Ballina

Etiketë: pdk

  • Marrëveshjet për normalizim të marrëdhënieve me Serbinë, sfidë për Qeverinë e re të Kosovës

    Cilado Parti a cilido Koalicion që e krijon Qeverinë e re në Kosovë pas Zgjedhjeve të 9 shkurtit pritet ta ketë në Agjendë Dialogun për normalizim të marrëdhënieve me Serbinë, të ndërmjetësuar nga Bashkimi Europian. Si proces i nisur qysh në vitin 2011, Dialogu paraqitet si obligim i palëve për të trazuar rrugën e tyre drejt integrimit në BE.

    Kaja Kallas, pas takimeve të para që ka pasur me kryeministrin kosovar Albin Kurti dhe presidentin serb Aleksandër Vuçiq, pas emërimit të saj si Shefe e Diplomacisë në BE, më 03.12.2024, ka theksuar se normalizimi i marrëdhënieve duhet të bëhet duke u bazuar në Marrëveshjen e Ohrit.

    “Rruga e vetme për anëtarësim në BE është normalizimi i marrëdhënieve të tyre, në bazë të Marrëveshjes së Ohrit.” – ka shkruar Kallas në platformën “X”.

    Me përjashtim të partisë që ende është në pushtet, Lëvizjes Vetëvendosje, mbi të cilën për katër vjet ka rënë barra e dialogimit në Bruksel, partitë dhe koalicionet tjera parazgjedhore e kanë përfshirë Dialogun në Programet e tyre zgjedhore.

    Gjatë fushatës zgjedhore, më 25.01.2025, kandidati për Kryeministër nga LVV-ja, njëherësh kryeministri aktual Albin Kurti, teksa ka shpalosur Programin zgjedhor nuk e ka përmendur fare Dialogun.

    Ndryshe nga LVV-ja, PDK parasheh që nëse vjen në pushtet do të përkushtohet për të zbatuar obligimet që rrjedhin nga Marrëveshjet e nënshkruara deri më tani.

    Në Programin e kësaj partie parashihet ristrukturimi i plotë i procesit të Dialogut.

    “Ky përfshin demokratizimin dhe institucionalizimin e përfaqësimit të Kosovës, miratimin e një platforme të qartë në Kuvendin e Kosovës dhe krijimin e një strukture gjithëpërfshirëse.” – thuhet në Programin e PDK-së. Në strukturën gjithëpërfshirëse, kjo parti parasheh edhe pjesëmarrjen e shoqërisë civile, qytetarëve dhe bizneseve.

    Synim i PDK-së është që brenda vitit 2026 të nënshkruhet një Marrëveshje që përfshin njohjen reciproke.

    Në Program megjithatë nuk përmendet decidivisht krijimi i Asociacionit të Komunave me Shumicë Serbe.

    Edhe LDK-ja synon njohjen e ndërsjellë përmes procesit të Dialogut me Serbinë.

    “Ky Dialog, në fakt, nuk është vetëm me Serbinë, por në thelb edhe me komunitetin më të gjerë ndërkombëtar, në veçanti me komunitetin euro-atlantik. Ndërsa qëllimi ynë përfundimtar është njohja reciproke, është gjithashtu thelbësore të pranojmë se rezultatet në procesin dialogues hapin rrugën tonë drejt anëtarësimit në NATO dhe BE.” – thuhet mes tjerash në Programin e LDK-së.

    Lidhja Demokratike e Kosovës parasheh që të respektojë Marrëveshjet e arritura deri më tani në kuadër të Dialogut. Këtu përfshihen Marrëveshjet e vitit 2013 e 2015 e deri te Marrëveshja e Ohrit e vitit 2023.

    “Angazhimi ynë do të mbetet brenda kornizave implementuese të kësaj Marrëveshjeje, me të gjitha pjesët e saja integrale – përfshirë dhe Asociacionin Kushtetues – duke mos bërë asnjë kompromis me Kushtetutën e Republikës së Kosovës, integritetin territorial të Kosovës e karakterin unitar të shtetit tonë.” – thuhet tutje në Programin zgjedhor të LDK-së.

