Policia e Kosovës raporton se është zhdukur një grua në Ferizaj.
Sipas Raportit policor, të lëshuar sot më 10.01.2025, bëhet e ditur se viktima ka dalur nga shtëpia dje, më 09.01.2025 dhe nuk është kthyer më.
Rasti thuhet se është në procedurë hetimore.
Një mesazh që pretendohet se u ka shkuar të gjithë nxënësve të Gjimnazit “Kuvendi i Arbërit” në Ferizaj, e në të cilin njoftohet se do të mbahet një mbledhje e Lëvizjes Vetëvendosje në qytet, më 09.01.2025, ka bërë bujë në gjithë qytetin.
Pretendohej se mesazhi u dërgua nga kryetarja e Këshillit të Nxënësve të Gjimnazin “Kuvendi i Arbërit”, e cila është nxënëse.
“Nesër me datë 09.01.2025 do të ketë një mbledhje në kafen X prej orës 18:30. është një lloj organizimi nga Lëvizja Vetëvendosje, ku do të jetë prezent edhe kryeministri i Kosovës. Do të ketë muzike dhe pije. Mundësisht dërgojeni këtë mesazh nëpër klasët e juaja dhe m’i dërgoni sot emrat e nxënësave të cilët do të jenë pjesëmarrës” – thuhet në mesazhin që pretendohet se u është dërguar nxënësve të Gjimnazit “Kuvendi i Arbërit”.
Zëvendësdrejtori i Gjimnazit, Adnan Hashani, ka thënë për KALLXO.com se kanë mbajtur një mbledhje me Këshillin e Nxënësve, në të cilin është deklaruar kryetarja e këtij Këshilli në lidhje me dërgimin e mesazhit.
Drejtori i Arsimit në Ferizaj, Afrim Llabjani, tha se është informuar në mbrëmje të datës 08.01.2025 se nga kryetarja e Këshillit të Nxënësve të Gjimnazit “Kuvendi i Arbërit” u është dërguar mesazhi nxënësve.
Mëngjesin e të enjtes, më 09.01.2025, Llabjani tha se e ka takuar drejtorin e Gjimnazit “Kuvendi i Arbërit”, Bajram Rexhepi. Nga ky takim, Rexhepi ka thënë se ishte informuar për këtë rast.
“Kërkova nga drejtori [i Gjimnazit] që t’i thirrin kryetarët e këshillave të klasëve, secilës klasë, edhe kryetaren e Këshillit të Nxënësve, ta bisedojnë këtë çështje, pastaj duhet m’i shiqu edhe pjesët e tjera, aspektet e tjera ligjore, udhëzimet administrative se çka mund të bëjmë ne në këtë drejtim” – ka treguar Llabjani përmes telefonit për KALLXO.com.
Sipas Llabjanit, nxënësit nëse janë në proces mësimor gjatë kohës që mbahet mbledhja e LVV-së, nuk kanë të drejtë të marrin pjesë në atë mbledhje.
“Unë po besoj që nxënësit nuk marrin pjesë edhe nuk duhet të marrin pjesë në këto aktivitete, sepse ata janë, e para janë të mitur që nuk i takojnë moshës madhore për të votuar, e dyta – mund të jenë të manipuluar” – ka theksuar Llabjani.
Ndërsa Rexhepi ka thënë për KALLXO.com se zëvendësdrejtori i Gjimnazit, Adnan Hashani, do ta mbajë një mbledhje me kryetaren e Këshillit të Nxënësve të enjten për ta biseduar këtë çështje.
Zëvendësdrejtori Hashani ka treguar se çka kanë biseduar në mbledhjen që ka mbajtur Këshilli i Nxënësve të Gjimnazit.
Sipas Hashanit, nxënësja është mashtruar prej Këshillit të Nxënësve në nivel komunal.
Hashani tha se nxënëses i është kërkuar nga kryetari i Këshillit të Nxënësve të Ferizajt që ta shpërndajë mesazhin te nxënësit, i cili sipas tij edhe është shpërndarë te të gjithë nxënësit e Gjimnazit.
“Kryetarja e ka sqaru se si ka rrjedhë çështja. U kanë kërkesë, kjo ka ra pre e mashtrimit me thanë edhe e ka shpërnda mesazhin. Nxënësit e mirëkuptuan edhe nuk pat naj kërkesë për naj masë diçka” – tha Hashani.
