Ballina

Etiketë: Mitrovicë

  • Investim 6 milionësh në objektin e QKMF-së në Mitrovicë të Jugut, rruga që të çon aty e papërfunduar – VIDEO

    Projekti i Qendrës Kryesore të Mjekësisë Familjare “Nexhat Çuni” në Mitrovicë të Jugut i cili u përurua më 06.01.2025 kushtoi plot 6 milionë e 16 mijë e 953 euro.

    Ndonëse Bedri Hamza së bashku me humanistin Halil Kastrati, kryetarin e PDK-së Memli Krasniqi e prenë shiritin për përurimin e kësaj qendreje, hyrja dhe rruga që të çon aty ende nuk janë gati.

    KALLXO.com ju sjell pamje të infrastrukturës së dobët që dukej, para se pacientët të mbërrijnë tek  objekti i përuruar të hënën më 06.01.2025.

    Fjalën hyrëse e kishte drejtori i Shëndetësisë së Komunën e Mitrovicës së Jugut, Fahri Shabani, i cili shpjegoi se para ndërtimit të këtij objekti, kjo QKMF ka funksionuar në një ndërtesë të stërvjetëruar me kushte shumë të papërshtatshme të punës dhe me vështirësi të madhe të qasjes për pacientë.

    Sipas tij, objekti i vjetër kishte hapësira të ngushta dhe të pamjaftueshme për nevojat e QKMF-së sepse në të njëjtën ndërtesë funksiononin edhe ambulancat specialistike të Spitalit të Përgjithshëm të Mitrovicës. Tutje ai potencoi se çka do të ofrojë tashmë QKMF-ja e re.

    “QKMF-ja e re është ndërtësë moderne me 8500 metra kator. Ka bodrumin, e cila ofron kushte shumë të mira të punës, hapësira të mjatueshme dhe qasje shumë të lehtë për pacientët. Këtu do të ofrohen shërbimet e shëndetësisë primare pra mjekësisë familjare, stomatologjisë, urgjencës, laboratorit të analizave, vaksinimit, shërbimet radiologjike pëfshirë mamografinë, barnatoren qëndrore, depon e barnave, këshillimore për sëmundjet kronike, hapësirat për aktivitetet e edukimit shëndetësorë, hapësira të mjaftueshme për aktivitete arsimore dhe edukative të nxënësve, studentëve dhe specializantëve. Do të kenë biblotekën, arkivën, sallat për trajnime e hapësirat për pushim”- tha Shabani.

    Sipas drejtorit, vlera totale e investimit për ndërtimin e kësaj qendreje shëndetësore, përfshirë rregullimin e oborrit është 6 milionë e 16 mijë e 953 euro. Teksa shtoi se 80% e shumës është donacion i shoqatës “Jetimat e Ballkanit” sipas tij “një dhuratë kjo për qytetin e Mitrovicës”.

    Ndërsa humanisti nga shoqata “Jetimat e Ballkanit”, Halil Kastrati kishte një këshillë për stafin e pacientët.

    “Uroj të ketë sa më pak pacientë. Ju lutem mirëmbajeni si shtëpinë tuaj. Uroj që të keni jetë e shëndet, të tilla projekte të mëdha me i realizu për Kosovën tonë të dashur. Mitrovicë e gëzofshi!”- tha Kastrati.

    Kryetari i Komunës së Mitrovicës së Jugut, Bedri Hamza tha se ky projekt u realizua falë fushatës “Jetimat e Ballkanit” duke e cilësuar si simbol të transfromimit të kujdesit parësor shëndetësor.

    “Qendër moderne e pajisur me aparatet e nevojshme që të vijnë në shprehje te dëshira juaj për të ofruar shërbimet më të mira për qytetarët. Qendra Kryesore e Mjekësisë Familjare në Mitrovicë nuk është vetëm një objekt i thjeshtë, ai është simbol i transfromimit të kujdesit parësor shëndetësor në Kosovë dhe i përmbushjes të premtimeve që u japim qytetarëve tanë”- tha kryetari.