    Ndërkaq, Koalicioni AAK-NISMA-Lista Konservatore-Forumi Intelektual E-30, në Programin zgjedhor parasheh ‘shembjen’ e themeleve të autonomisë për Komunat me shumicë serbe.

    “Kosova do ta përmbyllë Dialogun dhe t’i rikthehet Marrëveshjes gjithëpërfshirëse dhe obligative me njohje reciproke.” – thuhet në Programin e këtij Koalicioni.

    Njohja reciproke sipas këtij Koalicioni do të vendoste themelet e një paqeje të përhershme.

    Marrëveshjet e dakorduara duhet të zbatohen, pavarësisht kush vjen në pushtet

    Ndonëse partitë politike duan ndryshime në procesin e Dialogut, Marrëveshjet e deritashme – përfshirë formimin e Asociacionit të Komunave me Shumicë Serbe – nga njohësit e çështjeve politike konsiderohen si obligime që duhen përmbushur nga Qeveria e re.

    Abit Hoxha, Asistent Profesor dhe Hulumtues Shkencor në Universitetin Agder në Norvegji konsideron se për Agjendën e Dialogut, Bashkimi Europian dhe partnerët e tjerë ndërkombëtarë presin ndryshime politike, në mënyrë që kjo Agjendë të shtyhet përpara.

    “As nuk ka ndryshuar e as nuk do të ndryshojë në vija të trasha në kuptimin e rezultatit, por ndryshon në hapa, kohë dhe mënyrë të implementimit. Sa Kosova ka dëshirë dhe Agjendë politike të integrimit, dikton mënyrën e implementimit të Dialogut.” – thotë Hoxha.

    Profesori i Marrëdhënieve Ndërkombëtare, Dritëro Arifi, thotë se pavarësisht se kush do jetë në Qeveri pas 9 shkurtit, presioni ndërkombëtar për zbatimin e Marrëveshjeve, do të jetë jashtëzakonisht i madh.

    “Më 10 shkurt po them në mënyrë figurative do të vijnë kërkesat nga BE-ja dhe SHBA-ja për zbatimin e Marrëveshjeve të arritura deri tash. Gjithashtu, pavarësisht se cila Qeveri do të jetë në pushtet është e obliguar që të zbatojë të gjitha Marrëveshjet që janë të dakorduara në mes të Prishtinës dhe të Brukselit. Mendoj që cilado Qeveri që do jetë në pushtet pas 9 shkurtit janë të detyruar që ta zbatojnë edhe Asociacionin e Komunave me Shumicë Serbe. Po flasim gjithmonë nga këndvështrimi i rrethanave aktuale.” – thotë Arifi.

    Hoxha, nga ana e tij, konsideron se pavarësisht se disa nga partitë në Programin e tyre kanë ide të ndryshme për Dialogun, kjo mund të ndikojë në mbarëvajtjen e procesit, por jo në Agjendën e tij.

    “Përgjithësisht, Dialogu ka për qëllim normalizimin mes Kosovës dhe Serbisë në kontekst europian, që do të thotë Marrëveshje për ndalimin e konfliktit, fqinjësi të mirë dhe ndoshta edhe integrim në BE. Pra, partitë përgjatë fushatave mund të ndryshojnë mënyrën se si rrjedh ky Dialog, por qëllimi është i njëjtë. Pjesët për të cilat palët janë marrë vesh deri më tani janë domosdoshmërisht të obligueshme dhe duhet të implementohen duke përfshirë Asociacionin, jo si favor ndaj Serbisë apo BE, por sepse janë në interesin më të mirë të Kosovës.” – shton Hoxha.

    Ndërsa Arifi përkujton se partitë ka pasur raste kur kanë kundërshtuar çështje të caktuara, por që kur kanë ardhur në pushtet, situata ka ndryshuar.

    “Historia është mësimi më i mirë. I kemi dy parti që e kanë kundërshtuar demarkacionin dhe kur kanë ardhur në pushtet e kanë votuar të njëjtën gjë. Njëjtë edhe Vetëvendosja ka lejuar që të zbatohet Vendimi për tokat e Manastirit të Deçanit. Është kalkulim i partive politike që kinse janë jashtëzakonisht shumë të vrazhda dhe populiste, por kur vijnë në pushtet, ndryshon gjatë rrugës gjithçka.” – shton Arifi.

