Ballina

Etiketë: Arrestimi

  • Prizren, policia arreston një burrë për dhunë në familje

    Policia e Kosovës ka arrestuar një person për dhunë në familje, të premten më 10.01.2025.

    Sipas njoftimit, të njëjtit i është konfiskuar edhe një revole.

    “Pas raportimit se i dyshuari mashkull  kosovar (bashkëshorti) ka ushtruar dhunë psikike dhe fizike ndaj viktimës femër kosovare (bashkëshortes). Viktima ka pranuar tretman mjekësor ndërsa nga i dyshuari është konfiskuar një pistoletë me 24 copë fishekë  për të cilën kishte leje. Palët janë intervistuar dhe me vendim të prokurorit  i dyshuari është arrestuar dhe dërguar në mbajtje  për 48 orë” – thuhet në njoftim.

  • Vjedhja në terminal doganor në Han të Elezit, arrestohen tre të dyshuar

    Policia ka bërë të ditur se ka arrestuar tre persona të dyshuar për vjedhje të rëndë në Han të Elezit.

    Personat e arrestuar A.R. (42-vjeç), R.R. (27) dhe I.L. (38) dyshohet se më  25.11.2024 kishin depërtuar me forcë në njërin nga objektet e terminalit doganor, duke vjedhur pjesë metalike me përmbajtje bakri.

    “Pas një pune intensive hetimore, sot, më datë 09.01.2025, policia ka arritur të identifikojë dhe të arrestojë tre persona të dyshuar për këtë vepër penale”- thuhet në njoftimin e Policisë.

    Sipas njoftimit, me vendim të prokurorit të arrestuarit janë ndaluar për 48 orë.

    Ndërkohë, personi N.L. i dyshuar për veprën penale – blerja, pranimi ose fshehja e sendeve të përfituara me kryerjen e veprës penale është liruar dhe do të ndiqet në procedurë të rregullt.

  • Policia kryen tri operacione në Prishtinë, arreston tre persona

    Policia e Kosovës më 08.01.2025 në Prishtinë ka kryer tri operacione në tri lokacione të ndryshme me ç‘rast janë arrestuar tre persona të kërkuar me urdhër-arreste aktive për vepra të rënda penale.

    Policia gjithashtu ka dhënë detaje së në cilat vende janë realizuar këto operacione.

    Policia ka njoftuar së operacioni i parë është zhvilluar rreth orës 11:00 në rrugën “Rexhep Luci“ në Prishtinë, me ç’ rast njësitet policore pasi lokalizuan të dyshuarin i cili ishte i dënuar me shtatë muaj burg efektiv për veprën penale – lëndim i lehtë trupor, reaguan me shpejtësi duke  e arrestuar.

    “Operacioni i parë u zhvillua rreth orës 11:00, në rrugën “Rexhep Luci“ në Prishtinë, me ç’ rast njësitet policore pasi lokalizuan të dyshuarin i cili ishte i dënuar me shtatë muaj burg efektiv për veprën penale “Lëndim i lehtë trupor“ reaguan me shpejtësi duke arrestuar të njëjtin” – thuhet në njoftimin e Policisë së Kosovës.

    Operacioni i radhës nga Policia u realizua rreth orës 14:00 në rrugën “Xheladin Hana“ në Prishtinë, me ç’rast pas marrjes së informacioneve në rrugë operative, zyrtarët policorë arritën të lokalizojnë dhe të kapin të dyshuarën e dënuar me tetë vite burgim efektiv për veprat penale – shpërlarja e parave, si dhe – financimi i terrorizmit.

    Ndërsa, operacioni i tretë është realizuar rreth orës 15:00 në rrugën “Nazim Gafurri” në Prishtinë dhe në këtë lokacion Policia arrestoi  të dyshuarin i cili ishte i dënuar me 3 vite burg efektiv për veprën penale – mashtrimi.

    Të arrestuarit në përputhje me vendimet e Gjykatës u transferuan në qendrat përkatëse për vuajtjen e dënimit.

  • Presidenti jugkorean përballet me përpjekjen e dytë për arrestim në Rezidencën e fortifikuar

    Presidenti i Koresë Jugore, Yoon Suk Yeol përballet me një përpjekje të re dhe potencialisht më të vendosur për arrestimin e tij për kryengritje pasi një top hetues është zotuar se do të bëjë çmos që ta thyejë bllokadën e sigurisë dhe ta arrestojë liderin e shkarkuar – ka raportuar Agjencia e lajmeve Reuters.

    Presidenti në detyrë, Choi San-mok u ka bërë thirrje autoriteteve të mërkurën, më 08.01.2025, që të bëjnë “më të mirën e tyre për të parandaluar çfarëdo lëndimesh ndaj qytetarëve ose të konfliktit fizik ndërmjet agjencive qeveritare”, derisa do të zbatojnë urdhrin për arrestimin e Yoonit.

    Protestuesit që mbështesin dhe kundërshtojnë Yoonin e sfiduar kanë qëndruar në temperatura të acarta në tubime në rrugë përreth Rezidencës presidenciale të mërkurën, pasi një Gjykatë ka lëshuar edhe një herë fletarrestimin të martën kundër tij.

    Shërbimi Presidencial i Sigurisë (PSS) ka fortifikuar Rezidencën gjatë javës me tela gjemborë dhe me autobusë të përdorur si barrikada për të bllokuar qasjen në Rezidencë – një vilë e cila ndodhet në një kodër në distriktin e njohur si “Beverly Hillsi” i Koresë Jugore.

    Yooni po hetohet për kryengritje për shkak të përpjekjes së tij të dështuar për të shpallur gjendje të jashtëzakonshme dhe për të nxjerrë Ushtrinë në rrugë më 3 dhjetor – një Vendim që kishte tronditur Korenë Jugore dhe që shkaktoi lëshimin e fletarrestimit të parë për arrestimin e Presidentit.

    Ai po përballet edhe me gjykim për shkarkim në Gjykatën Kushtetuese.

    Njëri prej avokatëve të Yoonit ka thënë se Presidenti nuk do të pranojë ekzekutimin e fletarrestimit, për shkak se është lëshuar nga një Gjykatë që nuk e ka këtë juridiksion dhe se ekipi hetues i formuar për hetimin e liderit në detyrë nuk kishte mandat për këtë punë.

    Përgatiti: Rexhep Maloku – Kallxo.com