Ambasadori i Britanisë së Madhe në Kosovë, Jonathan Hargreaves po vazhdon takimet me liderët e partive politike në Kosovë, në prag të Zgjedhjeve parlamentare të cilat do të mbahen më 09.02.2025.
Hargreaves ka njoftuar se sot më 29.01.2025 është takuar me liderin e Lëvizjes Vetëvendosje, Albin Kurti, njëherësh kandidat i kësaj partie për Kryeministër.
Ai ka thënë se me Kurtin diskutuan për fushatën zgjedhore.
“Ambasada Britanike po vazhdon takimet me liderët e partive politike, në prag të Zgjedhjeve të përgjithshme në Kosovë. Sot ishte mirë të flisja me liderin e Vetëvendosjes, kryeministrin Albin Kurti dhe Besnik Bislimin. Diskutuam fushatën zgjedhore dhe rëndësinë e institucioneve të fuqishme, të pavarura të Kosovës.” – ka njoftuar ai.
Në këto ditë fushate, Abdixhiku e ka njoftuar Ambasadorin për rrjedhën e tubimeve elektorale.
Sipas njoftimit, ai tha se u zotua që pas 9 shkurtit me Qeverinë e re të LDK-së, Kosova do të rikuperojë pozicionin e saj ndërkombëtar dhe do të avancojë interesat strategjike.
Fushata pёr Zgjedhjet parlamentare nё Kosovё ka filluar zyrtarisht, mё 11.01.2025.
Për këto Zgjedhje janë certifikuar 28 subjekte politike, me 1,280 kandidatë.
Këto do të jenë Zgjedhjet e para të rregullta që Kosova mban, që nga shpallja e Pavarësisë më 2008 – duke ftuar qytetarët për mobilizim masiv për të arritur numrin rekord të daljes së grave dhe vajzave në votime.
Zgjedhjet e vitit 2025 për Kuvend të Kosovës janë Zgjedhjet e gjashta me radhë që do mbahen në Kosovë, që nga shpallja e pavarësisë së Kosovës më 17 shkurt 2008.
Kryetari i Komunës së Prishtinës, Përparim Rama, është takuar me ambasadorin e Britanisë së Madhe në Kosovë, Jonathan Hargreaves, me të cilin ka diskutuar për rolin e ekspertizës britanike në procesin e digjitalizimit të kryeqytetit.
Po ashtu, Rama thotë se kanë folur edhe për rëndësinë e bashkëpunimeve mes kompanive teknologjike dhe për mundësitë për inovacion të përbashkët.
“Bashkëpunime të tilla janë kyçe për të forcuar lidhjet tona dhe për të krijuar mundësi të reja për qytetarët e Prishtinës”- ka shkruar Rama, të martën, më 28.01.2025.
Ai kishte theksuar se ky është hap i rëndësishëm për sigurinë dhe rregullin në trafik.
Ndërsa, si pjesë e angazhimit për një Qytet të Mençur (Smart City), muaj më parë Komuna nisi vendosjen e shtyllave informuese që tregojnë vendet e lira të parkimit, temperaturën, cilësinë e ajrit e informacione të tjera.
Kandidati i Lidhjes Demokratike të Kosovës (LDK) për Kryeministër, Lumir Abdixhiku, më 22.01.2025, ka zhvilluar takim me ambasadorin e Britanisë së Madhe në Kosovë, Jonathan Hargreaves.
Në këto ditë fushate, Abdixhiku e ka njoftuar Ambasadorin për rrjedhën e tubimeve elektorale.
Ai tha se u zotua që pas 9 shkurtit me Qeverinë e re të LDK-së, Kosova do të rikuperojë pozicionin e saj ndërkombëtar dhe do të avancojë interesat strategjike.
“Ambasadorin e njoftova për momentumin e mirë të fushatës sonë; për rrjedhën e tubimeve impresive, si dhe për pritjet tona për ndryshim! E njoftova dhe për projektet e mëdha kapitale, që do t’i realizojmë! U zotova që pas 9 shkurtit, me LDK-në udhëheqëse të Qeverisë së Re, Republika e Kosovës do të rikuperojë pozicionin e saj ndërkombëtar, siç dhe do të avancojë interesat tona strategjike.” – ka thënë lideri i LDK-së.
