Ballina

Etiketë: Podujevë

  • Dhunë në familje në Prishtinë e Podujevë, arrestohet një person

    Policia e Kosovës ka njoftuar për dy raste të dhunës në familje në Rajonin e Prishtinës.

    Më 29.01.2025, një patrullë e Policisë hasi në një automjet në Podujevë, ku një çift ishte duke u përleshur fizikisht. Të njëjtit sipas forcave të rendit janë dërguar në Emergjencë, për trajtim mjekësor.

    “Njësiti policor derisa ka qenë duke patrulluar, ka hasur në një automjet të ndalur, ku çifti që ishin në automjet ishin duke u rrahur mes vete.” – njofton Policia.

    Palët janë dërguar në Emergjencë, kanë marrë tretman mjekësor dhe pas konsultimit me Prokurorin janë liruar në procedurë të rregullt.

    Ndërsa, në një rast tjetër në Prishtinë, një burrë dyshohet se ka sulmuar fizikisht gruan me të cilën bashkëjetonte.

    “E njëjta pas intervistimit me dëshirë ishte kthyer në shtëpinë e prindërve të saj, së bashku me fëmijën e saj, ndërsa i dyshuari gjendet në arrati.” – thuhet në njoftim.

  • I gjendet marihuanë në shtëpi – arrestohet një person në Podujevë

    Në Podujevë janë sekuestruar substanca narkotike, në rrugën ‘Skënderbeu’.

    Sipas Policisë Rajonale të Prishtinës, më 26.01.2025 u arrestua një person në shtëpinë e të cilit u gjetën 132.89 gramë marihuanë dhe një peshore.

    Personi i arrestuar, me vendim të prokurorit është dërguar në mbajtje kurse peshorja dhe substanca e dyshuar të jetë marihuanë janë sekuestruar.

    Marihuane, Podujeve, 26.01.2025, foto: PK

  • Unifikimi i Trafikut Urban nga komuna e Prishtinës, protestojnë kompani të Podujevës

    Pjesëtarë të shoqatës së autobusëve ‘Llapi’ të linjës Podujevë-Prishtinë po protesojnë në shenjë pakënaqësie ndaj vendimit të komunës së Prishtinës për sistem të unifikuar të trafikut urban, përfshirë operatorët privat që lidhin fshatra të komunës.

    Sipas tyre, ky vendim i komunës i dëmton ekonomikisht.

    Si shenjë proteste, pronarët e autobusëve të linjës Podujevë-Prishtinë nuk i kanë lejuar të qarkullojnë autobusët që janë të komunës së Prishtinës.

    Pronari i kompanisë ‘Besart Lines’ që mban linjën 15 Prishtinë-Sharban, e cila ka lidhur marrëveshje me komunën e Prishtinës, thotë se kompanive të Podujevës i’u bën konkurrencë çmimi i biletës kthyese 80 cent.

    “I dëmton Podujevën sepse Prishtina e ka bërë 80 cent biletën kthyese, e nuk hip manej askush me ta. Neve na paguan me kontratë komuna, ata biletën deri në Llugjan e kanë 80 cent, këtu është problemi. Dihet se ka konkurrencë, kjo është marrëveshje e komunës me BERZH”- tha Salih Asllani.

    “Linjat e Podujevës janë në vijë të Ministrisë, ne jemi me komunë. Podujeva është e vetmja që kanë hyrë deri në qytet, tash nuk i lejojnë”- shtoi tutje ai.

    Nga 02.01.2025 qytetarët e Kryeqytetit kanë sistem të unifikuar të transportit publik urban, me bileta të integruara ditore, javore dhe mujore për të gjitha linjat, përfshirë operatorët privatë që po ashtu operinë sipas këtyre kushteve.

    Çmimet e biletave sipas këtij vendimi që aplikohen edhe në linja që lidhin fshatrat me qytetin janë si në vijim:

    • 0.50 cent për një udhëtim të vetëm.
    • 0.80 cent për biletën ditore (vlefshme për të gjitha linjat).
    • 4 euro për biletën javore.
    • 12 euro për biletën mujore për studentë.
    • 13,50 euro për biletën mujore për qytetarë.

    Një biletë e tillë mund të përdoret brenda 12 orëve në secilën linjë të trafikut urban.

    Kallxo.com ka kërkuar deklarim edhe nga Komuna e Prishtinës si dhe përfaqësues të Trafikut Urban, por deri në publikim të këtij lajmi nuk është dhënë përgjigje.

  • Kurti: Rruga Podujevë – Prishtinë përfundon në pranverë

    Kandidati për kryeministër i Lëvizjes Vetëvendosje, Albin Kurti, ka mbajtur tubim elektoral në qytetin e Podujevës më 15.01.2025.

    Ai ka thënë se Qeveria e tij ndihmon kategoritë shoqërore e jo individë të veçantë, duke theksuar subvencionet për bujqit, grantet, armatimin për ushtrinë e të tjera.

    Kurti dha një afat kohor edhe për përfundimin e punimeve në rrugën Podujevë – Prishtinë.

    “Rruga Podujevë – Prishtinë përfundon në pranverën 2025. Kësaj pritjeje të gjatë po i vjen fundi sepse Qeveria jonë e mirë ka punuar edhe me problemet në mangësitë në shpronësime edhe me projektimet e këqija. Rruga kryhet përgjithmonë në pranverën e sivjetshme”- u shpreh Kurti.

    Ndërsa, edhe gjatë këtij tubimi Kurti ka përmendur e kritikuar partitë opozitare në Kosovë.

