Ballina

Etiketë: flaka e janarit

  • Shfaqja e Teatrit të Gjakovës hap Edicionin e 34-të të Festivalit ‘Talia e Flakës’

    Shfaqja “Bëje ose vdis” e Teatrit “Hadi Shehu” të Gjakovës, me regji të Blerta Nezirajt do të hapë Edicionin e 34-të të Festivalit të Dramës Origjinale shqipe, “Talia e Flakës”.

    Festivali “Talia e Flakës 2025” hapet sot, e mërkurë, më 22.01.20025, në ora 20:00 në Teatrin e Qytetit në Gjilan.

    Festivali “Talia e Flakë” mbahet nga 22 deri më 27 janar 2025 – në kuadër të manifestimit mbarëkombëtar “Flaka e Janari”, që po mbahet në Gjilan.

    Edicioni i 34-të i manifestimit mbarëkombëtar “Flaka e Janarit” është hapur me 11 janar dhe mbyllet me Gala mbrëmje, në “Vali Ranch Resort”, më 31.01.2025.

    Anvi Shkodra, nga Organizata “Varg e Vi” ka thënë për KALLXO.com, se në Edicionin e sivjetmë të “Talias së Flakës” do të shfaqen gjithsej 6 shfaqje teatrore nga Kosova, Shqipëria e Maqedonia e Veriut. Të gjitha shfaqjet jepen në Teatrin e Gjilanit.

    Ai ka thënë se Festivali ka karakter garues dhe do të ndahen edhe disa çmime. Shkodra tha se risi e Edicionit të sivjetmë të “Talias së Flakës” është themelimi dhe ndarja edhe e çmimit për “Dramën më të mirë origjinale të shkruar”.

    “Ideja (për themelimin e këtij çmimi) është që të përkrahet drama origjinale shqipe – duke krijuar mundësi që të paktën dikush t’ua lexojë dramat tekstshkruesve tanë. Tutje stimulimit dhe shpërblimit për dramë fituese e po ashtu me shumë gjasë edhe inskenimin e saj në Teatrin e Gjilanit.” – ka thënë ai.

    Sipas tij, ky çmim dhe çmimet e tjera të Festivalit do të ndahen më 31.01.2025, në Gala mbrëmjen përmbyllëse të manifestimit “Flaka e Janarit”.

     

    “Talia e Flakës 2025” – Orari i shfaqjeve.

    Edicioni i 34-të i manifestimit mbarëkombëtar “Flaka e Janari” është hapur më 11 janar 2025.

    Deri më tani, gjatë këtij manifestimi janë mbajtur një sërë aktivitetesh, si: homazhe për heronjtë e Kosovës, Akademi e Tryeza kushtuar personaliteteve të njohura historike e aktivitete kulturore. Ndërsa, deri në mbyllje të manifestimit do të mbahen edhe një sërë aktivitetesh kulturore.

    Manifestimit Mbarëkombëtar “Flaka e Janarit” për të nderuar të rënët për liri.

    Edicioni i sivjetmë i “Flakës së Janarit” mbyllet me gala mbrëmje në “Vali Ranch Resort”, më 31.01.2025.

     

    ‘Flaka e Janarit 2025’- agjenda.

     

     

  • Fillon edicioni i 34-të i “Flakës së Janarit” në Gjilan

    Më 11.01.2025 ka filluar manifestimi mbarëkombëtar, “Flaka e Janarit” e organizuar nga Komuna e Gjilanit.

    Sipas një komunikate për media, kryetari i Gjilanit, Alban Hyseni, bashkë me ministrin e Mbrojtjes Ejup Maqedoncin, ministren e Drejtësisë Albulena Haxhiun, zv. ministrin e Mbrojtjes Shensi Sylën, nënkryetaren Leonora Morina Bunjakun, deputetë, ministra, drejtorë, aktivistë dhe qytetarë, gjatë ditës bënë homazhe tek varrezat e dëshmorëve në Gjilan.

    Në njoftim thuhet se më pas aktivitetet kanë vazhduar në Kazermën e Qytetit, ku janë prit nga komandanti i FSK-së i kësaj kazerme nënkoloneli Arben Avdyli.

    I pari i ka thënë se së bashku me nënën Stane, deputetë, ministra, aktivistë dhe qytetarë, nderuan historinë dhe të ardhmen e Kosovës.

