Ballina

Etiketë: futboll

  • UEFA refuzon ankesat e Federatës së Futbollit të Serbisë ndaj dy dënimeve në lidhje me ndeshjet me Zvicrën dhe Danimarkën

    Shtëpia e futbollit europian, UEFA, e kishte dënuar Federatën e Futbollit të Serbisë (FFS) me 172,750 euro për ndeshjet e futbollit që kishte zhvilluar vitin e kaluar ndaj Zvicrës e Danimarkës në kuadër të kualifikimeve për Ligën e Kombeve 2025.

    Për ndeshjen e Serbisë me kombëtaren e Zvicrës, më 15.11.2024, UEFA e kishte dënuar Federatën e Futbollit të Serbisë me 119,750 euro.

    Kurse, për ndeshjen e zhvilluar ndaj Danimarkës, Federata e Futbollit të Serbisë ishte dënuar me 53,000 euro.

    Ndaj këtyre vendimeve Federata e Futbollit të Serbisë kishte parashtruar ankesë.

    Të dy këto ankesa janë refuzuar nga Organi i Apelit të UEFA-s dhe janë konfirmuar vendimet e dënimit ndaj kësaj Federate të marra më 11.12.2024 nga Trupa e Kontrollit, Etikës dhe Disiplinës të UEFA-s (CEDB).

    “Refuzohet ankesa e Federatës së Futbollit të Serbisë. Për rrjedhojë, konfirmohet vendimi i Trupës së Kontrollit, Etikës dhe Disiplinës të UEFA-s, i datës 11 dhjetor 2024” – thuhet në vendimin e Organit të Apelit në UEFA më 24.01.2025.

    Sipas vendimit të CEDB të datës 11.12.2024, në raport me ekipin e kombëtares së Zvicrës, Federata Serbe ishte dënuar:

    – Për ndezje të fishekzjarreve: 8,250 euro; 

    – Gjuajte të gjësendeve: 31,500 euro;

    – Akte të dëmtimit të shkaktuara ndaj stadiumit dhe instalimeve të tij: 5,000 euro dhe të kontaktohet Federat e Futbollit të Zvicrës për zgjidhjen e dëmtimeve të shkaktuara nga tifozët;

    – Vonim i topit në lojë: Vërejtje;

    – Vonim i topit në lojë (nga trajneri Dragan Stojkovic): Vërejtje;

    – Sjellje raciste dhe diskriminuese: Ndalohet shitja e biletave për tifozët e jashtëm për dy ndeshjet e ardhshme që luan si ekip mysafir dhe 50,000 euro dënim;

    – Transmetimi i një mesazhi që nuk është i përshtatshëm një ngjarje sportive: 25,000 euro;

    – Udhëtimi i tifozëve vizitorë: Vërejtje.

    Në ndeshjen mes Zvicrës e Serbisë u raportua se kishte pasur slogane dhe thirrje nxitëse të tifozëve serbë kundër shqiptarëve. Ndërsa, loja ka përfunduar me rezultat 1:1.

    Kurse, lidhur me ndeshjen me kombëtaren e Danimarkës, më 18.11.2024, e cila kishte përfunduar me rezultat 0:0, CEDB kishte marrë vendim që Serbia të dënohet:

    – Për sjellje raciste dhe diskriminuese: 40,000 euro dhe të urdhërojë zbatimin e masës disiplinore të pezulluar nga Organi i Apelit të UEFA-s në vendimin e tij më 30.10.2023 për sjellje diskriminuese të tifozëve të saj p.sh. të urdhërojë mbylljen e pjesshme të stadiumit gjatë një ndeshjeje të ardhshme të UEFA-s në të cilën luan si Federatë nikoqire;

    – Mbyllje e pjesshme e stadiumit për një ndeshje shtesë të UEFA-s në të cilën luan si Federatë nikoqire: pushtim i fushës së lojës – 10,000 euro dhe ndezje të fishekzjarreve – 3,000 euro.

    Edhe në këtë rast, Organi i Apelit i UEFA-s ka vendosur që t’ia refuzojë Federatës së Futbollit të Serbisë ankesën, por e ka konfirmuar vendimin e CEDB të marrë më 11.12.2024. 

