Ballina

Etiketë: gjoba

  • Për çka u gjobit “Koalicioni për Familjen” nga PZAP?

    Më 28.01.2025 profili në rrjetin social ‘TikTok’ me emër ‘Shqiperia zgjohet’ ka publikuar një fotografi/video të bartësit të listës së ‘Koalicioni për Familjen’, Eman Rrahmani, në të cilën shkruhet “ish-deputeti i LVV u dënua me 7000 euro gjobe vetëm se ne nje tubim elektoral deklaroi qe neqoftse do qeveriste ne Kosove nuk do te lejonte kurrë martesat burre me burre e gru me gru”.

    KALLXO.com ka kontrolluar vendimet për dënime të Panelit Zgjedhor për Ankesa dhe Parashtresa (PZAP) që nga nisja e fushatës zgjedhore në Kosovë (11.01.2025) e deri më 31.01.2025.

    Më 28.01.2025, PZAP kishte publikuar vendimin për dënimin me 7,500 euro ndaj subjektit politik ‘Koalicioni për Familje’. Në vendimin e PZAP-së thuhet se dënimi është shqiptuar pas gjuhës së përdorur nga kandidati për deputet, Eman Rrahmani në rrjetin social Facebook.

    “Paneli, pas shikimit të shkresave të ofruara si provë materiale në ankesë, të cilat janë bërë nga Koalicioni për Familjen, respektivisht nga kandidati për deputet Eman Rrahmani në rrjetin social facebook, ku shihet se i njëjti ka postuar deklaratat duke përdorur fjalët “Po thonë që nuk bon me ju thanë “turp” atyre që cenojnë familjen. Turp edhe marre, secilit, organizatë joqeveritare që financon degjenerimin e fëmijeve! Turp dhe marre secilës komunë e secilit kryetar komune që i financon këto organizata, me e prish familjen!””- thuhet në vendimin e PZAP-së.

    Përveç këtij dënimi, ‘Koalicioni për Familje’ që nga fillimi i fushatës zgjedhore është dënuar edhe me tri gjoba të tjera.

    Ky subjekt politik ishte dënuar më 5 mijë euro më 23.01.2025 me arsyetimin se kandidati për deputet Jeton Haxhimustafa në rrjetin social Facebook kishte postuar një deklaratë duke përdorur fjalët “A po e kuptoni se këtu kemi të bëjmë me idiologji dhe se i kemi shumë arsye për t’u përgjigjur masovikisht këtyre bojkotimeve që po i bëhën Koalicionit për Familjen, fillimisht përmes RTK-së dhe tani përmes PZAP-së vetëm që të na detyrojnë të heshtim përballë degjenerimit. Por, përkundrazi, s’ka pushtet që i nënshtrohemi apo na pengoj që t’i themi jo martesës burrë me burrë dhe grua me grua. PIKE!”.

    ‘Koalicioni për Familje’ ishte gjobitur me 4,500 euro të tjera nga PZAP më 22.01.2025 për gjuhën e përdoror të kandidatëve për deputetë, Fatmir Smajli dhe Eman Rrahmani kundrejt komunitetit LGBTI+.

    Në vendimin e PZAP-së thuhet se gjuha e përdorur nga subjekti politik ‘Koalicioni për Familjen” ndaj LGBTI+ në tubimet zgjedhore në Pejë më datë 17.01.2025, është në kundërshtim me Kodin e Mirësjelljës për Subjektet Politike.

    “…sipas panelit përdorimi i gjuhës së tillë ka për qëllim ofendimin, denigrimin dhe njëherit shihen si shprehje me ngjyrime përçmuese ose nënvlerësuese”- thuhet në arsyetimin e vendimit të PZAP-së.

    Më 23.01.2025, ky subjekt politik ishte dënuar me 1,500 euro nga PZAP me arsyetimin se vendosja e posterit të kandidates Dorontina Kokollari në shtyllën elektrike në Komunën e Suharekës ishte në kundërshtim me dispozitat ligjore.

    Shuma të majme të gjobave ka shqiptuar PZAP kundrejt partive politike që nga fillimi i fushatës zgjedhore. 

    PZAP u ka shqiptuar gjoba në vlerë 125 mijë euro subjekteve politike për shkelje të rregullave zgjedhore që nga fillimi i fushatës zgjedhore, e cila ka nisur më 11.01.2025 e deri më 22.01.2025.

