Ballina

Etiketë: dialogu kosovë- serbi

  • NATO e gatshme të punojë me Sorensenin si ndërmjetësues në dialogun Kosovë-Serbi

    NATO-ja ka shprehur gatishmëri për të punuar ngushtë me Peter Sorensenin kur të nisë zyrtarisht punën si i dërguar i Bashkimit Evropian për dialogun mes Kosovës dhe Serbisë.

    Pozita e tij është konfirmuar një ditë më parë, dhe ai do të nisë punën më 1 shkurt.

    “Vazhdimi i bashkëpunimit mes NATO-s dhe BE-së është kyç për ruajtjen e stabilitetit në rajonin e Ballkanit Perëndimor”, ka thënë zëdhënësja e NATO-s, Allison Hart përmes një postimi në X – platformë e njohur më parë si Twitter.

    Më herët gjatë ditës, i dërguari në shkuarje i BE-së për dialogun, Mirosllav Lajçak, ka thënë se është takuar me pasardhësin e tij, dhe janë duke u siguruar që transicioni të ndodhë sa më lehtë që është e mundur.

    Lajçak ka qenë në pozitën e ndërmjetësuesit për pesë vjet. Përgjatë mandatit të tij është arritur Marrëveshja për normalizimin e marrëdhënieve mes dy vendeve, por nuk është bërë asnjë hap drejt zbatimit të saj.

    Po të martën, emërimin e Sorensenit në pozitën e ndërmjetësuesit, e ka përshëndetuar edhe zëvendëskryeministri i Kosovës, Besnik Bislimi, njëherësh kryenegociator i Kosovës në dialogun me Serbinë.

    Ai ka thënë se pret qasje balancuese ndaj palëve, si parakusht për proces të suksesshëm drejt normalizimit të marrëdhënieve.

    Sorensen ka përvojë të gjatë diplomatike në strukturat e BE-së. Ai aktualisht është Këshilltar i lartë në Shërbimin e Veprimit të jashtëm të BE-së (EEAS) për diplomaci digjitale.

    Gjatë karrierës së tij diplomatike në BE, Sorensen ka ushtruar disa detyra në Ballkanin Perëndimor, përfshirë Kosovën, ku ka punuar në misionin e Kombeve të Bashkuara në Kosovë (UNMIK).

    Përvoja e tij nga rajoni thuhet se ka qenë edhe një prej argumenteve se pse kryediplomatja Kaja Kallas ka vendosur që ai të jetë pasardhësi i Lajçakut.

    Në të kaluarën, liderë të Kosovës, nisur nga presidentja e vendit, Vjosa Osmani e deri të kryeministri Albin Kurti, e kanë kritikuar Lajçakun për qasje të pabalancuar në dialog dhe për rreshtim me raste kah Serbia.

    Vetë Lajçak pati thënë në një intervistë për Radion Evropa e Lirë, muaj më parë, se pretendime të tilla nuk qëndrojnë dhe pati vlerësuar se shoqëritë në Kosovë dhe Serbi, nuk janë të gatshme për normalizim.

    Kosova dhe Serbia dialogojnë në Bruksel qysh prej vitit 2011.

    Palët kanë arritur një mori marrëveshjesh, por jo të gjitha janë zbatuar.

    Bashkimi Evropian u rikujton dy palëve shpesh se avancimi në procesin e dialogut është i lidhur me rrugën e tyre në integrimet euro-atlantike.

    Serbia gëzon statusin e vendit kandidat për anëtarësim në bllokun evropian dhe tashmë ka hapur disa kapituj për anëtarësim, ndërsa Kosova ka aplikuar për t’u bërë anëtare e BE-së, por aplikimi i saj nuk është shqyrtuar ende.

    Kosova është e vetmja në rajonin e Ballkanit Perëndimor që nuk ka status të vendit kandidat, ndonëse zyrtarë të lartë të BE-së thonë vazhdimisht se ardhmja e rajonit të Ballkanit është në bllok./REL

  • Abazi (AAK): Kosova duhet t’i përmbush obligimet nga dialogu në Bruksel

    Kandidati për deputet nga Koalicioni AAK-Nisma, Haki Abazi, në kuadër të prezantimit të programit për politikën e jashtme, në emisionin “Debat Përnime”, ka folur për çështjen e dialogut Kosovë-Serbi.

