Ballina

Etiketë: liburn aliu

  • Dalin rezultatet e testimit të urës së Badovcit

    Zëvendësministri i Infrastrukturës, Hysen Durmishi, më 29.01.2025, konfirmoi se i kanë pranuar rezultatet e testimit të urës te Liqeni i Badovcit, testim ky i kryer më 09.01.2025 pas raportimit të KALLXO.com.

    Ndonëse nuk janë bërë publike, zëvendësministri tha se rezultatet tregojnë se struktura e urës është stabile.

    “Tani i kemi bërë edhe testimet sipas kontratës që i kemi pasë dhe rezultatet kanë dalë në rregull, pra ura është stabile dhe mos të krijohet një lloj konfuzioni se ne e kemi lëshuar urën dhe është rreziku dikush aty. Pra ura ka qene stabile në ditën që është leshu në qarkullim, është stabile edhe sot, pesha të rënda kalojnë aty dhe nuk ka pasur asnjë problem”- tha zëvendësministri Hysen Durmishi.

    KALLXO.com më 07.01.2025 kishte raportuar ekskluzivisht se Ura e Badovcit ishte lëshuar për qarkullim pa u testuar.

    Zëvendësministri Durmishi tha se ura u lëshua për qarkullim për shkak të fluksit të madh të mërgimtarëve të cilët kishin vendosur që festat e fundvitit t’i presin në Kosovë.

    “Ura e Badovcit është lëshu në qarkullim për shkak të mërgimtarëve që kanë qenë të shumtë në atë kohë, për shkak se gjatë gjithë kohës së ndërtimit, janë bërë a-testet paraprake, është shqyrtuar çdo material që është përdorur aty dhe ky testimi final që ka qenë pjesë e kontratës, në fund është vetëm formal. Të gjithë inxhinierët e dinë se nëse ka pasur monitorim të përditshëm të zhvillimit të punimeve dhe rezultatet e betonit dhe armaturës kanë qenë të gjitha në rregull dhe janë zhvillu punimet sipas projektit, atëherë natyrisht që ura është stabile”- shtoi Durmishi.

    Pas raportimit të KALLXO.com se testimi nuk ishte kryer dhe ura ishte lëshuar në qarkullim, Prokuroria e Prishtinës nisi hetimet.

    Më 23.01.2025 Policia njoftoi se një person është intervistuar, teksa rasti është cilësuar si – mbikëqyrje e pandërgjegjshme e trafikut publik.

    https://kallxo.com/lajm/u-leshua-ne-qarkullim-pa-u-testuar-pas-raportimit-te-kallxo-com-intervistohet-nje-person-per-uren-e-badovcit/

    Teksa sipas Policisë një person është intervistuar, ministri i Infrastrukturës, Liburn Aliu, dhe zëvendësi i tij, nuk janë në dijeni nëse për rastin është intervistuar edhe ndonjë zyrtar në Ministrinë e Infrastrukturës.

    Ura që shtrihet në magjistralen Prishtinë – Gjilan ishte mbyllur në fund të muajit prill të vitit 2023. Më pas, më 17.05.2023, Ministria e Infrastrukturës kishte asfaltuar rrugën ndihmëse që shfrytëzohej si rrugë alternative, deri në përfundimin e urës.

    Ndërsa në tetor të vitit 2023 kishin filluar procedurat e prokurimit për ndërtimin e urës së re.

    Kontrata “Ndërtimi i urës në rrugën nacionale N25.2, segmenti Prishtinë – Gjilan, lokacioni te Liqeni i Badovcit” ishte nënshkruar më 10.01.2024. Vlera e kontratës së nënshkruar me kompaninë fituese “Dreni Inginiering” ishte 468 mijë e 522 euro.

    Testimi i urës ishte paraparë në aneks-kontratë dhe shtetit i kushtoi 6,000 euro.

  • Mbi 3 milionë euro aneks-kontrata të negociuara për punë shtesë për rrugën Prishtinë-Podujevë

    Ministria e Infrastrukturës ka nënshkruar mbi 3 milionë euro aneks-kontrata për punë shtesë për rrugën Prishtinë – Podujevë.

    Tenderi është i ndarë në 5 LOT-e me vlerë totale të kontratave bazë prej 35 milionë eurove, të cilat ishin nënshkruar në qershor 2023. Aneks-kontratat janë nënshkruar përgjatë vitit 2024, për katër nga pesë LOT-et e tenderit bazë.

    Një nga pesë kontratat bazë, ajo në vlerë prej 9.2 milionë euro i ishte dhënë kompanisë “Bageri”, për të cilën zv/ministri Hysen Durmishi kishte thënë se pronarin e kësaj kompanie e ka shok.

