Ballina

Etiketë: LVV

  • Kurti: Qeveria e Kosovës ka planifikuar projekte kyçe infrastrukturore në Therandë

    Lëvizja Vetëvendosje në kuadër të fushatës zgjedhore ka mbajtur një tubim në Suharekë më 28.01.2025.

    Në tubimin me qytetarë, kandidati për kryeministër i LVV-së, Albin Kurti, deklaroi se Qeveria e Kosovës ka planifikuar projekte kyçe infrastrukturore në Suharekë, të cilës ai i është referuar si Therandë.

    Ndërsa ka theksuar autostradën e re dhe digën në Dragaqinë.

    “Qeveria e Kosovës ka planifikuar projekte kyçe infrastrukturore në Therandë, si autostradën e re dhe digën në Dragaqinë. Shumë projekte kapitale në Therandë mbulohen nga buxheti qendror por hiqet tabela treguese sepse provohen të përvetësohen. Rreth 88.5% e buxhetit të komunës së Therandës vjen si grant qeveritar, që është një dëshmi e përkushtimit të qeverisë tonë për ta ndihmuar Therandën, pavarësisht përkatësisë politike”- ka thënë ai.

    Tutje Kurti ka thënë në qeverisjen e tij, prona e “Damper”-it iu kthye shtetit.

    “Me ish-qeveritë, ish-punëtorët e Ballkanit për 20 vjet pritën shpagimin e djersës së tyre dhe prona e ‘Damper’-it pritej të bëhej supermarket. Me qeverinë tonë, pronën e ‘Damper’-it ia kthyem shtetit, shteti ia kaloi ushtrisë sonë, e me paratë që shteti i siguroi nga kjo, 20 vjet pas i pagoi ish-punëtorët e Ballkanit. Nuk ka grevë të punëtorëve, ka ushtri të Kosovës, mirëqenie dhe siguri për Therandën”- ka thënë ai.

    Në mbledhjen e mbajtur më 30.05.2024, Qeveria e Kosovës ka miratuar vendimin përfundimtar për shpronësim për interes publik të pronave të paluajtshme ish-shoqërore të IGK “Ballkan”, njësia “Damper” (ish-kampi “Casablanka”), për nevoja të Ministrisë së Mbrojtjes dhe Forcës së Sigurisë së Kosovës në komunën e Suharekës.

    Mirëpo, në vitin 2018 Qeveria e Kosovës e asaj kohe kishte marrë vendim që e tërë prona me sipërfaqe mbi 30 hektarë, e njohur si “Damperi” t’i kalojë në pronësi Komunës së Suharekës.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Kurti në Drenas: Ju kërkojmë falje që u vonuam sepse në Skenderaj na pritën me fishekzjarre, entuziazëm shtesë për fitoren e 9 shkurtit

    Pas tubimit që u shoqërua me protesta nga disa qytetarë në Skenderaj, Lëvizja Vetëvendosje më 27.01.2025 e ka vazhduar fushatën në Drenas.

    Kandidati i LVV-së për kryeministër, Albin Kurti, e nisi fjalimin në Drenas duke thënë se në Skenderaj ka pasur pjesëmarrje me të madhe sesa ka pritur.

    “Ne ju kërkojmë falje që u vonuam sonte meqë në Skenderaj pati pjesëmarrje më të madhe në tubim sesa që e kishim menduar. Na pritën edhe me fishekzjarre e me petarda. Entuziazëm shtesë për fitoren e 9 shkurtit”- u shpreh Kurti.

    Ai tutje ka folur për të arriturat e Qeverisë së drejtuar prej tij, duke thënë se janë duke i eliminuar politikanët himni i të cilëve “nuk është rreth flamurit të përbashkuar, por rreth korrupsionit të përbashkuar”.

    Sipas Kurtit, opozitarët po i ndan paraja.

    “Rritjen ekonomike që reflektohet në 50 për qind bruto produkt vendor. Rekord të investimeve kapitale ka pasur vitin e kaluar. Mbështetja jonë është reflektuar edhe në Drenas. I kemi izoluar dy ndërtesa shumëbanesore sociale, ndërsa i kemi rinovuar nëntë shkolla. Rreth 2,500 nëna lehona kanë fituar shtesa. Pensionistët e Drenasit kanë përfituar 20% rritje nga janari”- ka thënë ai.

