Ballina

Etiketë: komuna e podujevës

  • Pakënaqësitë për unifikimin e Trafikut Urban, Rama thotë se ka inicuar bashkëpunim me Komunën e Podujevës 

    Pakënaqësitë për unifikimin e transportit të autobusëve të Trafikut Urban, sidomos të linjave të transportit nga Komuna e Podujevës janë diskutuar në mbledhjen e Kuvendit Komunal të Prishtinës, më 31.01.2025.

    Kuvendi i Komunës së Prishtinës po mban mbledhjen e parë të rregullt për këtë vit, ndërsa aktualisht ndodhet në pauzë. 

    Asamblisti nga radhët e Lëvizjes Vetëvendosje, Feim Osmani ngriti për diskutim çështjen e unifikimit të Trafikut Urban nga Komuna e Prishtinës.

    Sipas Osmanit, linjat e fundit të kontraktuara nga Komuna e Prishtinës, me Operatorë privatë, me të cilët thotë se Komuna ka synuar të arrijë shërbimet e transportit publik për banorët e fshatrave që shtrihen përgjatë magjistrales Prishtinë – Besianë, si fshatrat: Trudë, Lebanë, Prugovc, Barilevë, Besi, Rimanishtë, Vranidoll, Teneshdoll, Sharban… janë linja që kanë paraqitur më shumë probleme, sesa që kanë krijuar lehtësira për banorët e këtyre zonave.  

    Osmani iu drejtua kryetarit Rama duke thënë se këto linja janë lëshuar në qarkullim pa ndonjë planifikim paraprak, pa plan të mobilitetit dhe pa marrëveshje me insitucionin, që sipas tij është përgjegjës për rrugët magjistrale. 

    “Duke tentuar të zgjidhet shkel e shko kjo çështje kaq e rëndësishme, Komuna ka nënshkruar Kontrata që kanë implikime të mëdha buxhetore, pa e vrarë fare mendjen se nuk ka pasur të drejtë ta bëjë një gjë të tillë.” – deklaroi Osmani.

    Sipas tij me këtë Vendim të Komunës së Prishtinës nuk janë marrë parasysh edhe konfliktet e dhunshme, që do të mund të ndodhin mes Operatorëve në aksin rrugor Prishtinë – Podujevë. 

    “Autobusët e kontraktuar për trafik urban i keni detyruar të shkojnë nga Prishtina në Teneshdoll dhe nga Prishtina në Sharban me tre ose katër udhëtarë dhe ua keni ndaluar ndaljet nëpër Stacione – duke i  detyruar të futen nëpër vendbanime.” – shtoi Osmani. 

    Ndërkaq, kryetari Përparim Rama në kundërpërgjigje ka thënë se e vetmja gjë që ka ndërmarrë Komuna e Prishtinës është se është bashkuar kostoja e trafikut urban dhe të gjithë Operatorëve privatë në një biletë, në mënyrë që siç tha ai të gjithë qytetarët të mos paguajnë dy herë, por ta kryejnë vetëm një pagesë. 

    Ai tha se ka pasur diskutime me këta Operatorë dhe Komunën e Podujevës, duke thënë se ka inicuar për të bërë një bashkëpunim me ta dhe me zëvendësministrin e Ministrisë së Infrastrukturës, Hysen Durmishin, për të zgjidhur këtë problem, por thotë se fokusi i tij është te qytetarët e Kryeqytetit. 

    Tutje, Rama thotë se janë në pritje të Ministrisë së Infrastrukturës që t’ua caktojë pikat në linjat ndërurbane. 

    Rama pati edhe akuza për Operatorët e Komunës së Podujevës. 

    “Pasi që ne e kemi kriju biletën e përbashkët mes Transportit publik dhe Operatorëve privatë, kemi insistu që t’i përmbahen një orari, i cili është në të mirën e çdo qytetari: edhe në Prishtinë, edhe nëpër fshatra. Edhe kjo ka kriju një pakënaqësi prej Operatorëve të Podujevës. Aty e kemi pasë ne problemin, sepse deri në kohën kur nuk i kemi bashku këto të dyja, Operatorët privatë kanë operu vetëm kur iu ka konvenu.” – deklaroi Rama, të premten, më 31.01.2025. 

    Në anën tjetër, Osmani nga Lëvizja Vetëvendosje akuzoi Ramën për mashtrim, gjersa tha se këto linja nuk qarkullojnë. 

    “Këto linja nuk qarkullojnë. Ti po thua se ato janë duke u mbajtë, mirëpo ato shkojnë nga Prishtina drejt në Teneshdoll dhe nga Prishtina në Sharban, pa u ndalë dhe pa i marrë banorët nëpër Stacionet përkatëse.” – tha Osmani.

