Ballina

Etiketë: pdk

  • Premtimet e PDK-së për reforma në Drejtësi dhe për investime në rajonin e Prishtinës

    Partia Demokratike e Kosovës (PDK) synon të kthehet në pushtet me premtimet se nuk do të ndikojë në Sistemin e Drejtësisë dhe se do të bëjë hapa specifikë në zbardhjen e krimeve të luftës.

    Herën e fundit kur Partia Demokratike e Kosovës (PDK) ishte në pushtet, Bedri Hamzës i ishte besuar pozita e Ministrit të Financave. Vite më pas, për herë të parë, njeriut që fitoi më së shumti vota e u zgjodh Kryetar i Mitrovicës së Jugut, u përzgjodh nga partia si kandidat për Kryeministër të vendit.

    Kandidatët e PDK-së për deputetë, Hamzën e shohin si njeri të urtë, me integritet dhe shumë punëtor. Duke u nisur nga këto premisa, ata besojnë që nëse populli “do e furnizojë mjaftueshëm” me vota, Hamza do të jetë Kryeministri i cili do ta reformojë Kosovën në të gjitha fushat. Se a do të arrijë ai t’i marrë votat e mjaftueshme – siç i mori në një Komunë – pritet të shihet pas Zgjedhjeve të 9 shkurtit 2025.

    Katër kandidatë për deputetë të kësaj partie: Përparim Gruda, Betim Gjoshi, Ilirik Musliu dhe Leutrim Retkoceri, të gjendur përballë ekipit të “Debat Përnime”, më 13.01.2025, shpërfaqën një pjesë të Programit të tyre për Sistemin e Drejtësisë dhe për investimet në rajonin e Prishtinës. Ata u zotuan se nëse PDK vjen në pushtet, do ta bëjnë Vetting-un, do ta reformojnë Sistemin e Drejtësisë, do të punojnë në zbardhjen krimeve të luftës dhe do ta ndërtojnë unazën e jashtme të Kryeqytetit.

    Kjo parti e djathtë është një prej partive më të mëdha në Kosovë, e cila ka përvojë me pushtetin përgjatë viteve, shpesh është kritikuar “se nuk ka bërë mjaftueshëm” dhe se projektet më të mëdha i ka pasur infrastrukturore.

    Me 110 kandidatë për deputetë për Zgjedhjet që do të mbahen më 09.02.2025, PDK mban numrin 241 me parullën “Kosova mundet ma mirë”.

    Planet për zbardhjen e krimeve të luftës

    Përparim Gruda, kandidati për deputet nga PDK-ja, me profesion jurist, premton se për të zbardhur krimet e kryera gjatë luftës në Kosovë, në Programin e tyre e kanë ndërtimin e një strategjie kombëtare, ndërtimin e një Instituti që do të ketë pavarësi buxhetore, si dhe shtimin e numrit të prokurorëve dhe bashkëpunëtorëve profesionalë. Se sa mund të shtohet numri i prokurorëve, ai nuk dha shifër konkrete, por tha se këtë do ta bëjnë pas konsultimeve me Këshillin Prokurorial.

    Gruda e quajti si të pamjaftueshëm Institutin për Krimet e Kryera gjatë Luftës, duke e cilësuar si një institut që ka rol vetëm administrativ. Të njëjtin, synojnë që ta shndërrojnë në Qendër kërkimore dhe shkencore – siç është Instituti Albanologjik.

    “Ky Institut do të punojë dhe ndoshta kjo gjeneratë nuk do ta presë mbylljen, por do të punojë shumë gjatë. Jo me i punësuar aty 40 vetë në Administratë, por me ardhë dita kur mbahet një Konferencë ndërkombëtare, ku vijnë profesorë të mirë të drejtës penale e kriminalistikës dhe të realizojnë hulumtime shkencore të cilat botohen në revista shkencore.” – tha ai.

    Kandidati i PDK-së për deputet, Përparim Gruda. Foto: Naser Fejza/KALLXO.com

    Nëse PDK e merr pushtetin, Gruda paralajmëroj se do të dërgojnë letër tek organizata Human Rights Watch, për të kërkuar që ta tërheqin Raportin në të cilën akuzohen krerët e Ushtrisë Çlirimtare të Kosovës (UÇK) dhe për të njëjtin të kërkojë falje.

    “Një Raport i Human Rights është endur nëpër botë për kinse krimet e UÇK-së, të cilin unë e kam hasur në mijëra punime shkencore, e në fund Drejtori i atij projekti kur ka shkuar në Gjykatë Speciale me dëshmu ka thënë: ‘Po është e vërtetë që nuk kam hetuar në terren, por e kam shkruar ashtu.” – tha ai, duke fajësuar Qeverinë Kurti që nuk ka kërkuar që të tërhiqet një Raport i tillë.

