Ballina

Etiketë: Granit Plava

  • Gjykata cakton datën e seancës fillestare ndaj Naim Murselit dhe tre të akuzuarve të tjerë

    Më 27.01.2025 është caktuar data e nisjes së gjykimit për rastin e vrasjes së Liridona Ademajt, ndaj të akuzuarve Naim Murseli, Kushtrim Kokalla, Granit Plava dhe Tomë Dodaj.

    Kjo konsiderohet seanca e parë për këtë gjykim, në të cilin parashihet që të bëhet leximi i Aktakuzës dhe deklarimi se a ndjehen apo jo fajtor të akuzuarit, për veprat që rëndojnë mbi ta.

    Këtë për KALLXO.com e ka konfirmuar zëdhënësja e Gjykatës së Prishtinës, Mirlinda Gashi.

    “Ju njoftojmë se seanca e shqyrtimit fillestar në çështjen penale ndaj të pandehurve N. M., G. P., K. K. dhe T. D. është caktuar të mbahet më 27 janar 2025.” – thuhet në përgjigjen e Gjykatës së Prishtinës.

    Katër persona tashmë po akuzohen nga Prokuroria Themelore në Prishtinë, në lidhje me vrasjen e Liridona Ademajt – ngjarje kjo e regjistruar, më 29.11.2023.

    Liridona Ademaj ishte vrarë më 29.11.2023, në ora 20:25, në rrugën “Dalip Alshiqi” në Prishtinë dhe – sipas Prokurorisë – dorasi ishte pajisur me armë dhe ishte inskenuar një grabitje.

    “E kishte mbajtur për krahu, në mënyrë që të mos iu shmangte plumbit.” – kështu e përshkruan ngjarjen prokurorja e rastit të vrasjes së Liridona Ademajt, derisa tregon veprimet e Naim Murselit, ish-bashkëshortit të viktimës, në natën kritike kur u krye krimi në një fshat të Prishtinës.

    Prokurorja e rastit, Javorka Prlinçeviq ka përshkruar se Naim Murseli planifikoi vrasjen e bashkëshortes së tij për shkak të raporteve të çrregulluara familjare dhe martesore. Prej këtyre problemeve – siç përshkruhet edhe në Aktakuzë – kishte lindur edhe dëshira për hakmarrje nga ana e Naim Murselit ndaj bashkëshortes së tij.

    Gjithmonë sipas Aktakuzës, pas datës 25.06.2022, kur ishte paguar një polisë e sigurimit jetësor në emër të Liridona Ademajt në vlerë prej 3 milionë kruna suedeze, me qëllim që pas vrasjes Murseli të përfitojë dobi financiare.

    Këtë plan Dosja e përshkruan se Naim Murseli e ndau me familjarin e tij Kushtrim Kokallën dhe se ky i fundit kishte refuzuar që të kryejë vrasjen, por tutje ka gjetur personin e tretë, Granit Plavën me të cilin e ka njoftuar Naim Murselin.

    Gjithmonë sipas Dosjes, më 29.11.2023, në orët e mesditës, Naim Murseli bashkë me Granit Plavën blejnë një armë të tipit “Zastava” me ngjyrë të zezë, nga Tom Dodaj, në vlerë 280 euro.

    E në të njëjtën ditë, Dosja shpjegon se në intervalin kohor: 20:11-20:18 minuta, në vendin me të cilin paraprakisht ishte dakorduar Naim Murseli me Granit Plavën – plan të dakorduar të cilin e kanë inskenuar që të duket si grabitje e armatosur – është kryer edhe vrasja.

    Në Dosje shkruhet se Naim Murseli e kishte lajmëruar fillimisht Granit Plavën me drita të veturës. Më pas e kishte kapur për dore Liridona Ademajn, që të mos i shpëtojë plumbit, pasi u shkrep nga Plava. E, që tutje Naimi ka dalë nga vetura me fëmijët dhe është larguar nga vendi i ngjarjes. Me të gjitha këto veprime që ka kryer Naim Murseli, Prokuroria e ka ngarkuar atë me veprën penale: ‘vrasje e rëndë’.

