Ballina

Etiketë: LVV

  • Diaspora nisi të votojë për Zgjedhjet në Kosovë, para se disa parti t’i publikojnë Programet zgjedhore

    Mërgimtarët kanë nisur të votojnë përmes postës për Zgjedhjet parlamentare në Kosovë, para se disa prej partive politike në vend t’i bëjnë  publike Programet me të cilat synojnë t’i fitojnë këto Zgjedhje.

    Pavarësisht kësaj, një pjesë e bashkatdhetarëve do ta vënë votën në zarf, veç në bazë të zotimeve që i kanë dëgjuar nga të preferuarit e tyre, nëpër emisione televizive, nëpër tubime apo edhe në rrjete sociale. 

    Për Xhevrije Statovcin, shqiptare e Kosovës e cila jeton në Ahen të Gjermanisë qe 22 vjet, është e rëndësishme që ta shohë Programin e Partisë para se të votojë për kandidatët për deputetë, mirëpo meqë ende nuk janë publikuar Programet e plota, asaj i ka mjaftuar t’i ndjekë pjesë-pjesë premtimet e deritashme.

    Mesazhi për votim nga Komisioni Qendror Zgjedhor (KQZ) Statovcit i ka arritur pikërisht më 09.01.2025 – ditën kur u hap votimi për diasporën.

    Për Kallxo.com, ajo thotë se sapo ta gjejë rastin e parë pas përfundimit të orarit të punës, bashkë me bashkëshortin e saj dhe nënën e tij do ta kryejnë procesin e votimit.

    Diaspora mund të votojë me postë deri më 08.02.2025. Pjesa tjetër e mërgimtarëve të regjistruar kanë të drejtë të votojnë nëpër Ambasada dhe Konsullata në shtetet përkatëse ose të udhëtojnë për votim në Kosovë më 09.02.2025.

    Komisioni Qendror Zgjedhor (KQZ) ka bërë të ditur se janë hapur kutitë postare në 23 shtete të ndryshme, si: Australi, Austri, Belgjikë, Çeki, Danimarkë, Francë, Gjermani, Holandë, Hungari, Itali, Kanada, Kosovë, Kroaci, Mal i Zi, Maqedoni e Veriut, Norvegji, SHBA, Shqipëri, Slloveni, Suedi, Turqi, Mbretëria e Bashkuar dhe Zvicër. Gjithashtu, janë treguar adresat e kutive postare, nëpër vendet përkatëse.

    Për Statovcin, edhe pse është shtetase e Gjermanisë qe më shumë se dy dekada, kjo është vetëm hera e dytë që e ka shfrytëzuar të drejtën e votës nga vendi ku jeton. Për shkak të angazhimeve të tjera ka vendosur që të mos presë derisa të publikohet Programi për ta hedhur votën, meqenëse e ka ndarë mendjen se cila parti i përmbush qëllimet e saj.

    “Unë në Kosovë nuk jetoj qe sa vjet, por po du me fitu dikush që ia shohim hajrin krejt. Nuk është që kam pa krejt çka kanë plan me ba nëse fitojnë. Po, deri diku, sa me vendos me ia qitë votën e di.” – tha ajo në bisedë për KALLXO.com.

    Por, të dy nuk e përjashtojnë rëndësinë që ka leximi i Programeve zgjedhore para se të hedhin votën.

    Deri më tani, secila prej katër partive të mëdha politike kanë publikuar nëpër rrjete sociale pjesë të Programeve të qeverisjes apo i kanë proklamuar përmes mediave e tubimeve nëpër Komuna të ndryshme. Lidhja Demokratike e Kosovës (LDK) dhe Partia Demokratike e Kosovës (PDK) janë dy subjektet që i kanë publikuar Programet e plota në uebfaqet e tyre. 

    Ndërkaq, Lëvizja Vetëvendosje (LVV) në një përgjigje për KALLXO.com ka deklaruar që Programin do ta publikojnë pas disa ditësh. E Aleanca për Ardhmërinë e Kosovës (AAK) nuk u është përgjigjur as telefonatave e as mesazheve në lidhje me këtë çështje.

