Ballina

Etiketë: ejup maqedonci

  • PSD e dërgon në Prokurorinë Speciale letrën e Maqedoncit për KFOR-in – VIDEO

    Partia Socialdemokrate (PSD), më 27.01.2025, ka dërguar në Prokurorinë Speciale “letërsqarimin” e ministrit të Mbrojtjes, Ejup Maqedoncit, drejtuar Komandantit të KFOR-it – në lidhje me kompetencat për dërgimin e FSK-së në veri të vendit.

    Zgjim Hyseni nga PSD-ja tha se kryeministri Albin Kurti në vitin 2020 e kishte quajtur si tradhëti dhe kundërkushtetues zotimin e ish-kryeministrit Hashim Thaçi në vitin 2013, që të mos dërgojë FSK-në në Veri – pa një miratim paraprak nga KFOR-i.

    Sipas Hysenit, edhe letra e ministrit Maqedonci në këtë rast duhet të cilësohet si “shkelje”.

    “Ne e kemi dorëzu sot në Prokurorinë Speciale nëse Marrëveshja e vitit 2013 qysh vetë Kurti e ka cilësuar ‘si shkelje të Kushtetutës’, për shkak se ka thënë se është Traktat Ndërkombëtar pa u votu në Kuvend. Nëse ajo ka qenë shkelje, atëherë riafirmimi i saj prej ministrit Maqedonci duhet me u cilësu po ashtu shkelje, me kriteret e vetë Kryeministrit.” – ka thënë Hyseni para gazetarëve.

    “E kemi dërgu pra letrën (në Prokurori), letërkëmbimin në mes të ministrit Maqedonci edhe Komandantit të KFOR-it. Edhe kemi thënë ‘Shikoje, nëse këtu ka shkelje të Kushtetutes’. Nëse ekzistojnë ato shkelje, të cilat i ka pretendu Kryeministri vetë në vitin 2020.” – shtoi ai.

    Ai ka akuzuar Kurtin për standarde të dyfishta për të njëjtën çështje.

    “Vetëm prej nivelit ku vetës ia afirmon, vetës ia njeh një rol historik, një rol që ka me e realizu një domosdoshmëri historike. Vetëm prej asaj perspektive, ti masnej nuk zgjedh mjete, diçka që më herët për dikon ka qenë tradhëti. E vetë e bon, edhe është punë shumë e vogël. Kjo është arsyeja pse kryeministri Kurti nuk është thjesht vetëm një autoritar i zakonshëm, është shumë më keq e më i rrezikshëm se kaq.” – tha Hyseni.

    Ndërsa, ministri i Mbrojtjes, Ejup Maqedonci e kishte mohuar se letra e dërguar te KFOR-i në nëntor të vitit 2024 përbënte “rizotim”, pasi që FSK kishte marrë pjesë në një ceremoni mortore në Veri.

    Sipas Maqedoncit, letra ishte vetëm një “sqarim”.

    “Letra në fjalë është dërguar me qëllimin që t’i sqarohen Komandantit të KFOR-it rrethanat e angazhimit të një Njësie të FSK-së në njërën nga Komunat në veri të vendit, si dhe ta sigurojë atë që nuk ka pasur për qëllim në asnjë rast tensionimin e situatës. Në asnjë mënyrë, letra nuk paraqet rizotim dhe nuk mund të interpretohet si rizotim, pasi për angazhimin e FSK-së në Veri të Kosovës ekziston një dokument në fuqi i dhënë si zotim nga ish-kryeministri Thaçi në prill të vitit 2013 – dërguar Sekretarit të Përgjithshëm të NATO-s, nga i cili derivojnë dhe kushtet e operimit e të koordinimit të FSK-së dhe KFOR-it për pjesën veriore të Kosovës.” – thuhej ndër të tjera në reagimin e Maqedoncit.

  • Burokracia e Qeverisë Kurti, Kosova pa atashe të Mbrojtjes në Gjermani, Turqi, Itali e Japoni

    Një procedurë e tejzgjatur e Qeverisë së Kosovës ka lënë pa akreditim atashetë e Mbrojtjes në katër prej vendeve me të cilat Kosova ka bashkëpunim serioz në fushën e mbrojtjes dhe në ushtri.

    Burime të KALLXO.com kanë konfirmuar se që nga 15 janari 2025, Kosova ka tërhequr atashetë e Mbrojtjes nga Turqia, Gjermania, Italia dhe Japonia. 

    Ky veprim ka ndodhur për shkaqe procedurale të cilat lidhen me Ministrinë e Punëve të Jashtme dhe Diasporës, e cila për 29 ditë nuk është përgjigjur në kërkesën e Ministrisë së Mbrojtjes për të dërguar kërkesat për akreditim të atasheve në vendet përkatëse. 