    Sipas vendimeve të publikuara, nga 11 deri më 22.01.2025, Lidhja Demokratike e Kosovës, ishte dënuar me 45 mijë euro për gjashtë raste të ndryshme.

    Me 20 mijë euro ishte dënuar Lidhja Demokratike e Kosovës për krahasimin e kandidates për deputete, Xhenet Syka Kelmendi, e cila e ka krahasuar kandidatin e LVV-së për kryeministër, Albin Kurtin, me Adolf Hitlerin.

    Nga 11 deri më 22.01.2025 Partia Demokratike e Kosovës për 10 ditë fushatë është dënuar gjithsej 44,500 euro për 10 raste të ndryshme.

    Gjoba prej 8 mijë eurosh iu dha PDK-së për shkak të postimit të një video ku shihet Sami Lushtaku duke i quajtur aktivistet e LVV-së ‘zagarë’.

    Deri më 22.01.2025 koalicioni AAK, Nisma Socialdemokrate, Konservatorët, Forumi Intelektual E-30, është dënuar me gjithsej  23,500 euro për tri raste të ndryshme.

    Po ashtu, PZAP për 10 ditë fushatë, nga 11 deri më 22.01.2025 e ka gjobitur me 12 mijë euro partinë Lëvizja Vetëvendosje për katër raste të ndryshme.

    Më 30.01.2025, PZAP e ka dënuar Lëvizjen Vetëvendosje me 8 mijë euro gjobë për pengimin e gazetarëve gjatë fushatës zgjedhore në dy raste të ndryshme. Sipas vendimit, Lëvizja Vetëvendosje me 5,500 euro gjobë është dënuar për pengimin e gazetarëve në tubimin e saj në Malishevë të mbajtur më 25.01.2025.

    Në të njëjtën ditë, më 30.01.2025, PZAP e ka dënuar edhe me 10 mijë euro Lëvizjen Vetëvendosje, për shkelje të Kodit të Mirësjelljes për Subjektet Politike gjatë fushatës zgjedhore.

    Në vendim thuhet se AAK-ja është ankuar se kandidatja për deputete, Donika Gërvalla dhe kandidati për kryeministër, Albin Kurti kanë përdorur gjuhë të papërshtatshme gjatë fjalimit të tyre në një tubim në Deçan, më 26.01.2025.

    “Sipas parashtruesit të Ankesës, gjatë këtij fjalimi, Donika Gërvalla-Schwartz, duke aluduar për Ramush Haradinajn, të njëjtin e quan ‘Gjeneralë të vetëshpallur’ (në shumës), e më pas vazhdon e njëjta ‘Prandaj, unë mendoj që aq më pak meriton respekt kush sakrificën personale apo familjare e përdor për arsyetim për krim, për korrupsion, për vrasje apo mashtrim’” – thuhet në vendimin e PZAP-së.

    PZAP është organ i përhershëm, i pavarur kompetent për të vendosur në lidhje me ankesat e lejuara që kanë të bëjnë me procesin zgjedhor siç është caktuar me Ligjin për Zgjedhjet e Përgjithshme në Republikën e Kosovës, Ligjin për Zgjedhjet Lokale në Republikën e Kosovës dhe me Rregullat zgjedhore.

    Fushata pёr Zgjedhjet parlamentare nё Kosovё ka filluar zyrtarisht, mё 11.01.2025. Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare që do të mbahen më 09.02.2025.

    Për këto Zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre

     – me qëllim të fitimit të përkrahjes nga votuesit e tyre;– të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues

     – në pajtim me rregullat e KQZ-së dhe ligjet e tjera në fuqi.

    Këto do të jenë Zgjedhjet e para të rregullta, që Kosova mban që nga shpallja e pavarësisë më 2008.

  • Drejtoi veturën me drita rrotative – Policia e dënon me 500 euro dhe i konfiskon patentë-shoferin

    Policia në Ferizaj e ka dënuar një ngasës i cili po e drejtonte automjetin me drita rrotative.

    Policia kishte tentuar fillimisht ta ndalojë automjetin, i cili po lëvizte në magjistralen Ferizaj – Prishtinë, por ngasësi nuk e kishte ndalur veturën.

