Ballina

Etiketë: Serbi

  • Vuçiq thotë se janë plotësuar të gjitha kërkesat e studentëve dhe zotohet për falje

    Presidenti serb, Aleksandar Vuçiq, ka pretenduar se janë plotësuar të gjitha kërkesat e studentëve, nisur nga publikimi i gjithë dokumentacionit rreth rindërtimit të stacionit hekurudhor në Novi Sad, e deri te falja e aktivistëve të arrestuar gjatë protestave.

    Në një adresim publik më 27 janar, ai ka thënë se do të publikohen edhe dokumentet tjera, dhe kështu shteti do të ofrojë “gjithçka që ka”.

    “Nuk ka më dokumentacion që ka të bëjë me rindërtimin e stacionit hekurudhor”, ka thënë Vuçiq.

    Ai, gjithashtu, ka thënë se është i gatshëm të nënshkruajë faljen e të gjithë studentëve dhe profesorëve, ndaj të cilëve janë nisur procedura penale, pas arrestimit të tyre në protesta.

    Protestat kanë nisur pas shembjes së një cope të madhe betoni në stacionin hekurudhor të Novi Sadit më 1 nëntor, duke lënë të vrarë 15 persona dhe duke plagosur rëndë dy të tjerë.

    Duke folur për kërkesat e studentëve për ndjekjen penale të përgjegjësve për sulmet ndaj studentëve, profesorëve dhe qytetarëve tjerë në marshe dhe protesta, Vuçiq ka thënë se janë iniciuar raste kundër 37 individëve.

    Sa i përket përfshirjes së zyrtarëve qeveritarë në sulme, Vuçiq ka thënë se “ekziston vetëm një rast në Beogradin e ri” dhe që beson se “tashmë është zgjidhur”.

    Kur ka folur për kërkesën për rritje të buxhetit për 20 për qind për edukimin e lartë, presidenti serb ka thënë se studentët e kanë ndryshuar kërkesën për të përfshirë rritje të pagave të profesorëve dhe zvogëlim për 50 për qind të tarifave studentore, dhe që shteti tashmë ka vendosur të plotësojë edhe këtë kusht.

    Sipas tij, kjo do t’i kushtojë shtetit rreth 73 miliardë dinarë.

    “Pyetja është nëse të gjitha këto që kemi përmbushur do të jenë mjaftueshëm që dikush të thotë se ‘të gjitha kërkesat janë përmbushur’. Nuk jam i sigurt, por shpresoj të jetë ashtu. Por, jam i sigurt që kjo do të nisë një dialog në shoqëri, dhe që dikush prej rektorëve dhe dekanëve, dhe të gjithë të tjerët të nisin të flasin, të niset dialogu dhe kështu të nisë shërimi i shoqërisë sonë”, ka thënë Vuçiq.

    Kryeministri i Serbisë, Millosh Vuçeviq, ka thënë në konferencë të përbashkët me Vuçiqin se i ka ftuar të gjithë rektorët, dekanët, profesorët dhe studentët e universiteteve dhe fakulteteve në Serbi që të shkojnë në Qeveri dhe të diskutojnë për kërkesat e studentëve, që sipas tij, janë plotësuar në tërësi.

    Vuçiq ka thënë të hënën se do t’i dërgojë një kërkesë Qeverisë serbe “për ristrukturimin më urgjent dhe më masiv të mundshëm”.

    “Sepse në këto kohë të vështira politike, është bërë e qartë se kush është i gatshëm të punojë dhe të luftojë, kush jo, dhe duke pasur këtë parasysh, pres që më shumë se 50 për qind e ministrave të shkarkohen dhe zëvendësohen në një ristrukturim shumë, shumë urgjent”, ka thënë Vuçiq më 27 janar.

    Ai ka thënë se në tre muajt e fundit, pas aksidentit në stacionin hekurudhor në Novi Sad – në të cilin kanë vdekur 15 persona – është krijuar një atmosferë që nuk është në të mirë të askujt.