    I pandehuri i dytë është Granit Plava, i cili sipas Prokurorisë në ditën kritike në intervalin kohor: 20:11-20:18 minuta, në fshatin Bërnicë, pas marrëveshjes paraprake që kishte bërë me Naim Muselin, Dosja përshkruan se kreu vrasjen në formë të maskuar, kishte shtënë në drejtim të viktimës, e cila për pasojë edhe ka vdekur. E për të gjithë këtë rast, Plava do të kompensohej me një shumë prej 30 mijë eurosh.

    Sipas Dosjes së Prokurorisë, Plava ishte afruar drejtpërdrejt me viktimën dhe të njëjtën e ka qëlluar me armë, derisa krahun viktimës po ia mbante ish-bashkëshorti i saj, që të mos i shmangej plumbit.

    Arma që ishte përdorur në rast ishte gjetur në shtëpinë e të akuzuarit tashmë Granit Plava, në fshatin Cermjan në Gjakovë. Sekuestrimi i armës u bë pas bastisjes, që u krye në shtëpinë e të dyshuarit.

    Plava nga Prokuroria ngarkohet me veprat penale “vrasje e rëndë” dhe “posedim i armës pa leje”.

    I akuzuari i tretë është Kushtrim Kokalla, djali i tezës së Naim Murselit. Dosja tregon se Kokalla kishte refuzuar të kryente vrasjen, por që më pas kishte gjetur Granit Plavën dhe i kishte prezantuar Naim Murselit.

    Edhe Kokalla ngarkohet me veprën penale “vrasje e rëndë”. E i pandehuri i katërt në këtë rast është Tom Dodaj. Ai po ngarkohet për “furnizim me armë” të tre të dyshuarve të parë, që planifikuan dhe kryen vrasjen.

    Më 28.11.2023, në ora 19:41, sipas të dhënave në Dosje të Prokurorisë thuhet se Naim Murseli i ka dërguar mesazh Granit Plavës – duke i thënë “Shok, sigurt kryhet nesër, a të ka thënë Kuqa që paradite?”.

    Pas këtij mesazhi – sipas Prokurorisë – kanë vazhduar biseda me audio – një bisedë e tillë e regjistruar në telefonat e të akuzuarve ka ndodhur edhe më 29.11.2023, në ora 19:01, ku kishte pasur bisedë telefonike për 00:00:28 sekonda.

    Raportimet e tjera: LINK 

  • Dosja – Çfarë kishin diskutuar Granit Plava me Naim Murselin para vrasjes së Liridona Ademajt?

    Rasti i vrasjes së Liridona Ademajt ka përfunduar me aktakuzë ndaj katër personave, duke përfshirë këtu bashkëshortin e saj, Naim Murselin, djalin e dajës së tij, Kushtrim Kokallën, dorasin sipas Prokurorisë, Granit Plava, dhe Tomë Dodajn, i cili dyshohet se ia kishte shitur armën dorasit.

    Naim Murseli, Granit Plava, Kushtrim Kokalla e Tomë Dodaj janë katër personat që tashmë po akuzohen nga Prokuroria e Prishtinës nën dyshimin për organizimin dhe vrasjen e Liridona Ademajt, ngjarje që ka ndodhur më 29.11.2023 në fshatin Bërnicë të Prishtinës.

    Aktakuza është ngritur më 15.01.2025 nga prokurorja Javorka Përlinçeviq.

    I pandehuri i dytë në këtë rast, Granit Plava, i cili nga Prokuroria po akuzohet për vrasjen e Liridona Ademajt, në deklaratën e tij të dhënë në Polici më 01.12.2023 kishte thënë se një ditë para rastit ishte takuar më të pandehurin Naim Murseli, dhe i njëjti i kishte thënë se e ka një rast ku të dy mund të fitojnë para.

    “Unë e pyeta: “Si është rasti?”. Ai vazhdoi: “E njoh një serbe e cila është biznesmene dhe ka shumë para, punët tjera i kryej unë ndërsa puna jote është të vrasësh atë”- kishte deklaruar në Polici i pandehuri Plava.

    Tutje i pandehuri kishte thënë se pasi e kishte pasur parasysh se e njëjta është serbe, kishte pranuar ta kryente vrasjen.

    “Naimi më ka thënë që pasi ta vras këtë vajzë do të m’i japë 30,000 euro pasi që kjo vajza ka shumë para”- kishte deklaruar Plava në Polici.

