Ballina

Etiketë: nato

  • NATO e gatshme të punojë me Sorensenin si ndërmjetësues në dialogun Kosovë-Serbi

    NATO-ja ka shprehur gatishmëri për të punuar ngushtë me Peter Sorensenin kur të nisë zyrtarisht punën si i dërguar i Bashkimit Evropian për dialogun mes Kosovës dhe Serbisë.

    Pozita e tij është konfirmuar një ditë më parë, dhe ai do të nisë punën më 1 shkurt.

    “Vazhdimi i bashkëpunimit mes NATO-s dhe BE-së është kyç për ruajtjen e stabilitetit në rajonin e Ballkanit Perëndimor”, ka thënë zëdhënësja e NATO-s, Allison Hart përmes një postimi në X – platformë e njohur më parë si Twitter.

    Më herët gjatë ditës, i dërguari në shkuarje i BE-së për dialogun, Mirosllav Lajçak, ka thënë se është takuar me pasardhësin e tij, dhe janë duke u siguruar që transicioni të ndodhë sa më lehtë që është e mundur.

    Lajçak ka qenë në pozitën e ndërmjetësuesit për pesë vjet. Përgjatë mandatit të tij është arritur Marrëveshja për normalizimin e marrëdhënieve mes dy vendeve, por nuk është bërë asnjë hap drejt zbatimit të saj.

    Po të martën, emërimin e Sorensenit në pozitën e ndërmjetësuesit, e ka përshëndetuar edhe zëvendëskryeministri i Kosovës, Besnik Bislimi, njëherësh kryenegociator i Kosovës në dialogun me Serbinë.

    Ai ka thënë se pret qasje balancuese ndaj palëve, si parakusht për proces të suksesshëm drejt normalizimit të marrëdhënieve.

    Sorensen ka përvojë të gjatë diplomatike në strukturat e BE-së. Ai aktualisht është Këshilltar i lartë në Shërbimin e Veprimit të jashtëm të BE-së (EEAS) për diplomaci digjitale.

    Gjatë karrierës së tij diplomatike në BE, Sorensen ka ushtruar disa detyra në Ballkanin Perëndimor, përfshirë Kosovën, ku ka punuar në misionin e Kombeve të Bashkuara në Kosovë (UNMIK).

    Përvoja e tij nga rajoni thuhet se ka qenë edhe një prej argumenteve se pse kryediplomatja Kaja Kallas ka vendosur që ai të jetë pasardhësi i Lajçakut.

    Në të kaluarën, liderë të Kosovës, nisur nga presidentja e vendit, Vjosa Osmani e deri të kryeministri Albin Kurti, e kanë kritikuar Lajçakun për qasje të pabalancuar në dialog dhe për rreshtim me raste kah Serbia.

    Vetë Lajçak pati thënë në një intervistë për Radion Evropa e Lirë, muaj më parë, se pretendime të tilla nuk qëndrojnë dhe pati vlerësuar se shoqëritë në Kosovë dhe Serbi, nuk janë të gatshme për normalizim.

    Kosova dhe Serbia dialogojnë në Bruksel qysh prej vitit 2011.

    Palët kanë arritur një mori marrëveshjesh, por jo të gjitha janë zbatuar.

    Bashkimi Evropian u rikujton dy palëve shpesh se avancimi në procesin e dialogut është i lidhur me rrugën e tyre në integrimet euro-atlantike.

    Serbia gëzon statusin e vendit kandidat për anëtarësim në bllokun evropian dhe tashmë ka hapur disa kapituj për anëtarësim, ndërsa Kosova ka aplikuar për t’u bërë anëtare e BE-së, por aplikimi i saj nuk është shqyrtuar ende.

    Kosova është e vetmja në rajonin e Ballkanit Perëndimor që nuk ka status të vendit kandidat, ndonëse zyrtarë të lartë të BE-së thonë vazhdimisht se ardhmja e rajonit të Ballkanit është në bllok./REL

  • Ushtarët amerikanë kryejnë patrullime rutinore në Veri të Kosovës

    Ushtarët amerikanë të KFOR-it kanë kryer patrullime në Veri të Kosovës, përgjatë vijës kufitare. 

    Kështu ka bërë të ditur KFOR-i përmes një njoftimi, në të cilin thuhet se këto përpjekje janë pjesë e misionit të KFOR-it për të garantuar një mjedis të sigurt për të gjitha komunitetet që jetojnë në Kosovë. 