    Për Valon Beqiraj, shqiptar i Kosovës i cili jeton në Siegburg të Gjermanisë, votimi përmes postës do të jetë hera e parë, sikundër që Zgjedhjet e zënë për herë të parë në një shtet tjetër për shkak se ka vetëm tri vjet që jeton atje.

    Ky proces atij i duket interesant dhe më i lehtë sesa të udhëtojë në Kosovë apo të votojë në objekte të misioneve diplomatike. Ai nuk e ka lexuar Programin e Partisë që do, por nuk e sheh si problem të madh meqenëse, sipas tij, ia di misionin qe sa kohë.

    “Ma mirë me votu me postë, se ma lehtë. Edhe kohën ta kursen. E Programin s’e kam lexu, po ia njoh misionin Partisë.” – tha ai për KALLXO.com.

    Procesi i votimit jashtë vendit do të zhvillohet në 17 Ambasada dhe 15 Konsullata, në 19 shtete të ndryshme të botës. Numri i qytetarëve, sipas të dhënave të KQZ-së, të cilët janë regjistruar për të votuar jashtë Kosovës është 104 mijë e 924 votues. Prej shumës totale, 84 mijë e 525 prej tyre kanë zgjedhur të votojnë përmes postës.

    Të dhënat e regjistrimit të popullsisë të vitit 2024, nga Agjencia e Statistikave të Kosovës, vënë në pah se në diasporë jetojnë rreth 550 mijë kosovarë.

    Gjithsej 2 milionë e 75 mijë e 868 votues do të kenë të drejtë vote këto Zgjedhje – sipas të dhënave të KQZ-së. Numri i qytetarëve me të drejtë vote në vendvotime vetëm në Kosovë është 1 milion e 970 mijë e 944 votues.

    Në Zgjedhjet parlamentare do të garojnë 27 subjekte politike. Prej tyre 19 janë parti politike, pesë koalicione, dy nisma qytetare dhe një kandidat i pavarur. Ky është procesi i parë i rregullt zgjedhor në Kosovë, që nga shpallja e Pavarësisë më 2008.

  • Sallahu thotë se KQZ e shkeli ligjin me ndarjen e numrit për Listën Serbe

    Zëvendësministri i Drejtësisë, Blerim Sallahu ka reaguar pasi Komisioni Qendror i Zgjedhjeve (KQZ) ka hedhur shortin për renditjen e partive politike në fletëvotime për Zgjedhjet e datës 09.02.2024 – duke e përfshirë edhe Listën Serbe.

    Lëvizja Vetëvendosje ka paraqitur Ankesë në Panelin Zgjedhor për Ankesa dhe Parashtresa (PZAP), më 02.01.2025, kundër Vendimit të KQZ-së për certifikimin e Listës Serbe.

    Sallahu ka thënë se me tërheqjen e shortit për Listën Serbe KQZ-ja e ka shkelur Ligjin – duke mos e pritur Vendimin përfundimtar të PZAP-së.

    “KQZ shkel sërish Ligjin! Lëvizja VETËVENDOSJE! ka bërë Ankesë në PZAP kundër Vendimit të KQZ-së lidhur me certifikimin e Listës Serbe. Në bazë të Nenit 130 të Ligjit për Procedurën e Përgjithshme Administrative, akti administrativ pezullohet përderisa të vendoset Ankesa në organin më lart, në rastin konkret, në PZAP. KQZ ka shkelur Ligjin me rastin e ndarjes së numrit për subjektin politik Lista Serbe – duke mos pritur Vendimin përfundimtar të PZAP-së.” – ka shkruar Sallahu në Facebook.

    Më 06.01.2024 janë përcaktuar numrat e partive politike që do të jenë pjesë e garës për Zgjedhjet e rregullta parlamentare, më 09.02.2025.

    Përmes shortit në Zgjedhjet e 9 shkurtit Lëvizja Vetëvendosje (LVV) do të ketë numrin 118, Lidhja Demokratike e Kosovës (LDK) 124, Partia Demokratike e Kosovës (PDK) 131, Koalicioni AAK-NISMA-Lista Konservatore 137 dhe Koalicioni për Familjen 129.

