Ballina

Etiketë: Policia

  • Ende nuk dihet çka e shkaktoi zjarrin e mbrëmshëm në lagjen ‘Kalabria’ – VIDEO

    Mbrëmjen e së enjtes më 16.01.2025, Haki Shala ishte duke qëndruar në banesën e tij në lagjen “Kalabria” të Prishtinës. Qetësinë ia prishi një trokitje e fuqishme, teksa kur hapi derën, thotë se e pa tmerrin me sy.

    “Jemi kanë t`u nejtë edhe t`u këqyrë TV. E kam dëgjuar një krismë të madhe në derë. Mendova mos është dikush i dehur a i çmendur. Kur e kam hapë derën, s’kam pa asgjë prej tymi. Ndoshta edhe personi që ka trokitur në derë ka qenë aty, por nga tymi nuk e kam pa. Kemi dalë, nuk e kemi ditë nëse po digjet një banesë apo diçka tjetër”- tha Haki Shala për KALLXO.com.

    Vetëm pasi kanë zbritur, banorët e kanë kuptuar se po digjen veturat në garazhin nëntokësor.

    “Pasi kemi zbrit poshtë, e kemi marrë një informatë se po digjet një veturë në garazhin e përbashkët, është shumë e madhe. Ka qenë e tmerrshme, se nuk e kemi ditë çka po ndodhë. Ka pasur raste kur njësia speciale mbi njëri-tjetrin i kanë nxjerrë banorët nga tymi”- shtoi mes tjerash Shala.

    Nga tymi që depërtoi në të gjitha katet, 13 persona kërkuan ndihmë mjekësore. Drejtori i Klinikes Emergjente Naser Syla, konfirmoi për KALLXO.com se të gjithë janë liruar për në shtëpi.

    Tymi u shkaktua nga djegia e dy veturave në garazhin nëntokësor, teksa si pasojë e temperaturës së lartë, janë dëmtuar edhe disa vetura të tjera.

    Veturat e djegura kishin targa kosovare, kurse në kushte anonimiteti, banorët thanë se pronari i njërës prej automjeteve nuk jeton në Kosovë.

    Si pasojë e zjarrit, janë djegur edhe kabllot elektrike, derisa dy ndërtesat të cilat garazhin ku shpërtheu zjarri, e kishin të përbashkët kanë mbetur pa energji elektrike. Ekipet e KEDS-it gjatë ditës u panë duke i vlerësuar dëmet.

    Zjarri dëmtoi edhe gypat e kanalizimit, teksa ujërat e zeza po derdhen në garazhin nëntokësor.

    Hetuesit policor mëngjesin e së premtes, për gati dy orë kanë qëndruar në vendin e ngjarjes duke kryer ekzaminimet e nevojshme. Ata janë përkujdesur që të marrin edhe filmime nga kamerat e sigurisë të lokaleve përreth.

    Megjithatë, Policia nuk dha detaje duke shtuar se duhet pritur përfundimin e hetimeve për të dalë me një përgjigje.

    Në intervenim, përveç zjarrfikësve të Prishtinës, asistuan edhe zjarrfikës nga komunat e tjera, teksa informata erdhi në orën 18:11.

    Komandanti i zjarrfikësve të Prishtinës, Mal Gashi tha për KALLXO.com se asnjë zjarrfikës nuk është lënduar, duke shtuar se intervenimin e bëri të vështirë fakti se në fillim nuk dihej saktë se çka ishte duke u djegur.

    “Informata është marrë se po digjet një veturë. Në parim kjo nuk nënkupton nevojën për intervenim të përmasave të mëdha. Por, kur ekipet kanë qenë këtu, e kanë pa që bëhet fjalë për një zjarr që nuk ishte i identifikuar sepse ka qenë tym tepër i dendur t’u dalë prapa. Ekipet kanë intervenu menjëherë, por problemi ka qenë se paniku ka qenë tepër i madh dhe i panevojshëm. Nuk i fajësoj shumë sepse ata nuk kanë njohuri”- tha Gashi.