    Plava në Polici kishte deklaruar se ishte takuar me Naim Murselin dhe i  njëjti i kishte thënë: “Kjo është vetura me të cilën do të vish ta kryesh vrasjen”, porse ai (Plava) nuk e kishte pranuar veturën dhe i kishte thënë: “Ky kerr është shumë i vogël dhe nuk mund të ik me të”.

    Tutje, sipas deklaratës së dhënë në Polici, Plava kishte kontaktuar me një “rent a car” në fshatin Kralan të Gjakovës dhe i kishte pyetur për ndonjë veturë të lirë.

    Tutje, sipas deklaratës së Plavës në Polici, ai kishte deklaruar se atë ditë me të pandehurin Naim Murseli kishte shkuar në fshatin Kralan dhe ishin takuar me një person dhe i njëjti u kishte ofruar veturën e tipit “Seat”.

    Sipas deklaratës së dhënë në Polici, i pandehuri Plava kishte thënë se i pandehuri Murseli i kishte ofruar një armë duke i thënë: “Qikjo është arma”.

    Plava në Polici kishte thënë se plani për vrasje ishte bërë nga i pandehuri Murseli dhe se ai i kishte treguar për planin, duke i thënë se puna e tij është që ta përcjellë të pandehurin Murseli më një veturë e më pas t’i dalë në pritë kinse është grabitje dhe ta vrasë vajzën, duke i thënë se vajza ishte serbe.

    Plava në Polici kishte thënë se paratë për veturë do ia jepte i pandehuri Murseli dhe po ashtu armën do ta gjente ai dhe pas përfundimit të vrasjes i pandehuri Murseli të nesërmen do i jepte shumën prej 30,000 euro.

    Sipas deklaratës së Plavës në Polici, ai kishte shkuar edhe në restorantin ku kishte qenë Naim Murseli me familjen e tij.

    Plava në deklaratën e tij në Polici kishte thënë se i pandehuri Murseli para se të çohej nga restoranti i kishte shkruar në telefon: “Çohu!” dhe i njëjti menjëherë kishte dalë nga restoranti dhe e kishte pritur atë në veturë në parkingun e restorantit.

    Dhe kur kishte mbërri afër vendit të ngjarjes, i pandehuri Murseli i kishte thënë: “Ti shko atje dil në pritë kurse unë po vonohem pak deri sa të përgaditësh ti”.

    Plava në Polici kishte deklaruar se kishte shkuar te një vend i errët dhe kishte dalë nga vetura dhe kishte pritur deri sa të vijë i pandehuri Murseli me veturën e tipit “BMW” me targa suedeze.

    Tutje, i njëjti kishte thënë se pasi kishte ardhur vetura, ai kishte dalë përpara me armë në dorë dhe i pandehuri Murseli e kishte ndalur menjëherë veturën, dhe ai kishte shkuar në drejtim të tani të ndjerës dhe pasi xhami i veturës së pasagjerit ishte hapur ai u kishte thënë: “Qitni telefonat! Dhe kam dëgjuar atë vajzën duke thënë: Mo(s), mo(s)”. Dhe aty e kam vërejtur se është shqiptare dhe kam shtënë vetëm një herë dhe nuk kam ditë se ku kam rrokë”- kishte thënë Plava në deklaratën e tij në Polici.

    Granit Plava në Polici kishte thënë se këtë gjë e kishte bërë për shkak të nevojës për para.

    “Këtë gjë e kam bërë për shkak se më janë nevojitur paratë për sëmundjen e djalit”.

    Plava tutje në deklaratën e tij në Polici kishte thënë se i pandehuri Murseli pasi ishte ndalur vetura e kishte hapur dritaren dhe duke dalë nga vetura kishte vendosur çantën e vajzës mbi tavanin e veturës dhe më nuk e kishte parë atë, dhe kishte deklaruar se nuk kishte pasur njohuri se sa persona kanë qenë në veturë.

    Plava në Polici tutje kishte deklaruar se pas vrasjes kishte hipur në veturë dhe ishte larguar nga aty.

    Për të pandehurin Murseli ai kishte deklaruar se e njeh prej 10-15 vitesh pasi janë të të njëjtit fshat ndërsa për të pandehurin Kushtrim Kokalla ai kishte deklaruar se e njeh pasi janë shokë të fëmijërisë.

