Ballina

Etiketë: Prokuroria Speciale

  • Huqja se kryeministri Albin Kurti është ftuar që të intervistohet në Prokurori si i dyshuar

    Më 30.12.2024 një faqe në TikTok (Arkiva) ka postuar një video të Kryeministrit Albin Kurti, me mbishkrimin “Albini spo shkon me dëshmu për hajnin e rezervave shtetërore. Janë gjetë imellat, provat që e implikojnë direkt. Tash synon viktimizimin”. 

    Pretendimi se janë gjetur email-e se Kryeministri i vendit, Albin Kurti është i inkriminuar direkt në rastin e ‘Rezervave shtetërore’ del të jetë i pa vërtetë, pasi që Kurti është ftuar në cilësinë e dëshmitarit.

    Sipas Kodit të Procedurës Penale ka një dallim nga ftesa ndaj një të dyshuari dhe një dëshmitari në një procedurë hetimore.

    Dëshmitari është palë e cila ftohet qoftë nga Gjykata apo Prokuroria ose mbrojta e të akuzuarit që të dëshmoj lidhur me një çështje penale. Dëshmitari ka për obligim të tregoj të vërtetën, të mos fsheh asgjë, në të kundërtën mund të ndiqet penalisht për dëshmi të rreme. Tutje dëshmitari ka të drejtë që në rast se e inkriminon veten nga deklarimi i tij, të mos përgjigjet. Dëshmitari nuk ka të drejtë të heshtë. 

    Kurse i dyshuari ka statusin një personi ndaj të cilit prokuroria ka pretendime se është kryer një vepër penale, ndaj të cilit merr aktvendim për të filluar hetimet dhe mund të përfundoj me aktakuzë. I akuzuari ka të drejtë të përfaqësohet nga mbrojtësi, të paraqes prova e të propozoj që të ftohen dëshmitarë me qëllim që t`i kontriboj mbrojtjes së tij nga akuzat e prokurorisë.

    Dallim tjetër mes të pandehurit dhe dëshmitarit është se, për të akuzuarin fillon një proces gjyqësor, ku kemi prokuroinë në njërën anë e cila mundohet të argumentoj ngritjen e aktakuzës dhe në anën tjetër të akuzurin i cili me çdo mjet juridik mundohet ta godet aktakutzën e prokurorisë.

    Dallim tjetër qenësor është se i akuzuari ka të drejtën të deklarohet për akuzat, mund t`i pranoj ato, mund të mos i pranoj, ndërsa dëshmitari nuk e ka këtë të drejtë. Heshtja si një e drejtë që e ka i akuzuari e për të cilën nuk mund të ndëshkohet nuk vlen për dëshmitarin i cili nuk ka të drejtë të hesht, por duhet të përgjigjet në çdo pyetje që i adresohet atij. 

    Këto të drejta dhe detyrime janë të përcaktuara me Kodin penal të Kosovës në nenin 122 dhe nenin 126, i cili flet për udhëzimet që i jepen dëshmitarit para se të jap dëshminë e tij.

    Kurse të drejtat që i ka i akuzuari në procedurë penale gjenden në nenet, 10, 11, 12, 13 të Kodit të procedurës penale.

    KALLXO.com ka raportuar për ftesat që  i janë dërguar kryeministrit, Albin Kurti nga Prokuroria Speciale për të dëshmuar për rastin e ‘Rezervave shtetërore’

    Ftesën e parë kryeministri Kurti e kishte marrë në dhjetor të vitit 2024. Zëdhënësi i Qeverisë, Përparim Kryeziu, e kishte bërë publike ftesën e Prokurorisë. 

    “Thirrje për dëshmitarin, dëshmitari, Albin Kurti, data e paraqitjes 16.12.2024, objekti i Prokurorisë Speciale”- përshkruhet në ftesën e Prokurorisë Speciale e cila është e nënshkruar nga dy prokurorët e rastit, Milot Krasniqi dhe Valdet Gashi. 

    Kësaj ftese Kryeministri, Kurti nuk i ishte përgigjur duke e shtyrë prokurorinë që të dërgoj edhe ftesën e dytë dhe ftesën e tretë që i njëtji të paraqitet për të dëshmuar.

