Ballina

Etiketë: Donald Trump

  • Presidenca: Kasanof tha se asnjë nga veprimet e presidentit Trump tani për tani nuk afektojnë negativisht Kosovën

    Zëvendës Ndihmës Sekretari i Shtetit i SHBA-së, Alexander Kasanof, ka konfirmuar se asnjë nga veprimet e presidentit të sapozgjedhur amerikan, Donald Trump, nuk e afektojnë negativisht Kosovën. 

    Kështu kanë deklaruar për KALLXO.com nga Presidenca e Kosovës. 

    Këshilltari për media në Presidencë, Bekim Kupina, ka thënë se në takimin që shefja e stafit të presidentes Vjosa Osmani, Learta Hollaj, ka pasur me Kasanof në Uashington ka marrë një konfirmim të tillë nga vetë ai.

    “Shefja e stafit të Presidentes Osmani, Learta Hollaj është takuar dje në Washington D.C. me Alexander Kasanof, zëvendësndihmës sekretar i SHBA-së për Ballkanin Perëndimor nga i cili ka marrë konfirmimin se  asnjë nga vendimet e deritashme të Presidentit Trump, tani për tani, nuk e afektojnë negativisht Kosovën”- ka thënë Kupina për KALLXO.com të mërkurën më 22.01.2025. 

    Ndryshe, presidenti amerikan, Donald Trump, pasi mori mandatin, nënshkroi një urdhër ekzekutiv që pezulloi përkohësisht të gjitha programet e ndihmës ndërkombëtare të Shteteve të Bashkuara për 90 ditë, raporton Radio Evropa e Lirë.

    Dje, më 21.01.2025, shefja e stafit të presidentes, Learta Hollaj dhe këshilltarja për politikë të jashtme, Rejhan Vuniqi, janë takuar me Zëvendës Ndihmës Sekretarin e Shtetit të SHBA-së, Alexander Kasanof. 

    Presidenca njofton se gjatë takimit është diskutuar për zhvillimet e fundit në marrëdhëniet bilaterale, veçanërisht për dialogun strategjik Kosovë-SHBA, fushat që do të mbulohen nga ky dialog strategjik si dhe pritshmëritë nga ky proces.

    “Gjithashtu, duke qenë dita e parë e punës e administratës së re të udhëhequr nga Presidenti Trump, Presidenca konfirmoi përkushtimin e saj të plotë për thellimin e vazhdueshëm të marrëdhënieve dhe zgjerimin e bashkëpunimit, duke potencuar rëndësinë e ruajtjes dhe avancimit të sigurisë si dhe fuqizimit dhe afirmimit ndërkombëtar të Republikës së Kosovës”- thuhet në njoftimin e datës 22.01.2025. 

    Tutje, nga Presidenca kanë njoftuar  se Kasanof, gjatë takimit, ka theksuar rëndësinë e vazhdimit të procesit të dialogut Kosovë-Serbi, derisa nga Presidenca thuhet se është ritheksuar nevoja që dialogu të përqëndrohet në njohje reciproke. 

    https://kallxo.com/lajm/delegacioni-i-presidences-se-kosoves-u-takua-me-zevendes-ndihmes-sekretarin-e-shtetit-alexander-kasanof/

     

  • Delegacioni presidencial i Kosovës në inaugurimin e Trumpit thekson rëndësinë e bashkëpunimit me SHBA-në

    Presidenca e Kosovës ka njoftuar se delegacioni i saj ka marrë pjesë në aktivitetet e organizuara me rastin e inaugurimit të presidentit amerikan, Donald Trump.

    Siç thuhet nga Presidenca, ky delegacion ka marrë pjesë në “Ceremoninë e Betimit të Presidentit Trump në Capitol Hill, tubimin e mbajtur para Ceremonisë së Betimit në Capital One Arena, Ballon e Komandantit Suprem, Ballon Presidenciale ‘The Liberty Ball’, Ballon ‘Black Tie and Boots’ të organizuar nga Texas State Society, Midwest Galla, pritjen e organizuar nga Dr. Miriam Adelson, Tilman Fertitta, Sylvie Legere & Todd Ricketts e Mark Zuckerberg, si dhe në Shërbesën e Lutjeve Kombëtare në Washington National Cathedral”.

