Ballina

Etiketë: gaza

  • Pikat kryesore të propozimit për armëpushim në Gazë

    Ndërmjetësuesit nga Katari kanë dërguar një projekt-propozim për një Marrëveshje për Ndalimin e luftimeve në Rripin e Gazës dhe Shkëmbimin e pengjeve izraelite për të burgosurit palestinezë – si një hap i parë drejt përfundimit të luftës gjatë 15 muajve.

    Luftimet po zhvillohen në mes të Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian.

    Një javë para se presidenti i zgjedhur i SHBA-së, Donald Trump të marrë detyrën nga presidenti Joe Biden, zyrtarët thanë se ishte arritur një përparim në bisedimet në Doha dhe një Marrëveshje mund të jetë afër.

    Ja pikat kryesore nga projekti, sipas një zyrtari izraelit dhe një zyrtari palestinez. Ndërsa Hamasi nuk ka dhënë detaje.

    Kthimi i pengjeve

    Në fazën e parë, do të lirohen 33 pengje izraelite. Në mesin e tyre janë fëmijë, gra, edhe ato ushtarake, burra mbi 50 vjeç, të plagosur dhe të sëmurë. Izraeli beson se shumica janë gjallë, por nuk ka pasur konfirmim zyrtar nga Hamasi.

    Sipas Marrëveshjes, faza e parë do të zgjasë 60 ditë. Nëse vazhdon siç është planifikuar, në ditën e 16 nga hyrja në fuqi e Marrëveshjes, do të fillojnë negociatat për një fazë të dytë, gjatë së cilës do të lirohen pengjet e mbetura gjallë: ushtarët burra e djemtë civilë më të rinj dhe trupat e pengjeve të vdekur do të kthehen.

    Tutje, në këmbim të pengjeve, Izraeli do të lirojë nga burgjet e tij më shumë se 1.000 të burgosur dhe të ndaluar palestinezë – përfshirë të dënuar me dënime të gjata për sulme vdekjeprurëse.

    Luftëtarët e Hamasit, të cilët morën pjesë në sulmin ndaj Izraelit më 7 tetor 2023, nuk do të lirohen.

    Tërheqja e Ushtrisë

    Tërheqja do të jetë me faza, me forcat izraelite që do të qëndrojnë në kufij për të mbrojtur qytetet dhe fshatrat izraelite.

    Do të ketë Marrëveshje sigurie në korridorin Filadelfi që kufizon Egjiptin, në anën jugore të Gazës, me Izraelin që do të tërhiqet nga disa pjesë të tij pas ditëve të para të Marrëveshjes.

    Banorët e paarmatosur në veri të Gazës do të lejohen të kthehen, me një mekanizëm për të siguruar që aty të mos lëvizin armë. Forcat izraelite do të tërhiqen nga korridori Netzarim, në pjesën qendrore të Gazës.

    Kalimi në Rafah mes Egjiptit dhe Gazës do të fillojë të funksionojë gradualisht – duke lejuar kalimin e atyre që janë të sëmurë dhe rasteve humanitare për trajtim jashtë enklavës.

    Shtim i ndihmave

    Do të ketë një rritje të konsiderueshme të ndihmës humanitare në Rripin e Gazës, ku organet ndërkombëtare, përfshirë Kombet e Bashkuara, thonë se popullsia po përballet me një krizë të thellë humanitare.

    Izraeli lejon hyrjen e ndihmave në enklavë, por ka pasur mosmarrëveshje për sasinë e ndihmës që lejohet dhe sasinë që arrin te njerëzit në nevojë – derisa plaçkitja nga bandat kriminale po bëhet një problem në rritje.

    Udhëheqësia e Gazës në të ardhmen

    Kush do ta drejtojë Gazën pas luftës është një nga pikat e panjohura të negociatave. Duket se raundi aktual i bisedimeve e ka lënë këtë çështje jashtë propozimit, për shkak të kompleksitetit të saj dhe mundësisë që ajo mund të pengonte një Marrëveshje të kufizuar.