    Rezultati përsëri ka qenë i njëjti, pasi Kurti nuk ka pranuar të shkoj dhe të dëshmoj në cilësinë e dëshmitarit para prokurorëve për këtë çështje penale.

    https://kallxo.com/lajm/prokuroria-speciale-planifikon-ti-drejtohet-gjykates-per-kryeministrin-albin-kurti/

    Për rastin e ‘Rezervave shtetërore’ janë të dyshuar zyrtari i Ministrisë së Industrisë, Ndërmarrësisë dhe Tregtisë, Irfan Lipovica, afaristi Ridvan Muharremi dhe Hafiz Gara.

    Por, më 15.04.2024 Prokuroria Speciale kishte zgjeruar listën e personave të dyshuar duke e intervistuar si të përfshirë në këtë rast edhe ministren kësaj ministrie, Rozeta Hajdari.

    Pra për këtë rast deri më tani nuk ka aktakuzë, por që të dyshuar janë katër përsona duke e përfshirë ktu edhe ministren, Hajdari.

    Ridvan Muharremi, Irfan Lipovica dhe Hafiz Gara, të dyshuarit lidhur me keqpërdorimin e rezervave shtetërore ishin liruar nga masa e paraburgimit me vendimin e Gjykatës së Apelit vetëm pak ditë pasi Gjykata Themelore i kishte caktuar masën e paraburgimit, të njëjtit gjendeshin në paraburgim që nga 19 gushti i vitit 2023.

    Në dosjen 12-faqëshe të Prokurorisë janë përshkruar me detaje veprimet dhe mosveprimet e tre të dyshuarve, dy zyrtarë të Ministrisë së Industrisë, Ndërmarrësisë dhe Tregtisë dhe një afarist, nën dyshimin për keqpërdorimin e rezervave shtetërore.

    Aty thuhet se pavarësisht se janë paguar paratë te kompanitë turke e polake për grurë, vaj e sheqer, këto produkte nuk kanë ardhur në Kosovë dhe rrjedhimisht buxheti i Kosovës është dëmtuar mbi 600 mijë euro.

    Gjithmonë sipas dosjes së Prokurorisë, të cilën e ka siguruar KALLXO.com, thuhet se ka qenë i paraparë furnizimi në sasi prej 10 mijë tonë me çmim 4,834,778 euro; 200 mijë litra vaj dhe 120 mijë kilogramë sheqer, me çmim prej 276 mijë euro, shuma këto të paguara në tërësi në formë të avansit.

    Mirëpo, Prokuroria ka potencuar se edhe përkundër faktit se pagesat janë realizuar, MINT si autoritet kontraktues ka pranuar vetëm 9,947.5 tonë grurë, pra 52.5 tonë më pak se sasia e kontraktuar, ndërsa vaji dhe sheqeri nuk janë sjellë fare.

    “Si pasojë e këtyre veprimeve buxheti i Republikës së Kosovës i destinuar për rezerva shtetërore, është dëmtuar në vlerë prej 601 mijë e 940 euro” – thuhet në dosjen e Prokurorisë.

    Dosja: Lipovica me dijeni të plotë ka lejuar që të anashkalohet procedura e hapur e prokurimit

    Për zyrtarin e Ministrisë së Industrisë, Ndërmarrësisë dhe Tregtisë, Irfan Lipovica, në dosjen e Prokurorisë thuhet se ekzistojnë dyshimet e bazuara se nga muaji shkurt i vitit 2022, në Prishtinë, në Ministrinë e Industrisë, Ndërmarrësisë dhe Tregtisë së Kosovës, në cilësinë e personit zyrtar, me pozitë zv.sekretar i Përgjithshëm, me qëllim të përfitimit të dobisë pasurore për personin tjetër dhe shkaktim të dëmit të buxhetit të Republikës së Kosovës, ai ka tejkaluar autorizimet ligjore të parapara për pozitën që e ka ushtruar.

    Kësisoj sipas prokurorisë, Lipovica me dijeni të plotë ka lejuar që në kundërshtim me legjislacionin në fuqi, të anashkalohet procedura e hapur e prokurimit publik për blerjen e rezervave shtetërore.

