Ballina

Etiketë: Obiliq

  • Raportohen dy vdekje të dyshimta brenda një dite

    Policia raporton për dy vdekje të dyshimta, në raste të ndryshme. 

    Në Istog, Policia thotë se dje më 28.01.2025, një person ka raportuar për një burrë se ishte pa shenja jete. 

    “Njësitë relevante kanë dalur në vendin e ngjarjes, ku mjeku kujdestar ka konstatuar vdekjen e viktimës.” – njofton Policia. 

    Ndërkaq, me vendim të Prokurorit, trupi i viktimës thuhet se është dërguar në Institutin e Mjekësisë Ligjore (IML) për ekzaminim. 

    Një vdekje e dyshimtë është raportuar edhe në Obiliq, dje më 28.01.2025. Ku një burrë është gjetur pa shenja jete.  

    Policia thotë se në vendin e ngjarjes kanë dalur Njësitë relevante, ku mjeku kujdestar ka konstatuar vdekjen e viktimës.

    Me vendim të Prokurorit, viktima është dërguar për ekzaminim në IML – thekson Policia e Kosovës. 

  • Obiliq, Policia sekuestron dy armë zjarri, u ekspozuan nga i dyshuari në rrjete sociale

    Policia ka njoftuar se gjatë kontrollit në një shtëpi në Breznicë të Obiliqit ka sekuestruar dy armë zjarri dhe municion.

    Sipas Policisë, armët e sekuestruara ishin ekspozuar më parë në rrjetet sociale.

    “Njësitet e Stacionit Policor të Obiliqit, me autorizim të Prokurorit të Shtetit, në fshatin Breznicë të Obiliqit, kanë ushtruar kontroll në një shtëpi, (pronë e të dyshuarit që kishte ekspozuar armët në rrjete sociale), ku kanë gjetur  dhe sekuestruar: dy armë zjarri dhe municion”- thuhet në njoftimin e Policisë.

    Policia thotë se ndaj personit të dyshuar është hapur rast për veprën penale – armëmbajtje pa leje.

     

     

  • Kurti në Obiliq: Vetëm për dy vjet, KEK-ut ia kemi shtuar 745 punëtorë të rinj

    Lëvizja Vetëvendosje në vazhdën e aktiviteteve të fushatës për zgjedhjet që pritet të mbahen më 09.02.2025 ka mbajtur tubim në Obiliq. 

    Sipas faqes zyrtare të LVV-së, kandidati për deputet nga kjo parti, Halil Thaçi, ka thënë se gjatë katër viteve në qeverisje është punuar në punësim, barazi, zhvillim dhe sovranitet.

    “Kryeministri i Republikës së Kosovës, z. Albin Kurti, u shpreh se ashtu siç është shtëpia për familjen, është edhe shteti për popullin. Ai theksoi se si qeveri kemi zhvilluar ekonominë dhe kemi mbrojtur sovranitetin e Republikës cep më cep territorit”- thuhet në njoftimin e tyre. 

    Sipas njoftimit, kandidati për kryeministër, Albin Kurti, gjatë këtij tubimi ka theksuar se Qeveria e tij ka investuar në KEK dhe në komunën e Obiliqit, duke thënë se kanë hapur vende të reja të punës. 

    “Vetëm për dy vjet, KEK-ut ia kemi shtuar 745 punëtorë të rinj. E prej këtyre 745 punëtorëve të rinj, mbi 400 janë banorë të Kastriotit; pra, më shumë se gjysma e të punësuarve të rinj në KEK janë nga komuna juaj e dashur. Ky nuk është favorizim, kjo është drejtësi, është meritë. Kush më mirë se banorët e Kastriotit e njeh KEK-un dhe terrenin e tij? Kush punon me më shumë zell për KEK-un sesa banorët e Kastriotit? Askush.44 gra, ose 22% e të gjitha grave që punojnë sot në KEK, janë punësuar gjatë mandatit tonë qeverisës. Ndërkaq, në mandatin e ri do të kemi programe të reja, posaçërisht për gra e vajza, për punësim në sektorin e energjisë dhe në KEK. Ne punësojmë në KEK, sepse ne investojmë në KEK”- citohet të ketë thënë Kurti, sot më 20.01.2025. 