    Po ashtu, Plava në Polici kishte deklaruar se ndjen keqardhje për rastin.

    “Ndjej keqardhje për rastin në fjalë. Po ta kisha ditur se kjo është shqiptare nuk do ta kisha bërë kurrë edhe pse kam pasur shumë nevojë për para për sëmundjen e djalit tim. Për këtë Naimi e ka shfrytëzuar gjendjen time ekonomike, sociale dhe më është afruar me këtë kërkesë ku unë ndihem shumë keq për veprimet e mia”- kishte deklaruar Granit Plava në Polici.

    Deklarata e dytë e Granit Plavës më 14.12.2023

    Granit Plava në deklaratën e dytë të dhënë më 14.12.2023 kishte thënë se dy javë para ngjarjes kritike ishte takuar me Naim Murselin dhe Kushtrim Kokallën, dhe i pandehuri Kushtrim Kokalla i kishte thënë se do ta inskenojmë një aksident.

    “Dy javë para se me ndodhë vrasja jemi takuar me Naimin dhe Kushtrimin te “Shell”-at në Vetërnik. Kushtrimi më ka thënë se do ta inskenojmë një aksident, ku unë me veturë do t’i bie një veture me targa te huaja ku Naimi do të ma qet në pritë, por nuk kam pranuar që ta kryej aksidentin, dhe gjatë këtyre ditëve Naimi me Kushtrimin më ka thënë se gjatë këtyre ditëve duhet të kryhet kjo punë” – kishte deklaruar Plava.

    Plava në deklaratën e tij të dytë kishte thënë se ai asnjëherë nuk kishte komunikuar direkt me të akuzuarin Murseli por gjithmonë e kishte thirrur i pandehuri Kokalla dhe se ky i fundit i kishte thënë se këtë kohë do të takohej me të akuzuarin Murseli.

    Plava në deklaratën e tij të dytë kishte thënë se një javë para se të kryhej vrasja atë e kishte marrë i pandehuri Kokalla dhe te një pompë e derivateve në udhëkryqin e Klinës ishte takuar me të pandehurin Murseli.

    Plava kishte deklaruar se gjatë bisedës në prani të treve i pandehuri Murseli i kishte thënë se pas vrasjes do t’i marrë 30,000 euro.

    “Gjatë bisedës në prezencë të treve Naimi më ka thënë se do t’i marrësh 30,000 euro pasi ta vrasim këtë grua, në këtë ditë është përmendur edhe “Kallashi” për me ekzekutu këtë grua por nuk kam pranuar” – kishte thënë Plava në deklaratën e tij të dytë.

    Sipas deklaratës së Plavës në Polici, i pandehuri Murseli i kishte thënë se ai do të shkojë në Shqipëri dhe kjo punë duhet të përfundohet sa është ai atje.

    Plava në deklaratën e tij të dytë kishte thënë se në ditën e vrasjes i pandehuri Murseli e kishte thirrur në “What’s app” dhe i kishte thënë: “Sot duhet të kryhet kjo punë”, duke më thënë se: “Ti e din që kam pare nëse ndodh diçka unë do të nxjerri”- kishte deklaruar Plava në deklaratën e tij të dytë.

    Sipas deklaratës së Plavës pas blerjes së armës kishte pasur më shumë presion për të kryer vrasjen.

    Në dosje të Prokurorisë thuhet se kur i pandehuri Granit Plava është ftuar më 23.01.2024 në Prokurori për të dhënë deklaratë ai kishte shfrytëzuar të drejtën e tij për t’u mbrojtur në heshtje.

  • ‘Shok, sigurt kryhet nesër’ – fjalët që Naim Murseli sipas Prokurorisë i kishte thënë Granit Plavës

    Dosja e Prokurorisë së Prishtinës për rastin e vrasjes së Liridona Ademajt, ku të akuzuar janë: Naim Murseli, djali i dajës së tij Kushtrim Kokalla, Granit Plava dhe Tom Dodaj, shpalos komunikimet në mes të dy të akuzuarve rreth një javë para se të vritej Ademaj.

    Bëhet fjalë për komunikimet mes Granit Plavës dhe Naim Murselit – biseda të regjistruara në rrjetin WhatsApp nga data 25.11.2023 deri më 29.11.2023.