    Përfaqësuesit e Listës Serbe dhe Srbska Demokratka nuk morën pjesë në tërheqjen e shortit për Zgjedhjet e 9 shkurtit. Në mungesë të përfaqësuesve të tyre shorti u tërhoq nga Sekretariati i KQZ-së.

    Lista Serbe qëlloi e treta, por në mungesë të përfaqësueve të saj, numri u tërhoq nga anëtarët e KQZ-së. Numri i kësaj partie doli të jetë 112.

    Lëvizja Vetëvendosje, më 02.01.2025, ka dorëzuar Ankesë në PZAP kundër Vendimit të KQZ-së për certifikimin e Listës Serbe për Zgjedhjet që do të mbahen më 9 shkurt në Kosovë.

    Kjo parti pretendon se “nxjerrja e Vendimit në emër të KQZ-së, por pa miratim të KQZ-së” është sulmi i radhës ndaj rendit tonë ligjor për shkak të Listës Serbe.

    Komisioni Qendror i Zgjedhjeve (KQZ), në ditën e fundit të vitit 2024, ka certifikuar Listën Serbe për Zgjedhjet 2025.

    Ky Vendim është marrë pasi Gjykata Supreme e Kosovës e ka hedhur poshtë si të palejuar Ankesën e Lëvizjes Vetëvendosje (LVV), kundër Vendimit të Panelit Zgjedhor për Ankesa dhe Parashtresa (PZAP), që e “urdhëronte” KQZ-në për ta certifikuar Listën Serbe për pjesëmarrje në Zgjedhje.

    https://kallxo.com/lajm/lvv-ankohet-ne-pzap-kerkon-anulimin-e-vendimit-te-kqz-se-per-certifikimin-e-listes-serbe/

  • Beteja ligjore mes LVV-së dhe Listës Serbe

    Lëvizja Vetëvendosje (LVV) e kryeministrit të Kosovës, Albin Kurti nuk heq dorë nga qëllimi për të kundërshtuar pjesëmarrjen e Listës Serbe në zgjedhjet e 9 shkurtit, dhe të enjten ka paraqitur përsëri ankesë kundër vendimit të Komisionit Qendror Zgjedhor (KQZ) për ta certifikuar këtë parti dhe ka kërkuar anulimin e tij.

    Paneli Zgjedhor për Ankesa dhe Parashtresa (PZAP), i cili është përgjegjës për përgjigje në ankesën e Vetëvendosjes, nuk iu përgjigj kërkesës së Radios Evropa e Lirë për të sqaruar nëse do ta shqyrtojë atë.

    Më herët, ky Panel kishte marrë vendim në favor të Listës Serbe, duke vepruar mbi ankesën e kësaj partie – më të madhes së serbëve në Kosovë – pasi anëtarët e KQZ-së nga radhët e Lëvizjes Vetëvendosje kundërshtuan certifikimin e saj. Më pas, LVV bëri ankesë në Gjykatën Supreme të Kosovës, e cila po ashtu mori vendim në favor të Listës Serbe.

    Një nga arsyet e kundërshtimit të pjesëmarrjes së Listës Serbe në zgjedhje nga Vetëvendosja qeverisëse është fakti që Lista Serbe nuk e njeh Kosovën si shtet dhe nuk është distancuar nga ish-nënkryetari i saj Millan Radoiçiq, i cili ka marrë përgjegjësinë për sulmin e armatosur në Banjskë, ku u vra një polic kosovar.

    Ndërkohë, kryetari i Listës Serbe, Zllatan Elek, deklaroi se kryeministri i Kosovës, Albin Kurti, po përpiqet të pengojë pjesëmarrjen e kësaj partie në zgjedhje, pasi e konsideron atë “kundërshtarin më të madh”.

    “Ndërsa Kurti dhe të vartësit e tij na sulmojnë dhe nuk na lejojnë të marrim pjesë në zgjedhje, ne e dimë se jemi në rrugën e duhur. Lista Serbe është mburoja e qëndrimit dhe mbijetesës së serbëve në këto hapësira, dhe për këtë arsye Kurti na sheh si rrezikun më të madh. Ai do të bëjë gjithçka për të na penguar të marrim pjesë në zgjedhjet e ardhshme”, tha Elek më 3 janar për Radiotelevizionin publik të Serbisë (RTS).

