Ballina

Etiketë: Artane Rizvanolli

  • KEK-u prezanton projektin 137 milionësh për rehabilitimin e Njësisë A3 – Kurti thotë se do të dyfishohet prodhimi në këtë Njësi

    Korporata Energjetike e Kosovës (KEK) sot, më 24.01.2025, ka prezantuar projektin për rehabilitimin dhe modernizimin e Njësisë A3 të Termocentralit “Kosova A”.

    Pas këtij projekti që pritet të kushtojë rreth 137 milionë euro, pritet që Njësia A3 të prodhojë më shumë dhe të ndotë më pak.

    Kryeministri Albin Kurti, i cili mori pjesë në prezantimin e projektit, tha se Kosova e ka të miratuar një Strategji që pëfshin trekëndëshin e sfidave, siç e quajti ai, që duhet baraspeshuar dilemën moderne në sektorin e Energjisë.

    “Në një kënd e kemi sigurinë e furnizimit, në një tjetër e kemi përballueshmërinë e kostos dhe të tretën e kemi uljen e ndotjes dhe energjinë e pastër.” – tha Kurti.

    “Projekti i rehabilitimit dhe modernizimit të A3-shit i shërben kësaj strategjie – duke e përthekuar çdo cep të dilemës energjetike. Ky investim synon që të rrisë kapacitetin e prodhimit dhe të përmirësojë efektshmërinë mjedisore të Njësisë A3, e cila aktualisht prodhon një pjesë të rëndësishme të energjisë elektrike në Kosovë”.

    Sipas Kurtit, pasi të përfundojë projekti, Njësisë A3 do t’i zgjatet jetëgjatësia për 20 vjet, si dhe do t’i shtohet kapaciteti i prodhimit nga rreth 140 megavat sa është aktualisht, në 215 megavat pasi të përfundojë.

    Ndërsa ministrja e Ekonomisë, Artane Rizvanolli tha se pas krizës së energjisë së vitit 2022 ishte nënshkruar Kontrata për modernizimin e turbinave të termocentralit “Kosova B”. Sipas saj, prishja e turbinave ishte shkaktari për importin e 50 milionë eurove në kohën e krizës.

    “Me realizimin e atij projekti jo vetëm që Kosova B do të jetë më i besueshëm, por edhe kapaciteti do të rritet për 35 megavatë. Vitet e ardhshme përderisa do të zbatohen këto projekte, do të jenë sfiduese për të gjithë, sepse një kohë do të jenë Termocentralet jashtë funksionit dhe do të duhet një punë e jashtëzakonshme.” – ka thënë ndër të tjera Rizvanolli.

    E ushtruesi i detyrës së kryeshefit të KEK-ut, Bekir Gërguri tha se qëllimi kryesor i investimit është përmirësimi i standardeve mjedisore.

    “Një nga qëllimet kryesore të këtij investimi është përmirësimi i standardeve mjedisore, ku pas përfundimit të modernizimit Njësia A3 do të operojë në përputhje me rregullat dhe direktivat e Bashkimit Evropian – duke kontribuuar në një sektor energjetik dhe ruajtjen e mjedisit.” – ka thënë Gërguri.

    Projekti planifikohet të finalizohet përafërsisht për 740 ditë kalendarike, nga nënshkrimi i Kontratës.

    Ndryshe, divizioni i Gjenerimit të Energjisë përbëhet nga Termocentralet “Kosova A”, “Kosova B” dhe Seperimet Kimike, që janë të vendosura në rrethinën e Obiliqit, që gjenden rreth 8 km larg Prishtinës, Kryeqytetit të Republikës së Kosovës.

    Termocentrali “Kosova A” përbëhet nga pesë Blloqe punuese të njohura si A1, A2, A3, A4 dhe A5. Blloku A1 i këtij Termocentrali është lëshuar në punë në vitin 1962, me fuqi prej 65MW; A2 në vitin 1965, me fuqi prej 125MW; A3 në vitin 1970, me fuqi 200MW; A4 në vitin 1971, me fuqi 200MW dhe A5 në vitin 1975 me fuqi prej 210MW. Blloqet A3, A4 dhe A5 janë funksional.
    Sipas planit aktual në prodhim përdoren dy Blloqe, kurse njëri prej tyre është rezervë “e nxehtë “ për shkak të gatishmërisë së tyre të ulët, që është pasojë e vjetërsisë së tyre. Blloqet A1 dhe A2 janë jashtë pune – pa status të definuar dhe sipas planeve aktuale ato do të mbesin kështu deri në fund, kur pritet të bëhet dekomisionimi i tyre së bashku me Njësitë tjera. Prodhimi vjetor i energjisë elektrike nga TC “Kosova A” është rreth 1500GWh.