    Këto kontakte – sipas Prokurorisë – kanë ndodhur çdo ditë në këtë interval kohor.

    Më 28.11.2023, në ora 19:41, sipas të dhënave në Dosje të Prokurorisë thuhet se Naim Murseli i ka dërguar mesazh Granit Plavës, duke i thënë “Shok, sigurt kryhet nesër, a të ka thënë Kuqa që paradite?”.

    Pas këtij mesazhi – sipas Prokurorisë – kanë vazhduar biseda me audio – një bisedë e tillë e regjistruar në telefonat e të akuzuarve ka ndodhur edhe më 29.11.2023, në ora 19:01, ku kishte pasur bisedë telefonike për 00:00:28 sekonda.

    Sipas Dosjes së Prokurorisë, Granit Plava dy ditë para se të ndodhte rasti, më 27.11.2023 kishte biseduar në telefon me babanë e tij, duke e pyetur “Hej, a e din noshta, ku e kam lënë kallashin bre?”, por që babai i tij ishte përgjigjur “Jo”.

    Provë tjetër e cila është paraqitur nga Prokuroria është edhe shkresa e organeve të Mbretërisë së Suedisë e datës 08.05.2024, e cila është marrë përmes ndihmës juridike ndërkombëtare.

    Prokuroria kishte parashtruar pyetje se “A ka pasur Liridona Murseli siguri jetësore!?”, ”Nëse ka pasur, te cila Kompani e Sigurimeve dhe sa është shuma e sigurimit jetësor”.

    “Sigurimi jetësor është lidhur me Kompaninë “Folskam”, shuma e sigurimit arrin shumën prej 3 milionë kruna suedeze.” – është përgjigja e autoriteteve suedeze për Prokurorinë e Prishtinës.

    Prokuroria e Prishtinës si provë ka paraqitur edhe Raportin informativ për Transaksionet bankare për të pandehurin Naim Murseli dhe të gjitha informacionet për detyrimet financiare, që i ka Naim Murseli.

    Sipas provave që i ka siguruar Prokuroria, në Dosjen e saj, del se Naim Murseli kishte borxhe ndaj personave fizik dhe juridik, në vlerë mbi qindra mijëra euro.

    Mbi bazën e kësaj prove, Prokuroria thotë se është vërtetuar se planifikimi e përgatitja për vrasjen e Liridona Ademajt është bërë për përfitime financiare – konkretisht dëmit që do të merrte nga polica e Sigurimit jetësor, në emër të Liridona Ademajt.

    Naim Murseli, Granit Plava, Kushtrim Kokalla e Tom Dodaj janë katër persona, të cilët po akuzohen tashmë nga Prokuroria Themelore në Prishtinë, nën dyshimin për organizimin dhe vrasjen e Liridona Ademajt – ngjarje që u regjistrua më 29.11.2023, në fshatin Bërnicë të Prishtinës.

    KALLXO.com ka arritur që të sigurojë Aktakuzën e plotë të ngritur nga prokurorja, Javorka Prlinçeviq. Kjo e fundit madje në një Konferencë, që u thirr nga kryeprokurori Zejnullah Gashi, tha se vonesa e Aktakuzës është si shkak i disa dokumenteve dhe kërkesave që ka kërkuar nga Suedia, për të zbardhur motivin që qëndroi mbrapa vrasjes.

    https://kallxo.com/lajm/aktakuza-naim-murseli-e-mbajti-per-krahu-liridona-ademajn-qe-mos-ti-shmangej-plumbit/

    Raportimet e KALLXO.com – LINK

  • ‘E kreva këtë punë’ – fjalët që i kishte thënë Naim Murseli Kushtrim Kokallës pas vrasjes së Liridona Ademajt

    Rasti i vrasjes së Liridona Ademajt, më 15.01.2025, ka përfunduar me Aktakuzë ndaj katër personave, duke përfshirë këtu sipas Prokurorisë: bashkëshortin e së ndjerës Naim Murselin, djalin e dajës së tij Kushtrim Kokallën; dorasin Granit Plava dhe Tomë Dodajn, i cili dyshohet se ia kishte shitur armën dorasit.