“Ata kanë kërku ose ai ka kërku me shpërnda mesazhin tek kryetarët e klasëve, nëse dëshirojnë me shku në takim me kryeministrin… Ajo e pranoi që ka gabu, s’e ka mendu që është çështje politike edhe e ka shpërnda” – ka shtuar Hashani.
Hashani tha se nxënësja vazhdon të jetë kryetare e Këshillit të Nxënësve të Gjimnazit, pasi nuk kishte kërkesë për ta shkarkuar nga kjo pozitë.
Kur u pyet nëse nxënësit do të marrin pjesë në mbledhjen e Lëvizjes Vetëvendosje, Hashani e ka mohuar.
Hashani ka treguar se nxënësit e përfundojnë mësimin në ora 19:05 dhe janë nxënës kryesisht të klasës 10 e gjysma e tyre të klasës 11.
Para se të mbahej mbledhja e Këshillit të Nxënësve të Gjimnazit “Kuvendi i Arbërit”, Hashani tha se ka biseduar me prindin e nxënëses.
“Edhe ajo [nëna e nxënëses] më tha që ka ra pre e kërkesës të një kryetarit të Këshillit të Nxënësve në nivel komunal. Edhe ajo e ka pasë shqetësim, pasi çika s’ka flejtë deri në dy të natës, ka qenë e shqetësuar” – ka thënë Hashani.
Hashani pretendon se mesazhi që u është dërguar nxënësve të Gjimnazit “Kuvendi i Arbërit” është shpërndarë edhe në shkollat e tjera të Ferizajt.
KALLXO.com ka kontaktuar me kryetarin e Këshillit të Nxënësve të Ferizajt. Ai është nxënës i Shkollës Ekonomike “Faik Konica” në Ferizaj dhe ka thënë se e ka parë në internet lajmin që Lëvizja Vetëvendosje do të jetë në Ferizaj më 09.01.2025.
Ai tha se e ka dërguar mesazhin në mënyrë shoqërore në një grup në Viber në të cilin janë të gjithë kryetarët e këshillave të nxënësve të shkollave në Ferizaj.
“Kjo punë u ba shumë e madhe. Unë e kam çu veç qysh me thanë hajt, nuk u kanë me shku me votu ose me shku me pa çka janë t’u bo. Ja, ja unë e kam pasë si qëllim shoqërie, jo obligim për ata, se nuk guxoj me dhanë kësi detyra as nuk është detyrë e jemja” – ka thënë ai.
“Ia kam çu mesazhin, ata nuk e kanë kuptu, kanë shku te drejtorat, t’u mendu që jam t’u dashtë m’iu thanë – shkoni patjetër… Tani drejtorat më kanë kontaktu krejt mua përveç drejtorit të Arsimit, ama unë u kam tregu edhe drejtorave tjerë edhe drejtorit të shkollës tem që ai nuk u kanë tendencë, se na jena institucion, na s’kena drejt m’u përzi me parti politike hiç” – ka treguar nxënësi.
Drejtori i Shkollës Ekonomike “Faik Konica” dhe Këshilli i Nxënësve të kësaj shkolle e kanë mbajtur një takim me kryetarin e Këshillit të Nxënësve në nivel komunal. Nxënësi tha se pritet që të merret ndonjë masë ndaj tij nga ana e Këshillit të shkollës.
“Edhe drejtori i Shkollës tonë ka menu që është gabim. Më kanë kontaktu edhe disa drejtorë të tjerë, unë nuk e kam pasë qëllimin që me shku te Vetëvendosja… E kam mbajtë takimin me drejtorin, takim me Këshillin e shkollës” – tha ai.
Ai e ka mohuar se do të shkojë në mbledhjen e Lëvizjes Vetëvendosje të enjten, më 09.01.2025.
KALLXO.com ka kontaktuar edhe me Ditjon Fetahun, drejtor ekzekutiv i organizatës “Kosovo Youth Council (KYC)”.
Në baza vullnetare KYC ndihmon në zgjedhjen e kryetarit të Këshillit të Nxënësve në nivel komunal.
Fetahu përmes telefonit ka thënë se kanë dëgjuar për këtë rast dhe janë duke u frikësuar se nuk është vetëm në Ferizaj.
