Policia njofton se dje, më 20.02.2025, në Prizren, është raportuar se nga një predhë (plumb qorr) është dëmtuar xhami i dritares së një objekti.
Sipas Policisë, i dyshuari për këtë rast është një burrë – shtetas i Shqipërisë.
Në konsultim me Prokurorin, rasti ka shkuar në procedurë të rregullt – njofton Policia, sot, më 21.02.2025.
Policia ka arrestuar një person të dyshuar për posedim të narkotikëve në rrugën “Qesk Zadeja”, në Prizren, dje, më 20.01.2025.
Sipas Policisë, të dyshuarit fillimisht në veturën e tij i është gjetur një sasi e dyshuar narkotike e llojit marihuanë.
Më pas, Policia bën të ditur se në shtëpinë e tij janë gjetur dhe konfiskuar edhe 36.68 gramë substancë narkotike e llojit marihuanë, 0.09 gramë kokainë, 1 peshore, 1 veturë, 1 telefon mobil dhe 1 mijë e 215 euro para të gatshme.
“Me urdhër të Prokurorit, i dyshuari dërgohet në mbajtje.” – njofton Policia, sot, më 21.01.2025.
Ka vdekur sot, më 20.01.2025, 25-vjeçari i cili mbeti i lënduar nga shpërthimet e fishekzjarrëve në Prizren, në natën e Vitit të Ri, më 31.12.2024.
Viktima me inicialet A. M., për shkak të plagëve të rënda ishte transferuar në Turqi për trajtim.
Këtë e ka konfirmuar për KALLXO.com zëdhënësi i Policisë për rajonin e Prizrenit, Shaqir Bytyqi.
“Sot më 20.01.2025, rreth orës 11:00, Sektori Rajonal i Hetimeve nga Drejtoria Rajonale e Policisë në Prizren, nga një i afërm i familjes është informuar se viktima e rastit “shkaktim i rrezikut të përgjithshëm” të ndodhur në Prizren më 31.12.2024 (shpërthimi i fishekzjarrëve) – si pasojë e lëndimeve të marra sot ka vdekur.” – ka thënë Bytyqi, më 20.01.2025.
https://kallxo.com/lajm/uka-25-vjecari-i-lenduar-nga-fishekzjarret-ne-prizren-eshte-ne-gjendje-kritike/
Kompania për Distribuimin e Energjisë Elektrike në Kosovë (KEDS) bën të ditur se të shtunën, më 18.01.2025, do të kryhen punime të domosdoshme për siguri të sistemit energjetik.
Si rezultat i kësaj, në disa lokalitete do të ketë ndërprerje të rrymës.
Ky është orari sipas rajoneve:
Prizren
Punime në projekte investive:
1.
Nga NS 110/10 [kV] Theranda do të ndërprehet:
Dalja 10[kV] rr. Reçanit (kodi: 32000005), prej orës 09:00 deri në ora 15:00.
Vendet: Pjesët periferike të Therandës (rr.Reçani), një pjesë e rr. Brigada 123, Banesat e Benafit, Banesat e Inxhinieringut, Banesat te Viva, lagjja Hoxha I dhe II.
Arsyeja: Energjizimi i kabllove të reja, punimi i lidhëseve dhe kokave.
Ferizaj
Punime të domosdoshme për siguri të sistemit:
1.
Nga NS 35/10 [kV] Shtime do të ndërprehet:
Dalja 10[kV] Shtime (kodi: 41046003), prej orës 10:00 deri në ora 12:00.
Vendet: rrugët: 12 Qershori, 14 Dhjetori, Adem Jashari (një pjesë), Afrim Musliu (një pjesë), Ahmet Kaçiku, Ahmet Shtimja (një pjesë), Anton Çetta, Arben Hyseni (një pjesë), e Prishtinës, e Tiranës, Imer Devetaku, Jetë Hasani, Komandant Kumanova, Lagja e Pajtimit, Milaim Beka, Ymer Prizreni (një pjesë), Rrethrrotullimi për Godanc, Shaqir Tërshana (një pjesë), Shefket Muhadini, Sheshi i Dëshmorëve, Sheshi i UÇK (një pjesë), Shtime, Smajl Gorani, Sylejman Vokshi (një pjesë), Ymer Prizreni (një pjesë), Godanc i Poshtëm dhe Godanc i Ulët.
Arsyeja: Ndërprerje për shkaqe sigurie, hapja e vrimës ngritja e shtyllës 12/315 dhe bartja e rrjetit të tensionit të mesëm sipas projektit, shkarkimi i daljeve 0.4kV-TS Jetë Hasani-Shtime.
Gjakovë
Punime në projekte investive:
1.
Nga NS 35/10 [kV] Malisheva do të ndërprehet:
Dalja 10[kV] Kijeva (kodi: 82082007) prej orës 09:00 deri në ora 18:00.
