Ballina

Etiketë: TikTok

  • Për çka u gjobit “Koalicioni për Familjen” nga PZAP?

    Më 28.01.2025 profili në rrjetin social ‘TikTok’ me emër ‘Shqiperia zgjohet’ ka publikuar një fotografi/video të bartësit të listës së ‘Koalicioni për Familjen’, Eman Rrahmani, në të cilën shkruhet “ish-deputeti i LVV u dënua me 7000 euro gjobe vetëm se ne nje tubim elektoral deklaroi qe neqoftse do qeveriste ne Kosove nuk do te lejonte kurrë martesat burre me burre e gru me gru”.

    KALLXO.com ka kontrolluar vendimet për dënime të Panelit Zgjedhor për Ankesa dhe Parashtresa (PZAP) që nga nisja e fushatës zgjedhore në Kosovë (11.01.2025) e deri më 31.01.2025.

    Më 28.01.2025, PZAP kishte publikuar vendimin për dënimin me 7,500 euro ndaj subjektit politik ‘Koalicioni për Familje’. Në vendimin e PZAP-së thuhet se dënimi është shqiptuar pas gjuhës së përdorur nga kandidati për deputet, Eman Rrahmani në rrjetin social Facebook.

    “Paneli, pas shikimit të shkresave të ofruara si provë materiale në ankesë, të cilat janë bërë nga Koalicioni për Familjen, respektivisht nga kandidati për deputet Eman Rrahmani në rrjetin social facebook, ku shihet se i njëjti ka postuar deklaratat duke përdorur fjalët “Po thonë që nuk bon me ju thanë “turp” atyre që cenojnë familjen. Turp edhe marre, secilit, organizatë joqeveritare që financon degjenerimin e fëmijeve! Turp dhe marre secilës komunë e secilit kryetar komune që i financon këto organizata, me e prish familjen!””- thuhet në vendimin e PZAP-së.

    Përveç këtij dënimi, ‘Koalicioni për Familje’ që nga fillimi i fushatës zgjedhore është dënuar edhe me tri gjoba të tjera.

    Ky subjekt politik ishte dënuar më 5 mijë euro më 23.01.2025 me arsyetimin se kandidati për deputet Jeton Haxhimustafa në rrjetin social Facebook kishte postuar një deklaratë duke përdorur fjalët “A po e kuptoni se këtu kemi të bëjmë me idiologji dhe se i kemi shumë arsye për t’u përgjigjur masovikisht këtyre bojkotimeve që po i bëhën Koalicionit për Familjen, fillimisht përmes RTK-së dhe tani përmes PZAP-së vetëm që të na detyrojnë të heshtim përballë degjenerimit. Por, përkundrazi, s’ka pushtet që i nënshtrohemi apo na pengoj që t’i themi jo martesës burrë me burrë dhe grua me grua. PIKE!”.

    ‘Koalicioni për Familje’ ishte gjobitur me 4,500 euro të tjera nga PZAP më 22.01.2025 për gjuhën e përdoror të kandidatëve për deputetë, Fatmir Smajli dhe Eman Rrahmani kundrejt komunitetit LGBTI+.

    Në vendimin e PZAP-së thuhet se gjuha e përdorur nga subjekti politik ‘Koalicioni për Familjen” ndaj LGBTI+ në tubimet zgjedhore në Pejë më datë 17.01.2025, është në kundërshtim me Kodin e Mirësjelljës për Subjektet Politike.

    “…sipas panelit përdorimi i gjuhës së tillë ka për qëllim ofendimin, denigrimin dhe njëherit shihen si shprehje me ngjyrime përçmuese ose nënvlerësuese”- thuhet në arsyetimin e vendimit të PZAP-së.

    Më 23.01.2025, ky subjekt politik ishte dënuar me 1,500 euro nga PZAP me arsyetimin se vendosja e posterit të kandidates Dorontina Kokollari në shtyllën elektrike në Komunën e Suharekës ishte në kundërshtim me dispozitat ligjore.

    Shuma të majme të gjobave ka shqiptuar PZAP kundrejt partive politike që nga fillimi i fushatës zgjedhore. 

    PZAP u ka shqiptuar gjoba në vlerë 125 mijë euro subjekteve politike për shkelje të rregullave zgjedhore që nga fillimi i fushatës zgjedhore, e cila ka nisur më 11.01.2025 e deri më 22.01.2025.