    Në nëntor të vitit 2023, Qeveria e Kosovës kishte marrë vendim për të ndarë 6 milionë euro shtesë për këtë rrugë dhe mjetet ishin marrë nga kontigjencat për shpenzime kapitale.

    Në ndërkohë, zëvendësministri Hysen Durmishi është duke u hetuar zyrtarisht nga Prokuroria Speciale në lidhje me këtë tender, kurse ministri Liburn Aliu kishte reaguar duke thënë se ‘Durmishi është i pastër’.

    Aneks-kontratat

    Në aneks-kontratën për LOT-in 0 janë kontraktuar punët si: Projektim i rrugës; punë ndërtimore në seksionin e rrugës; muret mbrojtëse; dislokim të ujësjellësit; punë në kanalizim fekal; punë në ura dhe mbikalime. Aneks-kontrata është nënshkruar me 16.07.2024, atë e ka fituar konzorciumi “Pro&Co Group” dhe “Levantina Ingenieria”, ndërsa vlera e saj është 613 mijë e 977 euro. Ky konzorcium e kishte fituar edhe kontratën bazë.

    Aneks-kontrata për LOT-in 1 është nënshkruar me 21.08.2024 dhe fitues i saj është kompania “2A Group”. Vlera e kësaj aneks-kontrate është 728 mijë e 166 euro.

    Në këtë aneks janë kontraktuar punët si:  Projektim i rrugës; punë ndërtimore në seksionin e rrugës; punët e betonit dhe armaturës; punët e ndriçimit; punë në kanalizim atmosferik dhe fekal; punë në hidroizolim; punë në asfalt; punimi i rrethojave të urës. Kjo kompani kishte fituar edhe kontratën bazë.

    Por në këtë aneks-kontratë Ministria e Infrastrukturës ka harruar që të kontraktojë edhe shtrirjen e ziftit nëpër pozicionet e kontratës. Kjo pasi që në dhjetor të vitit 2024 kanë nënshkruar një tjetër aneks-kontratë vetëm për shtrirjen e ziftit nëpër këtë rrugë.

    Aneks-kontrata e dytë e kishte vlerën e 70 mijë eurove, prapë me të njëjtën kompani.

    Për LOT-in 2 të tenderit është nënshkruar një aneks-kontratë tjetër, në të cilën janë parashikuar të kryhen punë si Projektim i rrugës; Punët e gërmimeve dhe transportit dhe të ngjashme; punët ndërtimore në seksionin e rrugës; punët e betonit dhe armaturës; punë në kanalizim atmosferik dhe fekal; punët e ndërtimit dhe sinjalistikës.

    Këtë aneks-kontratë e ka fituar kompania “Bageri” dhe vlera e saj është 853 mijë e 619 euro. Kontrata është nënshkruar me 16.07.2024.  Edhe në këtë rast, kjo kompani kishte fituar kontratën bazë.

    Kurse për LOT-in 3 të tenderit, janë nënshkruar dy aneks-kontrata për punë shtesë. Në aneksin e parë është kontraktuar për të kryer punë si: Projektim i rrugës; punë ndërtimore në seksionin e rrugës; pune mbikalimit urë; ndërtimi i mbikalimit për këmbësorë; punë në kanalizimin atmosferik; punët në ndriçim.

    Aneks-kontratën e ka fituar konzorciumi “Agbes Construksion”; “Arbotec”; “Geo Construction”; “Minera” dhe “BM Group”. Vlera e saj ka qenë 575 mijë e 972 euro dhe është nënshkruar me 14.06.2025.

    Ndërsa aneks-kontratën tjetër për këtë LOT, po ashtu e ka fituar i njëjti konzorcium, në vlerë 288 mijë e 418 euro. Kontrata është nënshkruar me 29.11.2024. Po ashtu, i njëjti konzorcium kishte fituar kontratën bazë.

    Në këtë aneks ka qenë e parashikuar të kryhen punët si: Projektim i rrugës; punë ndërtimore në seksionin e rrugës; punë përgatitore; punë demoluese; punë tokësore; punë montuese; punët e betonit dhe armaturës.

    Kurse aneks-kontrata e e fundit ka qenë për LOT-in 5 të tenderit. Në këtë aneks është kontraktuar të kryhen punë si Ndërtimi i rrugës; sinjalizimi vertikal; punët projektuese. Kontrata është fituar nga “Beni-Com” dhe e ka vlerën e 32 mijë e 404 eurove. Sikurse në aneks-kontratat tjera, edhe te ky LOT, kontratën bazë e kishte fituar e njëjta kompani.