    “Në këta tre muaj, ne kemi dëgjuar shumë akuza kundër trupave shtetërore, thirrje për përmbysje të shtetit, kemi dëgjuar deklarata shumë të papërgjegjshme, jo vetëm nga opozita, por edhe nga ne në pushtet”, ka thënë ai.

    Presidenti serb ka thënë se ka biseduar me përfaqësues qeveritarë dhe që ata “kanë deklaruar se kanë dëshirë të dëgjojnë palën tjetër” [studentët që po protestojnë] dhe që dëshirojnë dialog dhe bisedë.

    Studentët vazhdojnë bllokadën 24-orëshe

    Vuçiq, kryeministri serb, Millosh Vuçeviq dhe kryetarja e parlamentit Ana Bërnabiq, i janë adresuar publikut në ditën kur studentët kanë organizuar bllokadë 24-orëshe në njërën prej pikave kryesore të trafikut në Beograd.

    Bllokada 24-orëshe është organizuar tri ditë pasi mijëra njerëz i janë bashkuar thirrjes për grevë të përgjithshme.

    Studentët, që janë bllokuar punën e më shumë se 60 fakulteteve për më shumë se dy muaj, janë duke kërkuar përgjegjësi penale dhe politike për 15 vdekjet e shkaktuara nga incidenti në Novi Sad.

    Përfaqësuesit qeveritarë kanë thënë paraprakisht se të gjitha kërkesat e studentëve janë plotësuar.

    Akademikët, në anën tjetër, kanë thënë se kërkesat e tyre janë plotësuar pjesërisht dhe që pezullimi i punës do të vazhdojë deri në njoftimin e radhës.

    Më shumë se 5.000 profesorë universitarë në Serbi kanë mbështetur bllokadën e studentëve.

    Përmes një peticioni ata dënojnë tentimet e Qeverisë për t’i frikësuar studentët – duke i bërë publike të dhënat e tyre personale, apo edhe duke dërguar agjentë të agjencive qeveritare në shtëpitë e tyre apo të prindërve të tyre.

    Zyra e Prokurorit të Lartë në Novi Sad ka paditur 13 njerëz lidhur me incidentin e nëntorit.

    Në mesin e tyre janë edhe ish-ministri për Ndërtim, Transport dhe Infrastrukturë, Goran Vesiq, asistentja e tij Anita Dimoski, si dhe ish-drejtorja e kompanisë publike infrastrukturore, Jelena Tanaskoviq.

    Dhjetë prej të paditurve janë në mbajtje, Vesiq është në arrati, ndërsa Tanaskoviq dhe Dimoski janë në arrest shtëpiak./REL.

  • Qytetarë të komunitetit serb sërish protestuan në Mitrovicë të Veriut në mbështetje të protestave në Serbi

    Qytetarë të komunitetit serb në një tubim në Mitrovicë të Veriut, të hënën, më 27.01.2025, kanë mbajtur 15 minuta heshtje për personat që vdiqën nga shembja e çatisë së Stacionit Hekurudhor në Novi Sad, ngjarje tragjike që ka ndodhur më 01.11.2024.

    Sikurse të premten, më 24.01.2025, qytetarët protestuan edhe të hënën më 27.01.2025 afër Fakultetit Filozofik në Mitrovicë të Veriut.

    Në mesin e protestuesve kishte edhe studentë të Universitetit që gjendet në Mitrovicë të Veriut.

    Qytetari Milentije Jakshiq shprehet mirënjohës për studentët që ngrenë zërin, ndërsa i zhgënjyer me Qeverinë e Serbisë.

    “Ka ardhur koha. Populli ka duruar 10 vite padrejtësi nga kjo qeveri. Studentëve, profesorëve të tyre, u jam pafundësisht mirënjohës në emrin tim dhe mendoj, edhe në emër të qytetarëve të Kosovës që kanë drejtuar kërkesën që institucionet përkatëse shtetërore të merren me punën e tyre, ndërsa ato që nuk janë kompetente të mos ndërhyjnë”- tha ai.

    Për dhjetë vite, siç thotë ai, nën pushtetin aktual në Republikën e Serbisë, Milentije Jakshiq ka kritika për subjektin – Partia Progresive Serbe.

