Ballina

Etiketë: Mitrovicë

  • Banorët e Koshtovës së Bobit në Mitrovicë kërkojnë rregullimin e shtratit të lumit – VIDEO

    Shtrati i lumit i parregulluar që kalon në afërsi të 25 shtëpive në fshatin Koshtovë e Bobit në Komunën e Mitrovicës së Jugut po krijon vështirësi dhe rrezik për jetesën e banorëve.

    Banorët e lagjeve “Binaku” dhe “Latifi” thonë se edhe pas 11 vjetëve që ishin munduar për të rregulluar këtë – siç e quajnë kanal – nuk kanë marrë asnjë ndihmesë.

    “Problemi është se që 11 vjet kemi participuar dy lagjet. Kemi qenë në Komunë, por asnjë përgjigje nuk kemi. Po, po…, jo nuk thonë kurrë. Punë nuk kryejnë kurrë. Kështu kemi mbetur në mëshirë të fatit.” – ka thënë për KALLXO.com banori i fshatit, Sherif Latifi.

    Latifi ka shtuar se “nuk e di, nëse nuk ndërmerret diçka këtu, ne veç do të largohemi krejt dhe do të shpërngulemi prej këtu”.

    “Te Granit Tmava (Drejtori Komunal) jena kanë për qit rekë (lumë), por na ka thënë që duhet të shkojmë në Emergjencë. Kemi shkuar në Emergjencë, ku na thanë që nuk kemi buxhet për këto dhe kemi mbetur kështu.” – pohoi Latifi.

    Një tjetër banor, Sheshivar Brahimi ka thënë për KALLXO.com, se është i gatshëm të marrë “hapa ekstremë”, nëse nuk do të ketë ndonjë ndërhyrje nga autoritetet lokale.

    “Unë jam Sheshivar Brahimi dhe do të dal tek Ura. Do të lajmëroj Komunën për datën kur dhe do të bllokoj rrugën. Unë do të jem iniciator për rrugën. Jam plakë, le të më çojnë ku duan. Nuk ka lidhje. Jo, jo, paguaj rrymën, paguaj ujin, paguaj bërllogun, çka na, ku jetojmë ne!?” – tha Brahimi.

    Sipas banorëve ata kishin kontribuar me afro 5 mijë euro për rregullimin e këtij kanali, para 11 vjetëve.

    “Në qeverisjen e Avni Kastratit kemi kontribuar, saktësisht nuk e di, dikund rreth 5 mijë euro. Kanë filluar të rregullojnë dhe pastaj e kanë ndërprerë. Na thanë se deri këtu kemi.” – ka përfunduar Latifi.

    Se çfarë kërkojnë nga aktorët komunalë, na tregon banori Sheshivar Brahimi, ku thotë se duhet të rregullohet ndonjë mur apo rindërtimi i kanalit.

    “Që aty 1 metër e 20 është ku është rregulluar. Aty pa u bërë një mur, nëse lejohet, ose të bëhet kanalizim, është edhe më mirë. Por, nëse nuk bëhet kanalizimi, le të bëhet si në Vaganicë që u bë kështu, sepse deri atje përtej pemëve është i shtetit, nuk është i komshinjës, por është i shtetit.” – potencoi Brahimi.

    KALLXO.com ka kontaktuar edhe me Drejtorinë për Shërbime Publike dhe Infrastrukturë në Mitrovicën e Jugut, por deri në publikimin e këtij artikulli nuk ka marrë përgjigje.

  • Grabitje e armatosur në një pompë të derivateve në Mitrovicë, policia jep detaje

    Dy persona të maskuar nën kërcënimin e armës dyshohet se kanë grabitur një shumë të parave dhe më pas kanë ikur.

    Rasti ka ndodhur më 17.01.2025 rreth orës 04:15 në një pompë derivatesh në fshatin Shupkovc të Mitrovicës, konfirmon zëdhënësi i Policisë së Kosovës për rajonin e Mitrovicës, Avni Zahiti.

    “Bazuar në informatat dhe hetimet  fillestare, dyshohet se dy persona të maskuar nën kërcënimin e armës kanë grabitur një shumë të parave dhe kanë ikur në drejtim të panjohur”- tha Zahiti për KALLXO.com.

    Ai potencoi se njësitet përkatëse policore janë duke ndërmarrë veprime hetimore në drejtim të identifikimit të personave të dyshuar dhe mbledhjen e provave relevante në lidhje me këtë rast.

  • Mitrovicë – Instruktori dyshohet se pranoi ryshfet për kalimin e testit me shkrim për patentë-shofer

    Policia e Kosovës njofton se ka arrestuar dy persona për dhënie dhe marrje të ryshfetit, në Mitrovicë, të enjten, më 15.01.2025. 

    Sipas Policisë, dyshohet se njëri prej të arrestuarve, në cilësinë e instruktorit të vozitjes në një Autoshkollë private, ka pranuar nga i dyshuari tjetër para, me qëllim të lehtësimit të procedurës për kalimin e testit me shkrim për kategorinë B të vozitjes. 

    Ndërkaq, Policia thotë se në cilësi të provave materiale janë sekuestruar 600 euro, para të gatshme dhe dy telefona celularë. 

    “Me urdhër të Prokurorit, të dyshuarit pas intervistimit janë dërguar në mbajtje.” – njofton Policia, më 16.01.2025. 

  • Eman Rrahmani në Mitrovicë premton nga 500 euro në muaj për gratë lehona

    Koalicioni për Familjen më 15.01.2025 ka mbajtur tubim elektoral në qytetin e Mitrovicës duke vazhduar fushatën për zgjedhjet e 09.02.2025.

    I pari këtij Koalicioni, Eman Rrahmani, ka thënë se garantojnë që do të realizojnë projektin për mbështetjen e nënave.

    Ai ka premtuar se për secilën grua që lind fëmijë do të ketë mbështetje financiare prej 500 eurove çdo muaj për dy vite.

    “E keni pa se çka është provu të bëhet në vendin tonë. Ju në Mitrovicë keni edhe probleme për shkak të aktiviteteve të strukturave paralele në veri. E di që e keni edhe më të domosdoshme dhe më të nevojshme që të angazhohemi që kjo kauzë të shkojë përpara sepse nuk mundemi që në 2025 nataliteti të jetë më i lartë në vendet fqinje se në Mitrovicë”- ka thënë ai.

    Ai ka shtuar se ky Koalicion nuk lejon martesat mes personave të gjinisë së njëjtë.

    Ndërsa, kandidati për deputet i këtij Koalicioni, Selim Pacolli, ka thënë se këto subjekte politike janë bërë bashkë me qëllimin për të mbrojtur familjen e traditave.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Mosmarrëveshje rreth një borxhi, i dyshuari i kërkoi një gruaje të kryejë marrëdhënie seksuale

    Policia e Kosovës në Mitrovicë ka arrestuar një person i cili dyshohet se i kishte kërkuar një gruaje të kryejë marrëdhënie seksuale, pas një mosmarrëveshjeje rreth një borxhi të datës 28.12.2024.

    Sipas Policisë, rasti është raportuar më 14.01.2025 dhe është duke u hetuar.

    “Palët janë intervistuar dhe me vendim të Prokurorit i dyshuari është arrestuar dhe dërguar në mbajtje.” – thuhet në njoftimin e Policisë, më 15.01.2025.

    Nga Policia, rasti është trajtuar “kanosje”.