    Në komunikatën e Presidencës thuhet se delegacioni është takuar me disa zyrtarë të lartë, senatorë, kongresistë, njerëz të biznesit dhe nga sfera të tjera.

    Gjatë takimeve me zyrtarë amerikanë thuhet se u theksua edhe rëndësia e vizitave të ndërsjella dhe rëndësia e bashkëpunimit për ruajtjen e sigurisë në rajon.

    “Gjatë këtyre aktiviteteve, ata kanë pasur mundësinë të bisedojnë me: kryetarin e Dhomës së Përfaqësuesve në Kongresin amerikan, Mike Johnson; të nominuarin e presidentit Trump për Drejtor të CIA-s, John Ratcliffe; kongresistin dhe kryesuesin e Nënkomitetit për Evropë në Komitetin për Politika të Jashtme të Dhomës së Përfaqësuesve të SHBA-ve, Keith Self; kongresistin, Chip Roy; kongresistin, Ronny Jackson; senatorin, John Cornyn, kongresistin, Ted Cruz; guvernatorin e Teksasit, Greg Abbott; guvernatoren e Ioëa, Kim Reynolds; ambasodorin e nominuar të presidentit Trump në NATO, Matt Ëhitaker; zëvendësguvernatorin e Teksasit, Dan Patrick; prokurorin e Përgjithshëm të Teksasit, Ken Paxton; ish-sekretarin e Përgjithshëm të NATO-s, Jens Stoltenberg; senatoren e Teksasit, Angela Paxton; këshilltarin lokal, Gino Mulliqi dhe ish-kongresistin Jack Fields. Si dhe, përfaqësues të shumtë të mërgatës.” – thuhet në komunikatën e Presidencës.

    Tutje, thuhet se në takime u përcollen urimet e presidentes Vjosa Osmani për presidentin Trump dhe u konfirmua angazhimi i Kosovës për avancimin e raporteve bilaterale.

    Delegacioni i Presidencës që mori pjesë në këto aktivitete përbëhej nga ambasadori i Kosovës në SHBA, Ilir Dugolli; shefja e Stafit të Presidentes, Learta Hollaj dhe këshilltarja për Politikë të Jashtme, Rejhan Vuniqi.

    Presidentja e Kosovës, Vjosa Osmani nuk ka marrë pjesë në Ceremoninë e Inaugurimit të presidentit amerikan, Donald Trump më 20.01.2025.

    Bekim Kupina, këshilltar për media i presidentes Osmani, kishte thënë për KALLXO.com që Osmani ka marrë ftesë nga anëtarë të Kongresit të Shteteve të Bashkuara (Senati dhe Dhoma e Përfaqësuesve).

    Mirëpo, Kupina më 18.01.2025 pati deklaruar se duke u bazuar në traditën protokolare, shumica e vendeve përfaqësohen në këto Ceremoni nga ambasadorët e tyre të akredituar në Washington D.C, kështu që ka deleguar një delegacion nga Presidenca.

    “Duke e vlerësuar këtë ngjarje si një moment të rëndësishëm në marrëdhëniet në mes Kosovës dhe SHBA-ve, Presidentja ka vendosur ta dërgojë një delegacion të Kabinetit të saj, i cili së bashku me ambasadorin në SHBA, Ilir Dugolli do ta përfaqësojnë Kosovën në aktivitetet inauguruese të datave 19-21 janar.” – tha Kupina, më 18.01.2025.

    https://kallxo.com/lajm/mori-ftese-nga-tre-kongresmene-por-nuk-do-te-shkoje-osmani-dergon-delegacion-ne-inaugurimin-e-trumpit/

  • Presidentja Osmani uron Sekretarin amerikan të Shtetit: Kosova mezi pret të punojë me ju

    Presidentja e Kosovës, Vjosa Osmani ka uruar Sekretarin e ri të Shteteve të Bashkuara të Amerikës (SHBA), Marco Rubio për marrjen e detyrës.