    “Për fatin tonë të keq, dhe për fatin e mirë të të tjerëve të cilët janë pasuruar falë ardhjes së Partisë Progresive Serbe. Shumë njerëz kanë lënë këto vatra, kanë marrë me vete fëmijët e tyre, brezat më të rinj dhe më të vjetër. Shumë prej tyre nuk mund as të vijnë për të vizituar trojet e paraardhësve të tyre”- tha Jakshiq.

    Milentije Jakshiq- qytetar

    Organizatori i kësaj proteste, Sërxhan Gjorgjeviq tha para mediave se ndihet krenar që e ka përcjellë këtë mesazh te studentët dhe thekson faktin se në këtë protestë, sipas tij, nuk kishte profesorë.

    “Unë mendoj që mund të kenë qenë disa (profesorë) apo asnjë fare. Ndoshta janë duke na shikuar nga dritarja dhe shpresoj që një ditë të ndjejnë turp”- tha ai.

    Sërxhan Gjorgjeviq – organizator i protestës
    Policia e Kosovës, 27.01.2025Të premten, më 24.01.2014 qytetarë serbë protestuan për të njejtën çështje- për viktimat në Novi Sad.

    Pas 15 minutash heshtje, protestuesit brohoritën “Vuçiqi në burg”, duke aluduar në presidentin e Serbisë.

    Të pranishëm ishin ish-zëvendësministri për Komunitete dhe Kthim i Qeverisë së Kosovës, Radoica Radomiroviq dhe lideri i partisë Demokracia Serbe, Aleksandar Arsenijeviq.

    Në vendin e ngjarjes u panë edhe pjesëtarë të Policisë së Kosovës, të cilët e përcollën ngjarjen edhe me dron.

    Zëvendësdrejtori i Drejtorisë Rajonale Mitrovicë–Veri të Policisë së Kosovës, Veton Elshani, ka thënë se protesta kaloi e qetë.

    Studentët në Serbi përmes protestave nga nëntori i 2024-ës po kërkojnë përgjegjësi institucionale pas vdekjes së 15 personave nga shembja e çatisë në Stacionin Hekurudhor në Novi Sad, më 01.11.2024.

    Ndërkohë në të gjithë Serbinë është mbajtur të premten (24.01.2025) një grevë e përgjithshme, teksa presidenti serb, Aleksandar Vuçiq, ka njoftuar për themelimin e “lëvizjes për popullin dhe shtetin”.

    Greva e përgjithshme ose “mosbindja e përgjithshme civile”, siç e quajnë studentët ndryshe, nënkupton ndërprerje të plotë të punës dhe të çdo aktiviteti tjetër të përditshëm, si: shkuarja në dyqane apo restorante, kinema, teatër e të tjera. Në mbajtjen e grevës së përgjithshme, qytetarët janë ftuar nga studentët, të cilët për më shumë se dy muaj bllokojnë fakultetet, duke kërkuar përgjegjësi penale dhe politike për vdekjen e 15 personave në Novi Sad.

    Gjatë protestave, mediat kanë raportuar se një vajzë është lënduar kur një makinë ka goditur një grup studentësh dhe qytetarësh në Beograd të Ri. Ajo është dërguar në një qendër të emergjencës për trajtim mjekësor.

    Radio Evropa e Lirë ka raportuar se kërkesat e studentëve për ndalimin e bllokadave përfshijnë publikimin e dokumentacionit të plotë për rindërtimin e Stacionit Hekurudhor të Novi Sadit, për të përcaktuar përgjegjësinë për aksidentin e 1 nëntorit 2024.

    Ata gjithashtu kërkojnë që sulmuesit ndaj demonstruesve nëpër Serbi, gjatë protestave që pasuan aksidentin, të identifikohen dhe të përballen me përgjegjësi penale.

    Kërkesat përfshijnë edhe lirimin e aktivistëve të arrestuar gjatë protestave, ndalimin e procedurave penale kundër tyre, si dhe rritjen e buxhetit për universitetet.

