Ballina

Etiketë: përparim rama

  • Gjoba digjitale të trafikut në Prishtinë, Rama nënshkruan Marrëveshje me Policinë e Postën

    Në kuadër të modernizimit të Kryeqytetit, kryetari i Prishtinës Përparim Rama nënshkroi Marrëveshje me Policinë dhe Postën e Kosovës për Gjoba digjitale të trafikut.

    Rama theksoi se ky është hap i rëndësishëm për sigurinë dhe rregullin në trafik.

    “Sot nënshkruam Marrëveshjen për gjobat digjitale të trafikut me Policinë e Kosovës dhe Postën e Kosovës. Një hap i rëndësishëm për sigurinë dhe rregullin në Kryeqytet – duke modernizuar mbikëqyrjen e rregullimin dhe duke minimizuar kundërvajtjet në trafik.” – shkroi Rama në Facebook.

    I pari i Prishtinës, më tej, shtoi se “Kryeqyteti po shkon me hapa të shpejtë drejt modernizimit”.

    Si pjesë e angazhimit për një Qytet të Mençur (Smart City), muaj më parë Kryeqyteti nisi vendosjen e shtyllave informuese, që tregojnë vendet e lira të parkimit, temperaturën, cilësinë e ajrit e informacione të tjera.

  • Ministri Murati i reagon Ramës: Në vend se të gjesh fajtorin, kryej punët që u ke premtuar qytetarëve 

    Ministri i Financave Hekuran Murati, ka publikuar një grafikon, për çka pretendon se Qeveria i ka dhënë mbështje buxhetore Komunës së Prishtinës për vite me radhë. 

    Në këtë mënyrë, ai ka kritikuar qeverisjen e kryetarit të kësaj komune, Përparim Ramës se po mbyll vitin me suficit.

    Reagimi i Muratit vie pas akuzave të kryetarit të Prishtinës se Qeveria e Kosovës, nuk ka mbështetur dhe ka bllokuar disa projekte në kryeqytet.

    Në anën tjetër, Ministri Murati, përmes një postimi në rrjetin social në Facebook, ka thënë se në tri vitet e fundit ka  rritje të theksuar të mbështetjes me buxhet nga Qeveria.

    “Por ç’e do këtë rritje kur Komuna e Prishtinës në vazhdimësi e mbyll vitin me suficit, sepse nuk arrin të implementojë buxhetin që vet e harton. Në vitin që sapo lamë pas, suficiti (buxheti i pashpenzuar) i Komunës së Prishtinës rezulton mbi 33 milionë euro”- ka shkruar Murati, sot më 09.01.2025. 

    Tutje, Murati është shprehur se kryetari Rama, në vend se të kërkoj fajtorin për zvarritjen e punëve në kryeqytet, t’i mbajë premtimet e dhëna. 

    “Andaj, Kryetari i Komunës Rama, në vend se të kërkojë fajtorin gjetiu, bën mirë që të përqëndrohet në kryerjen e punëve për të cilat u ka premtuar qytetarëve”- ka shkruar ministri Murati. 

    Kryetari i kryeqytetit, Përparim Rama në këtë fillimvit të ri renditi, në një konferencë për media, sfidat që i ka pasur qeverisja e tij gjatë vitit të kaluar, në realizimin e projekteve që sipas tij kontribuojnë në transformimin e Prishtinës.Për ‘sfidat dhe ngecjet’ në projekte, Rama fajin ia hodhi Qeverisë Kurti duke nisur nga projekti i Unazës së Jashtme dhe projekti i organizimit të Lojërave Mesdhetare 2030, për të cilat Prishtina është nikoqire.

    https://kallxo.com/lajm/perparim-rama-me-kritika-ndaj-qeverise-rendit-projektet-qe-kane-ngecur-video/

  • Hulumtimi i KALLXO ‘Oborri i Devollit’ – Rama: Nuk jam në dijeni që ka diçka jashtëligjore

    Përparim Rama, kryetari i Prishtinës, ka thënë se nuk është në dijeni se ka diçka jashtëligjore sa i përket lejeve që janë lëshuar nga Drejtoria e Urbanizmit për Zgjerimin e Qendrës Tregtare “Central Park”, që gjendet në Zonën Industriale të Prishtinës, ku ka aksione edhe biznesmeni Blerim Devolli.