    Në dosje thuhet se më 25 shkurt 2022 ai ka adresuar në Qeverinë e Kosovës kërkesën për përjashtimin e procedurave të rregullta të prokurimit si dhe klasifikimin e kësaj procedure si “sekrete” me qëllim për ta kufizuar konkurrencën dhe fshehur shkeljen e ligjit, e më pas, duke u bazuar në një vendim të Qeverisë së Kosovës, i cili e kishte bazën në kërkesën e kundërligjshme të të pandehurit, ka nxjerrë Vendimin për formimin e Komisionit për Negocimin e Kontratave për Furnizimin me Mallra të Rezervës Shtetërore për vitin 2022.  Me këtë vendim, sipas prokurorisë, është anashkaluar procedura e hapur e prokurimit publik.

    Në dosjen e prokurorisë thuhet se më pas edhe përkundër faktit se krijimi i këtij Komisioni nuk kishte bazë ligjore, i pandehuri në drejtim të funksionimit të këtij Komisioni për negocim me OE “Yafe Turizm Inseat Sanayi ve Ticaret Anonim Sirketi” dhe “Xanto SP” ZO.O. In, kishte anashkaluar në tërësi dy anëtarët e Komisionit. Sipas Prokurorisë, kjo i ka mundësuar të pandehurit Ridvan Muharremi që të luajë rolin e ndërmjetësuesit ndërmjet MINT dhe O.E., përkatësisht firmave nga të cilat do të siguroheshin produktet e rezervës shtetërore.

    “….Pas të cilave ishin nënshkruar Kontrata, datë 13.03.2022 me O.E. “Yafe Turizm Insant Sanayi ve Ticaret Anonim Sirketi” me seli në Bursa të Turqisë, për blerjen e grurit, në sasi 10,000 tonë, me çmim të kontraktuar 4,834,778 Euro dhe Aneks-kontrata nr.prot. 1960-02, datë 29.03.2022 dhe me O.E. “Xanto SP” ZO.O. In, me seli në Gdynia, Poloni, si dhe Kontrata nr.1548-02, datë 17.03.2022 për furnizim me vaj luledielli dhe sheqer, në sasi 200,000 litra vaj dhe 120,000 kg. sheqer, me çmim të kontraktuar 276,000 Euro, ku pas nënshkrimit të kontratave i pandehuri kishte urdhëruar dhe bërë trysni ndaj zyrtarëve financiar në MINT, për të realizuar ciklin e pagesave për O.E. të cekur në formë të avansit në lartësi 100% të vlerës së kontratës, mirëpo pavarësisht faktit se pagesa është realizuar në tërësi, në Kosovë si vend i destinimit janë sjellë vetëm 9,947.5 tonë grurë, ose 52.5 tonë më pak se sasia e kontraktuar, ndërsa vaji dhe sheqeri nuk janë sjellë fare, ku si rezultat i këtyre veprimeve është dëmtuar interesi publik në lartësi 601,940 Euro, përkatësisht buxheti i Republikës së Kosovës i destinuar për rezerva shtetërore”– thuhet në dosje.

    Dosja: Hafiz Gara ka adresuar te Irfan Lipovica, kërkesën për përjashtimin e procedurave të prokurimit

    Për zyrtarin tjetër të Ministrisë së Industrisë, Ndërmarrësisë dhe Tregtisë, Hafiz Gara, dosja e Prokurorisë thotë se ai nga muaji shkurt i vitit 2022, në Prishtinë, në MINT, në cilësinë e personit zyrtar, në pozitën Drejtor i Departamentit të Rezervave Shtetërore të Mallrave (DRSHM/MINT), me qëllim të përfitimit të dobisë pasurore për personin tjetër dhe shkaktim të dëmit buxhetit të Republikës së Kosovës, ka tejkaluar autorizimet ligjore të parapara për pozitën që e ka ushtruar.

    Në dosje thuhet se në kundërshtim me legjislacionin në fuqi, më datë 25 shkurt 2022 ka adresuar te Irfan Lipovica, kërkesën për përjashtimin e procedurave të prokurimit, edhe pse e ka ditur se kërkesa e tillë nuk ka bazë ligjore.