    Autoritetet në Serbi pretendojnë se në organizimin e protestave të studentëve janë të përfshira shërbimet e huaja të inteligjencës dhe se mes studentëve ka “mercenarë të huaj”.

    Sipas tyre, këtë e dëshmon fakti se bllokadat e studentëve nuk ndalen, edhe pse kërkesat e tyre janë plotësuar – gjë që hidhet poshtë nga studentët.

    Edhe gjatë adresimit në Jagodinë, Vuçiq pretendoi, pa ofruar dëshmi, se Serbia po sulmohet “nga jashtë dhe brenda”.

    Përndryshe, Zyra e Prokurorit të Lartë Publik në Novi Sad ka ngritur aktakuzë kundër 13 personave në lidhje me shembjen vdekjeprurëse të strehës në Stacionin Hekurudhor të qytetit.

  • Grenell kërkon të dënohet ‘dhuna’ në protestat në Serbi, komuniteti i ‘X’ i thotë se janë më paqësoret në 30 vjetët e fundit

    Richard Grenell, i emëruar nga presidenti amerikan Donald Trump si emisar presidencial për misione të posaçme ka shpërndarë në rrjetin social “X” një video të protestave në Serbi.

    Grenell shkruan se është me rëndësi që të rritet zëri dhe ai të dëgjohet, por sipas tij “të gjithë duhet të dënojmë dhunën dhe të qëndrojmë në protesta paqësore” – shkruante ai më 25.01.2025.

    Megjithatë platforma “X” në të cilën ka shkruar Grenell jep mundësinë e shënimeve (notes) të komunitetit, përmes së cilës lexuesit mund t’i japin kontekst apo t’i demantojnë ngjarjet për të cilat publikojnë personalitete të ndryshme publike.

    Në këto shënime tek shkrimi i Grenellit, komuniteti e ka demantuar zyrtarin amerikan, teksa thotë se këto protesta janë më paqësoret në 30 vjetët e fundit.

    Komuniteti mes tjerash ka sqaruar se kërkesat e stduentëve në Serbi lidhen me aksidentin në Novi Sad vitin e kaluar dhe jo me marrjen e qeverisë.

    “Këto protesta kanë qenë më paqësoret në 30 vjetët e fundit në Serbi. E vetmja dhunë që ka ndodhur është bërë dhe frymëzuar nga Qeveria dhe Presidenti Vuçiq. Lista e kërkesave lidhet me një aksident që vrau 15 persona, jo me marrjen e Qeverisë” – thuhet në shënimet e komunitetit.

    Kurse Grenell ka kërkuar që protestat si proces demokratik të respektohen.

    “Ne nuk i mbështesim ata që minojnë sundimin e ligjit ose që marrin me forcë ndërtesat qeveritare” – ka shkruar tutje ai.

    Tutje ai thotë që nëse nuk duhet ligji apo lideri duhet të punohet që të ndërrohen por jo të përdoret dhuna.

    Studentët në Serbi përmes protestave nga nëntori i 2024-ës, po kërkojnë përgjegjësi institucionale pas vdekjes së 15 personave nga shembja e çatisë në Stacionin Hekurudhor në Novi Sad, më 01.11.2024.

    Ndërkohë në të gjithë Serbinë është mbajtur të premten (24.01.2025) një grevë e përgjithshme, teksa presidenti serb, Aleksandar Vuçiq, ka njoftuar për themelimin e “lëvizjes për popullin dhe shtetin”.

    Greva e përgjithshme ose “mosbindja e përgjithshme civile”, siç e quajnë studentët ndryshe, nënkupton ndërprerje të plotë të punës dhe të çdo aktiviteti tjetër të përditshëm, si: shkuarja në dyqane apo restorante, kinema, teatër e të tjera.

    Në mbajtjen e grevës së përgjithshme, qytetarët janë ftuar nga studentët, të cilët për më shumë se dy muaj bllokojnë fakultetet, duke kërkuar përgjegjësi penale dhe politike për vdekjen e 15 personave në Novi Sad.