    Lidhur me këtë proces, sipas tij, qëndrimi i koalicionit AAK-Nisma, është përmbushja e të gjitha obligimeve për të cilat është dakorduar pala kosovare me ndërmjetësimin e BE-së dhe SHBA-së.

    “Krejt obligimet që Kosova i ka marrë duhet t’i zbatoj, sepse janë dakordime trepalëshe. Kur them trepalëshe, është Kosova, Bashkimi Europian dhe SHBA. Këto janë zotime që Kurti i ka bërë në Bruksel dhe në Ohër para BE-së dhe SHBA-së”- ka thënë Abazi, më 27.01.2025.

    Në këtë kontekst, ai tha se marrëveshja për Asociacionin e Komunave me Shumicë Serbe, duhet sa më shpejtë të dërgohet në Gjykatën Kushtetuese për shqyrtim, me qëllim që t’i hapen Kosovës rrugët për anëtarësime dhe për çështje të tjera.

    “Nëse këto zotime janë ndërkombëtare, çfarë edhe janë, duhet t’i bëjmë me sa më pak dhimbje për Kosovën dhe duke i besuar plotësisht Gjykatës Kushtetuese të Kosovës, përfshirë edhe statutin e Asociacionit, i cili me shpejtësi duhet të dërgohet në Gjykatën Kushtetuese për shqyrtim, për t’ia hequr ‘lakun edhe kurthin’ Kosovës dhe për t’ia hapur rrugët e negociatave me katër vendet e NATO-s që nuk e kanë njohur Kosovën”- tha ai.

    Ndërsa, kandidati tjetër për deputet, Fatmir Matoshi tha se politika e jashtme është e lidhur edhe me dialogun me Serbinë, mirëpo qasja e Qeverisë Kurti ndaj dialogut, sipas tij, e ka sjellë Kosovën në një situatë jo të mirë.

    “Tallja me dialogun edhe përdorja e dialogut për poena politik e popullizëm, normalisht që e ka sjellë Kosovën në këtë situatë. LVV-ja për këto katër vite, dialogun e ka përdor me ba foto …, e ka përdor për popullizëm në seancat e Këshillit të Sigurimit t’u fol me gjuhën që e rritë Vuçiqin në Serbi, ndërsa ai t’u ia kthy me po të njëjtën gjuhë për me e rritë me popullizëm Kurtin në Kosovë”- tha Matoshi.

    Për të ilustruar “gjendjen jo të mirë në politikën e jashtme”, ai e ka përmendur rastin e ambasadorit Martin Berishaj, të cilin presidentja Vjosa Osmani, në vizitën e saj në Kroaci nuk ka pranuar ta këtë në shoqërim.

    Mirëpo, sipas kandidatit Matoshi, këtë gjendje e kanë krijuar vetë presidentja dhe Qeveria.

    “Partia në pushtet edhe presidentja e kanë ndërtuar vetë këtë lloj diplomacie dhe në mungesë të politikës së jashtme vendosin agjentë tregtarë të energjisë elektrike nëpër pozita të ambasadorëve”- tha Matoshi.

    Kur u pyetën se a do të shkarkohet ambasadori Berisha nëse AAK-Nisma vijnë në pushtet, Haki Abazi u përgjigj se “AAK nuk e ndjekë askënd politikisht për veprimet jolegale që ka bërë”. “Ne inkurajojmë prokurorin ta përfundoj këtë tregim sa vjeçar se çfarë ka ndodhur me atë transfer financiar, a ka qenë apo s’ka qenë ky emër i përfshirë në tregtinë e energjisë me Serbinë”, tha ai.

    “DebatPërnime” është format i cili do të transmetohet për një muaj rresht deri një ditë para Zgjedhjeve parlamentare të 09 shkurtit 2025. Kandidatët për deputetë nga partitë politike garuese përveç që prezantojnë Programin e tyre, përballen me pyetjet e Jeta Xharrës, kryeredaktorit të KALLXO.com, Kreshnik Gashi dhe Visar Prebrezës nga “Krypometër”.

    Lëvizja Vetëvendosje (LVV) ka zgjedhur që gjatë fushatës për Zgjedhjet e 9 shkurtit të mos marrë pjesë në disa nga mediat në Kosovë. Kjo parti e ka arsyetuar mospjesëmarrjen në emisionet politike të shfaqura në mediume të caktuara, me pretendimin se gjoja ato media janë në pronësi të oligarkëve.