    Sipas vendimeve të publikuara, nga 11 deri më 22.01.2025, Lidhja Demokratike e Kosovës, ishte dënuar me 45 mijë euro për gjashtë raste të ndryshme.

    Me 20 mijë euro ishte dënuar Lidhja Demokratike e Kosovës për krahasimin e kandidates për deputete, Xhenet Syka Kelmendi, e cila e ka krahasuar kandidatin e LVV-së për kryeministër, Albin Kurtin, me Adolf Hitlerin.

    Nga 11 deri më 22.01.2025 Partia Demokratike e Kosovës për 10 ditë fushatë është dënuar gjithsej 44,500 euro për 10 raste të ndryshme.

    Gjoba prej 8 mijë eurosh iu dha PDK-së për shkak të postimit të një video ku shihet Sami Lushtaku duke i quajtur aktivistet e LVV-së ‘zagarë’.

    Deri më 22.01.2025 koalicioni AAK, Nisma Socialdemokrate, Konservatorët, Forumi Intelektual E-30, është dënuar me gjithsej  23,500 euro për tri raste të ndryshme.

    Po ashtu, PZAP për 10 ditë fushatë, nga 11 deri më 22.01.2025 e ka gjobitur me 12 mijë euro partinë Lëvizja Vetëvendosje për katër raste të ndryshme.

    Më 30.01.2025, PZAP e ka dënuar Lëvizjen Vetëvendosje me 8 mijë euro gjobë për pengimin e gazetarëve gjatë fushatës zgjedhore në dy raste të ndryshme. Sipas vendimit, Lëvizja Vetëvendosje me 5,500 euro gjobë është dënuar për pengimin e gazetarëve në tubimin e saj në Malishevë të mbajtur më 25.01.2025.

    Në të njëjtën ditë, më 30.01.2025, PZAP e ka dënuar edhe me 10 mijë euro Lëvizjen Vetëvendosje, për shkelje të Kodit të Mirësjelljes për Subjektet Politike gjatë fushatës zgjedhore.

    Në vendim thuhet se AAK-ja është ankuar se kandidatja për deputete, Donika Gërvalla dhe kandidati për kryeministër, Albin Kurti kanë përdorur gjuhë të papërshtatshme gjatë fjalimit të tyre në një tubim në Deçan, më 26.01.2025.

    “Sipas parashtruesit të Ankesës, gjatë këtij fjalimi, Donika Gërvalla-Schwartz, duke aluduar për Ramush Haradinajn, të njëjtin e quan ‘Gjeneralë të vetëshpallur’ (në shumës), e më pas vazhdon e njëjta ‘Prandaj, unë mendoj që aq më pak meriton respekt kush sakrificën personale apo familjare e përdor për arsyetim për krim, për korrupsion, për vrasje apo mashtrim’” – thuhet në vendimin e PZAP-së.

    PZAP është organ i përhershëm, i pavarur kompetent për të vendosur në lidhje me ankesat e lejuara që kanë të bëjnë me procesin zgjedhor siç është caktuar me Ligjin për Zgjedhjet e Përgjithshme në Republikën e Kosovës, Ligjin për Zgjedhjet Lokale në Republikën e Kosovës dhe me Rregullat zgjedhore.

    Fushata pёr Zgjedhjet parlamentare nё Kosovё ka filluar zyrtarisht, mё 11.01.2025. Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare që do të mbahen më 09.02.2025.

    Për këto Zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre

     – me qëllim të fitimit të përkrahjes nga votuesit e tyre;– të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues

     – në pajtim me rregullat e KQZ-së dhe ligjet e tjera në fuqi.

    Këto do të jenë Zgjedhjet e para të rregullta, që Kosova mban që nga shpallja e pavarësisë më 2008.

  • Babai vret të bijën në Pakistan shkaku i videove në TikTok

    Një burrë, i cili kohët e fundit e ktheu familjen në Pakistan nga Shtetet e Bashkuara, ka rrëfyer se ka vrarë të bijën e tij adoleshente, sepse nuk i pëlqenin videot e saj në TikTok – ka konfirmuar Policia pakistaneze për televizionin britanik BBC.