    Naim Murseli, Granit Plava, Kushtrim Kokalla e Tom Dodaj janë katër persona që tashmë po akuzohen nga Prokuroria Themelore në Prishtinë, nën dyshimin për organizimin dhe vrasjen e Liridona Ademajt – ngjarje që u regjistrua më 29.11.2023, në fshatin Bërnicë të Prishtinës.

    Djali i dajës së Naim Murselit, Kushtrim Kokalla gjatë deklarimeve të tij të dhëna në Polici kishte treguar se si Naim Murseli e kishte lutur për një vit atë që ta vriste Liridona Ademajn.

    Ky i fundit në Polici ka deklaruar se i ka thënë Murselit që të mos e përmendë më asnjëherë këtë punë.

    Kushtrim Kokalla ka treguar tutje momente të takimit me Naim Murselin në natën kritike, kur kishte dëgjuar se është vrarë Liridona Ademaj.

    Takimi sipas tij kishte ndodhur në hotelin “Swiss Diamond”, ku sipas Kokallës bashkëshorti i Ademajt i kishte thënë “E kreva këtë punë”.

    Kokalla ka deklaruar se me të dëgjuar këtë fjali kishte qenë i shokuar dhe i kishte thënë nuk donte të dëgjonte asgjë më shumë, lidhur me këtë rast.

    Tutje Kokalla ka shpjeguar se po atë natë kishte marrë një thirrje nga Granit Plava për të shkuar në një diskotekë. Sipas deklaratës së Kokallës, Plava i kishte dërguar një video nga diskoteka.

    Kokalla ka thënë se i ka shkuar mendja që ta paraqesë rastin në Polici, por që ishte frikësuar për mirëqenien e tij dhe të familjes së tij nga Naim Murseli.

    Pasi kishte ndodhur varrimi i Liridona Ademajt, Kushtrim Kokalla shpjegon se së bashku me Naim Murselin kishin shkuar te shtëpia e gruas së vëllait të Naim Murselit për t’i marrë fëmijët. Rrugës kthyese për në Prishtinë, Kokalla ka deklaruar se kishin parë patrulla të Policisë duke shkuar te shtëpia e Granit Plavës dhe në ato momente Murseli e kishte pyetur Kokallën nëse e kishte ‘me vete alltinë’.

    Por, si kishin rënë në kontakt Granit Plava dhe Naim Murseli?

    Një javë para se të ndodhte vrasja e Liridona Ademajt, Kushtrim Kokalla tregon se Murseli dhe Plava ishin njoftuar.

    Takimi i parë i Murselit dhe Plavës kishte ndodhur te pompa “Shell”.

    Sipas Kokallës, Murseli e kishte pyetur Plavën se “Me çka merresh?”, ky i fundit i kishte thënë “Me gjithçka”. “Ti po vyjshe.” – është deklarimi i Kokallës për fjalët që i ka thënë Murseli Plavës.

    Të njëjtën ditë kur ka ndodhur takimi, Kokalla tregon se Murseli i kishte shkruar në telefon për t’ia kërkuar numrin e Granit Plavës – duke ia siguruar këtë numër kontaktues.

    Kushtrim Kokalla tregon për Naim Murselin se kishte hyrë në kredi rreth 25 mijë euro – arsyet e kredisë nuk i kishte treguar asnjëherë.

    Më 29.11.2023 natën kritike, Murseli e kishte kontaktuar Kokallën duke kërkuar një takim të shkurtër, duke i thënë se ‘Sot duhet të kryhet kjo punë’ – me aludim në vrasjen e gruas së tij.

    Kushtrim Kokalla kishte shfrytëzuar të drejtën të mbrohet në heshtje në Prokurori, më 24.01.2024.

    Çka kishte deklaruar Naim Murseli para Policisë dhe Prokurorisë?

    Rrëfimin e tij për ditën kritike Murseli e kishte filluar se kishin qenë cak i një grabitjeje, kur ai së bashku me fëmijët e tij kanë dalë nga vetura, ndërsa Liridona nuk kishte arritur ta bëjë një gjë të tillë.

    Në Polici Murseli kishte deklaruar se raporti martesor me bashkëshorten e tij ishte përkeqësuar me elemente të xhelozisë, karakter temperament të Liridonës dhe elemente kontrolluese.