Ndërsa, ka shtuar se Mbretëria e Bashkuar është aleat strategjik i Kosovës – duke thënë se e ka falënderuar Ambasadorin, për gjithë kontributin e dhënë në çdo etapë.
Fushata pёr Zgjedhjet parlamentare nё Kosovё ka filluar zyrtarisht, mё 11.01.2025.
Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare të 9 shkurtit 2025.
Për këto Zgjedhje janë certifikuar 28 subjekte politike, me 1,280 kandidatë.
Sipas Ligjit, gjatë periudhës së fushatës zgjedhore subjektet politike kanë të drejtë:
– të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;
– të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdolloj mjeti tjetër reklamues – në pajtim me rregullat e KQZ-së dhe ligjet e tjera në fuqi.
Këto do të jenë Zgjedhjet e para të rregullta që Kosova mban, që nga shpallja e Pavarësisë më 2008 – duke ftuar qytetarët për mobilizim masiv për të arritur numrin rekord të daljes së grave dhe vajzave në votime.
Presidentja e Kosovës, Vjosa Osmani është takuar me ambasadorin e Mbretërisë së Bashkuar në Kosovë, Jonathan Hargreaves.
Në komunikatën për media të Presidencës thuhet se në takim u fol për fushën e sigurisë dhe mbrojtjes, me ç’rast u vlerësua mbështetja e Mbretërisë së Bashkuar në reformat institucionale dhe promovimin e sundimit të ligjit.
Osmani ka theksuar nevojën e ngritjes së nivelit të bashkëpunimit – si hap drejt anëtarësimit në NATO.
“Presidentja Osmani falënderoi po ashtu Mbretërinë e Bashkuar për Programin e bursave Chevening dhe diskutoi mundësitë për zgjerimin e shkëmbimeve arsimore e kulturore, si dhe për forcimin e partneritetit në këto fusha.” – thuhet tutje në komunikatë.
Presidentja kosovare ka folur për rëndësinë e bashkëpunimit për adresimin e sfidave dhe ka dhënë gatishmëri për thellimin e marrëdhënieve në mes të dy vendeve në të gjitha fushat.
Administrata Tatimore e Kosovës (ATK) ka mbledhur mbi 11 miliardë euro të hyra në Kosovë, përmes tatimeve e kontributeve pensionale për 25 vjet.
Kështu ka deklaruar drejtori i përgjithshëm i ATK-së, Ilir Murtezaj në shënimin e 25-vjetorit të themelimit të këtij institucioni, më 17.01.2025.
ATK thotë se e shënuan përvjetorin e themelimit me një ceremoni solemne, në të cilën morën pjesë udhëheqës të lartë të shtetit, ambasadorë të vendeve të fuqishme që veprojnë në Kosovë, përfaqësues të organizatave ndërkombëtare dhe shumë të ftuar të tjerë.
Sipas Murtezajt, misioni i ATK-së është ngritja e nivelit më të lartë të përmbushjes vullnetare në përputhje me legjislacionin tatimor në fuqi, si dhe ofrimi i shërbimeve profesionale, transparente dhe efektive për tatimpagues.
“Ne drejtuesit dhe të gjithë punonjësit e Administratës Tatimore të Kosovës, këtë mision e konsiderojmë si mision të shenjtë dhe punojmë shumë që askush dhe asnjëherë të mos guxojë të shkelë mbi këtë mundësi që na është ofruar për t’i shërbyer vendit tonë.” – thuhet në njoftimin e ATK-së, më 17.01.2025.
Murtezaj ka bërë të ditur se ATK-ja për këto 25 vjet ka mbledhur mbi 8 miliardë euro tatime dhe mbi 3 miliardë euro kontribute pensionale.
“I pari i ATK-së (Ilir Murtezaj) tha se krahas rritjes së të hyrave ne vazhduam me reformim institucional – reforma këto të cilat transformuan institucionin e ATK-së nga një Administratë Tatimore modeste në një Administratë Tatimore moderne.” – ka njoftuar ATK.
Foto: ATK/Facebook, 17.01.2025
Sipas ATK-së, ambasadorët e vendeve të fuqishme në Kosovë, në fjalimet e tyre në ceremoni, e vlerësuan lart angazhimin dhe përkushtimin e ATK-së për të ndërtuar një sistem tatimor të drejtë dhe të qëndrueshëm – duke theksuar mbështetjen e vazhdueshme të dhënë përmes projekteve dhe ekspertizës ndërkombëtare.