    Gjithnjë sipas Prokurorisë, kjo kërkesë më pas i është adresuar Qeverisë së Kosovës, me qëllim për ta kufizuar konkurrencën dhe fshehur shkeljen e ligjit, përkundër faktit se ishte nxjerrë Vendimi për formimin e Komisionit për Negocimin e Kontratave për Furnizimin me Mallra të Rezervës Shtetërore për vitin 2022, me të cilin është anashkaluar procedura e prokurimit publik, e më pas ishte anashkaluar edhe Komisioni i cili ishte krijuar me qëllim të negocimit, porositjes dhe blerjes së produkteve të rezervës shtetërore të grurit, vajit të lulediellit dhe sheqerit. Dosja vazhdon duke thënë se kjo i ka mundësuar të pandehurit Ridvan Muharremi që të luajë rolin e ndërmjetësuesit ndërmjet MINT dhe O.E. përkatësisht firmave nga të cilat do të siguroheshin këto produkte të rezerves shtetërore, pas të cilave ishin nënshkruar kontratat me kompanitë në Turqi dhe Poloni për furnizim.

    “…Pas nënshkrimit të kontratave, O.B. te kontraktuar, edhe pse ju ishin kryer pagesat në tërësi, në Kosovë si vend i destinimit i kanë sjellë vetëm 9,947.5 tonë grurë, gjithsej 52.5 tonë më pak se sasia e kontraktuar, ndërsa vaji dhe sheqeri nuk ishin sjellë fare” – thuhet në dosje.

    Çfarë thotë dosja e Prokurorisë për Ridvan Muharremin?

    Në anën tjetër dosja e Prokurorisë për Ridvan Muharremin thotë si ai në periudhën kohore nga muaji shkurt 2022 e në vazhdimësi, me dashje dhe me qëllim të krijimit të kushteve dhe mundësive për realizimin e veprimeve inkriminuese për të pandehurit Irfan Lipovica dhe Hafiz Gara, i ka ndihmuar ata, duke i krijuar kushtet, propozuar dhe siguruar fillimisht për negocim për furnizim me rezerva shtetërore.

    Prokuroria ka thënë në dosje se janë propozuar O.E. “Yafe Turizm Insaat Sanayi ve Ticaret Anonim Sirketi” me seli në Bursa të Turqisë për furnizim me grurë dhe “Xanto SP” ZO.O. In me seli në Gdynia, Poloni për furnizim me vaj luledielli dhe sheqer, e më pas përmes përfshirjes pa autorizim në procesin e negocimit në mes të pandehurve Irfan Lipovica dhe Hafiz Gara me O.E.  ka luajtur rol kyç në negocimin e kushteve të kontratave.

    “Ku si rezultat është lidhur Kontrata për furnizim me rezerva shtetërore në mes të Ministrisë se Industrisë, Ndërmarrësisë dhe Tregtisë (MINT) dhe O.E. “Yafe Turizm Insaat Sanayi ve Ticaret Anonim Sirketi” për blerjen e grurit, në sasi prej 10,000 tonë, dhe çmim prej 4,834,778 Euro, me të cilat kompani i pandehuri Ridvan Muharemi, edhe më parë ka pasur raporte kontraktuale dhe biznesore dhe Kontrata nr.1548-02 e datës 17.03.2022 me O.E. “Xanto SP ZO.O. In për furnizim me Vaj luledielli dhe sheqer, në sasi 200 mijë litra vaj dhe 120 mijë kg. sheqer, me çmim prej 276 mijë euro, shuma këto të paguara në tërësi në formë të avansit, mirëpo edhe përkundër faktit se pagesat janë realizuar, autoriteti kontraktues ka pranuar vetëm 9,947.5 tonë grurë, pra 52.5 tonë më pak se sasia e kontraktuar, ndërsa vaji dhe sheqeri nuk janë sjellë fare….” – thuhet në dosje.

    Gjykata e Prishtinës jua kishte caktuar nga 30 ditë paraburgim tre të dyshuarve për keqpërdorim me rezarvat shtetërore.

    Sipas njoftimit të Gjykatës së Prishtinës, caktimi i masës së paraburgimit për të pandehurit Irfan Lipovica dhe Hafiz Gara ishte dhënë për shkak të dyshimit të bazuar se kanë kryer veprën penale “Keqpërdorimi i pozitës apo autoritetit zyrtar”.

    Ndërkaq, paraburgimi për Ridvan Muharremin ishte dhënë për shkak të dyshimit të bazuar se ka kryer veprën penale “Dhënia e ndihmës në kryerje të veprës penale të keqpërdorimit të pozitës apo autoritetit zyrtar”.

    Në mëngjesin e 18 gushtit 2023, me urdhër të Prokurorisë Speciale ishin kryer arrestimet dhe bastisjet për disa orë në zyret e MINT dhe pronat e Ridvan Muharremit.