    Tashmë i akuzuari, Naim Murseli përpos në Polici kishte treguar se për problemet që kishte me bashkëshorten kishte biseduar edhe me djalin e dajës së tij, Kushtrim Kokallën.

    https://kallxo.com/lajm/cfare-kishte-deklaruar-naim-murseli-ne-polici-dhe-prokurori/

    Kryeprokurori Zejnullah Gashi tha se ky rast ka qenë i ndjeshëm dhe për atë ka qenë një kufizim për dhënie të informacioneve.

    “Po ashtu, siç e dini, rasti ka qenë i inskenuar si grabitje, por në një afat të shkurt kohor kemi arritur t’i gjejmë kryerësit e veprës penale. Janë zhvilluar hetime në shumë dimensione, për arsye se kemi siguru ekspertiza edhe nga jashtë, edhe nga brenda vendit tonë.” – tha Gashi.

    Kryeprokurori i Prokurorisë Themelore në Prishtinë, Zejnullah Gashi në një Konferencë për media më 15.01.2025 ka bërë të ditur se kanë ngritur Aktakuzë, lidhur me rastin e vrasjes së Liridona Ademajt.

    Gashi ka thënë se lidhur me rastin janë zhvilluar hetime në shumë dimensione dhe se kanë siguruar ekspertiza nga brenda dhe jashtë vendit.

    https://kallxo.com/lajm/vrasja-e-liridona-ademajt-aktakuze-ndaj-naim-murselit-dhe-tre-te-tjereve-video/

    Raportimet e KALLXO.com – LINK 

  • Vrasja e Liridona Ademajt – Aktakuzë ndaj Naim Murselit dhe tre të tjerëve – VIDEO

    Katër persona tashmë po akuzohen nga Prokuroria Themelore në Prishtinë, në lidhje me vrasjen e Liridona Ademajt – ngjarje kjo e regjistruar më 29.11.2023.

    Të akuzuarit janë Naim Murseli, ish-bashkëshorti i Liridona Ademajt, Kushtrim Kokalla e Granit Plava dhe Tom Dodaj.

    Liridona Ademaj ishte vrarë më 29.11.2023, në ora 20:25, në rrugën “Dalip Alshiqi” në Prishtinë dhe – sipas Prokurorisë – dorasi ishte pajisur me armë dhe ishte inskenuar një grabitje.

    Kryeprokurori Zejnullah Gashi tha se ky rast ka qenë i ndjeshëm dhe për atë ka qenë një kufizim për dhënie të informacioneve.

    “Po ashtu siç e dini rasti ka qenë i inskenuar si grabitje, por në një afat të shkurt kohor kemi arritur t’i gjejmë kryerësit e veprës penale. Janë zhvilluar hetime në shumë dimensione, për arsye se kemi siguru ekspertiza edhe nga jashtë, edhe nga brenda vendit tonë.” – tha Gashi.

    Kryeprokurori i Prokurorisë Themelore në Prishtinë, Zejnullah Gashi në një Konferencë për media më 15.01.2025 ka bërë të ditur se kanë ngritur Aktakuzë, lidhur me rastin e vrasjes së Liridona Ademajt.

    Gashi ka thënë se lidhur me rastin janë zhvilluar hetime në shumë dimensione dhe se kanë siguruar ekspertiza nga brenda dhe jashtë vendit.

    “Ky rast ka qenë i ndjeshëm dhe për atë ka qenë një kufizim për dhënie të informacioneve. Po ashtu siç e dini rasti ka qenë i inskenuar si grabitje, por në një afat të shkurt kohor kemi arritur të zbulojmë kryerësit e veprës penale. Janë zhvilluar hetime në shumë dimensione, për arsye se kemi siguru ekspertiza edhe nga jashtë, edhe nga brenda vendit tonë.” – ka thënë Gashi.

    Prokurorja e rastit, Javorka Perlinçeviq ka thënë se arsyeja pse ka kaluar një kohë e gjatë për ngritjen e Aktakuzës ka qenë mungesa e informacioneve për motivin e ngjarjes.