    “’Flaka e Janarit’, ka filluar që nga dita e sotme, duke na kujtuar heronjtë dhe dëshmorët që dhanë gjithçka për lirinë tonë. Vizituam Kodrën e Dëshmorëve, ku mes varreve të heronjve reflektuam mbi sakrificat e tyre dhe ripërtëritë angazhimin për një Kosovë që respekton dhe vlerëson ato sakrifica”- ka thënë Hyseni sipas komunikatës.

    Hyseni ka theksuar se më pas kanë vizituar ushtarët e FSK-së, të cilët sipas tij, me guxim dhe përkushtim mbrojnë sigurinë dhe sovranitetin e vendit tonë.

    “’Flaka e Janarit’, na kujton sakrificat që na sollën lirinë dhe angazhimin për të ndërtuar një të ardhme të sigurt”- është shprehur Hyseni.

    Në edicionin e vitit të kaluar, shkrimtari shqiptar, tashmë i ndjeri Ismail Kadare ishte mysafir nderi.

    Kadare vdiq më 01.07.2024, në moshën 88-vjeçare, si pasojë e një arresti kardio-respirator. Ai u varros më 03.07.2024 në Varrezat e Tufinës në Tiranë.

  • Festivali ‘Talia e Flakës 2025’, themelohet çmimi që nxit shkrimin e dramës shqipe

    Themelimi i çmimit për dramën më të mirë origjinale të shkruar është risia e Festivalit të dramës origjinale shqipe “Talia e Flakës 2025” që mbahet ndërmjet 22.01.2025 e 28.01.2025 në Gjilan.

    Festivali “Talia e Flakës” mbahet në kuadër të manifestimit tradicional mbarëkombëtar “Flaka e Janarit”, që hapet të shtunën, më 11.01.2025.

    Edicioni i 34-të i “Talias së Flakës” organizohet nga OJQ ‘Varg e Vi” në bashkëpunim me Teatrin e Qytetit të Gjilanit.

    Festivali ka karakter garues dhe përveç çmimit të sapothemeluar ndahen edhe disa çmimet të tjera.

    Konkursi për çmimin për dramën më të mirë origjinale të shkruar është hapur më 07.01,2025 dhe sipas organizatorëve të Festivalit, themelues të çmimit, konkursi mbetet i  hapur deri më 22.01.2025.

    Aktori Avni Shkodra, një nga themeluesit e “Varg e Vi’, ka thënë për KALLXO.com se çmimi do të stimulojë krijimin e dramës shqipe, e siç ka thënë ai, edhe të inskenimit të saj, qoftë në Teatrin e Gjilanit, teatrot kombëtare, etj.

    “Ideja (për themelimin e këtij çmimi) është që të përkrahet drama origjinale shqipe, duke krijuar mundësi që të paktën dikush t’ua lexojë dramat tekstshkruesve tanë, tutje stimulimit dhe shpërblimit për dramë fituese, e po ashtu me shumë gjasë edhe inskenimin e saj në Teatrin e Gjilanit”- ka thënë ai.

    Shkodra ka thënë se drama fituese e çmimit për dramën më të mirë origjinale të shkruar do të vlerësohet nga një komision tjetër e jo nga juria e “Talias”. Sipas tij, drama fituese e shkruar kompensohet materialisht nga mjetet e grumbulluara prej biletave të “Talias 2025”.

    “Drama fituese kompensohet materialisht në vlerë 1,000 euro dhe konsiderohet si dramë potenciale për inskenim në Teatrin e Qytetit në Gjilan. Çmimi dorëzohet në ceremoninë e ndarjes së çmimeve ‘Flaka e Janarit 2025’”- ka thënë Shkodra.

     ‘Flaka e Janarit 2025″

    Edicioni i 34-të i manifestimit mbarëkombëtar kulturor “Flaka e Janarit” do të nisë të shtunën, më 11.01.2025, në Gjilan.

    Sipas programit të publikuar nga Drejtoria për Kulturë, Rini dhe Sport e Gjilanit, gjatë këtij edicioni të  “Flakës së Janarit” do të mbahen një sërë aktivitetesh si: festival i muzikës, dramës, ekspozita, orë letrare.

    Manifestimi “Flaka e Janarit” mbyllet me një gala mbrëmje më 31.01.2025.