    Bastisjet dhe arrestimet erdhën pas publikimit të audioincizimeve të medias ‘Nacionale’ për rezervat shtetërore.

  • PSD e dërgon në Prokurorinë Speciale letrën e Maqedoncit për KFOR-in – VIDEO

    Partia Socialdemokrate (PSD), më 27.01.2025, ka dërguar në Prokurorinë Speciale “letërsqarimin” e ministrit të Mbrojtjes, Ejup Maqedoncit, drejtuar Komandantit të KFOR-it – në lidhje me kompetencat për dërgimin e FSK-së në veri të vendit.

    Zgjim Hyseni nga PSD-ja tha se kryeministri Albin Kurti në vitin 2020 e kishte quajtur si tradhëti dhe kundërkushtetues zotimin e ish-kryeministrit Hashim Thaçi në vitin 2013, që të mos dërgojë FSK-në në Veri – pa një miratim paraprak nga KFOR-i.

    Sipas Hysenit, edhe letra e ministrit Maqedonci në këtë rast duhet të cilësohet si “shkelje”.

    “Ne e kemi dorëzu sot në Prokurorinë Speciale nëse Marrëveshja e vitit 2013 qysh vetë Kurti e ka cilësuar ‘si shkelje të Kushtetutës’, për shkak se ka thënë se është Traktat Ndërkombëtar pa u votu në Kuvend. Nëse ajo ka qenë shkelje, atëherë riafirmimi i saj prej ministrit Maqedonci duhet me u cilësu po ashtu shkelje, me kriteret e vetë Kryeministrit.” – ka thënë Hyseni para gazetarëve.

    “E kemi dërgu pra letrën (në Prokurori), letërkëmbimin në mes të ministrit Maqedonci edhe Komandantit të KFOR-it. Edhe kemi thënë ‘Shikoje, nëse këtu ka shkelje të Kushtetutes’. Nëse ekzistojnë ato shkelje, të cilat i ka pretendu Kryeministri vetë në vitin 2020.” – shtoi ai.

    Ai ka akuzuar Kurtin për standarde të dyfishta për të njëjtën çështje.

    “Vetëm prej nivelit ku vetës ia afirmon, vetës ia njeh një rol historik, një rol që ka me e realizu një domosdoshmëri historike. Vetëm prej asaj perspektive, ti masnej nuk zgjedh mjete, diçka që më herët për dikon ka qenë tradhëti. E vetë e bon, edhe është punë shumë e vogël. Kjo është arsyeja pse kryeministri Kurti nuk është thjesht vetëm një autoritar i zakonshëm, është shumë më keq e më i rrezikshëm se kaq.” – tha Hyseni.

    Ndërsa, ministri i Mbrojtjes, Ejup Maqedonci e kishte mohuar se letra e dërguar te KFOR-i në nëntor të vitit 2024 përbënte “rizotim”, pasi që FSK kishte marrë pjesë në një ceremoni mortore në Veri.

    Sipas Maqedoncit, letra ishte vetëm një “sqarim”.

    “Letra në fjalë është dërguar me qëllimin që t’i sqarohen Komandantit të KFOR-it rrethanat e angazhimit të një Njësie të FSK-së në njërën nga Komunat në veri të vendit, si dhe ta sigurojë atë që nuk ka pasur për qëllim në asnjë rast tensionimin e situatës. Në asnjë mënyrë, letra nuk paraqet rizotim dhe nuk mund të interpretohet si rizotim, pasi për angazhimin e FSK-së në Veri të Kosovës ekziston një dokument në fuqi i dhënë si zotim nga ish-kryeministri Thaçi në prill të vitit 2013 – dërguar Sekretarit të Përgjithshëm të NATO-s, nga i cili derivojnë dhe kushtet e operimit e të koordinimit të FSK-së dhe KFOR-it për pjesën veriore të Kosovës.” – thuhej ndër të tjera në reagimin e Maqedoncit.

  • Aktakuzë për “krime lufte” ndaj një boshnjaku, dyshohet për pjesëmarrje në vrasjen e tre shqiptarëve në Gjakovë

    Prokuroria Speciale e Kosovës të premten, më 24.01.2025, ka ngritur Aktakuzë për “krime lufte” ndaj personit me inicialet J. Sh., i nacionalitetit boshnjak, pasi që dyshohet se ka marrë pjesë në vrasjen e tre personave civilë shqiptar, në Gjakovë.