    “Më 27.01.2025, rreth orës 18:00, policët e Njësisë së Komunikacionit Rrugor në Ferizaj kanë tentuar të ndalojnë një automjet të tipit “Audi Xhip” me targa vendore, i cili po lëvizte në rrugët e fshatit Talinovc i Muhaxherëve, në drejtim të rrugës magjistrale Ferizaj – Prishtinë.” – thuhet në njoftimin e Policisë.

    Më pas Policia e kishte identifikuar drejtuesin e automjetit, teksa e dënoi me 500 euro dhe ia konfiskoi patentë-shoferin për 3 muaj.

    “Pas verifikimit të pamjeve nga kamerat e sigurisë, Policia ka arritur ta identifikojë dhe ta ftojë në Stacionin Policor drejtuesin e automjetit, N.RR. (M/K), 40 vjeç. Pas intervistimit, ndaj tij është shqiptuar një gjobë kundërvajtëse prej 500 eurosh, si dhe masa mbrojtëse: heqje e patentë-shoferit për 3 muaj.” – u tha mes të tjerash në komunikatën e Policisë.

  • Për një javë 11 armë zjarri u sekuestruan nga Policia në Rajonin e Prishtinës

    11 armë zjarri janë sekuestruar nga Policia e Kosovës në Rajonin e Prishtinës gjatë javës së kaluar – ka bërë të ditur ky institucion.

    Policia e Kosovës, gjatë kësaj periudhe, ka shqiptuar 3 mijë e 350 gjoba për lloje të ndryshme të kundërvajtjeve në trafik.

    “Nga zyrtarët policorë të Rajonit Prishtinës, gjatë javës që lamë pas në lokacione të ndryshme dhe aksione të ndara janë realizuar 195 Urdhëresa të Gjykatës, prej tyre 43 Urdhëresa për vepra penale, ndërsa të tjerat për kundërvajtje, seanca, verifikime etj.” – thuhet në njoftimin e Policisë së Kosovës.

    Policia ka theksuar se pas përfundimit të procedurave policore personat e dënuar me burgim janë dërguar për vuajtje të dënimit, ndërsa personat e dënuar me gjobë janë liruar, pasi të njëjtit kanë kryer obligimet e caktuara në Urdhëresa.

     

  • Akuzat ndaj Prokurorisë, posterët e videot në Kuvend – PZAP gjobit disa subjekte politike

    Të dielën e 26.01.2025, Paneli Zgjedhor për Ankesa dhe Parashtresa ka publikuar disa vendime për ankesat e dorëzuara aty nga disa parti politike.

    Gjoba për partitë politike janë dhënë për posterë e video të tyre në institucione publike.

    Lëvizja Vetëvendosje është gjobitur me 6 mijë euro nga Paneli Zgjedhor për Ankesa dhe Parashtresa pas ankesave së Partisë Demokratike të Kosovës.

    PDK u ankua për një video të kandidatit për deputet Haxhi Avdyli brenda Klinikës së Neurokirurgjisë. Po ashtu u ankua për një video të Albena Reshitajt në hapësirat e Kuvendit të Kosovës dhe për një foto të Agon Batushës po ashtu në Kuvend. Një ankesë tjetër u drejtua për Besim Muzaqi për një video të tij në Kuvendin e Kosovës.

    PZAP ka gjetur se u shkel neni 34, paragrafi 1 i Ligjit për Zgjedhjet e Përgjithshme.

    1 mijë e 500 euro është gjoba ndaj Koalicionit për Familjen pas ankesës së LVV-së e cila u ankua për posterin e kandidates Dorentina Kokollari në Suharekë.

    PZAP ka gjetur se kandidatja Kokollari ka shfrytëzuar jashtëligjshëm shtyllën elektrike në rrugën ‘Xhavit Bajraktari’.

    3 mijë e 500 euro është gjoba për koalicionin AAK-NISMA-Intelektualët-Konservatorët.

    LVV u ankua për posterët e Albana Bytyqit dhe Driton Maliqit. PZAP gjeti se posterët e tyre ishin vendosur pa leje nga Komuna e Suharekës.

    LVV-së iu refuzua ankesa për posterët e Doruntina Malokut në Prishtinë, kjo për shkak se PZAP gjeti se Maloku kishte pëlqim nga Parking Center Publike.

