Ballina

Etiketë: Policia

  • RTS: Petkoviq largohet nga takimi në Bruksel pas aksionit policor kundër strukturave ilegale serbe në Kosovë

    Në Bruksel ishte caktuar që sot, më 15.01.2025, të mbahej takimi i parë i Komisionit të Përbashkët të Kosovës dhe Serbisë për të Pagjeturit.

    Televizioni serb RTS ka raportuar se shefi i delegacionit të Serbisë, Petar Petkoviq është larguar nga takimi, për shkak të zhvillimeve lidhur me aksionin policor kundër strukturave ilegale serbe në Kosovë.

    “Kryenegociatori i Beogradit, Petar Petkoviq i ndërpreu e u largua nga bisedimet në Bruksel për shkak të terrorit të paparë e dhunës institucionale të Prishtinës e Albin Kurtit ndaj serbëve dhe mbylljes së institucioneve të shumta serbe në Kosovë.” – ka thënë delegacioni i Beogradit, më 15.01.2025.

    Ngritja e këtij Komisioni është bërë në bazë të një Marrëveshjeje të arritur vitin e kaluar në kuadër të Dialogut për normalizimin e raporteve mes Kosovës dhe Serbisë, që ndërmjetësohet nga Bashkimi Evropian, për zbatimin e Deklaratës për Personat e Zhdukur.

    Në takim, delegacioni i Kosovës do të udhëhiqet nga Halil Cenaj – bëri të ditur kryetari i Komisionit qeveritar për Personat e Zhdukur, Andin Hoti.

    https://kallxo.com/lajm/aksioni-policor-ne-disa-komuna-deklarohen-ministrat-krasniqi-dhe-svecla-video/

    “Ka përfunduar epoka e Komunave dhe institucioneve paralele e kriminale të Serbisë në Kosovë.” – kanë deklaruar ministri i Punëve të Brendshme, Xhelal Sveçla dhe ai i Administrimit të Pushtetit Lokal, Elbert Krasniqi.

    Deklarata e tyre vjen pas aksionit policor në disa Komuna të vendit kundër strukturave ilegale serbe.

    Aksioni u zhvillua edhe në bashkëpunim me Ministrinë e Industrisë, Ndërmarrësisë dhe Tregtisë (MINT).

    Sveçla ka thënë se të mërkurën, më 15.01.2025, janë mbyllur Komunat paralele të Serbisë në: Lipjan, Obiliq, Prishtinë, Fushë Kosovë, Vushtrri, Novobërdë, Kamenicë, Viti, Rahovec, Skenderaj, si dhe Posta e Zyra Tatimore ilegale.

  • Detaje nga vjedhja e rreth 3 kg ari në një Argjendari në Prizren, dyshohet se u këput kabllo e kamerave të sigurisë

    Rreth 3 kilogramë ari dyshohet se janë vjedhur nga argjendaria “Gold 2000” në Prizren. Pronarët thanë për KALLXO.COM se për vjedhjen kanë kuptuar më 13.01.2024, kur kishin shkuar për ta hapur lokalin.

    “E kemi kuptu të hënën kur kemi shku me e hap lokalin. Dera nuk është dëmtuar, vetëm alarmi. Sasia e arit besohet se është rreth 3 kilogramë.” – thanë pronarët e kësaj Argjendarie për KALLXO.com, më 14.01.2025.

    Teksa zëdhënësi i Policisë së Kosovës për rajonin e Prizrenit, Vesel Gashi ka deklaruar se nga hetimet e para del se personi i panjohur ka arritur të depërtojë në lokal, pa e dëmtuar derën e hyrjes. Po ashtu, ai ka shtuar se i dyshuari ka dëmtuar një kabllo, e cila ka ndërprerë kamerat e sigurisë dhe më pas ka kryer grabitjen.

    “Dhe nga seti ka arritur të tërheqë gjësende të arit dhe argjendit, ku sipas pronarit besohet se është tërhequr një vlerë e konsideruar e gjësendeve.” – theksoi Vesel Gashi për KALLXO.com.

    Vjedhjen e Argjendarisë në rrugën “Adem Jashari” në Prizren, Policia e Kosovës e ka evidentuar edhe në Raportin 24-orësh, si “vjedhje e rëndë”.