  • Ish-futbollistët Anel Rashkaj dhe Hekuran Kryeziu marrin pozita të rëndësishme në Kombëtaret U19 dhe U21 të Kosovës

    Federata e Futbollit të Kosovës ka njoftuar se Anel Rashkaj ka marrë detyrën e ndihmëstrajnerit të Kombëtares U19, ndërsa Hekuran Kryeziu do të jetë ndihmëstrajner i Kombëtares U21.

    “Anel Rashkaj dhe Hekuran Kryeziu – dy nga ikonat e Kombëtares së Kosovës rikthehen në role të reja në Federatën e Futbollit të Kosovës, këtë herë si ndihmëstrajnerë në ekipet kombëtare! Mirësevini në shtëpinë tuaj për një kapitull të ri dhe të rëndësishëm për futbollin e Kosovës!” – thuhet në njoftimin e FFK-së, më 20.01.2025.

    Para këtij postimi, Adil Maliqi njoftoi se po ka dhënë dorëheqje nga pozita e trajnerit të Kombëtares U19. Maliqi ka shkruar se ishte vendim i “detyrueshëm”, pasi sipas tij nuk kanë arritur të gjejnë një zgjidhje të përbashkët me Federatën.

    “Dua të falënderoj nga zemra Federatën e Futbollit të Kosovës dhe Kryetarin për besimin dhe mundësinë që më dhanë të udhëheq këtë grup të mrekullueshëm. Lojtarët ishin frymëzim i përditshëm për mua dhe prindërit e tyre, që ishin gjithmonë mbështetës, janë një shtyllë e rëndësishme e suksesit të tyre. Një falënderim i veçantë shkon për tifozët tanë të zjarrtë “Dardanët”, të cilët na qëndruan pranë në çdo sekondë dhe nuk reshtën së na dhëni forcë.” – ka shkruar Maliqi, më 20.01.2025, në “Facebook”.

    Aktualisht, Afrim Tovërlani është trajner i Kombëtaes U21 të futbollit.

    https://kallxo.com/lajm/adil-maliqi-jep-doreheqje-nga-pozita-e-trajnerit-te-kombetares-u19/

  • Adil Maliqi jep dorëheqje nga pozita e trajnerit të Kombëtares U19

    “Shpesh, rrethanat na vendosin përballë vendimeve që zemra nuk dëshiron t’i pranojë, por arsyeja i kërkon.” – me këtë fjali ka nisur Adil Maliqi postimin njoftues për dorëheqjen e tij, nga pozita e trajnerit të Kombëtares U19 të Futbollit të Kosovës.

    Maliqi ka shkruar se ishte vendim i “detyrueshëm”, pasi sipas tij nuk kanë arritur të gjejnë një zgjidhje të përbashkët me Federatën.

    “Dua të falënderoj nga zemra Federatën e Futbollit të Kosovës dhe Kryetarin për besimin dhe mundësinë që më dhanë të udhëheq këtë grup të mrekullueshëm. Lojtarët ishin frymëzim i përditshëm për mua dhe prindërit e tyre, që ishin gjithmonë mbështetës, janë një shtyllë e rëndësishme e suksesit të tyre. Një falënderim i veçantë shkon për tifozët tanë të zjarrtë, “Dardanët,” të cilët na qëndruan pranë në çdo sekondë dhe nuk reshtën së na dhëni forcë.” – ka shkruar Maliqi, më 20.01.2025, në “Facebook”.

    “Krenohem me sukseset që kemi arritur së bashku – suksese që janë jashtëzakonisht të vështira për t’u realizuar, veçanërisht kur përballesh me sfida të shumta. Por, pavarësisht çdo pengese, arritëm të tregojmë se puna, përkushtimi dhe bashkëpunimi janë çelësi i suksesit.” – shtoi ai.

    Adil Maliqi, një ish-futbollist dhe trajner në disa klube në Zvicër, është përzgjedhur më 16.05.2023 trajner i Kombëtares U19 të Kosovës në futboll.