    “Dua të sqaroj pse ka kaluar një kohë e gjatë nga ngritja e Aktakuzës, provat janë mbledhur shpejt për veprën penale. Çka ka munguar ka munguar motivi dhe e kemi të njohur faktin se e ndjera me familje ka jetuar në Suedi. Organeve atje iu jemi drejtuar për të kërkuar të dhëna, nëse kanë pasur të dhëna në lidhje me problemet. Derisa nuk i kemi pasur të dhënat në lidhje me këtë, nuk kam mundur ta ngrisë Aktakuzën. Tani që kemi edhe motivin, kemi zbuluar edhe faktin pse ka ndodhur dhe pse janë përfshirë, edhe si janë përfshirë edhe Kushtrim Kokalla dhe Granit Plava.” – është shprehur ajo.

     

    Sipas Prokurorisë, ndaj Naim Murselit rëndon vepra penale “vrasje e rëndë në bashkëkryerje”, për Plavën rëndon vepra penale “vrasje e rëndë dhe armëmbajtje pa leje”, ndërsa për Kushtrim Kokallën “marrëveshja për ta kryer veprën penale të vrasjes së rëndë”.

    Më 27.12.2024, Gjykata e Prishtinës ua ka vazhduar edhe për dy muaj të tjerë masën e paraburgimit Naim Murselit, Kushtrim Kokallës e Granit Plavës, të dyshuar për rastin e vrasjes së Liridona Ademajt. Të njëjtit gjenden në këtë masë, që nga nëntori i vitit 2023.

    Si shpjegohen veprimet e të dyshuarve për vrasjen e Liridona Ademajt

    Sipas Dosjes që kishte siguruar KALLXO.com, disa orë para se të vritej Liridona Ademaj, i dyshuari për rastin e organizimit të vrasjes së gruas së tij, Naim Murseli ishte takuar me të dyshuarin Kushtrim Kokalla, duke i thënë “Sot duhet të kryhet kjo punë.” – me aludim në vrasjen e Ademajt.

    Sipas Dosjes së Prokurorisë, takimi kishte ndodhur në një Qendër në Gjakovë, në ora 9:30 minuta në mëngjes. Ky takim kishte ndodhur si rrjedhojë e një takimi rreth një javë para natës kritike, kur Murseli i kishte treguar Kokallës lidhur me “problemet bashkëshortore që është duke pasur me të ndjerën”.

    “Kokalla ishte munduar t’i bëjë zgjidhje Murselit, duke i thënë ‘Unë ta zgjidhi këtë punë’.” – thuhet në Dosje.

    “Naim Murseli i ka treguar të pandehurit Kushtrim për problemet e tij bashkëshortore, me tani të ndjerën Liridona Murseli. I pandehuri Kushtrim i ka thënë ‘Unë ta zgjidhi këtë punë’ dhe ndërkohë janë marrë vesh për një aksident të inskenuar.” – thuhet në Dosjen e Prokurorisë.

    Kështu, të dyshuarit kanë inskenuar një aksident të grabitjes, nga i cili kishte rezultuar më pas në vrasjen e Liridona Ademajt. Sipas Vendimit të Gjykatës, Kushtrim Kokalla, Naim Murseli së bashku me Granit Plavën ishin takuar në një pompë të derivateve dhe Plava i kishte treguar të dyshuarve se “merret me gjithçka”.

    Pas këtij takimi, Naim Murseli kishte kërkuar numrin e telefonit të Granit Plavës nga Kushtrim Kokalla, i cili ia kishte dhënë numrin.

    Sipas Dosjes, Murseli i kishte thënë Kokallës se do të aranzhojë një takim me dorasin, që në këtë rast – sipas Prokurorisë – dyshohet të jetë Granit Plava.

    Sipas kërkesës për caktimin e masës së paraburgimit, Naim Murseli, me qëllim që të privojë nga jeta bashkëshorten e tij, është marrë vesh me të pandehurin, Granit Plava për të kryer këtë akt makabër.

    Sipas Dosjes, Naim Murseli kishte siguruar armën, e kishte pajisur më armë dorasin dhe kishin inskenuar një grabitje – inskenim i cili kishte ndodhur të mërkurën e 29 nëntorit 2023, rreth orës 20:25, në Rrugën “Dalip Alshiqi”.

    Raportimet e KALLXO.com – LINK 

    (Shënim: Lajmi është edituar duke e shtuar edhe emrin e të akuzuarit të katërt pasi KALLXO ka siguruar Aktakuzën- Koha e editimit: 14:39 – 15.01.2025).