    Të dhënat e KALLXO.com vënë në pah që institucionet e Kosovës kanë vetëm tre prokurorë për hetimin e krimeve të luftës dhe rreth 40 policë hetues – gjë që është e pamjaftueshme që të zbardhen rastet 26 vjet pas përfundimit të luftës.

    Reformimi i Drejtësisë

    Kandidati tjetër për deputet, Betim Gjoshi, po ashtu me profesion jurist, u zotua se Drejtësisë do t’ia ofrojnë të gjitha mundësitë: buxhet të mjaftueshëm dhe kompetencë. Sipas tij, ministri i tyre i Drejtësisë, nëse vijnë në pushtet, nuk do të guxojë që të përzihet në Distemin e Drejtësisë.

    Gjoshi tha se i kanë 14 prioritete në fushën e Drejtësisë.

    “Kemi mësuar shumë nga gabimet me ligjin dhe ia dimë vlerën që ka. Dhe për krahasim me partinë që është në pushtet, kritikat nga mediat dhe shoqëria civile i kemi marrë me sportivitet dhe kemi reflektuar.” – ka deklaruar ai.

    Ndërsa, Përparim Gruda tha se Programi i tyre për Drejtësi parasheh reformimin e Sistemit të Drejtësisë dhe arritjen e dy qëllimeve themelore: e para vënien në funksion të zhvillimit ekonomik dhe e dyta mbrojtja e të drejtave dhe lirive të njeriut.

    Gruda tha se e kanë si synim realizimin e plotë të procesit të Vetting-ut, duke zbatuar me besnikëri rekomandimet e Komisionit të Venecias. Ndërsa, qëllimi tjetër është digjitalizimi i Sistemit të Drejtësisë dhe themelimi i Gjykatës të Punës. Kjo e fundit, sipas tij, do të bëhet me një ligj të veçantë, ashtu që njerëzit të mos presin gjatë që të fitojnë të drejtën për marrëdhënie pune.

    Ai edhe pse nuk ceku shifra konkrete se sa do t’u kushtojë, tha se digjitalizimi do të bëhet në vitin e parë dhe formati i tyre është që të ulen bashkë me prokurorë dhe me gjyqtarë për t’i parë  nevojat e tyre.

    “Nuk mundemi me ditë koston, sepse nuk e dimë ende se cilat pjesë kemi me i digjitalizu. Procesverbalet do të bëhen në mënyrë automatike, marrja në pyetje do të bëhet me video dhe audio. Kostoja është e përballueshme për buxhetin e Kosovës.” – tha ai.

    Digjitalizimin e Sistemit të Drejtësisë, PDK synon ta bëjë më shpejt se Vetting-un.

    Lidhur me Vetting-un, Gruda tha se ky proces do të bëhet pasi të kenë një debat me Këshillin Gjyqësor të Kosovës dhe Këshillin Prokurorial.

    “Do t’i shohim rekomandimet e Komisionit të Venecias e të diskutojmë me miqtë tanë ndërkombëtarë që munden me na ndihmu. Por, ky nuk do të bëhet kurrë qysh është bërë deri tani, duke e sulmuar Këshillin Gjyqësor të Kosovës.” – tha ai.

    Se si do të arrijnë të marrin votat e shumicës parlamentare, konkretisht të Listës Serbe, Gruda tha se në Kosovë edhe më herët janë bërë ndryshime kushtetuese, kështu që mund të bëhen edhe tash. Ai beson që Bedri Hamza, si “politikan i ndërgjegjshëm”, mundet ta sigurojë shumicën e nevojshme për ta realizuar këtë proces.

    “Dokumentet për Vettingun që përfshijnë Amendamentet kushtetuese, Ligjin për Vetting-un mundemi t’i bëjmë në vitin e parë. Vetting-un komplet e bëjmë për katër vjet. Kush thotë se bëhet më herët është joserioz, sepse nuk e ka kryer askush aq herët. Nuk bëhet ai proces ashtu.” – tha Gruda.

    Kandidati i PDK-së për deputet, Betim Gjoshi. Foto: Naser Fejza/KALLXO.com

    Njëjtë beson edhe Gjoshi. Ky i fundit e cilëson Qeverinë Kurti si të paaftë për ta realizuar këtë proces.

    “Partisë në pushtet ia kemi ofruar votat blanco për Vetting. Ia kemi dhënë këshillën e ndihmesën, por ata nuk kanë në gjendje që ta bëjnë një ligj.” – tha ai.