    Izraeli ka thënë se nuk do ta mbyllë luftën duke e lënë Hamasin në pushtet. Ai ka refuzuar, gjithashtu, Administratën e Gazës nga Autoriteti Palestinez – organi i mbështetur nga Perëndimi, që u krijua sipas akordeve të paqes së Oslos 30 vjet më parë dhe që ka sovranitet të kufizuar në Bregun Perëndimor të pushtuar.

    Ai ka thënë, gjithashtu, që nga fillimi i fushatës ushtarake në Gaza se do të mbajë kontrollin e sigurisë mbi enklavën pasi të përfundojnë luftimet.

    Komuniteti ndërkombëtar ka thënë se Gaza duhet të drejtohet nga palestinezët, por përpjekjet për të gjetur alternativa nga fraksionet kryesore mes shoqërisë civile apo liderëve të klaneve kanë rezultuar kryesisht të pasuksesshme.

    Megjithatë ka pasur diskutime mes Izraelit, Emirateve të Bashkuara Arabe dhe Shteteve të Bashkuara për një Administratë përkohshme, e cila do të drejtonte Gazën deri në një reformim të Autoritetit Palestinez, që do të ishte në gjendje të merrte drejtimin./REL

  • Raportohet për përparim në bisedimet për armëpushim mes Izraelit dhe Hamasit

    Ndërmjetësit amerikanë dhe arabë kanë bërë përparim të rëndësishëm drejt arritjes së një armëpushimi në luftën mes Izraelit dhe Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – dhe lirimit të pengjeve që mbahen në Rripin e Gazës.

    Megjithatë, marrëveshja ende nuk është arritur, thanë zyrtarët më 13 janar.

    Katër zyrtarë, që janë në dijeni për këtë çështje, thanë se është arritur përparim dhe ditët në vijim do të jenë vendimtare për t’i dhënë fund luftimeve 15-mujore që kanë destabilizuar Lindjen e Mesme. Ata folën në kushte anonimiteti pasi nuk ishin të autorizuar që të flisnin për mediat për këtë çështje.

    Një zyrtar amerikan tha se të gjitha palët “janë më afër se kurrë më parë, por gjithçka mund të shkatërrohet”. Ky zyrtar nuk pranoi të jepte ndonjë afat për një marrëveshje të mundshme, pasi tha se ende ka pasiguri për arritjen e një pakti.

    Dy zyrtarë të tjerë, përfshirë një të lidhur me Hamasin, thanë se ende ka disa sfida. Disa herë vitin e kaluar, udhëheqësit amerikanë kanë deklaruar se janë në prag të arritjes së një marrëveshjeje, por më pas bisedimet kanë ngecur.

    Një tjetër zyrtar i informuar për bisedimet tha se gjatë bisedimeve të zhvilluara gjatë natës në tavolinë është paraqitur një propozim-marrëveshje. Ai tha se negociatorët izraelitë dhe ata të Hamasit do t’ua dërgojnë udhëheqësve të tyre këtë propozim për miratimin përfundimtar.

    Një person tjetër tha se ndërmjetësit nga Katari kanë zhvendosur presionin ndaj Hamasit për të pranuar marrëveshjen, ndërkaq Steve Witkoff, i dërguari i presidentit të zgjedhur amerikan, Donald Trump, po u bënë presion izraelitëve. Së fundi, Witkoff iu bashkua negociatave dhe ditëve të fundit ka qëndruar në rajon. Ky person tha se ndërmjetësit ua kanë dorëzuar propozimin palëve dhe kanë thënë se 24 orët e ardhshme do të jenë të rëndësishme.

    Edhe një zyrtar egjiptian tha se ka pasur përparim në bisedime, por sipas tij do të duhen disa ditë para se palët të synojnë një marrëveshje, para se Trump të inaugurohet në postin e presidentit më 20 janar.