    “Partitë e tjera nuk janë në tokë të bukës. Me qeverinë tonë, në sofrën tonë e kemi bukën tonë. Rekord të mbjelljeve e të korrjeve në vitin 2024. Pasha bukën me neve edhe mbrapsht me qitë mbarë po del”- ka thënë ai.

    “Kjo është qeveria që kujdeset për qytetarin. Pagat do të rriten serish nga korriku me 55 euro të gjitha kategorive. Kur kemi ardhë ne në qeverisje raporti mes pagës me të lartë dhe më të ulët ka qenë 20 me 1. Me qeverisjen tonë raporti ndërmjet pagës me të lartë dhe më të ulët në administratë bjen në 4 me 1” – shtoi Kurti.

    I pranishëm në tubim ka qenë edhe kryetari i kësaj Komune, Shpejtim Bulliqi, i cili ka falënderuar të pranishmit për pjesëmarrjen duke thënë se Llapi “ia ka pa hairin” Qeverisë Kurti.

    “Ky është vetëm fillimi, me qeverisjen e Kurtit në mandatin e ri do të realizojmë shumë projekte madhore duke filluar me impiantin e ujërave të zeza, e të tjera që do lënë gjurmë historike për komunën tonë”- u shpreh ai.

    Kurti më 15.01.2025 ka mbajtur tubim edhe me qytetarët e Fushë-Kosovës.

    Ai ka theksuar se gjatë këtyre katër viteve si Qeveri i kanë shtuar vendit zhvillimin ekonomik, sigurinë, kujdesin social dhe kanë shtrirë sovranitetin në tërë territorin e Republikës së Kosovës.

    “Kurti përmendi në detaje të arriturat dhe kujdesin shtetëror ndaj qytetarëve, duke theksuar se nuk ka pasur familje që nuk e ka ndjerë dorën ndihmëse të shtetit gjatë mandatit të tij”- thuhet në njoftim.

    Ndërsa u ka bërë thirrje qytetarëve ta mbërrijnë numrin e 500 mijë votave anembanë Kosovës.

    Përmes një njoftimi në Facebook, Kurti ka njoftuar se më 14.01.2025 ka qëndruar në Han të Elezit, prej ku ka kërkuar 500 mijë vota për LVV-në.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Gjashtë raste ‘armëmbajtje pa leje’ të trajtuara në Polici, prej tyre katër të arrestuar

    Gjashtë raste të trajtuara si “armëmbajtje pa leje” janë regjistruar në Raportin e Policisë së Kosovës, gjatë 24 orëve të fundit. Prej këtyre rasteve, katër persona kanë përfunduar të arrestuar.

    Në Podujevë, Policia ka arrestuar një të dyshuar, pasi kishte ekspozuar në rrjete sociale një fotografi me armë.

    Sipas njoftimit të Policisë rasti ka ndodhur më 31.12.2024, kurse i dyshuari është arrestuar më 14.01.2025.

    “Gjatë kontrollit në shtëpinë e të dyshuarit është sekuestruar një pushkë me karikator pa fishekë. I dyshuari pas intervistimit, me vendim të Prokurorit, është liruar në procedurë të rregullt.” – njofton Policia, më 15.01.2025.

    Policia në Fushë Kosovë është informuar se një person posedon dy thika. Rasti ka ndodhur më 14.01.2025, rreth orës 15:45.

    Policia thotë se palët janë intervistuar dhe, me vendim të Prokurorit, janë liruar në procedurë të rregullt.

    Kurse, në Graçanicë Policia ka gjetur dhe konfiskuar një pistoletë me pesë copë fishekë në automjetin e një të dyshuari. Sipas Policisë, rasti ka ndodhur më 14.01.2025, rreth orës 13:20.

    “I dyshuari është intervistuar dhe, me vendim të Prokurorit, është arrestuar dhe dërguar në mbajtje. Rasti nën hetime.” – ka njoftuar Policia.

    Në Pejë, pas disa të shtënave me armë zjarri një i dyshuar është vërejtur në ballkon të banesës kolektive, duke ekspozuar armën.

    Ky rast ka ndodhur më 14.01.2025, rreth orës 21:42. I dyshuari – sipas Policisë – në fillim ka refuzuar t’u bindet urdhrave të policëve dhe u është drejtuar me kanosje.

    “Më vonë i njëjti është qetësuar dhe arrestuar. Gjatë kontrollit në banesën e tij janë gjetur dhe konfiskuar: 1 (një) pushkë automatike, 1 (një) pistoletë, 2 (dy) karikatorë, 71 (shtatëdhjetë e një) copë fishekë, 5 (pesë) gëzhoja dhe një thikë-bajonetë.” – ka thënë Policia.

    Pasi është intervistuar nga Policia, i dyshuari, me vendim të Prokurorit, është dërguar në mbajtje, ndërsa rasti është trajtuar si ‘armëmbajtje pa leje’ dhe ‘përdorim i armës’.

    Në Gjakovë, në veturën e një të dyshuari Policia ka gjetur dhe konfiskuar një sprej.

    Sipas Policisë, rasti ka ndodhur në rrugën “Gasper Karaqi”, më 14.01.2025, rreth orës 18:40.

    Policia e ka intervistuar të dyshuarin dhe, me vendim të Prokurorit, e ka liruar në procedurë të rregullt, kurse rasti është trajtuar si ‘armëmbajtje pa leje’.

    Për një rast tjetër që ka ndodhur në Prishtinë, më 03.09.2024, Policia ka njoftuar se i dyshuari është vetëdorëzuar dhe e ka dorëzuar edhe pistoletën me të cilën dyshohet se është kryer vepra.

    “I dyshuari pas intervistimit në prani të avokatit, me vendim të Prokurorit është dërguar në mbajtje.” – ka thënë Policia.