    Një Marrëveshje finale sipas Hoxhës deri tani nuk është mundur të arrihet përmes Dialogut për shkak se Serbisë nuk i ka konvenuar, për sa kohë që përkohësisht as Kosova nuk ka shfaqur interes për Marrëveshje.

    “Tekefundit Kosova do të duhej të shqyrtojë mundësinë që Marrëveshjet t’i vendosë më shumë vis-à-vis BE-së sesa Serbisë dhe kjo do të thotë se duhet t’i implementojë të gjitha Marrëveshjet njëanshëm dhe të ecë para me BE-në dhe të mos varet nga Agjenda karshi Serbisë.” – përfundon Hoxha.

    Rruga e gjatë e dialogimit

    Kosova dhe Serbia janë në bisedime të ndërmjetësuara nga Bashkimi Europian për normalizimin e marrëdhënieve, që nga viti 2011.

    Ky proces kishte nisur fillimisht për çështje teknike, për të kaluar më pas në nivel politik.

    Më 18 mars 2023 Kosova dhe Serbia në Ohër të Maqedonisë së Veriut u dakorduan për Aneksin e zbatimit të Marrëveshjes drejt normalizimit.

    Dy liderët u pajtuan që Kosova dhe Serbia të zhvillonin marrëdhënie normale të fqinjësisë së mirë me njëra-tjetrën dhe ndër të tjera t’i njihnin dokumentet relevante dhe simbolet kombëtare të njëra-tjetrës – përfshirë pasaportat, diplomat, targat e automjeteve dhe vulat doganore, ndonëse nuk përmend njohjen e ndërsjellë.

    Kosova merrte obligime për t’i zbatuar Marrëveshjet e arritura më herët – përfshirë atë që e parasheh krijimin e Asociacionit të Komunave me Shumicë Serbe – ndërsa Serbia nuk do ta kundërshtonte anëtarësimin e Kosovës në asnjë Organizatë Ndërkombëtare. E, si “shpërblim” për zbatimin e Marrëveshjes bazë, BE-ja kishte marrë përsipër të organizonte një Konferencë donatorësh brenda 150 ditësh, për të krijuar një paketë investimesh dhe ndihmë financiare për Kosovën dhe Serbinë. Por, asnjë shpërndarje nuk do të ndodhë përpara se BE-ja të përcaktojë se të gjitha dispozitat e Marrëveshjes janë zbatuar plotësisht. Dhe, me gjithë pritjet se gjërat po merrnin rrjedhë pozitive, zhvillimet e mëvonshme në terren quan procesin në kah krejt të kundërt. E, Marrëveshja mbeti vetëm në letër.

    Palët nuk e nënshkruan Marrëveshjen, por BE-ja dhe Shtetet e Bashkuara janë deklaruar se pavarësisht se nuk është firmosur, ajo është Marrëveshje e obligueshme për palët.

    Kurti kërkoi të nënshkruhet Marrëveshja e Ohrit nga palët – duke insistuar se vetëm ashtu garantohet zbatimi.

    “Presidenti i Serbisë nuk ishte i gatshëm ta respektonte asnjërën. Ne jemi për Dialog për normalizim. Kjo bëhet me pranimin në tërësi të Marrëveshjes dhe zbatimin e saj.” – kishte deklaruar Kurti, më 28.06.2024, në një mbledhje të Qeverisë së Kosovës.

    Sipas tij nënshkrimi i Marrëveshjes nënkupton formalizim, kurse dorëzimi i Radoiçiqit do të kuptonte vendosje të drejtësisë.

    Ndaj 45 personave – në krye të të cilëve qëndron ish-nënkryetari i Listës Serbe, Millan Radoiçiq – është ngritur Aktakuzë, më 11.09.2024, nga Prokuroria Speciale e Kosovës.

    Sipas Aktakuzës në mbi 45 të akuzuarit rëndojnë veprat penale për: “terrorizëm”, “financim terrorizmi” dhe “shpëlarje e parasë”. Kjo pasi të njëjtit akuzohen se më 24.09.2023 kanë kryer sulm terrorist në Banjskë të Zveçanit – duke lënë të vrarë zyrtarin policor Afrim Bunjaku.

    https://kallxo.com/gjate/dialogu-ne-kome/

  • Hamza premton funksionalizimin e linjës hekurudhore Klinë – Prizren

    Kandidati i Partisë Demokratike të Kosovës për kryeministër, Bedri Hamza, më 28.01.2025 ka mbajtur tubim me qytetarë më Klinë.

