Ballina

Etiketë: IKShPK

  • U zgjatet orari i punës, punëtorët e IKSHPK-së thonë se po i ekspozohen rrezikut në vendin e punës

    Punonjësit e Departamentit të Mikrobiologjisë në Institutin Kombëtar të Shëndetësisë Publike (IKSHPK) tash e një kohë janë duke punuar me orar 8-orësh.

    Për shkak të rrezikshmërisë së punës në Laborator dhe ekspozimit ndaj mostrave të ndryshme, ky Departament, në bazë të një Vendimi të nënshkruar në vitin 2018, nga ish-drejtori Naser Ramadani punonte me orar shtatë-orësh.

    “Për punëtorët e Institutit Kombëtar të Shëndetësisë Publike të Kosovës në Departamentin e Mikrobiologjisë, Ekologjisë Humane dhe Qendrës së Laboratorëve Testuese, orari i punës reduktohet në shtatë orë në ditë, përkatësisht orari i punës do të jetë: 08:00 deri 15:00.” – thuhet në Vendimin e datës  15.01.2018.

    Por, me hyrjen në fuqi të Rregullores për Orarin e punës, pushimet dhe vijueshmërinë e zyrtarëve publik të miratuar nga Qeveria e Kosovës, punëtorët e Departamentit të Mikrobiologjisë detyrohen të punojnë me orar tetëorësh.

    “Jemi të rrezikuar gjatë tërë kohës, jemi në kontakt me gjithfarë mostre.” – ka thënë një punonjës në kushte anonimiteti për KALLXO.com.

    Në Kërkesën e këtyre punëtorëve të siguruar nga KALLXO.com, ata kanë kërkuar kthimin e orarit shtatëorësh, të paktën deri në Vendimin e Komisionit për Vlerësimin e rrezikshmërisë në punë.

    Në këtë Kërkesë mes të tjerave theksohet rreziku që iu kanoset punëtorëve, të cilët sipas kësaj Kërkese “ka disa raste që kanë marrë sëmundje profesionale në vendin e punës”.

    “Kërkojmë nga ana e Drejtorit të Departamentit të Mikrobiologjisë që të na lejohet të punojmë me orar, siç kemi punuar shtatë orë deri në një Vendim të radhës, të bazuar në vlerësimin e Komisionit adekuat për rrezikshmëri në punë.” – thuhet në Kërkesën e bërë në shtator të 2024-tës.

    “…siç po shihet edhe me Vendimin e datës 16.01.2018 ka pasur reduktim të orëve të punës dhe me Vendimin Nr.304/01 i datës 17.04.2012, ku në këtë Vendim ceket se është bërë vlerësimi i rrezikshmërisë në punë nga Komisioni adekuat, është vendosur që orari i punës për Departamentin e Mikrobiologjisë të jetë 6 orë pune në ditë.” – thuhet në Kërkesë, duke përmendur Vendimet e mëparshme, kur ky Departament ka punuar me orar gjashtë dhe shtatëorësh.

    Instituti Kombëtar i Shëndetësisë Publike (IKSHPK) ka thënë se janë duke respektuar Rregulloren e miratuar nga Qeveria e Kosovës.

    Ndërsa sa i përket Kërkesës së punonjësve të bërë që nga shtatori i vitit 2024 kanë thënë se janë duke e shqyrtuar ende.

    “Pra, zbatimi i Rregullores së Qeverisë është obligativ edhe për Institutin Kombëtar të Shëndetësisë Publike në Kosovë. Kërkesën për të cilën jeni duke u thirrur, jemi duke e shqyrtuar dhe diskutuar me parashtruesit e kësaj çështjeje, për të gjetur një zgjidhje për të mirën e të gjithëve, pa shkelur Dispozitat ligjore. Lidhur me rrezikshmërinë, kjo do të bëhet nga institucioni përkatës, të cilët do të bëjnë vlerësimin e rrezikshmërisë në vendin e punës.” – thuhet në përgjigjen e IKSHPK-së për KALLXO.com

    KALLXO.com ka dërguar pyetje në Shërbimin Spitalor Klinik Unversitar të Kosovës (SHSKUK), në lidhje me procesin e vlerësimit të rrezikshmërisë në vendin e punës, por deri në momentin e publikimit të këtij artikulli nuk kanë kthyer përgjigje.

     

  • IKSHPK u bën thirrje qytetarëve pa dallim moshe të marrin vaksinën kundër gripit sezonal

    Instituti Kombëtar i Shëndetësisë Publike të Kosovës (IKSHPK) u ka bërë thirrje qytetarëve të vendit pa dallim moshe që të vaksinohen kundër gripit sezonal, si masë parandaluese.