    Çfarë thotë ligji?

    Lëvizja Vetëvendosje, në një postim në llogarinë e saj në Facebook, ka deklaruar se kërkon anulimin e vendimit të Komisionit Qendror të Zgjedhjeve për pjesëmarrjen e Listës Serbe në zgjedhje, bazuar në nenin 119 të Ligjit për Zgjedhjet e Përgjithshme.

    Në këtë nen thuhet se një person, që konsideron se të drejtat e tij janë shkelur lidhur me procesin zgjedhor të rregulluar nga Ligji për Zgjedhjet e Përgjithshme ose rregullat zgjedhore, mund të paraqesë ankesë në Panelin Zgjedhor për Ankesa dhe Parashtresa.

    Sipas kësaj partie, certifikimi i Listës Serbe, pa u kryer procesi i votimit në KQZ, përbën “sulm ndaj rendit tonë ligjor”.

    “Lista Serbe nuk është certifikuar në përputhje me Ligjin, por është kontrabanduar kundërligjshëm”, thuhet ndër të tjera në deklaratë.

    Nga ana tjetër, kryetari i KQZ-së Kreshnik Radoniqi, deklaroi se, bazuar në nenin 118 të Ligjit për Zgjedhjet e Përgjithshme, vendimet e Panelit Zgjedhor për Ankesa dhe Parashtresa janë të detyrueshme për institucionin që drejton, nëse Gjykata Supreme e Kosovës nuk vendos ndryshe.

    Reagimet e komunitetit ndërkombëtar

    Komuniteti ndërkombëtar ka shprehur shqetësimin se procesi i verifikimit të subjekteve politike është “i motivuar politikisht”, duke theksuar se “është e domosdoshme që votuesit, dhe jo trupat politike, të vendosin se kush i përfaqëson ata”.

    Para certifikimit të Listës Serbe, më 31 dhjetor nga KQZ-ja, Bashkimi Evropian ka deklaruar se është e nevojshme të sigurohet pjesëmarrja e lirë e të gjithë kandidatëve dhe partive politike të kualifikuara.

    Ata shtuan se procesi i certifikimit duhet të bazohet në standardet dhe procedurat ligjore, në përputhje me ligjet në fuqi, pa ndërhyrje politike.

    Vendimin për konfirmimin e Listës Serbe për pjesëmarrje në zgjedhjet parlamentare të 9 shkurtit e mirëpriti Ambasada amerikane në Prishtinë.

    “Procesi zgjedhor duhet të mbetet transparent, i besueshëm dhe pa ndërhyrje politike. Votuesit duhet të vendosin se kush do të zgjidhet brenda sistemit demokratik të Kosovës, ndërsa të gjitha partitë dhe kandidatët duhet të refuzojnë çdo përpjekje për politizimin e procesit zgjedhor”, thuhet në postimin e ambasadës në një postim në platformën X – të njohur më parë si Twitter.

    ECMI: Ekziston dallim midis platformës ideologjike dhe programore të një partie

    Pas insistimit të Lëvizjes Vetëvendosje që Lista Serbe nuk e njeh Kosovën si shtet, dhe për këtë arsye nuk duhet të marrë pjesë në zgjedhje, Qendra Evropiane për Çështje të Minoriteteve në Kosovë (ECMI) ka vlerësuar se në një shoqëri demokratike duhet të ekzistojë një dallim i qartë midis platformës ideologjike ose programore të një partie politike.

    Pjesëtarë të Qendrës vlerësojnë se është detyrë e partive politike të veprojnë brenda kornizës ligjore dhe kushtetuese të shtetit ku ekzistojnë, por gjithashtu kanë të drejtë të promovojnë reforma kushtetuese ose politike.

    “Kufizimi i shprehjes së tillë vetëm mbi bazën e pikëpamjeve ideologjike, bart rrezikun e minimit të vlerave themelore demokratike”, deklaruan nga ECMI, një organizatë që merret me promovimin e mbrojtjes dhe fuqizimit të komuniteteve joshumicë në Kosovë.