    Sipas njoftimit J. Sh. dyshohet se ka marrë pjesë në vrasjen e tre civilëve, që ka ndodhur në shtëpinë e familjes Dyla në Gjakovë, si dhe dyshohet se ka marrë pjesë në dëbimin e kësaj familje dhe shkatërrimin e pasurisë së tyre.

    “Kjo çështje penale tashmë i ka kaluar në kompetencë Departamentit Special të Gjykatës Themelore në Prishtinë për procedurë të mëtutjeshme. I pandehuri gjendet nën masën e paraburgimit, sipas vendimit të gjyqtarit të procedurës paraprake, deri në një vendim të ri nga ana e Gjykatës.” – thuhet në njoftim.

    J. Sh. po akuzohet për veprën penale “krim i luftës kundër popullsisë civile”.

     

  • Prokuroria Speciale po heton mënyrën e ndarjes së banesave sociale në Zubin Potok

    Banesave sociale në Zubin Potok u është vendosur shiriti nga Policia e Kosovës dhe rasti po vazhdon të hetohet nga Prokuroria Speciale, për “keqpërdorim të detyrës zyrtare”.

    Organet e rendit konfirmojnë se në këto banesa janë hasur “dallavere”, me prona e me ndërtim. Ndërsa organet komunale bëjnë të ditur se në mënyrë ilegale është bërë shpërndarja e çelësave.

    Lajmin për KALLXO.com e konfirmoi zëvendësdrejtori i Drejtorisë Rajonale Mitrovicë – Veri të Policisë së Kosovës, Veton Elshani i cili tha se rasti po hetohet nga Prokuroria Speciale, për “keqpërdorim të detyrës zyrtare” nga ish-Kryetari i kësaj Komune.

    “E kemi njoftu Prokurorin. Tani kemi nis me hetu rastin. Kemi ardhë në përfundim. Më 15 dhjetor (2024) ia kemi qit shiritat. Tash e ka këtë rast duke e hetu Prokuroria Speciale, bashkë me krimet ekonomike me dyshimin ‘keqpërdorim i detyrës zyrtare’.” – tha Elshani.

    Ai shtoi se hetimet për këtë rast kanë filluar që nga nëntori i vitit të kaluar, për problemet që kishin serbët me ndarjen e këtyre banesave.

    “Ka qenë një hetim, duke u zhvillu në nëntor të vitit të kaluar për ndarjen e banesave. Kanë pasë disa probleme serbët mes vete: ‘Jo e ka nda mirë, jo s’e ke nda mirë’. Qaty ia kemi nis hetimeve për punë të problemeve, qysh e tek. I kemi marrë si anëtarë Komisioni. I kemi marrë në pyetje. E prej aty e kemi pa, që është e dyshimtë krejt ajo me prona, me ndërtim e me krejt.” – përfundoi Elshani.

    Kryetari i Komunës së Zubin Potokut, Izmir Zeqiri tha se banorët e këtyre banesave kanë shpërndarë çelësat në mënyrë ilegale. Gjjithashtu, tashmë qarkullimi në këto objekte është ndaluar.

    “Iu kanë qit disa shirita, se i kanë nda disa çelësa në mënyrën ilegale. Nuk e di kush. Kjo ka ndodhë rreth 26, 27 nëntor dhe çelësat janë shpërndarë diku natën nga kufijtë. Unë kam dëgju të nesërmen, menjëherë. Mirëpo, ishte festa kombëtare, natyrisht 28 Nëntori dhe ishte pushim. Unë kam pasë menjëherë ankesa të qytetarëve. Kërkesa për banim të qytetarëve dhe informacionet se kush e ka ba. I kanë marrë natën. Janë dalë aty nga kufini, aty përtej kufinit, çka po di unë.” – tha i pari i Zubin Potokut, për KALLXO.com.

     

  • Prezentohen Raportet vjetore nga Kryeprokurorët e Prokurorive për vitin 2024

    Këshilli Prokurorial i Kosovës ka mbajtur më 23.01.2025 mbledhjen e 261, në të cilën si Pikë e Rendit të ditës është paraparë prezantimi i Raporteve vjetore për Prokuroritë e vendit.

    Ky Raport përfshin periudhën kohore prej 1 janarit deri më 31 dhjetor të vitit 2024.

