Ballina

Etiketë: LVV

  • Haxhiu në Podujevë flet për aksionin ndaj strukturave paralele: Ata prokurorë që nuk guxojnë le të rrinë në shtëpi

    Ministrja e Drejtësisë, Albulena Haxhiu, gjatë tubimit elektoral të mbajtur në Podujevë ka folur për aksionin e Policisë së Kosovës të zhvilluar sot, më 15.01.2025, ndaj strukturave paralele serbe në disa komuna të Kosovës.

    Ajo falënderoi Policinë dhe ministrin e Brendshëm, Xhelal Sveçla, ndërsa tha se Prokuroria i la vetë duke thënë se nuk kanë dorë në mbylljen e strukturave paralele.

    Haxhiu u “çoi” mesazh prokurorëve duke iu kërkuar të shkojnë në shtëpi.

    “Me lejoni të përshëndes Policinë e Kosovës dhe ministrin Sveçla. Sot ministri dhe Policia u la vetë nga Prokuroria. Ata thanë që ne s’kemi dorë në mbylljen e strukturave paralele. Por edhe nga Llapi u çojmë mesazh atyre që ata prokurorë që nuk guxojnë le të shkojnë sepse vendi i tyre nuk është në prokurori, le të rrinë në shtëpi, por nëse përnjëmend nuk i kryejnë detyrat duhet me dhënë përgjegjësi për këtë”- ka thënë Haxhiu.

    “Do të angazhohemi që në Kosovë me pasë shtet të së drejtës dhe të gjithë prokurorët që nuk veprojnë – me u përgjigj para ligjit”- shtoi tutje ajo.

    https://kallxo.com/lajm/policia-per-aksionin-ndaj-strukturave-paralele-thote-se-nderpreu-aktivitetet-e-disa-institucioneve-te-jashteligjshme/

    Mëngjesin e së mërkurës, Policia e Kosovës zhvilloi një aksion të gjerë në disa komuna të Kosovës, duke mbyllur dhjetëra objekte të strukturave paralele serbe, përfshirë objekte komunale, posta e zyra të Administratës Tatimore të Serbisë.

    Përmes një komunikate Policia njoftoi se qëllimi i aksionit ishte ndërprerja e aktiviteteve të disa institucioneve të jashtëligjshme që vepronin si komuna, posta, banka, etj.

    “Policia e Kosovës me njësitë e saja relevante, sot në orët e hershme të mëngjesit, në bashkëpunim dhe koordinim me institucionet përkatëse të Republikës së Kosovës, ka realizuar një operacion të gjerë policor, operacion ky i shtrirë në disa rajone të Kosovës: DRP Prishtinë, DRP Gjilan, DRP Gjakovë dhe DRP Mitrovicë Jugu, për ndërprerjen e aktiviteteve të disa institucioneve të jashtëligjshme që vepronin si komuna, posta, banka, etj., të cilat ofronin shërbime të jashtëligjshme, kundër rendit kushtetues dhe ligjeve pozitive të Republikës së Kosovës”- tha Policia përmes komunikatës.

    Por, Prokuroria e Prishtinës përmes një komunikate më 15.01.2025 ka njoftuar se prokurori i shtetit nuk ka autorizuar kryerjen e bastisjeve nga ana e Policisë në disa lokacione për shkak të dyshimit se ekzistojnë struktura paralele.

    https://kallxo.com/lajm/prokuroria-e-prishtines-konfirmon-se-nuk-qendron-prapa-bastisjeve-ne-objektet-e-strukturave-paralele/

  • Në kohë fushate, Komuna e Gjilanit shpërndan ndihma – pako ushqimore e higjienike

    Në muajin e fushatës zgjedhore, Komuna e Gjilanit më 15.01.2025 u ka shpërndarë ndihma 500 familjeve të kësaj komune. Ndihma përfshin pako me ushqime, miell e mjete higjienike. 

    Aktiviteti u zhvillua sot, më 15.01.2025, në Gjilan.

    Lidhur me këtë, KALLXO.com ka kontaktuar me ushtruesin e detyrës të drejtorit të Shëndetësisë të Komunës së Gjilanit, Hekuran Rapuca, i cili e ka konfirmuar këtë aktivitet.

    Ai tha se aktiviteti ka qenë i organizuar nga vetë Komuna për t’u dalë në ndihmë familjeve, të cilat janë përfituese të asistencës sociale.

    Sipas Rapucës, shpërndarja e ndihmave nga Komuna e Gjilanit për familjet nevojtare nuk është bërë për shkak të fushatës zgjedhore, duke mohuar se një organizim i tillë ka pasur qëllime politike. 