    Në njoftim thuhet se KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë e lirinë e lëvizjes në çdo kohë.
    “KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet përkatëse si reagues të sigurisë.” – përfundon njoftimi i KFOR-it.

  • Ministri Maqedonci thotë se letra dërguar komandantit të KFOR-it nuk ishte rizotim por sqarim

    Ministri i Mbrojtjes, Ejup Maqedonci, ka reaguar për letrën dërguar komandantit të KFOR-it në lidhje me angazhimin e Gardës Ceremoniale të FSK-së gjatë një ceremonie mortore.

    Sipas një njoftimi të ministrit, letra në fjalë është dërguar me qëllim që t’i sqarohen komandantit të KFOR-it rrethanat e angazhimit të një njësie të FSK-së në njërën nga komunat në veri të vendit, si dhe për ta siguruar atë që nuk ka pasur për qëllim në asnjë rast tensionimin e situatës. 

    Minsitri ka deklaruar se ajo letër në asnjë mënyrë nuk paraqet rizotim dhe se nuk mund të interpretohet si e tillë. 

    Kjo për shkak se, sipas ministrit, për angazhimin e FSK-së në veri ekziston një dokument në fuqi i dhënë si zotim nga ish-kryeministri Hashim Thaçi në prilll të vitit 2013 dërguar Sekretarit të Përgjithshëm të NATO-s, nga i cili thotë se derivojnë dhe kushtet e operimit e të koordinimit të FSK-së dhe KFOR-it për pjesën veriore të Kosovës. 

    “E ritheksoj, ashtu siç e kam thënë në çdo paraqitje timen publike, që personalisht nuk pajtohem me atë zotim, pasi vazhdoj të mendoj se ka qenë zotim i gabuar dhe i dëmshëm për ushtrinë tonë, si dhe me pasoja afatgjata. Mirëpo ashtu siç e kemi deklaruar si Ministri e Mbrojtjes dhe si Qeveri e Kosovës, letrën zotuese të vitit 2013 do ta respektojmë, sepse jemi të përgjegjshëm karshi obligimeve të trashëguara institucionale për aq kohë sa janë në fuqi”- ka shkruar Maqedonci sot, më 22.01.2025.

    Tutje, ministri i Mbrotjes ka thënë se është përgjegjësi e tij dhe e komandantit të KFOR-it tani kur thotë se ekziston zotimi i vitit 2013 i dhënë nga ish-kryeministri Thaçi, është që të sigurojnë njëri-tjetrin që do të bëjnë veprimet e nevojshme për të garantuar që angazhimi ushtarak në veri të bëhet në mënyrë të koordinuar.

  • Haradinaj nga SHBA: Besoj se me Administratën Trump, Kosova do ta zë hapin e anëtarësimit në NATO

    Kryetari i Aleancës për Ardhmërinë e Kosovës (AAK) dhe kandidati për Kryeministër nga kjo parti, Ramush Haradinaj ka marrë pjesë në aktivitetet e organizuara me rastin e inaugurimit të presidentit amerikan, Donald Trump në Shtetet e Bashkuara të Amerikës.

    Përmes një videomesazhi, Haradinaj ka thënë se beson që me Administratën Trump, Kosova do ta zë hapin e anëtarësimit në NATO.

    “Këtu u dha betimi i Presidentit të Amerikës dhe u shpallën objektivat për katër vjet. Besoj që Kosova ka me zënë hapin me këtë Administratë, në qëllimin e vet që të ndodhë anëtarësimi në NATO – direkt dhe shpejt.” – është shprehur Haradinaj.

    Gjatë qëndrimit në SHBA, Haradinaj ka zhvilluar takim me Alexander Kasanof, zëvendësndihmës sekretar i Departamentit të Shtetit për Ballkanin Perëndimor.

    Ai ka thënë se rikthimi i partneritetit strategjik Kosovë-SHBA dhe anëtarësimi i Kosovës në NATO ishin në fokus të diskutimit të tyre.

    “E falënderova për mbështetjen e vazhdueshme të SHBA-së ndaj Kosovës. Ndava vizionin tonë për një Kosovë të integruar plotësisht, në strukturat euroatlantike dhe ritheksova përkushtimin tonë të palëkundur për të përmbushur të gjitha obligimet, që rrjedhin nga partneriteti ynë me SHBA-në.” – ka thënë Haradinaj.