    Më 28.12.2024, KALLXO.com ka publikuar hulumtimin ‘Oborri i Devollit’, i cili shpjegon se si Drejtoria e Urbanizmit e Prishtinës ka ndërruar disa herë kushtet ndërtimore duke mundësuar kësisoj zgjerimin e kësaj Qendre Tregtare.

    Kryetari i Prishtinës në një Konferencë për media, më 09.01.2025, në pyetjen e KALLXO.com, tha se Drejtoria e Urbanizmit ka lëshuar leje për ndërtim në bazë të Planeve rregullative dhe se të gjitha Vendimet, sipas tij, janë marrë në mënyrë ligjore.

    “Sa i përket lejes në ‘Central Park’, unë informatat që i kam Drejtoria e Urbanizmit ka lëshuar leje në bazë të Planeve rregullative. Pra, është mënyra ligjore në bazë të së cilës edhe kanë lëshu lejen. Nuk jam në dijeni që ka diçka jashtëligjore.” – deklaroi Rama.

    https://kallxo.com/gjate/oborri-i-devollit/

    Hulumtimi i KALLXO

    Drejtoria e Urbanizmit në Komunën e Prishtinës ka ndërruar disa herë kushtet ndërtimore, Vendime që ia mundësuan bizneseve në të cilat ka aksione Blerim Devolli të zgjerojnë Qendrën Tregtare “Central Park”, që gjendet në Zonën Industriale të Prishtinës.

    Leja e parë e ndërtimit për këtë Qendër Tregtare ishte lëshuar bazuar në kërkesën e bërë nga bashkëpronarët: Blerim Devolli, biznesmeni nga Peja dhe kompania “Ndërmarrja e Re Amortizatorët – Ndërtesa e Administratës” dhe kompanisë “Faico Sh.p.k”.

    KALLXO.com, pas një hulumtimi disamujor, faktoi se kushtet ndërtimore të caktuara në vitin 2019 që ishin bazë për lejen e lëshuar në vitin 2020, ishin ndryshuar disa herë nga Drejtoria e Urbanizimit. Përmes këtyre Vendimeve ishte ndryshuar sipërfaqja e ndërtimit, por edhe e parcelës dhe në fund është dhënë leja për zgjerim të kësaj Qendre Tregtare.

    Për rritjen e sipërfaqes së ndërtimit, tashmë ka një kontest gjyqësor në mes të Komunës së Prishtinës dhe Ministrisë së Mjedisit, Planifikimit Hapësinor dhe Infrastrukturës, pasi kjo e fundit, bazuar në një ankesë të dorëzuar nga grupi i asambleistëve të Lëvizjes Vetëvendosje, ka kërkuar nga Komuna e Prishtinës të anulojë Vendimin për Ricaktim të kushteve ndërtimore, që iu mundëson biznesve në të cilat ka aksione Blerim Devolli të zgjerojnë Qendrën Tregtare “Central Park”.

    KALLXO.com ka analizuar dhe krahasuar Vendimet që janë marrë për ndërtimin e kësaj Qendre Tregtare dhe në to ka gjetur ndryshime të parcelave e sipërfaqes së ndërtimit, për të cilat në dokumente nuk janë dhënë shpjegime.

    Ndryshimi i parë që bie në sy është rritja e sipërfaqes brenda vijës rregulluese. Në Vendimin e datës 18.11.2019 për caktimin e kushteve ndërtimore thuhet se totali i sipërfaqes brenda vijës rregulluese ka qenë 54,484 metra katror në kuadër të parcelës kadestrale 10315-0, e formuar nga bashkimi i parcelave kadastrale 1559-13, 1559-21 dhe 1559-22.

    Kurse, në Vendimin për ricaktim të kushteve ndërtimore të datës 28.07.2023 thuhet se sipërfaqja totale brenda vijës rregulluese është 58,707 m2 në kuadër të parcelës kadestrale 10315-0 [e formuar nga bashkimi i parcelave kadastrale 1559-13, 1559-21 dhe 1559-22].