    “Jo vetëm miell, faktikish kanë qenë pako ushqimore dhe higjienike. Është organizim i njëjtë që mbahet për tri vite me radhë. Unë veç pash në disa shkrime që ka marrë konotacion tjetër. Komuna është siguru që në secilin prej viteve prej që jemi në qeverisje, me shpërnda pako të tilla edhe duke e ditë që janari dhe shkurti janë ndoshta muajt më të dobët financiarisht tek secili, e kemi planifiku në këtë kohë, nuk ka të bëjë me fushatën kjo”- ka deklaruar Rapuca.

    Më 11.01.2025 ka nisur fushata për zgjedhjet parlamentare që mbahen më 09.02.2025.

    Komuna e Gjilanit udhëhiqet nga Lëvizja Vetëvendosje.  

  • Kaçanik, ish-qeveritarët Kurti i quan “të pashpresë” dhe “të pabesë”

    Kandidati për kryeministër i Lëvizjes Vetëvendosje, Albin Kurti, ka mbajtur tubim elektoral në qytetin e Kaçanikut më 14.01.2025.

    Ai ndër të tjera ka përmendur edhe ish-qeveritarët e Kosovës, të cilët i ka quajtur “të pabesë”.

    “Ish-qeveritarët që populli i njeh mirë ishin mendjelehtë e zemërgurë, e ne që jemi bashkë jemi edhe mendjemprehtë, edhe zemërgjerë. Ne bashkë me mendje sjellim shpresë sepse me zemër kemi besë. Ish-qeveritarët janë edhe të pashpresë, edhe të pabesë”- është shprehur Kurti.

    Ai ka thënë se Qeveria e tij e ka rritur 44 për qind buxhetin për komunat e Kosovës, duke thënë se ka ndihmuar komunat e banorët e vendit pa diskriminim.

    Kurti tha se Kosovën e ka gjetur me 350 mijë të punësuar, ndërsa sipas tij, tash janë 80 mijë të punësuar më shumë.

    “80 mijë për katër vjet, janë mesatarisht 55 të punësuar çdo ditë. Me programin ‘Super Puna’ janë punësuar 14 mijë të rinj”- ka thënë ai.

    Ndërsa ka shtuar se Lëvizjes Vetëvendosje i nevojitet një fitore si asnjëherë tjetër, me gjysmë milion vota.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Kurti në Pejë: Me qeverisjen tonë Kosova u bë shtet i taksapaguesve të rregullt

    Lëvizja Vetëvendosje më 13.01.2025 e ka vazhduar fushatën elektorale me një tubim të organizuar në palestrën “Karagaçi” në Pejë.

    Kandidati për kryeministër i LVV-së, Albin Kurti, gjatë fjalimit të tij tha se fitoren e Lëvizjes Vetëvendosje nuk ka fuqi që mund ta ndalë, pasi sipas tij, populli tashmë ka vendosur.

    Ai ka thënë se katër vite kanë qeverisur mirë, bashkë dhe drejt, duke theksuar se më 2024 bruto produkti është 30 për qind më i madh se në vitin 2021.

    Kurti nga Peja ka përmendur edhe opozitën, duke e kritikuar për borxhet që i kanë trashëguar nga qeveritë e kaluara.

    “Ne vendosim rekorde në fusha të jetës e të punës, opozita vendos rekorde në analista të studiove televizive. Ne veprimtarë, ata analistë. Ne në frymë e në fakte, ata në rrena e shpifje. Një nga rekordet më domethënëse, ne e ngritëm numrin e të punësuarve në vendin tonë, andaj le ta thyejmë edhe këtë rekord më 9 shkurt dhe ta thyejmë rekordin në punësim” – u shpreh Kurti.

    “Kosova me qeverisjen tonë të mirë u bë shtet i taksapaguesve të rregullt jo më shtet i pronarëve të mëdhenj”- tha tutje ai.

    Ndërsa, kryetarja e Partisë Guxo, Donika Gërvalla, i ka falënderuar të pranishmit për prezencën, duke u kërkuar gjysmë milion vota në Kosovë e mërgatë të cilat, sipas saj, bëjnë fitoren e madhe.

    Gërvalla tha se “opozita ka zgjedhur të jetë kundër qytetarëve në veri, duke i ofenduar e pranuar realitetin e ri – sundimin e ligjit”.

    Gjatë qëndrimit në Pejë, Kurti ka zhvilluar disa takime. Ai ka vizituar familjen e dëshmorit të kombit, Shpëtim Bojku.

    Kurti përmes një postimi në Facebook tha se sakrifica e Bojkut dhe e të gjithë të rënëve për liri mbetet frymëzim i përhershëm për të punuar me përkushtim për Republikën.