    Megjithatë, ata theksuan se të gjitha subjektet politike duhet t’i respektojnë dispozitat ligjore dhe kushtetuese të Kosovës.

    “Nëse përcaktohet se një parti vepron jashtë këtyre kufijve – duke rrezikuar stabilitetin ose integritetin kushtetues të shtetit – mund të merren masa të ligjshme”.

    Lista Serbe u themelua në vitin 2013 me mbështetjen e Beogradit zyrtar dhe që atëherë ka pasur mbështetje për të marrë pjesë në institucionet e Kosovës.

    Deri më tani, në të gjitha proceset zgjedhore ku ka marrë pjesë, kjo parti ka fituar mbi 90 për qind të votave të komunitetit serb, por Misioni Vëzhgues i BE-së, në raportin e saj të vitit 2021, ka përfunduar se Lista Serbe ka “monopolizuar jetën politike ndërmjet serbëve të Kosovës” dhe janë shënuar raste të frikësimit dhe presionit ndaj votuesve nga kandidatët dhe aktivistët e kësaj partie./REL

  • Dosja – Komunikimet e Nagip Krasniqit me Dejona Mihalin, çka deklaroi kjo e fundit në Prokurori?

    Ish-kryeshefi i Korporatës Energjetike të Kosovës (KEK), Nagip Krasniqi po përballet edhe me një tjetër aktakuzë që ka të bëjë me veprën penale: “keqpërdorim i detyrës zyrtare”. Aktakuza e fundit ndaj tij mban datën 30.12.2024. Krasniqi tashmë ka një rast tjetër gjyqësor, në cilësinë e të akuzuarit për pozitën e njëjtë si ish-kryeshef i KEK-ut.

    Dosjen që ka siguruar KALLXO.com përshkruhet se Dejona Mihali ishte ftuar në Prokurorinë Speciale më 20.09.2024 në cilësinë e dëshmitares për t`u intervistuar në lidhje me hetimet që po zhvilloheshin ndaj Nagip Krasniqi si kryeshef i KEK-ut, në bashkëkryerje me Ymer Dragushën (ushtrues detyre i drejtorit të Zyrës së Prokurimit) për çka edhe tani po akuzohen se nga nëntori i vitit 2022 e deri në fund të janarit të vitit 2023 kanë keqpërdorur detyrën e tyre zyrtare – duke i tejkaluar kompetencat që i kanë.

    Sipas aktakuzës së Prokurorisë, tejkalimi i kompetencës është bërë që t’i mundësojnë përfitim personit tjetër, në këtë rast operatorit ekonomik “Litwin S. A.”, në rastin e aktivitetit të prokurimit lidhur me “Riparimin kapital të kalldasë së bllokut A5”.

    Ndonëse aktakuza është ngritur ndaj tre personave, në këtë rast në pyetje u mor edhe Dejona Mihali, koordinatore e komiteteve në Lëvizjen Vetëvendosje (LVV). Ajo është përmendur në aktakuzën që ka ngritur Prokuroria Speciale për Nagip Krasniqin, si dëshmitare në lidhje me krizën energjetike në Kosovë.

    Dosja e prokurorisë, tregon se Nagip Krasniqi e Dejona Mihali kishin biseduar disa herë përmes platformave sociale, kryesisht në rrjetet “Signal” e “Whatsapp”. Mihali në dëshminë e saj në Prokurori Speciale ka deklaruar se e kishte takuar Nagip Krasniqin një apo dy herë në lidhje me krizën energjetike në Kosovë.

    “Nagip Krasniqi e kishte njohur në kuadër të këtij komiteti nga viti 2009-2010 si ekspert të kësaj fushe. Ndërkaq, pas emërimit të të njëjtit si kryeshef ekzekutiv në KEK, e kishte takuar një apo dy herë dhe kishin diskutuar lidhur me krizën energjetike”- thuhet në dosjen e prokurorisë.

    Mihali gjithmonë sipas aktakuzës, kishte dëshmuar se në emër të Lëvizjes Vetëvendosje kishte kërkuar informacione mbi gjendjen energjetike dhe se përmes platformave sociale WhatsApp, Signal, Viber, email dhe telefon kishte komunikuar disa herë, për gjendjen energjetike, komunikime lidhur me disa sinjalizime nga persona anonim që kishin marrë lidhur me remontin e TC Kosova A, por edhe disa artikuj nga portalet online.

