Policia Rajonale e Ferizajit ka shqiptuar mbi 1 mijë gjoba javën e kaluar, si pjesë e aktiviteteve për parandalim të aksidenteve në komunikacion.
Derisa, janë raportuar 29 aksidente, prej tyre 11 me persona të lënduar dhe 18 me dëme materiale.
“Në kuadër të këtyre aktiviteteve Policia rajonale e Ferizajt gjatë javës që kaloi, nga data 13-19/01/2025 ka shqiptuar 1,009 gjoba kundërvajtëse dhe ka hequr 6 patentë shoferë për drejtuesit që kanë shkaktuar kundërvajtje më të rënda në komunikacionin rrugor.” – thuhet në një komunikatë për media të Policisë.
Policia Rajonale e Ferizajit thekson se do të vazhdojë me aktivitete të shtuara, me synim parandalimin e aksidenteve në komunikacionin rrugor, si dhe u bëri thirrje shoferëve që të bëjnë kujdes në komunikacionin rrugor.
“Ftojmë qytetarët që të bashkëpunojnë më Policinë.” – thekson më tej Policia.
Rreth dy kilogramë marihuanë dhe mbi 70 fishekë të kalibrave të ndryshëm janë gjetur në një shtëpi, në rajonin e Podujevës – njoftoi Policia.
“Në koordinim me Prokurorin është kryer bastisje në shtëpinë dhe objektet përcjellëse pronë e të dyshuarit mashkull kosovar, ku janë gjetur dhe sekuestruar 1.994 kg – substancë e dyshuar narkotike e llojit marihuanë, 75 fishekë kalibrash të ndryshëm, 7 peshore të ndryshme, mbështjellës të ndryshëm të substancave narkotike dhe një radiolidhje.” – bëri të ditur Policia.
Lidhur me rastin, në cilësi të dëshmitarëve, janë intervistuar dy persona.
Tre të arrestuar nën dyshime për marrje ryshfeti dhe mbi 11 mijë euro të sekuestruara është bilanci i aksionit që Drejtoria për Hetimin e Krimeve Ekonomike e zhvilloi sot, më 20.01.2025, në rajonin e Gjakovës.
Sipas Policisë, tre të dyshuarit në periudha të ndryshme kanë kërkuar dhe pranuar ryshfet nga pronarët e bizneseve të ndryshme. Andaj, me këto veprime dyshohet se kanë kryer veprën penale “marrja e ryshfetit’’ – Neni 421 i KPRK-së.
“Policia e Kosovës, në koordinim me Prokurorinë Themelore në Gjakovë, ka ndërmarrë veprime hetimore – duke zbatuar edhe masa të avancuara hetimore, gjatë së cilave janë siguruar dëshmi se tre të dyshuarit meshkuj kosovarë, me qëllim të përfitimit pasuror për vete apo personin tjetër, dyshohet se kanë pranuar ryshfet në shuma të ndryshme parash, në disa raste të ndara. Si dhe, të mira materiale të ndryshme, pa pagesë nga pronarët e bizneseve të ndryshme në Komunën e Gjakovës.” – njoftoi Policia përmes një komunikate për media.
Gjatë aksionit janë sekuestruar para të gatshme dhe dokumente të ndryshme personale.
“Sot, më 20.01.2025, me urdhër nga Gjykata Themelore në Gjakovë, në koordinim me Prokurorin përgjegjës të rastit, janë kontrolluar tri objektet e banimit të personave të dyshuar (dy në Gjakovë dhe një në Pejë), ku janë siguruar prova materiale që ndërlidhen me rastin. Gjatë kontrollit janë sekuestruar dëshmitë, si në vijim: para të gatshme 11600 euro, 4 telefona mobil, 1 IPOD, 1 pasaportë e Republikës se Shqipërisë, 1 letërnjoftim i Republikës së Shqipërisë.” – njoftoi mes të tjerash Policia.
Tre të dyshuarit janë intervistuar në prezencë të avokatit mbrojtës dhe më pas, me Aktvendim të Prokurorit, janë ndaluar për 48 orë.
Dy persona janë arrestuar, për shkak të dyshimit për dhunë në familje, teksa rastet janë regjistruar në Podujevë dhe Pejë.
Sipas Policisë, një person në Podujevë është arrestuar pasi i njëjti dyshohet se ka ushtruar dhunë psikike ndaj viktimës grua. Pas bastisjes, të njëjtit Policia i ka gjetur edhe një armë zjarri.
“Lidhur me rastin në koordinim me Prokurorin është bastisur shtëpia e të dyshuarit, me ç’rast është gjetur dhe konfiskuar: 1 armë zjarri me një karikator dhe 82 fishekë. Pas intervistimit, me vendim të Prokurorit, i dyshuari është dërguar në mbajtje.” – bëri të ditur Policia.
Kurse në Pejë, dyshohet se personi i arrestuar në gjendje të dehur e ka sulmuar fizikisht një grua.
“Si pasojë e sulmit viktima ka pësuar lëndime të lehta trupore për çka dhe i është ofruar tretmani mjekësor. I dyshuari, me vendim të Prokurorit, është dërguar në mbajtje.” – njoftoi Policia.
Një nga reformat që Partia Demokratike e Kosovës ka planifikuar t’i realizojë nëse e merr drejtimin e Qeverisë pas zgjedhjeve të 9 shkurtit, është edhe procesi i Vetting-ut në Policinë e Kosovës.
Kandidati për deputet nga kjo parti, Rashit Qalaj, Vetting-un në Polici e sheh si të domosdoshëm, por assesi si një proces politik.
Ndërsa, për mënyrën se si do të bëhet ky proces, ai thotë, se kjo do të shihet gjatë përgatitjes së dokumenteve.
“Mendoj që është i nevojshëm edhe në sektorin e sigurisë një Vetting i mirëfillt, jo një Vetting politik, por një Vetting që e ndihmon Policinë e Kosovës dhe e ngrit besueshmërinë e qytetarëve. Se si do të bëhet Vetting-u do të shohim gjatë përgatitjes së dokumenteve”- shpjegoi Qalaj.
Si çështje me urgjencë që duhet të trajtohet, sipas tij, është edhe Ligji për Policinë, i cili duhet të ndryshohet dhe plotësohet në aspektin operacional.
“Edhe pse me ligjin aktual shkruhet që Policia e Kosovës në aspektin operacional është e pavarur apo që ministri i Brendshëm nuk përzihet në menaxhimin operacional, duhet në mënyrë decidive të shkruhet që ministrit të Brendshëm dhe politikës i ndalohet përzierja në aspektin operacional”- deklaroi Qalaj në “Debat Përnime”, më 19.01.2025.
“Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 9 shkurtit 2025. Kandidatët për deputetë nga partitë politike garuese, përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashit dhe Visar Prebrezës nga “Krypometër”.
Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.
Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.
Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”.