    KALLXO.com i ka analizuar dokumentet dhe në Vendimin e 2023-tës nuk është përmendur ndonjë parcelë e re (përveç parcelave që janë përmendur në Vendimin e parë: 1559-13, 1559-21 dhe 1559-22) dhe as nuk janë dhënë shpjegime se nga kanë ardhur këto 42 ari. Kurse në Vendimin e fundit nuk është shkruar fare se sa është sipërfaqja brenda vijës rregulluese.

    Pra, që nga viti 2023 në Vendimet për ricaktim të kushteve ndërtimore figuron sipërfaqja 58,707 m2, që është më e madhe për 4,223 metra katror apo rreth 42 ari – krahasuar më atë të vitit 2019.

    KALLXO.com ka kërkuar sqarime nga Komuna e Prishtinës dhe nga investitori për këta 42 ari shtesë në sipërfaqen totale dhe bashkimin eventual të ndonjë parceleje tjetër.

    Investitori nuk është përgjigjur në tri palë pyetjet e dërguara më 27.08.2024, 19.11.2024 dhe më 11.12.2024.

    Hulumtimin e plotë mund ta lexoni në këtë LINK.

  • Përparim Rama me kritika ndaj Qeverisë, rendit projektet që kanë ngecur (VIDEO)

    Kryetari i kryeqytetit, Përparim Rama në këtë fillimvit të ri renditi sfidat që i ka pasur qeverisja e tij gjatë vitit të kaluar, në realizimin e projekteve që sipas tij kontribuojnë në transformimin e Prishtinës.

    Për ‘sfidat dhe ngecjet’ në projekte, Rama fajin ia hodhi Qeverisë Kurti duke nisur nga projekti i Unazës së Jashtme dhe projekti i organizimit të Lojërave Mesdhetare 2030, për të cilat Prishtina është nikoqire.

    “Sfidë është Unaza e Kryeqytetit dhe jo vetëm por për gjithë Kosovën, duke përfshirë këtu edhe tash që i kemi Lojërat Olimpike 2030. Pra, që po planifikojmë të jemi nikoqir i këtyre Lojërave. Ky projekt që e ka koston e 206 milionë euro është i gatshëm. Ky projekt vazhdon me qenë një projekt që nuk përkrahet nga Qeveria, përkundër faktit që kemi 40% të buxhetit që do të ishte grant prej komunitetit evropian. Është kërkuar garancia e Qeverisë dhe kjo nuk është dhënë, pra nuk e shohin një projekt të rëndësisë së madhe për Kryeqytetin apo Kosovën.” – ka thënë Rama gjatë Konferencës, më 09.01.2025.

    Për Nënkalimin në rrugën “Agim Ramadani”, Kryetari Kryeqytetas tha se nuk po sigurojnë pëlqim nga niveli qendror për të vazhduar me punimet. Ai i bëri lutje Qeverisë aktuale dhe asaj në ardhje që të ‘reflektojnë’.

    “Sfidë është edhe pëlqimi për Nënkalimin “Agim Ramadani”. Që nga marsi i këtij viti është projekti i përfunduar dhe kemi kërkuar në Qendrën Rajonale të Trashëgimisë Kulturore dhe në Institutin për Mbrojtjen e Monumenteve për të siguruar pëlqimin për të vazhduar punimet për këtë tunel. Ka rëndësi jetike për qarkullimin rrugor në Kryeqytet dhe po ashtu jetësimin e zonës historike. Kjo kërkesë ende nuk është miratuar. Pas dy refuzimeve të orkestruara politikisht, kjo mbetet praktika më e gjatë që njeh Kosova në procedurën administrative në mes të organeve shtetërore. Prapë, lus, që Qeveria në ikje tash apo Qeveria e re të reflektojnë dhe të vazhdojnë me këtë projekt madhor.” – deklaroi Rama.

    Rama e quajti tendencioze zvarritjen e procesit të projektit, që ka nisur për ndërtimin e të ashtuquajturit ‘ishull’ i cili lidh lagjen “Arbëria” me qendër ose me Pallatin e Rinisë.