    Një zyrtar i lidhur me Hamasin tha në kushte anonimiteti se duhet të zgjidhen një sërë çështjesh para një marrëveshje, përfshirë edhe zotimin e Izraelit për t’i dhënë fund luftës dhe detajet për tërheqjen e trupave izraelite, këmbimin e pengjeve me të burgosurit palestinezë.

    Emiri i Katarit, Sheiku Tamim bin Hamad Al Thani, është takuar me delegacionin e Hamasit në Doha, së bashku me Witkoff dhe të dërguarin e presidentit Joe Biden për Lindjen e Mesme, Brett McGurk. Thani po ashtu ka biseduar me Bidenin dhe ka vënë në pah nevojën urgjente për një marrëveshje.

    Administrata Biden, së bashku me Egjiptin dhe Katarin për më shumë se një vit po tentojnë të arrijnë një marrëveshje për t’i dhënë fund luftës më të përgjakshme mes izraelitëve dhe palestinezëve dhe lirimit të pengjeve që u kapën nga Hamasi gjatë sulmit të 7 tetorit 2023. Gjatë sulmit, Hamasi vrau afër 1.200 persona dhe rrëmbeu afër 250 të tjerë.

    Ndërkaq, si pasojë e ofensivës izraelite, në Gazë janë vrarë më shumë se 46.000 palestinezë, shumica gra dhe fëmijë, ka thënë Ministria e Shëndetësisë në këtë enklavë./REL.

  • Biden bisedon me Netanjahun, lidhur me Gazën

    Presidenti amerikan, Joe Biden bisedoi të dielën me kryeministrin izraelit Benjamin Netanyahu, tha një burim në dijeni të kësaj çështje, ndërsa zyrtarët amerikanë po përshpejtojnë përpjekjet për të arritur një marrëveshje për lirimin e 98 pengjeve, si dhe për armëpushim në Gazë, përpara se zoti Biden të largohet nga detyra, më 20 janar.

    Në një deklaratë të Zyrës së Kryeministrit izraelit thuhej se zoti Netanyahu e informoi zotin Biden mbi progresin në bisedime, si dhe mandatin që i ka dhënë një delegacioni të nivelit të lartë që ndodhet në Doha të Katarit – me qëllim për të avancuar në arritjen e marrëveshjes.

    Këshilltari i Sigurisë Kombëtare i Presidentit Biden, Jake Sullivan tha për rrjetin televiziv CNN më herët të dielën se palët ishin “shumë, shumë pranë” arritjes së një marrëveshjeje.

    Ai tha se zoti Biden po informohej në mënyrë të vazhduar mbi bisedimet në Doha, ku sipas zyrtarëve izraelitë dhe palestinezë, që nga e enjtja se është bërë njëfarë përparimi në bisedimet indirekte mes Izraelit dhe grupit militant Hamas.

    “Ne jemi ende të vendosur të përdorim çdo ditë që kemi në detyrë për arritjen e një marrëveshjeje dhe nuk do ta lëmë mënjanë këtë çështje në asnjë mënyrë.” – tha zoti Sullivan.

    Ai shtoi se ka ende një shans për të arritur një marrëveshje, përpara se zoti Biden të largohet nga detyra, por sipas tij ekzistonte gjithashtu mundësia që “Hamasi, në veçanti, të mos pajtohej me kushtet e marrëveshjes”.

    Izraeli filloi sulmin e tij në Gazë, pasi luftëtarët e Hamasit sulmuan shtetin hebre në tetor të vitit 2023 – duke vrarë 1200 persona dhe marrë më shumë se 250 të tjerë.

    Që atëherë, më shumë se 46,000 njerëz janë vrarë në Gazë – sipas zyrtarëve palestinezë të Shëndetësisë, që kontrollohet nga Hamasi.

