Ballina

Etiketë: Lufta

  • Putini i shqetësuar për ekonominë, derisa Trump i kërkon ujdi për Ukrainën

    Presidenti rus, Vladimir Putin është përherë e më i shqetësuar për telashet që ka shkaktuar lufta në ekonominë ruse, në kohën kur homologu amerikan, Donald Trump po i shtyn përpara përpjekjet për t’i dhënë fund konfliktit në Ukrainë – bëjnë të ditur për Agjencinë e lajmeve Reuters pesë burime të informuara me rrjedhat e situatës.

    Ekonomia e Rusisë, e bazuar goxha shumë në eksportet e naftës, gazit e mineraleve, kishte shënuar ngritje pavarësisht dy vjetëve nën sanksione të shumëfishta perëndimore, pas evazionit në Ukrainë më 2022.

    Por, aktiviteti i brendshëm ekonomik është tkurrur muajve të fundit, për shkak të shkurtimit të fuqisë punëtore dhe normave të larta të interesit për ta luftuar inflacionin, që ka shënuar ngritje të theksuar sherri i shpenzimeve ushtarake rekorde.

    Kjo ka kontribuar për krijimin e pikëpamjes në mesin e një hiseje të elitës ruse, se një marrëveshje e negociuar lufte do të ishte e dëshirueshme – bëjnë të ditur dy burime të informuara me qasjen që po dominon në Kremlin.

    Trump, i cili ka marrë të hënën, më 20.01.2025, timonin e Shtëpisë së Bardhë, është zotuar se do ta zgjidhë shpejt konfliktin në Ukrainë – më i madhi në Europë prej Luftës së Dytë Botërore. Gjatë javës, ai ka thënë se do të ketë më shumë sanksione dhe më shumë tarifa për Rusinë, nëse Putini nuk ulet në tavolinën e negociatave – duke shtuar se Rusia ka marrë udhë drejt “telasheve të mëdha” ekonomike. Një zyrtar i lartë i Kremlinit ka thënë të martën se Rusia deri tani nuk ka marrë ndonjë propozim specifik për bisedime.

    Reuters kishte raportuar më parë se Putini është i gatshëm të diskutojë opsionet për Marrëveshje armëpushimi me Trumpin, por që duhet të mbesin avancimet territoriale të Rusisë në Ukrainë dhe se Ukraina duhet të heqë dorë prej kërkesës për anëtarësim në NATO.

    Kremlini nuk e ka komentuar Raportin dhe Kërkesën e Reuters-it për gatishmërinë për bisedime, për shkak të ndikimit të luftës në ekonominë ruse.

    Përgatiti: Rexhep Maloku – Kallxo.com

  • Dita e dytë e armëpushimit, lirohen 90 të burgosur palestinezë

    Armëpushimi i brishtë ndërmjet Izraelit dhe “Hamasit” ka hyrë në ditën e dytë – ka konfirmuar për BBC-në të hënën, më 20.01.2025, një qytetar nga Gaza – duke thënë se për herë të parë prej nisjes së luftës ka bërë gjumë të mirë “sepse jam ndier i sigurt”.

    Ndërkohë, 90 të burgosur palestinezë janë liruar gjatë natës si pjesë e fazës së parë të armëpushimit – ka bërë të ditur Shërbimi Korrektues Izraelit. Shumica prej të liruarve janë gra dhe fëmijë.

    Më herët u liruan tri gra izraelite, përfshirë njërën me shtetësi të dyfishtë britanike e izraelite, nga “Hamasi”. Ato janë trajtuar tashmë në Spitalin izraelit në Tel-Aviv dhe janë në gjendje të mirë shëndetësore.

    Ka pasur ritakime emocionale në të dy anët: palestinezët janë pritur me përqafime dhe brohoritje prej familjeve të tyre, derisa Emily Damari, e cila ishte peng në duar të “Hamasit” ka shpërndarë një xhirim të momentit prekës të takimit me familjen e saj.