    Kurse, për pozitën e Kryeprokurorit të Shtetit, Përparim Gruda tha se asnjë ligj nuk i jep asnjë rol Qeverisë në përzgjedhjen e Kryeprokurorit, e nuk duhet të ketë as nëse zgjedhen ata në Qeveri.

    Ai beson që Qeveria Hamza, nëse i merr votat, nuk do të ketë asnjë rol në këtë përzgjedhje, njëherësh zotohet se nëse do të kenë mundësi do të bëjnë edhe intervenim në ndryshimin e Ligjit.

    Pozita e Kryeprokurorit të Shtetit në Kosovë është me ushtrues detyre që nga prilli i vitit 2020, meqë presidentja e Kosovës, Vjosa Osmani nuk e dekretoi Blerim Isufajn në këtë pozitë.

    Vetting-u është një nga çështjet kryesore të përfolura në Kosovë, që sa vite në fushën e Drejtësisë. Ky është proces i rivlerësimit të figurës së prokurorëve dhe gjyqtarëve dhe ka për qëllim rritjen e tyre profesionale, luftimin e korrupsionit dhe ndikimin e krimit të organizuar, politikës apo elementëve të tjerë të paligjshëm në dhënien e Drejtësisë.

    Për një temë tjetër, atë të pasurisë së zyrtarëve, Përparim Gruda, tha se PDK është kundër që pasuria e pajustifikueshme të bëhet përmes Byrosë Shtetërore për Verifikimin dhe Konfiskimin e Pasurisë së Pajustifikueshme.

    Gruda tha se janë për konfiskim të pasurisë, por nga një organ brenda Sistemit Prokurorial, e jo nga një Byro që është organ politik.

    “Byroja është në varësi të Kryeministrit. Nuk duhet me pasë as Kryeministri jonë, se na mundemi me thanë që mundemi me ba, por jo, ajo duhet të jetë brenda Sistemit Prokurorial.” – tha ai.

    Ndërsa, Betim Gjoshi tha se duhet të ndryshohet vullneti politik për Vetting-un.

    Ai deklaroi se në planin e tyre nuk ekziston themelimi i një Byroje si ajo që thotë Qeveria Kurti, por themelimi i Byrosë Kombëtare të Hetimit.

    “Këta (Qeveria Kurti) krejt ligjet i kanë bërë antikushtetuese për me fitu vota, për me thanë e keqe është Kushtetuesja edhe krejt këta tjerët që nuk po na lajnë më ba çka thotë ‘Albin Baba’.” – tha ai.

    Qeveria e tanishme, thotë Gjoshi, për herë të parë në historinë e Kosovës i ka menaxhuar krejt institucionet në Kosovës, duke i emëruar “prej presidentit e deri te portieri”. Ai përmendi rastin e ish-drejtorit të Korporatës Energjetike të Kosovës, Nagip Krasniqi dhe të ambasadorit në Kroaci, Martin Berishaj.

    “Ka pas kohë të mjaftueshme, nëse ka dashtë me i shti hajnat në burg. Na e kemi një ambasador që Presidentes i vjen marre me dal në foto me ta, i cili ka heq pare me thes prej bankave pa asnjë punëtor për tregti të GEN-it serb. I njëjti është ambasador e ka qenë këshilltar i Kryeministrit. Qysh bre nuk i vjen marre kush e përfaqëson shtetin e Kosovës. Kjo ka tregu që i mirë je veç nëse je vasal i kësaj Qeverie.” – tha ai.

    Më 11.09.2024, Qeveria e Kosovës ka miratuar ndryshimet në Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme – pasi Gjykata Kushtetuese kishte gjetur se disa Nene të këtij Ligji nuk ishin në harmoni me Kushtetutën. Ky Ligj ishte dërguar në Kushtetuese nga Partia Demokratike e Kosovës, më 21.02.2023.

    Një tjetër segment i rëndësishëm në fushën e Drejtësisë, që u sfiduan kandidatët për deputetë, është nëse do të themelohet në Kosovë një mekanizëm si në Shqipëri: si Struktura e Posaçme kundër Korrupsionit dhe Krimit të Organizuar.

    Përparim Gruda tha se si parti do të formojnë një Byro Kombëtare të Hetimit, si mekanizëm që vendoset brenda Sistemit Prokurorial.

    “Aktualisht është e menduar si mekanizëm administrativ, që varet prej shumicës parlamentare. Kjo është katastrofë. Nuk mundet me ndodhë kurrë. Ne duhet ta vendosim brenda organit prokurorial. Kjo siguron që i emëruari nuk është i emëruar i Qeverisë, por i Sistemit të Drejtësisë.” – tha Gruda.

    Planet për rajonin e Prishtinës

    Kandidatët e PDK-së për deputetë kanë prezantuar edhe disa plane investive në rajonin e Prishtinës, që ndërlidhen me qeverisjen qendrore.

