritmin më të shpejtë që nga nisja e luftës, teksa Ukraina po përballet me sfida të rekrutimit të ushtarëve të rinj.

    Një ditë pas inaugurimit më 20 janar, Trump tha se do të vendosë më shumë sanksione ndaj Rusisë, që ta detyrojë që të ulet në tavolinën e bisedimeve. Por, ai nuk tregoi se çfarë do të shënjestronin sanksionet e reja eventuale.

    Një ditë më vonë ai përsëriti këtë paralajmërim. Por, zëdhënësi i Kremlinit, Dmitry Peskov tha më 23 janar – para se Trump të fliste në Davos – se Moska “nuk sheh asnjë element të ri”, në atë që Trump ka deklaruar.

    Gjatë mandatit të paraardhësit të Trumpit, Joe Biden, SHBA-ja vendosi një sërë sanksionesh ndaj ekonomisë ruse – përfshirë edhe ndaj industrisë së naftës.

    Ekonomia ruse varet shumë nga eksportet e naftës, që përbëjnë mbi 30% të të ardhurave të buxhetit federal. Një rënie, qoftë e eksporteve të naftës ruse apo e çmimeve të naftës, do të shtrëngonte edhe më shumë ekonominë ruse, që veçse po përballet me vështirësi.

    Megjithatë, sanksione të reja ndaj industrisë së naftës ruse mund të çojë në rritje të çmimeve globale të naftës – nëse shtetet e tjera nuk rrisin prodhimin.

     

    Arabia Saudite dhe disa nga aleatët e saj në OPEC janë të aftë të rrisin prodhimin për një periudhë të shkurtër kohore. Arabia Saudite prodhon aktualisht 3 milionë fuçi nafte në ditë, ndërkaq Emiratet e Bashkuara Arabe rreth 1 milion fuçi.

    Prodhimi në sasi të tilla është rezultat i Marrëveshjes mes shteteve të OPEC-ut, që të prodhojnë aq sa çmimet e naftës të mbesin të larta.

    Rusia, anëtare e OPEC+, eksporton rreth 6.6 milionë fuçi nafte dhe produkt të naftës në ditë.

    Para fjalimit virtual në Davos, Trump bisedoi me Princin e Kurorës të Arabisë Saudite, në bisedën e parë telefonike të realizuar me një udhëheqës të huaj, që kur mori mandatin në fillim të javës.

    Të dy diskutuan për stabilitetin në Lindjen e Mesme, luftën kundër terrorizmit, rritjen e tregtisë – tha Shtëpia e Bardhë.

    Chris Weafer, ekspert për industrinë e naftës dhe themelues i firmës këshilluese, Macro-Advisory tha se nuk mendon që Trumpi mund të bindë sauditët dhe anëtarët e tjerë të OPEC-ut që të rrisin prodhimin, me qëllim që t’i bëhet presion Kremlinit për Ukrainën.

    “Ka pak gjasa që Arabia Saudite, Emiratet apo ndonjë prodhues tjetër i OPEC-ut që të përfshihen në një lëvizje të tillë politike kundër anëtares së OPEC+, Rusisë, apo të ndërmarrin ndonjë veprim që do të bënte që ata të humbin të ardhura nga eksportet dhe t’i japin hise më të madhe në treg prodhuesve të SHBA-së.” – tha Weafer për Radio Evropa e Lirë.

    David Oxley, ekonomist për klimën dhe mallrat në Capital Economics, tha se përderisa Arabia Saudite është “larguar” nga SHBA-ja viteve të fundit, Trump ka lidhje të forta me udhëheqjen e vendit.

    “Ka pasur shenja së fundi të ngrohjeve të raporteve dhe Trump njihet si person që ka raporte të mira me Princin e Kurorës dhe me Fondin Publik të Investimeve të Arabisë Saudite.” – tha Oyley, më 23 janar.

    Ai shtoi se Arabia Saudite ka shprehur gjithashtu zhgënjimin me anëtarët e tjerë të OPEC-ut, për prodhimin e një sasie më të madhe të naftës sesa kuota e tyre dhe mund të “hapë portat” për të rimarrë pjesën e tregut global.

    “Kjo ftesë eksplicite nga Trumpi mund të jetë mbulesa që i duhet Arabisë, për të hapur portat.” – tha ai./REL