    Në total janë nënshkruar shtatë aneks-kontrata, me vlerë totale prej 3 milionë e 162 mijë e 556 euro.

    Raportimet për rrugën

    Në fillim të këtij viti, KALLXO.com kishte raportuar se si Ministria e Infrastrukturës është detyruar që të nënshkruajë dy aneks-kontrata për “lot”-in 1 të tenderit për rrugën Prishtinë – Podujevë, për shkak se kishte harruar që në pozicionet e aneks-kontratës së parë të vendosë edhe shtrirjen e ziftit për rrugën në fjalë.

    Kurse në gusht të vitit 2023, KALLXO.com kishte zbuluar se kompanitë që kanë fituar kontrata nga Ministria e Infrastrukturës për të ndërtuar rrugën Prishtinë – Podujevë, rezultojnë se në të kaluarën kanë pasur gjoba të shqiptuara nga Komisioni i Pavarur për Miniera dhe Minerale (KPMM), për nxjerrje ilegale të mineraleve.

    Të dhënat e siguruara nga KPMM tregonin se kompanitë ndër vite janë gjobitur për nxjerrje ilegale të zhavorrit, gurit të fortë, rërës apo të reshpes.

    Në anën tjetër, në maj të vitit 2024, zëvendësministri Hysen Durmishi ishte intervistuar si i dyshuar nga Prokuroria Speciale e Kosovës, pikërisht për tenderin e rrugës Prishtinë – Podujevë.

    Ai para gazetarëve, pas intervistimit, kishte thënë se pyetjet e prokurorit kanë qenë “sqaruese”.

    “… i sqarova të gjitha pyetjet që i kishte prokurori për ta dëshmuar se procesi për rrugën Prishtinë – Podujevë  ka qenë i rregullt dhe atje po zhvillohen punimet me dinamikën të cilën e kemi planifikuar. Në njëfarë mënyre e sqarova edhe para prokurorit pastërtinë e plotë timen në gjithë këtë proces” – kishte thënë Durmishi para gazetarëve.

    Në korrik të vitit 2023 në emisionin “Kallxo Përnime” ishte publikuar hulumtimi pikërisht për rrugën Prishtinë – Podujevë, në të cilin tregohej se si Hysen Durmishi kishte nënshkruar kontratat për këtë tender, duke pasur ankesë aktive në Organin Shqyrtues të Prokurimit (OSHP).

  • Mjegulla e dendur anulon afër 50 fluturime për dy ditë në Aeroportin e Prishtinës

    Për shkak të mjegullës së dendur, në Aeroportin e Prishtinës “Adem Jashari” janë anuluar afër 50 fluturime gjatë dy ditëve të fundit, kurse në disa të tjera ka pasur vonesa. Për pasojë numri i qytetarëve që detyrohen të presin gjatë nuk është i vogël, por megjithatë disa prej tyre thonë se e mirëkuptojnë situatën. Instituti Hidrometeorologjik paralajmëron se mjegull do të ketë edhe gjatë ditës së nesërme (03.01.2025).

    Kolona të tilla janë të zakonshme në kryeqytet, por këtë të enjte (02.01.2025) ato janë bartur në hyrje të Aeroportit të Prishtinës “Adem Jashari”.

    Mërgimtarët e ardhur në Kosovë për festën e Vitit të Ri dëshirojnë të kthehen në vendet ku jetojnë, por këtë po e kanë problem shkaku i mjegullës së dendur që ka përfshirë Kosovën.

    Nga Aeroporti i thanë televizionit Dukagjini se këto dy ditë janë anuluar dhjetëra fluturime.

    “38 fluturime janë anuluar ditën e djeshme. Nga to disa janë divertuar në aeroportet fqinje. Sot janë anuluar 4 fluturime deri më tani. Dukshmëria ka qenë nën 50 metra, prandaj është pamundësuar realizimi i fluturimeve”.

    Qytetarët që largoheshin nga Kosova, ata që vinin në vendin tonë, dhe familjarët që i prisnin dhe përcillnin, kryesisht pajtoheshin me faktin se mund të ketë anulime ose vonesa të udhëtimeve.

    “Një fluturim i ka dështu, tash e ka nxjerrë tiketën prapë për knej.

    -Kur ka pas me arrite?

    -Në 12:30 ka pas me arritë këtu por tash duhet me pritë deri në 14:00-15:00”, ka thënë Sinan Ferizi, njëri nga udhëtarët që u ballafaqua më vonesa.

    “Tash jam tu shku, nuk e di deri të hyje brenda, të shohim.