    Në “X” Osmani ka shkruar se Kosova mezi pret të punojë me Rubion, për të forcuar aleancën në mes dy shteteve e për të adresuar sfidat.

    “Kosova mezi pret të punojë me ju për të forcuar aleancën tonë të qëndrueshme, për të promovuar vlerat tona të përbashkëta dhe për të adresuar sfidat e kohës sonë së bashku. Në emër të popullit të Kosovës ju uroj suksese në këtë rol të rëndësishëm.” – ka shkruar presidentja Osmani, më 21.01.2025.

    Marco Rubion si Sekretar i Shtetit do të jetë Shefi i parë hispanik i diplomacisë amerikane.

    Mediat amerikane kanë raportuar gjatë ditëve të kaluara, se me këtë vendim Trump synon ndër të tjera ta ruajë votën hispanike, që sipas sondazheve ishte fort e rëndësishme në shtatë shtetet amerikane të fushëbetejës zgjedhore, që përcaktuan fitoren e tij kundrejt demokrates Kamala Harris.

    Rubio, i cili është i informuar me rrjedhat politike në Europë – përfshirë Ukrainën dhe Ballkanin – ishte përfshirë edhe në zhvillimet politike të Kosovës në raport me fqinjët dhe botën edhe gjatë Presidencës së parë të Trumpit, kur diskutohej mundësia e shkëmbimit të territoreve ndërmjet Kosovës dhe Serbisë.

    https://kallxo.com/lajm/donald-trump-e-konfirmon-marco-rubion-per-sekretar-shteti/

  • Rubio zgjidhet unanimisht Sekretar amerikan i Shtetit

    Senati Amerikan e ka miratuar unanimisht Marco Rubion si Sekretar të Shtetit – duke e vendosur senatorin në vijën e parë të diplomacisë së presidentit të ri, Donald Trump.

    Rubio, i cili është hispaniku i parë dhe folësi i parë i rrjedhshëm i gjuhës spanjolle që merr detyrën e Kryediplomatit amerikan, është Kandidati i parë i Kabinetit të Trump që u konfirmua nga Senati i drejtuar nga Republikanët – vetëm disa orë pas inaugurimit.

    Presidentja e Kosovës, Vjosa Osmani i uroi Rubios suksese pas emërimit të tij në postin e Sekretarit të Shtetit, në atë që Osmani e quajti rol të rëndësishëm.

    “Kosova mezi pret të punojë me ju për të forcuar aleancën tonë të qëndrueshme, për të promovuar vlerat tona të përbashkëta dhe për të adresuar sfidat e kohës sonë së bashku.” – shkroi Osmani në X.

    Përgjatë karrierës, Rubio e ka pasur disa herë në fokus rajonin e Ballkanit. Në vitin 2022, ai iu bashkua një grupi senatorësh, i cili i dërgoi letër presidentit të atëhershëm amerikan, Joe Biden, për ta inkurajuar që ta mbajë Ballkanin në vëmendjen e tij.

    “Ballkani është një zonë e cenueshme e Evropës dhe megjithëse Ukraina duhet ta ketë vëmendjen tonë të menjëhershme, ne nuk mund ta humbasim nga sytë këtë rajon, ku NATO-ja, prej kohësh, ka luajtur një rol të rëndësishëm në ruajtjen e paqes.” – u tha në atë letër.

    Rubio u konfirmua në këtë post me 99 vota pro dhe asnjë kundër, me disa senatorë nga Partia Demokratike rivale që e përshkruan Rubion si një mik. Një vend në Senat kishte mbetur bosh pas inaugurimit të nënpresidentit, J.D. Vance.

    “Duke marrë parasysh pasigurinë në mbarë botën tani, është në interes të Amerikës të mos humbasë kohë.” – tha senatorja Jeanne Shaheen, demokratja kryesore në Komitetin e Marrëdhënieve me Jashtë të Senatit.