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj partitë politike pritet të mbajnë tubime elektorale me qytetarët për të fituar besimin e tyre në garën për zgjedhjet parlamentare të 09.02.2025.Për këto zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre, me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër, lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

     

  • Hamza e quan Obiliqin zemër energjetike: Ky qytet që i jep shumë Kosovës, meriton ma mirë

    Kandidati i PDK-së për kryeministër, Bedri Hamza, ka mbajtur një tubim me qytetarët e Obiliqit. Hamza e ka quajtur këtë qytet si zemër energjetike të Kosovës.

    Ai ka thënë se në Obiliq ditë e natë punohet për t’i dhënë dritë dhe ngrohje krejt vendit.

    “Në Obiliq, në zemrën energjetike të Kosovës, aty ku ditë e natë punohet për t’i dhënë dritë dhe ngrohje krejt vendit tonë. Ky qytet që i jep shumë Kosovës, meriton ma mirë”- ka shkruar ai.

    Hamza gjatë ditës ka zhvilluar vizita edhe në bizneset e qytetit të Klinës. Ai ka thënë se bizneset gjithandej Kosovës do ta kenë mbështetjen e qeverisë së tij.

    “Bizneset me qarkullim deri në 10 mijë euro nuk do të tatohen. Ato me qarkullim deri në 30 mijë euro do të tatohen sipas fitimit real, pas zbritjeve të lejuara. Secili ndërmarrës do ta ndjejë dorën e shtetit dhe me grante investive deri në 30% do t’i mbulojmë investimet e tyre”- ka thënë ai.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre, me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër, lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Ministria e Arsimit ndryshon periudhën e furnizimit me inventar të çerdhes që e përuroi në Milloshevë

    Ministria e Arsimit e përuroi çerdhen në fshatin Milloshevë të Obiliqit të premten, më 10.01.2025, ndonëse çerdhja nuk ishte e kompletuar me gjithë inventarin e nevojshëm.

    Pas raportimit të KALLXO.com se çerdhja në Milloshevë sipas kryetarit të Obiliqit, Xhafer Gashi, është ndërtuar por nuk ka inventar, Ministria e Arsimit e arsyetoi mosfurnizimin e çerdhes me inventar.

    Më shumë se dy orë para se të përurohej çerdhja në Milloshevë, Ministria e Arsimit tha se inventari do të kompletohet gjatë muajve në vazhdim.

    Por, pas përurimit të çerdhes, ministrja e Arsimit, Arbërie Nagavci, tha se kompletimi i çerdhes me inventar do të ndodhë në fillim të javës së ardhshme.

    Ekipi i KALLXO.com e ka vizituar çerdhen në Milloshevë dhe ka parë se akoma pa hyrë në objekt qytetarët përballen me rrugën e pashtruar dhe me baltë, kurse brenda objektit nuk është i gjithë inventari.

    Në përurimin e çerdhes përveç ministres së Arsimit, Arbërie Nagavci, e kryetarit të Obiliqit, mori pjesë edhe deputeti i Kuvendit të Kosovës, Halil Thaçi.

    “Ministrja, Arbërie Nagavci me këtë rast ka thënë se, gurëthemeli i këtij objekti është vendosur para një viti, ndërsa tash kur punimet janë realizuar në kohë rekord, po vazhdon inventarizimi, i cili pritet që të përfundojë gjatë javës së ardhshme” – thuhet në njoftimin e MASHTI-t.

    Sipas Ministrisë, çerdhja në Milloshevë ka kapacitet të akomodojë 80 fëmijë.