    Hamza ka premtuar përfundimin e autostradës për Pejë dhe të unazës që lidh rrugët Klinë-Skenderaj dhe Klinë-Istog.

    Po ashtu ka premtuar funksionalizimin e linjës hekurudhore Klinë-Prizren.

    “Kështu siç ju gjeta sonte Klinë, me plot entuziazëm, me plot energji për fitoren, kështu dua të jeni më 9 shkurt dhe gjithmonë. Autostradën për Pejë, e cila kalon kah Klina, do ta përfundojmë. Unazën e re që lidh rrugët Klinë – Skenderaj dhe Klinë – Istog do ta ndërtojmë. Edhe linjën hekurudhore Klinë – Prizren do ta bëjmë funksionale dhe do ta elektrifikojmë rrjetin hekurudhor në krejt Kosovën. Jemi bashkë për Kosovën që mundet ma mire”- ka shkruar Hamza në Facebook.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Planet e PDK-së për investime në rajonin e Anamoravës

    Kandidati për deputet nga Partia Demokratike e Kosovës (PDK), Granit Berisha, në emisionin “Debat Përnime”, ka folur për investimet që  i kanë paraparë në kuadër të programit zgjedhor për rajonin e Gjilanit (06).

    Projekti i parë që do të trajtohet më prioritet nga PDK, sipas tij, do jetë përfundimi i autostradës së Gjilanit.

    “Përfundimi i autostradës si dhe kontraktimin i segmentit të dytë nga Bresalci deri të Dheu i Bardhë, që është shumë me rëndësi për qytetarët e Kamenicës dhe Anamoravës”- tha Berisha.

    Pas përfundimit të kësaj autostrade, për qytetarët e Kamenicës u premtua se do të ndërtohet një rrugë e cila do të lidhë direkt me autostradën e Gjilanit.

    “Fillimisht duhet të bëhet përfundimi i segmentit prej Bresalcit deri te Dheu i Bardhë, që jam i bindur që do të ndodhë gjatë dy ose tri viteve të qeverisjes së Bedri Hamzës. Pas përfundimit të autostradës mund të fillojë ky segmenti që ka me lidhë qytetin e Kamenicës me autostradën deri të Dheu i Bardhë”- tha Berisha.

    Një investim tjetër që pritët të bëhet në këtë rajon është edhe ndërtimi i Parkut të Biznesit, që sipas Berishës, do të jetë një “mundësi e mirë për kompanitë prodhuese”.

    “Ndërtimi i një Parku të Biznesit afër pikës kufitare, për shkak të korridorit të Dheut [të Bardhë] dhe lidhjes me Europën, mendoj që ka me qenë me shumë interes për kompanitë prodhuese”- tha ai.

    “Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve.

    RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    Jeta Xharra, drejtuese e “DebatPërnime” tha në nisje të debatit për politikën e jashtme se “Donika Gërvalla si ministre e Punëve të Jashtme, Glauk Konjufca si kryetar i Kuvendit, Vjosa Osmani si presidente, deri tani edhe komplet Qeveria Kurti 2, me gjithë respektin ndaj tyre, janë udhëheqësi e parë pas shpalljes së Pavarësisë që po e përfundon mandatin e plotë  pa asnjë njohje të vetme”.

    Për më shumë lexoni në linkun në vijim:

    https://kallxo.com/gjate/fuqizimi-i-marredhenieve-me-aleatet-shtimi-i-njohjeve-dhe-anetaresimet-zotimet-e-pdk-se-per-politiken-e-jashtme/

  • Si do të trajtohet rasti i ambasadorit Martin Berishaj nëse do të qeverisë PDK-ja?

    Kandidatja për deputete nga Partia Demokratike e Kosovës (PDK), Blerta Deliu-Kodra, ka shprehur qëndrimet e partisë së saj në lidhje me ambasadorin e Kosovës në Kroaci, Martin Berishaj, dhe kontratën për konsulencë të Gani Jakupit me Ministrinë e Punëve të Jashtme dhe Diasporës.