  • Lëshimi i Nënstacionit të ri në Ferizaj – Rizvanolli premton se nuk do të ketë më reduktime të ashpra të energjisë elektrike

    Nënstacionit elektrik “Kastrioti” në Ferizaj i është prerë shiriti të enjten, më 23.01.2025.

    Ministrja e Ekonomisë, Artane Rizvanolli, gjatë përurimit të këtij Nënstacioni tha se tani do të marrin fund reduktimet e rrymës – jo vetëm në këtë qytet, por edhe në Komunat përreth.

    Reduktime në qytet dhe rrethinë ka pasur edhe pesëmbëdhjetë minuta para Ceremonisë së Inaugurimit të Nënstacionit 110/35/10(20) Ferizaj 3 – “Kastrioti”, që është zhvilluar sot në orën 13:00, afër Fabrikës së Tubave në Ferizaj.

    “Ky investim jo vetëm që do të mundësojë furnizim të sigurt dhe të besueshëm për më shumë se 12 mijë konsumatorë të Ferizajit, por gjithashtu do të mbështesë edhe një zhvillim të qëndrueshëm të zonës dhe do të krijojë mundësi të reja për rritjen e sektorëve të ndryshëm ekonomik.” – ka thënë Rizvanolli, duke theksuar më nuk do të ketë reduktime të ashpra të energjisë elektrike.

    Ferizaj ka më shumë se një muaj që po përballet me reduktime.

    KEDS-i fajësonte mungesën e infrastrukturës, si një prej arsyeve pse rrjeti nuk po përballonte përmbushjen e kërkesës së konsumatorëve.

    Reduktime ka pasur edhe mbrëmë, kur Ferizaj mbeti pa energji elektrike, prej orës 17 deri në orët e hershme të mëngjesit të sotëm.

    KEDS-i ka njoftuar se kjo ndërprerje ishte shkaktuar për shkak të punimeve, që po bëheshin në Nënstacionin Ferizaj 3.

    “Goxha kemi vuajt.” – i ka thënë kryetari i Ferizajit, Agim Aliu ministres Rizvanolli, ende pa filluar ceremonia për prerjen e shiritit.

    Ndryshe prej Rizvanollit dhe zyrtarëve të lartë të KOSTT-it, Aliut nuk i është dhënë fare fjala në ceremoninë e organizuar nga KOSTT-i, por Aliut iu dhanë një palë gërshërë për t’iu bashkuar prerjes së shiritit me mbishkrimin e KOSTT-it.

    Zyrtarët e KOSTT-it kanë bërë të ditur se projekti ka kushtuar rreth 7.8 milionë euro.

    “Dhe, efektet e tij pritet që të arrihen në ditët dhe muajt e ardhshëm.” – ka thënë Gëzim Tosuni, kryetar i Bordit të KOSTT-it.

    Edhe kryeshefi ekzekutiv i KOSTT-it, Evetar Zeqiri ka thënë se Nënstacioni Ferizaj 3 është shumë i rëndësishëm për furnizimin e qytetarëve dhe bizneseve të Ferizajit me energji elektrike.

    “Ky Nënstacion i ka pasur sfidat e veta të përfundimit, të cilat në bashkëpunim me të gjitha palët, i kemi tejkaluar.” – ka thënë Zeqiri.

    “Ky është projekt strategjik, i realizuar me përkushtim të të gjithë neve dhe shënon një periudhë të re në Komunën e Ferizajt, sepse do të mbështetë qytetarët dhe bizneset në tërësi”.

     

     

  • Kosova me ndihmën e ndërkombëtarëve synon që të investojë në izolimin e rreth 400 ndërtesave publike

    Shteti i Kosovës po synon që të investojë në izolimin e rreth 400 ndërtesave publike në gjithë Kosovën, për të rritur efiçiencën e energjsë dhe për të ulur konsumin.

    Projekti që do të kushtojë 86 milionë euro, pritet të fillojë në vitin 2025 dhe të përfundojë në vitin 2031.

    Më 17.01.2025 është nënshkruar marrëveshja në mes të Fondit të Kosovës për Efiçiencë të Energjisë (FKEE) dhe Bankës Evropiane për Rindërtim dhe Zhvillim (BERZH).

    Drejtori i Fondit për Efiçiencë, Driton Hetemi, tha se pasi që të përfundojë projekti, synohet një reduktim i rreth 75 mijë ton të emitimit të dioksidit të karbonit në vit dhe kursim të rreth 5 deri në 7 milionë eurove në vit.