    Qytetarët mund të vaksinohen në secilën Komunë në Qendrën më të afërt të Mjekësisë Familjare, ndërsa është bërë e ditur se Ministria e Shëndetësisë ka siguruar 85 mijë doza të vaksinës.

    “Duke qenë që sezoni i gripit zgjat edhe për disa muaj, IKSHPK u bën thirrje të gjithë qytetarëve pa dallim moshe që të vaksinohen si masë parandaluese, me theks të veçantë grupeve me prioritet, si: punëtorët shëndetësorë, gratë shtatzëna, personat me sëmundje kronike dhe me imunitet të komprometuar, personat mbi 65 vjeç dhe fëmijët e moshës nga 6 muaj deri në 5 vjeç, me indikacione shëndetësore.” – thuhet në njoftim.

    Ky Institut ka bërë të ditur se intensiteti i gripit sezonal është në aktivitetin e lartë të qarkullimit – duke e kaluar pragun epidemik.

    IKSHPK ka bërë thirrje te qytetarët që të zbatojnë edhe masat parandaluese kundër grupit, si: mbajtja e higjienës personale, evitimi i kontakteve me individë të sëmurë, evitimi i vendeve të mbyllura e ndër të tjera edhe ushqim të shëndetshëm me shumë vitamina.

    Instituti Kombëtar i Shëndetësisë Publike ka shpjeguar se “gripi sezonal është sëmundje akute infektive e cila te një numër i konsideruar i rasteve shkakton komplikime serioze shëndetësore, veçanërisht te fëmijët, të moshuarit dhe ata me sëmundje kronike, ndërsa vaksinimi  është mënyra më e mirë për të parandaluar gripin dhe reduktuar rrezikun”.

  • Ajri i ndotur në Kosovë – IKSHKP me rekomandime

    Kosova, e veçanërisht Prishtina, është duke u përballur me nivele të larta të ndotjes së ajrit – ndotje kjo e cila po konsiderohet rrezik për shëndetin e qytetarëve, e sidomos për grupet e ndjeshme.

    Instituti Kombëtar i Shëndetësisë Publike (IKSHPK) duke dhënë disa informata mbi ndotjen e ajrit ka bërë të ditur se, ditët e ftohta dhe rëniet e temperaturave mund ta vështirësojnë më shumë situatën, si pasojë e ngrohjes me lëndë djegëse të dëmshme.

    Për zvogëlimin e rrezikut nga ajri i ndotur IKSHPK ka rekomanduar që të reduktohen daljet në qytet, me theks të veçantë në mëngjes dhe mbrëmje, e sidomos personat që kanë sëmundje kronike të Sistemit kardiovaskular dhe respirator: fëmijët dhe shtatzënat.

    Instituti rekomandon që të qëndrohet në shtëpi dhe të mos hapen dritaret, ndërsa për personat që pashmangshëm duhet të dalin të përdorin maska mbrojtëse apo të mbulojnë gojën e hundën me shallë.

    “Të reduktohet pirja e duhanit jashtë, ku ka qarkullim të njerëzve, e domosdoshmërisht të ndalohet hapësirave të mbyllura – sikur e përcakton edhe vetë Ligji dhe në hapësira të banimit, punës, shkollave dhe spitaleve.” – ka rekomanduar, ndër të tjera, IKSHPK më 23.01.2025.

    Të dhënat e Organizatës Botërore të Shëndetit (OBSH), të publikuara nga IKSHPK, tregojnë se mbi 500 mijë vdekje të parakohshme ndodhin çdo vit, si pasojë e ndotjes së ajrit në botë, ndërsa 9 nga 19 njerëz thithin ajër që tejkalon kufijtë e Udhëzuesit të OBSH-së.

  • Në IKSHPK caktohen Laboratorët Referentë për Influencën, Fruthin dhe Rubellën

    Me Vendim të Ministrit të Shëndetësisë, Instituti Kombëtar i Shëndetësisë Publike (IKShKP) ka caktuar dy laboratorë referentë në kuadër të këtij institucioni.

    Laboratori për Influencë është caktuar si laborator referent për diagnostifikimin e monitorimin e influencës dhe viruseve të tjera respiratore në nivel kombëtar.

    Ndërsa Laboratori për Fruth dhe Rubellë është caktuar si laborator referent për diagnostifikimin, monitorimin dhe studimin e fruthit dhe rubellës.

    Sipas njoftimit të IKShPK-së, ndër të tjera, funksioni i Laboratorit Referent për Influencë është si Qendër Diagnostike për Influencën dhe Virusët Respiratorë në Kosovë dhe shërben si Qendër Trajnimi për Personelin Laboratorik mbi Diagnozën e Influencës dhe Viruseve.