    Lëvizja Vetëvendosje ka nisur sot, më 27.01.2025, në ora 18:00, një tubim zgjedhor në Skenderaj.

    Disa qytetarë janë mbledhur në qendër të Skenderajt dhe kanë protestuar kundër tubimit të LVV-së dhe pranisë së kryeministrit Albin Kurti.

    Ata kanë thirrur “Thaçi, Thaçi”, “PDK, PDK”, “Sami Lushtaku”, si dhe kanë hedhur mjete piroteknike drejt vendit ku po mbahej tubimi zgjedhor i LVV-së.

    Përmes një postimi në Facebook, Lëvizja Vetëvendosje ka thënë se “në tokën e heroizmit e të krenarisë, aty ku shumëçka flet për luftën dhe sakrificën, mbështetës si asnjëherë më parë u mblodhën për ta pritur Kryeministrin Albin Kurti”.

     

  • Tubimi i Vetëvendosjes në Skenderaj, reagon Hajrulla Çeku

    Lëvizja Vetëvendosje ka nisur sot, më 27.01.2025, në ora 18:00, një tubim zgjedhor në Skenderaj.

    Disa qytetarë janë mbledhur në qendër të Skenderajt dhe kanë protestuar kundër tubimit të LVV-së dhe pranisë së kryeministrit Albin Kurti.

    Ata kanë thirrur “Thaçi, Thaçi”, “PDK, PDK”, “Sami Lushtaku”, si dhe kanë hedhur mjete piroteknike drejt vendit ku po mbahej tubimi zgjedhor i LVV-së.

    Ndaj veprimeve të këtyre personave ka reaguar ministri i Kulturës, njëherazi kandidat i LVV-së për deputet, Hajrulla Çeku.

    Ai i ka quajtur ata “qyqanë të orkestruar nga partia”.

    “Disa qyqanë të orkestruar nga partia paskan tentu me e pengu tubimin e Vetëvendosjes në Skenderaj. Për çudi, komuna paralele e Serbisë atje nuk ju bënte fort përshtypje. Harroni që na ndalni. Po thyejmë bastione një nga një, cep më cep. Dje në Deçan, sot në Drenicë, e çdo ditë deri në 500 mijë zemrat e 9 shkurtit. Politika primitive nuk kalon.”- ka thënë ai.

    KALLXO.com ka kërkuar informacione nga zëdhënësi i LVV-së, Arlind Manxhuka, i cili ka thënë se tubimi po mbahet.

    “Po, po mbahet dhe nuk ka kush e ndalon LVV-në me mbajtë tubime. Askund, cep më cep të vendit”- u përgjigj ai.

    Lidhur me këtë çështje KALLXO.com ka kërkuar informacione nga Policia e Kosovës dhe është në pritje të përgjigjes.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Akuzat ndaj Prokurorisë, posterët e videot në Kuvend – PZAP gjobit disa subjekte politike

    Të dielën e 26.01.2025, Paneli Zgjedhor për Ankesa dhe Parashtresa ka publikuar disa vendime për ankesat e dorëzuara aty nga disa parti politike.

    Gjoba për partitë politike janë dhënë për posterë e video të tyre në institucione publike.

    Lëvizja Vetëvendosje është gjobitur me 6 mijë euro nga Paneli Zgjedhor për Ankesa dhe Parashtresa pas ankesave së Partisë Demokratike të Kosovës.

    PDK u ankua për një video të kandidatit për deputet Haxhi Avdyli brenda Klinikës së Neurokirurgjisë. Po ashtu u ankua për një video të Albena Reshitajt në hapësirat e Kuvendit të Kosovës dhe për një foto të Agon Batushës po ashtu në Kuvend. Një ankesë tjetër u drejtua për Besim Muzaqi për një video të tij në Kuvendin e Kosovës.

    PZAP ka gjetur se u shkel neni 34, paragrafi 1 i Ligjit për Zgjedhjet e Përgjithshme.

    1 mijë e 500 euro është gjoba ndaj Koalicionit për Familjen pas ankesës së LVV-së e cila u ankua për posterin e kandidates Dorentina Kokollari në Suharekë.

    PZAP ka gjetur se kandidatja Kokollari ka shfrytëzuar jashtëligjshëm shtyllën elektrike në rrugën ‘Xhavit Bajraktari’.

    3 mijë e 500 euro është gjoba për koalicionin AAK-NISMA-Intelektualët-Konservatorët.