    Kandidati Leutrim Retkoceri i cili është asamblist në Komunën e Prishtinës thotë se programi i tyre parasheh “Unazën e Jashtme” të Kryeqytetit me vlerë 400 milionë euro. Edhe pse ajo është filluar më herët, ai thotë se atë do ta bëjë Bedri Hamza, nëse bëhet Kryeministër.

    Kandidati i PDK-së për deputet, Leutrim Retkoceri. Foto: Naser Fejza/KALLXO.com

    Retkoceri tha se kanë paraparë legalizimin e ndërtimeve, zhbllokimin e miliarda eurove kapital, pastaj shfuqizimin e Ligjit në Tatimin në Pronë, subvencionimin për të gjithë fëmijët me nga 100  euro të cilët nuk mund të regjistrohen në Çerdhet publike.

    “Për uljen e tatimit në pronë nuk mund ta japim një shifër sepse ka prona, palujtshmëri të ndryshme që nuk mund të përkufizohet me një shifër.” – tha ai.

    Kandidati tjetër, Ilirik Musliu, i cili ka qenë Drejtor në Komunën e Prishtinës, tha se në pesë shtyllat programore të PDK-së hyjnë: zhvillimi i qëndrueshëm ekonomik, jeta më e mirë për secilin, arsim për të ardhmen, sistem shëndetësor për pacientin dhe një Kosovë e sigurt dhe e integruar.

    “Stimujt fiskalë janë shumë të rëndësishëm për sektorin privat, për faktin që do ta bëjmë ndryshimin e pagesës së TVSH-së, kemi me e ndryshu këtë praktikë dhe do ta bëjmë  praktikën e pagesës brenda regjionit të Kosovës.” – tha ai.

    Kandidati i PDK-së për deputet, Ilirik Musliu Foto: Naser Fejza/KALLXO.com

    Sipas tij, në përjashtim për bizneset të cilat qarkullojnë deri në 10 mijë euro do të bëjnë lirim nga tatimi në fitim për një periudhë të caktuar, për ata që investojnë mbi 500 mijë euro apo deri në 50 punëtorë.

    Përvoja e PDK-së në qeverisje

    Partia Demokratike e Kosovës (PDK) ka qenë në qeverisje nga viti 2008 deri në vitin 2019, por jo çdo herë si forca kryesore udhëheqëse.

    Nga viti 2008 deri në vitin 2014, PDK udhëhoqi Qeverinë me kryeministër Hashim Thaçin. Ky ishte mandati i parë dhe i dytë i saj.

    Kurse nga viti 2014 deri në 2017, PDK ishte pjesë e koalicionit qeverisës me Lidhjen Demokratike të Kosovës (LDK). Atëkohë, Kryeministër ishte Isa Mustafa nga LDK, ndërsa PDK mbante postin e Kryeparlamentarit.

    PDK ka qenë pjesë e Qeverisë edhe pas vitit 2017, por jo si forcë kryesore udhëheqëse. Pas vitit 2017 deri në 2019, PDK u rikthye si pjesë e koalicionit qeverisës. Këtë herë me Ramush Haradinajn nga Aleanca për Ardhmërinë e Kosovës (AAK) si Kryeministër. PDK mbante disa Ministri dhe poste të rëndësishme në këtë Qeveri.

    Prej atëherë PDK-ja ka qenë vetëm në opozitë. Në Zgjedhjet e vitit 2021, prej të cilave fituese doli Lëvizja Vetëvendosje, PDK zuri vendin e dytë për nga numri i votave, më saktësisht me 16.9%.

    “DebatPërnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve. RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    “Na s’jemi oligarkë. Asnjëri prej neve në KALLXO.com nuk jemi pasanika, as milionera e le më oligarka. Ne kemi qenë në RTK e na kanë largu prej RTK-së, saktë sepse kemi raportuar qysh oligarkët e kanë zhvat shtetin.” – ka deklaruar Jeta Xharra në hapje të Debatit të parë zgjedhor, në kuadër të “Debat Përnime”. 

  • PDK mban takim me bizneset në Shtime

    Kandidati për kryeministër nga radhët e Partisë Demokratike të Kosovës (PDK), Bedri Hamza ka takuar dhjetëra biznesmenë nga qyteti i Shtimes.

    Hamza tha se prioriteti i tij i parë është zhvillimi i qëndrueshëm ekonomik, duke përmendur se bizneset të cilat investojnë mbi 500 mijë euro dhe punësojnë mbi 50 punëtorë, 5 deri në 10 vitet e ardhshme do të lirohen nga pagesa në fitim.