    Armëpushimi në Gazë është fuqizuar pas një vonese të minutave të fundit, por gëzimi ka mbetur në hije pasi palestinezët janë kthyer në shtëpitë e tyre të shkatërruara dhe ende nuk ka qartësi se çfarë do të sjellë e ardhmja – raportojnë korrespodentët e BBC-së.

    Përgatiti: Rexhep Maloku – Kallxo.com

  • Izraeli do ta aprovojë Marrëveshjen e armëpushimit dhe pengjeve – thotë Zyra e Netanyahut

    Kabineti izraelit do t’ia japë aprovimin përfundimtar ujdisë me grupin militant palestinez, “Hamas”, për armëpushim në Rripin e Gazës dhe për lirimin e pengjeve – ka bërë të ditur të premten, më 17.01.2025, Zyra e kryeministrit Benjamin Netanyahu – raporton Agjencia e lajmeve Reuters.

    Në vetë Gazën, aeroplanët izraelitë kanë vazhduar sulmet e intensifikuara dhe autoritetet palestineze kanë thënë se të enjten janë vrarë 86 persona një ditë pas arritjes së Marrëveshjes.

    Me ndasitë e kahershme që janë të dukshme në mesin e Ministrave, Izraeli ka shtyrë takimet e pritura për të enjten kur Kabineti pritej të votonte paktin – duke fajësuar “Hamasin” për rigrupim.

    Por në orët e hershme të mëngjesit të së premtes, zyra e Netanyahut ka thënë se aprovimi do të jetë i menjëhershëm.

    “Kryeministri Benjamin Netanyahu është informuar prej ekipit negociues se Marrëveshjet janë arritur me pajtimin për lirimin e pengjeve.” – ka njoftuar Zyra Kryeministrore, në një deklaratë të shkruar.

    Kabineti i Sigurisë do të takohet të premten para një takimi të krejt ekipit qeveritar, për ta aprovuar Marrëveshjen e ndërmjetësuar në Katar, për të cilin rol kritik kanë pasur Administrata e presidenti amerikan, Joe Biden dhe ajo e presidentit të zgjedhur, Donald Trump.

    Marrëveshja parashihet të hyjë në fuqi më 19 janar – një ditë para inaugurimit të Trumpit president të Shteteve të Bashkuara të Amerikës.

    Përgatiti: Rexhep Maloku – Kallxo.com

  • Kryeministri britanik në Kiev, që të zotojë mbështetjen historike për Ukrainën

    Kryeministri britanik, Keir Starmer ka arritur në Kiev, për të nënshkruar atë që Downing Street po e quan “partneritet 100-vjeçar historik” me Ukrainën – bën të ditur të enjten, më 16.01.2025, televizioni britanik BBC.

    Pakti do të formalizonte mbështetjen ekonomike dhe ushtarake që tashmë e ka zotuar Mbretëria e Bashkuar ndaj Ukrainës, por do të ofrojë edhe shumë më shumë.

    Është vizita e parë e Kryeministrit britanik në këtë vend, pasi mori detyrën verës, si një dëshmi e mbështetjes për Ukrainën, pak ditë para se presidenti i zgjedhur amerikan, Donald Trump të marrë detyrën në Shtëpinë e Bardhë.

    Presidenti ukrainas, Volodymyr Zelensky pritet të ketë diskutime të rëndësishme për garancitë e sigurisë nga aleatët kyç, si Britania e Madhe, në kohën kur raportohet se Administrata e re amerikane mund ta shtyjë Ukrainën që të arrijë Marrëveshje paqësore me Rusinë.

    Ndryshe prej Kryeministrave të tjerë që menjëherë vizitonin Kievin, Keirit ka marrë kohën e nevojshme para vizitës, por pas gjashtë muajsh në krye të Ekzekutivit britanik, ai i ka shprehur zotimin Ukrainës për mbështetje afatgjate, kundër atij që e ka quajtur “invazion barbar dhe ilegal” të Rusisë.