“Këshilli i Nxënësve në nivel të Kosovës nuk ka kurrfarë të drejte ose të themi kurrfarë përgjegjësie mbi atë se çka ndodh me Këshillin e Nxënësve në nivel lokal… Sigurohemi që çdo vit me u siguru që zgjedhjet e Këshillit të Nxënësve qoftë në shkollë, qoftë nivel komunal e qoftë nacional, m’u ba në mënyrë demokratike, transparente” – ka shpjeguar Fetahu.
Fetahu tha se nuk kanë fakte por vetëm disa informata se thirrja nxënësve për të qenë pjesëmarrës në mbledhjet e partive politike nuk është duke ndodhur vetëm në Ferizaj.
“Fatkeqësisht e kemi këtë skepticizëm të informatave që jena t’u i marrë prej terrenit që potencialisht janë t’u u targetu prej grupeve rinore të partive, janë duke u targetu përfaqësuesit e nxënësave nëpër komuna të ndryshme edhe ne diskutime të ndryshme ata janë duke u motivu që me ba këtë angazhim” – ka thënë Fetahu.
Ajo çfarë mund të bëjë KYC për rastin e Ferizajt, sipas Fetahut, është që t’i nisin një email grupit të nxënësve, të cilët e votojnë përfaqësuesin e tyre, që t’i informojnë mbi atë çka ka ndodhur në momentin që e konfirmojnë se është e vërtetë.
“Që është ndesh komplet me mënyrën se qysh ata janë zgjedhur, me statutin të cilin e kanë në nivel komunal, të cilin e kanë aprovu si grup edhe automatikisht i bie që kuvendi i anëtarëve në atë komunë kanë bazë për m’i largu prej pozitës së përfaqësimit” – tha Fetahu.
“Ne punojmë me gjenerata të përfaqësuesve të nxënësve tash e 25 vjet gati e përfaqësuesit e nxënësve në moment që i përfundojnë klasën e 12 çdoherë po na atakohen prej partive politike. Po tash kemi mbërri në një nivel ma nalt ku ata të cilët janë ataku në vitet paraprake po i atakojnë këta që janë në shkolla në periudhën e fushatës zgjedhore” – ka përfunduar Fetahu.
KALLXO.com e ka pyetur zëdhënësin e Lëvizjes Vetëvendosje, Arlind Manxhuka, në lidhje me mbledhjen që pritet të mbahet nga LVV në Ferizaj, por nuk ka marrë përgjigje deri në publikimin e këtij lajmi.
Në anën tjetër, ministri i Financave, Hekuran Murati, ka njoftuar në Facebook se sot është me kryeministrin Albin Kurti në Ferizaj.
Policia në Ferizaj ka shqiptuar një numër gjobash kundërvajtëse dhe ka trajtuar disa aksidente në komunikacionin rrugor gjatë periudhës: prej 30.12.2024 deri më 05.01.2025.
Sipas njoftimit të Policisë, në periudhën e përmendur janë shqiptuar 808 gjoba kundërvajtëse dhe ka hequr pesë patentë-shoferë për drejtuesit që kanë shkaktuar kundërvajtje më të rënda në komunikacionin rrugor.
Janë raportuar 66 aksidente, prej tyre: një aksident fatal në të cilin ka vdekur një person, 21 aksidente me lëndime në të cilat janë lënduar 34 persona dhe 44 aksidente me dëme materiale.
Teksa u ka kërkuar kujdes shoferëve në komunikacion, Policia ka kërkuar nga qytetarët që të bashkëpunojnë me ta duke e raportuar secilën kundërvajtje në Stacionin më të afërt të Policisë apo në numrat e telefonit: 192,0290/326-250 & 0290/322-406.
“Policia Rajonale e Ferizajit do të vazhdojë me aktivitete të shtuara, me synim parandalimin e aksidenteve në komunikacionin rrugor, si dhe apelojmë te shoferët që të bëjnë kujdes, të respektojnë shenjat dhe rregullat në komunikacion.” – thuhet në njoftimin e Policisë, më 06.01.2025.
Policia e Kosovës ka bërë të ditur se dje me 04.01.2025 një person në Ferizaj është shoqëruar në stacionin policor, pasi që kishte shkaktuar dhunë psikike ndaj gruas së tij.
Po ashtu, Policia ka njoftuar se nga i dyshuari është sekuestruar një pistoletë me gaz.
Me vendim të prokurorit pas intervistimit palët janë liruar dhe rasti ka shkuar në procedurë të rregullt.