    “Themelet e shtetit të zhvilluar ekonomikisht janë bizneset. Këtu unë nuk kam dilemë. Nëse të tjerët kanë dilema, unë këtu s’kam dilemë. Për këtë qëllim, prioriteti im i parë është zhvillimi i qëndrueshëm ekonomik. Bizneset të cilat investojnë mbi 500 mijë euro dhe punësojnë mbi 50 punëtorë, 5 deri në 10 vitet e ardhshme prej atij momenti kanë me u liru prej pagesës në fitim të korporatave. Përveç kësaj, të ardhurat për të punësuarit deri në 400 euro kanë me pas tatimin 0, kanë me u tatimu me 0. Prej 400 deri në 800 me 8%, edhe mbi 800, me 10%”- ka thënë Hamza.

    Kandidati për kryeministër i PDK-së ka treguar për projektin për ndërtimin e një autostradë të re e cila do të kalojë nëpër periferinë e Shtimes.

    “Autostrada e re do ta ketë kyçjen në Banullë të Lipjanit dhe do të kalojë përmes Shtimes deri në Qafën e Duhlës. Kjo autostradë do t’i lidhë tri autostradat kryesore, Autostradën e Kombit, Autostradën Gjilan – Dheu i Bardhë dhe Autostradën e Shkupit”- ka shkruar Hamza në Facebook.

    Në ditën e dytë të fushatës zyrtare, PDK-ja ka organizuar tubim edhe në qytetin e Ferizajt. Kryetari i kësaj komune, Agim Aliu është shprehur se ora e fitores po afron, ndërsa ka thënë se Ferizaj është shembulli më tipik i qeverisjes së Partisë Demokratike të Kosovës.

    E kandidati për kryeministër nga kjo parti, Bedri Hamza u zotua se vota për të “do të thotë Kosovë më të zhvilluar, më shumë vende të reja të punës dhe paga me të dinjitetshme”.

    “Do të rrisim pagat për 50 për qind, edhe për mësues, ushtarë, zjarrfikës, shërbyes civil, doktorë e të tjerë. Nuk kam se si mos t’ja filloj nga kategoria më meritore, familjet e dëshmorëve, invalidëve, veteranët”- ka thënë ai.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025. Për njё muaj, partitë politike pritet të mbajnë tubime elektorale me qytetarët për të fituar besimin e tyre në garën e 9 shkurtit 2025.

    Për këto zgjedhje janë certifikuar 28 subjekte politike me 1280 kandidatë.

    Sipas Ligjit, gjatë periudhës së fushatës zgjedhore, subjektet politike kanë të drejtë:

    – të organizojnë dhe mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes të cilave ata mund t’i shprehin lirisht mendimet e tyre me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; dhe të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e pavarësisë më 2008.

    Mërgimtarët kanë nisur më 09.01.2025 të votojnë përmes postës për Zgjedhjet parlamentare në Kosovë.Sipas të dhënave të KQZ-së, numri i qytetarëve me të drejtë vote në vendvotime në Kosovë është 1 milion e 970 mijë e 944 votues, ndërkaq numri i qytetarëve të cilët janë regjistruar për të votuar jashtë Kosovës është 104 mijë e 924 votues.

  • PDK-ja hap zyrtarisht fushatën me tubim nё Prishtinё, Hamza premton rritje tё pagave

    Kandidati pёr kryeministër i Partisё Demokratike tё Kosovёs, Bedri Hamza e ka hapur zyrtarisht fushatёn pёr zgjedhjet e 9 shkurtit, nё njё tubim tё organizuar nё sallёn “1 Tetori”, nё kryeqytet.

    Organizimi filloi rreth orёs 17:00, me intonimin e himnit kombёtar dhe atij shtetёror.

    Lideri i partisё, Memli Krasniqi e mori fjalёn i pari duke i falёnderuar tё gjithё tё pranishmit. Ndёrsa, tha se ёshtё i bindur qё rezultati i kёtyre zgjedhjeve ёshtё formimi i njё qёverie tё re dhe mё tё mirё pёr Kosovё.

    “Njё Kosovё mё e mirё ёshё e mundshme, njё Kosovё qё do ta bёj Bedri Hamza. Sot qёndroj kёto pёr t’ju thёnё qё PDK-ja ka njё program tё detajur dhe gjithpёrfshirёs, realisht e tё realizueshёm i cili do tё pёrmirёsoj cilёsinё e jetёn e qytetarёve tanё”- ka thёnё ai.

    Krasniqi tha se Bedri Hamza ёshtё kryeministri mё i mirё qё mund ta ketë Kosova sot.