    Haradinaj, ka prezantuar 10 top-prioritetet e Aleancës për Ardhmërinë e Kosovës, bashkë me partnerët e saj të koalicionit, Nismën Socialdemokrate, Konservatorët, Forumin Intelektual E-30.

    Sipas Haradinajt, prioriteti i parë në listë është Kosova direkt në NATO dhe, siç thuhet, miqësi e përhershme me SHBA-në dhe BE-në.

    Fushata pёr Zgjedhjet parlamentare nё Kosovё ka filluar zyrtarisht, mё 11.01.2025.

    Për njё muaj partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare të 9 shkurtit 2025. Për këto Zgjedhje janë certifikuar 28 subjekte politike, me 1,280 kandidatë.

    Këto do të jenë Zgjedhjet e para të rregullta, që Kosova mban që nga shpallja e Pavarësisë më 2008.

  • Kurti takohet me Ministrin e Jashtëm të Norvegjisë – flitet për sigurinë e anëtarësimin në NATO

    Kryeministri kosovar, Albin Kurti u takua me ministrin e Punëve të Jashtme të Norvegjisë, Espen Barth Eide në Davos të Zvicrës.

    Ky takim u zhvillua në kuadër të Forumit Ekonomik Botëror që mbahet në Davos, nga 20 deri më 24.01.2025.

    “Sot do ta kemi nënshkrimin e Marrëveshjes për EFTA, e cila është një arritje e madhe. Ne kemi patur rritje të konsiderueshme në katër vjetët e fundit, 6% të BPV-së mesatarisht – duke mos shkuar asnjëherë poshtë 4%. Ne duam të vazhdojmë të rritemi, por eksportet janë shumë të rëndësishme. E, eksporti i të mirave dhe shërbimeve është i përfshirë tashmë në EFTA.” – citohet të ketë thënë Kryeministri në fillim të takimit.

    Sipas komunikatës për media të Zyrës së Kryeministrit, Kurti ka falënderuar Norvegjinë për mbështetjen ndaj Kosovës, me theks të veçantë në anëtarësimin në Organizata Ndërkombëtare dhe rrugëtimin drejt integrimit në BE.

    Në komunikatë thuhet se u bisedua rreth sfidave të përbashkëta të sigurisë dhe adresimit të tyre.

    Kurti ka folur për rëndësinë e anëtarësimit në NATO. Kjo krahas rreshtimit të Kosovës përkrah shteteve të BE-së dhe NATO-s në dënimin e agresionit rus në Ukrainë dhe mbështetjes së sanksioneve ndaj Rusisë.

    Kryeministri i Kosovës, Albin Kurti së bashku me dy ministret: atë të Industrisë, Ndërmarrësisë dhe Tregtisë, Rozeta Hajdari dhe të Ekonomisë, Artane Rizvanolli po marrin pjesë në Forumin Ekonomik Botëror në Davos.

    Shoqata Evropiane e Tregtisë së Lirë (EFTA) është një organizatë ndërkombëtare që promovon tregtinë e lirë dhe bashkëpunimin ekonomik ndërmjet shteteve të saj. EFTA ka si qëllim heqjen e barrierave tregtare dhe lehtësimin e fluksit të mallrave dhe shërbimeve midis vendeve anëtare. Organizata është e ndryshme nga Bashkimi Evropian (BE), megjithatë ajo bashkëpunon ngushtësisht me BE-në përmes Marrëveshjeve të ndryshme.

    Prej 20 deri më 24 janar 2024, derisa Konferenca e Davosit mbledh lojtarët kryesorë ekonomikë dhe përfaqësuesit qeveritarë, Kosova ka hapur hapësirën e saj “House of Kosovo”, kryesisht fal dy zhvilluesve të suksesshëm të patundshmërive, Esat Lika nga fshati Carrabreg në Kosovë dhe Ertion Axha nga Durrësi në Shqipëri.

    Këta dy merren me biznesin e patundshmërive dhe ia kanë dalë të sigurojnë një shesh prej 11.500 metrash katrorë të një ish-Sanatoriumi, që ndodhet rreth 800 metra larg prej Sallës së Kongresit të FEK-ut, me synim ta kthejë në një resort luksoz.

    https://kallxo.com/lajm/kurti-ne-forumin-ekonomik-ne-davos-do-te-nenshkruaje-marreveshjen-me-shtetet-e-efta/