    RTV Dukagjini është në listën e këtyre mediave të “piketuara” nga LVV, e pikërisht në këtë televizion transmetohet emisioni “Debat Përnime” – prodhim i KALLXO.com.

    Mirëpo, për dallim nga partia në pushtet, partitë e tjera opozitare kanë pranuar të marrin pjesë në këtë Debat dhe t’u përgjigjen pyetjeve të gazetarëve të Kallxo-it.

    Jeta Xharra, drejtuese e “Debat Përnime” tha në nisje të debatit se “Donika Gërvalla si ministre e Punëve të Jashtme, Glauk Konjufca si Kryetar i Kuvendit, Vjosa Osmani si Kryetare, deri tani edhe komplet Qeveria Kurti2, me gjithë respektin ndaj tyre, janë udhëheqësia e parë pas shpalljes së Pavarësisë që po e përfundon mandatin e plotë pa asnjë njohje të vetme”.

    Për më shumë lexoni në tekstin në vijim:

    https://kallxo.com/gjate/angazhim-te-emisareve-speciale-per-njohje-dhe-dergim-te-draftit-te-asociacionit-ne-kushtetuese-plani-i-koalicionit-aak-nisma-per-politiken-e-jashtme/

     

  • Sorensen konfirmohet përfundimisht emisar për Dialogun Kosovë-Serbi

    Peter Sorensen ka marrë pëlqimin përfundimtar nga Ministrat e Jashtëm të Bashkimit Evropian për postin e Përfaqësuesit të Posaçëm të Bllokut për Dialogun për normalizim të raporteve mes Kosovës dhe Serbisë – raporton Radio Evropa e Lirë.

    Paraprakisht, më 24 janar ambasadorët e BE-së kishin konfirmuar Sorensenin në këtë post.

    Politikani nga Danimarka u zgjodh nga Përfaqësuesja e lartë e BE-së për Politikë të Jashtme dhe Siguri, Kaja Kallas për ta zëvendësuar Mirosllav Lajçakun në këtë post.

    Pasi ka marrë pëlqimin nga ambasadorët dhe kryediplomatët, Sorensen do të nisë mandatin më 1 shkurt.

    Emisarit aktual Lajçak i skadon mandati më 31 janar.

    Para nisjes së takimit në Bruksel të kryediplomatëve, ku Sorensen u konfirmua, ministrja e Jashtme e Sllovenisë Tanja Fajon tha se me zgjedhjen si emisar të diplomatit nga Danimarka po dërgohet mesazhi se Dialogu mes Kosovës dhe Serbisë mbetet lart në agjendën e bllokut evropian.

    Kush është Sorensen?

    Sorensen ka përvojë të gjatë diplomatike në strukturat e BE-së. Ai është aktualisht Këshilltar i lartë në Shërbimin e Veprimit të Jashtëm të BE-së (EEAS) për diplomaci digjitale.

    Gjatë karrierës së tij diplomatike në BE, Sorensen ka ushtruar disa detyra në Ballkanin Perëndimor. Ka shërbyer si Përfaqësues i Posaçëm i BE-së për Bosnjë e Hercegovinë dhe Shef i Zyrës së BE-së në Sarajevë. Po ashtu ka qenë edhe Shef i delegacionit të bllokut evropian në Shkup.

    Më herët Sorensen ka punuar si këshilltar edhe në Kosovë në misionin e Kombeve të Bashkuara në Kosovë (UNMIK), ndërsa ka qenë edhe Përfaqësues i Posaçëm i Përfaqësuesit të lartë të BE-së në Serbi.

    Në Ballkan, ai ka punuar edhe në misionin e Organizatës për Siguri dhe Bashkëpunim në Evropë (OSBE) në Kroaci.

    Përvoja e tij nga rajoni thuhet se ka qenë edhe një prej argumenteve se pse Kaja Kallas ka vendosur që ai të jetë pasardhësi i Lajçakut.

    Për postin e lehtësuesit të Dialogut garoi edhe emri i ish-ministrit të Jashtëm të Finlandës, Pekka Haavisto, i cili po ashtu ka njohuri për zhvillimet në Ballkanin Perëndimor.

