Ballina

Etiketë: Policia e Kosoves

  • Policia jep detaje për aksidentin në rrugën Gjakovë-Prizren, 4 të lënduar

    Katër persona janë lënduar si pasojë e një aksidenti që ka ndodhur sot, më 21.01.2025, në rrugën Gjakovë-Prizren.

    Policia rastin po e trajton si vetaksident.

    Zëdhënësi i Policisë për Rajonin e Gjakovës, Sheremet Elezaj, tha se rasti ka ndodhur në zonën e njohur si “fshati slloven” në rrugën Gjakovë- Prizren rreth orës 8:35.

    Sipas Elezajt dyshohet se shoferi ka humbur kontrollin mbi automjetin.

    “Rreth orës 08:35, në zonën e njohur si “fshati Slloven” në rrugën Gjakovë-Prizren, shoferi i një veture ka humbur kontrollin mbi të dhe është vet-aksidentuar. Përveç dëmeve materiale, është raportuar edhe për katër persona të lënduar. Rasti do të trajtohet nga Njësia Rajonale e Komunikacionit Rrugor”- tha Elezaj.

     

  • Policia e Kosovës gjen kamerën e tretë të maskuar në Veri – VIDEO

    Policia e Kosovës ka gjetur të hënën, më 20.01.2025, një kamerë të maskuar, në Leposaviq.

    Kështu konfirmoi për KALLXO.com zëvendësdrejtori i Drejtorisë Rajonale Mitrovicë – Veri të Policisë së Kosovës, Veton Elshani i cili tregoi qëllimin e kësaj kamere, si dhe bëri të ditur se është njoftuar Prokurori.

    “Kjo është vendosur, me qëllim, ashtu e maskuar për syrin e njeriut. Dje e kemi largu e jemi në konsultim me Prokurorin, se si të procedohet në rast. Por, po ashtu konfirmoj që nga Prokuroria është hap rast ‘incizim i paautorizuar’.” – tha Elshani.

    Elshani shtoi se kjo është kamera e tretë e maskuar që gjendet në Veri. Sipas tij, dy janë gjetur në Mitrovicë të Veriut në “air conditioner”.

     

    Pamjet: Policia e Kosovës

     

     

  • Kanosi viktimën e fajdesë duke i kërkuar të tërheqë deklaratën, arrestohet i dyshuari

    Prokuroria Themelore në Prizren ka njoftuar se, pas disa hetimeve të zhvilluara në bashkëpunim me Policinë e Kosovës, kanë arritur të arrestojnë në pikën kufitare në Merdarë një person, pasi i njëjti dyshohet se ka kanosur një viktimë të fajdesë.

    Në njoftim thuhet se i dyshuari e kishte kanosur viktimën përmes rrjetit social Facebook – duke i shkruar mesazhe me përmbajtje kërcënuese dhe duke kërkuar nga ai të tërhiqej nga deklarata në rastin e fajdesë.

    “I pandehuri i arrestuar dyshohet se më 06.12.2024 ka kanosur viktimën e fajdesë, përmes rrjetit social Facebook – duke i shkruar mesazhe me përmbajtje kërcënuese, duke kërkuar nga i njëjti që të tërhiqet nga deklarata në rastin e fajdesë që kjo Prokurori e ka nën hetim. I njëjti ka lidhje të afërta familjare me të dyshuarin, i cili gjendet në paraburgim për veprën penale ‘fajdeja’, nga Neni 331 sipas KPRK-së.” – thuhet në njoftimin e Prokurorisë Themelore në Prizren.

    I arrestuari është nën masën e ndalimit 48-orësh, ndërsa Prokuroria ka bërë të ditur se do të parashtrojë kërkesë për caktim të masës së paraburgimit.

  • Policia kërkon ndihmën e qytetarëve për identifikimin e një personi që dyshohet se mashtroi një shitëse në Ferizaj

    Policia e Kosovës ka kërkuar ndihmën e qytetarëve për identifikimin e një personi, i cili po dyshohet se, më 09.03.2024, në Ferizaj ka kryer veprën penale: “mashtrimi”.

    Sipas njoftimit personi dyshohet se ka mashtruar shitësen, me një shumë të caktuar të parave.

    “Drejtoria Rajonale e Policisë në Ferizaj, në bazë të autorizimit nga Prokuroria Themelore në Ferizaj për publikimin e fotografive të personave në kërkim, lëshon kërkesë për bashkëpunim me qytetarët me qëllim identifikimin, vendndodhjen dhe kapjen e personit të dyshuar, mashkull, i cili dyshohet se më 09.03.2024 në rrugën ‘Ahmet Kaçiku’, në Ferizaj ka kryer veprën penale: ‘mashtrimi’, ku në një lokal ka mashtruar shitësen me një shumë të caktuar të parave.” – thuhet në njoftim.

    Policia ka kërkuar që kushdo nga qytetarët që ka ndonjë informacion rreth identitetit të të dyshuarit të lajmërojë Stacionin më të afërt të Policisë, apo përmes aplikacionit digjital “Lajmëro Policinë” dhe në numrat kujdestarë: 192 ,0290/326-250 & 0290/322-406.

    Foto: Policia e Kosovës

     

     

     

  • 56-vjeçari arrestohet për kanosje – Policia i gjeti armën me 50 fishekë

    Një person i dyshuar për një rast të kanosjes është arrestuar nga Policia, të hënën, më 20.01.2025.

    Sipas Policisë, ngjarja ka ndodhur rreth orës 14:00, në një lokal në Çagllavicë.

    Tek i dyshuari është gjetur dhe sekuestruar një armë zjarri dhe 50 fishekë.

    Personi i dyshuar është Y. S., 56 vjeç, shtetas i Republikës së Kosovës.

    “Me vendimin e Prokurorit të shtetit është dërguar në Qendrën e Mbajtjes prej 48 orësh, për veprat “kanosje” dhe “mbajtja në pronësi, kontroll ose posedim të paautorizuar të armës”. Aktualisht, hetuesit policorë po punojnë për sqarimin dhe zbardhjen e plotë të motiveve dhe rrethanave të ngjarjes.” – thuhet në njoftimin e Policisë, më 21.01.2025.