Ballina

Etiketë: kqz

  • KQZ merr vendim për numrin e fletëvotimeve në Zgjedhjet e 9 shkurtit

    Komisioni Qendror i Zgjedhjeve (KQZ) në mbledhjen e sotme, më 15.01.2025, mori vendim për numrin e fletëvotimeve dhe broshurave që do të shtypen në Zgjedhjet parlamentare që do mbahen më 9 shkurt 2025.

    Sipas vendimit të KQZ-së do të shtypen 1,752,650 fletëvotime, prej të cilave 1,664,100 për votimin në vendvotime të rregullta; 28,450 për votimin me kusht; 38,650 për votimin e personave me nevoja të veçanta dhe si fletëvotime rezervë; si dhe, 21,450 për votimin në përfaqësi diplomatike.

    Bazuar në Listën Votuese të certifikuar nga Komisioni Qendror i Zgjedhjeve numri i shtetasve të Kosovës me të drejtë vote është 2,075,868 votues, prej të cilëve 1,970,944 votues janë votues që i takojnë Listës Votuese brenda Kosovës dhe 104,924 votues janë pjesë e Listës Votuese jashtë Kosovës.

    Për këto Zgjedhje janë certifikuar 28 subjekte politike, me 1,280 kandidatë.

    Fushata pёr Zgjedhjet parlamentare ka filluar zyrtarisht mё 11.01.2025. Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet e 9 shkurtit 2025.

    Këto do të jenë Zgjedhjet e para të rregullta, që Kosova mban që nga shpallja e Pavarësisë më 2008.

    https://kallxo.com/lajm/kqz-shtyn-afatin-per-akreditimin-e-vezhguesve-te-subjekteve-politike/

  • KQZ shtyn afatin për akreditimin e vëzhguesve të subjekteve politike

    Komisioni Qendror i Zgjedhjeve (KQZ) mori vendim për shtyrjen e afatit për subjektet politike, për aplikim për akreditimin e vëzhguesve.

    Afati i paraparë të përfundonte sot më 15 janar është shtyrë për 20 janar 2025.

    Sipas anëtarëve të KQZ-së kjo shtyrje po vjen për shkak se periudha për aplikimin për akreditimin e vëzhguesve ka filluar 6 ditë më vonesë, sesa ishte planifikuar.

    Po sipas anëtarëve të KQZ-së shtyrja e këtij afati nuk pengon aspak rrjedhën e planit të aktiviteteve të miratuar më parë.

    Fushata pёr Zgjedhjet parlamentare nё Kosovё ka filluar zyrtarisht mё 11.01.2025. Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet e 9 shkurtit 2025.

    Këto do të jenë Zgjedhjet e para të rregullta, që Kosova mban që nga shpallja e Pavarësisë më 2008.
     

  • Zgjedhjet e 9 shkurtit, KQZ-ja akrediton grupet e para të vëzhguesve të katër subjekteve politike

    Komisioni Qendror i Zgjedhjeve (KQZ) ka akredituar të hënën, më 12.01.2025, në mbledhjen e radhës grupin e  parë prej 2,274 vëzhguesve të katër partive politike të certifikuara për zgjedhjet e përgjithshme që mbahen më 09.02.2025.

    Gjatë kësaj mbledhjeje, KQZ ka miratuar akreditimin e grupit të parë prej 95 vëzhguesve nga Partia Demokratike e Kosovës, grupin e parë prej 1,725 vëzhgueves nga Lidhja Demokratike e Kosovës, grupin e parë prej 234 vëzhguesve nga Koalicioni “Vakat”, dhe grupin e parë prej 220 vëzhguesve nga Nova Demokratska Stranka.

    Besnik Buzhala, drejtor i Zyrës për Regjistrim, Certifikim dhe Kontrollin Financiar të Subjekteve Politike (ZRCKFSP), tha se sipas ligjit, subjektet politike që janë certifikuar për zgjedhjet e 9 shkurtit kanë afat deri më 15.01.2025 të aplikojnë për akreditimin e vëzhguesve të tyre.

    “Secili subjekt i certifikuar për zgjedhjet mund të parashtrojë pranë KQZ kërkesë për aplikim për akreditimin e vëzhguesve më së voni 25 ditë para ditës së zgjedhjeve. Për zgjedhjet për Kuvendin e Kosovës që mbahen më 09.02.2025, afati i fundit për aplikim për akreditim përfundon më 15.01.2025”- tha ai.

    Sami Kurteshi, anëtar i KQZ-së, propozoi që KQZ të shtyjë afatin për regjistrimin e vëzhguesve të subjekteve politike.

    Ky propozim u mbështet edhe nga anëtarë të tjerë të KQZ-së por u kundërshtua nga kryetari i KQZ-së, Kreshnik Radoniqi. “Është shkelje e ligjit nëse e zgjasim afatin e aplikimit, dhe shkurtojnë afatin prej më vonë 25 ditë para ditës së zgjedhjeve”- tha Radoniqi.

    Por, Kurteshi tha se kërkesën e tij e bazooi në nevojën që kanë partitë politike për zgjatje të afatit.

    “Po, mundet me u shkel ligji, por kjo shkelje e ligjit nuk është cenim i së drejtës së askujt, vetëm ndihmë, edhe ligji mendoj që është tolerant, kur ka mundësi me i ndhmu dikujt edhe me u shkel një afat, por jo mu shkel e drejta e dikujt” – tha Kurteshi.

    Gjatë kësaj mbledhjeje, KQZ shqyrtoi edhe raportim për aktivitete e Sekretariatit të KQZ-së rreth votimit me postë dhe nëpër përfaqësitë diplomatike, shqyrtimin dhe miratimi i planit operacional të sigurisë për zgjedhjet e 09.02.2024.