    Nënpresidenti i zgjedhur JD Vance tha për rrjetin televiziv “Fox News” se ai pret që një marrëveshje për lirimin e pengjeve amerikane që ndodhen në Lindjen e Mesme, të shpallet në ditët e fundit të administratës Biden, deri 2 ditë përpara.

    Presidenti i zgjedhur Donald Trump ka mbështetur fuqishëm objektivin e zoti Netanjahu për të shkatërruar Hamasin. Ai ka premtuar se do të sjellë paqe në Lindjen e Mesme, por nuk ka dhënë detaje se si do ta arrinte këtë qëllim./VOA

  • Studimi: Numri i vdekjeve në Gazë, 41% më i lartë se shifrat e bëra publike

    Një studim i ri i publikuar në revistën “The Lancet” arrin në përfundimin se numri i të vdekurve nga lufta e Izraelit kundër militantëve të Hamasit në Gazë është shumë më i lartë se shifrat zyrtare – të raportuara nga Ministria e Shëndetësisë e këtij territori, që kontrollohet po nga Hamasi.

    Korrespodenti i Zërit të Amerikës në Londër, Henry Ridgwell bisedoi me bashkautoren e këtij studimi.

    Një studim i ri i publikuar në revistën prestigjoze “The Lancet” thotë se numri i viktimave të luftës në Gazë është rreth 64 mijë, rreth 40% më i lartë se shifrat e publikuara nga Ministria e Shëndetësisë e Rripit të Gazës, që kontrollohet nga Hamasi.

    Studimi tregon se zyrtarët e Gazës e kanë ulur numrin e vdekjeve me më shumë se 40%, gjatë periudhës 7 tetor 2023 dhe 30 qershor 2024.

    “Në realitet, vdekshmëria mund të jetë më e lartë nëse përfshijmë gjithashtu ata të cilët kanë humbur jetën, pasi nuk kanë patur qasje te Kujdesi shëndetësor, vdekjet nga goditjet në zemër apo sëmundjet infektive, vdekjet e grave shtatzëna që nuk mund të kenë patur qasje te mjeku gjatë lindjes.” – thotë Zeina Jamaluddine, bashkautore e studimit në revistën “The Lancet” .

    59% e viktimave ishin gra, fëmijë dhe të moshuar, sipas Raportit të revistës “The Lancet” – shifër kjo pothuajse e njëjtë edhe me studimet e tjera.

    Studimi i fundit nuk përfshin numrin e luftëtarëve të Hamasit në mesin e të vdekurve.

    Ambasada e Izraelit në Londër i tha Zërit të Amerikës përmes një deklarate se “çdo informacion që rrjedh nga Gaza nuk mund të besohet dhe nuk mund të injorohet historia e revistës ‘The Lancet’ për njëanshmërinë kundër Izraelit”.

    Zëri i Amerikës nuk është në gjendje të verifikojë shifrat, pasi Izraeli nuk i lejon gazetarët në Gazë.

    Studiuesit ndërthurën tre burime: Ministrinë e Shëndetësisë së Gazës që drejtohet nga Hamasi, një studim në internet të vdekjeve të raportuara dhe nekrologjitë në mediat sociale – thotë bashkautorja e studimit.

    “Është e rëndësishme që brenda secilës listë të mos kemi dyfishime, kështu që nuk duam të kemi të njëjtin person të përmedur disa herë. Më pas i krahasuam listat.” – thotë Zeina Jamaluddine, bashkautore e studimit në revistën “The Lancet” .

    E njëjta teknikë është përdorur për të vlerësuar vdekjet në konflikte të tjera – thotë bashkautorja e studimit.

    “Është përdorur në Sudan dhe Jemen. Është përdorur edhe në Kosovë dhe disa nga këto prova janë përdorur në GJND [Gjykata Ndërkombëtare e Drejtësisë” – thotë Zeina Jamaluddine, bashkautore e studimit në revistën “The Lancet”].