“Ky përvjetor nuk është thjesht një shënim i kalimit të kohës, por një dëshmi e përkushtimit, profesionalizmit dhe suksesit të arritur nga ky institucion në ndërtimin e themeleve të qëndrueshme për të ardhmen e Kosovës.” – ka thënë përfaqësuesja nga Ambasada e SHBA-së, Eileen Devitt.
ATK vlerëson se sistemi tatimor është themeli mbi të cilin ngrihet një shtet i fortë dhe i qëndrueshëm.
“Një Administratë Tatimore e besueshme dhe efikase jo vetëm që siguron burime për zhvillimin ekonomik dhe shërbimet publike, por gjithashtu rrit besimin e qytetarëve në institucione dhe në drejtësinë e sistemit.” – ka theksuar ATK.
Tutje, ATK ka përmendur se SHBA ka ofruar mbështetje në zhvillimin e ATK-së dhe se kjo mbështetje ka përfshirë trajnime, ndihmë teknike dhe partneritet për të avancuar proceset e digjitalizimit, transparencës dhe llogaridhënies.
Kurse, ambasadori i Mbretërisë së Bashkuar në Kosovë, Jonathan Hargreaves, sipas ATK-së, gjatë fjalimit të tij në ceremoninë e 25-vjetorit të ATK-së ka vlerësuar bashkëpunimin afatgjatë mes Kosovës dhe Mbretërisë së Bashkuar në ndërtimin e kapaciteteve institucionale të ATK-së.
“Ambasadori nënvizoi rëndësinë e vazhdimit të shkëmbimit të përvojave ndërkombëtare për të siguruar një sistem tatimor modern, transparent dhe të drejtë – duke shprehur gatishmërinë e Mbretërisë së Bashkuar për të mbështetur më tej reformat dhe zhvillimin e mëtejshëm të ATK-së.” – thotë ATK.
Ndërsa, për ambasadorin e Gjermanisë në Kosovë, Joern Rohde, ATK thotë se ai theksoi mbështetjen e vazhdueshme që shteti gjerman ka ofruar përmes organizatës ‘GIZ’.
“Ai vlerësoi rezultatet e dukshme të këtij bashkëpunimi, duke përfshirë forcimin e kapaciteteve institucionale të ATK-së, përmirësimin e procedurave tatimore dhe zhvillimin e sistemeve të digjitalizuara. Ambasadori nënvizoi se përkushtimi i Gjermanisë për të mbështetur Kosovën në ndërtimin e një Administrate moderne dhe të përgjegjshme do të vazhdojë.” – ka shtuar ATK.
E përfaqësuesi i Fondit Monetar Ndërkombëtar (FMN), Sebastian Sosa ka vlerësuar, siç thotë ATK, përparimin e jashtëzakonshëm të ATK-së në ndërtimin e një Administrate Tatimore efikase dhe transparente.
“Ai theksoi se ATK ka luajtur një rol të rëndësishëm në sigurimin e të hyrave të qëndrueshme për buxhetin e Kosovës – duke ndihmuar kështu në zhvillimin ekonomik dhe stabilitetin financiar të vendit. Përfaqësuesi i FMN-së u shpreh se institucioni që ai përfaqëson mbetet një partner i përkushtuar në mbështetjen e reformave dhe përmirësimin e mëtejshëm të proceseve tatimore në Kosovë.” – ka thënë Sosa, sipas ATK-së.
Kryetari i Odës Ekonomike të Kosovës, Lulzim Rafuna ka thënë se në këto dy dekada e gjysmë ATK jo vetëm që ka përmbushur misionin e saj për të mbledhur të hyrat publike, por ka ndikuar thellësisht edhe në ndërtimin e një kulture të re të vetëdijes tatimore.
“Nëpërmjet punës së saj të palodhshme, ATK ka ndërgjegjësuar qytetarët dhe bizneset se pagimi i tatimeve nuk është vetëm një detyrim ligjor, por edhe një akt përgjegjësie shoqërore, që kontribuon direkt në ndërtimin e një shoqërie më të mirë dhe më të drejtë.” – ka thënë Rafuna, sipas ATK-së.