    Në email nuk na ka ardhë diçka, ta shofim tash, edhe me pas nuk kemi çka bëjme duhet të presim”, ka shtuar Ferizi.

    “Po vonesa pati, kemi pas me fluturu në ora 08:00 dhe kemi fluturar në orën 11:00, në Cyrih nuk ka pas vonesa vetëm këtu shkaku i mjegullës”, ka thëne Smajl Mahmutaj, udhëtar.

    Në kohën kur televizioni ishte në ambientet e aeroportit, në monitorët udhëzues njoftohej për shtyrje të fluturimeve.

    Ora shënon të jetë 13:00, momentalisht nuk ka asnjë fluturim të anuluar kurse deri në këtë orë kanë qenë 4 të tillë, kurse nuk dihet nëse do ketë anulime të tjera të fluturimeve pasi që mjegulla në aeroportin e Prishtinës, vazhdon të jetë e dendur”.

    Ndërkaq, Besim Aliu nga Instituti Hidrometorologjik i Kosovës thotë kushtet e tilla atmosferike do të jenë edhe gjatë së premtes (03.01.2025).

    “Edhe nesër pra do të kemi mjegull, pastaj vranësira të dendura të cilat do të krijojnë kushte për reshje, mjegulla do të hiqet por prapë do të krijohet nuk do të thotë që është mjegulla e kësaj stine sepse jemi shumë herët”.

    Para disa javësh, ministri i Infrastrukturës, Liburn Aliu tregoi se Qeveria ka investuar në një sistem të avancuar të aterimit, ku me këtë rast tha se anulimi i fluturimeve për shkak të mjegullës ka mbetur në histori.

    Ndërsa këtë të enjte (02.01.2025) pas anulimit të dhjetëra fluturimeve, Aliu ka thënë se fluturimet me pilotë të certifikuar për përdorimin e këtij sistemi kanë ateruar me sukses, ndërsa ato fluturime pa certifikimin e nevojshëm janë anuluar ose devijuar.

    Ky sistem sipas tij, mundëson aterime edhe në kushte të mjegullës së dendur, deri në dukshmëri minimale prej 50 metrash./Dukagjini

  • Anulohen 12 fluturime në ardhje në Aeroportin e Prishtinës, ministri Aliu shpjegon shkaqet

    Në Aeroportin Ndërkombëtar të Prishtinës “Adem Jashari”, janë anuluar 12 fluturime në ardhje shkaku i mjegullës.

    Këto anulime janë bërë pavarësisht se AP “Adem Jashari” e ka të instaluar sistemin e avancuar të aterimit – ILS CAT 3B.

    Lidhur me këtë zhvillim ka shkruar ministri i Infrastrukturës, Liburn Aliu, më 02.01.2025.

    “Aeroporti i Prishtinës është në shërbim gjatë tërë kohës, pasi ka të instaluar dhe funksional sistemin e avancuar të aterrimit ILS CAT IIIb, i cili mundëson aterrime edhe në kushte të mjegullës së dendur, deri në dukshmëri minimale prej 50 metrash.

    Fluturimet me pilotë të certifikuar për përdorimin e këtij sistemi, sipas tij, kanë aterruar me sukses, ndërsa “fluturimet pa certifikimin e nevojshëm janë anuluar ose devijuar”.

    “46 ardhje-shkuarje janë realizuar me sukses, derisa 12 janë anuluar në ardhje”, ka shkruar Aliu.

     

  • Ministrat Sveçla dhe Aliu vizituan mbrëmë zyrtarët policorë në veri

    Ministri i Punëve të Brendshme, Xhelal Sveçla, ka njoftuar se mbrëmë, gjatë ndërrimit të motmotit, bashkë me ministrin e Mjedisit, Planifikimit Hapësinor dhe Infrastrukturës, Liburn Aliu, ka vizituar zyrtarët policorë në Leposaviq, Urën e Bistricës, Koshtovë, Mitrovicë e Jarinje.

    Përmes një postimi në Facebook, Sveçla ka thënë se këta zyrtarë policorë përveç sigurisë së gjithë qytetarëve, janë kujdesur edhe për sigurinë e kufirit me Serbinë.

    “Përkushtimi i tyre dhe i të gjithë policëve tanë ka bërë të mundur të përmbyllim një vit sfidues por të suksesshëm e edhe më të fortë.Në këtë mbrëmje festive shpreh mirënjohjen time për të gjithë zyrtarët që në këtë mbrëmje festive ndodhen larg familjeve të tyre duke qenë në shërbim e në gatishmëri të nevojave të qytetarëve tanë” – ka shkruar Sveçla në Facebook.