    “Ndërsa mund të mos biem gjithmonë dakord, unë besoj se ai ka aftësitë, njohuritë dhe kualifikimet për të qenë Sekretar i Shtetit.” – tha ajo në Sallën e Senatit.

    Shaheen dhe kryetari republikan i komitetit, Jim Risch ranë dakord ta përshpejtojnë emërimin e Rubios, i cili u miratua nga Paneli – vetëm një orë para se të kalonte në Sallën e Senatit.

    “Nuk është sekret që fuqitë armiqësore nga Kina te Rusia, nga Koreja e Veriut te Irani, kanë formuar një bosht autoritar që synon të dobësojë Shtetet e Bashkuara.” – tha Risch.

    “Na duhet një Kryediplomat parimor dhe i përqendruar te veprimi si Marco Rubio, për t’i përballuar ata”.

    Rubio do të ketë menjëherë detyrën për të zbatuar politikën e jashtme potencialisht të paparashikueshme të Trumpit, i cili në një fjalim inaugurues të hënën përsëriti kërcënimet për të marrë Kanalin e Panamasë, por gjithashtu premtoi të ishte një “paqebërës”.

    Trump sfidoi dy Sekretarët e Shtetit gjatë mandatit të tij të parë, me një politikë të jashtme që ndryshonte shpejt – duke kaluar në një rast nga kërcënimi për shkatërrimin e Koresë së Veriut në deklaratën se ai “ra në dashuri” me liderin autoritar Kim Jong Un.

    Rubio, djali i një familjeje punëtore kubane që kundërshtoi ashpër Revolucionin komunist të Fidel Castros, është i njohur për qëndrimin e tij të ashpër ndaj shteteve autoritare të Amerikës Latine dhe Kinës.

    Në seancën e tij të konfirmimit javën e kaluar, Rubio akuzoi Kinën për mashtrim në rrugën e saj drejt statusit të superfuqisë dhe e quajti gjigantin aziatik “kundërshtari më i fuqishëm dhe më i rrezikshëm që ky komb ka hasur ndonjëherë”.

    Disa nga të nominuarit e Trumpit nuk kanë pasur ende seanca konfirmimi, për shkak të historikut të tyre të diskutueshëm – përfshirë Tulsi Gabbardin për postin e shefes së inteligjencës, Robert F. Kennedy Jr. për Sekretar të Shëndetësisë dhe Shërbimeve humane dhe Kash Patel për FBI-në./REL

  • Trumpi zotohet ta shpëtojë Amerikën nga “rënia”, paralajmëron mësymje ndaj emigrantëve

    Donald Trump i trimëruar ka deklaruar me të bërë betimin se “rënia e Amerikës ka marrë fund”, duke premtuar goditje ndaj emigracionit të paligjshëm dhe duke e portretizuar veten si shpëtimtar të zgjedhur nga Zoti për të shpëtuar kombin e lëkundur amerikan, raporton agjencia e lajmeve Reuters.

    “Për qytetarët amerikanë, 20 janari 2025 është Dita e Çlirimit”, ka deklaruar Trump, 78-vjeç, brenda Rotondës së Kapitolit amerikan, simboli i demokracisë amerikane që u pushtua më 6 janar 2021 nga një turmë e mbështetësve të Trumpit pas humbjes së tij në zgjedhjet e vitit 2020 përballë demokratit Joe Biden.

    Inaugurimi kulmoi me kthimin triumfues të një përçarësi politik, i cili u fajësua dy herë, u mbijetoi dy tentativave për vrasje, u dënua në një gjyq penal dhe u përball me akuza për përpjekje për të përmbysur humbjen e tij në zgjedhjet e vitit 2020.

    Ai është presidenti i parë qe më shumë se një shekull që fiton një mandat të dytë pas humbjes së presidencës së Shtëpisë së Bardhë dhe i gjykuari i parë me fajtor që merr timonin e Shtëpisë së Bardhë.

    “Më shpëtoi Zoti për t’ia kthyer Amerikës madhështinë”

    “Unë u shpëtova nga Zoti për t’ia kthyer Amerikës madhështinë” – ka deklaruar Trumpi të hënën, duke iu referuar plumbit të atentatorit që ia gërvishti veshin në korrik 2024.