    KALLXO.com ka siguruar korrespondencën me të cilën ministri i Mbrojtjes, Ejup Maqedonci i kërkon ministres së Punëve te Jashtme, Donika Gërvallës që në afat sa më të shpejtë të inicojë procedurat e akreditimit të atasheve ushtarakë pranë shteteve.

    Në korrespondencën e datës 27.12.2024, ministri Maqedonci e njofton ministren Gërvalla për tërë ecurinë e procesit të përzgjedhjes së atasheve. 

    Të dhënat tregojnë që Gërvalla ishte njoftuar se mandati i atasheve aktualë përfundonte me datë 15 janar, mirëpo shkresa për atashetë e rinj nuk është dërguar deri më datë 26 janar për qeveritë partnere. 

    Sipas ligjit, Ministria e Mbrojtjes përzgjedhë atashetë e Mbrojtjes, ndërsa Minitria e Jashtme dërgon njoftimet dhe kërkesat për akreditim tek vendet të cilat kanë pranuar atashetë e mbrojtjes. 

    Konkursi për përzgjedhjen e katër atasheve të Mbrojtjes në këto shtete ishte hapur në tetorin e viti 2024. Komisioni i Ministrisë së Mbrojtjes gjatë konkursit kishte pranuar nëntë aplikacione, ku pesë nga kandidatët kishin aplikuar në dy pozita.

    Para përzgjedhjes së katër kandidatëve për atashe, kishte pasë edhe kohë të ankesës për aplikantët që nuk janë pranuar, por komisioni nuk kishte pranuar asnjë ankesë për procedurat e përzgjedhjes.

    Rregullorja e përzgjedhjes për atashe të Mbrojtjes precizon se kandidati duhet të jetë pjesëtari aktiv i Forcës së Sigurisë së Kosovës, i cili shërben në misionet diplomatike të Republikës së Kosovës, si përfaqësues i Ministrisë së Mbrojtjes dhe FSK-së. Kjo rregullore tek përzgjedhja e atasheve precizon të gjithë procesin se si duhet të zgjidhet një atashe.

    “Ministri i Mbrojtjes emëron Bordin Përzgjedhës për shqyrtimin dhe propozimin e kandidatëve për detyrën e AM dhe PU. Bordi përzgjedhës përbëhet Kryesuesi i Bordit, i cili përzgjidhet nga Ministri i Mbrojtjes dhe dy anëtarë të tjerë, të cilët propozohen nga KOMFSK. Ministri, në koordinim me KOMFSK, i propozon Ministrit të Punëve të Jashtëm njërin nga kandidatët e përzgjedhur për inicim të procedurave të akreditimit dhe emërimit”- thuhet në rregulloren për përzgjedhjen e atasheve.

    KALLXO.com ka tentuar të marrë përgjigje nga Ministria e Mbrojtjes, Ministria e Punëve të Jashtme dhe Zyra e Kryeministrit Albin Kurti për këtë çështje, mirëpo përkundër insistimit për tri ditë përgjigjet nuk janë pranuar.

    Atashetë e Mbrojtjes zgjidhen për mandat 3-vjeçar të shërbimit në vendin e caktuar. Pozicionet e tyre janë kruciale në komunikimin në fushën e mbrojtjes në mes shteteve. 

    Ata janë përgjegjës për shkëmbimin e informacioneve konfidenciale në mes ushtrive partnere, përpos kësaj ata koordinojnë bashkëpunimet ushtarake përfshirë çështjet e blerjes së armëve dhe çështjet e trajnimeve. 

  • Ministri Maqedonci thotë se letra dërguar komandantit të KFOR-it nuk ishte rizotim por sqarim

    Ministri i Mbrojtjes, Ejup Maqedonci, ka reaguar për letrën dërguar komandantit të KFOR-it në lidhje me angazhimin e Gardës Ceremoniale të FSK-së gjatë një ceremonie mortore.

    Sipas një njoftimi të ministrit, letra në fjalë është dërguar me qëllim që t’i sqarohen komandantit të KFOR-it rrethanat e angazhimit të një njësie të FSK-së në njërën nga komunat në veri të vendit, si dhe për ta siguruar atë që nuk ka pasur për qëllim në asnjë rast tensionimin e situatës. 

    Minsitri ka deklaruar se ajo letër në asnjë mënyrë nuk paraqet rizotim dhe se nuk mund të interpretohet si e tillë. 

    Kjo për shkak se, sipas ministrit, për angazhimin e FSK-së në veri ekziston një dokument në fuqi i dhënë si zotim nga ish-kryeministri Hashim Thaçi në prilll të vitit 2013 dërguar Sekretarit të Përgjithshëm të NATO-s, nga i cili thotë se derivojnë dhe kushtet e operimit e të koordinimit të FSK-së dhe KFOR-it për pjesën veriore të Kosovës. 