Me përfundimin e vitit 2024, punën e kanë përmbyllur edhe disa QMF në periferi të qyteteve. Në Ferizaj, në 5 prej fshatrave të njëjtat veçse janë mbyllur. Nga Drejtoria e Shëndetësisë këtë e arsyetojnë me numrin e vogël të stafit e mbingarkesën e punës. E të pakënaqur mbesin banorët të cilët përpos shpenzimeve mjekësore, tanimë u janë shtuar edhe ato të transportit.
Qendrat për kujdesin parësor janë të parat që pranojnë në trajtim shqetësimet shëndetësore të qytetarëve.
E ndonëse në qytete QMF-të po vazhdojnë ta kenë këtë funksion, ato në periferi të tyre po shuhen.
Që nga koha e stërgjyshit të tij, Shefki Hasani dhe familja kanë jetuar në fshatin Gaçkë. Ndonëse larg nga Ferizaj, fshati ua plotësonte të gjitha nevojat. Por tash e disa muaj, jo më.
Ambulantës së këtij fshati i është vënë dryni e nevojave të banorëve të këtij fshati, tani iu përgjigjen Qendrat e Mjekësive Familjare në qytet të Ferizajt. Kjo tregojnë se ua ka vështirësuar jetën.
”Unë frik kam dëgju që s’po punon, e pata një rast. Doja të merrja vaksinën e gripit sezonal dhe kur shkova, ambullanta ishte mbyllur. Çka u bë pyeta, më thanë se e kanë mbyllur, e kanë qu punëtoren në qytet me punu dhe mjeku më nuk vjen” – ka thënë Shefki Hasani, banor i Gaçkës.
E nga nevoja për hapjen e saj, ai thotë se ka nisur të marrë vetiniciativë për rikthimin e saj.
”Unë vet kam biseduar me kusheri e kojshi, të shkojmë tek drejtori e tek kryetari dhe të kërkojmë pse të na e mbyllin. Jemi 500 shtëpi, 500 familje e pamundur pa u sëmurë ndonjëherë brenda ditës e natës. Janë afër 400 nxënës në shkollë, për çdo rast tash na duhet me qu në ambullanta të tjera duke e pas ata në derë të shtëpisë” – ka thënë Shefki Hasani, banor i Gaçkës.
Por Gaça nuk është fshati i vetëm që QMF-ja është mbyllur. Njëjtë ka ndodhur edhe në Varosh.
”Në Ferizaj kontrollohem por më lehtë do ishte këtu, e kam më afër sesa në Ferizaj. Nëse s’kemi veturë, si të shkojmë?”.
Të njëjtën pamje ka edhe Qendra e Mjekësisë familjare në Llojzë, e cila nga shtatori është jashtë funksioni.
Ani pse mjekun e kishin në dyert e shtëpisë, tani banorët e fshatit Llojzë detyrohen të shkojnë deri në qytet për të marrë shërbimet mjekësore. E përpos tyre, në kosto u përfshihet edhe rrugëtimi”.
Drejtori i Shëndetësisë në Ferizaj, Kemajl Emini, tregon se pos problemeve, shtesë vështirësi u ka shkaktuar edhe ndërprerja e një kontratë me organizatën “Caritas” për shkak të kontratës kolektive e që sipas tyre, penalizon drejtorinë me 1 milion euro.
”Së pari, që tri vite kemi bërë kërkesë për shtim stafi për QKMF në Ferizaj në ministritë përkatëse si edhe deputetëve të Ferizajt, me 8 faqe arsyetime për 100 vetë, për shtim stafi; mjek, stomatolog, infermier etj., Por nuk kemi gjetë koncensus, edhe pse jemi komuna e tretë në Kosovë për numër banori e kemi vetëm 318 staf, ndërsa krahaso Gjilanin dhe Mitrovicën që kanë mbi 450 staf. Së dyti, kemi pas një kontratë me “CARITAS” të cilën nuk po mund ta vazhdojmë për shkak të kontratës kolektive që vetëm drejtorinë time e penalizon 1 milion e Ferizajn 10 milion. Së treti, kemi filluar një orar të ri 8- 16 , në bashkëbisedim me Ministrinë e Shëndetësisë për përzgjedhjen e mjekut familjar. E gjithë kjo po na pamundëson punën nëpër QMF”- Kemajl Emini, drejtor për Shëndetësi në Ferizaj.
Televizioni ka pyetur edhe Ministrinë e Shëndetësisë rreth çështjes, por nga e njëjta nuk ka pranuar përgjigje./Dukagjini