    “50 milionë euro do të sigurohen nga Qeveria e Kosovës përmes një kredie nga BERZH-i; 12.6 milionë euro si bashkëfinancim nga Qeveria e Kosovës; 20 milionë euro të cilat sigurohen nga burime të ndryshme si 7 milionë euro grant nga BE: 3 milionë euro sigurohen nga Fondi Danez për Kosovën; 10 milionë euro do të sigurohen më tutje në pjesën e dytë të programit si grant; dhe 3.4 milionë euro të mbetura të siguruara nga BERZH dhe donatorë të tjerë të dedikuara për asistencë teknike, njësi implementuese dhe studim fizibilitetit” – tha Hetemi më 17.01.2025.

    Ndërsa drejtori i BERZH-it për Kosovë, Sergiy Maslichenko, tha se përmes këtij projekti do të renovohen 1/5-ta e gjitha ndërtesave publike në Kosovë.

    “Ky projekt, siç u përmend, është mbështetje e vërtetë për modernizimin e 400 ndërtesave publike. Është sasi shumë e madhe, nëse e shikoni, llogaritet që në Kosovë ka rreth 2 mijë ndërtesa publike, pra rreth 1/5-ta e gjithë ndërtesave do të renovohen me anë të këtij porgrami” – tha Maslichenko.

    E ministrja e Ekonomisë, Artane Rizvanolli, tha se Kosova sot konsumon katër herë më shumë energji për njësi, në krahasim me mesataren e Bashkimit Evropian.

    “Në kuadër të këtij konsumi enorm, stoku i ndërtesave konsumon mbi 40% të totalit të energjisë që konsumohet në vend. Pra kjo e vë në prespektivë se sa e rëndësishme është që ndërtesat tona të jenë të izoluara mirë dhe të kenë masa të efiçiencës, në mënyrë që konsumi i gjithëmbarshëm në vend të ulet dhe ta lehtësojë edhe sistemin tonë elektro-energjetik, mirëpo edhe koston e financimit të këtij konsumi” – tha ministrja Rizvanolli.

    Kurse Hekuran Murati, ministër i Financave, deklaroi se iniciativa të ngjashme Qeveria e Kosovës ka pasur edhe në të kaluarën me komunat si ajo e Prishtinës apo e Prizrenit.

    “Vlen të theksojmë që projekti i sotëm është vetëm pra vetëm një pjesë, apo një fragment i punës disavjeçare të Qeverisë së Kosovës në këtë drejtim. Iniciativa të ngjashme kemi nënshkruar në të kaluarën, nëse iu kujtohet edhe me Komunën e Prishtinës apo edhe Komunën e Prizrenit, pra ku ngjashëm është paraparë investimi në renovimin dhe rritjen e efiçienvës në ndërtesat publike të këtyre komunave, total vlera ka qenë rreth 12 milionë euro” – tha ministri Murati më 17.01.2025.

  • KRU “Mitrovica” nënshkruan marrëveshje për shërbim, inkasim dhe faturim me 4 komunat e veriut

    Faturat e ujit të banorëve të komunave Mitrovicë e Veriut, Zveçan, Zubin Potok e Leposaviq do të inkasohen dhe faturohen nga Kompania Rajonale Ujësjellësi “Mitrovica”.

    Kështu parasheh marrëveshja e nënshkruar mes KRU “Mitrovica” dhe kryetarëve të katër komunave veriore më 16.01.2025.

    Të pranishëm në ceremoni ishin ministrja e Tregtisë dhe Ndërmarrësisë, Artane Rizvanolli, zëvendësministri Getoar Mjeku, kryeshefi ekzekutiv i kompanisë KRU “Mitrovica”, Bashkim Kurti, dhe kryetarët e katër komunave.

    Ministrja Rizvanolli tha se kjo marrëveshje është një hap i rëndësishëm për përmirësimin e furnizimit me ujë për qytetarët e këtyre komunave.

    “Deri më sot KRU “Mitrovica” ka qenë e kufizuar në tre rajone, Mitrovicë, Vushtrri, Skenderaj. Nga sot kjo po ndryshon duke lidhur marrëveshje me katër komuna. Çështja e mospagesës në veri është diçka që e ka rënduar KRU Mitrovicën ndër vite. Ftoj komunat dhe ndërmarrjen të bashkëpunojnë ngushtë sepse do të jetë një proces kompleks i identifikimit të pranimit teknik ”- tha Rizvanolli.

    Ndërsa kryeshefi i Ujësjellësit bëri të ditur se këto komuna do të marrin shërbime nga KRU “Mitrovica”. Gjithashtu, sipas tij, do të bëhet edhe inkasimi e faturimi.