    “Punësuam mbi 100 profesionistë të rinj për t’i fuqizuar ekipet shëndetësore në shëndetin parësor. Ndërtuam katër qendra familjare të reja. Në Iliridë, Koshtovë, Frashër e Stan Tërg. Renovuam nëntë qendra mjekësore në zonat urbane dhe rurale. Kemi rritur buxhetin për subvencione të shpenzimeve për barna dhe trajtime mjekësore duke ndihmuar mbi 2700 qytetarë me një fond prej 300 mijë eurosh”- përfundoi Hamza.

     

    Përurimi i QKMF-së “Nexhat Çuni” në Mitrovicë, 06.01.2024
    Foto: Florinda Kelmendi/ KALLXO.com

     

    Përurimi i QKMF-së “Nexhat Çuni” në Mitrovicë, 06.01.2024
    Foto: Florinda Kelmendi/ KALLXO.com

     

    Përurimi i QKMF-së “Nexhat Çuni” në Mitrovicë, 06.01.2024
    Foto: Florinda Kelmendi/ KALLXO.com

  • Kurti për Byronë për konfiskimin e pasurisë së pajustifikueshme: Nuk kanë ku me shku ma

    Në një tubim me qytetarë në Mitrovicë, kryeministri Albin Kurti kishte një mesazh për mërgimtarët që nuk kanë arritur të regjistrohen me kohë për zgjedhjet parlamentare të 09.02.2025.

    “Ata të cilët nuk janë regjistruar u mbetet metoda e vjetër: me aeroplan, autobus ose veturë”- tha Kurti në fjalimin e tij në tubimin e mbajtur në Qendrën e Kulturës “Rexhep Mitrovica” më 05.01.2025.

    Gjatë këtij tubimi, Kurti ka përmendur ato që ai i ka quajtur suksese të qeverisjes së tij gjatë vitit 2024.

    Në mesin e tyre ka përmendur faturimin e energjisë elektrike në katër komunat në veri të vendit.

    Gjithashtu, ai tha se ka përmirësime në shëndetësinë publike, pasi siç tha, ka transformime rrënjësore në klinikat e vendit.

    “Në shkurt çmimet e barnave do të jenë shumëfish më të ulëta… Janë rritur pensionet. Paga minimale pas trembëdhjetë vjetësh është shumëfishuar” – shtoi i pari i Qeverisë.

    Kurti përmendi edhe funksionalizimin e Institutit për dokumentimin e krimeve të kryera gjatë luftës.

    Dhe, si sukses tjetër, ai përmendi edhe nënshkrimin e marrëveshjes për ndërtimin e fabrikës së municioneve.

    Kryeministri ka përmendur edhe rritjen ekonomike. Ai tha se kjo rritje nuk është bërë me borxh të ri. “Përkundrazi, e kemi zvogëluar”.

    “Në mandatin e ardhshëm patjetër duhet ta reformojmë me shpejtësi sistemin e drejtësisë” – tha Kurti, i cili përmendi Byronë për konfiskimin e pasurisë së pajustifikueshme.

    “Të dashur mitrovicas, deri tash e kanë shty, nuk munden ma. Një herë Gjykata Kushtetuese na rrëzoi 5 me 2. Tash prapë është në Gjykatë Kushtetuese (Projektligjin për Byronë për konfiskimin e pasurisë së pajustifikueshme). S’kanë ku me shku ma. Do të bëhet Byroja. Secili do të tregojë sa ka pasuri. Nuk kemi kurrgjë kundër njerëzve të pasur, veç duhet me na kallëzu kah i kanë marrë paret” – tha Albin Kurti, duke shtuar se nevojitet edhe reforma e Këshillit Prokurorial të Kosovës.

    Projektligji për Byronë shtetërore për verifikimin dhe konfiskimin e pasurisë së pajustifikuar është miratuar më 05.12.2024 në Kuvendin e Kosovës.

    Më 13.12.2024, PDK ka dërguar në Gjykatën Kushtetuese 13 projektligjet e miratuara nga Kuvendi në seancën e 05.12.2024, përfshirë edhe Projektligjin për Byronë për konfiskimin e pasurisë së pajustifikueshme.

    Duke folur për situatën në veri të vendit, kryeministri tha se atje është shtrirë ligjshmëria e kushtetutshmëria.

    Ai foli edhe për sulmet terroriste në Banjskë dhe në kanalin e ujit të “Ibër-Lepencit”.