    Nёn brohoritjet e mbështetësve tё tij, Bedri Hamza ka thёnё se prioritet i tij ёshtё zhvillimi ekonomik, vizioni pёr njё Kosovё mё tё fuqishme qё ka nё themel hapjen e vendeve tё reja tё punёs, rritjen e pagave tё tjera.

    “Nё muajt e parё tё Qeverisjes sime, pagat do t’i rris pёr 50 pёr qind, pёr 70 pёr qind do tё rris pensionet bazike, do tё rrisё edhe pensionet kontribudhёnese. Vota pёr mua dhe PDK nёnkupton paga dhe pensione dinjitoze pёr tё gjithё. Zotohem qё nё ditё e para do tё marrё hapa qё ndikojnё nё çmimin e energjisё elektrike”- deklaroi ai.

    Hamza tutje ka premtuar sistem shkollor gjithditor, qendra pёr kujdesin e tё moshuarve, shёndetёsi tё qashshme e tё avancuar, funksionalizimin e sigurimeve shendetёsore, barna falas pёr pacientet me kancer dhe ata me sëmundje kronike, financim tё bizneseve, bursa pёr studentetёt, investime transformuese nё infrastrukturё e tё tjera.

    “Nё qeverisjen time Kosova do ti riparojё dhe forcoj marrёdhёnniet em vendet e Bashkimit Europian dhe SHBA-nё. Do tё promovojmё stabilitet rajonal dhe do tё ecim me hapa tё shpejt nё procesin e integrimit euroatlantik. Do tё sjellemi si partner tё pёrgjegjshёm”- u shpreh ai.

    Fushata pёr zgjedhjet parlamentare nё Kosovё ka filluar zyrtarisht sot, mё 11.01.2025. Për njё muaj, partitë politike pritet të mbajnë tubime elektorale me qytetarët për të fituar besimin e tyre në garën e 9 shkurtit 2025.

    Për këto zgjedhje janë certifikuar 28 subjekte politike me 1280 kandidatë.

    Sipas Ligjit, gjatë periudhës së fushatës zgjedhore, subjektet politike kanë të drejtë:

    – të organizojnë dhe mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes të cilave ata mund t’i shprehin lirisht mendimet e tyre me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; dhe të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e pavarësisë më 2008.

    Mërgimtarët kanë nisur më 09.01.2025 të votojnë përmes postës për Zgjedhjet parlamentare në Kosovë.

    Sipas të dhënave të KQZ-së, numri i qytetarëve me të drejtë vote në vendvotime në Kosovë është 1 milion e 970 mijë e 944 votues, ndërkaq numri i qytetarëve të cilët janë regjistruar për të votuar jashtë Kosovës është 104 mijë e 924 votues.

  • Anëtarët e KQZ-së pretendojnë për ndikim në procesin e votimit në diasporë, Kurteshi i quan tendecioze 

    Anëtarë të KQZ-së në mbledhjen e mbajtur të premten, më 10.01.2025, ngritën pretendime për ndikim në procesin e votimit në diasporë. 

    Ishte anëtari i PDK-së në KQZ, Ilir Gashi, i cili ngriti shqetësime për procesin e votimit në diapsorë, duke thënë se ka tendecë për t’u pamundësuar apo manipuluar në disa raste ky lloj votimi. 

    Duke lëshuar një video-incizim përpara anëtarëve të KQZ-së, Gashi pretendoi se në rrjete sociale, ata që janë regjstruar për të votuar, po marrin ndihmë se si të votojnë dhe se po bëhet thirrje për ata që janë regjistruar për të votuar, të votojnë me postë. 

    Sipas Gashit, votimi me postë duhet të bëhet vetëm individualisht. 

    “Kam pranu video nga qytetarë që i ftojnë votuesit për t’u regjistruar përmes postës, gjoja për t’iu ndihmuar. Këto janë thirrje, përpjekje për kontaminim të procesit. Votimi përmes postës duhet të jetë individual, nëse ka dikush nevojë për informacione duhet të drejtohet në KQZ.” – ka thënë Gashi.

    Ai deklaroi se Prokuroria duhet të merret me këto çështje dhe se secili qytetar që bën një gjë të tillë, të ballafaqohet me Prokurorinë Speciale dhe Ligjet e Kosovës. 

    Këto pretendime të Gashit të PDK-së i kundërshtoi anëtari i LVV-së në KQZ, Sami Kurteshi. 

    Ai mohoi se video të tilla janë shqetësuese, duke thënë se Gashi ka tendencë të shpërndajë dyshime te njerëzit. 