     

     

  • KQZ me njoftim për votuesit me nevoja të veçanta

    Komisioni Qendror i Zgjedhjeve (KQZ) ka njoftuar se procesi i regjistrimit të votuesve me nevoja të veçanta ka filluar më 04.01.2025 dhe do të zgjasë deri më 05.02.2025.

    Sipas njoftimit, për të mundësuar votimin e personave të regjistruar si votues me nevoja të veçanta, KQZ më 09.02.2025 do të angazhojë ekipet mobile në çdo Komunë të Kosovës.

    “Procesi i regjistrimit të këtyre votuesve ka filluar më 4 janar dhe do të përfundojë më 5 shkurt 2025.” – thuhet në njoftimin e KQZ-së.

    Me qëllim të lehtësimit të procedurës, KQZ ka funksionalizuar platformën online: https://vpnv.kqz-ks.org/

    Sipas KQZ-së, votuesit me nevoja të veçanta përfshijnë këto kategori: personat me sëmundje apo aftësi të kufizuar për shkak të së cilës nuk mund të dalin nga shtëpia; personat me lëvizje të kufizuar në institucione, si: spitale, shtëpi për të moshuarit dhe strehimore; dhe, personat në rrethana të veçanta, të cilët nuk mund të shkojnë në vendvotim për shkaqe sigurie apo janë në arrest shtëpiak.

    Këto do të jenë Zgjedhjet e para të rregullta që Kosova mban që nga shpallja e pavarësisë më 2008.

    Mërgimtarët kanë nisur më 09.01.2025 të votojnë përmes postës për Zgjedhjet parlamentare në Kosovë.

    Sipas të dhënave të KQZ-së, numri i qytetarëve me të drejtë vote në vendvotime në Kosovë është 1 milion e 970 mijë e 944 votues, ndërkaq numri i qytetarëve të cilët janë regjistruar për të votuar jashtë Kosovës është 104 mijë e 924 votues.

    Sipas vendimit të fundit të KQZ-së, procesi i votimit do të zhvillohet në 17 Ambasada dhe 15 Konsullata, në 19 shtete të ndryshme të botës.

    https://kallxo.com/lajm/numrat-e-partive-politike-per-zgjedhjet-e-9-shkurtit/

  • Sot nis gara për zgjedhjet e 9 shkurtit

    Fushata pёr zgjedhjet parlamentare nё Kosovё ka filluar zyrtarisht sot, mё 11.01.2025. Për njё muaj, partitë politike pritet të mbajnë tubime elektorale me qytetarët për të fituar besimin e tyre në garën e 9 shkurtit 2025.

    Për këto zgjedhje janë certifikuar 28 subjekte politike me 1280 kandidatë.

    Sipas Ligjit, gjatë periudhës së fushatës zgjedhore, subjektet politike kanë të drejtë:

    – të organizojnë dhe mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes të cilave ata mund t’i shprehin lirisht mendimet e tyre me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; dhe të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet tjera në fuqi.

    Procesi i votimit si brenda dhe jashtë vendit pritet të ketë disa ndryshime. Një nga ndryshimet, do të jetë edhe largimi i heshtjes zgjedhore që me ligjin e vjetër ka filluar 24 orë para hapjes së Qendrave të Votimit.

    Ndërsa me Ligjin e ri sipas nenit 37, “heshtja zgjedhore fillon” nga hapja e Qendrave të Votimit në ora 07:00, e deri në mbylljen e tyre në ora 19:00. Përveç kësaj, votuesit kësaj radhe mund të votojnë një deri në dhjetë kandidatë nga lista e subjektit politik.

    Këto do të jenë zgjedhjet e para të rregullta që Kosova mban që nga shpallja e pavarësisë më 2008.

    Mërgimtarët kanë nisur më 09.01.2025 të votojnë përmes postës për Zgjedhjet parlamentare në Kosovë.

    Sipas të dhënave të KQZ-së, numri i qytetarëve me të drejtë vote në vendvotime në Kosovë është 1 milion e 970 mijë e 944 votues, ndërkaq numri i qytetarëve të cilët janë regjistruar për të votuar jashtë Kosovës është 104 mijë e 924 votues.

    Sipas vendimit të fundit të KQZ-së, procesi i votimit do të zhvillohet në 17 Ambasada dhe 15 Konsullata, në 19 shtete të ndryshme të botës.

    Subjektet politike në Kosovë janë pajisur me numra, me të cilët do të garojnë në zgjedhjet e rregullta parlamentare të 9 shkurtit, pasi Komisioni Qendror i Zgjedhjeve ka organizuar hedhjen e shortit për renditjen në fletëvotime. Numrat e subjekteve politike në fletëvotime janë nga 111 deri në 138.

    Përmes shortit në Zgjedhjet e 9 shkurtit Lëvizja Vetëvendosje (LVV) do të ketë numrin 118, Lidhja Demokratike e Kosovës (LDK) 124, Partia Demokratike e Kosovës (PDK) 131, ndërsa Koalicioni AAK-NISMA-Lista Konservatore me numër 137.

    https://kallxo.com/lajm/numrat-e-partive-politike-per-zgjedhjet-e-9-shkurtit/

    KQZ e ka certifikuar më 04.01.2025 listën përfundimtare të votuesve brenda dhe jashtë Kosovës dhe ka bërë të ditur se 2 milionë e 75 mijë e 868 votues do të kenë të drejtë vote në Zgjedhjet e rregullta parlamentare më 9 shkurt.

    Nga këto zgjedhje do të vendoset përbërja e re e Kuvendit me 120 ulëse dhe deputetët më pas zgjedhin Qeverinë e re.

    Qeveria aktuale e formuar mё 2021 në Kosovë udhëhiqet nga Albin Kurti, kreu i Lëvizjes Vetëvendosje.