    Gjatë protestave, mediat kanë raportuar se një vajzë është lënduar kur një makinë ka goditur një grup studentësh dhe qytetarësh në Novi Beograd. Ajo është dërguar në një qendër të emergjencës për trajtim mjekësor.

    Radio Evropa e Lirë ka raportuar se kërkesat e studentëve për ndalimin e bllokadave përfshijnë publikimin e dokumentacionit të plotë për rindërtimin e Stacionit Hekurudhor të Novi Sadit, për të përcaktuar përgjegjësinë për aksidentin e 1 nëntorit 2024.

    Ata gjithashtu kërkojnë që sulmuesit e demonstruesve nëpër Serbi, gjatë protestave që pasuan aksidentin, të identifikohen dhe të përballen me përgjegjësi penale.

    Kërkesat përfshijnë edhe lirimin e aktivistëve të arrestuar gjatë protestave, ndalimin e procedurave penale kundër tyre, si dhe rritjen e buxhetit për universitetet.

    Autoritetet në Serbi pretendojnë se në organizimin e protestave të studentëve janë të përfshira shërbimet e huaja të inteligjencës dhe se mes studentëve ka “mercenarë të huaj”.

    Sipas tyre, këtë e dëshmon fakti se bllokadat e studentëve nuk ndalen, edhe pse kërkesat e tyre janë plotësuar – gjë që hidhet poshtë nga studentët.

    Edhe gjatë adresimit në Jagodinë, Vuçiq pretendoi, pa ofruar dëshmi, se Serbia po sulmohet “nga jashtë dhe brenda”.

    Përndryshe, Zyra e Prokurorit të Lartë Publik në Novi Sad ka ngritur aktakuzë kundër 13 personave në lidhje me shembjen vdekjeprurëse të strehës në Stacionin Hekurudhor të qytetit.

  • Vuçiq themelon “lëvizjen për popullin dhe shtetin”

    Presidenti i Serbisë, Aleksandar Vuçiq, gjatë një tubimi në Jagodinë njoftoi për themelimin e “lëvizjes për popullin dhe shtetin”, që tha se do të mbledhë rreth vetes partitë në pushtet dhe mbështetësit e tyre.

    Në tubimin në Jagodinë morën pjesë mijëra mbështetës të Partisë Progresive Serbe (SNS) dhe partnerëve të saj të koalicionit.

    “Të gjithë jeni të mirëpritur në lëvizje, në lëvizjen për ndryshimet e mëdha”, tha presidenti serb, Aleksandar Vuçiq.

    Sipas tij, arsyeja e formimit të kësaj lëvizjeje është se ka gjëra me të cilat ai nuk është i kënaqur.

    Tubimi i mbështetësve të Qeverisë serbe në Jagodinë u mbajtë në kohën kur po vazhdojnë protestat masive në mbarë Serbinë, që janë thirrur nga studentët të cilët po bllokojnë universitetet. Studentët po kërkojnë që autoritetet të mbahen përgjegjëse për vdekjen e 15 personave në një aksident në stacionin hekurudhor të Novi Sadit.

    Po të njëjtën ditë është mbajtur edhe një “grevë e përgjithshme”, ku janë bashkuar një numër i biznesmenëve, mësuesve, punëtorëve të arsimit dhe avokatëve që ndërprenë punën në shenjë proteste.

    Akuza ndaj opozitës

    Vuçiq e nisi adresimin e tij duke thënë se Serbia “u sulmua sot”, pa ofruar dëshmi se kush po e sulmonte shtetin.

    “Njerëzit tanë e dinë, Serbia e di, se si po sulmohet sot, se si po sulmohet nga jashtë dhe nga brenda. Njerëzit tanë e dinë se kur është koha të ngrihen në këmbë dhe të mbështesin ata për të cilët mund të thënë shumë gjëra të pakëndshme, por të paktën e dinë se ata e kanë mbrojtur Serbinë dhe kanë luftuar për Serbinë”, tha ai.

    Ai akuzoi partitë që ishin në pushtet pas ndryshimeve politike të 5 tetorit të vitit 2000, e që tani janë në opozitë, se po “plaçkitin Serbinë”.