    “Kemi filluar punimet, por jemi bllokuar nga institucionet qendrore. Pra, arsyetimi është tërësisht tendencioz, i cili ka për qëllim zvarritjen e procesit dhe bllokimin e këtij projekti.” – tha ai.

    “Kampusi sportiv në Bërnicë – Ky është një projekt tjetër në kuadër të Planit Zhvillimor Komunal që vazhdon të bllokohet. Ky Fshat Olimpik ka qenë në Plan para se Prishtina të jetë organizuese e garave mesdhetare, prandaj tani është adaptuar, kemi fituar. Megjithatë, Qeveria është bllokuese e këtij projekti në tërësi. Këto zvarritje janë të paarsyeshme dhe janë vazhdimësi e bllokimeve të qëllimshme të projektit.” – shtoi Rama.

    Ai përmendi edhe projektin e Sallës Koncertale, që tha se si shkak i masave ndaj Kosovës kanë humbur fondet IPA, të premtuara për financim deri në 20 milionë euro.

    “Projekti i Sallës Koncertale është i gatshëm. Kemi pasur zotime nga fondet europiane IPA, për financim deri në 20 milionë. Mirëpo, si rezultat i masave të padrejta të vendosura drejt Kosovës, këto fonde kanë humbur. Ne kemi vazhduar të shfrytëzojmë fondet tona dhe kemi arritur të revitalizojmë ndërtesën e Gërmisë. Jemi duke diskutuar seriozisht me komunitetin europian, që të rishikojnë aspektin e IPA, të na fusin në 2025-2027 për financim të këtij projekti.” – tha Rama.

    Përtej kësaj, Përparim Rama filloi edhe lëvdatat për projektet që i kanë përfunduar gjatë vitit 2024. Ai tha se kanë thyer rekorde në realizimin e buxhetit në mbi 80% .

    “Kemi thyer rekorde në realizimin e buxhetit. Që nga fillimi i qeverisjes sonë ka pasur rritje të realizimit të buxhetit nga viti në vit. Në vitin 2024 buxheti ka realizim rekord historik me mbi 80%, ndërsa investimet kapitale janë realizuar mbi 63%. Këto janë projektet: projekti i madh Jim Jema – edhe ky ka pasur ballafaqime gjyqësore tri herë për vazhdimin e saj dhe do ta përfundojmë deri në fund të këtij viti; ndërtimi i rrugëve “Bajram Bahtiri”, “Abedin Dino”, “1 Tetori”; ndarja e qytetit në gjashtë zona për intervenime, ndërtimi i rrugës  “Mallakastra”, ndërtimi i rrugës “Nekibe Kelmendi”, unazës qendrore Lakrishë-Arbëri.” – u shpreh tutje kryetari Rama.

    Rama foli edhe për një problem të kahmotshëm me qentë endacak. “Kemi dhënë më shumë se 600 qenë endacak për adoptim dhe kemi kërkesa për më shumë se 1 mijë të tjerë. Janë trajtuar më shumë se 3 mijë qenë endacak. Uroj që viti i ri të jetë bashkëpunues me nivelin qendror.” – deklaroi Rama.

  • Vazhdojnë ‘përplasjet’ për Palestrën multisportive në Prishtinë – Çeku-Ramës: Kryetar, mos gënje!

    Projekti për Palestrën multisportive në Prishtinë, është bërë “mollë sherri” mes Ministrisë së Kulturës, Rinisë dhe Sportit së Hajrulla Çekut dhe kryetarit të kësaj Komune, Përparim Ramës.

    Pas deklaratave të kryetarit Rama, se “faji për vonesat e realizimit të projektit, bie mbi bllokimin e qëllimshëm të VV-së”,  ministri Çeku i është kundërpërgjigjur të parit të Prishtinës, duke i thënë që “të mos të gënjejë”, pasi që sipas tij Komuna nuk e ka mbajtur zotimin e saj për realiziamin e këtij projekti. 

    Sipas Çekut, lokacioni i dakorduar nga Komuna e Prishtinës dhe nga Federata e Basketbollit të Kosovës për ndërtimin e kësaj Palestre gjendet në Hajvali, pranë Qendrës Nacionale të Futbollit dhe se kjo nuk ka të bëjë me lokacionin ku Komuna dëshiron ta realizojë projektin e kampusit sportiv në Bërnicë, përkatësisht në Fshatin Olimpik.