    5 mijë euro është gjoba për LVV-në pas ankesës së PDK-së se kandidatja për deputete Albena Reshitaj ka shpërndarë një fotografi në një nga tubimet e VV-së, në fotografi gjendej një parullë që mes tjerash shkruante ‘Prokuroria e Kosovës e kapur nga hajnat, Qeveria Kurti i qoi në Gjyakta 250 lëndë’.

    PZAP ia hodhi poshtë ankesën e LDK-së ndaj LVV-së, saktësisht kandidatit për deputet Hajrulla Çeku. LDK u ankua se Çeku ka përdor gjuhë nxitëse e provokuese kur në një postim në facebook ku mes tjerash shkruante ‘Lodhja demokratike nuk kalon’.

    Në vendim thuhet se pretendimet janë të pabazuara dhe nuk mund të thuhet se kandidati Çeku ka shkelur nënin 34, pika 1.11 të Ligjit për Zgjedhjet e Përgjithshme.

    3 mijë e 700 euro iu dha gjobë koalicionit AAK-NISMA-Intelektualët-Konservatorët.

    Kjo për shkak se LVV u ankua për posterë të Nuredin Lushtakut në Skenderaj. PZAP gjeti se posterët janë vendosur në hapësira publike, ndërtesa publike, në kundërshtim me nenin 34, paragrafi 1, nënparagrafi 1.2 i Ligjit për Zgjedhjet e Përgjithshme.

    PZAP ia refuzoi një ankesë LVV-së për posterë të kandidatit të PDK-së Xhevahir Geci. Sipas PZAP-së ankesa se posterët janë të vendosur në hapësira publikë, ndërtesë të banimit kolektiv, për PZAP-në është e pabazuar.

    3 mijë e 500 euro gjobë është dhënë për LDK-në për shkak të posterëve të kandidates Arjeta Salihu Abazi në sheshin e Podujevës. Pas ankesës së LVV-së, PZAP gjeti se posterët ishin vendosur në ndërtesë kolektive dhe ka gjobitur LDK-në.

    Një ankesë e Partisë Liberale Egjiptiane ndaj Iniciativës së Re Demokratike është hedhur poshtë si e palejuar.

    PLE ishte ankuar se Elbert Krasniqi, kryetar i IRDK-së kishte shpërndarë një sport politik me fëmijë nën 16 vjeç.

    PZAP thotë se IRDK veçse është dënuar me 1 mijë e 500 në një vendim të më hershëm për këtë çështje.

  • Gjuhë fyese gjatë fushatës e posterë pa leje – PZAP gjobit partitë politike

    Paneli Zgjedhor për Ankesa dhe Parashtresa (PZAP) ka publikuar 13 vendime që i mori më 25.01.2025.

    Disa ankesa janë konsideruar si të pabaza dhe për disa ankesa, PZAP ka gjobitur partitë politike.

    LVV u gjobit me 4 mijë euro, PDK u gjobit me 6 mijë euro, LDK me 4 mijë euro dhe Koalicioni për Familjen me 5 mijë euro, sipas vendimeve të datës 25.01.2025 që ka publikuar në ueb-faqe.

    Paneli Zgjedhor për Ankesa dhe Parashtresa ka gjobitur Partinë Demokratike të Kosovës me 3 mijë euro gjobë. Gjoba PDK-së i erdhi pas një ankese të LVV-së.

    LVV u ankua se në rrugën ‘Brigada 123’ në Suharekë u identifikuan banerë të Enver Hoxhajt dhe Qefsere Kuqit. PZAP ka gjet se u shfrytëzuan hapësirat publike pa marrë leje nga organet kompetente të komunës, prandaj edhe gjobiti PDK-në.

    4 mijë euro është gjoba që iu dha LDK-së për posterë në të njëjtën rrugë. Posterë të Shemsije Bytyqit, Lumir Abdixhikut, Shaqir Kryeziut, Urim Sukës dhe Selman Kolgecit.

    PZAP gjeti se njësos si PDK, edhe LDK nuk kishte marrë leje për vendosjen e këtyre banerëve.

    Ky organ i hodhi poshtë ankesat LVV-së për subjektin Srpska Demokratija.