    Në “Debat Përnime”, ajo tha se nuk ka ndodhur asnjëherë prej se është në politikë që një diplomat në një shtet kredibil ta vazhdoj mandatin e tij përkundër “aferave të shumta korruptive”.

    Deliu-Kodra u zotua se me “ardhjen e PDK-së në pushtet” nuk do të ketë raste të tilla që e  “dëmtojnë kredibilitetin e Kosovës”.

    “Absolutisht, Partia Demokratike e Kosovës, ose kryeministri i ardhshëm Bedri Hamza, nuk do të lejojnë të ketë persona që janë të përfshirë në afera të tilla korruptive dhe të dëmtojnë kredibilitetin e Kosovës”- tha ajo.

    Njëjtë u diskutua edhe për kontratën e Gani Jakupit, të cilën Ministria e Punëve të Jashtme e kishte kontraktuar si konsulent të jashtëm.

    Sipas dokumentit, çmimi i tërësishëm i kësaj kontrate ka qenë 90 mijë euro bruto dhe ësjhtë paguar në 12 këste, nga 7 mijë e 500 euro.

    “Partia Demokratike e Kosovës qysh në fillim të mandatit do t’i shfuqizoj të gjitha kontratat të cilat e kanë dëmtuar buxhetin e Republikës së Kosovës”, tha Deliu-Kodra.

    Ndërsa, kandidatja Ariana Musliu-Shoshi, u përgjigj se cfarë do të bëjnë me ambasadorët e emëruar gjatë Qeverisë Kurti.

    “Këta ambasadorë të cilët kanë kaluar, janë ambasadorë puro politik dhe janë pjesë e shumë organeve të LVV-së. A do të shkarkohen, varet nga kualiteti i punës se tyre që kanë treguar sa janë në mandat politik”- tha Musliu-Shoshi.

    “Debat Përnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve.

    RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    Jeta Xharra, drejtuese e “Debat Përnime” tha në nisje të debatit për politikën e jashtme se “Donika Gërvalla si ministre e Punëve të Jashtme, Glauk Konjufca si kryetar i Kuvendit, Vjosa Osmani si presidente, deri tani edhe komplet Qeveria Kurti 2, me gjithë respektin ndaj tyre, janë udhëheqësi e parë pas shpalljes së Pavarësisë që po e përfundon mandatin e plotë  pa asnjë njohje të vetme”.

    Për më shumë lexoni në linkun në vijim:

    https://kallxo.com/gjate/fuqizimi-i-marredhenieve-me-aleatet-shtimi-i-njohjeve-dhe-anetaresimet-zotimet-e-pdk-se-per-politiken-e-jashtme/

     

     

  • Deliu-Kodra (PDK): Në raportet ndërkombëtare Kosova është zhvendosur shumë poshtë

    Kandidatja për deputete nga Partia Demokratike e Kosovës (PDK), Blerta Deliu-Kodra, në emisionin “Debat Përnime”, më 28.01.2025, ka folur për pozitën e Kosovës në arenën ndërkombëtare përgjatë qeverisjes katërvjeçare të kryeministrit, Albin Kurti.

    Ajo tha se Kosova gjatë kësaj periudhe është zhvendosur poshtë në raportet kredibile ndërkombëtare.

    “Fatkeqësisht, raportet (ndërkombëtare), viteve të fundit kanë qenë raporte të cilat Kosovën e kanë zhvendosur shumë më poshtë në ranglistën e saj, si në Transparency International …”, ka deklaruar ajo.

    Niveli në të cilin ka rënë Kosova në raport me partnerët ndërkombëtarë, sipas saj, shpërfaqet më së miri me gjendjen e ambasadave strategjike që i ka sot Kosova.

    Deliu-Kodra përmendi edhe çështjen e mungesës së njohjes së Kosovës nga shtetet që nuk e kanë njohur si dhe mungesën e vizitave të rëndësishme të partnereve strategjikë në Kosovë.