    “Ankuesi mashkull kosovar ka raportuar se persona të panjohur në lokalin e tij kanë vjedhur stoli ari dhe argjendi. Lidhur me rastin është informuar edhe Prokurori, ndërsa njësitet policore kanë dalë në vendin e ngjarjes dhe janë duke hetuar rastin.” – thuhet në Raportin policor të datës 14.01.2025.

     

  • Një i arrestuar e dy të intervistuar për “dhunë në familje” në 24 orët e fundit

    Policia e Kosovës ka bërë të ditur se tri raste të dhunës në familje dhe një rast i kanosjes janë raportuar në 24 orët e fundit.

    Sipas Policisë, një person është dërguar në mbajtje dhe dy të tjerë janë liruar me procedurë të rregullt pas intervistimit.

    Këto raste të dhunës, sipas Policisë, kanë ndodhur në Lipjan, Fushë Kosovë, Ferizaj dhe Pejë.

    Në Ferizaj, Policia njoftoi se është arrestuar një person, pasi nën ndikimin e alkoolit e kishte sulmuar fizikisht të dashurën e tij, shtetase e huaj.

    “ Me vendim të Prokurorit, i dyshuari është dërguar në mbajtje, ndërsa viktima është dërguar në strehimore.” – bëri të ditur Policia.

    Në një rast tjetër në Fushë Kosovë, Policia tha se një grua ka pësuar lëndime pas një mosmarrëveshjeje që kishte me të dyshuarin.

    “Viktimës i është ofruar tretman mjekësor, përderisa lidhur me rastin është informuar edhe Prokurori, ndërsa njësitet policore janë duke hetuar rastin.” – njoftoi Policia.

    Kurse në Pejë, sipas Policisë, një grua kishte raportuar se ishte sulmuar fizikisht nga një burrë. Sipas Policisë i dyshuari pas intervistimit, në konsultim me Prokurorin, është liruar me procedurë të rregullt.

    Ndërkaq, në Lipjan një grua ka raportuar se ajo dhe bashkëshorti i saj janë kanosur nga një i dyshuar.

    Lidhur me rastin, Policia ka intervistuar të dyshuarin dhe i njëjti në konsultim me Prokurorin është liruar.

  • Arrestohen dy të dyshuar për vrasje në tentativë

    Dy persona janë arrestuar nga Policia e Kosovës në Prishtinë nën dyshimet për vrasjen në tentativë e cila kishte ndodhur më 01.01.2025.
    “Janë arrestuar dy persona të dyshuar për rastin vrasje në tentativë të ndodhur më datë 01.01.2025, rreth orës 03:00, në parkingun e një biznesi, në rrugën magjistrale Prishtinë – Ferizaj”- kështu ka njoftuar policia në njoftim për media.
    Sipas Policisë arrestimi i të dyshuarve E. H., mashkull, 19 vjeç, shtetas i Republikës së Kosovës, si dhe B. H., mashkull, 19 vjeç, shtetas i Republikës së Kosovës, erdhi si rezultat i ndërmarrjes së veprimeve të specializuara operativo-policore, në kuadrin e procesit hetimor të këtij rasti.
    “Përderisa policia po punon në mënyrë aktive për zbardhjen e plotë të rrethanave të ngjarjes, ndaj të dyshuarve me autorizimin e prokurorit të shtetit është iniciuar hetim në drejtim të veprës penale “Vrasja në Tentativë”. Të njëjtit me aktvendim mbi ndalimin e personit të dyshuar të nxjerrë nga ana e prokurorit të shtetit u dërguan në qendrën e mbajtjes prej 48 orësh”- thuhet në njoftim.

  • Prizren, policia arreston një burrë për dhunë në familje

    Policia e Kosovës ka arrestuar një person për dhunë në familje, të premten më 10.01.2025.

    Sipas njoftimit, të njëjtit i është konfiskuar edhe një revole.

    “Pas raportimit se i dyshuari mashkull  kosovar (bashkëshorti) ka ushtruar dhunë psikike dhe fizike ndaj viktimës femër kosovare (bashkëshortes). Viktima ka pranuar tretman mjekësor ndërsa nga i dyshuari është konfiskuar një pistoletë me 24 copë fishekë  për të cilën kishte leje. Palët janë intervistuar dhe me vendim të prokurorit  i dyshuari është arrestuar dhe dërguar në mbajtje  për 48 orë” – thuhet në njoftim.