    “Të  gjitha këto komunikime me të pandehurin janë zhvilluar në grupin e tyre në WhatsApp, ku ishin edhe Kryeministri, zv.Kryeministri, Ministrja e Ekonomisë, Ministri i Financave, si dhe këshilltari i Ministres së Ekonomisë”- kishte deklaruar Mihali, theksohet në aktakuzën ndaj Nagip Krasniqit.

    Më tutje në dosje thuhet se Mihali kishte sqaruar se ‘shkëmbimi i informacioneve ishte brenda një grupi kolegial dhe të bashkëpunimit të mëhershëm dhe se nuk kishte të bënte me pozicione, duke shtuar se kjo ishte puna e saj e përditshme si koordinatore e Lëvizjes – duke qenë se kishte marrë pjesë në hartimin e programit qeverisës të Lëvizjes Vetëvendosje’.

    Aktakuza të cilën e kanë punuar prokurorët specialë, Fikrije Fejzullahu dhe Ilir Morina, shpjegon se i akuzuari tashmë Nagip Krasniqi në periudhën kohore 2022-2023, në Prishtinë, me dashje, në vazhdimësi, në cilësinë e personit zyrtar si Kryeshef Ekzekutiv i KEK-ut, ka zbuluar fshehtësi zyrtare lidhur me procedurat e prokurimit të cilat po zhvilloheshin në KEK duke i ndarë me personin jo zyrtar, përkatësisht me Dejona Mihalin, e cila nuk mban asnjë pozitë zyrtare në administratën Shtetërore e për të cilat informata Krasniqi kishte qasje si rezultat i detyrës së tij dhe të cilat nuk ishin publike.

    Tutje në aktakuzë përmenden edhe kohë të ndryshme të komunikimit mes Krasniqit e Mihalit për çka edhe thuhet se është kryer vepra penale e zbulimit të fshehtësisë.

    Në dosje thuhet se më datën 02.07.2022, në ora 20:21, gjatë komunikimeve në rrjetin social ‘’WhatsApp’’, me Mihaili, i ka dërguar informatën lidhur me dyshimin për abuzimin e energjisë elektrike nga ana e KESH-it sipas marrëveshjes së datës 24.06.2022 në mes të KEK dhe KESH.

    Një tjetër komunikim është ai i datës 22.04.2022, në ora 18:25, kur Krasniqi gjatë komunikimeve në rrjetin social ‘’Signal’’ i ka dërguar Dejona Mihalit dy dokumente për eksportet e energjisë elektrike për muajin mars – prill 2022, pas pranimit të lajmit nga ana e saj lidhur me publikimin e një informacioni nga portali ‘’Reporteri’’ me titullin “Kompania GEN e lidhur me ambasadorin Berisha mori 4.2 milionë euro nga Kosova për dy muaj të krizës energjetike”.

    Më datë 24.02.2022, në ora 07:59, gjatë komunikimeve në rrjetin social ‘’Signal’’ Krasniqi i ka dërguar Mihailit një dokument me titull “Agjenda e takimit të datës 09.02.2023’’, në të cilën janë të përfshira pikat kryesore si dhe termat e referencës  për prokurimin e titulluar “Shërbime të Konsulencës Ligjore dhe Rregullatorët’’.

    Dosja thotë se më datën 12.04.2023, në ora 16:25, gjatë komunikimeve në rrjetin social ‘’Signal’’ i ka dërguar Dejona Mihali, një draft-autorizim për angazhimin e një konsulenti të jashtëm për asistencë teknike për sektorin e fushëveprimit të KEK-ut, përkatësisht angazhimin e ekspertit G. B.

    Më e datën 04.08.2022, në ora 15:59, sipas aktakuzës gjatë komunikimeve në rrjetin social  ‘’Signal’’ i ka dërguar Dejona Mihalit, kërkesën drejtuar Qeverisë së Republikës së Kosovës përkatësisht kryeministrit të Kosovës dhe ministrave të Qeverisë për plotësim/ndryshimin e vendimit për shpalljen e emergjencës energjetike.