    Kryetari i Prishtinës tha se janë në pritje të një përgjigjeje të zëvendësministrit të Ministrisë së Infrastrukturës, Hysen Durmishi, për të treguar se ku mund të ndalen autobusët: edhe në zonat ndërurbane, edhe të trafikut urban – duke thënë se është çështje javësh, derisa ky problem me Operatorët e Komunës së Podujevës të zgjidhet përgjithmonë. 

    “Po më vjen keq për fjalorin që po e përdor. S’ka kurrfarë mashtrimi këtu. Ka përmirësim në secilën pjesë të Kryeqytetit, nëse dalin probleme gjatë përmirësimit, siç i kemi tash me linjat ndërurbane. Ne kemi marr iniciativë të menjëhershme për përmirësimin e kushteve, pikërisht për qytetarët e këtyre zonave, të Kryeqytetit e të gjitha. Derisa ata i kanë pagu dy bileta, tash i paguajnë vetëm dy.” – shtoi Rama në seancën e rregullt të Kuvendit të Prishtinës.  

    Nga 02.01.2025 qytetarët e Prishtinës kanë sistem të unifikuar të transportit publik urban, me bileta të integruara ditore, javore dhe mujore për të gjitha linjat – përfshirë Operatorët privatë, që po ashtu operon sipas këtyre kushteve.

    Çmimet e biletave – sipas këtij Vendimi – që aplikohen edhe në linja që lidhin fshatrat me qytetin janë si në vijim: 0.50 cent për një udhëtim të vetëm; 0.80 cent për biletën ditore (e vlefshme për të gjitha linjat); 4 euro për biletën javore; 12 euro për biletën mujore për studentë; 13,50 euro për biletën mujore për qytetarë. Një biletë e tillë mund të përdoret brenda 12 orëve në secilën linjë të trafikut urban.

    Ndërkaq, më 16.01.2025, pjesëtarë të Shoqatës së autobusëve “Llapi”, të linjës Podujevë – Prishtinë patën protestuar në shenjë pakënaqësie ndaj Vendimit të Komunës së Prishtinës për sistem të unifikuar të trafikut urban – përfshirë Operatorët privat që lidhin fshatra të Komunës.

    Sipas tyre ky Vendim i Komunës i dëmton ekonomikisht. Si shenjë proteste, pronarët e autobusëve të linjës Podujevë-Prishtinë nuk i kanë lejuar të qarkullojnë autobusët që janë të Komunës së Prishtinës.

  • Ministria e Financave me 25 milionë euro kredi nga BERZH-i për impiantin e ujërave të zeza në Podujevë

    Ministria e Financave do të marrë  një kredi të re nga Banka Evropiane për Rindërtim dhe Zhvillim (BERZH), për ndërtimin e një impianti për trajtimin e ujërave të zeza në Podujevë.

    Sipas njoftimit, projekti përfshin ndërtimin e një impianti të madh që do t’i shërbejë një popullate deri në 50 mijë banorë, si dhe ndërtimin e një impianti në shkallë të vogël, për trajtimin e ujërave të zeza dhe përmirësimin e rrjetit lokal të kanalizimeve.

    Udhëheqësi i BERZH-it për Kosovë, Sergiy Maslichenko ka thënë se është krenar që BERZH po vazhdon mbështetjen e projekteve kyçe të infrastrukturës në Kosovë.

    “Kjo iniciativë shënon një hap tjetër përpara në rritjen e kapaciteteve të vendit, për trajtimin e ujërave të zeza – duke adresuar një nevojë kritike për përmirësimin e higjienës dhe reduktimin e ndotjes së mjedisit për mirëqenien e qytetarëve të Kosovës. Së bashku, jemi të përkushtuar për të krijuar zgjidhje të qëndrueshme që nxisin përparimin afatgjatë dhe një të ardhme më të shëndetshme për të gjithë.” – ka thënë ai.

    Kurse kryetari i Podujevës, Shpejtim Bulliqi tha se ky projekt do të jetë në përputhje me standardet evropiane.

    “Ndërtimi i këtij impianti jo vetëm që do të sigurojë që trajtimi i ujërave të zeza të jetë në përputhje me standardet evropiane, por gjithashtu do të luajë një rol kyç në uljen e ndotjes së lumenjve dhe ruajtjen e burimeve ujore.” – ka thënë Bulliqi.

    Zbatuese e projektit do të jetë Kompania Rajonale e Ujësjellësit “Prishtina”, ndërsa Agjencia Suedeze për Bashkëpunim Ndërkombëtar për Zhvillim (SIDA) është duke e mbështetur këtë Kompani për përgatitjen e projektit, me një grant prej 270 mijë eurosh.