    LVV u ankua për posterët e Albana Bytyqit dhe Driton Maliqit. PZAP gjeti se posterët e tyre ishin vendosur pa leje nga Komuna e Suharekës.

    LVV-së iu refuzua ankesa për posterët e Doruntina Malokut në Prishtinë, kjo për shkak se PZAP gjeti se Maloku kishte pëlqim nga Parking Center Publike.

    5 mijë euro është gjoba për LVV-në pas ankesës së PDK-së se kandidatja për deputete Albena Reshitaj ka shpërndarë një fotografi në një nga tubimet e VV-së, në fotografi gjendej një parullë që mes tjerash shkruante ‘Prokuroria e Kosovës e kapur nga hajnat, Qeveria Kurti i qoi në Gjyakta 250 lëndë’.

    PZAP ia hodhi poshtë ankesën e LDK-së ndaj LVV-së, saktësisht kandidatit për deputet Hajrulla Çeku. LDK u ankua se Çeku ka përdor gjuhë nxitëse e provokuese kur në një postim në facebook ku mes tjerash shkruante ‘Lodhja demokratike nuk kalon’.

    Në vendim thuhet se pretendimet janë të pabazuara dhe nuk mund të thuhet se kandidati Çeku ka shkelur nënin 34, pika 1.11 të Ligjit për Zgjedhjet e Përgjithshme.

    3 mijë e 700 euro iu dha gjobë koalicionit AAK-NISMA-Intelektualët-Konservatorët.

    Kjo për shkak se LVV u ankua për posterë të Nuredin Lushtakut në Skenderaj. PZAP gjeti se posterët janë vendosur në hapësira publike, ndërtesa publike, në kundërshtim me nenin 34, paragrafi 1, nënparagrafi 1.2 i Ligjit për Zgjedhjet e Përgjithshme.

    PZAP ia refuzoi një ankesë LVV-së për posterë të kandidatit të PDK-së Xhevahir Geci. Sipas PZAP-së ankesa se posterët janë të vendosur në hapësira publikë, ndërtesë të banimit kolektiv, për PZAP-në është e pabazuar.

    3 mijë e 500 euro gjobë është dhënë për LDK-në për shkak të posterëve të kandidates Arjeta Salihu Abazi në sheshin e Podujevës. Pas ankesës së LVV-së, PZAP gjeti se posterët ishin vendosur në ndërtesë kolektive dhe ka gjobitur LDK-në.

    Një ankesë e Partisë Liberale Egjiptiane ndaj Iniciativës së Re Demokratike është hedhur poshtë si e palejuar.

    PLE ishte ankuar se Elbert Krasniqi, kryetar i IRDK-së kishte shpërndarë një sport politik me fëmijë nën 16 vjeç.

    PZAP thotë se IRDK veçse është dënuar me 1 mijë e 500 në një vendim të më hershëm për këtë çështje.

  • Gjuhë fyese gjatë fushatës e posterë pa leje – PZAP gjobit partitë politike

    Paneli Zgjedhor për Ankesa dhe Parashtresa (PZAP) ka publikuar 13 vendime që i mori më 25.01.2025.

    Disa ankesa janë konsideruar si të pabaza dhe për disa ankesa, PZAP ka gjobitur partitë politike.

    LVV u gjobit me 4 mijë euro, PDK u gjobit me 6 mijë euro, LDK me 4 mijë euro dhe Koalicioni për Familjen me 5 mijë euro, sipas vendimeve të datës 25.01.2025 që ka publikuar në ueb-faqe.

    Paneli Zgjedhor për Ankesa dhe Parashtresa ka gjobitur Partinë Demokratike të Kosovës me 3 mijë euro gjobë. Gjoba PDK-së i erdhi pas një ankese të LVV-së.

    LVV u ankua se në rrugën ‘Brigada 123’ në Suharekë u identifikuan banerë të Enver Hoxhajt dhe Qefsere Kuqit. PZAP ka gjet se u shfrytëzuan hapësirat publike pa marrë leje nga organet kompetente të komunës, prandaj edhe gjobiti PDK-në.

    4 mijë euro është gjoba që iu dha LDK-së për posterë në të njëjtën rrugë. Posterë të Shemsije Bytyqit, Lumir Abdixhikut, Shaqir Kryeziut, Urim Sukës dhe Selman Kolgecit.

    PZAP gjeti se njësos si PDK, edhe LDK nuk kishte marrë leje për vendosjen e këtyre banerëve.