Vendet, fshatrat: Balincë, Bubavec, Drenoc, Gollubovc, Kijevë, Llazicë, Lubizhdë, Mleqan, Plloçicë, Polluzhë dhe Stapanicë.
Arsyeja: Projekte investive, ndërrimi i konzollave dhe izolatorëve nën largpërçuesin ekzistues.
Kandidati për Kryeministër i Lëvizjes Vetëvendosje, Albin Kurti bashkë me disa prej anëtarëve të listës me të cilën garon në Zgjedhjet parlamentare ka mbajtur tubim elektoral, në qytetin e Prizrenit, më 17.01.2025.
Në tubimin në Prizren, Kurti ka folur për rrugën Prizren-Tetovë, punimet për të cilën tha se “kanë filluar dhe po ecin me shpejtësi.”
Vlera e projektit të ndërtimit të rrugës Prizren-Tetovë është rreth 200 milionë euro – sipas Kurtit.
“Tuneli pritet të kushtojë rreth 150 milionë euro. Me Qeverinë e Maqedonisë së Veriut kemi Marrëveshje për Financimin dhe Projektimin e Tunelit. Tuneli do t’i bie mes për mes malit të Vërdopit. Ai do të jetë i gjatë gati 6km e gjysmë dhe do të jetë pra edhe më i gjatë se sa tuneli i Kalimashit, përafërsisht 600 metra.” – ka thënë Kurti.
Kurti, më 13.08.2024, si Kryeministër i Kosovës, pa nga afër fillimin e punimeve për ndërtimin e rrugës Prizren-Tetovë, përkatësisht në segmentin Struzhë – kyçja në autoudhën “Ibrahim Rugova” në Prizren.
Sipas njoftimit të Qeverisë, vlera totale e projektit është paraparë të jetë 35 milionë euro, me gjatësi prej 20.3 km.
Gjatë tubimit të tij elektoral në Prizren, Kurti i ka kritikuar krerët e Prokurorisë dhe ka folur për zgjedhjen e Kryprokurorit të ri.
“Malli i huaj s’bahet i joti. Shtetin tënd s’bën me vjedh. Ktheni paret, fitoni shërbim e shpagim, ku është Z-mobile sot? Zyrtarisht Z-mobile veç një të punësuar e ka, sepse nuk iu duhen më, meqë e kanë kry plaçkitjen. E krerët e Prokurorisë qartazi kanë vdekë për së gjalli. Na duhet doemos, na nevojitet një Kryeprokuror i ri, profesionist, patriot, i ndershëm.” – ka thënë Kurti.
Më 29.12.2024, Kurti në një intervistë në KTV e ka akuzuar kryeprokurorin e Prokurorisë Speciale, Blerim Isufajn se është “regjisor” i ftesës që i është dërguar Kurtit, për të dëshmuar në Prokurori në rastin e rezervave shtetërore.
Para Kurtit ka folur ministri i Kulturës, Hajrulla Çeku, i cili edhe vjen nga Prizreni.
Sipas Çekut, janë duke e mbrojtur trashëgiminë e Prizrenit, të cilin tha se po e bëjnë gati për UNESCO dhe po investojnë në sport, sepse Prizreni do të jetë mikpritës i Lojërave Mesdhetare.
“Po e zhvillojmë kulturën, sepse Prizrenin do ta nominojmë për Kryeqytet kulturor evropian.” – ka thënë Çeku.
E ministrja e Arsimit, Arbërie Nagavci tha se vetëm në arsim në këtë mandat kanë investuar mbi 6 milionë euro në Prizren.
Sipas Nagavcit janë ndërtuar tashmë tri Çerdhe për 540 fëmijë të Prizrenit. Edhe dy Çerdhe të tjera janë në ndërtim e pritet të përfundojnë sivjet.
“Në Prizren, brenda një mandati, deri në fund të këtij viti janë ndërtuar pesë Çerdhe për fëmijët e Prizrenit. A e dini se sa Çerdhe janë ndërtuar në Kosovë, në 17 vjetët e fundit? Vetëm 4 Çerdhe në të gjithë Kosovën.” – tha Nagavci.
Fushata pёr Zgjedhjet parlamentare nё Kosovё ka filluar zyrtarisht, mё 11.01.2025.
Për njё muaj partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare të 9 shkurtit 2025.
Për këto Zgjedhje janë certifikuar 28 subjekte politike, me 1,280 kandidatë.
Sipas Ligjit, gjatë periudhës së fushatës zgjedhore subjektet politike kanë të drejtë:
– të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre, me qëllim të fitimit të përkrahjes nga votuesit e tyre;
– të publikojnë dhe të shpërndajnë afishe, reklama dhe material tjetër, lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet tjera në fuqi.
Këto do të jenë Zgjedhjet e para të rregullta, që Kosova mban që nga shpallja e Pavarësisë më 2008.