    “E ritheksoj, ashtu siç e kam thënë në çdo paraqitje timen publike, që personalisht nuk pajtohem me atë zotim, pasi vazhdoj të mendoj se ka qenë zotim i gabuar dhe i dëmshëm për ushtrinë tonë, si dhe me pasoja afatgjata. Mirëpo ashtu siç e kemi deklaruar si Ministri e Mbrojtjes dhe si Qeveri e Kosovës, letrën zotuese të vitit 2013 do ta respektojmë, sepse jemi të përgjegjshëm karshi obligimeve të trashëguara institucionale për aq kohë sa janë në fuqi”- ka shkruar Maqedonci sot, më 22.01.2025.

    Tutje, ministri i Mbrotjes ka thënë se është përgjegjësi e tij dhe e komandantit të KFOR-it tani kur thotë se ekziston zotimi i vitit 2013 i dhënë nga ish-kryeministri Thaçi, është që të sigurojnë njëri-tjetrin që do të bëjnë veprimet e nevojshme për të garantuar që angazhimi ushtarak në veri të bëhet në mënyrë të koordinuar.

  • Ministri i Mbrojtjes, Ejup Maqedonci, dhe komandanti i FSK-së, Bashkim Jashari, vizituan fabrikën e helikopterëve në SHBA

    Në përmbyllje të vizitës zyrtare në Shtetet e Bashkuara, ministri i Mbrojtjes i Kosovës, Ejup Maqedonci, dhe komandanti i FSK-së, gjeneral Bashkim Jashari, kanë vizituar fabrikën e helikopterëve.

    Ministria e Mbrojtes njofton se ata kanë vizituar fabrikën “Sikorsky – Lockheed Martin”, ku prodhohen helikopterë të ndryshëm, ndër të cilët edhe helikopterët “Black Hawk”, që ushtria e Kosovës do t’i ketë në flotën e mbështetjes ajrore.

    “Ministri Maqedonci së bashku me Gjeneral Jasharin takuan menaxhmentin e kësaj kompanie, ku diskutuan për opsionet e përfshirjes së helikopterëve në inventarin e Forcës së Sigurisë së Kosovës”- thuhet në njoftimin e datës 15.01.2025. 

    Sot, Ministria e Mbrojtjes ka njoftuar se Forca e Sigurisë së Kosovës (FSK) ka marrë dritën e gjelbër nga Shtetet e Bashkuara të Amerikës për blerjen e helikopterëve, radarëve dhe mbrojtjes ajrore.

    Maqedonci dhe Jashari po qëndrojnë për vizitë zyrtare në SHBA nga data 13.01.2025. 

    Ministria e Mbrojtjes ka bërë të ditur se gjatë kësaj vizite Maqedonci ka zhvilluar takime të nivelit të lartë në Departamentin e Mbrojtjes, në Departamentin e Shtetit dhe në Senatin e SHBA-së. 

    https://kallxo.com/lajm/ministri-i-mbrotjes-dhe-komandanti-i-fsk-se-priten-nga-ndihmes-sekretari-i-mbrojtjes-per-nato-dhe-europe-ne-shba/

    https://kallxo.com/lajm/ministri-i-mbrojtjes-dhe-komandanti-i-fsk-se-udhetojne-per-ne-shba/

     

  • Ministri i Mbrojtjes dhe Komandanti i FSK-së priten nga Ndihmëssekretari i Mbrojtjes për NATO dhe Europë në SHBA 

    Ministri i Mbrojtjes, Ejup Maqedonci dhe Komandanti i FSK-së, Bashkim Jashari, bashkë me delegacionin përcjellës, janë pritur nga Ndihmëssekretari i Mbrojtjes për NATO dhe Europë, Alton Buland në Departamentin e Mbrojtjes së Shteteve të Bashkuara.

    Në njoftimin e Ministrisë së Mbrojtjes thuhet se ministri Maqedonci gjatë këtij takimi ka folur për sukseset e përbashkëta dhe për aktivitetet dypalëshe, Planin e tranzicionit dhe për realizimin e Marrëveshjes Kornizë ndërmjet vendeve tona në fushën e mbrojtjes.

    Ndërkaq, Jashari thuhet se ka folur për aktivitetet bilaterale ushatrake në mes të dy forcave, për planet për bashkëpunim me Gardën Kombëtare të Ajovës dhe për finalizmin e Planit 10-vjeçar të tranzicionit. 

    Ndërkaq, Buland tuhet se ka theksuar rëndësinë e partneritetit në mes të dy vendeve dhe se ka ofruar mbështetjen e Departamentit të Mbrojtjes për rrugëtimin përpara drejt përmbushjes së objektivave strategjike.

    “Të dy palët u pajtuan që bashkëpunimi në mes bilateral është në nivel të lartë dhe me hapa konkret për zhvillim të mëtutjeshëm në shërbim të garantimit të interesave të sigurisë të dy vendeve tona.” – thuhet në njoftim, më 14.01.2025.