    Izraeli e filloi luftën kundër Hamasit në Gaza pas sulmit të grupit militant më 7 tetor të vitit 2023, i cili vrau më shumë se 1200 njerëz, kryesisht civilë.

    Shtetet e Bashkuara, Mbretëria e Bashkuar, Bashkimi Evropian dhe të tjerë e kanë cilësuar Hamasin si organizatë terroriste./VOA

  • Dhoma e Përfaqësuesve voton pro sanksioneve ndaj GJNP-së për shkak të Izraelit

    Dhoma e Përfaqësuesve në SHBA e ka kaluar të enjten një projektligj për vendosjen e sanksioneve ndaj Gjykatës Ndërkombëtare Penale (GJNP), në shenjë proteste ndaj fletarrestimeve që ajo ka lëshuar kundër kryeministrit të Izraelit, Benjamin Netanyahu, dhe ish-ministrit izraelit të Mbrojtjes, në lidhje me luftën e Izraelit në Rripin e Gazës.

    Projektligji, i cili kaloi me 243 vota për dhe 140 kundër, mundëson sanksionimin e çdo të huaji që heton, arreston, ndalon ose ndjek penalisht qytetarë amerikanë ose qytetarë të një vendi aleat, përfshirë Izraelin, të cilët nuk janë anëtarë të gjykatës.

    Dyzet e pesë demokratë iu bashkuan 198 republikanëve për ta mbështetur projektligjin. Asnjë republikan nuk votoi kundër tij.

    “Amerika po miraton këtë ligj sepse një gjykatë e rreme po kërkon të arrestojë kryeministrin e aleatit tonë të madh, Izraelit”, tha përfaqësuesi Brian Mast, kryetar republikan i Komitetit të Punëve të Jashtme të Dhomës së Përfaqësuesve, gjatë një fjalimi në Dhomë para votimit.

    Votimi në Dhomën e Përfaqësuesve, i cili është ndër të parët prej se përbërja e re e Kongresit e nisi punën javën e kaluar, theksoi mbështetjen e fortë të republikanëve, aleatët e presidentit të zgjedhur Donald Trump, për Qeverinë e Izraelit, tani që ata kontrollojnë të dyja dhomat e Kongresit.

    Trump pritet të bëjë betimin më 20 janar për një mandat të dytë si president.

    Kryetari i sapoemëruar i shumicës republikane në Senat, John Thune, është zotuar se Senati do ta shqyrtojë shpejt këtë projektligj, në mënyrë që Trumpi ta nënshkruajë atë si ligj menjëherë pas marrjes së detyrës.

    Gjykata Ndërkombëtare Penale është gjykatë e përhershme e cila mund të ndjekë penalisht individë për krime lufte, krime kundër njerëzimit, gjenocid dhe krimin e agresionit në shtetet anëtare ose nga shtetasit e tyre.

    Gjykata ka deklaruar se vendimi i saj për të lëshuar fletarrestime kundër zyrtarëve izraelitë ishte në përputhje me qasjen e saj në të gjitha rastet, bazuar në një vlerësim nga prokurori që kishte prova të mjaftueshme për të bërë këtë dhe bazuar në mendimin se kërkimi i fletarrestimeve menjëherë mund t’i parandalojë krimet e vazhdueshme.

    Republikanët në Kongres e kanë denoncuar GJNP-në që kur ajo lëshoi fletarrestimet për Netanyahun dhe ish-shefin e tij të Mbrojtjes, Yoav Gallant, duke i akuzuar ata për krime lufte dhe krime kundër njerëzimit gjatë konfliktit 15-mujor në Gazë.

    Izraeli i ka mohuar akuzat.

    Dhoma e drejtuar nga republikanët e miratoi projektligjin për të kërkuar sanksione ndaj GJNP-së në qershor, por ai nuk u shqyrtua kurrë në Senat, i cili në atë kohë ishte nën kontrollin e shumicës demokrate./REL