    “Hiç nuk është shqetësim. Gjithkush e ka obligim gjithkujt me i ndihmu, deri në momentin që nuk shkruan votë me dorën e tij në votën e huaj. Secili prej nesh e ka për detyrë me i ndihmu çdokujt, deri në momentin që ai e mbush fletëvotimin vetë me dorën e tij. Kolegu don me shpërnda një skepticizëm, një dyshim te njerëzit që kurrkush-kurrkujt të mos i ndihmojë.” – tha Kurteshi. 

    Anëtari i PDK-së, Ilir Gashi gjatë mbledhjes kundërshtoi edhe ndërhyrjet e mundshme në votime dhe mbledhjen e Certifikatave personale të votuesve për t’u dërguar në Postë.  

    “Nuk lejohet ndërhyrja në votues, nuk lejohet mbledhja e Certifikatave personale të votuesve. As grumbullimi i tyre në një vend të caktuar, e pastaj dikush me i mbeldh e me i dërgu në Postë”.

    Ashpër i është kundërpërgjigjur Kurteshi i VV-së, i cili i quajti shpifje pretendimet e Gashit, duke thënë se këto diskutime po i bën ngase në Zgjedhjet paraprake, pjesa më e madhe e votave nga diaspora kanë qenë për Lëvizjen Vetëvendosje.

    “Po shpif. Nuk ka kërku kurrkush me i mbledhë Certifikatat. Pse po e përmend këtë? Kjo është dhimtë e 2021-shit, në 2021 78% të votave nga mërgata kanë qenë për Lëvizjen Vetëvendosje, prandaj. Prespektiva po shihet këtu. Le të delë Prokuroria, cilindo element që e gjen për vepër penale, ajo duhet me reagu.” – tha Kurteshi. 

    Tutje, anëtari i LDK-së në KQZ, Sami Hamiti gjatë fjalës së tij në mbledhje është shprehur se KQZ ka kryer punë të shkëlqyeshme për njoftimin e diasporës se si duhet të votohet. 

    “Ky insitucion e ka kry punën në mënyrë të shkëlqyeshme. Pjesët tjera po, shihet ashiqare, asistim në grup është. Konsideroj që nuk është në rregull. Nëse është nevoja KQZ me pas ende sqarime, por me u bo tubime me u votu, kredibilitet nuk ka.” – ka thënë Hamiti.   

    Procesi i votimit jashtë vendit do të zhvillohet në 17 Ambasada dhe 15 Konsullata, në 19 shtete të ndryshme të botës. Numri i qytetarëve, sipas të dhënave të KQZ-së, të cilët janë regjistruar për të votuar jashtë Kosovës është 104 mijë e 924 votues.

    Prej shumës totale, 84 mijë e 525 prej tyre kanë zgjedhur të votojnë përmes postës. Të dhënat e regjistrimit të popullsisë të vitit 2024, nga Agjencia e Statistikave të Kosovës, vënë në pah se në diasporë jetojnë rreth 550 mijë kosovarë.Gjithsej 2 milionë e 75 mijë e 868 votues do të kenë të drejtë vote këto Zgjedhje – sipas të dhënave të KQZ-së. Numri i qytetarëve me të drejtë vote në vendvotime vetëm në Kosovë është 1 milion e 970 mijë e 944 votues.

    Në Zgjedhjet parlamentare do të garojnë 27 subjekte politike. Prej tyre 19 janë parti politike, pesë koalicione, dy nisma qytetare dhe një kandidat i pavarur. Ky është procesi i parë i rregullt zgjedhor në Kosovë, që nga shpallja e Pavarësisë më 2008.

  • Diaspora nisi të votojë për Zgjedhjet në Kosovë, para se disa parti t’i publikojnë Programet zgjedhore

    Mërgimtarët kanë nisur të votojnë përmes postës për Zgjedhjet parlamentare në Kosovë, para se disa prej partive politike në vend t’i bëjnë  publike Programet me të cilat synojnë t’i fitojnë këto Zgjedhje.

    Pavarësisht kësaj, një pjesë e bashkatdhetarëve do ta vënë votën në zarf, veç në bazë të zotimeve që i kanë dëgjuar nga të preferuarit e tyre, nëpër emisione televizive, nëpër tubime apo edhe në rrjete sociale. 

    Për Xhevrije Statovcin, shqiptare e Kosovës e cila jeton në Ahen të Gjermanisë qe 22 vjet, është e rëndësishme që ta shohë Programin e Partisë para se të votojë për kandidatët për deputetë, mirëpo meqë ende nuk janë publikuar Programet e plota, asaj i ka mjaftuar t’i ndjekë pjesë-pjesë premtimet e deritashme.

    Mesazhi për votim nga Komisioni Qendror Zgjedhor (KQZ) Statovcit i ka arritur pikërisht më 09.01.2025 – ditën kur u hap votimi për diasporën.