    Më datën  29.09.2022, në ora 13:48, gjatë komunikimeve në rrjetin social ‘’WhatsApp’’ me anëtarët e të njëjtit grup, Krasniqi e ka dërguar tabelën me të dhënat/çmimet e gjashtë (6) tenderuesve të cilët kanë ofertuar për aktivitetet e prokurimit: Riparimi kapital i kalldasë dhe Riparimi kapital i turbinës dhe gjeneratorit.

    Tutje në aktakuzë thuhet se më datën 13.10.2022 , në ora 17:17, gjatë komunikimeve në rrjetin social ‘’WhatsApp’’, në grupin ku bënte pjesë Dejona Mihali, Krasniqi e ka dërguar informatën të cilën e ka pranuar nga anëtari i komisionit të vlerësimit dhe negocimit Skender Isufi, në lidhje me tenderin me numër KEKC-22-287-51, përkitazi me ofertat e ofruara nga operatorët ekonomik si dhe komunikime tjera në këto platforma.

    Një tjetër komunikim është ai më datën 16.05.2022, gjatë komunikimeve në rrjetin social ‘’Signal’’ Nagip Krasniqi i ka dërguar Dejona Mihalit, një komunikim-foto me shkrimin e tre emrave dhe pozitave të zyrtarëve në KEK: D. B., E. T. dhe M. K., pas të cilës e njëjta i kthen përgjigje dhe për secilin veç e veç i jep informata për profilin e secilit nga të lartcekurit.

    Me të gjitha këto veprime që ka kryer Nagip Krasniqi prokurorët Fikrije Fejzullahu dhe Ilir Morina kanë akuzuar se i njëjti ka kryer veprën penale zbulim i fshehtësisë zyrtare duke i dhënë informacione Dejona Mihalit deri sa e njëjta nuk posedonte asnjë post shtetëror.

     

    Ndryshe në aktakuzën e re e cila përmban shtatë diapozitiva (pika) të aktakuzës, Nagip Krasniqi mbi supe mban gjashtë prej tyre. Në katër prej pikave të aktakuzës, Krasniqi në bashkëkryerje me Ymer Dragushën akuzohen për keqpërdorim të detyrës zyrtare, ndërsa në pikën e shtatë, Isuf Zejna akuzohet për ndihmë në keqpërdorim të detyrës zyrtare.

    KALLXO.com mëson se i akuzuari, Ymer Dragusha ka marrë statusin e dëshmitarit bashkëpunues.

    Këtë cilësi, Dragusha e ka arritur më 19.05.2023 për katër veprat penale për të cilat akuzohet në bashkëkryerje me Krasniqin.

    Pas arritjes së marrëveshjes, Prokuroria është pajtuar që t’i propozojë gjykatës që Dragushës t’i caktohet dënimi me kusht në kohëzgjatje prej 2 viteve, me qëllim që ky dënim të mos ekzekutohet nëse i akuzuari nuk kryen vepra të tjera penale gjatë periudhës së verifikimit në kohëzgjatje prej 2 viteve.

    https://kallxo.com/lajm/skandali-me-milionat-ne-kek-i-bashkakuzuari-ben-marreveshje-me-prokurorine/

     

     

    Aktakuza e fundit ndaj ish-kryeshefit të Korporatës Energjetike të Kosovës (KEK), Nagip Krasniqi, mban datën 30.12.2024.

    https://kallxo.com/lajm/dosja-e-prokurorise-ndaj-nagip-krasniqit-cka-thote-aktakuza-e-re-per-ish-kryeshefin-e-kek-ut/

  • LVV ankohet në PZAP, kërkon anulimin e vendimit të KQZ-së për certifikimin e Listës Serbe

    Lëvizja Vetëvendosje, më 02.01.2025, ka dorëzuar ankesë në PZAP kundër vendimit të KQZ-së për certifikimin e Listës Serbe, për zgjedhjet që do të mbahen më 9 shkurt në Kosovë.

    Kjo parti pretendon se “nxjerrja e vendimit në emër të KQZ-së, por pa miratim të KQZ-së” është sulmi i radhës ndaj rendit tonë ligjor për shkak të Listës Serbe.