    “Sakrifica e dëshmorëve dhe martirëve është themeli i shtetit dhe i lirisë që e gëzojmë.  Nderimi për veprën e tyre është i përhershëm siç është edhe mirënjohja për familjet e tyre. Në Pejë vizituam familjen e dëshmorit të kombit, Shpëtim Bojku. Një luftëtar i dalluar i Ushtrisë Çlirimtare të Kosovës, që me trimëri e përkushtim të pashoq luftoi për çlirimin e atdheut. Në betejën e lavdishme të Koshares, duke luftuar ballë për ballë me forcat serbe, më 28 prill 1999, Shpëtim Bojku ra heroikisht në fushëbetejë” – ka shkruar Kurti.

    Ndërsa bashkë me ministrin Elbert Krasniqi kanë vizituar një familje të komunitetit egjiptian në Treboviq.

    Kryeministri shtoi se e kanë rritur mbështetjen për studentë dhe nxënës dhe i kanë shtuar vendet e punës bashkë me krijimin e skemave sociale në mbështetje të tyre.

    Lëvizja Vetëvendosje tubime të tilla ditëve të kaluara ka organizuar edhe në Mitrovicë e Gjakovë.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025. Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet e 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore, subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta, që Kosova mban që nga shpallja e Pavarësisë më 2008.

  • Kurti në Mitrovicë kritikon ish-Qeveritë: Për rritje ekonomike jemi tri herë më të shpejtë

    Lëvizja Vetëvendosje, më 12.01.2025, në ditën e dytë të fushatës për Zgjedhjet e 09 shkurtit 2025 ka mbajtur tubim elektoral në qytetin e Mitrovicës.

    Kandidati për kryeministër i LVV-së, Albin Kurti duke i kritikuar partitë që kanë udhëhequr në të kaluarën, ka folur, sipas tij, për të arriturat e Qeverisë Kurti në Mitrovicë të Veriut gjatë katër vjetëve qeverisje.

    “Kemi shtuar gati dyfish më shumë vende pune, sesa këta para neve për 8 vjet. Për çdo vit ia kemi shtuar ekonomisë nga 1 miliardë euro, e atyre para neve iu nevojiteshin 3 vjet për 1 milion. Për rritje ekonomike jemi tri herë më të shpejtë se ata. Për punësim jemi katër herë më të shpejtë. Ne punojmë më shumë. Ne ecim më shpejt.” – ka thënë ai.

    Ai ka thënë se “nuk ka më e nuk do të ketë kurrë më, sundim të bandave kriminale, qarkullim të targave ilegale, ngritje të barrikadave, e prodhim të kriptovalutave”.

    Ndërsa, ministri i Brendshëm, Xhelal Sveçla tha se Qeveria Kurti ka dalë fitimtare në veri të Kosovës.

    “Këtu do të jetë vendi që të tjerëve do t’iu dëshmojmë që 4 vjetët e ardhshme ku puna jonë do të jetë me e madhe dhe do të triumfojë. S’ka më barrikada, alarme e kamera ilegale banda e kriminelë. Këtu në Kosovë ka rend dhe ligj, sovranitet e integritet, siguri… cep më cep këtu në veri e në çdo cep të Kosovës.” – u shpreh ai.

    Kurse ministrja e Drejtësisë, Albulena Haxhiu tha se më shumë se gjithçka tjetër LVV duan që në Kosovë të ketë drejtësi.

    “Me këtë Qeveri që ka përgjegjësi, dije dhe dinjitet të vazhdojmë mandatin tonë, që të sjellë drejtësi për punë të paligjshme, konfiskimin e pasurisë ku po kanë frikë shumë oligarkë të opozitës.” – tha ajo.

    Kandidati për deputet i LVV-së, Armend Muja tha se ditën e kanë filluar në Bistricë, më pas në Vernicë, Broboniq, Shupkovc, Bajgorë. Ndërsa njoftoi se janë takuar edhe me minatorë të Trepçës.

    Fushata pёr Zgjedhjet parlamentare nё Kosovё ka filluar zyrtarisht mё 11.01.2025. Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën e 9 shkurtit 2025.

    Për këto Zgjedhje janë certifikuar 28 subjekte politike, me 1280 kandidatë.

    Sipas Ligjit, gjatë periudhës së fushatës zgjedhore, subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë Zgjedhjet e para të rregullta, që Kosova mban që nga shpallja e pavarësisë më 2008.

    Mërgimtarët kanë nisur më 09.01.2025 të votojnë përmes postës për Zgjedhjet parlamentare në Kosovë.

    Sipas të dhënave të KQZ-së, numri i qytetarëve me të drejtë vote në vendvotime në Kosovë është 1 milion e 970 mijë e 944 votues, ndërkaq numri i qytetarëve të cilët janë regjistruar për të votuar jashtë Kosovës është 104 mijë e 924 votues.