    Për Kallxo.com, ajo thotë se sapo ta gjejë rastin e parë pas përfundimit të orarit të punës, bashkë me bashkëshortin e saj dhe nënën e tij do ta kryejnë procesin e votimit.

    Diaspora mund të votojë me postë deri më 08.02.2025. Pjesa tjetër e mërgimtarëve të regjistruar kanë të drejtë të votojnë nëpër Ambasada dhe Konsullata në shtetet përkatëse ose të udhëtojnë për votim në Kosovë më 09.02.2025.

    Komisioni Qendror Zgjedhor (KQZ) ka bërë të ditur se janë hapur kutitë postare në 23 shtete të ndryshme, si: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kosovë, Kroaci, Mal i Zi, Maqedoni e Veriut, Norvegji, SHBA, Shqipëri, Slloveni, Suedi, Turqi, Mbretëria e Bashkuar dhe Zvicër. Gjithashtu, janë treguar adresat e kutive postare, nëpër vendet përkatëse.

    Për Statovcin, edhe pse është shtetase e Gjermanisë qe më shumë se dy dekada, kjo është vetëm hera e dytë që e ka shfrytëzuar të drejtën e votës nga vendi ku jeton. Për shkak të angazhimeve të tjera ka vendosur që të mos presë derisa të publikohet Programi për ta hedhur votën, meqenëse e ka ndarë mendjen se cila parti i përmbush qëllimet e saj.

    “Unë në Kosovë nuk jetoj qe sa vjet, por po du me fitu dikush që ia shohim hajrin krejt. Nuk është që kam pa krejt çka kanë plan me ba nëse fitojnë. Po, deri diku, sa me vendos me ia qitë votën e di.” – tha ajo në bisedë për KALLXO.com.

    Por, të dy nuk e përjashtojnë rëndësinë që ka leximi i Programeve zgjedhore para se të hedhin votën.

    Deri më tani, secila prej katër partive të mëdha politike kanë publikuar nëpër rrjete sociale pjesë të Programeve të qeverisjes apo i kanë proklamuar përmes mediave e tubimeve nëpër Komuna të ndryshme. Lidhja Demokratike e Kosovës (LDK) dhe Partia Demokratike e Kosovës (PDK) janë dy subjektet që i kanë publikuar Programet e plota në uebfaqet e tyre. 

    Ndërkaq, Lëvizja Vetëvendosje (LVV) në një përgjigje për KALLXO.com ka deklaruar që Programin do ta publikojnë pas disa ditësh. E Aleanca për Ardhmërinë e Kosovës (AAK) nuk u është përgjigjur as telefonatave e as mesazheve në lidhje me këtë çështje.

    Për Valon Beqiraj, shqiptar i Kosovës i cili jeton në Siegburg të Gjermanisë, votimi përmes postës do të jetë hera e parë, sikundër që Zgjedhjet e zënë për herë të parë në një shtet tjetër për shkak se ka vetëm tri vjet që jeton atje.

    Ky proces atij i duket interesant dhe më i lehtë sesa të udhëtojë në Kosovë apo të votojë në objekte të misioneve diplomatike. Ai nuk e ka lexuar Programin e Partisë që do, por nuk e sheh si problem të madh meqenëse, sipas tij, ia di misionin qe sa kohë.

    “Ma mirë me votu me postë, se ma lehtë. Edhe kohën ta kursen. E Programin s’e kam lexu, po ia njoh misionin Partisë.” – tha ai për KALLXO.com.

    Procesi i votimit jashtë vendit do të zhvillohet në 17 Ambasada dhe 15 Konsullata, në 19 shtete të ndryshme të botës. Numri i qytetarëve, sipas të dhënave të KQZ-së, të cilët janë regjistruar për të votuar jashtë Kosovës është 104 mijë e 924 votues. Prej shumës totale, 84 mijë e 525 prej tyre kanë zgjedhur të votojnë përmes postës.

    Të dhënat e regjistrimit të popullsisë të vitit 2024, nga Agjencia e Statistikave të Kosovës, vënë në pah se në diasporë jetojnë rreth 550 mijë kosovarë.

    Gjithsej 2 milionë e 75 mijë e 868 votues do të kenë të drejtë vote këto Zgjedhje – sipas të dhënave të KQZ-së. Numri i qytetarëve me të drejtë vote në vendvotime vetëm në Kosovë është 1 milion e 970 mijë e 944 votues.

    Në Zgjedhjet parlamentare do të garojnë 27 subjekte politike. Prej tyre 19 janë parti politike, pesë koalicione, dy nisma qytetare dhe një kandidat i pavarur. Ky është procesi i parë i rregullt zgjedhor në Kosovë, që nga shpallja e Pavarësisë më 2008.