    Maliqi, i cili ka lindur dhe është rritur në Zvicër, ka të përfunduar Akademinë e futbollit “Grasshopper Club Cyrih” dhe atë të “Fc Winterthur”. Si futbollist, Maliqi ka qenë aktiv në Ligën e Parë të Zvicrës deri në vitin 2012.

     

  • Gjyqtari shqiptar që po rritet me hapa të mëdhenj në Itali: Synimi im është Serie A

    Në fushën e futbollit, gjyqtari është më shumë sesa vetëm një person i cili kujdeset që të respektohen rregullat e kësaj loje. Është dikush tek sytë e të cilit pasqyrohet çdo lëvizje e lojtarëve, çdo pasim dhe faull.

    Roli i tij në futboll është jetik, pasi garanton që ky sport të mbetet ashtu siç duhet të jetë: një spektakël i pastër dhe i drejtë.

    E kush më mirë se sa gjyqtari shqiptar Roland Bytyçi mund të na rrëfejë për vështirësitë dhe misionin që bart në vete ky profesion.

    Në një intervistë për Telegrafin, gjyqtari me prejardhje nga Suhareka rrëfen për përvojën e tij në Itali, më saktësisht në regjionin Emilia-Romagna në qytetin Reggio Emilia ku jeton dhe vepron.

    I pyetur se si nisi gjithçka, Bytyqi tha se inspirimi për t’u bërë gjyqtar i erdhi në moshën 22-vjeçare kur ai ishte aktiv si futbollist.

    “Kur isha në moshën 22-vjeçare, një mik i imi i ngushtë më tha përse nuk planifikon të bëhesh gjyqtar, sepse të shohë shumë në këtë profesion. Fillimisht nuk isha entuziast ndaj kësaj ideje, por pastaj përfundova kursin dhe mora licencën e referimit në federatën italiane të futbollit”, ka thënë Bytyqi fillimisht.

    Për gjyqtarin nga Suhareka ky është viti i pestë si gjyqtar profesional, por ai ende po tenton të ngjitet më lartë.

    “Ndeshje pas ndeshje përfundova edhe vitin e pestë si gjyqtar profesional, duke ndarë drejtësinë në 65-70 ndeshje brenda vitit që nga kadetët U16 deri më sot në Ligën Promozione dhe Ecelenca, ku gjendet edhe Serie C”.

    Për Bytyçin synimi më i madh mbetet Serie A, objektiv për të cilin ai tha se duhet të ketë durim.

    “Me kalimin e kohës besoj që do ngritëm më lartë. Natyrisht, çdo gjyqtar objektivin kryesor e ka Serie A, por gjithmonë duhet durim dhe pasion dhe unë them se me punë gjithçka në jetë arrihet”.

    Ndonëse larg nga Kosova, Bytyçin nuk e ka penguar ky fakt që të mos i ndjekë zhvillimet në elitën e futbollit kosovar, ku tha se i shikon ndeshjet kohë pas kohe si dhe tregoi se me kë prej gjyqtarëve kosovarë mban kontakte.

    “Superligën e Kosovës e ndjekë shumë çdo vikend, i shikoj ndeshje pas ndeshje sepse futbolli në Kosovë po bëhet sport i vlerave dhe kampionëve”.

    “Kam respekt për punën që bën secili gjyqtar në Kosovë, por ai që më bën më së shumti përshtypje dhe shkëmbejë biseda me të është Genc Nuza”.

    Për fund Bytyçi tha se mundohet të marrë nga pak prej gjyqtarëve më të dalluar në botë, ku e përmendi Daniele Orsaton si person të cilin e ka pikë referimi dhe merr këshilla.

    “Unë shikoj shumë analiza të gjyqtarëve italianë, por edhe të huaj si ata anglezë dhe francezë. Kam shumë simpati për (Daniele) Orsaton, një gjyqtar tejet i dashur dhe i respektuar në Itali dhe jashtë vendit”.

    “Me Orsaton kam pasur fatin që të bisedojë edhe nga afër dhe këshilla e tij ndaj meje ishte të kem pasion, vullnet dhe sakrificë në çdo ndeshje”, përfundoi ai./Telegrafi.com