    “Ato ishin aksione dëshpërimi dhe të dështuara. Ata sa herë të provojnë do të dështojnë” – theksoi ai.

    Në këtë tubim kryeministri Kurti ishte i shoqëruar nga ministrat Xhelal Sveçla, Albulena Haxhiu, Faton Peci, Hekuran Murati dhe Arben Vitia.

    Ministri Sveçla: Për dallim nga qeverisjet e mëhershme, secili polic i Republikës se Kosovës ka armën e tij të gjatë

    Në tubimin në Mitrovicë, ministri i Punëve të Brendshme, Xhelal Sveçla, ka thënë se kushdo që ka menduar që Qeveria Kurti do ta realizojë luftën kundër krimit e korrupsionit e ta anashkalojë veriun ka gabuar rëndë.

    “Suksesi ynë kulmor në fushën e sigurisë është vendosja e sovranitetit në veri të vendit” – tha ministri në këtë tubim me qytetarë.

    Sipas ministrit, rinia e Kosovës ka qenë në fokus të punës së tyre, andaj, sipas tij, me ngulm janë luftuar narkotikët.

    “Janë konfiskuar lloje të drogave nga më të ndryshmet e janë shkatërruar laboratorë të drogave” – shtoi ai.

    Duke folur për veprimet e Qeverisë, ministri ka përmendur faktin se për vitin 2025, Policia e Kosovës ka 152 milionë euro buxhet.

    “Për dallim nga qeverisjet e mëhershme, secili polic i Republikës se Kosovës ka armën e tij të gjatë. Ne për katër vite kemi blerë  më shumë autoblinda sesa që janë blerë para 20 viteve” – shtoi Sveçla.

    Ministri Sveçla përmendi edhe dyfishimin e hetuesve që merren me krimet e luftës.

    Tutje, ai ka folur edhe për aksionet në veri të vendit.

    Sipas tij, ata që dikur janë trajtuar si të paprekshëm, e të cilëve iu hoqën aktakuzat, “pasi i hetuam ikën në Serbi”.

    “Ata kanë pasur institucione ilegale e nuk i kanë më. Kanë rrahur e dëbuar shqiptarë – nuk munden më. Kanë pasur targa ilegale e dinarin – nuk i kanë më. Kanë pasur laboratorë të drogës – nuk i kanë më. Kanë realizuar kontrabandë – nuk mund ta bëjnë më. Kanë provuar të pengojnë zgjedhjet demokratike – kanë dështuar. Kanë tentuar të mundësojnë funksionimin normal të vendit tonë me sulmin në kanalin ‘Ibër-Lepencit’ – kanë dështuar” – theksoi ministri i Punëve të Brendshme, duke shtuar se Qeveria e drejtuar nga Albin Kurti nuk ua ka lënë në dorë veriun e vendit atyre që “sulmin e Banjskës nuk duan ta cilësojnë sulm terrorist”.

    Ministri Peci: Në Qeverinë Kurti ka funksionuar buka, pushka dhe diplomacia

    Ndërsa, ministri i Bujqësisë, Faton Peci, në këtë tubim ka thënë se mund të dalin ballëhapur para mitrovicasve për atë që ka bërë Qeveria Kurti dhe Ministria që ai drejton.

    Ministri tha se janë mbi 40 përfitues të granteve nga Mitrovica.

    “Në Qeverinë Kurti ka funksionuar buka, pushka dhe diplomacia” – ka thënë ministri Peci.

    “Më duhet të them që Mitrovica është amaneti i Isa Boletinit, qytet ku ka lindur roku e lulëzuar sporti, ka marrë epilog me personalitetin që quhet Albin Kurti. Ne si Mitrovicë i kemi 1,001 arsye për ta votuar Albin Kurtin kryeministër” – ka theksuar ministri Faton Peci.

    Në këtë tubim, para mitrovicasve kanë shpalosur punët e tyre edhe ministrja e Drejtësisë, Albulena Haxhiu, ministri i Shëndetësisë, Arben Vitia dhe ministri i Financave, Hekuran Murati.

    Shënim: Artikulli është edituar, me ç’rast janë shtuar edhe deklarimet e ministrave Xhelal Sveçla e Faton Peci. Koha e editimit: 05.01.2025, ora 20:32