    Së pari, Raportin e ka prezantuar kryeprokurori i Apelit, Agron Bajrami, i cili para Këshillit ka deklaruar se zgjidhja e lëndëve në këtë Prokurori arin 100% – duke marrë për bazë lëndët e pranuara për vitin 2024 dhe lëndët e zgjidhura.

    Sipas Brajramit, në vitin 2024 janë pranuar 9,707 lëndë, ndërsa janë zgjidhur 9,707.

    Kryeprokurori i Apelit ka folur edhe për hedhje të kallëzimeve penale dhe për vitin 2024 ka deklaruar se kishin 176 raste të kallëzimeve penale, që ishin apeluar në Shkallën e Dytë të Prokurorisë.

    Nga këto kallëzime penale, 104 Ankesa kundër hedhjes së kallëzimit penal ishin refuzuar, 55 ishin aprovuar, kurse 17 ishin hedhur poshtë si të palejuara.

    Raporti i kryeprokurorit të Apelit, Agron Bajrami është aprovuar nga Këshilli me 10 vota “për” dhe asnjë “abstenim”.

    Radhën për të prezantuar Raportin para Këshillit Prokurorial të Kosovës e kishte Prokuroria Speciale. Prezent ishte zëvendëskryeprokurori i kësaj Prokurorie, Valdet Gashi.

    Gashi tha fillimisht se lëndë të vitit 2023 që janë bartur në vitin 2024 janë 1,756 sosh, ndërsa për vitin 2024 ishin pranuar në Prokurori Speciale plot 489 raste të reja.

    Në vitin 2024 në punë në Prokurorinë Speciale ishin plot 2,224 lëndë. Në vitin 2024 ishin zgjidhur 288 lëndë, që i bie në përqindje 58% në raport me rastet e pranuara.

    Gashi shtoi tutje se gjatë vitit që lamë pas si Prokurori ishin ballafaquar me disa sfida, sidomos me ndryshimin e Ligjit për Kompetenca të Zgjeruara të Prokurorisë Speciale – duke rritur numrin e paraqitjes së rasteve në këtë Prokurori.

    Sipas tij, arsyeja pse viti 2024 del të jetë me përqindje më pak efikas sesa viti 2023, është arsyeja e këtij ndryshimi ligjor.

    “Gjatë vitit 2024 jemi ballafaquar me disa sfida, sidomos me rastin e ndryshimit të Ligjit të PSRK-së. Në kompetencë ka vendosur edhe disa zyrtarë. Edhe pozita të disa zyrtarëve që i mbajnë që më parë kanë qenë në Prokuroritë Themelore. Kemi një numër të dyfishimit të numrit të lëndëve të pranuara, në krahasim me vitin 2023. Për atë ka dalë përqindja më e ulët, se në vitin 2023.” – tha Gashi.

    Gashi ka folur tutje se numri i madh i lëndëve, si për shembull hetimi i rreth 1,600 Kontratave njëburimore sipas tij kanë bërë që në aspektin procedural Prokuroria të ketë ngecje.

    Këto vonesa në hetime sipas Gashit kanë të bëjnë edhe me një numër tjetër të elementeve, si për shembull bashkëpunimi që kjo Prokurori e ka me institucione të tjera, e që nganjëherë deri te grumbullimi i informacioneve merr kohë.

    Raporti vjetor i Prokurorisë Speciale u aprovua me 10 vota “për”, me qëllim që brenda 7 ditësh të përpilohet një Raport i vetëm, i cili përfshin punën e secilit Prokuror.

    Radhën e kishte kryeprokurori i Prishtinës, Zejnullah Gashi.

    Gashi në prezantimin e Raportit tha se puna e kësaj Prokurorie në përqindje do të vinte në 101%, në të gjitha Departamentet.

    Sipas Gashit, Aktakuzat e kësaj Prokurorie në Gjykatë janë vërtetuar me Aktgjykime dënuese në përqindje në 93%. Aktgjykime liruese nga këto Aktakuza sipas Gashit kanë vetëm 2.82%, ndërsa Aktgjykime refuzuese kanë pasur vetëm 3.84%.

    Pas raportimit të Gashit, radhën pritet ta marrë kryeprokurori i Prokurorisë së Ferizajit, Burim Çerkini dhe Kryeprokurorët e Prokurorive të tjera.