    Anwar ul-Haq akuzohet për vrasje, pasi pranoi se të martën, më 28.01.2025, e qëlloi për vdekje të bijën Hira në qytetin jugperëndimor Quetta. Ai u deklaroi fillimisht hetuesve se vrasjen e kishin kryer burra të paidentifikuar.

    Babai, i cili ka nënshtetësi amerikane, ka thënë se ishte kundër postimeve të së bijës.

    Policia ka bërë të ditur se po e heton rastin në të gjitha pistat e mundshme – duke përfshirë mundësinë e një vrasjeje nderi, e cila nuk është e pazakontë në vend.

    Qindra njerëz – shumica prej tyre gra – vdesin shkaku i të ashtuquajturave vrasje nderi në Pakistan çdo vit – thonë grupet për të drejtat e njeriut. Këto vrasje kryhen zakonisht nga të afërm, të cilët thonë se po veprojnë në mbrojtje të nderit të familjes.

    Në rastin e Hira Anwarit, e cila ishte ndërmjet 13 dhe 14 vjeç, një zëdhënës i Policisë ka thënë se familja e saj “kundërshtonte veshjen, stilin e jetesës dhe ndejat e saj shoqërore “.

    Familja jetoi në Shtetet e Bashkuara 25 vjet dhe Hira filloi të postonte përmbajtje në TikTok edhe para se me familje të kthehej në Pakistan.

    Hetuesit kanë thënë se kanë celularin e viktimës, por që është i kyçur.

    Në lidhje me vrasjen u arrestua edhe dhëndri i babait të saj – ka njoftuar Policia

    Nëse zbulohet se është vrasje nderi dhe të akuzuarit shpallen fajtorë do të përballen me dënim të detyrueshëm të përjetshëm – një ndryshim i bërë në Ligj nga Qeveria e Pakistanit, në vitin 2016. Më parë, fajtorët mund t’i shmangeshin dënimit me burg, nëse faleshin nga familja e viktimës.

    Në vitin 2023, një Gjykatë italiane dënoi një çift pakistanez me burgim të përjetshëm për vrasjen e vajzës së tyre 18-vjeçare, sepse ajo refuzoi një martesë të padëshiruar.

    Një vit më parë vëllai i yllit pakistanez të mediave sociale, Qandeel Baloch u lirua nga akuza për vrasjen e saj. Pas Ankesës në apel ai më herët ishte dënuar me burgim të përjetshëm, pasi pranoi vrasjen e vitit 2016 – duke thënë se kjo ishte për shkak se ylli e kishte turpëruar familjen.

    Përgatiti: Rexhep Maloku – Kallxo.com

  • Trump thotë se Microsoft-i është në bisedime për blerjen e TikTok-ut

    Presidenti amerikan, Donald Trump u tha gazetarëve se kompania Microsoft është në bisedime për blerjen e TikTok-ut – duke shtuar se do të dëshironte të shihte një betejë ofertash për këtë aplikacion.

    Kompania e teknologjisë, Microsoft nuk ka komentuar për këtë pohim të Trumpit. As TikTok e as ByteDance, që ka pronësi aplikacionin, nuk kanë komentuar po ashtu.

    TikTok, që ka afër 170 milionë përdorues amerikanë, përkohësisht u ndalua para se Ligji që i kërkon pronarit kinez ByteDance ta shiste ose do të ndalohej në Shtetet e Bashkuara të hynte në fuqi më 19.01.2025.

    Pasi mori mandatin e Presidentit më 20.01.2025, Trump nënshkroi një Urdhër Ekzekutiv duke kërkuar shtyrjen për 75 ditë të zbatimit të Ligjit, i cili thirret në shqetësimet për sigurinë kombëtare.

    Trump tha javën e kaluar se ai ishte duke biseduar me disa njerëz lidhur me blerjen e TikTok-ut dhe do të dëshironte që Vendimi për të ardhmen e aplikacionit popullor të merrej brenda 30 ditësh.

    Presidenti amerikan ka thënë më herët se është i hapur që miliarderi Elon Musk ta blejë aplikacionin, nëse pronari i Tesla-s dëshiron ta bëjë një gjë të tillë. Megjithatë, Musk nuk ka komentuar publikisht këtë deklaratë të presidentit Trump.

    Kjo është hera e dytë që Microsoft-i lidhet me blerjen e mundshme të TikTok-ut.