    Gashi, mes tjerash apeloi që në këto raste, e vetmja uniformë që banorët duhet ta dëgjojnë, është ajo e zjarrfikësve.

    https://kallxo.com/lajm/zjarri-ne-objektin-banesor-ne-prishtine-policia-13-personave-u-eshte-ofruar-tretman-mjekesor/

  • Policia po kryen hetime për zjarrin e mbrëmshëm në “Kalabri”

    Dy vetura të djegura tërësisht dhe katër të tjera të dëmtuara, është bilanci i zjarrit që shpërtheu në një garazh nëntokësor në lagjen “Kalabria” të Prishtinës, rreth orës 18:00 të enjten.

    KALLXO.com ka qëndruar në vendin e ngjarjes, ku përveç veturave janë dëmtuar edhe kabllot elektrike dhe për pasojë dy ndërtesa kanë mbetur pa rrymë.

    Hetuesit policor për gati dy orë kanë qëndruar në vendin ku janë djegur veturat për të kryer ekzaminimet e nevojshme, teksa rasti është duke u hetuar. Policia ka marrë edhe pamje nga kamerat në lokalet afër vendit të ngjarjes. Megjithatë, Policia nuk dha detaje duke shtuar se duhet pritur përfundimin e hetimeve për të dalë me një përgjigje.

    Banorët të cilët folën për KALLXO.com, ngjarjen e përshkruan si të tmerrshme.

    “Jemi kanë t`u nejtë edhe t`u këqyrë TV. E kam dëgjuar një krismë të madhe në derë. Mendova mos është dikush i dehur a i çmendur. Kur e kam hapë derën, s’kam pa asgjë prej tymi. Ndoshta edhe personi që ka trokitur në derë ka qenë aty, por nga tymi nuk e kam pa. Kemi dalë, nuk e kemi ditë nëse po digjet një banesë apo diçka tjetër. Pasi kemi zbrit poshtë, e kemi marrë një informatë se po digjet një veturë në garazhin e përbashkët, është shumë e madhe. Ka qenë e tmerrshme, se nuk e kemi ditë çka po ndodhë. Ka pasur raste kur njësia speciale mbi njëri-tjetrin i kanë nxjerrë banorët nga tymi”- tha Haki Shala, banor i ndërtesës ku u dogjën veturat.

    Ndërkohë, për shkak të ekspozimit në tym, 13 persona kishin kërkuar ndihmë mjekësore në Qendrën Klinike Universitare. Drejtori i Klinikes Emergjente, Naser Syla, konfirmoi për KALLXO.com se të gjithë janë liruar për në shtëpi.

    https://kallxo.com/lajm/zjarri-ne-objektin-banesor-ne-prishtine-policia-13-personave-u-eshte-ofruar-tretman-mjekesor/

  • Tre gra viktima të dhunës në familje, arrestohen tre burra

    Tre raste të dhunës në familje ku viktimat janë gra u raportuan gjatë datës 15.01.2025.

    Në Lipjan u arrestua një burrë, nën dyshimin se kishte ushtruar dhunë ndaj bashkëshortes së tij.

    Sipas Policisë, viktima ka pranuar trajtim mjekësor, ndërsa i dyshuari pas intervistimit me vendim të Prokurorit është dërguar në mbajtje.

    Në Kryeqytet po ashtu u arrestua një burrë nën dyshimin se pas një mosmarrëveshjeje sulmoi fizikisht bashkëshorten e tij.

    Policia bën të ditur se viktima ka pranuar tretman mjekësor. Derisa, me vendim të Prokurorit rasti ka shkuar në procedurë të rregullt.

    Edhe në Istog u arrestua një burrë, pasi kishte sulmuar fizikisht bashkëshorten e tij.

    Sipas Raportit policor, viktima ka pranuar trajtim mjekësor, ndërsa i dyshuari pas intervistimit, me vendim të Prokurorit, është dërguar në mbajtje.

  • Aeroporti i Prishtinës -Dy persona tentojnë të udhëtojnë për në Vjenë me lejeqëndrim që dyshohet të jetë i falsifikuar

    Një burrë dhe një grua dyshohen se tentuan të udhëtojnë nga Aeroporti Ndërkombëtar i Prishtinës “Adem Jashari” për në Vjenë, me lejeqëndrim të një shteti tjetër, që dyshohet të jetë i falsifikuar.