    “Sot po na mbajnë predikime, duan të kthehen në pushtet dhe po i përdorin fëmijët për t’u kthyer në pushtet”, tha Vuçiq.

    Gjatë fjalimit në Jagodinë, Vuçiq tha se “fëmijët e kanë vendin në shkolla” e jo në protesta, duke iu referuar bllokimit të shkollave në mbarë Serbinë dhe pjesëmarrjen e nxënësve të shkollave të mesme në protestat më 24 janar.

    “Sa u përket stundetëve, pavarësisht sharjeve dhe fjalëve të ashpra, u bëj thirrje që të angazhohen në dialog dhe të tregojnë se cilat kërkesa nuk janë plotësuar. Le të na thonë publikisht kërkesat që nuk janë plotësuar. Kërkesa të tilla nuk ekzistojnë”, tha ai.

    Ai përsëriti qëndrimin se Qeveria ka plotësuar katër kërkesat e studentëve. Vuçiq po ashtu pretendoi se nuk ka pasur raportime në polici për protesta dhe bllokim të rrugëve në mbarë Serbinë.

    “Policia nuk mund t’iu mbrojë kur nuk e di që ka tubime, tubime të paligjshme. Edhe sot, ata nuk kanë raportuar për asnjë tubim asakund”, tha ai.

    Vuçiq tha po ashtu se pas incidentit gjatë protestës në Novi Beograd, ku një studente u lëndua pasi u godit nga një makinë që u përplas me demonstruesit, “policia me rroba civile shpëtoi situatën”.

    Gjatë adresimit, ai tha po ashtu se nuk do të vendosë sanskione ndaj Rusisë “e as ndaj ndonjë miku tjetër”.

    Ai po ashtu tha se do të ketë “raporte miqësore dhe vëllazërore” me Rusinë dhe Kinën dhe do të bisedojë me presidentin rus, Vladimir Putin, në ditët në vijim për të gjetur një zgjidhje lidhur me sanksionet amerikane ndaj Industrisë së Naftës të Serbisë.

    “Fuqia e Serbisë është në pavarësinë e saj. Në mbrojtjen e rrënjëve tona, por edhe të ardhmes tonë”, tha ai.

    Daçiq mbështet lëvizjen e re

    Tubimi në Jagodinë nisi me këndimin e himnit serb nga mijëra të pranishëm. Në të u bë njoftimi për themelimin e lëvizjes së re.

    Përveç presidentit të Serbisë, Aleksandar Vuçiq, të pranishëm në tubim ishin edhe ministra qeveritarë nga SNS-ja dhe partnerët e koalicionit.

    Në tubim përkrah Vuçiqit ishte edhe Ivica Daçiq, ministër për Punë të Brendshme dhe udhëheqës i Partisë Socialiste të Serbisë.

    “Nuk duhet të lejojmë që armiku të krijojë përçarje mes nesh, qytetarëve të Serbisë. Ne nuk duam luftë civile, ne duam paqe dhe zhvillim”, tha Daçiq.

    Siç u tha në fillim të tubimit, “lëvizja për popullin dhe shtetin” do të bëjë bashkë njerëzit që kanë “mendime të ndryshme politike, qëndrime të ndryshme, përvoja të ndryshme, që janë në parti të ndryshme politike, por edhe ata që kurrë nuk kanë qenë pjesë e ndonjë partie dhe nuk kanë pasur interesim për politikën”.

    “Por, njerëz që kanë një qëllim të përbashkët. Ky qëllim është një Serbi e qëndrueshme, e fortë dhe fituese. Një shtet me institucione të forta. Një shtet që u garanton të gjithë qytetarëve të drejta të njëjta, një shoqëri që nuk përçan njerëzit”, u tha në fillim të tubimit.

    Sipas gazetarëve të Radios Evropa e Lirë që janë në terren në Jagodinë, qindra autobusë me tabela nga qytete të tjera u panë duke iu afruar qytetit, duke transportuar mbështetësit e Aleksandar Vuçiqit.