    “Nga sot do të marrim në shërbim katër komunat veriore. Do të bëhet evindentimi i konsumatorëve, vendosja e ujëmatësve si dhe faturimi e inkasimi. Për këtë periudhë transitore, e kemi caktuar një afat kohor, datën 31.12.2025. Duhet të gjejmë zgjidhje edhe për organin paralel”- tha Kurti.

    Nënshkruhet marrëveshja mes KRU “Mitrovica” dhe katër komunave veriore, 16.01.2025,
    Foto: Florinda Kelmendi/ KALLXO.com
    Nënshkruhet marrëveshja mes KRU “Mitrovica” dhe katër komunave veriore, 16.01.2025,
    Foto: Florinda Kelmendi/ KALLXO.com
    Nënshkruhet marrëveshja mes KRU “Mitrovica” dhe katër komunave veriore, 16.01.2025,
    Foto: Florinda Kelmendi/ KALLXO.com
    Nënshkruhet marrëveshja mes KRU “Mitrovica” dhe katër komunave veriore, 16.01.2025,
    Foto: Florinda Kelmendi/ KALLXO.com
    Nënshkruhet marrëveshja mes KRU “Mitrovica” dhe katër komunave veriore, 16.01.2025,
    Foto: Florinda Kelmendi/ KALLXO.com

    Në dhjetor të vitit të kaluar, kryetari i Mitrovicës së Veriut, Erden Atiq, ka thënë se ujësjellësi në këtë komunë funksionon ende me sistem paralel.

    Gjatë debatit në “Jeta në Komunë”, Atiq tha se ujësjellësi ende menaxhohet nga ndërmarrja “Vodovod” i Serbisë.

    “Ujësjellësi i Komunës së Veriut ende është me sistem paralel, nuk është hy në sistem të Kosovës. Normal mu më kish konvenu me marr prej ditës së parë nën kontroll, nën udhëheqje mirëpo për shkak të gjendjes politike jena ku jena. As nuk paguhet uji e as nuk e kemi në menaxhim ndërmarrjen. Ndërmarrja që e menaxhon ujësjellësin quhet “Vodovod”- kishte thënë kryetari.

    https://kallxo.com/kallxopernime/ujesjellesi-ne-mitrovicen-e-veriut-ende-nen-menaxhimin-e-ndermarrjes-serbe/

     

  • Pak para nisjes së fushatës, Kurti shpërndau kartelat punonjësve të rinj në KEK

    Korporata Energjetike e Kosovës pranoi 220 punëtorë të rinj më 06.01.2025.

    Në ditën e pranimit të tyre në punë, kryeministri i Kosovës Albin Kurti disa prej tyre jua shpërndau kartelat e punës.

    Kurti mori pjesë në këtë ceremoni pak ditë para fillimit të fushatës zgjedhore e cila fillon më 11.01.2025 për zgjedhjet për Kuvendin e Kosovës të datës 09.02.2025.

    Për këtë ceremoni të shpërndarjes së kartelave të punonjësve dhe kontratave të punës për ta, nuk pati njoftim për media.

    Në hyrje të Termocentralit Kosova B, ekipit të KALLXO.com fillimisht iu pamundësua hyrja.

    “Ai që iu ka thanë me hi, e thirrni në telefon, vjen ai iu merr. Se pa leje s’guxojmë”– është fjalia e punëtorit të sigurimit në hyrje të këtij Termocentrali.

    Pas disa përpjekjeve, ekipi hyri në objektin në të cilin u mbajt ceremonia, kjo në brendësi të hapësirës së Termocentralit.

    Në ceremoni përveç kryeministrit, mori pjesë edhe ministrja e Ekonomisë, Artane Rizvanolli dhe U.D kryeshefi ekzekutiv i KEK-ut, Bekir Gërguri, si dhe kryesuesi i Bordit të KEK-ut, Valdrin Krasniqi.

    Pas fjalëve hyrëse, kryeministri dhe ministrja Rizvanolli shpërndanë kartelat për disa punonjës.

    Kur kryeministri, pas ceremonisë u pyet se a lidhet ky aktivitet me fushë zgjedhore dhe për të marrë vota nga punonjësit e rinj, ai pati një përgjigje jodirekte.

    “Kjo është në funksion të mihjes, prodhimit të qymyrit”– është përgjigja e kryeministrit.

    Edhe pse përsëri u pyet se a është ky aktivitet edhe në kuadër të fushatës zgjedhore, kryeministri nuk ktheu përgjigje.

    220 punëtorët e rinj do të punojnë në Divizionin e Qymyrit në KEK

    Gjatë dy viteve të fundit, në KEK janë pranuar 525 punëtorë.