    “BERZH-i do t’i ndihmojë Kompaninë edhe që të sigurojë bashkëpunim teknik shtesë dhe grante investimi, në mënyrë që ta bëjë këtë investim më të realizueshëm dhe të përballueshëm për Qeverinë e Kosovës.” – thuhet në njoftim.

    BERZH është bankë shumëpalëshe që promovon zhvillimin e sektorit privat dhe iniciativat ndërmarrëse në 36 ekonomi në tre kontinente. Banka është në pronësi të 74 shteteve, si dhe të BE-së dhe BEI-së.

    Deri më tani, kjo Bankë ka investuar më shumë se 770 milionë euro në Kosovë, përmes 120 projekteve.

     

  • Fermeri thotë se Komuna e Podujevës deshi të ndërtojë shtratin e lumit në pronën e tij

    Vërshimet e viteve të fundit, Musa Bacakut nga Podujeva ia dëmtuan një pjesë të konsiderueshme të pronës. Fermeri nga Lluzhani pretendon se Lumi Llap, ia mori rreth 50 ari tokë. Ai shpresonte se me fillimin e projektit për rregullimin e shtratit, toka do t’i rikthehej, por një gjë e tillë sipas tij nuk ndodhi.

    Punimet në pronën e tij nuk i ka lejuar të vazhdojnë, meqë Bacaku pretendon se muri mbrojtës planifikohej të ndërtohej në tokën e tij.

    “Në pronat e mija nuk kam leju me u punu më tutje, për shkak se unë kur e kam thirrë gjeodetin privat dhe i ka vendosë pikat, i kam tregu edhe atyre të komunës, i kanë pa pikat ku janë. Ju kam thanë nuk ka nevojë me u bazu në gjeodet timin, merrni gjodetët e komunës, t’i verifikoja a janë mirë a nuk janë mirë. Pikërisht aty ka qenë një pikë gjeodike dhe prej asaj pike deri në anën e kundërt të lumit, ka qenë maksimalisht 2 metra. E fajësoj kryetarin Shpejtim Bulliqin sepse kemi shpresu që ka me e rregullu dhe ka me qenë real. Mezi kemi pritë që do të rregullohet edhe kjo pjesa kah na, nuk kanë dashtë, kanë mendu me e vendos murin veç ka është dheu e jo ka janë pikat. Unë nuk kam leju sepse në atë kohë, kanë qenë diku 20 ari të dëmtuara, por niveli është rritë prapë dhe diku 50 ari është dëmi”- tha Bacaku për KALLXO.com

    Drejtori për Shërbime Publike në Komunën e Podujevës e mohoi që muri mbrojtës planifikohej të ndërtohej në pronën e Musa Bacakut.

    “E vërteta është që ne e kemi ndërtu murin mbrojtës deri të prona e tij, ai na ka pengu dhe është ndal si proces dhe kemi vazhdu në pjesë tjera dhe pronën e tij se kemi prekur. Jemi mundu me bo marrëveshje e diskutime të përbashkëta që me e rregullu lumin. Unë e kam të qartë që lumi ka bo gërryerje në pronën e tij, e di që e ka marrë një pjesë të tokës së tij. Diskutimi ka qenë që murin me e vendos në pika kadastrale të lumit, mirëpo si duket aty është kriju një pabesi sepse ai nuk besojke që ne mundemi me e vendos murin në pika kadastrale të lumit”- tha Bahri Selimi për KALLXO.com

    Për ta zgjidhur problemin, fermeri thotë se iu drejtua disa herë Komunës, por, pa hasur në mirëkuptim.

    “Kur kam shku herën e fundit pikërisht te drejtori që ka qenë në mbikëqyrje të projektit, i kam thanë kur do të përfundojnë parcelat e mija? Më ka thanë kurrë dhe në momentin kur i kam thanë po të incizoj, thuaje edhe njëherë ata çka e the, me ka qitë prej zyre”- shtoi Musa Bacaku.

    Por, krejt tjetër version ka drejtori në fjalë.

    “Për këtë kontratën e re kur e kemi ba, ne i kemi vendos pikat kadastrale edhe në pronën e tij. Përmes menaxherit të kontratës e kam ftuar në zyre të kryetarit, por ai nuk është përgjigj”- bëri të ditur Drejtori për Shërbime Publike në Komunën e Podujevës.

    Puna për ndërtimin dhe rregullimin e shtratit të lumit Llap, kishte nisur qysh në vitin 2019. Kompania “Bini” i kishte fituar disa kontrata nga Komuna e Podujevës.