Një person është gjetur i vdekur në shtëpinë e tij në Kamenicë.
Policia e Kosovës ka bërë të ditur se njësitë përkatëse kanë dalë në vendin e ngjarjes, ndërsa ekipi mjekësor ka konstatuar vdekjen e viktimës.
Me vendim të Prokurorit, trupi i pajetë është dërguar në IML për obduksion.
Rastin i cili është evidentuar më 23.01.2025, Policia është duke e hetuar, si: “vdekje e dyshimtë”.
Dy persona të dyshuar janë arrestuar nga Policia e Kosovës, nën dyshimin se kanë kanosur një gazetar përmes rrjeteve sociale.
Sipas Raportit 24-orësh të Policisë së Kosovës, kanosja dyshohet se ka ndodhur më 18 dhe 19.01.2025.
Në njoftimin e datës 24.01.2025 bëhet e ditur se pas intervistimit, me vendim të Prokurorit, të dyshuarit janë dërguar në mbajtje.
Rasti i cili ka ndodhur më 23.01.2025 është inicuar, si: “kanosje”.
Një person është arrestuar, pasi i njëjti dyshohet se ka sulmuar një mjek në Qendrën Klinike Universitare të Kosovës (QKUK).
Sipas Raportit 24-orësh të Policisë, sulmi ka ndodhur ndaj një mjeku të Klinikës Infektive.
Në njoftim bëhet e ditur se viktima ka pranuar tretman mjekësor, ndërsa i dyshuari pas intervistimit, me vendim të Prokurorit, është dërguar në mbajtje.
Rasti i cili është inicuar si “lëndim i lehtë trupor” ka ndodhur më 23.01.2025.
Një person i mitur është arrestuar, më 22.01.2025, nën dyshimin për “vjedhje të rëndë” dhe “hyrje në sistemet kompjuterike”, në Mitrovicë të Jugut.
Sipas organeve të rendit, arrestimi i tij është bërë mbi dyshime të arsyeshme dhe provave të siguruara se më 17.01.2025, në rrugën Nexhip Dragaj” në Mitrovicë, ka kryer veprën penale “vjedhje e rëndë” dhe se cak i kësaj vjedhjeje ishte një lokal nga ku kishte vjedhur pajisje teknologjike.
“Ndërsa, pas intervistimit, me Aktvendim të Prokurorit, të dyshuarit i është caktuar masa e ndalimit policor për 24 orë.” – thuhet në njoftimin e Policisë së Kosovës.
Drejtoria Rajonale Mitrovicë-Jugu e Policisë së Kosovës më 22.01.2025 ka prezantuar punën, angazhimet dhe aktivitetet e realizuara gjatë vitit 2024.
Të pranishëm ishin drejtoresha Afërdita Mikullovci, drejtori i Departamentit të Rendit Publik, Arbnesh Ajvazi, si dhe mysafirë nga institucionet e tjera.
Në njoftimin e Drejtorisë theksohet se janë ndërmarrë një mori aktivitetesh parandaluese duke përfshirë realizimin e projekteve, fushatave, dhe ligjëratave me tema të ndryshme që prekin interesin dhe sigurinë e qytetarit, me mbi 50% në krahasim me vitin 2023.
Gjithashtu drejtoresha Mikullovci thotë se ka pasur rënie të numrit të përgjithshëm të rasteve për 7.6% si dhe të veprave penale për 9.8% në krahasim me vitin 2023.
“Po ashtu gjatë vitit 2024 rezultate pozitive janë shënuar në zbulueshmerinë e rasteve prej 80.0% si dhe rënie të veprave penale si ato të rasteve: vrasje -75.0%, grabitje -75.0%, vjedhje -43.2%, zvogëlimi i numrit të aksidenteve në trafik -3.0%, ngritje e numrit të konfiskimit të armëve pa leje me +22.9% ne krahasim me vitin paraprak”- thuhet në njoftim.
Në fund të prezantimit, për zyrtarët meritorë gjatë vitit 2024 janë shpërndanë mirënjohje.
“Rezultatet janë të përbashkëta që kanë rezultuar në parandalimin e këtyre veprave, ku përveç përkushtimit të policisë, esenciale mbetet përkrahja dhe bashkëpunimi me qytetarët si dhe me institucionet përkatëse”- shprehet falënderuese Mikullovci.