Policia e Kosovës ka njoftuar se dje me 04.01.2025 dyshohet se pas një mosmarrëveshje, një person në Prishtinë ka sulmuar fizikisht gruan e tij, ndërsa djali i saj ka sulmuar babain e tij, për ta mbrojtur nënën e tij.
Sipas Policisë, gruaja ka pranuar tretman mjekësor, ndërsa i dyshuari me vendim të prokurorit është dërguar në mbajtje.
Një 32-vjeçar është shoqëruar në polici për dhunë në familje në Ferizaj.
Sipas Policisë së Kosovës, i dyshuari është arrestuar pas raportimit për dhunë ndaj bashkëshortes së tij.
Raportimin organet e rendit e kanë marrë më 04.01.2025, në ora 10:50.
“Një patrullë e policisë menjëherë është nisur në atë drejtim dhe ka shoqëruar në polici të dyshuarin mashkull, kosovar, i moshës 32 vjeç, i cili kishte shkaktuar dhunë në familje ndaj bashkëshortës së tij”- njofton Policia më 04.01.2025.
Policia ka njoftuar se të dyshuarit i është sekuestruar një armë zjarri (pistoletë).
Ndërkaq, pasi është intervistuar nga hetuesit e Njësisë së Dhunës në Familje, me vendim të prokurorit kujdestar është liruar për procedurë të rregullt hetimore, thuhet në raportin policor.
Një grua është arrestuar në Prishtinë nën dyshimin se e njëjta ka ushtruar dhunë fizike ndaj nënës dhe motrës së saj.
Policia ka pranuar informacionin dhe më pas ka bërë edhe arrestimin e të dyshuarës më datë 03.01.2025.
Sipas raportit ditor, e dyshuara më pas është dërguar për tretman mjekësor në repartin e psikiatrisë.
Rasti është duke u hetuar edhe më tutje ndërsa është iniciuar si dhunë në familje.
Nën dyshimin se rrahu babain e tij, një djalë është arrestuar nga Policia, më 02.01.2025, në Viti.
Policia ka njoftuar se i dyshuari kishte ushtruar dhunë ndaj babait të tij, ndërsa pas marrjes së informacionit njësitet policore ishin drejtuar për në vendin e ngjarjes.
Përveç arrestimit të të dyshuarit, në shtëpinë e të njëjtit është kryer edhe një bastisje.
Gjatë bastisjes është gjetur dhe është konfiskuar një armë zjarri.
Për rastin është njoftuar edhe Prokurori kujdestar, derisa ky i fundit ka marrë vendim që pas intervistimit të të dyshuarit, i njëjti të dërgohet në mbajtje për 48 orë.
Rasti është duke vazhduar të trajtohet, ndërsa është iniciuar si “dhunë në familje” dhe “armëmbajtje pa leje”.
Babë e bir në Istog janë përballur me organet e rendit, më 02.01.2025, pasi të njëjtit po dyshohen se kryen vepra penale: atë “dhunë në familje” dhe “përdorim i armës apo mjetit të rrezikshëm”.
Policia ka njoftuar se është arrestuar një burrë, pasi i njëjti dyshohet se ka ushtruar dhunë fizike, si dhe e kishte kërcënuar me armë një grua, me të cilën bashkëjetonte prej disa ditësh.
Në anën tjetër, babai i të dyshuarit për “dhunë në familje” – sipas Policisë – dyshohet se në ndërrimin e motmoteve kishte gjuajtur me armë zjarri në ajër.
Pas marrjes së informacionit për “dhunë në familje” Policia kishte dalë në vendin e ngjarjes, ndërsa kishte konfiskuar edhe armën që dyshohet se ishte përdorur edhe në ndërrimin e motmoteve.
Në këtë rast nuk ka pasur ndonjë person të lënduar, ndërsa viktima e dhunës në familje, sipas Raportit të Policisë, me dëshirën e saj, pasi dyshohet se ishte rrahur nga partneri, është kthyer te familja e saj.
Për ngjarjen është njoftuar edhe Prokurori kujdestar. Ndaj babait të të dyshuarit për “dhunë në familje” është iniciuar rasti për “përdorim i armës” dhe i njëjti pas intervistimit është liruar në procedurë të rregullt.
Ndërsa, Policia ka njoftuar se ndaj djalit është iniciuar rasti për “dhunë në familje” dhe i njëjti pas intervistimit është dërguar në mbajtje për 48 orë.