    Sipas gazetarëve të REL-it, flamuj të Serbisë dhe ushqime u janë dhënë mbështetësve të mbledhur të partive në pushtet.

    Teksa mijëra mbështetës të Qeverisë serbe u mblodhën në Jagodinë, disa prej tyre ishin edhe në një tubim partiak afër Novi Sadit.

    Kryeministri serb, njëherësh kryetari i SNS-së, Millosh Vuçeviq, tha në tubimin partiak se nuk do të ketë “ndryshim të pushtetit me dhunë e as qeveri tranzitore”.

    “Ka pasur kohë të vështira dhe gjithçka ka kaluara, edhe kjo do të kalojë dhe nuk do të ketë revolucion”, tha Vuçeviq.

    “Ne kurrë nuk iu kemi ikur zgjedhjeve. Mos u zhgënjeni sërish, sepse kur shikoni fotografi nga tubimet, është një gjë, e është tjerët gjë kur njerëzit shkojnë të votojnë”, shtoi ai./REL

  • Dhjetëra-mijëra njerëz u bashkohen protestave serbe në mes të përpjekjeve për grevë mbarëkombëtare

    Kompani, biznese dhe shoqata të shumta në Serbi dëgjuan thirrjet e studentëve për një ‘grevë të përgjithshme’ të premten, më 24.01.2025, ndërsa protestat kundër autoriteteve të vendit vazhdojnë të marrin vrull.

    Dhjetëra-mijëra njerëz iu bashkuan studentëve dhe nxënësve në Beograd për në marsh proteste nëpër qytet dhe iu bashkuan thirrjes për një “grevë të përgjithshme” të premten, më 24.01.2025.

    Në orën 11:52, si çdo ditë kohët e fundit, nxënës, studentë, mësues dhe qytetarë të thjeshtë u mblodhën para ndërtesës së Qeverisë serbe në Beograd dhe Komunës së Novi Beogradit, në anën tjetër të Kryeqytetit.

    Pasi qëndruan për 15 minuta në heshtje në kujtim të 15 viktimave të fatkeqësisë të Stacionit hekurudhor në Novi Sad më 01.11.2024, turmat u mblodhën pranë Qendrës Tregtare Usce, të mbështetur nga mësuesit dhe qytetarët dhe duke mbajtur në duar lloje të ndryshme pankarta dhe slogane.

    Hristina Stanisavljevic dhe Andrea Tijanic, të dy studentë të artit, mbanin pankarta ku shkruanin – “Sistemi ka nevojë për ridizajnim”.

    Tijanic tha se protestuesit kishin “arritur të bashkohen pa asnjë shantazh apo para dhe zëri i popullit ka fituar mbi gjithçka tjetër”.

    “Ka ende njerëz që janë shantazhuar, por gjithnjë e më shumë prej tyre qëndrojnë në anën e djathtë… E shihni sa i shkretë është në qytet dhe sa njerëz iu bashkuan grevës, është e pabesueshme se si të gjithë ranë dakord që asgjë nuk duhet bërë ose blerë sot, se duhet të jemi në shtëpi me familjet tona ose këtu. Është fenomenale.” – tha ajo për BIRN.

    Matija, një marinar 45-vjeçar, ka sjellë një lidhës kartoni për dokumente me dorën e gjakosur mbi të – një nga simbolet e valës së protestës. Ai tha se simbolizonte “të gjitha krimet korruptive të Qeverisë aktuale dhe gënjeshtrat që çojnë në vdekjen e 15 njerëzve” në Novi Sad, më 01.11.2024.

    “Dora e përgjakur në lidhëse thjesht përshkruan duart e tyre të përgjakura, me të cilat ata njollosën 12 vjetët e fundit të jetës sonë.” – tha ai për BIRN.

    Ai shtoi se e gjithë Serbia duhet të ndalojë, në mënyrë që qytetarët të zbulojnë gjithçka që Qeveria dëshiron të fshehë. “Nëse gjithçka ndalon, kjo është mënyra e vetme që ne mund t’u tregojmë atyre qartë se nuk ka më lojë me ne dhe se nuk kemi më kohë.” – tha ai.