    Ai është pritur në Stacionin e trenit në Kiev prej ambasadorit britanik në Kiev, Martin Harris dhe emisarit ukrainas në Londër, Valeri Zaluzhnyi.

     

    Përgatiti: Rexhep Maloku – Kallxo.com

     

  • Reuters: Izraeli dhe Hamasi arrijnë marrëveshje për armëpushim

    Negociatorët kanë arritur të mërkurën (më 15.01.2025) marrëveshje armëpushimi për luftën e Gazës midis Izraelit dhe Hamasit, i ka deklaruar Reutersit një zyrtar i informuar me negociatat.

    Marrëveshja ndodh pas 15 muajsh konflikti që ka vrarë dhjetëra mijëra palestinezë dhe ka ndezur flakët e luftës në Lindjen e Mesme.

    Marrëveshja, që pritet të shpallet edhe zyrtarisht, përshkruan një fazë fillestare gjashtëjavore të armëpushimit dhe përfshin tërheqjen graduale të forcave izraelite nga Gaza dhe lirimin e pengjeve që po mbahen nga Hamasi në këmbim të të burgosurve palestinezë që gjenden në burgjet e Izraelit, ka deklaruar për Reuters një zyrtar i përfshirë në procesin negociator.

    Marrëveshja arrihet pas disa muajsh negociatash të ndërmjetësuara nga ndërmjetësuesit e Egjiptit dhe të Katarit, me mbështetjen e Shteteve të Bashkuara dhe erdhi pak përpara inaugurimit të presidentit të zgjedhur të SHBA-së, Donald Trump, më 20 janar.

    Hamasi, grupi militant palestinez që udhëhiqte Gazën, i ka deklaruar Reutersit se delegacioni i tij u kishte dhënë ndërmjetësuesve miratimin për marrëveshjen e armëpushimit dhe kthimin e pengjeve.

    Një zyrtar palestinez, i cili kërkoi të mos identifikohej, i ka theksuar Reutersit më herët se Hamasi ka dhënë miratimin verbal për propozimin e armëpushimit dhe kthimit të pengjeve në negociatat e Katarit dhe ishte duke pritur për më shumë informacione për të dhënë miratimin përfundimtar me shkrim.

    Ministri i Jashtëm izraelit, Gideon Saar, ka njoftuar se do të ndërpresë vizitën në Europë dhe do të kthehet në Izrael gjatë natës për të marrë pjesë në votimet e kabinetit të sigurisë dhe qeverisë për marrëveshjen – që do të thotë se votimi do të zhvillohet sonte.

    Trupat izraelite pushtuan Gazën pasi persona të armatosur të udhëhequr nga Hamasi depërtuan nëpër barrierat e sigurisë dhe hynë në komunitetet izraelite më 7 tetor 2023, duke vrarë 1,200 ushtarë dhe civilë dhe rrëmbyer më shumë se 250 të huaj dhe izraelitë.

    Fushata e Izraelit në Gazë ka vrarë më shumë se 46 mijë njerëz, sipas shifrave të Ministrisë së Shëndetësisë të Gazës, dhe e ka kthyer enklavën bregdetare në një shkretëtirë rrënojash me qindra mijëra që i mbijetuan të ftohtit të dimrit në tenda dhe strehimore të improvizuara.

    Ndërsa inaugurimi i tij afrohej, presidenti i zgjedhur Trump përsëriti kërkesën e tij që një marrëveshje të arrihej shpejt, duke paralajmëruar hakmarrje nëse pengjet nuk do të liroheshin. I dërguari i tij në Lindjen e Mesme, Steve Witkoff, punoi me ekipin e presidentit Joe Biden për ta arritur marrëveshjen.

    Përgatiti: Rexhep Maloku/Kallxo.com