    Ky organ i hodhi poshtë ankesat LVV-së për subjektin Srpska Demokratija.

    LVV u ankua për banerët e Aleksandër Arsenijeviq në ndërtesat publike në rrugën ‘Kneza Milosa’. PZAP nuk shqyrtoi këtë ankesë për shkak se për këtë rast është vendosur me vendimin Anr. 160/2025 me ç’rast subjekti Srpska Demokratija është gjobitur me 3 mijë e 500 euro.

    Partija Kosovskih Srba është gjobitur me 3 mijë e 500 euro pasi që LVV u ankua për banerët e kësaj partie në disa objekte dhe sheshin e Mitrovicës së Veriut.

    PZAP gjeti se me këtë rast u shfrytëzuan jashtëligjshëm ndërtesat/hapësirat publike, në kundërshtim me nenin 34 të Ligjit për Zgjedhjet e Përgjithshme.

    LVV-së iu refuzua një ankesë ndaj LDK-së. LVV u ankua se identifikoi disa flamuj të LDK-së në rrugën ‘Drenica’ dhe lagjen Kodra e Trimave në Prishtinë. PZAP gjeti se LDK kishte leje nga Komuna e Prishtinës për vendosjen e këtyre flamujve.

    LVV-së iu refuzua edhe ankesa për banerë të LDK-së në Istog. Ngjashëm si në Prishtinë, LDK kishte marrë leje edhe në Istog.

    3 mijë euro gjobë iu dha PDK-së për shkak të një fotografie të postuar në Facebook nga kandidati për deputet Faruk Bojaxhi, me hapësirat e brendshme dhe të jashtme të Bashkësisë Islame dhe Ipeshkvisë së Prizrenit, për qëllime elektorale.

    PZAP thotë se me promovimin e kandidaturës së tij për deputet me përfaqësues fetar, Bojaxhi ka shkeluar Rregulloren 07/2024.

    LVV-së iu refuzua ankesa ndaj LDK-së në Prishtinë, për banerë në rrugën ‘Ilaz Kodra’ dhe në ‘Kurriz’. LDK kishte pëlqimin nga Komuna e Prishtinës për vendosjen e banerit të kandiatit Florian Dushi.

    Ankesa e LVV-së ndaj PDK-së për posterin e Jakup Nurës në rrugën ‘Ilaz Kodra’ në Skenderaj u refuzua nga PZAP. KY institucion ka gjetur se kjo parti kishte pëlqimin e Komunës për vendosjen e posterit.

    E pabazuar u shpall edhe ankesa e PDK-së ndaj LVV-së për gjuhë fyese dhe denigruese. PDK në Dragash u ankua se asistenti i zyrës administrative të VV-së në këtë Komunë, Asri Qusaj ka përdorur gjuhë fyese në Facebook ndaj partive kundërshtare.

    PZAP thotë se në bazë të dëshmive të dorëzuara nuk mund të verifikohet se në cilën kohë ka ndodhur shkelja e pretenduar.

    LVV u gjobit me 4 mijë euro pas ankesës së PDK-së për një video të kandidatit për deputet Valon Ramadani.

    Në video, Ramadani i drejtohet kundërshtarëve politik me termin ‘hajna’. PZAP thotë se gjuha e tillë është në kundërshtim me nenin 34, pika 1.1 e Ligjit për Zgjedhjet e Përgjithshme.

    OJQ-ve Cel Kosova dhe Dylberizëm iu pranua ankesa me ç’rast Koalicionit për Familjen iu shqiptua gjobë prej 5 mijë eurove.

    Gjoba i shkoi këtij koalicioni pas një deklarate të kandidatit për deputet Jeton Haxhimustafa i cili sipas PZAP-së ka bërë shkelje të nenit 34, paragrafit 1, pika 1.11 të Ligjit për Zgjedhjet e Përgjithshme.

    Ankesa e Kosova Demokratik Turk Partisi kundër vendimit të KQZ-së për miratimin e dizajnit të fletëvotimit dhe broshurës për zgjedhjet, u hodh poshtë si e pasfatshme.

    Fushata pёr Zgjedhjet parlamentare nё Kosovё ka filluar zyrtarisht, mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare të 9 shkurtit 2025.

    Për këto Zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet e tjera në fuqi.

    Këto do të jenë Zgjedhjet e para të rregullta, që Kosova mban që nga shpallja e pavarësisë më 2008.