    Mediat lokale raportuan se, ndërsa turma kaloi disa Gjykata, gjyqtarët u larguan nga ambientet dhe qëndruan jashtë si një formë mbështetjeje.

    Një shëtitje proteste vazhdoi në Novi Beograd. Tubimet e ndryshme bllokuan rrugët më të njohura dhe më të frekuentuara të qytetit. Protesta të ngjashme u mbajtën në të gjithë vendin.

    Ndërkohë, shumë njerëz të tjerë iu përgjigjën thirrjes së studentëve për një “grevë të përgjithshme” të premten, më 24.01.2025.

    Midis atyre që njoftuan një ndërprerje të punës ishte një nga rrjetet më të mëdha të kinemasë në vend, i cili mbulon Beogradin, Nishin dhe Kragujevcin, si dhe qytete më të vogla. Shumë Shoqata të punëtorëve në industrinë e filmit shpallën grevë.

    Shumë teatro në të gjithë vendin nuk janë duke punuar dhe Oda e Avokatëve ka zgjeruar ndërprerjen e punës për të përfshirë edhe tre ditë të tjera. Shkollat ​​nuk kanë funksionuar ose kanë punuar vetëm pjesërisht që nga e hëna, 20.01.2025.

    Shumë restorante dhe kafene mbështesin grevën, por të tjera, kundër grevës, po ofrojnë kafe dhe çaj falas për të gjithë klientët. Shumë klube nate të njohura të Beogradit kanë anuluar Programet e tyre të së premtes mbrëma, më 24.01.2025.

    Arkivi Historik i Beogradit nuk funksionoi të premten, më 24.01.2025. Sindikata e Pavarur e Kulturës së Serbisë njoftoi se anëtarët e saj nuk do të punojnë në asnjë institucion kulturor në vend atë ditë. Edhe Arkivi i Filmit Jugosllav, Jugoslovenska kinoteka, pushoi së punuari.

    Shumë librari dhe shtëpi botuese, përfshirë disa të mëdhenj komercialë, gjithashtu deklaruan se nuk do të punojnë të premten, më 24.01.2025. Disa kompani të mëdha deklaruan gjithashtu se nuk do të punojnë.

    Një grup joformal punonjësish të IT-së bllokuan një kryqëzim rrugor në Novi Beograd dhe më pas iu bashkuan studentëve protestues.

    Koalicioni për Lirinë e Medias u bëri thirrje mediave që të mbështesin grevën dhe të raportojnë vetëm për grevën të premten, më 24.01.2025. Protesta u mbajt edhe para ambienteve të transmetuesit kombëtar, RTS.

    Protestat shihen si sfida më e madhe me të cilat janë përballur autoritetet serbe, që kur Partia Progresive Serbe mori pushtetin në vitin 2012.

    Studentët kanë bllokuar ndërtesat e Universiteteve për gati dy muaj, që kur një protestues u sulmua para Fakultetit të Arteve Dramatike në Beograd, më 22.11.2024.

    Protestat përkujtimore të heshtura që zgjasin 15 minuta janë mbajtur rregullisht në Beograd, Novi Sad dhe qytete të tjera, që nga fatkeqësia e Stacionit hekurudhor të Novi Sadit.

    Rënia e tendës në Stacionin e trenit pasoi punime të mëdha rinovimi që filluan në vitin 2021, si pjesë e një përmirësimi të infrastrukturës hekurudhore të Serbisë, të udhëhequr nga Kina.

    Punimet u zbuluan në vitin 2022 gjatë fushatës zgjedhore të atij viti, por rindërtimi vazhdoi më pas deri në korrik 2024, kur autoritetet deklaruan se Stacioni ishte rindërtuar “sipas standardeve evropiane”.

    Trembëdhjetë persona – përfshirë Ministrin e ndërtimit të Serbisë në atë kohë – janë akuzuar për “rrezikim të sigurisë publike” mbi shembjen e tendës.

    Artikulli fillimisht është publikuar në Balkan Insight.