    Në anën tjetër, kryetari i Obiliqit, Xhafer Gashi, e konfirmoi për KALLXO.com më 09.01.2025 se do të merrte pjesë në përurimin e çerdhes.

    Sipas Gashit, Ministria e Arsimit ka kërkuar të bëhet përurimi i çerdhes të premten, më 10.01.2025, anipse nuk ka inventar.

    “Inventari pritet me ardhë hala, po çerdhja është ndërtu. Stafin e (çerdhes) e kena përzgjedhë”– ka thënë Gashi më 09.01.2025.

    Inventari i çerdhes në Milloshevë, sipas Gashit, është detyrë e Ministrisë së Arsimit.

    Kur u pyet se përderisa nuk e ka inventarin, kur pritet të hapet çerdhja në Milloshevë, Gashi tha se kurdo që vjen inventari janë të gatshëm ta hapin.

    Gashi ka treguar se çerdhja është ndërtuar nga bashkëpunimi i Ministrisë së Arsimit dhe Komunës së Obiliqit. Sipas tij, nga viti 2022 kanë kërkuar në Ministri që të ndërtohet kjo çerdhe.

    “Më 2022 nuk janë marrë parasysh, më 2023 është aprovu, si duket në pamundësi të kërkesave që ata i kanë pasë të shumta për ndërtim të çerdheve edhe ma në fund është aprovu kërkesa jonë, pas shumë insistimeve që ne i kemi adresuar, është e domosdoshme për komunitetin në atë zonë”– ka thënë Gashi.

    Në përgjigjen për KALLXO.com para përurimit të çerdhes, Ministria e Arsimit u arsyetua se operatori ekonomik për furnizimin e çerdheve me inventar ka qenë i njoftuar që furnizimin me inventar ta bëjë nga muaji janar 2025.

    “Duke qenë se objekti ka përfunduar në muajin dhjetor dhe procedurat e pranimit të punëve dhe pastrimit të objektit marrin kohë, si dhe pushimet e fund vitit, OE (operatori ekonomik) ka filluar me furnizim dhe presim që inventari të kompletohet brenda muajve në vazhdim”- tha Ministria e Arsimit.

    Ministria e Arsimit tha se punimet e ndërtimit dhe pranimi teknik i çerdhes në Milloshevë teknikisht kanë përfunduar në muajin dhjetor 2024.

    Sipas përgjigjes së tyre, pranimin teknik e kanë kryer inxhinierët e fushave përkatëse të kompanisë që ka ofruar shërbime profesionale në ndërtimin e çerdhes, më 20.12.2024.

    Ministria ka shtuar se vlera e projektit është 569,569.56 euro dhe kontrata është nënshkruar më 28.09.2023 në kohëzgjatje prej 36 muajve.

    Në anën tjetër, KALLXO.com raportoi më 08.01.2025 se si ministrja e Arsimit, Arbërie Nagavci, më 08.01.2025 e anuloi përurimin e Shkollës Fillore të Mesme të Ulët “Halil Alidema” në fshatin Pozharan të Vitisë dhe atë të çerdhes në fshatin Dobresh.

    Përurimi i shkollës dhe çerdhes u anulua pasi që të dyja fillimisht nuk kishin përfunduar: as pranimi teknik, madje kishte ende punë për t’u kryer brenda dhe jashtë objekteve arsimore.

    Çerdhja në fshatin Dobresh ishte e mbyllur dhe ekipi i KALLXO.com nuk pati qasje në të, por që nga jashtë vërehej se ende nuk është funksionalizuar në tërësi objekti, e madje as nuk është rekrutuar stafi.

    Në Shkollën “Halil Alidema” inventari shkollor është parë në klasat e shkollës, hapësira brenda ka përfunduar, ende nuk është bërë pranimi teknik, ndërsa ekipi i KALLXO.com në terren ka parë edhe punëtorët e kompanisë së kontraktuar derisa rregullonin shkallët emergjente të shkollës.