    Trumpi ka përshkruar një seri urdhrash gjithëpërfshirës ekzekutivë që ai planifikon të nënshkruajë menjëherë që të frenojë emigracionin, për të rritur prodhimin e karburanteve fosile dhe për të rikthyer rregulloret mjedisore, hapat e parë në miratimin e një agjende me ndikim të gjerë që do të riformësonte qeverinë ndërsa teston kufijtë e autoritetit presidencial.

    Ai ka theksuar se do të shpallë emergjencë kombëtare në kufirin jugor me Meksikën, do të dërgojë trupa atje dhe do të rikthejë një politikë që i detyron emigrantët azilkërkues të presin në Meksikë për seancat e tyre gjyqësore në SHBA – e gjithë kjo si një prelud i asaj që e përshkroi si një operacion të paprecedentë për të dëbuar miliona emigrantë.

    “Të gjitha hyrjet e paligjshme do të ndalen menjëherë dhe ne do të fillojmë procesin e kthimit të miliona e miliona të huajve kriminelë në vendet nga kanë ardhur” – ka deklaruar ai, ndërsa kolegët republikanë duartrokitën dhe demokratëve u ndryshoi çehrja.

    Menjëherë pas inaugurimit, autoritetet kufitare amerikane njoftuan se i dhanë fund një programi të Bidenit që lejonte qindra mijëra emigrantë të hynin legalisht në SHBA duke caktuar një seancë gjyqësore.

    Zbutja e fjalëve

    Fjalimi gjysmë ore u bëri jehonë disa temave që i rrahu në inaugurimin e tij të parë më 2017, kur foli për “kërdinë amerikane” që ai tha se kishte shkatërruar vendin.

    Ndërsa Trump u përpoq ta portretizonte veten si paqebërës dhe unifikues, fjalimi i tij shpesh ishte ashpërsisht partizan, shkruan Reuters. Ai përsëriti pretendimet e rreme nga fushata e tij se vendet e tjera po zbrazin burgjet e tyre në Amerikë dhe shprehu ankesa të njohura dhe të pabaza për hetimet penale ndaj tij.

    Me Bidenin të ulur aty pranë, duke shprehur një buzëqeshje të lehtë, Trump pati ​​akuza për politikat e paraardhësit të tij nga emigracioni deri te punët e jashtme.

    “Ne kemi një qeveri që ka dhënë fonde të pakufizuara për mbrojtjen e kufijve të huaj, por refuzon të mbrojë kufijtë amerikanë, ose më e rëndësishmja, njerëzit e saj” – ka deklaruar Trump.

    Drejtues të shumtë të teknologjisë që kanë kërkuar të fitojnë favore me administratën e ardhshme – duke përfshirë tre njerëzit më të pasur në botë, shefi ekzekutiv i Teslas dhe SpaceX, Elon Musk, ai i Amazon, Jeff Bezos dhe i Meta-s, Mark Zuckerberg – kishin vende të spikatura në skenë, pranë kandidatëve të kabinetit qeveritar dhe anëtarëve të familjes së Trumpit.

    Trump ka thënë se do të dërgonte astronautë në Mars, duke bërë që Musk – i cili ka folur prej kohësh për kolonizimin e planetit – të ngrejë grushtet me emocione në skenë.

    Donald Trump u zotua të ndryshojë emrin e Gjirit të Meksikës në Gjirin e Amerikës dhe përsëriti synimin e tij për të rimarrë kontrollin e Kanalit të Panamasë, një nga disa deklarata të politikës së jashtme që kanë shkaktuar shqetësim mes aleatëve të SHBA-së.

    Trump nuk do të vendosë menjëherë tarifa të reja ndaj Kanadasë, Kinës dhe Meksikës, siç është zotuar të bëjë, ka theksuar një zyrtar i Trumpit, shkruan Reuters. Disa nga urdhrat ekzekutivë ka të ngjarë të përballen me sfida ligjore./Reuters

    Përgatiti: Rexhep Maloku / Kallxo.com