Një person është arrestuar sepse dyshohet se i është gjetur dhe sekuestruar një sasi prej 2.06 gramë substancë e dyshuar narkotike e llojit marihuanë dhe 0.85 gram substancë narkotike e llojit kokainë.
Sipas organeve të rendit rasti ka ndodhur në rrugën “Hasan Prishtina” në Prizren.
“I dyshuari pas intervistimit me vendim të prokurorit është dërguar në mbajtje”- thuhet në raportin e Policisë së Kosovës.
Pushkë gjuetie, municion i kalibrave të ndryshëm, thikë, shufër metalike, karikatorë u gjetën gjatë një bastisje të policisë me urdhër të prokurorisë në Prizren në shtëpitë e dy personave të dyshuar.
Fillimisht, policia ka njoftuar se dy persona ka arrestuar nën dyshimin se kanë demoluar disa vila dhe një shtëpi në Prizren më 06.01.2024.
Vlera e dëmit material që është shkaktuar sipas policisë raportohet të jetë e vogël.
Në anën tjetër, policia ka njoftuar se pasi ka identifikuar të dyshuarit ka kryer edhe një bastisje në shtëpitë e të njëjtëve.
Aty kanë gjetur dhe konfiskuar, dy pushkë gjuetie, 105 copë fishekë të kalibrave të ndryshëm, një thikë, një shufër metalike, tre karikator dhe një automjet.
Në lidhje me rastin tashmë është iniciuar vepra penale e armëmbajtjes pa leje, asgjësimit të pasurisë por edhe për dhunë në familje.
Te kjo e fundit policia në raportin ditor nuk ka dhënë ndonjë informacion se pse u iniciua edhe kjo vepër penale.
Tutje, të dyshuarit janë intervistuar dhe është njoftuar prokurori kujdestar në lidhje me rastin. Prokurori me vendim ka dërguar dy të dyshuarit në masën e mbajtjes për 48 orë.
Disa persona të panjohur dyshohet se kanë vjedhur një pistoletë me leje valide dhe dy karikatorë me fishekë, në një shtëpi në Klinë.
Sipas policisë, rasti është nën hetime teksa është raportuar më 02.01.2024 në orën 23:00.
“Policia është njoftuar se nga persona/a të panjohur nga një shtëpi është vjedhur një pistoletë me leje valide dhe dy karikatorë me fishekë. Rasti është nën hetime”- thuhet në raport.
Një plagosje aksidentale është raportuar në Rugovë të Pejës.
Policia ka njoftuar se rasti është regjistruar në orët e para të datës 06.01.2025.
Sipas raportit ditor të policisë, dyshohet se plagosja ishte aksidentale me armë zjarri dhe një person ka marrë plagë.
Viktima në këtë rast pas ngjarjes është dërguar në spital dhe në bazë të deklaratave të mjekëve, I njëjti është jashtë rrezikut për jetë.
Për rastin është njoftuar edhe prokurori kujdestar në Pejë.
I dyshuari për plagosjen është intervistuar dhe me vendim të prokurorit i njëjti është dërguar në mbajtje për 48 orë.
Një vjedhje është raportuar në një shkollë në Rahovec më 06.01.2025.
Policia ka njoftuar se disa topa futbolli janë vjedhur ndërsa janë dëmtuar edhe disa orendi të sallës sportive brenda shkollës.
Deri më tani nuk ka ndonjë person të identifikuar për vjedhjen ndërsa në polici është raportuar se persona të panjohur kanë depërtuar me forcë përmes dritares në sallën e edukatës fizike.
Tashmë rasti është iniciuar si vjedhje e rëndë dhe është duke u hetuar nga policia.