    “Kosova si një shtet i ri, për katër-pesë vite nuk ka as edhe një njohje të vetme. Ne nuk mund ta vazhdojmë rrugëtimin tonë të fuqizimit të shtetit tonë në rast se nuk bashkërendojmë me partneret tonë. Kosovës i kanë munguar vizitat e rëndësishme të partnereve strategjik të saj”- tha ajo.

    Se si kanë qenë raportet e Kosovës me SHBA-në, për gjatë qeverisjes së kryeministrit Albin Kurti, sipas kandidates Deliu-Kodra, tregojnë vetë mungesat e vizitave të kryeministrit Kurti në SHBA.

    “Është shumë e thjeshtë: cila ka qenë vizita e parë dhe e fundit në Shtëpinë e Bardhë e Albin Kurtit, kryeministrit të Kosovës në Shtëpinë e Bardhë gjatë mandatit qeverisës? A ka ndodhë në të kaluarën që të kalohen dy vite të qeverisjes ku ne nuk kemi pasur shkëmbime, vizita të rëndësishme në Departamentin amerikan [të Shtetit], në Shtëpinë e Bardhë, në institucionet e rëndësishme të SHBA-së, për të koordinuar të ardhmen tonë euroatlantike”- tha Deliu-Kodra.

    Në debat u diskutua edhe mungesa e anëtarësimeve të shtetit në organizata ndërkombëtare.

    “Në fund të vitit 2022 kemi pasur procesin e aplikimit për anëtarësim në Bashkimin Europian. Ka qenë një aplikim që është bërë nga kryeministri Albin Kurti. Tash jemi në vitin 2025. Shiheni vetëm rrugën integruese të Kosovës ku është sot. Në takimet tona me partnerët tonë të BE-së, vërejtjet të cilat i ka marrë Kosova kanë qenë vërejtje që ne po e humbasim të ardhmen tonë të integrimit në BE”- u shpreh Deliu-Kodra.

    Përveç kësaj u diskutua edhe vlerësimi që ka bërë Raporti i Progresit për Kosovën, që sipas saj, ky raport tregon për nivelin e korrupsionit që aktualisht është në Kosovë.

    “Mbi 52 herë në Raportin [e Progresit] për vendin përmendet fjala nivel i mesëm i korrupsionit, niveli i lartë i korrupsionit. D.m.th mbi 52 herë ky raport i referohet institucioneve të Republikës së Kosovës të cilat ende përballen me nivel të korrupsionit, të cilin duhet ta adresojnë në mënyrë që ne ta kemi të ardhmen tonë evropiane të sigurtë”- thotë ajo.

    Pa kritika nuk kaloi as qasja e komplet kabinetit qeveritar ndaj institucioneve të drejtësisë dhe mediave, që sipas Deliu-Kodra, thuhen “troç” edhe në Raportin e Progresit.

    “Ne nuk mund ta konsolidojmë drejtësinë, nëse Qeveria me mediat, gjyqësorin, me institucionet e drejtësisë ka një qasje të tillë dhe kur një kryeministër del e deklarohet se nuk do të shkoj [për të dëshmuar], madje [thotë] le të vjen vet prokurori e ta merr [në pyetje] në zyrën e tij”- tha Deliu-Kodra.

    “Stërkeqja” më e madhe e pushteteve, sipas Deliu-Kodrës, ka ndodhur në mandatin e Lëvizjes Vetëvendosje, me arsyetimin se gjatë këtij mandati mbi 10 herë është shkelur Kushtetuta e Kosovës.

    “DebatPërnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve.

    RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    Jeta Xharra, drejtuese e “DebatPërnime” tha në nisje të debatit për politikën e jashtme se “Donika Gërvalla si ministre e Punëve të Jashtme, Glauk Konjufca si kryetar i Kuvendit, Vjosa Osmani si presidente, deri tani edhe komplet Qeveria Kurti 2, me gjithë respektin ndaj tyre, janë udhëheqësi e parë pas shpalljes së Pavarësisë që po e përfundon mandatin e plotë  pa asnjë njohje të vetme”.

    Për më shumë lexoni në linkun në vijim:

    https://kallxo.com/gjate/fuqizimi-i-marredhenieve-me-aleatet-shtimi-i-njohjeve-dhe-anetaresimet-zotimet-e-pdk-se-per-politiken-e-jashtme/