    Policia e Kosovës bën të ditur se burri është dërguar në mbajtje, derisa gruaja së bashku më një fëmijë është dërguar në Qendrën për Punë Sociale.

    Rasti ka ndodhur më 15.01.2025.

    “Raportohet se të dyshuarit: një mashkull dhe një femër me shtetësi të huaj kanë tentuar që të fluturojnë nga Aeroporti i Prishtinës për në Vjenë – duke prezentuar lejeqëndrim të një shteti tjetër, që dyshohet të jetë i falsifikuar. Me vendim të Prokurorit, i dyshuari mashkull është dërguar në mbajtje, ndërsa e dyshuara femër së bashku me fëmijë në Qendrën për Punë Sociale.” – thuhet në Raportin policor.

    Rasti po trajtohet si “falsifikim i dokumentit”.

  • Pse ndërkombëtarët kritikuan aksionin e mbylljes së strukturave paralele serbe nga Policia e Kosovës?

    Xhafer Ymeri nga Podujeva, të mërkurën, më 15.01.2025, erdhi në Graçanicë për të marrë shërbime në Postën e Serbisë. Por, ai u kthye prapa pa kryer punë, meqë autoritetet kosovare e mbyllen postën për të cilën pretendojnë që është ilegale.

    Ymeri, i cili foli për KALLXO.com, ka frikë se vërtetimin që është gjallë nuk do të arrijë ta dërgojë në Beograd, në mënyrë që të vazhdojë ta marrë pensionin.

    “Jam ardhë me u lajmëru që jam gjallë, se i marrin ata vërtetimat e dua me i çu për Beograd. Për qata kam ardhë. Pardje u kanë ‘zavodi’ mshelë, dje u kanë mshelë, sot mshelë. Çka është kjo punë nuk e di, na vërtetimet mos me i çu kena me mbetë pa pensione. Jemi kanë punëtor të Beogradit, tash ku me u drejtu s’e di” – tha Xhafer Ymeri për KALLXO.com.

    Kurse, drejtori i Postës, Ivan Millojeviq, tha se qëllimi i autoriteteve kosovare është që tema e postës të largohet nga bisedimet në Bruksel.

    “Policia erdhi për të mbyllur Postën, duke thënë se është gjë e përkohshme derisa të aplikojmë për licencë. Por mua këtu asgjë s’më duket e përkohshme, as qëllimi i përkohshëm. Sikurse në veri ashtu edhe në jug qëllimi është tjetër, të heqin postën nga bisedimet në Bruksel, sepse atje po diskutohet për këtë. Këtë e di Kurti por s’ka nevojë para zgjedhjeve të bëj filma. Filma sikurse që bënte represion me Policinë ndaj popullit serb. Kjo fushatë është negative dhe them se do t’i ‘thyhet për koke’”-tha Millojeviq pas aksionit të Policisë.

    Po në Graçanicë, 200 metra larg objektit të Postës, Policia e mbylli edhe Autoritetin e Përkohshëm Komunal të Prishtinës. Kurse në fshatin Lepi, mbylli objektin që shërbente si zyrë komunale për banorët e Lipjanit.

    Përveç në Graçanicë, autoritetet kosovare mbyllën edhe disa organe komunale serbe, zyra postare dhe të Administratës Tatimore të Serbisë, në dhjetë komuna të Kosovës, pas një aksioni të gjerë më 15.01.2025.

    Aksionet policore u zhvilluan në komunën e Lipjanit, Obiliqit, Prishtinës, Fushë-Kosovës, Vushtrrisë, Novobërdës, Kamenicës, Vitisë, Rahovecit dhe Skenderajt.

    Megjithatë, aksioni në rajonin e Prishtinës u krye pa autorizimin e Prokurorisë.

    Prokuroria Themelore e Prishtinës njoftoi se nuk është ofruar asnjë provë për të krijuar dyshimin e bazuar për kryerjen e ndonjë vepre penale.

