Një person është arrestuar sepse dyshohet se i është gjetur dhe sekuestruar një sasi prej 2.06 gramë substancë e dyshuar narkotike e llojit marihuanë dhe 0.85 gram substancë narkotike e llojit kokainë.
Sipas organeve të rendit rasti ka ndodhur në rrugën “Hasan Prishtina” në Prizren.
“I dyshuari pas intervistimit me vendim të prokurorit është dërguar në mbajtje”- thuhet në raportin e Policisë së Kosovës.
Pushkë gjuetie, municion i kalibrave të ndryshëm, thikë, shufër metalike, karikatorë u gjetën gjatë një bastisje të policisë me urdhër të prokurorisë në Prizren në shtëpitë e dy personave të dyshuar.
Fillimisht, policia ka njoftuar se dy persona ka arrestuar nën dyshimin se kanë demoluar disa vila dhe një shtëpi në Prizren më 06.01.2024.
Vlera e dëmit material që është shkaktuar sipas policisë raportohet të jetë e vogël.
Në anën tjetër, policia ka njoftuar se pasi ka identifikuar të dyshuarit ka kryer edhe një bastisje në shtëpitë e të njëjtëve.
Aty kanë gjetur dhe konfiskuar, dy pushkë gjuetie, 105 copë fishekë të kalibrave të ndryshëm, një thikë, një shufër metalike, tre karikator dhe një automjet.
Në lidhje me rastin tashmë është iniciuar vepra penale e armëmbajtjes pa leje, asgjësimit të pasurisë por edhe për dhunë në familje.
Te kjo e fundit policia në raportin ditor nuk ka dhënë ndonjë informacion se pse u iniciua edhe kjo vepër penale.
Tutje, të dyshuarit janë intervistuar dhe është njoftuar prokurori kujdestar në lidhje me rastin. Prokurori me vendim ka dërguar dy të dyshuarit në masën e mbajtjes për 48 orë.
Një person është arrestuar sepse kishte shtënë me pistoletë në ajër, në Dedaj të Prizrenit.
Policia njofton se nga i dyshuari është sekuestruar një pistoletë me gas.
“Pas inicimit të rastit me vendim të prokurorit i dyshuari është dërguar në mbajtje”- bënë të ditur Policia e Kosovës.
Bashkësia Islame e Kosovës (BIK) në bashkëpunim me Ambasadën turke në Prishtinë kanë mundësuar që personi i lënduar si pasojë e shpërthimit të fishekzjarrëve në një pikë shitjesh të mjeteve piroteknike në Prizren më 31.12.2024, të dërgohet për trajtim me aeroplan special në Turqi.
BIK-u mё 06.01.2025, njoftoi se trajtimi i tij, do të realizohet në qendrën hulumtuese spitale për djegie të thella në Stamboll.
“Bashkësia Islame e Kosovës në bashkëpunim me Ambasadën e Turqisë në Prishtinë, kanë siguruar trajtimin mjekësor dhe transportin emergjent me aeroplan special të Abdurrahman Memajt, i cili ditë më parë u lëndua rëndë nga shpërthimi i fishekzjarrëve në Prizren.
Me këtë rast, Bashkësia Islame e Kosovës falënderon Ambasadën e Republikës së Turqisë dhe Qeverinë turke për mundësinë e trajtimit mjekësor në Qendrën Hulumtuese Spitalore për diegie të thella në Stamboll të Turqisë, duke bërë apel kështu për kujdes edhe më të shtuar”- thuhet nё njoftim.
Mё 01.01.2025, 25-vjeçari i lënduar si pasojë e shpërthimit të fishekzjarreve në një pikë shitjesh të mjeteve piroteknike në Prizren ka qenë në gjendje kritike shëndetësore.
Ai ishte duke u trajtuar në Klinikën Intensive të QKUK-së.
Një këmbësor ka humbur jetën pasi është goditur nga një veturë, në rrugën “Ekrem Rexha”, në Prizren.
Siç njofton zëdhënësi i Policisë për rajonin e Prizrenit, Shaqir Bytyqi, aksidenti ka ndodhur të dielën më 05.01.2025, kur një veturë me targa sllovene derisa ishte duke lëvizur në drejtim të lagjes “Arbana” ka goditur këmbësorin, i cili ishte duke kaluar rrugën nga ana e majtë në të djathtë, jashtë vendkalimit të shënuar për këmbësorë.
Sipas Bytyqit, këmbësori ishte goditur me pasqyrën e majtë të veturës, e cila po lëvizte në shiritin e majtë të rrugës me dy shirita në një kahje.
“Si pasojë këmbësori pëson lëndime të rënda trupore, dërgohet në Emergjencën e Spitalit të Prizrenit, nga ku pastaj është dërguar në QKUK në Prishtinë për trajtim të mëtutjeshëm – për shkak të lëndimeve të rënda trupore.” – ka thënë Shaqiri për KALLXO.com.
Ndërkaq, sot më 06.01.2025, Shaqiri thotë se Policia është njoftuar se viktima S.K, rreth 60 vjeçar, ka vdekur në QKUK dhe se trupi i pajetë është dërguar në Institutin e Mjekësisë Ligjore për ekzaminim.
Shaqiri njofton tutje se ngasësi i dyshuar V.S , me urdhër të Prokurorit kujdestar, është dërguar në mbajtje.