    “Secili vendim i KQZ-së duhet t’i nënshtrohet votimit nga anëtarët e KQZ-së. Ky vendim nuk është i KQZ-së, sepse nuk është votuar. Është i paligjshëm, sepse bie ndesh me Ligjin për Zgjedhjet e Përgjithshme. Ndërsa Lista Serbe nuk është certifikuar në përputhje me Ligjin, por është kontrabanduar kundërligjshëm”, thuhet në njoftimin e kësaj partie.

    Për LVV-në, “Lista Serbe ka qenë dhe mbetet partia e kryeterroristit Radoiçiq. “Ajo [LS] dikur përdorej nga Radoiçiqi kundër shtetit të Kosovës, kurse tani po shërben si struktura që mbron dhe amniston terrorizmin”, thuhet në njoftimin e LVV-së.

    “Nuk mund të lejohet që për t’i bërë vend në fletëvotim një strukture që e lufton shtetin e Kosovës dhe merr në mbrojtje terroristët, të shkelet kaq brutalisht Ligji për Zgjedhje dhe çdo praktikë e rregullt. Andaj, Lëvizja VETËVENDOSJE! përmes kësaj ankese synon ta prapësojë këtë vendim të paligjshëm, të mbrojë rendin ligjor dhe të pamundësojë certifikimin e Listës Serbe”, përfundon LVV.

    Komisioni Qendror i Zgjedhjeve (KQZ), në ditën e fundit të vitit 2024 ka certifikuar Listën Serbe për Zgjedhjet 2025.

    Ky vendim është marrë pasi Gjykata Supreme e Kosovës e ka hedhur poshtë si të palejuar Ankesën e Lëvizjes Vetëvendosje (LVV), kundër Vendimit të Panelit Zgjedhor për Ankesa dhe Parashtresa (PZAP), që e “urdhëronte” KQZ-në për ta certifikuar Listën Serbe për pjesëmarrje në Zgjedhje.

    “KQZ ka marrë vendim që ta certifikojë Listën Serbe. Vendimi i PZAP-së është i plotëfuqishëm. Konsideroj që kjo çështje është mbyllur.” – deklaroi kryetari i KQZ-së, Kreshnik Radoniqi.

    Më 25.12.2024, Lëvizja Vetëvendosje (LVV) u ankua në Gjykatën Supreme ndaj Vendimit të Panelit Zgjedhor për Ankesa dhe Parashtresa (PZAP) – lidhur me rastin e Listës Serbe.

    Pasi u konfirmua nga kryetari i KQZ-së, Kreshnik Radoniqi, për certifikimin e Listes Serbe, kundër këtij vendimi u shpreh anëtari i  KQZ-së nga LVV-ja, Sami Kurteshi.

    “Ka shumë dëshmi, shumë elemente që unë mendoj që ky subjekt politik nuk meriton të certifikohet.” – tha ai.

    Komisioni Qendror i Zgjedhjeve, më 23.12.2024, nuk e kishte certifikuar Listën Serbe për pjesëmarrje në Zgjedhje.

    Pas votimeve, me 2 vota “për”, 2 “kundër” dhe të të tjerëve anëtarë për mospjesëmarrje në votim, moscertifikimin e LS-së e kishte konstatuar kryetari i KQZ-së, Kreshnik Radoniqi.

    “Nuk kalon Rekomandimi i Zyrës për certifikimin e Listës Serbe.” – kishte thënë ai në mbledhjen e KQZ-së, më 23.12.2024.

    Vendimi paraprak ishte marrë, pasi u vlerësua nga ana e disa anëtarëve në KQZ, se ka pasur thirrje nacionaliste serbe nga ana e kryetarit të Listës Serbe, Zllatan Ellek – gjatë prezantimit të Listës zgjedhore të këtij subjekti politik.

    Lista Serbe pas kësaj më 25.12.2024 kishte parashtruar Ankesë në Panelin Zgjedhor për Ankesa dhe Parashtresa (PZAP), pasi që nuk u certifikua për Zgjedhjet e 9 shkurtit 2025 në Kosovë.

    Ndërsa, PZAP kishte vendosur në favor të kësaj partie.