    Për këto rol ishte përmendur edhe emri i ish-presidentit dhe ish-kryeministrit të Sllovenisë, Borut Pahor. Vitin e kaluar, ai pranoi se ishte i interesuar për këtë post. Por, gjatë janarit të këtij viti tha se nuk do të garonte për këtë post, pasi ka kuptuar se kërkohet më shumë një nivel diplomatik sesa politik.

    Ndryshe, gjatë mandatit gati pesëvjeçar të Lajçakut, Kosova dhe Serbia kanë arritur Marrëveshjen në rrugën drejt normalizimit të raporteve.

    Marrëveshja, e cila nuk është nënshkruar, është ligjërisht e obligueshme për palët – ka thënë blloku. BE-ja ka akuzuar Kosovën dhe Serbinë për mosnisjen e zbatimit të paktit – duke thënë se kjo do të ndikojë në rrugëtimin e dy shteteve drejt integrimeve evropiane.

    Dialogu për normalizimin e raporteve ndërmjet Kosovës dhe Serbisë, që ndërmjetësohet nga Bashkimi Evropian, ka nisur më 2011. Gjatë procesit janë arritur disa Marrëveshje, por pak prej tyre janë zbatuar në terren./REL/

     

    https://kallxo.com/lajm/peter-sorensen-pritet-te-jete-pasardhesi-i-lajcakut-per-dialogun-kosove-serbi/

  • Delegacioni i Presidencës së Kosovës u takua me Zëvendës Ndihmës Sekretarin e Shtetit, Alexander Kasanof

    Delegacioni i Presidencës së Kosovës është takuar me Zëvendës Ndihmës Sekretarin e Shtetit të SHBA-së, Alexander Kasanof. 

    Kështu ka bërë të ditur Presidenca përmes një njoftimi, ku thuhet se më 21.01.2025, gjatë vizitës në Washington, shefja e stafit të Presidentes, Learta Hollaj dhe këshilltarja për politikë të jashtme, Rejhan Vuniqi, janë takuar me Kasanof. 

    Presidenca njofton se gjatë takimit është diskutuar për zhvillimet e fundit në marrëdhëniet bilaterale, veçanërisht për dialogun strategjik Kosovë-SHBA, fushat që do të mbulohen nga ky dialog strategjik si dhe pritshmëritë nga ky proces.

    “Gjithashtu, duke qenë dita e parë e punës e administratës së re të udhëhequr nga Presidenti Trump, Presidenca konfirmoi përkushtimin e saj të plotë për thellimin e vazhdueshëm të marrëdhënieve dhe zgjerimin e bashkëpunimit, duke potencuar rëndësinë e ruajtjes dhe avancimit të sigurisë si dhe fuqizimit dhe afirmimit ndërkombëtar të Republikës së Kosovës”- thuhet në njoftimin e datës 22.01.2025. 

    Tutje, nga Presidenca njoftojnë se Kasanof, gjatë takimit, ka theksuar rëndësinë e vazhdimit të procesit të dialogut Kosovë-Serbi, derisa nga Presidenca thuhet se është ritheksuar nevoja që dialogu të përqëndrohet në njohje reciproke. 

  • Takimi i fundit si emisar i BE-së – Lajçak bisedon me Vuçiqin për Dialogun

    I dërguari special i Bashkimit Europian për Dialogun Kosovë-Serbi, Mirosllav Lajçak ka njoftuar se është takuar me presidentin serb, Aleksandër Vuçiq, si takim i fundit në pozitën aktuale të Lajçakut si emisar.

    Takimi i tyre ka ndodhur në Davos të Zvicrës, ku po mbahet Forumi Ekonomik Botëror.

    Lajçak thotë se me Vuçiqin kanë folur për gjendjen e Dialogut.

    “Në takimin tonë të fundit të pozitës sime aktuale, presidenti Vuçiq dhe unë folëm për situatën në Dialog. Theksova se Marrëveshja e Ohrit e vitit 2023 hapi rrugën përpara drejt normalizimit. Progresi i mëtutjeshëm është në interes të Serbisë, Kosovës dhe të ardhmes së tyre BE.” – shkroi Lajçak në platformën X.

    Lajçakut i skadon mandati si emisar për Dialogun, më 31.01.2025.

    Në media është raportuar se përfaqësuesja e lartë e Bashkimit Evropian për politikë të jashtme dhe siguri, Kaja Kallas ka vendosur që diplomati nga Danimarka, Peter Sorensen të jetë përfaqësues i posaçëm për Dialogun mes Kosovës dhe Serbisë.