    Gjatë mandatit të parë si President, Trump kishte kërkuar që TikTok-u të ndante versionin për SHBA-në nga ByteDance – duke u thirrur në shqetësime të sigurisë kombëtare.

    Më 2020 Microsoft ishte ofertuesi kryesor, por bisedimet për blerjen e aplikacionit dështuan./REL

  • Trump njofton se mund të marrë vendim brenda 30 ditësh mbi të ardhmen e TikTok-ut

    Presidenti amerikan, Donald Trump tha të shtunën se ishte në bisedime me shumë individë për blerjen e platformës TikTok dhe ka të ngjarë të marrë një vendim për të ardhmen e aplikacionit në 30 ditët e ardhshme.

    “Kam folur me shumë njerëz për (aplikacionin) TikTok dhe ka interes të madh për TikTok-un,” u tha Trump gazetarëve në bordin e avionit presidencial ‘Air Force One’ gjatë një fluturimi për në Florida.

    Më herët të shtunën, agjencia e lajmeve Reuters, raportoi se dy persona që janë në dijeni të bisedimeve, thanë se administrata e zotit Trump po punon mbi një plan për të shpëtuar aplikacionin TikTok që përfshin kompaninë amerikane të teknologjisë kompjuterike ‘Oracle’.

    Sipas marrëveshjes që po negociohet nga Shtëpia e Bardhë, kompania mëmë e rrjetit TikTok, ByteDance do të vazhdonte të kishte rol, por mbledhja e të dhënave dhe përditësimi i rrjetit do të mbikqyrej nga kompania amerikane ‘Oracle’, që aktualisht mundëson infrastrukturën për funksionimin e TikTok-ut në Shtetet e Bashkuara.

    Sidoqoftë, në komentet e tij për gazetarët, zoti Trump tha se nuk kishte biseduar me shefin e kompanisë Oracle, Larry Ellison, për blerjen e aplikacionit.

    I pyetur nëse po synohej një marrëveshje me ‘Oracle’ dhe invesitorë të tjerë për të shpëtuar aplikacionin zotit Trump tha se “ Jo nuk është ‘Oracle’. Ka shumë njerëz që po flasin me mua, njerëz të rëndësishëm, mbi mundësinë për ta blerë dhe ka të ngjarë që të marr vendim në 30 ditët e ardhshme. Kongresi ka dhënë 90 ditë. Nëse mund ta shpëtoj Tiktok-un mendoj se do të ishte diçka e mirë”, tha zoti Trump./VOA

  • TikTok rikthehet në SHBA

    Rreth 12 orë pas ndalimit në Shtetet e Bashkuara, TikTok është rikthyer për shumë përdorues, pothuajse sikur të mos kishte ndodhur asgjë, duke ia atribuar kthimin një vendimi të presidentit të zgjedhur, Donald Trump, për të shpëtuar aplikacionin, raporton CNN.

    TikTok mirëpriti përdoruesit me një njoftim që thoshte: “Faleminderit për durimin dhe mbështetjen tuaj. Si rezultat i përpjekjeve të Presidentit Trump, TikTok është rikthyer në SHBA!”.

    Ky veprim i papritur për të rikthyer aplikacionin ndodhi pasi TikTok u bë i papërdorshëm për amerikanët të shtunën vonë në mbrëmje. Përdoruesit që përpiqeshin ta hapnin aplikacionin në atë kohë, merrnin një mesazh që thoshte se aplikacioni ishte offline dhe u kërkohej të “prisnin për informacione të tjera.”

    “Një ligj që ndalon TikTok është miratuar në SHBA. Për fat të keq, kjo do të thotë se nuk mund ta përdorni TikTok për momentin” – thuhej në mesazhin e TikTok-ut.

    Gjithashtu, aplikacioni nuk ishte i disponueshëm as në Apple dhe Google Play store, së bashku me aplikacionet Lemon8 dhe CapCut, të cilat gjithashtu janë në pronësi të kompanisë mëmë me bazë në Kinë, ByteDance.

    Të dielën në mëngjes, Trump tha se do të nxirrte një urdhër ekzekutiv pas inaugurimit të tij të hënën për të shtyrë zbatimin e ligjit që kërkon ndarjen ose ndalimin e aplikacionit. Brenda pak orësh, qasja në aplikacionin dhe faqen e internetit të TikTok filloi të rikthehej për përdoruesit në SHBA./CNN