    LVV u ankua për banerët e Aleksandër Arsenijeviq në ndërtesat publike në rrugën ‘Kneza Milosa’. PZAP nuk shqyrtoi këtë ankesë për shkak se për këtë rast është vendosur me vendimin Anr. 160/2025 me ç’rast subjekti Srpska Demokratija është gjobitur me 3 mijë e 500 euro.

    Partija Kosovskih Srba është gjobitur me 3 mijë e 500 euro pasi që LVV u ankua për banerët e kësaj partie në disa objekte dhe sheshin e Mitrovicës së Veriut.

    PZAP gjeti se me këtë rast u shfrytëzuan jashtëligjshëm ndërtesat/hapësirat publike, në kundërshtim me nenin 34 të Ligjit për Zgjedhjet e Përgjithshme.

    LVV-së iu refuzua një ankesë ndaj LDK-së. LVV u ankua se identifikoi disa flamuj të LDK-së në rrugën ‘Drenica’ dhe lagjen Kodra e Trimave në Prishtinë. PZAP gjeti se LDK kishte leje nga Komuna e Prishtinës për vendosjen e këtyre flamujve.

    LVV-së iu refuzua edhe ankesa për banerë të LDK-së në Istog. Ngjashëm si në Prishtinë, LDK kishte marrë leje edhe në Istog.

    3 mijë euro gjobë iu dha PDK-së për shkak të një fotografie të postuar në Facebook nga kandidati për deputet Faruk Bojaxhi, me hapësirat e brendshme dhe të jashtme të Bashkësisë Islame dhe Ipeshkvisë së Prizrenit, për qëllime elektorale.

    PZAP thotë se me promovimin e kandidaturës së tij për deputet me përfaqësues fetar, Bojaxhi ka shkeluar Rregulloren 07/2024.

    LVV-së iu refuzua ankesa ndaj LDK-së në Prishtinë, për banerë në rrugën ‘Ilaz Kodra’ dhe në ‘Kurriz’. LDK kishte pëlqimin nga Komuna e Prishtinës për vendosjen e banerit të kandiatit Florian Dushi.

    Ankesa e LVV-së ndaj PDK-së për posterin e Jakup Nurës në rrugën ‘Ilaz Kodra’ në Skenderaj u refuzua nga PZAP. KY institucion ka gjetur se kjo parti kishte pëlqimin e Komunës për vendosjen e posterit.

    E pabazuar u shpall edhe ankesa e PDK-së ndaj LVV-së për gjuhë fyese dhe denigruese. PDK në Dragash u ankua se asistenti i zyrës administrative të VV-së në këtë Komunë, Asri Qusaj ka përdorur gjuhë fyese në Facebook ndaj partive kundërshtare.

    PZAP thotë se në bazë të dëshmive të dorëzuara nuk mund të verifikohet se në cilën kohë ka ndodhur shkelja e pretenduar.

    LVV u gjobit me 4 mijë euro pas ankesës së PDK-së për një video të kandidatit për deputet Valon Ramadani.

    Në video, Ramadani i drejtohet kundërshtarëve politik me termin ‘hajna’. PZAP thotë se gjuha e tillë është në kundërshtim me nenin 34, pika 1.1 e Ligjit për Zgjedhjet e Përgjithshme.

    OJQ-ve Cel Kosova dhe Dylberizëm iu pranua ankesa me ç’rast Koalicionit për Familjen iu shqiptua gjobë prej 5 mijë eurove.

    Gjoba i shkoi këtij koalicioni pas një deklarate të kandidatit për deputet Jeton Haxhimustafa i cili sipas PZAP-së ka bërë shkelje të nenit 34, paragrafit 1, pika 1.11 të Ligjit për Zgjedhjet e Përgjithshme.

    Ankesa e Kosova Demokratik Turk Partisi kundër vendimit të KQZ-së për miratimin e dizajnit të fletëvotimit dhe broshurës për zgjedhjet, u hodh poshtë si e pasfatshme.

    Fushata pёr Zgjedhjet parlamentare nё Kosovё ka filluar zyrtarisht, mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet parlamentare të 9 shkurtit 2025.

    Për këto Zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet e tjera në fuqi.

    Këto do të jenë Zgjedhjet e para të rregullta, që Kosova mban që nga shpallja e pavarësisë më 2008.