    “Prokurori i shtetit sqaron opinionin publik se nuk ka autorizuar kryerjen e kontrollit apo bastisjes në këto lokacione, për shkak se nuk ka pasur ndonjë kërkesë zyrtare me shkrim për kryerjen e këtij aksioni nga ana e institucioneve gjegjëse, për çka edhe nuk është ofruar kurrfarë prove para prokurorit të shtetit për tu krijuar dyshimi i bazuar se është duke u kryer ndonjë vepër penale që bie nën kompetencën e Prokurorisë Themelore në Prishtinë”-tha Prokuroria përmes një komunikate.

    https://kallxo.com/lajm/policia-per-aksionin-ndaj-strukturave-paralele-thote-se-nderpreu-aktivitetet-e-disa-institucioneve-te-jashteligjshme/

    Për bastisjet, autorizim nuk ka lëshuar as Prokuroria Themelore e Mitrovicës, teksa zëdhënësi Valon Preteni për KALLXO.com tha se po presin për kërkesë.

    “Prokurori kujdestar vetëm është njoftuar nga Policia, por kërkesë nuk ka pasur. Pritet që kërkesa të bëhet e pastaj të vendoset më tutje”- bëri të ditur Preteni.

    Ndërkohë, Policia përmes një komunikate tha se aksioni kishte qellim ndërprerjen e aktiviteteve të disa institucioneve të jashtëligjshme.

    “Policia e Kosovës me njësitë e saja relevante, sot në orët e hershme të mëngjesit, në bashkëpunim dhe koordinim me institucionet përkatëse të Republikës së Kosovës, ka realizuar një operacion të gjerë policor, operacion ky i shtrirë në disa rajone të Kosovës: DRP Prishtinë, DRP Gjilan, DRP Gjakovë dhe DRP Mitrovicë Jugu, për ndërprerjen e aktiviteteve të disa institucioneve të jashtëligjshme që vepronin si komuna, posta, banka, etj., të cilat ofronin shërbime të jashtëligjshme, kundër rendit kushtetues dhe ligjeve pozitive të Republikës së Kosovës”- tha Policia përmes komunikatës.

    KALLXO.com i ka dërguar pyetje Ministrisë së Punëve të Brendshme, por deri në publikimin e shkrimit nuk mori përgjigje.

    Ambasada e SHBA-së në Kosovë ka reaguar duke vlerësuar se veprimet e Qeverisë së Kosovës për mbylljen e institucioneve të drejtuara nga Serbia “dobësojnë besimin në marrëdhënie dhe kufizojnë aftësinë tonë për të ndihmuar Kosovën të sigurojë të ardhmen më të mirë dhe më të ndritshme për të gjithë njerëzit e saj”

    https://kallxo.com/lajm/mbyllja-e-strukturave-ilegale-ambasada-amerikane-thote-se-keto-veprime-e-dobesojne-besimin/

    Për aksionin e së mërkurës ka reaguar edhe Bashkimi Europian, duke përmendur faktin se mbyllja e strukturave të mbështetura nga Serbia, u bë në mes të fushatës zgjedhore për zgjedhjet parlamentare të 09.02.2025, dhe “veprimet bien ndesh me detyrimet e Kosovës ndaj Bashkimit Europian në kuadër të procesit të normalizimit”.

    https://kallxo.com/lajm/be-thote-se-qeveria-mbylli-strukturat-ilegale-ne-mes-te-fushates-ia-permend-edhe-masat/

    Sipas BE-së, statusi i strukturave të mbështetura nga Serbia parashikohet të zgjidhet përmes dialogut të lehtësuar nga BE-ja.

    Ndër të tjera janë përmendur edhe masat ndaj Kosovës, duke shtuar se këto veprime të Kosovës janë të pafavorshme për t’ia hequr masat.

    Në një video të publikuar në rrjete sociale, ministri i Brendshëm Xhelal Sveçla tha se “me aksionin e përbashkët, përfundon epoka e komunave dhe institucioneve paralele e kriminale të Serbisë në Republikën e Kosovës”.

    Në videon e publikuar u pa edhe ministri i Administrimit të Pushtetit Lokal, Elbert Krasniqi, teksa shtoi se “nga sot, 28 komunat paralele, kriminale të Serbisë në Kosovë dhe pesë qarqet e tyre mbyllen përfundimisht”.