    Ministri ka shkruar se gjatë gjithë vitit 2024 Komuna e Prishtinës nuk ka ndërmarrë asnjë hap për ta kryer zotimin e saj: plotësimin e kërkesës së FBK-së. 

    “Gjatë tërë vitit 2024 Komuna e Prishtinës nuk ndërmori asnjë hap për ta konkretizuar zotimin tuaj dhe plotësuar kërkesën e FBK-së. Me gënjeshtra nuk ecet përpara. Nëse jeni serioz, dërgojeni Vendimin në Kuvendin e Komunës për lokacionin që jeni dakorduar me FBK-në, duke mundësuar kështu realizimin e plotë të projektit nga MKRS.” – ka shkruar Çeku, të hënën, më 06.01.2025. 

    Ministri i Kulturës i është kundërpërgjigjur Ramës,i cili më 04.01.2025, deklaroi se kanë qenë asambleistët e LVV-së që katër herë e kanë refuzuar lokacionin dhe planin për Palestër. 

    Për këtë ministri Çeku ka shkruar se nga grupi i Lëvizjes Vetëvendosje i kanë thënë se do të votojnë “për”, andaj i ka bërë thirrje kryetarit Rama që Vendimin për lokacionin e Palestrës ta dërgojë në Kuvendin e Komunës për ta votuar.

    “PS. Nga grupi i VV më thanë që do të votojnë PËR. Dërgoje!” – është shprehur Çeku. 

    KALLXO.com të shtunën, më 04.01.2025, raportoi se Projekti i Palestrës multisportive në Kryeqytet u bë shkas i përplasjes mes të parit të Prishtinës, Përparim Rama dhe ministrit të Kulturës, Rinisë dhe Sportit, Hajrulla Çeku.

    https://kallxo.com/lajm/projekti-i-palestres-multisportive-ne-kryeqytet-perplas-te-parin-e-prishtines-dhe-ministrin-e-kultures/

    Të premten, më 03.01.2025, ministri Çeku përmes një postimi në profilin e tij në Facebook ka akuzuar Komunën e Prishtinës se ka një vit që ka neglizhuar ndajen e lokacionit për projektin e Palestrës multisportive në Prishtinë, për ndërtimin e së cilës thotë se është ndarë një buxhet prej 3.5 milionë euro. “Ky është vetëm njëri nga projektet që jemi zotuar për të investuar në infrastrukturën sportive të Kryeqytetit, por kemi hasur në neglizhencë totale të Komunës së Prishtinës. Dhe sikur kjo të mos mjaftonte, ajo çfarë kemi dëgjuar përditë nga ta është kinse Qeveria po i pengon apo nuk po investon në Prishtinë.” – ka shkruar Çeku, më 03.01.2025.

    Ndërsa kryetari Rama i është kundërpërgjigjur ministrit Çeku duke thënë se kanë qenë asambleistët e LVV-së që katër herë e kanë refuzuar lokacionin dhe planin për Palestër.

    “Lokacioni dhe plani për Palestrën janë refuzuar katër herë nga asambleistët e Vetëvendosjes. Në seancën e fundit, më 04.12.2024, kjo bllokadë u shoqërua me shkatërrim të pronës publike dhe ndërhyrje të Policisë! Komuna e Prishtinës ka planifikuar ndërtimin e Palestrës si pjesë të një kampusi sportiv në Bërnicë, me projekte të plota urbanistike dhe përpjekje të vazhdueshme për miratim. Përhapja e propagandës dhe mungesa e bashkëpunimit politik po dëmtojnë Prishtinën dhe qytetarët e saj. Faji për vonesat bie mbi bllokimin e qëllimshëm nga Vetëvendosje dhe jo mbi Komunën.” – ka shkruar Rama, më 04.01.2025, në Facebook.

    Tutje, Rama është shprehur se Komuna e Prishtinës do të vazhdojë të punojë për të realizuar projektet e rëndësishme politike, duke thënë se “qytetarët e Prishtinës meritojnë zhvillim dhe jo propagandë politike”.