    “Detyrat Specifike të Laboratorit Referent për Influencë: teston mostra për sëmundje të ngjashme me gripin dhe infeksione akute respiratore, sipas mbikëqyrjes së sëmundjeve ngjitëse; identifikon dhe dallon nëntipe të influencës A dhe B, duke përdorur metoda diagnostike të avancuara; përgatit dhe raporton të dhëna statistikore për IKSHPK; ruajtja e mostrave në mikrobanka dhe dërgimi i tyre në Qendrat Bashkëpunuese të OBSH-së për zhvillimin e vaksinave sezonale.” – thuhet në njoftimin e datës 14.01.2025.

    Ndërkaq, detyrat specifike të Laboratorit Referent për Fruth dhe Rubellë janë që të sigurojë teste diagnostifikuese e këshilla shkencore për kontrollin e sëmundjeve dhe ruajtjen e shpërndarjen e produkteve referente biologjike për diagnostifikim.

  • Fillon vaksinimi kundër HPV edhe për djemtë në Kosovë

    Përveç vajzave, tashmë edhe djemtë do të mund ta marrin vaksinën kundër Human Papilloma Virusit (HPV).

    Kështu ka njoftuar ministri i Shëndetësisë, Arben Vitia në një Konferencë për media, teksa theksoi se sigurimi i vaksinave të tilla pa asnjë kosto shtesë “është një arritje e madhe e sistemit shëndetësor”.

    “Kam kënaqësinë që sot të njoftoj fillimin e vaksinimit HPV edhe për djemtë, që ndikon në ruajtjen e brezave të ardhshëm. Siç e dini ky virus shkakton lloje të ndryshme të kancerëve. Vitin e kaluar miratuam përfshirjen e tri vaksinave të reja. Sigurimi i vaksinave të tilla pa asnjë kosto shtesë është një arritje e madhe e të gjithë juve dhe sistemit shëndetësor. Vaksina HPV nuk është vetëm mundësi për vajza, por edhe për djemtë tash. HPV është shumë i rrezikshëm dhe vaksinimi i djemve është një hap shumë i rëndësishëm.” – ka deklaruar Vitia.

    Ministri Vitia bëri të ditur se 10 mijë vajza janë vaksinuar që nga fillimi i vaksinimit me vaksinën HPV, që nga viti i kaluar.

    “10 mijë vajza janë vaksinuar që nga fillimi i vaksinimit për vajza me vaksinën HPV, që nga viti i kaluar. Komiteti profesional për imunizim ka rekomanduar që të fillojë vaksinimi edhe për djemtë. Ju bëj thirrje prindërve që të sigurohen që fëmijët të vaksinohen, sepse është një hap i rëndësishëm dhe përgjegjësi e përbashkët.” – tha Vitia.

    Drejtoresha e Institutit Kombëtar të Shëndetësisë Publike (IKSHPK), Ardita Baraku tha se vaksina është e sigurtë dhe efikase.

    “Vaksina është vaksinë e sigurt dhe efikase. Bëj thirrje për prindër dhe arsimtarë që të përçojnë mesazhin për vaksinim dhe t’i kemi të mbrojtur fëmijët tonë.” – tha Baraku.

    Tutje, Vitia ka deklaruar se nuk është regjistruar ndonjë rast me HPV.

    “Nuk kemi akoma rast. Jemi të përgatitur. Institucionet janë në kontakt të vazhdueshëm me të gjitha mekanizmat, sa i përket këtyre sëmundjeve ngjitëse. Jemi në kontakt të vazhdueshëm me çdo institucion të rëndësishëm si OBSH.” – është shprehur Vitia.

    “Asnjë lloj paniku nuk ka nevojë te qytetarët. IKSHPK dhe SHKUK thashë që kanë marrë masat. Nuk ka asnjë arsye për me pasë panik.” – shtoi ai.

    HPV – Human Papilloma Virus është një virus i cili mund të shkaktojë një sërë sëmundjesh serioze, përfshirë lloje të kancerëve. HPV është shakatari kryesor i kancerit të qafës së mitrës, i cili është kanceri i katërt më i shpeshtë te femrat. HPV, gjithashtu, mund të shkaktojë kancer të anusit, kancer të organeve gjenitale dhe kancer te kokës dhe qafës së mitrës. Vaksina kundër HPV ofron mbrojtje kundër virusit HPV e, rrjedhimisht, edhe prej kancerëve që shkakton ai. Vaksinimi te vajzat ka filluar vitin e kaluar, nga mosha 12-15 vjeçare.

    https://kallxo.com/lajm/ikshpk-vaksina-kunder-hpv-tani-e-tutje-ofrohet-edhe-per-vajzat-nga-13-deri-ne-21-vjec/